|
لا استطيع مسامحة زوجي العزيز..
السلام عليكم ورحمة الله وبركاته ،،
هذه اول مشاركة لي في هذا المنتدى لما قريت فيه من الاراء السديده والوقفه الصادقه من الاخوان والاخوات ومالجأت له الا بعد ان اثقلتني الهموم .. اسمحولي بكتب بلهجتنا لاني ابي افضفص واسرد وسامحوني على الاطاله .. انا متزوجة حديثاً سنة أولى زواج .. تزوجت بعد رحلة طويله كنت انخطب من عمري 17 وما تزوجت الا وعمري 29 (الحمدلله) . سنين طويلة تراكمت علي مواقف واحداث وتجارب شفت وسمعت وانحطيت بمواقف وتقدمو لخطبتي كثير كثير لدرجة مااتذكر كثير منهم 50 60 ماادري وبدون مبالغة . وعلشان تكون الصورة واضحة انا البنت الوحيدة بين اخواني وكان لي نصيب كبير من الدلع والحب، وكانو معظم صديقاتي اللي بعمري تزوجو وماحبيت اكون مزعجه فبتعدت عنهم قليلا وكانت لي صديقات كثير مع بنات قريباتي بس كانو يكبروني بسنين فكنت انصدم واتأثر من مشاكلهم الزوجية وكنت اقرا كثير بالمنتديات لحد ماحسيت انه عيني تفتحت على مشاكل وقصص لسا بدري عليها . أما معاناتي بدت من اول ما العمر صار يمر ومالقيت الشريك اللي يناسبني من بين كل اللي يخطبوني بدا ينزرع بداخلي احساس النقص والالم مو لانه ناقصني شى الحمد لله عندي اشياء كثيره احمد ربي عليها ليل نهار بس النصيب . اول ما خلصت دراستي الجامعيه .. وبديت رحلة العمل خطبني واحد من اللي كانو يعملون معاي ، بعد تفكير قلت بالعقل يناسبني وبعد ماقررت اني اوافق الرجال كلم بيتنا يلغي الخطبه ليه اخته الكبيره ماتبيني . زعلت طبعا وتأثرت كثير بس قلت الحمدلله . وبعد سنتين خطبني شخص بعد كنت افكر جديا اوافقه عليه لكنه تعذر بمشاكل وانه عمله اتهموه بقضيه .. زعلت بعدها اكيد لانه كل مره يخطبوني ارفض واذا افكر جديا اوافق مايصير النصيب وقلنا مره ثانيه الحمدلله . وبدا يصيدني خوف من الزواج وصرت بعدها ارفض كثير . وبعدها بفترة خطبني شخص وكان اول انسان اوافق عليه ويجون اهله ونتفق على كل شى هالانسان انا اعجبت فيه المهم واحنا نرتب لعقد القران بديت الاحظ عليه تصرفات غريبه غموض و24ساعة مشغول كنت ابدا مااشك فيه ولا اراقبه او اتابع اي شئ يخصه مثل ايميلات فيس بوك ...الخ وقبل مانكتب الكتاب اعترف لي انه يشك فيني ومايقدر يواصل ماادري اصلا على اي اساس انزرع هالشك .. وتركني بدون اي تعليق وبدون اي كلمه من اهله لاهلي .. انا وقتها تعبت تماما كل موازين حياتي اختلت ظليت تعبانه سنة ونص تقريبا ورافضه نهائي اي شخص يخطبني أرفض تماما اي شخص بدون مااعرف حتى مواصفاته ..لحد ماعرفت بالصدفه انه كان يخون اللي بينا وكان يكلم بنات كثير وطبيعي اللي يلعب مايقدر يثق حتى في الانسانه اللي راح تكون زوجته. وبعد مارجعت أمل القوية الصابره ووافقت اقابل مقابله زواج للاسف هالشخص كان مطلق دخلت قلبه وظل يحوم وكل يومين اهله يتصلون تعلقه الشديد فيني خلاني غصب افكر اوافق لكن طليقته اتصلت لابوي تهدد وتتعود وابوي اساسا كان رافضه وخبرت اهلي يخبرونه انه كويس ولو ماكان مطلق كنت بوافق عليه بدون تردد لكن يرجع زوجته ويظل مع عياله احسن من ندخل بمشاكل .. والان هو رجع زوجته . وبعد ماانهيت هالموضوع بشهر شهرين خطبني زوجي وتزوجنا كل شى صار بسرعه وحلو ومرتب .. اعترف اني وافقت عليه بعقلي بس وكنت متردده لان زوجي يكبرني ب8 سنوات وكان مطلق من غير اطفال اما غير كذا فهو انسان كامل والكمال لله ادب واخلاق وذوق محافظ على دينه وصله رحمه ووسيم ومركز مرموق وظيفه ممتازة . فقلت الحمدلله ربي عوضني خير وتزوجنا .. بعد الزواج بديت اكتشف اشياء غريبه منه دايما مشغول اما بالعمل اما مسافر للعمل واذا جلس بالبيت 24 ساعه لاب توب والايباد و مشترك في كل هالبرامج توتير وفيس بوك وتانقو وسكايب و...الخ و يظل على الجوال والانترنت بالساعات . قلت ماعليه يابنت الناس هذا عمله ومع اني كنت احس بشى غريب وغموض بس قلت كل شى راح يبين مع الوقت .. بعدين بدا يعاملني باسلوب يستصغرني فيه وانا مسئوله بعملي والكل يحترمني يحسسني اني مااعرف اسوي شى حتى بالطبخ يجي يحط ايده قلت يلا يمكن يحبني ويحب يشاركني .. مع انه هالتصرفات تخلي الانسان يبدا يفقد ثقته بنفسه وقراراته يعاملني مرات كأني امه حتى لو اطلع من البيت مايروح مكان وينتظرني ومرات كأني بنته الصغيره اللي ماتعرف تسوي شى بدونه حتى علاقاتي الاجتماعية وزيارات اهلي بدت تقل لان من اروح احس بالذنب اما يكون راجع من سفر والا توه داخل البيت متاخر وكيف اسيبه واخرج .