|
متعلقات الزواج السابق كيف يمكن التخلص منها
السلام عليكم
وش سويتو بفستان تلزواج فستاني مره غالي وحلو واحترت وش اسوي فيه الصور لي كم يوم مو لاقيتها الظاهر ماما دمرتها لانها قالت كذا بتسوي وماسالت مالي خلق افتح هالموضوع ولكن عندي السي دي وش اسوي فيه هل امسحه برضو وشريط الفيديو ذكرياتي معاه ماهي كثيره هديه وحده وتخلصت ممنها ايه الملابس الباقيه الخاصه بالمتزوجات وش سويتو فيها انا كنت شاريه عطور كثيره مره وجتني هدايا فقمت وزعتها واهديت للعرايس الي بعدي مره كنت مكثره بتحهيزي ممياج وعطور وملابس الله يعوضني والخساره الماديه هل خسرتو ماديا بالزواج انا تخسرت لان الشبكه والزواج كان علي فدفعت كثير الله يعوضني الله يعين والله بغنينا من سعته وعده الحق سبحانه |
رد : وش سويتو بالصور والذكريات وفستان الزواج
الله يعوضك بخير منه زوج صالح
بالنسبة للصور احرقيها بالنسبة ماتبقى من ملابس سواء خاصة تصدقي بها لعروس محتاجة بعد ترتيبها ونظيمها وفستان الزفاف اعطيه جمعية خيرية او عروس محتاجة |
رد : وش سويتو بالصور والذكريات وفستان الزواج
اهلين متفائلة وعليكم السلام ورحمة الله وبركاته.
عشانك توك انفصلتي تفكرين بها وين انا مبطية و كل شي صرفته خرجت من بيت طليقي بﻻ امتعه تركت له كل شي بما فيه عناء التخلص منها بس اخذت قطعه خاصة باولادي كنت محتفظة بها وما يدري عنها أساساً و كان فيه دفتر اكتب فيه يوميات أطفالي و اخذته معايه اكتفيت بالذكرتين هاذي رجعت بيت اهلي و كانت غرفتي نظيفة جداً اشتريت كل شي من جديد رجعت كأني توي مولودة بينهم :23: بعد كم سنة اكتشفت انو فيه قطعه من المﻻبس عندي كانت اصلا موجودة قبل اتطلق كنت كل ما اطالع فيها اكش وﻻ عمري استخدمتها الين جا يوم و تخلصت منها. و الحمدلله الحين مافيه شي يذكرني بالماضي ابد . ياشيخه ارمي كل شي و تصدقي بكللل اغراضك نصيحه من اخت ارتاحت |
رد : وش سويتو بالصور والذكريات وفستان الزواج
تخيلي من الاشياء الي اكتشفتها معاي ملابس خاصه فيه هو وعطر تخلصت ننهم
ملابسي الخاصه شلون اتخلص منها مو معقوله اعطي عروس ثانيه ملابس مره حميميه كنت لابستها حتى لو غسلتها وهي كثبره صراحه ماني فاضيه اغسلهم كلهم يبي لها وقت ومستحيل اعطيها الشغاله تغسلها مدري محتاره بهالناحيه ام خالد صعب اتخلص من كل شي انا مجهزه كثير مره كنت متحمسه صعب ارميها اه الله يعين والله شي مؤلم وصعب |
رد : وش سويتو بالصور والذكريات وفستان الزواج
الصور الزواج كانت دائما في شنطتها .. و اخذتها و هي طالعه
معظم صورنا كنت حاطها في SD CARD . و كانت صور شهر العسل في مصر و طلاعتنا و كسرتها اول ما طلقتها اكثر شي معذبني هو الذكريات .. مو قادر اتخلص من الذكريات .. كل شي في البيت يذكريني فيها طبعا انا تكفلت بمصاريف الزواج من و الئ + شهر العسل و مشتقاته من هدايا لاهلها و صديقاتها و عماتها و تذاكر سفر الخ طبعا هل المصاريف كلها كانت من مبلغ محوشه من شان اشتري بيت و طار طبع المبلغ اللمهم الله يعوض الجميع |
