زوجي يمنعني من زيارة أقاربي رغم صفاته الكريمة
 

السلآم عليكم
حابه تشاركوني قصتي وتفيدوني وتوجهوني .. أنا انسانه متزوجه عندي بنت وولد الله يحفظهم عمري29 سنه وزوجي 31 سنه كلانا موظفين والحمد لله عمر زواجنا5 سنوات .. عايشين ببساطة وسعاده مع وجود بعض المنغصات والمشاكل الزوجيه البسيطه التي نتجاوزها بهدوء وتفاهم .. ولكن تظل هناك بعض الأمور المعلقه اللي ما أقدر أكلم زوجي فيها لأنه خط أحمر بالنسبه له ولأني بطبعي هادئه وما أحب المشاكل وأتنازل دائما رضخت .. أدري انها سلبيه مني ..بس زوجي عصبي جدا لدرجة انه ممكن يرمي ويكسر أي شي في يده ..وعلى العكس اذا كان مبسوط ورايق يكون وديع ولطيف جدا ..
راح اعطيكم ايجابياته قبل ما أخوض في المشكله الأساسيه ..
هو انسان مثقف وطموح وواعي وحنون معي ومع اولاده لأبعد حد يساعدني في المطبخ ودااايم يجيب لي هدايا باستمرار حتى لو يسافر يوم واحد ويرجع مستحيل ما يجي وفي يده هديه كريم جدا ولطيف وخلوق مع أهلي وامي وابوي يحبونه كثير ..
مشكلتي معه في الزيارات طبعا زياراتي لأهلي بالقطاره واذا وداني يا اما يكون متضايق او طفشان رغم ان بيت اهلي مايبعد دقيقتين بالسيارة .. اما زيارات خوالي وعماني وعماتي وخالاتي هذي ممنوعه الا اذا سمح لي مره في السنه بتقولون ليش اقولكم يكره بعض اقاربي عداوات واحقاد قديمه من قبل الزواج وما عرف صلة قرابتي بهذولي الناس الا بعد الزواج ومنعني تماما من السلام عليهم عشان كذا يمنعني من زيارتهم .. احيانا اقول مو مشكله اهم شي اني مبسوطه في زواجي ومع عيالي والزم ماعلي هم ..بس احيانا اتمنى ازور قرايبي وابادلهم الزيارات ولو في الأعياد خاصه انهم داااائما يعاتبوني ويسألون عني ويستغربون ليش ما ازورهم مثل بقية خواتي ..
واساسا هو من النوع اللي يكره خروج المرأه من بيتها وانا ما ازور جيراني ولاهم يزوروني حسب رغبته .. رغم انه مضايقني هذا الشي ..بس ماقدرت أغيره.
الموضوع الثاني او المشكله الثانيه هي..راتبي.. هو مضيع بطاقته الصراف وشهريا ينزل راتبه ويحوله ع حسابي ويستخدم بطاقتي طبعا راتبي دبل راتبه اطلب منه يحول لابوي وامي مبلغ معين شهريا وياما حاولت فيه يوديني البنك عشان افعل خدمة الهاتف المصرفي او مباشر ويرفض تماما. والباقي اذا صارت فرصه ننزل للسوق اشتري اللي ابي رغم انه يدقق ع مشترياتي وما اكون براحتي اشتري اللي ابغاه يعني لو القى مثلا علبة مكياج وتكون غاليه ما يخليني اشتريها .. وبقية الراتب يتصرف فيه هو واذا دققت وحاسبت يزعل ويقول فلوسنا ما بيننا فرق وأنا اتضايق من هذا التصرف..وهو والله كريم وعنده مشاريع والله معطيه وفعلا ما يحاسبني على فلوسه اذا اخذت منها قبل ما اتوظف كان يجيب ارباح مشاريعه ويحطها واذا ودي بفلوس يقول خذي اللي تبين فدا رجولك ..بس مدري ليش احس انه الحين يستغل فلوسي وراتبي ويبي يكون هو المسيطر والمتحكم .. طبعا مر بظروف وكان مديون وانا طلعت له قرض خسف بثلث راتبي ..
شي أخير أحب أضيفه انا أحيانا اكون مرتاحه ومبسوطه وراضيه ..بس أحيانا تاكلني نار داخلي ليش انا كذا .. اشوف خواتي يجون ويروحون براحتهم وين ما يبون ورواتبهم هم المتحكمات فيها وازواجهم طيبين مره واتحسف على نفسي واذا ودي اصارح زوجي اتراجع كثير .. أولا لاني ما اقدر اتكلم واذا تكلمت اتلعثم وابكي وماعاد افدر اقول اللي بداخلي وثانيا ما احب المشاكل وزوجي اذا زعل مني يهجرني ولا يكلمني ويطلع من البيت ويستمر الوضع بالايام حتى انهار من داخلي واضطر اصالحه وأوافق على كل مطالبه ..
هو دايما مشغول .يجي البيت يرتاح واذا طلع مشغول .. احاول اصطاد فرصه يكون فيها رايق وفاضي عشان اتكلم معه بس ما قد لقيت الفرصة المناسبه خاصه مؤخرا .
أنا حاسه ان لو ماكنت سلبيه كذا ودايما اتنازل عن حقي كان قدرت اغيره من زمان بس وش أسوي هذا طبعي .. زمان قالت لي أمي جمله والله انها ترن في ذاكرتي كل يوم
..قالت يارب تتزوجين انسان طيب ويقدرك ويخاف الله لأنك كتومه وماراح تآخذبن حقك لو تنظلمين ..
محتاجه آراء .. وتوجيهات .. ودفع معنوي .. ومؤازه منكم ..