و تحملت كثير منه شفت ملابس طليقته واشيائهم الخاصه ورسائل حب وغرام قديمه قال ايش نسى يرميها . وبعد 4 شهور من الزواج وماصار الحمل راجعنا طلعت سليمه وهو عنده مشكله صغيره قلنا بنستغل الوقت بما انه اعمارنا مو صغيره وعملنا تلقيح صناعي .. كنت اروح اراجع واخذ ابر وانا مبسوطه واقول وش بجازيني فيه حبيبي لما اجيب له الولد ومرات كان يجي على حسب ظروف عمله طبعا الابر والحبوب اثرت على نفسيتي كثير صرت حساسه وزعوله . لكن زوجي ماقدر شى . وفي الليله اللي كان لازم اقضيها بالدعاء لان الصبح بنروح للعمليه وكانت اول ليله بنام فيها في شقتنا الجديده ونجهز ونرتب جه زوجي مع العمال بركبون شغله وعطاني جواله اخليه على الشاحن وقفل الباب علي وراح للعمال. وانا بركب الشاحن لفت نظري مسج وصل انا ماعمري سويتها لكن غصب عني فتحت المحادثات وياريت الارض انشقت وابلعتني والا ياريتني انعميت ولا انحطيت بهالموقف . زوجي اللي كنت اشوفه شخص كبير وربي احترمه واخاف منه واعتبر له مكانه كبيره يكلم بنات وحده متزوجه تقوله حامل بس الحمد لله مو منك واغار عليك من كل شى بس شكلها ماتعرفه شخصيا لان كان في البلاك بيري ماسنجر وتكلمه باسمه المستعار وثانيه تقول اشدعوه ماتسأل ولا كأنا بيوم حبينا وثالثه تقوله متى راح تجي دبي خل نتقابل هاذي شكلها كانت معه بكورس قال لها بشوف مع المدام .والطامه الاكبر والاكبر وحده يحبها ويتكلم معها عني تسأله وش اسم زوجتك قالها اسم الدلع اللي يناديني فيه وتسأله ماوحشتك وهات يازوجي كلام كله جنس وقرف وتقله وشو زوجتك ماتكفيك رد عليها زوجتي شى وانتي الحب وعطته اسم معرفها في الانستقرام وتقوله شوف صوري رد عليها ارسليهم لي على طول على الواتس و ويردد لها الف مره انه يبيها كلام كثير قلبي ينعصر لما اتذكره . انا وربي انهرت اسودت الدنيا في عيني قفلت وفتحت المحادثه الف مره مو مستوعبه لدرجه ماكملت الباقي ولا شفت المكالمات ناديت عليه ورويته لاول مره اشوفه كذا وين الغرور والجبروت اللي يكلمني فيه لاشعوريا عطيته كف وقلت له كلام جارح كثير واخذت الجوال عندي وسجلت ارقامها كانت ليله قاسيه علي قفلت الباب علي وظل عند الباب ترك العمال ماوصلهم قال لهم راحو لحالكم وظل ينادي وينادي لحد مادخل علي من فتحت نافذه الحمام راح على السطوح وحاله ودخل تكلمنا كثير كثير ولانمت ولانام ظل جالس جنبي والصبح رحت سويت العمليه وانا ادعي ماتنجح وفعلا نسبه نجاحها كانت 98% بس ماصار والدكتوره قالت بسبب النفسيه لدرجه وصفت لي مهدأ. بكى اعتذر حلف على القران مسح كل شى من جواله .. وعمل لرقم البنت حظر .( واكتشفت انه هالبنت يعرفها من سنين ويحبها بس مايقدر يتزوجها لانها مريضه ومااستبعد انها كانت سبب طلاقه من زوجته الاولى) ماكنت اتخيل زوجي على شخصيته القوية ينهار ويبكي بالم وهو اللي روحه بعمله ترك عمله وجلس معي كم يوم وكان جواله معي حتى ماسأل عنه .. سامحته وقتها بس كلام وظل داخلي محروق .. اليوم انا بنت ثانيه عروس بأول زواجها تشوف زوجها يخونها حتى مارحمني وانا اخذ الحبوب والابر واسعى اجيب له ولد ولابين في عينه وش السبب يا زوجي قال انتي قاسيه معاي وفي بدايه زواجنا صار خلاف وقلتيلي طلقني .. كل هالحنان والحب وقاسيه وان قلت طلقني كنت ابي اشوف غلاتي في بنت تتزوج علشان تتطلق وهل هالشى يعطيك الحق تخون .قال انا كنت احاسب نفسي وابي اتركها بس انت سبقتيني قلت له لان ربي يحبني . اليوم انا من كثر مااحبه تعز علي نفسي ليه سوى فيني كذا كرهت كل شى وماصرت احس بطعم الفرح والضحك 24 ساعه قلقانه ان شفته متصل بالانترنت قلت يكلم وان كان مشغول قلت يكلمها جوال انا معي المعده من اتالم وازعل صرت كله مريضه البس واكشخ بس كذا ديكور عملي كله اخطاء وبعد حصلت ترقيه لكن ماحسيت حتى بالفرح وعلاقاتي مع الناس مو قادره اجلس بينهم اضحك وابتسم وانا داخلي يتالم ودي اقول لاي شخص تحبني انت تقدر تحس فيني . طبعا انا خبرت امي وابوي بس ماكلموه وهو يظن انه محد يعرف غيرنا وكلمت شيخ دين واستشاري اسره كلهم قالو عطيه وعطي نفسك فرصه .. بس انا عايشه في قلق وخوف وشكوك وساوس وافكار تعبت من الدموع لا انام كويس ولا احس حتى بطعم الاكل . هو احاول ماابين له بس هو حاس فيني وتجيني حاله من وقت للثاني واتهاوش معه وابكي واقوله انه خاين والجرح مااقدر انساه . وقتها يعصب ويصير قاسي وجاف بس غصب عني احساسي يقول انه لسا يكلمها ويكلم غيرها وهو يحلف مافي شى . ماادري شنو اسوي احس بصير مجنونه .. كيف اجيب ولد وهذا ابوه بنشغل معاه وبروح يلعب من وراي .مو قادره اتحمل اكثر لدرجه فكرت اطلب الطلاق لكن اذا افكر صح احس الطلاق مو حل ولازم احافظ على بيتي وبنفس الوقت مو قادره احسه بس يكذب ويمثل مع انه يحاول يهديني ويعطيني الحب والحنان ولما يشوفني هاديه يطير من الفرحه ومايعرف وش يسوي علشاني .. لكن داخلي يتالم ويبكي حتى ملامحي احسها تغيرت .. ابي اتغير ابي اعطيه واعطي نفسي فرصه مو قادره .. اسففففه طولت كثير بس ارجوكم اواقفو معي اخاف يطفش مني ويتركني وانا احبه مااتخيل حياتي بدونه . |
رد : لا استطيع مسامحة زوجي العزيز..