رد : وش سويتو بالصور والذكريات وفستان الزواج
اقتباس:
و انا عايشة بمنطقة ثانية ف اخذ معايه اغراض كثير لاني اطول منهم . بس عادي يا حبيبتي الزبالة و انتي بكرامة تشيل كل شي ﻻ يردك اﻻ قمامة مطبخكم بالنسبة لمﻻبسك الخاصة خذي منها كل بعد فترة شوي و اغسليهم مجموعه مجموعة و أعطي صديقاتك القريبات عادي ترى او اللي تعرفين ماديتها بسيطة اعطيها مجموعه تستفيد منها انتي اذا غلفتيها بشكل مرتب خاصة اذا كانت ما اتلبست كثير يبان كأنها جديدة احتسبي الاجر وانتي تشتغلين فيها حتى الوقت اللي يروح وانتي مشغولة بها اجر اذا نويتي لوجه الله ساعات حاجات بسيطة نسويها تدخلنا الفرح بحياتنا انتي بس تلفتي حولك و دوري مين محتاج الفرح و عطيه العطاء يبهجنا أكثر من الأخذ يا متفائلة و انتي عارفه دالشي اهم حاجة تتخلصي من كل شي وﻻ تبقين شي يفكرك بالماضي بأي شكل من الأشكال الله يسعدك و يوفقك |
رد : وش سويتو بالصور والذكريات وفستان الزواج
والذكريات الي براسي
|
رد : وش سويتو بالصور والذكريات وفستان الزواج
بسيطة مسألة وقت يا متفائلة
بس صراحة انتي تبين تنسينه وﻻ ما تبين ﻻن مو معقول بتكملين سنتين و باقي تذكرينه |
رد : وش سويتو بالصور والذكريات وفستان الزواج
هو كانسان ماعاد يعني لي شي
بس مساله الزواج والاطفال تكدر خاطري انا تزوحت كبيره ورسمتها زواجة العمر والله كريم |
رد : وش سويتو بالصور والذكريات وفستان الزواج
اقتباس:
الحمد لله على قضاؤه و في كل شي خير ﻻزم نتأكد من الشي هذا. الحمد لله فرحتيني لما قلتي ماعاد يعني لك شي لان هذا اصعب شي لما تقنعين وحدة بإنسان تبيه انتي عاقله الله يحفظك تنشدين استقرار و مسؤلية و هالشي من حقك كإنسان كلنا نشبهك و مين ما يبي استقرار يا متفائلة على بالك كل الناس مرتاحه بحياتها والله مافيه كماال مريح الا ما تتكدر من هنا وﻻ هنا مدري وش اقولك ﻻنها فعلا فعلا مسألة وقت ياخيتي ذكرتيني بنفسي زمان كان مافيه شي يقنعني و ابي اتزوج يعني ابي اتزوج رغبتي كانت طاغيه على كل تفكيري تدرين اني الحين احمد ربي الف مرة اني ما تزوجت ذيك الفترة وربي بدون مبالغه فترة الطﻻق فتحت عقلي و كبرتني اكثر من فترة الزواج برغم ان مدة زواجي 8 سنوات و عليها بس كنت منغلقه عن الكل و منغمسة بمشاكلي فقط . الطﻻق تعلمت منه حاجات كثير نضج تفكيري اكثر و الحمدلله نعمة من ربي متفائلة اطلعي من جوك و غرفتك ﻻ تخلين تفكيرك في احتياجاتك فقط عندك والدين فكري بهم سوي لك مشروع تجاري ادخلي فيه انشغلي بعبادة تخليك فوووووق سوي لك برنامج على مدار اليوم قسمي ساعات يومك على أشياء مفيدة تنفعك اي فكرة توديك للماضي او المستقبل اطرديها فكري بس في وقتك الحاضر و عيشي اللحظة التفكير بالماضي يغم القلب و التفكير بالمستقبل يجيب القلق والخوف صدقيني بيجي اخر اليوم تلقين نفسك مجهدة و تنامين سريع و يمر الأسبوع و تنشغلين و تمر السنة و تفكيرك كله يتغير ادعي كل يوم الصبح دعاء الهم انا من تعودته ارتحت و وكلت امري لخالقي يديره |
