|
اخوي ضربني !
السلام عليكم و رحمة الله وبركاته ..
ببدا بالمشكله على طول بدون مقدمات لاني متضايقة جدا ومحتاره و ( أحتاج ردود عقلانية تنور لي بصيرتي ) ، ما أبي أشتكي لصديقة أو قريبة لأن الموضوع عائلي بحت . مشكلتي تتخلص في أمرين : - اني كيف اتعامل مع ضرب اخوي لي ؟ - هل أكمل اجراءات الابتعاث للدراسة في الخارج معاه وهو مد يده علي ؟ .. ومشكلتي بالتفصيل : انه قبل فتره نزلت موضوع اني اشتكي من عملي ، واني ابغى استقيل و انهم اضطروني للإستقاله بعد اهانتي معنويا بكافة الأشكال ( محد كان يدري بمشاكل عملي من اهلي ولما كانوا يسألوني عن عملي كنت أجاوب الحمدلله .. لأني تعودت أشكي لله سبحانه وتعالى فقط ) اهلي تفاجئوا لما شافوني قررت استقيل فجأه و من بعدها انحرمت من حقوقي الماديه من عملي و الوالد شجعني أشتكي عليهم في مكتب العمل .. .. اخوي اللي اكبر مني سمع ب ردة فعلي مع عملي وصار يجرحني بالكلام ( انتي قوية شخصيه بزيادة والله يسلط عليك من يكسرك وحرام عليك اللي سويتيه مع ناس بينك وبينهم عيش وملح ) وانا ساكته وهو يغلط ويجرح الين مره حكيت له عن كل شي سووه معاي قال لي احسك تبالغين وكان الأفضل تسامحين ! ( وخلاص تكونت عنده فكره اني المرأة الحديدية اللي ما تنكسر ، وهالشي جدا مضايقه وكل تصرفاتي يحللها على هالأساس ) .. بعد كذا قدمنا على الإبتعاث انا وياه و ننتظر أسمائنا تطلع وحاليا أفكر اتراجع مع اني عارفه لو تراجعت ( راح يحقد علي طول عمره وينجرح ومايسامحني ) لأنه كذا مره يقول لي انا حاط آمالي فيك اني اطلع ابتعث معاك ك مرافق ويقول لي لاتخذليني ! ليش افكر اتراجع : - لأنه ابوي نصحني ما اروح معاه وقال عنه ( عديم مسؤوليه ) - واختي نصحتني ما اروح لنفس السبب - شخصيته تقلقني جدا : * غير محافظ على الصلاة ابدا يصليها بالوقت اللي يبغاه ( يعني مثلا لو كنا طالعين لمكان عام و أذن مستحيل يروح يصلي حتى لو بعد ساعه او ساعتين .. لكن يجمعها مع الفجر او مع إي صلاة ثانيه ) * نومه مقلوب ( من عرفته ) ينام بالنهار ويصحى بالليل ، حتى انه اضطر يحول دراسته ليلي عشان واستقال من عمله عشان هالسبب وانا اشوف عدم الانضباط في النوم والصلاة والأمور الأساسيه بالحياه دلاله على عدم تحمل الشخص لمسؤولية نفسه أبدا ! * انسان افكاره متحرره او خليني اقول بشكل صريح ( ماعنده غيره ) و ضد النقاب ، ومن الحين يكلمني : لا تفشليني وتلبسين النقاب لو طلعنا برا وانا كنت مخططه اني استغل فترة دراستي بالخارج بأنشطة إيجابيه تخدم ديني و صارحته بهالشي و جدا عارضني ! * باختصار : من زمان وانا مقتنعه انه انسان ممكن يكون سبب يبعدني عن الله لو رحت معاه برا وممكن يضغط علي لاني كنت قبل ادرس نفس الشي بعيد عن اهلي وكان لما يجي يزورني مايسمح لي أصلي وتصير مشاكل عشان الصلاه + ماحس معاه بالأمان لنقطه انعدام الغيره + ماحس انه بيتحمل مسؤوليتي عشان موضوع صلاته و نومه و كل حياته الملخبطه علما بأنه على اعتاب الثلاثين ! لكني قدمت على الابتعاث معاه لاني