وعليكم السلام ورحمة الله وبركاته
كان الرحمن في عونج حبيبتي..اللي صار لج جداً مؤلم واضح من كلماتج إنج انسانه واعيه وصبوره ماشاءالله..زوجج أتوقع هذا طبعه من المراهقه وصعب يتغير مابين وليله..انتي اشترطي عليه إنه يغير رقم الموبايل..ويتخلص من كل شي قديم عنده علشان تثقين فيه من جديد..لازم يغيره والانستجرام والكِك يسوي عليه ديليت نهائياً وأكثري من اللجوء إلى لله تعالى..بعمل النوافل وكل شيء يحبه الله..وتذكري أن الله دائما معاج ربي يهديه ويصلحه ويغير حالكم إلى أحسن حال |
رد : لا استطيع مسامحة زوجي العزيز..
عزيزتي ..
قلبي معكِ امنحيه فرصة أخرى دوسي عالألم الذي تعيشينه الآن هي آلام مؤقتة لكن إن أعطيتها فرصة بعقلك ستكبر وتضخم لا تذكريه بالذي مضى .. كوني واعية .. وربي يسعدك ويفرج امرك |
رد : لا استطيع مسامحة زوجي العزيز..
حبيبتي امل اقترح عليك ان تطلبي منه ان يعلن توبته الخالصة الى الله امامك وقولي له سانسى كل ما جرى وسافتح صفحة جديدة مع هذا الانسان الجديد التائب
حبيبتي اعطيه فرصة ليكون انسان ثاني جدير بالثقة والامان ... واعطي لنفسك فرصة لتعيشي السعادة الزوجية بعيد عن منغصات الشك والحيرة تكلمي معه كلام جاد وضعا نقطة نهاية لما مضى وابداا حياة جديدة وتقربي من الله اكثر واكثر واكثر ستشعرين براحة وطمئنينة وسكينة ليس لها اي مثيل سارعي حبيبتي وابداا من جديد حياة جديدة وسعيدة ان شاء الله |
رد : لا استطيع مسامحة زوجي العزيز..
حبيبتي امل يعني انتي مو معقوله صراحه شخص عاشرتيه اربعه شهور وبنيتي عليه امال للسماء
انا جلست سنه كامله موعارفه اكمل مع زوجي ولا لا واحط ميه فكره براسي هل ينفع يكون اب اطفالي ولا لا وانتي رغم اللي اكتشفتيه وشفتيه من بكره رحتي تسوي العمليه!!!!!!! والله عجيب امرك شوفي مافي انسان معصوم عن الخطاء وبذات انتي تاركه الحبل على الغالب سامحه له يكون عنده كل برامج التواصل وتاركته على راحته يتصفح لا حبيبتي هذا زوجك خشي في عينه واجلسي جنبه ماعليكي منه خلاص زمن الفلته ولى وانتهى هذولي الرجال لازم تخنقينهم اول شي خطوه خطوه من ناحية التلقيح واطفال الانابيب والهرمونات لا تعملين ولاشي انتي مو كبيره انتي لسا صغيره والعيب منه مو منك هو يتعالج وياخذ هرمونات لا تعرضين نفسك لاي ضغوطات نفسيه وعصبيه ثاني شي امسحي كل برامج التواصل من جواله ولاتسمحين له يرجعها اشرطي عليه اذا كان يبغا كل شي يرجع زي زمان الصلاه في المسجد وكل يوم تقرين انتي وزوجك سورة من القران قبل النوم ذكريه بالاذكار واستودعيه ربك وقوي علاقتك بربك وربي بأذن الله بيوفقك بزواجك ويسخر لك زوجك ولاتستعجلين على الحمل انتم لسا عرسان احتوي زوجك وحبيه وحضنيه وخليه جنبك ودلعيه ودلعي نفسك عيشي ايامك حبيبتي لاحقه على الحمل والهم والله الحمل متعب رهيب ياشيخه وعلى فكره لا تتوقعين من زوجك انه راح يفرح عشان جبتي له الولد ولا تتوقعين اهتمام زياده اذا تبغين تحملين لازم يكون عشانك انتي مو عشان احد ثاني حبي نفسك عشان زوجك يحبك عندي كلام كثير بس ابغاك تعرفين انه زوجك مو ملاك ولا تحاسبينه على اساس انه ملاك وبالتوفيق حبيبتي والله يسخر لك زوجك ويبعد عنكم شياطين الانس والجن |
رد : لا استطيع مسامحة زوجي العزيز..
الله غفور رحيم بعباده رغم سيئاتهم وذنوبهم وأخطائهم
أليس من اﻷولى نحن البشر أن نسامح بعضنا البعض؟ طالما زوجك أظهر الندم ولم يكابر ولم يعاند ولم يقلب الطاولة عليك ،، هذا الزوج إن شاء الله فيه خير كثير. تقربي إلى الله بالطاعات وتجنبي المعاصي،،وقربي زوجك من ربه،،واخلقي جو ايماني وروحاني في بيتكما والسيارة وكل مكان يجمعكما ،،فاﻹنسان كلما كان قريبا من ربه يزداد الخوف وتقوى الله في قلبه.. |
رد : لا استطيع مسامحة زوجي العزيز..
ياحبيبتي الله يفرج همك يارب
ماحبيت اخرج من الموضوع بدون ما ادعيلك |
رد : لا استطيع مسامحة زوجي العزيز..
شيء جميل في زوجك أنه ماكابر ولاعاند وحرص عليك ..