رد : وش سويتو بالصور والذكريات وفستان الزواج
الصور شقيتها والملابس باتخلص منها بارميها
اكره الاماكن اللي كنا نتمشى فيها اكره اسمه او اي احد يجيب طاريه وما اذكره هو وامه الا في سجودي |
رد : وش سويتو بالصور والذكريات وفستان الزواج
حبيبتي
الفستان اعرضيه للايجار واكسبي من وراه تجارة النت المكياح وبقية الاغراض والملابس العادية بين البيع او الهدايا والصدقة الملابس الخاصة احرقيها وقطعيها الصور سبحان الله طبعي امسح وارمي الذكريات مالهم معنى واحرقيهم او خبيهم بمندوس وخلاص |
رد : وش سويتو بالصور والذكريات وفستان الزواج
اقتباس:
مع كلام فاكهة استفيدي من فستان الزفاف ولاترميه حرام بالنسبة لللانجري ما أظن أحد يرضى يلبس من ورا أحد ثاني حتى لو تنظفت ارميها والله يعوضك والأشياء المعقولة اللي تقدري تعطيها لأحد محتاجها مو مشكلة زي المكياج والعطور موفقة |
رد : وش سويتو بالصور والذكريات وفستان الزواج
ان شاءالله بعرض الفستان ويارب يجيب سعر
|
رد : وش سويتو بالصور والذكريات وفستان الزواج
وعليكم السلام ورحمة الله وبركاته ..
مرحباً بالمتفائلة .. كل شيء تبرعي به للجمعيات أفضل لكِ من الإيجار تأخذين أجراً عظيماً وتُعتبر صدقة ورُبما دعوة صادقة من أحدهم تغمر حياتكِ كلها سعادة في سعادة .. وحتى الملابس الخاصة اجعلي العاملة تغسلها جميعها على أيام حتى تنتهي وضعي في أكياس وأعطيها لهؤلاء المستحقون من الصدقة .. لاتعلمي كيف دعواتهم صادقة يامبتعثة .. لاتؤجري مادمتِ ليست بحاجة للمال والحمدلله .. أما الصور أحرقيها وقطعيها إرباً إرباً ..سيأتي من يستحقكِ وتضعين صوره في كل مكان تُحبيه .. جبر الله قلبكِ بكل ماتُحبين .. |
رد : وش سويتو بالصور والذكريات وفستان الزواج
اختي بالنسبة للمكياج و العطور ليش حتى تتبرعي فيها
المكياج و العطورات مو بس للزوج .. المكياج و العطورات للانثى بكل حالتها متزوجة مطلقة غير متزوجة اهتمي بنفسك و تمكيجي و تعطري نفسيتك كلها بتتغير الله ينتقم من كل رحل كسر قلب امرأة بنت احلامها عليه عيشي من حديد و ان شا الله ربي رح يعوضك بزوج افضل |
رد : وش سويتو بالصور والذكريات وفستان الزواج
[QUOTE=سهر الشام90;2999113]اختي بالنسبة للمكياج و العطور ليش حتى تتبرعي فيها
المكياج و العطورات مو بس للزوج .. المكياج و العطورات للانثى بكل حالتها متزوجة مطلقة غير متزوجة اهتمي بنفسك و تمكيجي و تعطري نفسيتك كلها بتتغير انا اقولك نفسك كلام الاخت سهر استفيدي من العطور والمكياج والصور قصي صورك عن صوره وخلي صورك لحالك ذكريات والفستان استفيدي منه اجريه والملابس الباقيه اغسليها ووديها الجمعيه الخيريه الله يعوضك خير |
رد : وش سويتو بالصور والذكريات وفستان الزواج
بالنسبه لي بعد زواج اكثر من سبع سنوات الذكريات هذي مثل الصور والملابس وغيرها ماتعني لي شئ ولا تأثر فيني يعني اكثر شئ يتعب ذكريات مكان وزمان !!