قلت راح انشغل بالدراسه هناك عنه وراح اخليه جسر يوصلني لطموحاتي فقط .. اللي صار ان اهلي سافروا بالإجازة و بقينا انا وهو بالبيت وتكشفت لي أطباعه اكثر ( اخوي هذا له 7 سنين او اقل بقليل مانعرف عنه شي الا اسمه ، حتى تخصصه الجامعي ما نعرفه لانه غيره اكثر من مره ، ما يجتمع معانا ولا ياكل معانا ، عادي يمر الأسبوع كامل مانشوفه فيه الا مره وحده ولدقايق معدودة بالصدفة ) هالسنه تغير للأفضل وصرنا نشوفه دقايق بسيطه باليوم لكن للحين ما يجتمع معانا على أي وجبه ولا يسافر ولا يطلع معانا ! مجتمعه كله = سفراته و صداقاته فقط ظلينا بالبيت مع بعض : و وعد اهلي انه يتحمل مسؤوليتي وتأملت فيه خير لكن اللي صار انه قال لي : ابغاك تجلسين معاي بالبيت برمضان هذا بس عشان تطبخين لي لاني ما احب افطر برا ، وكنت فعلا اسوي له هالشي يوميا ! الين مره طلع من البيت ( وكالعاده بدون اي احساس بالمسؤوليه انه اخته لحالها ) و ترك باب الشارع مفتوح ، و دخلوا اثنين شباب حرامية للبيت ( وسبحان الله بالصدفه وهم ناطين على حوشنا شافهم وهو طالع ) و حاول يمسكهم بس هربوا ! انا لما خبرني بالموضوع بكيييييييييييت حسيت انه ما وراي شخص اعتمد عليه بعد الله اللي قهرني ان موضوع ترك باب البيت مفتوح تكرر كثيررررررر الى هاللحظة بدأت مشكلتنا الأساسية : قبل العيد ب أيام بسيطه مرضت مرض شديد و ضغطت على نفسي عشان اسوي له الفطور بس كان الفطور ناقص كم صنف لاني كنت تعبانه ف صار يسب و يصارخ ويقول : لو انا فطرت بالمسجد مع الفقراء كانت الأصناف اكثر انا انجرحت لاني ضغطت على نفسي جدا وحسيته ما قدر هالشي انا فطرت هذاك اليوم على تمره فقط و وداني السوق بس برجع شغله وبطلع .. وقلت له انزل معاي اخاف ادوخ من التعب ورفض قال لي انا مواعد واحد نزلت لحالي وانا اررررررجف وسويت الشغله اللي ابغاها وجلست ع الكراسي يمكن ساعه انتظره بعد كذا حسيت نفسي اشتديت شوي ورحت بشتري لي اكل لاني مو ماكله شي ! واتصل هو قال يلا انا برا قلت له انا جالسه اطلب لي عشا دقايق واجي صار يسب ويلعن ويقول حسبي الله عليك مالقيتي تاكلين بهالوقت وربي اذا ماطلعتي بروح عنك و روحي مع اي احد غيري انا قفلت الخط بوجهه و اخذت اكلي وطلعت بهدوء وما ناقشته لكن من بعدها عاهدت نفسي ما اضغط على نفسي ابدا وانا تعبانه عشانه ( لانه مايستاهل ولا يرحم ولا يعطف ) بعد كذا استمر مرضي تقريبا اسبوع و اكثر طايحة على الفراش وكان جدا متنرفز كل يوم يصارخ ويقول متى تطبخين متى تسوين وانا اقول له والله اعذرني مره تعبانه ! .. بعدها انفجر علي ب أيام العيد وقال لي انتي شخصيتك قوية والله يكسرك و ان شاء الله تدور الدنيا وتحتاجين الناس وماتلاقين احد ( هذا عشان ماطبخت وعشان موقفي مع عملي ) وصار يسب ويصارخ وانا اناقشه واجادله ( ما اتذكر ايش كنت ارد عليه ) المهم جلس يتفلسف علي فوق الساعه ومو راضي ينزلني للبيت يدور حول البيت وانا مليييييت اقول له نزلني ما ابغى اتناقش يقول لا ما انزلك لين تقتنعين انك فيك اخطاء و و اللي