إذن هو راغبك وشاريك ... أختي حاولي بأسلوبك يكون مكشوف أمامك يعني ارقام سرية من هنا ورايح مافيه اذا ارتحتي له من هالناحية وتعهّد لك ... فـ كما قيل : كوني له أمةً يكن لك عبدا ... لاأقصد أنه خياناته بسببك لأ .. وإن كنت لا أبعدها كأحد الاسباب... لكن أنتي الان بمشكلة وتريدين أن تأخذي بيده إلى الأفضل ... فكوني أنتي الأفضل قبل أن يكون ... عيشي حياتك من جديد ... إصنعي زواجك مجدداً ... فلا يسمع منك الا طيب وان سمع الطيب فلتبحثي عن الاطيب... ولا يرى منك إلا مايقر عينه ... أبهريه وأدهشيه ... بادريه بالهدايا وباغتيه بالاناقة ... مادمت موظفة فأنتي قادرة على سفر مكفول محفول كما يقال ... أنتما تحبان بعضكما حبا جما جما ... فـ هذا ما اتضح بصريح كلامك ... وبردة فعله معك ... الان المطلوب ثلاثة أمور / تجدد منكما ومنك خاصة لأنك أنتي اللي أمامنا الان ... فأقول لك استعيني بالله ... وليكن اهتمامك متجدد ومضاعف ... لن تملكيه وتقيّديه .. لكن تستطيعين إغراقه وإحاطته بك فلا يتنفس الا بك ومن خلالك ... مثلا إياكِ أن تمضي ساعات دون سؤال أو إرسال .. ليس شرطا : أين أنت وماذا تفعل ..؟ وإنما محادثة لطيفة ظريفة ... مثلا لديه شغل خارج البيت .. لماذا لاترافقيه وتكون شغله بوناسة ! بل لدية دورة تحتاج سفر ... مالذي يمنع من مصاحبته ! وإن كنتي موظفة فمالذي يمنع من تقديم إجازة ! وهكذا ... الامر الثاني : هو .. عليكِ أن تشغليه واحذري أن يفرغ ... الفراغ مشكلة بحد ذاته .. حاولي تستوعبي بعض نواحي عمله ... وتملإي فراغه .. مثل الاوقات الفارغة خلال دوامه... أو الايام اللي مايكون فيها عمله مزدحم ... وهكذا هذا فضلا عن دفعه للأعمال الخاصة الاخرى ومتابعته ومشاركته ... الامر الثالث : تعزيز الرقيب الذاتي لديه .. خصوصا الناحية الايمانية ... فخذي بيده نحو تدينه وصلاته وأوراده ... اقتربي معه من الله ... ادعي له وهو يسمع وادعي بظهر الغيب ... وبهذا كله تكون الحياة شراكة حقيقية ... فيكون دورك مشاركة وحرص لا رقابة لأنك لن تسطيعي كما قلت لك بأول كلامي... واستودعيه بين هذا كله لخالقه والجإي إليه .. أسعدكم الله .. وبالتوفييييييق .. |
رد : لا استطيع مسامحة زوجي العزيز..
اقتباس:
|
رد : لا استطيع مسامحة زوجي العزيز..
-علقي قلبك بالله وحده دون سواه من البشر.
-اشغلي وقت فراغك بما يرجع عليك بالنفع. -عندما يأتي الشيطان ليوسوس لك تعوذي من الشيطان وانفثي على يسارك ثلاث مرات واكثري من الأستغفار. |
رد : لا استطيع مسامحة زوجي العزيز..
مرحبا بك 1 - حمل ثقيل اخرجتيه من صدرك .. تراكم ضغوط وأحباطات .. ومصاعب الحياة التى لا تعد ولا تحد .. تجعل قلب الانسان اضعف من فرخ الطائر الصغير .. 2 - اخراج الهم من النفس على الورق طريقة فعاله وعمل ايجابي .. لتخفيف النفس من مؤنته 3 - كثرة الخطاب للمرأه كثيرا ما يجعلها متردده خائفه .. والتردد يسمي في علم النفس الصراع وهو احد اسباب الامراض النفسيه والعصبيه .. فهي من السموم التى تغزو قلب الانسان وتبدد سكينته .. 4 - التشائم من الزواج .. واضح من خلال ما رقمته يداك في متصفحك فأنت تذكرين ان الخطاب كثير .. تقرئين مشاكل الزواج .. الفشل مرتين في الخطبه .. صديقاتك المتزوجات وأنت لم تتزوجين .. الخ الخ ومثل هذه الامور تجعل الانسان يعيش في دوامة القلق .. الذي اراه في ما خطه يراعك بصراحه كل حرف من حروفك قلق .. حتى انني احسست بالقلق وأنا اقراء مشكلتك من أول خطيب الى العريس والقلق لا يفارق محياك .. 5 - أختى الكريمه يقول علماء النفس ان المرض النفسي عباره عن تراكم ضغوطات وأحباطات .. حتى يصل الانسان على نقطة الصفر .. فيحدث حدث يكون هو القشه التى قصمت ظهر البعير قال الدكتور احمد راجح .. في المرض النفسي امرين (( عوامل مفجره .. عوامل ممهده )) 6 - العوامل المفجره في قضيتك .. هو عثورك على علاقات زوجك خارج مؤسسة الزواج فهذه هي القشه التى قصمت ظهر البعير العوامل الممهده هي كل الاحباطات والالم والحزن والخوف من بداية حياتك .. 7 - الاحساس بالنقص .. فقدان الثقه بالذات .. الخوف الدائم الهائم كلها تدل على المرض النفسي .. الشك هو اعظم واخطر مرض يصاب به الانسان .. ولو اصيب الانسان بكل شي اهون عليه من أن يصاب بالشك 8 - لعل درس الكف .. وصك الباب في وجهه .. والكلام الجارح له .. يكون له موعظة وذكرى .. ومن خلال سطورك اشعر ان زوجك يحبك .. ويشعر بذنبه وخطائه .. والمثل يقول (( يا ماشي بدرب الزلاق لا تأمن الطيحه )) 8 - لابد ان يغير رقم الموبايل .. ولابد من تغيير جهازه .. ولابد من كسر الشريحه الاولي ..حتى تذهب الارقام ادراج الرياح .. |
رد : لا استطيع مسامحة زوجي العزيز..