رد : نصائحكم..توجيهاتكم..اقتراحاتكم..محتآجه مساعدة الجميع..
 

مدري وش أنصحك فيه صراحه لكن لاتقارنين نفسك بأخواتك

إذا هم ماخذين راحتهم بالزيارات ورواتبهم بجيبهم شوفي وش إللي ناقصهم بزواجاتهم

من عدل الله إنه مايعطي الإنسان كل شي الحمدلله حياتك أحسن من غيرك ماشاء الله لاقوة إلا بالله

بس حبيت أعلق على هالنقطه والباقي إن شاء الله الأعضاء مايقصرون

رد : نصائحكم..توجيهاتكم..اقتراحاتكم..محتآجه مساعدة الجميع..
 

مشكوره ضيعتني العاطفه .. جزاك الله ألف خير
أدري إن مافيه إنسان وصل حد الكمال والراحه
بس من جد اتمنى زيارة قرايبي .. جيراني .. اتصرف بفلوسي مثل ما أبي ما أحس دايم ان علي وصي او متحكم ..
أنا ودي من خلال تجاربكم تدلوني كيف أحاول أقنعه بهذي الأشياء بدون زعل أو خلافات ..خاصه ان شخصيته مثل ماذكرت عصبي جدا ومتهور طبعا ممكن يسوي أي شي .

رد : نصائحكم..توجيهاتكم..اقتراحاتكم..محتآجه مساعدة الجميع..
 

وفيه نقطه مهمه ودي يفهمها اني اتمنى يعطيني خبر اذا بياخذ من راتبي شي خاصه اني اكتشفت مره بالصدفه انه ساحب من راتبي 4 الاف عطاها خاله .. يمكن يكون خاله ايدعها بعدين او حولها ما ادري هو اكيد رجعها بأي طريقه بس كان من باب أولى يعطيني خبر ..صح والا أنا غلط؟

رد : نصائحكم..توجيهاتكم..اقتراحاتكم..محتآجه مساعدة الجميع..
 