الذكريات اللي تطرأ على البال تتعب سواء حلوه او مره . وبالنسبه للصور عندي شنطه مجمعه فيها كل الصور والالبومات حق التماشي والطلعات والسفريات احنا واولادنا بس لي اكثر من سنتين مافتحت الشنطه ولا شفتها مثل ماقلت ماتأثر فيني كثير وكمان ماافكر اتخلص منها أفكر اعطي اولادي اذا كبروا شوي لانها كمان ذكريات بالنسبه لهم وبالنسبه لنا كلنا . اما ملابس النوم رميتها في الزباله ، اما بالنسبه للمكياج والعطور عادي بتخلص من نفسها مع الاستخدام يمكن فيه عطر معين يذكرك فيه عطي اي احد وبس . ياليت ذكرياتي مجرد صور وملابس كان تخلصت منها بس انا عندي شئ أكبر يذكرني فيه وهو ,, اولادي ,, ايش اسوي فيهم ؟؟؟ |
رد : وش سويتو بالصور والذكريات وفستان الزواج
المكياج والعطور أستعملها
فستان الفرح والشبكة والخطوبة والملكة كلها عندي معلقة كما هي كأنها جديدة الصور تبع الفرح والشبكة عندي محفوظة أما صوره رجعتها له ومسحت الي عندي ملابسي الخاصة في الأكياس الي تتفرغ من الهوا أهلي حطوها ما شفتها من ذاك الوقت أما الذكريات شغالة بالباك رواند بصمت للعلم لي ثلاث سنوات منفصلة موضوعك عفسني والله !! |
رد : متعلقات الزواج السابق كيف يمكن التخلص منها
الله يعوضك باخير ويعوض الجميع
|
رد : متعلقات الزواج السابق كيف يمكن التخلص منها
بعض مرات وانا اقرأ معاناة المطلقات استنكرها بشدة
مااحس كل شي صار لي زيهم ماتعلقت معي وﻻ ذكرى خاصه فيه ماعمره مر على بالي ذاك الآدمي صح بعض مرات احلم فيه لكن ما اهتم ابد وﻻ افسر نهائي بديت احس اني غريبة ، ماني مطلقة زيكم طيب ليه أنا كذا ...!!! |
رد : وش سويتو بالصور والذكريات وفستان الزواج
اقتباس:
لكنتي تخلصتي من كل شوائب الزواج المؤلمة انصحك بشيء جربته اذا حقدتي على احد ادعيله في صﻻة الليل وربي ان كل مشاعرك السيئة تتبخر مو بجهد منك لا .... راحه من الله كان بحياتي انسانة ما احب وجودها بحياتي و كنت اشوفها سيئة و عيوبها كثير و تضايقني لين سمعت درس عن الكره و الحقد و الحل ان الانسان يدعي للشخص اللي يكرهه و يهديه هدايا و طبقت الشي هذا على الانسانة هذه و الله العظيم اني اصبحت اشعر تجاهها بمشاعر اخرى غير الماضي صارت عﻻقتي فيها جدا راقية و زارتني في البيت و صارت اشياء ما توقعتها تصير بسبب دعوات في السجود برغم اني ما كنت ابغى شي غير انو قلبي يصبح سليم من الحقد . والحمد لله ربي جازاني بشيء جميل انصحك طبقيها و راح تذوقين راااااحه . الله يفرج همك و يرزقك من واسع عطاءه |
رد : متعلقات الزواج السابق كيف يمكن التخلص منها
الله يعين
ببدى ادور مكان لتاجير الفستان والمكياج انا قاعده استخدمه بس العطور وزعت كثير منها االله يعوضني يارب عندي لكم سؤال انا لي حق نفقه عند زوجي تقريبا عشر الاف ريال وقالي ابوي تبغيها روحي اخذيها من المحكمه بس اجراءاتها تطول ولازم ارفع قضيه ومشوار والاصعب احتمال اشوف طليقي شرايكم ارفع قضيه ولا اخليها |