اقتباس:
الله يسلمك الف شكر على الرد يعطيك العافية ، انا بعد اللي صار شرطت عليه كم شرط ، يعني معظم البنات اللي كان يكلمهم كانو معه في مشروع كان قروب ومايعرفونه شخصياً ، شرطت عليه يمسح اي وحده يكلمها خاص ويمسح القروب وفعلا هالشى سواه ووراني محادثه مع رجال واحد فقط هو اللي بيظل يتعامل معه وكاتب له انه يبي التعامل بس يكون بينهم . وانا من فتره شيكت على البلاك بيري وكانو فعلا محذوفين . وشرطت عليه يلغي حساباته اللي مالهم داعي مثل سكايب وتانقو وحاليا مااشوفه يستخدمهم قدامي على الاقل والايباد مافتحه الا مره من صارت المشكله والمشكله صارت من 4 شهور وكان عنده 4 جوالات الغى رقمين وظل رقمه الخاص ورقم العمل . انستغرام وكيك مااشوفه يستخدمهم بالاحرى يقول ماعنده حساب فيهم . أما رقمه الخاص عجزت معاه يغيره مو راضي لان عنده يمكن من 10 سنوات مايحب يغير رقمه ابدا وزوجي بحكم طبيعه عمله وسفره مختلط مع ناس كثير . قلت له طيب غيره واللي تبيه انت اعطيه الرقم رافض ومعتبر هالشى كأني اتهمه واامره وانه بكذا يصير طرطور وماله شخصيه . شكرا مره ثانيه ودعواتكم |
رد : لا استطيع مسامحة زوجي العزيز..
اقتباس:
ادوس على الالم والله صعب وانا احس قلبي ينزف ادعي من ربي بس يعطيني الصبر ويجبر بخاطري . احاول اني مااخبره بشى ومااذكره بس تصير مواقف غصب مثلا انا حذفت ارقام البنت بيدي وبعدين اشوفه مره ثانيه محفوظ ليه خير يقول انه زمان محفوظ بأكثر من اسم كيف اصرفها.. انا اكيد بشك .. قبل يومين بس مرسلين له من تانقو حنين القلب يعني شنو هذا اكيد بنت في واحد بسمي نفسه حنين القلب ولما قلت له يقول تتوهمين وانا شايفه بعيني .. |
رد : لا استطيع مسامحة زوجي العزيز..
اقتباس:
والله اني احاول واحاول بس تعبت يوم استسلم واقول خلاص بقوله كل واحد يروح لحاله ولا ابي اتزوج ولا ابي طفل ، ويوم اقول زوجي هذا اختارني من بين كل الناس وهو صعب ومغرور ومختلط مع ناس كثير وانا كمان اخترته بعد سنين وبيتي ماراح اتنازل عنه لاي وحده ويوم اتعب جد واكرهه كل مااشوفه اتذكر وش سوى . بس بحاول وبشوف اخرتها المركب وين بترسى . |
رد : لا استطيع مسامحة زوجي العزيز..
اقتباس:
حبيبتي الف شكر على ردك يعطيك العافية ، حبيبتي انا ماعاشرته بس 4 شهور احنا كنا مملكين فترة وبعد 4 شهور من بعد الزواج قررت اسوي العمليه ، وانا زيك جلست فتره الملكه وحتى اول الزواج بس افكر ينفع اب لعيالي وانا وابوي ما وافقنا عليه بسهوله سألنا عنه كثير حتى عند اهل زوجته الاولى والكل كان يمدح فيه وفي اخلاقه ودينه وانا توكلت على الله وفوضت امري له ووافقت. وبعد العمليه بالعكس حمدت ربي انه مانجحت .. والان اكيد افكر وافكر اجيب بيبي او لا ولي فتره معطيه نفسي فرصه وهو ماخذ بخاطره ومتأثر من هالناحيه يقولي دامك تفكري انه ماتبين عيال الحين معناه انك جديا تفكرين بأمر الانفصال وانك ماتبيني. واني رحت من بكره سويت العمليه فأنا ابدا ماكنت بروح اسويها وخبرته ليلتها بس الصباح قررت ورحت لشى واحد بس صحتي انا كنت بكورس حبوب وابر واثرت علي وهرمونات تهيئة للعمليه والحين ماراح اسويها علشانه واعرض صحتي لمضاعفات ليه كنت افكر انه مايستاهل وكنت متاكده انه ماراح تنجح وان نجحت الطفل بجيبه لي انا اقل شى يسليني في هالدنيا . ومن ناحية اني تركته لحاله يتصفح مواقع النت فحطي نفسك مكاني بتدخلين على رجال مدير بعمله ومستشار الاسره حقته شخصيه قياديه وقويه مره دارس برا وفتره يعمل برا ومستقل بذاته مره وكلمته مسموعه .. تتوقعي كان بيسمع مني من البدايه والا كان بيقبل بسهوله احشر نفسي واتحكم واتشرط واعطيه الاوامر .. اكيد لا .. انا صبرت وتحملت لحد ما عرفته كويس وكان هو الاقوى دايم وبينت اني الاضعف مو لشى غير لان احساسي يقول انه في شى .. وهذا ربي كشفه وهالموضوع خلاني ماسكه عليه شى خاصه اني قلت له انه معي كل الادله .. وطبعا بحكم شخصيته واخلاقه مابيحب ينفضح ابدا . وعلى موضوع العمليه والاطفال انا قلت له ماابي الحين وهو فهمها ماابي شى يربطني فيه زياده .. وقالها وهو مكسور على راحتك خاصه بعد ماقلت له اني كنت بكورس العلاج وانت حضرتك تخون فكيف تبيني اطمن يعني هذا الجزا اللي كنت انتظره منك . قالي خلاص انتي لا تسوين شى انا بسوي وبتابع مع الطبيب قلت له بكيفك . واما على البيبي وربي قلبي يتفطر يبي طفل ودي يشغلني اقل شى اتناسى بلاوي ابوه وهم يربطنا في بعض لكن خايفه انشغل مع الولد ويلعب ابوه من وراي خايفه ماافرح حتى في ولدي . |
رد : لا استطيع مسامحة زوجي العزيز..