حبيبتي ،، ربي يديم محبتكم ويسخركم لبعض ويهديكم ..
اهم نقطه بنصحك فيها عن تجررربة ،، لا تقارني حياتك ونفسك وشخصيتك باحد ثاني حتى لو كانت امك واخواتك ! بتتعبين جد .. شخصيات اخواتك مختلفة بشكل طبيعي عنك وايضا ازواجهم .. يعني كل زوج وزوجه تتحور شخصيته مع شخصية الطرف الاخر وهكذا فلا مجال للمقارنة ابدا ،،،

النقطة الاخرى هي طيبتك وليس ضعفك ،، اذا ماتقدرين تصارحين زوجك بما يدور بقلبك اذن الخيار الاخر هي الرسالة ولازم تكتبيها بطريقة مايتحسس منها وبنفس الوقت تكوني جادة وتبين رغبتك في المناقشة وخوفك من غضبه ... بعض الاحيان تحتاجي انك تطنشي زعله يومين ثلاث لحتى يحس بتغيرك وجديتك ،،،

انا اشوف من حقك تكون لك بطاقتك الخاصة ولكن جملته ان انتي وهو واحد هاذي معاه حق فيها وخصوصا انه مايبخل عليك بشي من ماله ،، هو اعتقد يبغي يوفر ويجمع من رواتبكم انتوا الاثنين فتاكدي من هالنقطه وممكن تكون لعقار او مشروع لك ولابنائك ...

موضوع لرفضه لشراء بعض الامور الخاصة بك ،، حلها بسيط وسهل .. اطلبي منه مبلغ بحسب تقديرك يناسبك وبعدها اشتري اللي بخاطرك واذا رفض فردي عليه بطيبه خاطر ( حبيبي انتي معطيني فلوس وانا محتاجة لهالغرض ) .. يعني تحصلي على غرضك بطريقه غير مباشرة حتى لو كان بالدلع والرومانسية لان اعتقد زوجك من هالنوع وصدقيني كرمه وحبه لك بسبب صفاتك هاذي ولو تساليه بيكون هذا جوابه ..

بالنسبة لرفضه لزيارة اقاربك ،، ايضا دام مو قادرة تصارحيه اذن اكتبي له رغبتك بزيارة الاقارب او حتى الجيران للتغيير من الروتين وحتى تغيري جوو بدل جلوسك الدائم بالبيت وفقد الاتصال بالعالم الخارجي يعني يحصل ككبت لك مهما يكون انتي محتاجة تتكلمي مع اهلك اقاربك والناس حولك ،، مع اني انا بعد مثل طبع زوجك افضل اكون ببيتي عشان ماحد يقول ويزعل اني زرت فلان وترك فلان ! حتى بين الجيران ذهبت لواحده غارت الثانية فقطعت الموضوع واصلا انشغلت بالدوام وشغل البيت ....

حبيبتي ،، زوجك برغم سلبياته ولكن ايجابياته تغطي ولله الحمد.. الامور اللي تزعجك تتعالج بسهولة لو قويتي نفسك ودربتيها على المصارحة والمناقشة .. هالشي مو معناه تمسحين شخصيته ولكن معناه تعاون وتفاهم بين الزوجين واحساس الطرغين بالراحة والمشاركة ...

لا تقارني فالحياة الظاهرية كثيرا ما تختلف عن ما بحصل تحت سقف الحياة الواقعية ،، صارحي و ناقشي وبادري ،، اظهري تقديرك لزوجك ولنفسك ،، اطرحي افكارك ونظميها قبلها ،، لاتخافي ولا تتكوري على نفسك بالنهاية هذا زوجك شريكك بالحياة والاهم انه يبقى انسان مخلوق حاله من حالك ! ...

ربي يوفقكم ويصلح اموركم يارب

رد : نصائحكم..توجيهاتكم..اقتراحاتكم..محتآجه مساعدة الجميع..
 