رد : متعلقات الزواج السابق كيف يمكن التخلص منها
خليه و انسيه اختي
مافي داعي تفتحي جروحك علئ نفسك وقتها أموال الدنيا ما راح تفيدك يمكن تشفي غليلك |
رد : متعلقات الزواج السابق كيف يمكن التخلص منها
اقتباس:
عادي تراه زيه زي هندي البقاله ما يعني لك شي الا اذا تبين تخلقين لنفسك جو ضيقة هذا شي ثاني يا شيخه شوفي نفسك و فلوسك بعدين عادي خليها تطول اهم شي تاخذين حقك كامل ارفعي قضية و انسييييييها ، متى ما جا وقتها بتستعدين ﻻ تضيعين لحظة من عمرك تفكرين بشيء ما يفيدك فيه إصدارات حلوة للدكتور صﻻح الراشد ياليت تسمعينها بتعجبك حاسة طلي عليها باليوتيوب انا الشبكة عندي سيئة وﻻ كان دخلت و جبتلك اكثر من رائعه .ﻻ تفوتينها ع نفسك مبتعثة |
رد : متعلقات الزواج السابق كيف يمكن التخلص منها
ياجماعه انا طليفي مايعني لي شي كلها
انا ازعل على احساس الامومه والرغبه بالاستقرار بس طليقي مابيني وبينه شي الي ردني من اخذ حقي مع انه المفروض اخذه طليقي مادفع شي بحفله الزواج ولاشي الي ردني شئين امي مو راضيه تقول لاتدخلي محاكم خاصه ماعندك اطفال تبغي نفقتهم ةثاني شي اخاف يتكلم طليقي ويكبر الموضوع عند الناس ويقول فلانه رافعه علي قضيه وشوفته جد ماابغاها ام خالد هندي البقاله ماغثني وظلمني اخاف تنفتح كل جروحي الي مفكره اسويه اعطي محامي فلوس يتكفل بالقضيه وياخذ حقي منه بدون مااحضر هالمبلغ يفترض ان طليقي يسلمه لابوي واهلي تعويض لي بدون ماارفع قضيه خاصه ان هو الي طلق وسعى بالطلاق |
رد : متعلقات الزواج السابق كيف يمكن التخلص منها
إذا كان اللي رح تصرفيه عشان تستجدي هالمبلغ مقارب للعشرة آلاف
مافي داعي له اتركيها واحتسبي الأجر وإذا كان اللي رح ينصرف قليل جداا مقارنة بالمبلغ خذيها حبيبتي تفك زنقة عشرة مو شوي بعدين حبيبتي حتى لو شفتيه بالأخير هو كان زوجك ويمكن حتى ماتصادفيه بالمحكمة يمكن تصادفيه بأماكن ثانية فخلي الوضع طبيعي موفقة |
رد : متعلقات الزواج السابق كيف يمكن التخلص منها
اقتباس:
ما عندك اولاد منه ودخلتك للمحكمه ماهي على سنع وسكتي كل هالمده بعدها تكلمتي معناها انك منقهره وتفكرين فيه وراح يشهرون فيك ان راعية محاكم وتنقلب عليك ومحد يقرب لك ويطق بابك وبالنهايه كلها 10 الاف يا بلاش !! راتب شهر واحد ! والله ما تسوى غير خساير المحامي راح تتعبين نفسياً |
رد : متعلقات الزواج السابق كيف يمكن التخلص منها
انا مو رادني اﻻا كلامك يابدوي
مع انه حقي بنصل بالمحكمه اذا يقدرون يخلصونه من عندهم كان بها اذا لا ولازم مشاوير واوراق بخليها بذمته |
رد : متعلقات الزواج السابق كيف يمكن التخلص منها
اقتباس:
ما استفدتي راح تصيرين راعية محاكم حتى لو ما دخلتيها اهله ( الحريم ) راح يشهرون فيك ووقتها محد يقرب لك منتي ناقصه وشكلك متعلقه فيه الى الان ودك يرجع لك بس منتي عارفه اشلون |
رد : متعلقات الزواج السابق كيف يمكن التخلص منها
لا متعلقه فيه ولا ابيه
بس قاعده اخلص الامور الي مترتبه على الطلاق وهذا احد الامور وبعدين لو كنت رجل وزوجتي اخلعتني كنت قلت مهرك من حقك وهالنفقه من حقي والمحكمه اقرتها يفترض بطيب نفس يجيبها يدري اني مو راعيه محاكم واذا اهله بيشهرون فيني هم احرار والرزق عند ربي وربي بيحاسب كل من يحكي باعراض الناس لكن انا فعلا مو مالت محاكم ولا مشاوير للمحكمه بكلمهم واشوف الوضع |
رد : متعلقات الزواج السابق كيف يمكن التخلص منها
اقتباس:
بتدفعين لمحامي يتكفل و المحامي كم بيكلفك ﻻ تتوقعين قليل انا مرة سمعت ابوي يقول دفع 30 لمحامي القرار بالنهاية لك اذا شايفه انك منتي رايقه لدوشه زي كذا خلاص وشهي تراها عشر الاف ما تسوى خليك على شور امك ازين |
رد : متعلقات الزواج السابق كيف يمكن التخلص منها
7 سنوات لك منه
متعة الطلاق وهو ميلغ يقدره القاضي حسب راتبه النفقة المتاخرة شهريا يقدرها القاضي لو 500 شهريا ع حسب راتبه من دخولك عليه الى اخر يوم في العدة انا رافعة قضية ولا راح اخليها شوفي الرجال اذا طلق طالب بمهره لا تستحين |
رد : متعلقات الزواج السابق كيف يمكن التخلص منها
بشوف كم ياخذ المحامي
|
رد : متعلقات الزواج السابق كيف يمكن التخلص منها
كم يعني متعة الطلاق ؟ وايش يعني نفقه متأخره ؟؟
ممكن توضحون ؟ |
رد : متعلقات الزواج السابق كيف يمكن التخلص منها
متعه الطلاق اتوقع ثلاث شهور وابتفقه سنه حسبها لي المخامي اول الطلاق قال يطلع لك.بين الغشره و العشرين الف
|
رد : متعلقات الزواج السابق كيف يمكن التخلص منها
اقتباس:
مرحباً مبتعثة المتفائلة .. أغلب المحاميين يأخذون مبلغ كالمبلغ الذي ستأخذيه منه ! لاأعلم لما بعد سنتين تُريدي إرجاعها ؟! هل لديكِ أحد قريب من العائلة يأتي بالمال دون تدخل المحامي الذي سيخسرك مالاً بنفس العشر آلاف ؟! لو أنا مكانكِ سأعتبرها صدقة عليه ! المال لن يجبر مابداخلكِ أبداً أبداً ولا ذرة من قهركِ ! |
رد : متعلقات الزواج السابق كيف يمكن التخلص منها
هلا سر الحياة
بعد سنتين لان بالبدايه كنت مشغوله بالعمل والبعثه وماكان عندي وقت المخامي ياخذ خمس الاف والمبلغ عشرون الف على كلامه شرايكم المبلغ الغرض منه مادي لاغرضي انتقم ولا انه يجبر كسري الجبار فوق سابع سما رب العالمين |
رد : متعلقات الزواج السابق كيف يمكن التخلص منها
اقتباس:
استخيري واقدمي وتوكلي على الله .. مادمتِ بحاجته .. |
رد : متعلقات الزواج السابق كيف يمكن التخلص منها
لست بحاجه ملحه له
ولكن من مبدا ليه اخلي حقي |
| الساعة الآن 08:50 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©