صار اني سويت حركة ، كنت دايم اسويها معاه مرات لما يتناقش معاي ب حده وابغى انهي النقاش و اخليه يضحك و سحبت شماغه ههههههه هو مره انقهر و طردني من السياره وقال كيف تتجرأين ! قلت له : دام هذا اسلوبك معاي ومن الصبح تغلط علي والله ما اركب معاك بعد اليوم ! ظلت علاقتنا رسميه كم يوم و صار يتعمد يحبسني بالبيت زي اللي يبغى يعاقبني عشان حركة الشماغ وتصير عزايم كبيره لأهلنا فترة العي واقول له طلعني يقول لا عشان حركتك قبل كم يوم ! وهو يطلع من الليل الين الصباح ومخلي الباب مفتوح علي وبدون مايجيب لي اكل ( والثلاجه فاضية ) وبدون ما يسأل عني اشتكيت لأبوي وقال : اذا مارضى يطلعك روحي مع السواق اللي صار اني طلعت مع السواق بدون علمه عشان اسحب من حسابي بالبنك ( وقبلها استأذنت من ابوي ) وطلعت رحت المول و تغديت وتمشيت شوي ومعاي اختي - اختي كانت مسافره مع اهلي ورجعت فترة العيد لحالها للبيت ! كنت مخنننننننوقه بموت مو متعوده اني انحبس هالفترة الطويلة بالذات انها اجازه وابوي عودني لو ما طلعني وخلاني انبسط يسمح لي اروح مع السواق بس بالنهار ولمشاوير بسيطه ! المهم هو اكتشف واتصل يسب و يهدد زي المجنون قلت له انا استأذنت من ابوي قال مالي دخل ب أبوي انا ولي أمرك وان اكتشفت انك طلعتي مره ثانيه ب اوريك شغلك ! رجعت من الطلعه وارسلت له مسج اني اعتذر انه كان المفترض اعطيه خبر على الأقل عشان ما يخاف ! طبعا حقد علي اكثر مع موضوع السواق و موضوع الشماغ ! .. آخر شي صار لي قبل امس صحيت من النوم اصلي الفجر ولقيت البيت كله بودرة بيضآ و جا عندي يصارخ انه ليش ما مسحتيها قلت له انا مو عارفه ايش هذي اصلا قال هذي عشان الحشرات زي المبيد ، يلا امسحيها الحين قلت ان شاء الله ! ورجعت نمت ع اساس اول ما اقوم بمسحها ! قمت الظهر .. اول ما سمع صوت باب الغرفه ينفتح جا عندي يصارخ ويطق الباب بققققققوه انه ليش مانظفتي وانتي عطيتيني كلمه ! اقسم بالله فجعني ! وانا مارديت لاني كنت حاطة سائل الغرغرة ب فمي ( ادري سبب يضحك ) بعد كذا رحت دقيت عليه الباب اطلبه يوديني بيت صديقتي ( مسويه حفلة كبيره وعازمتني من اسبوعين وشريت لها هديه - يعني مو عزيمة عادية ) قال لي ب اوديك بس على شرط تنظفين قلت له بلا عبط بتوديني ولا لا ؟ قال بوديك لو نظفتي قلت اوك بنظف بس اكيد توديني ؟؟ قال اي ان شاء الله بعد ساعه رحت دقيت عليه قلت تراني نظفت وبليز لا تخذلني هالمناسبه مهمه لي واذا بتنام من الحين خليني ادبر نفسي مع السواق لو ما بتصحى قال لا اكيد بوديك يوم جا الموعد رحت دقيت عليه وصار يقل أدبه يقول لي انقلعي ما بوديك لو تطيرين وروحي غيري ملابسك و نامي انا مزاجي اليوم يقول لي ما اطلعك لاني طلبتك تنظفين من 3 ايام ومطنشتني ( طبعا كذاب هو بس طلب مني امس الفجر ، والعصر نظفت ) يعني سوا فيني حركة نذله مره واخلف وعده معاي انا هنا انفجرت وقلت له شوف انا بستأذن من ابوي وبطلع مع السواق وانت وعدتني المفروض تكون قد كلامك يا رجال يا شيخ الرجال ولا بس فالح تتفلسف علي لا تروحين ولا تجين ومن اليوم ورايح بطلع وقت ما ابغى واذا هددتني او مديت يدك علي بكلم خوالي يكسرون عظامك ومره ثانيه لما تقول كلام تصير قده ! بكيت من قهري ، و طلعت مع السواق ! بعدين على الفجر هو صحى وشافني جا عندي يسأل ليش ما نظفتي ؟ ( وانا اساسا كنت منظفة ) .. طنشته ما رديت وصار يقرب وجهه من وجهي ويصارخ : ليش مانظفتي وانا مطنشه ومشغوله باللاب توب ومقهوره منه على تصرفه امس حسيته طاح من عيني ! جا عصب و اخذ لابتوبي قال والله ماتشوفينه قلت له جيبه بسرعه ، وصرنا نتعاند ويدفني و أدفه ( نتهاوش من جد ) بالنهاية انا خذته بالقوة وجلست بالصاله بهدوء ورجعت فتحته ورجع يصارخ ويسب بكلام قذر وانا مره ما ابغى اتكلم معاه ولا لي خلق نكد على الصبح ! دخلت غرفتي وهو يصارخ وتجاهلته جا لحق وراي .. واخذ جهازي و رماه و ضربني شد شعري وعطاني كفوف ( للحين اماكن الضرب تعورني ) واخذ لابتوبي و جوالي واخذ مفتاح غرفتي بعدين لحقته بهدوء قلت جيب مفتاح الغرفه ! قال ما بجيب وصار يضربني اكثر ! رحت الغرفه و انسدحت على سريري قال بتكلم معاك ! قلت اسفه ما بتكلم معاك وانت ضاربني قال انا ضربتك عشان تحترميني وتسمعين كلامي قمت ضحكت قلت له : على فكره تراك شخص ضعيف ومهزوز من داخل تسميها مرجله ؟ تمد يدك علي وانا ضعيفه وانت عارف اني ما اقدر اردها لك ! وانت عارف بعد لو ابوي هنا ماكنت تجرأت وهو يقاطعني يقول لا تغلطين ويصارخ .. وانا مستمره اتكلم بهدوء ومطنشته جا مره ثانيه ضربني ضرب اقوى من الأول ! قلت له اطلع برا ما ابغى اتكلم معاك ! قال الا بتتكلمين ! رحت طلعت كتاب اذكاري وجلست اقرا وهو يتكلم ويصارخ انه انتي عنيده و قوية ربي بيكسرك ومحد متحملك الا ابوي .. وانا مطنشششه جا مره ثالثه وضربني ضرب اقوى وقال لما اكلمك تنتبهين معاي ! طنشته وسويت نفسي ما اسمعه وهو مستمر يتكلم ، و كل كلامه بنفس المنوال ( انا شخص ناجح بحياتي وانتي محد بيتزوجك على اخلاقك عاندتيني وما نظفتي بسرعه و قوية ما تتنازلين وانا كثير سكت عليك من يوم العيد لحد اليوم و امشي و اطنش وانتي تماديتي ولازم تفهمين اني رجال والمجتمع عطاني اشياء ما عطاك اياها المفروض تعرفين مقامك وتكون حدودك بس البيت والتنظيف انا المجتمع عطاني الحرية انبسط و اطلع وابوي مسكين ضعيف انتي لاعبه عليه شخصيته ضعيفه مو زيي ) جلس يتكلم هالكلام وحابسني بالغرفه 3 ساعات ونص ! وانا ساكته ما اتناقش و بس ابتسم ب استهزاء ! بعد كذا اعتذر مني قال والله احبك وانتي اختي بس انتي تستفزيني ولاتطلعين مع السواق اخاف عليك ( قلت له لاتكذب لو تخاف فعلا و اهمك انا كان سألت عني وجبت لي اكل او فلوس ع الاقل ) قال والله ما دريت انك محتاجه ما قلتي لي قلت له : انا مره قلت لك عطيني فلوس بشتري لي اكل وعطيتني ظهرك ورحت مع اصحابك وقلت دبري نفسك ! قال والله انا اسف وسامحيني وتبغيني ابوس رجلك ! قلت لا ما ابغى شي بس ابغاك تعرف لو تشوفني غلطانه بحقك مره انت غلطت علي مليون مره وليش تخلف وعدك معاي وانا