الله يسعدك ويريح بالك مثل ما ريحني كلامك..
أنا كثير أفكر في كتابة رسالة له بس أحس اني بتتلف أعصابي قبل لا أشوف ردة فعله .. ولكن بإذن الله انا راح اقدم عليها وأعلمكم بالنتايج بإذن الله.
أما سالفة انه يوفر فلوس أو يجمع فهذي أنا واثقه تمااااااما انه مايجمع لأنه مع انه كريم الا انه مبذر ويحب يساعد ويعين أي أحد حتى لو مايعرفه .
بالنسبة للزيارات ف ﻷني اجتماعيه كثير وأحب أختلط بالناس نتيجه لهذا تعبت نفسيتي من القعده لحالي ودي اجتمع مع حريم ونسولف .. بس زوجي عكسي تماما في هالنقطه مايحب يختلط بأحد ولا يتبادل الزيارات مع احد .

رد : نصائحكم..توجيهاتكم..اقتراحاتكم..محتآجه مساعدة الجميع..
 

والله يا انكسار هاذي مشكلة الكريم ،، مثل مايقولون فلوسه لغيره .. اخوي فيه نفس طبع زوجك وبالبداية كان مع زوجته مثلك لا طلعه الا معه ولا زيارة الا به وهكذا .. طنشت مرة مرتين وبعدها انفجرت بكاء واخرجت كل مابقلبها بالنهاية اعتذر ةفهمها انه ماكان قاصد الاذية والجرح وتفاهموا على تقاط تمنحهم اثنينهم بعض الحرية منها زيارة الاهل ... طبعا كل هذا باعترافه هو شخصيا وكان يوصيني قبل زواجي بالصبر والمصارحة والمناقشة وعدم المقارنة مع زوجي ..

اختي كانت تمر بمشاكل مع زوجها ،، بالنهاية كلها سببها المقارنة ! انا واختى الاخرى لنا مطلق الحرية والخ والخ والخ من صفات الازواج وهي بحكم انها اختنا كنا نطلب خروجها معنا بعد الاستئذان ولكن لرغبتها بان تكون مثلنا كانت تتسبب بمشاكل لنفسها ولنا ايضا ،، لما عرفنا ان سبب الخلافات هو فقط هالنقطه وتتفرع منها امور كثيرة قلنا لها مثل الكلام اللي قلت لك بالضبط .. رغم صفات ازواجنه لازال بيننا خلافات ممكن توصل للصراخ والزعل ،، رغم الحرية ولكنهﻻ تصبح مزعجة لانك تحسين بعدبن بان لا دور لزوجك بخياتك وانتي اللي تديربن الدفه وتضطرين تكوني بمكان القبطان لاوقات كثيرة وتستاقين لان تكوني بظل رجل هو المسؤول عنك بكل تفااصيل حياتك لحتى تحسي بالهدوء وقله التوتر .. ههههههه شوفيها الحين حصلت على ماتريد وزيااااادة وصارت تقول يااريت ارجع ويريحني ..

ما اقصد ان ماتكون لك حريتك ،، لانها حق من حقوقك ولكن كل امر له سلبيته وعلينا تقبله .. ارد اقولك طيبتك نقطه قوتك ونقطه ضعف زوجك فكوني ذكيه واستغليها لصالحك ... وربي يريح قلبك

رد : نصائحكم..توجيهاتكم..اقتراحاتكم..محتآجه مساعدة الجميع..
 