اقتباس:
أختي ورب من خلقني ودي اسامحه ودي اعطي نفسي واعطيه فرصه .. لكنه خطأ اكبر خطا كنت اخاف منه من قبل الزواج شى مؤلم ويجرح واحنا لسا بالبدايه واللي ذابحني انه كان يعاملني احسن معامله لدرجه كنت اقول لاهلي ربي عطاني أكثر مما كنت احلم واتمنى تخيلي انك عروسه بأول زواجها رسمت احلام وامنيات وبدت تحب زوجها لدرجه انه تسعى لطفل يجمعه فيه وتنصدم فيه انا لو ما كنت جد حبيته مازعلت كل هالزعل كنت تركته وخلاص بس لاني ابي حياتي صافيه خاليه من هالشوائب .. اكيد بتصير اخطاء وزعلات بس مو البدايه تزرع خيانه وتبيني اليوم بسهوله اغفر واسامح .. يقولي ابني حياتك واساس بيتك قلت وحده من الطوب خربانه ماعاد يوقف عدل البيت .. اصعب احساس بالدنيا انك تعيشي خايفه انك مغفله ويضحك عليك مع اللي يكلمها او انك تكوني خايفه انه صادق وانتي ظالمته . الله يكتب اللي فيه الخير ولا تنسوني من دعواتكم . |
رد : لا استطيع مسامحة زوجي العزيز..
مرحبا عزيزتي امل
سبحان الله كاني اقرا قصتي مع زوجي. نفس السيناريو صار معي وصراحه عشت الي انتي الان عايشته لكن الحمدلله من يومين بس جلست مع نفسي جلست صراحه وقلت حوكل امري لله لان مومعقوله حعيش طول عمري في هذا الصراع والي ساعدني صراحه اني عرضت مشكلتي هنا في المنتدى بعنوان كيف استعيد الثقة في قسم ساعدني والاخت نور الايمان اثلج الله قلبها وشرح صدرها ابهرتني بردها ومن جد ردها ريحني لانها خاطبتني كاخت اتطلعي على الموضوع وشوفي ردها وحتستفيدي باذن الله وهوني عليكي اختي. سبحان الله طال ما ان.زوجك يحبك ويحترمك ويقدرك وبكى علشانك ( زي مازوجي فعل بكى وحله على القران) هذا اكبر دليل على حبه وما ابرر له الي سواه بس كان تمضية وقت. وهنا نقدر ان شاء الله نشغل اوقات فراغهم او نتقرب منهم لما يكون بالهم مشغول وبالدعاء والتقرب الى الله راح تنعدل الامور باذن الله وبرضو اذكرك اتطلعي على موضوعي لانه مشابه لموضوعك تقريبا وباذن الله.تريحك الردود |
رد : لا استطيع مسامحة زوجي العزيز..
اهلا اخواني وخواتي
انا بس حبيت اضيف كم شغله علشان تكون المشكله واضحه واتمنى ماتخجلوني وتساعدوني .. زوجي انسان عانا كثير في حياته امه على كثر ماتحب عيالها لكنها ماتظهر الحب ابدا وقاسيه في تصرفاتها ، لدرجه قبل كم يوم راح رحنا نزورها راح يسلم عليها ويبي يحضنها ويبوسها ماعطته وجهه ولا حضنته تركته يبوس راسها ومشت راحت تجلس كسر خاطري مره .. وقسوتها خلت ابوه بحكم شخصيته (سي السيد) يتزوج عليها . ومن يومها الام هجرت الاب نهائي من دخلت بيتهم لي سنه ما شفت ابوه وامه حتى يتكلمون . وابوه جاب زوجته الثانيه معهم بالبيت وعايش معها بالطول والعرض والزوجه الاولى والعيال حاسين بالفرق مره واضح . لكن الان عايشين يحبون بعض الاخوان والخوات وحتى الزوجتين وعلى طول مع بعض لان خلاص كبرو بس بالبدايه اكيد كان في مشاكل . وزوجي اعتمد على نفسه ومن هو صغير ثابر وعمل بأكثر من شغله لحد ما حصل على بعثه اوربا وسافر درس وعمل هناك وبعد مارجع وحب يتزوج ويستقر .. طليقته تعرف عليها بمؤتمر .. لكن بعد الملكه ابوها خبره انها مريضه نفسيه وتتعالج عايشه حياة طبيعيه بالحبوب ومو بس هي اللي مريضه هي وامها وراثه واكثر من وحده من قريباتها وبدت رحله المشاكل قصص وافلام وربي لو احكي تقولون فلم خيالي مو حقيقه معها اعصاب وطبعا عنده الادله وهالشى اللي ساعده على الطلاق في المحكمه بسهوله .. لدرجه انها ضاربته بسكين وهذا واحد من الاشياء هو حاول وحاول بس ماقدر وتركها بعد سنه تقريبا من الزواج .وانا طبعا واحنا نسأل عنه قبل الزواج ابوي سأل كثير ومن ضمنهم أهل طليقته واحد قال لابوي هاالرجال كويس بس عانا بزواجه الاول قول لبنتك ووصيها امانه تحافظ عليه وتعوضه خير . وهالكلام انا بعد وصل لي من حريم وانا اسأل عنه وكلهم قالو عوضيه خير تراه يستاهل . وحتى وانا ارتب اغراضه لما بننقل الشقه شفت رسايل لها تعتذر منه لانها ضايقته وازعجته بس معظمها كان الورق مقطع. وانا بحكم اني تزوجته وانا خايفه اساسا ماكنت اقدر اتقبله بسهوله وافقت على اساس العقل واني شفت اني كلما اكلمه ارتاح له اكثر واحسه قريب مني وقلت اكيد مدامه عانا بحياته بحافظ علي وبعد السؤال توكلت على الله . بالبدايه ماكنت حتى اقدر ارفع عيني اشوفه مااتقبل اي شى منه بس ماحاولت اظهر هالشى .. لكن الظاهر انه وصل له هالاحساس حتى لبسه واستايل شعره ولحيته حاولت اغيرهم بس علشان اتقبله وسمع نصايحي صار شكله اصغر بواجد كل من يشوفنا يحسب الفرق بينا سنه او سنتين لانه وسيم بس كان مسوي استايل قديم مره ومكبر شكله قلت هالشى ممكن يساعدني اتقبله وشى طبيعي بالبدايه كان اي تصرف منه يزعجني بسهوله لاني اساسا ماكنت احبه .. ومره كنا مسافرين