بإذن الله تعالى .. اللهم يسر أمري وفرج همي ياكريم
والله يسعدك دنيا وآخره كلامك مريح جدا .
وأنا والله أحاول ما أقارن نفسي بأحد بس يكسر نفسي لما خواتي يجتمعون لزيارة وحده من العايله توها والده او طالعه من عمليه او حادث ويكلموني عشان أروح معهم وما أقدر .. أحيانا اكلمه ويرفض واعتذر منهم واتحجج بأي شي واحيان كثييييييييره اعتذر من نفسي لأني صرت أحس بالذل اذا طلبته ورفض ..
هو الحمد لله ماعمره رفع يده علي ولا قد حصل ان نقاشاتنا توصل للصراخ ﻷني هادئه جدا واذا حسيته بدا يرفع نبرة الصوت ابدا امتص غضبه وفي هذي المرحله يطنشني ويسحب علي حتى اراضيه انا واستسلم للي يبيه.
حابه أوضح نقطه عني قبل الزواج كنت قياديه واخواني الذكور انا اللي اعطيهم التعليمات ف الروحه والجيه وادارة البيت كنت انا اللي ماسكه زمام الامور في كل شي وكنت ازور الكل ومحبوبه من الكل .. عشان كذا افتقدت هالأشياء كثيييييير والكل صار يعاتب عدم زيارتي وانا ما اقدر اقول لأحد ان زوجي مانعني .. خاصة اني تزوجت هالانسان رغم معارضة الأغلبيه وأحس لو تفوح مشاكلنا راح ألقى شماته من العيار الثقيل ..
وبالنسبه لطيبتي وطاعتي هو فعلا دايم يقول انها اكثر شي يحبه فيني والحمد لله
وعايلته جدا رائعين ويحبوني واحبهم من كل قلبي .
طبعا الزيارات لأهله دائمه وهو يكون مبسوط ع الاخر نروح عند اهله وخواله وخواته عادي ما يعترض ولا يرفض اذا صار عند احد من قرايبه مناسبه نروح حتى لو بدون مناسبه .. بس لا صارت الزيارات لقرايبي ينعفس مزاجه ويتكدر ويتضايق

رد : نصائحكم..توجيهاتكم..اقتراحاتكم..محتآجه مساعدة الجميع..
 

حلي مشكله وحده تنحل لك الثانيه باذن الله زوجك يخاف عليك من مخالطه الناس حتى لا يواثرون عليك وينبهونك ان تحفضين مالك الي تعبتي وجمعتيه لان المال قووووووووه للمراه واغلب الرجال لا يريدون قوه المراه عليهم
لا تخافي الحق معك وهذا حقك وتعبك وشقاك فاحفضيه
عليك بسياسه التدرج كلميه بالهداوه وذكريه بالله وبحقك في المال وان لم ينفع زيدي الجرعه قليلا حتى تحصلي على حقك وبعدها تنحل مساله منعه لك من مخالطه الناس
الله يوفقك

رد : نصائحكم..توجيهاتكم..اقتراحاتكم..محتآجه مساعدة الجميع..
 

حطي في بالك انه لا يمكن تكلمينه وتقولين ابغى راتبي لي ويوافق على طول لانه عرف انك ضعيفه وتخافين من المشاكل فبيثور عليك
اذا مااستجاب لك ولكلامك لا تناقشينه زياده كلمي اخ او خال او عم او اب ثققققققققققه وامين وحكيم يكلمه ان مالك لك

رد : نصائحكم..توجيهاتكم..اقتراحاتكم..محتآجه مساعدة الجميع..
 

مشكوور-ه حلم الواقع.. مسألة انه بتنحل مشكله بالثانيه ما اعتقد لاني توظفت بعد اربع سنوات زواج وهو طبعه كذا من قبل ما اتوظف ..
بإذن الله راح أكلمه دعواتكم لي انه يفهمني واني ما احتاج لتدخل أي أحد لأنه هذا اللي أنا ما أبيه.

رد : نصائحكم..توجيهاتكم..اقتراحاتكم..محتآجه مساعدة الجميع..
 