باول شهر واحنا نتسوق كلمني باسلوب يستهزا فيه على ذوقي لا شعوريا انا عصبت وقلت مو عاجبك وتتحجج فكر زين واذا ماتبي طلقني .. هنا انا حسيت انه الدنيا دارت فيه خفت عليه يجيه شى لانه ابدا ماتوقع هالكلمه مهما يكون واحد تو طالع من تجربه وبرضو راسم احلام علي وانا صدمته لدرجه ظل لحد مارجعنا مايقدر حتى يرفع عينه يشوفني . لكن تصالحنا وحاولنا نتناسا ماظنيت انه هالكلمه بتخلق حاجز بينا وبتبعده عني .. واشوي واشوي بديت اتعلق فيه كان يعاملني كويس طلعات وبحكم عمله سافرت معه كم مره ويحب اهلي ويدلعني زي ماكتبت قبل كنت اقول لاهلي ربي عطاني اكثر مما اتمنى . وبعدين بدت تصرفاته يستصغرني مرات ، اساليب يستهزا فيها ، غيووووووور مره ومعظم الاشياء ممنوعة يغار حتى لما اخرج مع صديقاتي يحاسبني حتى على صور عاديه بالواتس اب بينما البنت اللي شفته يكلمها ويازعم يحبها وحده تحط صورها بالواتس اب وكان حافظ اسمها حاف انا مدلعني والمحادثه باين انه كان توه كم يوم مكلمته لان لو كان يكلمها ظول فتره زواجنا كان اكيد مخبرها باسمي بس هالشى صار بعد 4 شهور وبرضو قايل لها اسم الدلع اللي يناديني فيه (بعدها عرفت انه تركها قبل الملكه بس) وانه اساسا هي كانت خاطبه له وحده من قرايبها بحكم انها ماتقدر تتزوجه بس ما صار نصيب. ويبيني 24 ساعه حاضره بس له ولو بيده خلاني اترك عملي .. وبديت اطوف اشوف فلانه وعلانه يرسلون تويتر وتانقو وقروبات وامشي بشوفه لحد وين بوصل .. انا كنت بس اطوف لكني فاتحه عيني كويس ومع كل هذا كان برضو حنون ويحاول .. لحد ماصار اللي صار .. من بعدها جربت اساليب كثيره .. البكي والنكد والنياح اول كم مره كان يتأثر ويبكي يقولي مااتحمل اشوفك كذا لا تسوي بنفسك كذا .. بعدين صار يعصب لانه كل مره يتذكر انه الغلطان وينحرج ويصير مره قاسي ويرمي كلام قاسي زي الله حللي 4 واذا خطأت مع البنت بصحح خطئي وانتي بكيفك وفكري زي ماتفكرين ولا تهددين وعلمي اللي تبين تعلمينه . صرت ابكي لحد ماانفجر . وجربت اسلوب الصمت والحقران واصفطه يجي كل اشوي يكلمني بابا وش فيك بابا اخاف عليك تكلمي لا تكتمين . جربت اسلوب الفضفضه ينقهر ويحاسبني على الكلمه وماينسى .. وقلت له اتركني وخل كل واحد يروح لحاله قالي انتي اهلك غصبوك واصلا ماتحبيني .. ولما لميت اغراضي بمشي قالي لو تموتين مااتركك انتي دخلتي داخلي مابطلقك ولا بخليك بيوم تتركي هالبيت . وصار مايتحمل مني اي سؤال يعتبره اتهام مااقدر اسأله عن اي شى مع انه يكون بيده يجاوب وينهي الموضوع بكل شهوله.. واصلا مايقولي الا اللي يبي يقوله .. ليه تبيني اعطيك تقرير مثلا عجزت معاه من قالك ابي واحد ماعنده شخصيه ويمشي ورا زوجته سوي اللي تبيه بس خل زوجتك بالصوره مافي فايده .. لدرجه احس مرات اني اشحت الحب والاهتمام ومااحب ارمي نفسي كل ماجيت ابي اكتب له كلمه او اسأل عنه اتذكر واقول مايستاهل .. اسلوب واحد بس يمكن يخليه هادي ويعاملني كويس اسكت عنه تماما .. لا اسأل لا انقاش لا انتقد وبس اظهر له الحب وقتها بس يكون مبسوط ويقول بس اللي يبي يقوله ويجي يتسحب تعرفين اني احبك وخلك كذا على طول والله يهديك . وانا اللي متعبني الان اني مو قادره اصدقه ابدا طيب مايكلم واتس اب او بلاك بيري وش يدريني وش يسوي من وراي اقل شى يكلم ويحذف المحادثه او جوال خاصه انه فاتورته دايم ماشاء الله ولما سألته يقول عليك كلها مو انا اسافر واحنا مكالمات دوليه .. والبنت حضرتها عندي بالواتس اب ماقد كلمتها بس مشكلتي اللي متعبتني اني دايم اشوفها متى هي وهو متصلين بالانترنت واقول يمكن يكلمون بعض هالشى ذابحني مره .. ارجع اقول زوجي مو غبي ويعرف اني اعرفها رقمها اقل شى لو بكلمها بكون من رقم ثاني او بيعطيها رقمي تسوي حظر علشان ماازعجه .. وحضرتها كاتبه لو رحت وين ماراح تلقى مثلي :( (اللهم طولك ياروح).. هو قبل شهر كذا سألته هي لسا حظر وعلى طول فتح الجوال وقالي شوفي رقمها حظر واصلا هي اكيد عرفت اني ماابي اكلمها لان بتعرف انه رقمها حظر .. وقالي ماراح احلف من جديد لاني مانقضت الحلف وانا حالف على القران وحلف انه مافي شى بينهم وقالي شوفي بابنت الناس انا ابي اكمل حياتي معك وماعندي شى وان شاء الله ماراح يصير بس ارجوك لا تدفعيني اني اخطا بيوم وجلس يضحك علي قلت له تقولي تبي تتزوج قال انا وحده ومو قادر اجيب بعد ثانيه. انا من قهري قلت له خلاص لو سمحت اذا قررت تحب والا تتزوج خبرني والا خبرني من الان علشان مااجيب طفل واتركه وعلشان انا بعد اشوف دربي قالي تبين تشوفي دربك اتركيني بالاول والا وربي اذبحك . وبس انا على هالحاله كم يوم كويسه واخذ عهد على نفسي وكم يوم ارجع اتعب واتهاوش وهو يحطني بمواقف غصب عني اشك . |
رد : لا استطيع مسامحة زوجي العزيز..