الله يفرجها عليك قولي امين
ام مريم ما قصرت
فكرت الرساله حلوة

رد : زوجي يمنعني من زيارة أقاربي رغم صفاته الكريمة
 

الله ييسر لك امرك ويبعد عنكم كل زعل ،، حبيبتي انكسار داءما تذكري ان هدوئك وطيبتك هي نقاط قوتك بالمناقشة وراح توصلي له الموضوع بسهولة وسلاسة وباسلوب ما يتحسس منه ... شفتي شلون يتكلم السياسين؟ بطريقة هادئة وواثقة ونبرة تخلي الناس تستمع حتى وان لم ترد ولكن المعلومة توصل لمخهم بعكس السياسي دائم الصراخ الا في اوقات حرب او دفاع وهكذا لشد العزم ،، اما في اوقات الرخاء وليجعلهم يتقبلوا مثلا قانون جديد يجهز كلماته باسلوب هادئ متزن وواثق وتعبيرات وجهه طيبه وكريمة .،.. الله يوفقك ان شاء الله ويسخر لك زوجك يارب

رد : زوجي يمنعني من زيارة أقاربي رغم صفاته الكريمة
 

المسالة مهي مسالة مقارنة انتي فعلا عندك مشكلة او باﻻحرى 2 عدم اختﻻطك بالناس وفلوسك و هذول من اهم حقوقك اللي كفلها لك اﻻسﻻم
فﻻ تضيعيها بضعفك وخوفك وبعد باين عليك انك واصلة حدك من هالمشكلتين ولو ماتكلمتي بتنفجرين او بيتحول لكره لزوجك وحقد ... زوجك طيب وحبيب ﻻتخسرينه وبعد ﻻتخسرين اهم حقوقك مالك و صلة رحمك حلي مشكلة الفلوس اول ﻻنها الاهم واﻻساس وعشان لما تزورين احد مايقول فروا راسك عليخهه ي حبيبتي المراة ضعيفة في مجتمعنا بشكل كبير وﻻ يسندها بعد الله اﻻ فلوسها زمان كانو اهلها عزوتها لكن الحين كل يقول نفسي نفسي ....
متاكدة ان زوجك مضيع بطاقته ؟؟ ﻻن اللي يسويه غريب بدل مايطلع غيرها حول فلوسه على حسابك طيب التحويل يحتاج يروح لبنك عشان يسويه كان من الممكن ان يطلع صراف اسهل لكن ممكن يكون زوجك مسوي كل هالحركات عشان يمسك صرافتك و يعرف كم عندك ويكون هو المتحكم والله اعلم ... اممم انتي كنتي بتشتري علبه مكياج من فلوسك بس رفض يعني بدا يسيطر عليها .. اعتقد تفكير زوجك المالي بدا يتغير او فيه احد يوزه يتحكم في فلوسك ... شوفي يا اختي زوجك باين طيب واخﻻقه زينه وﻻتخسرينه بس بعد ﻻ تخسرين حقوقك شوفي انتي وش الطريقة اﻻنسب لاقناعه واعملي بها مرة شدي ومرة ارخي لكن حطي في بالك استقلالك المادي عنه انتي وهو مو واحد انتو اثنين وكل له ماله

رد : زوجي يمنعني من زيارة أقاربي رغم صفاته الكريمة
 

تمسكي بحقك بكل شي
اذا باعك عشان راتب او عشان صلة الرحم فهو لايستحقك

مساعدتك له بمالك يجب ان تكون برضاك
وان يكون هناك تقدير منه لذلك
اما اجبارياً فهذا لايجوز
ثانيا مشاكله مع اقاربك او العدوات معه هو وليست بينك وبينهم
فلماذا يجبرك على مقاطعتهم
او فصلك اجتماعيا عن الناس وكأنك مريضه بمرض معدي
ناقشيه واستمري ولا تيأسي ولا تنسي الدعاء

رد : زوجي يمنعني من زيارة أقاربي رغم صفاته الكريمة
 

أشكر مروركم جميعا..

راني ران
أشكرك .. وبطاقته ايوه انا متأكده انه ماعنده لأنه ابتلعها الجهاز وأنا معه بالسياره والتحويل يحول من الجوال مايروح البنك ولاشي ... وهذا الإحساس اللي ذابحني انه يستغلني وهو المسيطر ع كل شي.

رد : زوجي يمنعني من زيارة أقاربي رغم صفاته الكريمة
 

كل الأسامي .. أنا خايفه من المشاكل والفضايح وواثقه انه مستحيل يخسرني بس أدري انه بيكون في ردة فعله تهور ويتخذ قرارات تخلي اللي مايدري يدري .. وأنا لي مكانتي في المجتمع اللي أنا فيه بحكم وضيفتي ف خايفه من الفضايح .
ومعك حق احنا 2 مش 1 والمفروض فلوسي تكون لي وهو اللي يصرف .
دعواتكم ان ربي يسخره لي
انا نويت اكتب الرساله واتمسك بكل شي وأكون حازمه .. وانتظر النتيجه .. لا تنسوني من الدعاااااااء ارجوكم ..

رد : زوجي يمنعني من زيارة أقاربي رغم صفاته الكريمة
 

واصله حدي فعلا من هالمشكلتين ونومي صار ملخبط وأفكاري مشتته محتاجه توجيه ودعم .. واللي خاني اشارك هنا لأني شفت هالمنتدى مثل العايله الواحده ويساعدون صاحب المشكله ويتابعون معه التطورات ويوجهونه ويعطونه الآراء والحلول المناسبه .
اسأل الله التوفيق والسداد للجميع

رد : زوجي يمنعني من زيارة أقاربي رغم صفاته الكريمة
 

احس ماعت كبدي من اللي انا اقراه
وان حكيت بيقولون تخبب
لا تعطين امك ولا ابوك ولا تروحين قرايبك ولا تتحكمين براتبك وش هالحياة ؟
ياختي مستغلك ومخوفك بعصبيته
اول مره اشوف رجال يضيع بطاقته ولا يطلع غيرها
لانه مبسوط ان حسابك بيده
ترى الطاعة مو لهالدرجة

رد : زوجي يمنعني من زيارة أقاربي رغم صفاته الكريمة
 

..


طلعي اسباب من تحت الارض لين يطلع بطاقة له !
بعدها بتقدرين تمسكين فلوسك شوي شوي !

رد : زوجي يمنعني من زيارة أقاربي رغم صفاته الكريمة
 

عندي لك خطة ما تخرش المية زي ما بيقولو إخواننا المصريين
ستطلعك من المأزق زي الشعرة من العجين
حاولي تحصلين على بطاقتك وتتلفيها
اسرقيها من جيبته واتلفيها ورجعيها
ولما تطلعوا بطايق جديدة روحي لحالك!
مالك وانتي اولى به
يحرمك وبعطي خاله!
لو فلوسه قلنا ماشي
لكن انتي اللي بتتعبي
لو محلك أترك الوظيفة!!
ولا يستغلني بريال
وقلتي ماخذ قرض!
اعملي الخطة اللي قلتلك عليها
او اذا عندك طفل صغير خبريه انه قصها بالمقص
انتي محتاجة كيد
لإنه ما خلالك مجال

رد : زوجي يمنعني من زيارة أقاربي رغم صفاته الكريمة
 

تدرين شلون اكسري بطاقتك انتي كمان او اخدشيها خدش ماينشاف عشان ماتشتغل بكذا ﻻزم واحد فيكم او كلكم تطلعون بطاقة ولو قال انتي اﻻول اتعذري باي عذر لحد مايطلع هو بطاقة ... اللي فهمته منك ان هذي اول سنة وظيفة لك وهذا جد خطر ... ﻻنه اللي يحصل في هالسنة بيحدد مصير السنوات الباقية من حياتكم اﻻن انتي خجلة تسالينة وين ودى 4000 من راتبك وليش ما استاذنك لكن بعد كم سنة راح يكون حق مكتسب له ولا لك حق تتكلمين يعني مو كفاية ماخذة قﻻض له وانتي لسه في اول سنة شغل