نسيت اكتب انا اذايكلمني يدلع وعمري وحياتي محادثته مع البنت كانت مافيها اي شى من هالكلام بس كلام وسخ منه ولما قلت له اللي يحب وحده جد بيتزوجها لو يعيش معاها سنه وتموت بحكم انها مريضه ولا بيكلمها بهالاسلوب الوسخ ولو اشتاق لها جد بعد زواجه بيطمن عليها وبيتمنى لها الخير وبيمشي مابكلمها بالاسلوب قال زين عرفتي انها مجرد لعبه ولو رجعت كلمت بعطيك رقم ابوها تكلمينه والا بقول لها تصرفي مع مدامتي .:29:
اصلا البنت وربي حزنتني كيف البنات يخلون روحهم في مواقف زي كذا واحد تاركك ومتزوج ويقولك زوجتي شى وانتي الحب يعني باختصار انتي لعبه .. |
رد : لا استطيع مسامحة زوجي العزيز..
يااخت امل اذا بتتقبلين نصيحتي؟
انتي اللي متعبه نفسك كتبتي في بداية موضوعك وضعك قبل الزواج وبعد ذلك وضعك مع زوجك وكيف كنتم سعداء يااختي كل ابن آدم خطاء وخير الخطائين التوابون،، زوجك اخطأ نعم لكنه ندم واعتذر فماذا تنتظرين؟ الله سبحانه وتعالي يغفر الذنوب وغفر للصحابه اشراكهم قبل الاسلام فلماذا نحن بنوا آدم نطغى ونتجبر ولانغفر !! اذا كان زوجك اخطأ فقد اعتذر وان كنتي تشكين به الان فتعوذي من الشيطان وتذكري ان له رب سيحاسبه وهو يعلم السر والجهر ولاتراقبيه تتعبي اكثر واي رجل لايسمح لامرأه ان تحاسبه على مايحمل في جواله من برامج !! زوجك يحبك وإلا لم يوافق ان تشرطي عليه بمسح برامج جواله!! مسحها لانه يحبك ويبحث عن رضاك وسيحاسبه ربه ان استغفلك فإن لم يهده الله لن تهديه لكن انتي ادعي له بالهدايه ولاتضيقي عليه بالاسئله والمحاسبه فأنت قد تنبهينه بمحاسبتك له بأشياء يغفل عنها عليك بحسن التبعل لزوجك وافتحي صفحة جديده ولاتتطرقي ابداً للمواضيع السابقه فنبشها كل مره قد يؤدي الى ان يكرهك ارجوك اتركي الافكار السيئه ومحاسبة زوجك والبحث ورائه والتنكيد عليه قبل ان يفوت الاوان ويبحث عن راحته عند غيرك فالنساء ملء البيوت الان ويعرضن انفسهن والرجل اذا عااف صعب يرجع. |
رد : لا استطيع مسامحة زوجي العزيز..
اقتباس:
قد يدفعه طول فتره التجهم والشك والتفتيش خلفه إلى تجاهلك والرجوع لما كان عليه واعلمي أن الخيانه دااااء انتزاعه ليس بالأمر السهل إن لم يرغب الزوج بذلك من نفسه ودونما ضغوط خيانة زوجك بالمكالمات والرسائل فقط دونما عشيقة حقيقية هي من اللعب والتسلية "المحرمة طبعا" ولا تضر بعلاقته بك كزوجة يكفي أن تذكريه بعاقبة ذلك وأن للذنب شؤم يلحق به واتركيه دعيه يدور في عالمك ويبتغي قربك ويعشق أرضك وسمائك بذكائك ودلالك وثقتك وحسن تبعلك ولا تدفعيه دفعا لكرهك والإبتعاد عنك واسئلي ربك دوما السداد والتوفيق |
رد : لا استطيع مسامحة زوجي العزيز..
اقتباس:
ماقدر زوجي ينكر لانه ما في مفر من الكذب كل شى كان واضح .. مع انه بعدين قالي لا تفتشين من وراي ولا تتعبثي بأشيائي ..وبعد مااعترف بخطئه قالي انا مااعتذر بسهوله ولا انكسر حتى لو كنت غلطان . اشلون كل شى يكون مكشوف وانا ثلاث ارباع اشياءه مااعرفها اعرف الظاهر بس واللي هو يبي يقوله اما بالنسبه للارقام السرية للجوال فهو يحسب اني اعرفهم وماغيرهم بعد اللي صار ويرميهم قدامي عادي . ويمكن اكون انا جزء من المشكله اكيد كل المشكله لها اسباب ومسببات بس كان يقدر يجي يصارحني يكلمني بدل ما يروح برا ويدور حد يتكلم معه . بالنسبة للحب اللي بينا فأنا احبه فعلا ولشخصه قبل مايكون زوجي وعلشان هالشى عزت علي نفسي اني احبه ويقابلني بخيانة .. وهو احسه يقوم بمسئولياته وواجباته من باب الحقوق والواجبات والشرع وفوقها يحبني لاني زوجته. أما بالنسبة اني المفروض اسأل عنه وادلعه والله العظيم اني احاول بس من داخلي مو قادره باللي سواه خلق شى صعب مو قادره اتجاوزه لاني اذا اظهر له الحب احس اني انسانه بدون كرامه وانه مايستاهل كيف يخطأ بحقي واغفر واسامح . لكني احاول مره كان عنده عمل وسافرت معه واول يوم رجعنا فيه كلمته بهدوء شكرا حبيبي وماتقصر وانبسطت ومن هالكلام .. بعدها بيومين يقولي تتوقعين اني صدقتك الكلام كان تمثيل ومن ورا قلبك حتى لما قلتي كلمه احبك لانك ماتحبيني . |
رد : لا استطيع مسامحة زوجي العزيز..
اقتباس:
اما بالنسبه للاشتراك بنادي صحي فهو برضو رافض يغار مره . قلت له طيب بدور لي شغل العصر لحد ما ترجع قال لا انتي الحين متزوجه وبكره بتصيري ام بيتك الزم فيك .. بعدين قال بخليك تشتغلي معاي في عملي الخاص .. وبعدها يقول لا اخاف تصير بينا مشاكل . متعب جد متعب .انا انسانه متعودة اكون اشوي حره بقراراتي وارائي هذا كل شى عنده ممنوع . |
رد : لا استطيع مسامحة زوجي العزيز..
يمنع فتح موضوعين بنفس المحتوى :::يغلق
|
| الساعة الآن 10:07 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©