رد : زوجي يمنعني من زيارة أقاربي رغم صفاته الكريمة
 

بطاقتك تقدرين تلغينها عن طريق الهاتف المجاني بدون ماتكون معك
اتصلي عالهاتف وعطيهم رقم الهويه وقولي فقدت بطاقة الصراف وابي الغيها
وراح يتم الغائها مباشرة

واذا رحتي للفرع لاستخراج بطاقه صراف جديده
اطلبي منهم تفعيل خدمة الهاتف المصرفي والانترنت المصرفي
وماحد يعرف الباسوورد الا انتي ولا من شاف ولا من دري

ساعدي زوجك نعم
لكن بدون ان يستغلك الدرجة ان حتى اهلك ماتقدري تساعديهم بشي او تهديهم اي شي

رد : زوجي يمنعني من زيارة أقاربي رغم صفاته الكريمة
 

اختي سوي زي ماقالوا الاخوات الغي البطاقه
واذا رحتي البنك فعلي الخدمات اللي تبغيها
وافتحي حساب متفرع لحسابك وحولي عليه شهريا عن طريق النت طبعا زوجك لا يدري عنه

رد : زوجي يمنعني من زيارة أقاربي رغم صفاته الكريمة
 

شاكره تفاعلكم وآراءكم ..
بالنسبه للصراف هي توقفت قبل فتره وأنا رحت البنك عشان أسوي تحديث وافعلها مره ثانيه وفعلا استغليت الفرصه وقلت للموظفه ابي افعل هالخدمات قالت لازم تمر 24 ساعه ع بال ماتتفعل وبعدها دخلي رقم الجوال في الجهاز الآلي وارجعي عندي ..وأنا ما أقدر ذاك اليوم ارجع لها بعد 24 ساعه يعني حتى لو اتلفت البطاقه بأي طريقه ماراح أقدر الا بموافقته ومساعدته هو .. وهالموضوع مقدور عليه بإذن الله .. الموضوع المعقد اللي هو موضوع الزيارات .

رد : زوجي يمنعني من زيارة أقاربي رغم صفاته الكريمة
 

وبالنسبه لأهلي ليش فهمتو اني ما اقدر اعطيهم ولا اساعدهم لا لا بالعكس مخصصه لهم مبلغ شهري وزوجي اللي يحوله بنفسه وأحيانا اذا بغيت أحول لأحد خواتي أو اخواني يحول المبلغ اللي اقول له عليه مايعترض.

رد : زوجي يمنعني من زيارة أقاربي رغم صفاته الكريمة
 

بالنسبة لموضوع الزيارات اجمعي ادله عن صله الرحم
وتكلمي ووضحي عقوبة قاطع الرحم والمصيبه التي تلحق المسلم بالدنيا والاخره بسبب القطيعه ..

وتعالي من باب انك تبغين الاجر ولا ترغبين ان يغضب ربك عليك بسبب هالموضوع
وكذلك الجيران وجيبي احاديث عن اهمية التواصل مع الجيران وتفقد احوالهم

رد : زوجي يمنعني من زيارة أقاربي رغم صفاته الكريمة
 

حابه اقولك اختي فلوسك من حقك انت فقط طيبتك لا تضيعك ثم تبكي دم

رد : زوجي يمنعني من زيارة أقاربي رغم صفاته الكريمة
 

كلام الاخت أم مريمي جميل وواقع
المقارنة هي سبب كل شر لابد للانسان ان يكزن قنوع برزقه بجسده بزوجته بزوجها ................
أم الزيارات لابد من جلسة مصارحة وهو رايق وتوضحين له عن صلة الرحم وعن أجرها
وشوفي أيش سبب تحسسه من الزيارة لابد هناك اسباب
والله يسخره لك ويرزقكم السعادة والاطمئنان

رد : زوجي يمنعني من زيارة أقاربي رغم صفاته الكريمة
 

رد : زوجي يمنعني من زيارة أقاربي رغم صفاته الكريمة
 

مع هذا الرأي