مواعد صديقتي قال كنت نايم وماحسيت على نفسي وانا اشتمك ! قلت له وليش تهددني لما طلعت مع السواق اذا انت مو قد كلامك قال حتى لو ماكنت قد كلامي ما تطلعين معاه انا ولي امرك هنا وتستأذنين مني ! وضربتك عشان تحترميني قلت له الانسان المحترم يفرض احترامه ب أدبه و اخلاقه وانا من طلعت على هالدنيا وانت تسبني بكلام قذر شوارعي يعتبر قذف بشرفي على سبيل المزح وانا عارفه انك ماتقوله لأصحابك قال صح انا ماكنت اقوله لأصحابي ، بس كنت اقوله لك على سبيل المزح قلت له : مافي انسان عاقل يمزح بكلمات فيها قذف مع اخته قال اوك خلاص فهمت انك تنجرحين وانا اسف الملخص : ان كل شي اعتذر لي عليه سواه لي بحياتي كلها ! الا الضرب : قال لو ما احترمتيني وتجاهلتيني او قليتي ادبك علي وانا الكبير ب اعطيك كف على طول الشي الثاني قال لي لك مني اطلعك كل يوم واغرقك فلوس عشان ما تلجأين للسواق لكن لو شفتك طلعتي معاه من وراي حتى لو ابوي راضي ب اجلده واشتكي عليه و بذبحك معاه ! و احبك واموت فيك بس بطلي عناد ! .. الحين انا مقهوره اني ما وقفته عند حده مع سالفة الضرب + سفرنا للخارج راح يتحدد بعد ايام \ ومحتاره هل امشي على فكرتي الأولى و اعتبره جسر و ممر لأحلامي .. ! انا متأكده انه راح يتغير من ناحية السب والشتم و امور كثيره اعتذر لي عنها ! لاني اعرفه ( لما يعتذر عن شي ما يرجع يسويه ابدا ) لكن خايفه من موضوع الضرب ما احس بالأمان معاه ! // و اسفه لاني طولت ولأن مشكلتي ممكن مليانه تفاصيل ممكن تعتبر تافهه لكن انا محتاجه اتكلم و افضفض لمكان اثق فيه عن اللي صار لي طول الايام اللي فاتت انا افكر اكلم خوالي وابوي .. بس ما ابغى اصعد الموضوع الا بعد ما افكر بكل شي لانه وعدني يحترمني وما يهددني وما يقل ادبه !! بس الضرب : ( وابغى اسأل سؤال اخير : هل الرجل له حق ( اذا استفز من وجهة نظره ) انه يمد يده على مرأه ضعيفه ؟ |
رد : اخوي ضربني !
الله يسعدك ادعي الله يهديه
صراحه مدري ينخاف احد يروح معاه للخارج هو شكله مراهق او مدلل زياده كل شويه ناط فيك قويه شخصيه وقويه ليه والله لو انك قويه كان كسرتي يده ووريتيه شغله احس معاااه عقده فيه خلل امكن يكون قلبه طيب لكن لديه مشكله ما استخيري الله في امر الابتعاث ككل ومعاه خاصه والله اخاف تتهاوشون عند الاجانب ويروحون يترقون علينا والمشكله اذا سافرتي ماراح يلبس شماغ فكيف تجريه شيء مهم البودره البيضاء حقت ايه من وين جات بودره حشرات وللا ايه لا تزعلي مني مدري خفت اخوك يتعاطى لاقدر الله او سليم والله انك طيبه وبنت حلال وتطبخين كل يوم ويقول قويه والله يقويك ان شاء الله في طاعته |
رد : اخوي ضربني !
اقتباس:
كذا احس فجأه صحى عقلي لأني من الصباح احاول أتناسى ! الحين انا معزومة لعزيمة كبيره عند جيراننا وهو قال لي اليوم الصباح عادي ب اوديك بس مقدر اروح لاني توني شفت وجهي فيه كدمة واضحه ! الحين انا ابغى اناقشك افكر اكلم عمي يتدخل لانه عاقل وملتزم و أثق فيه ! احس صعبه اسكت له على الضرب اخاف يعيدها وهو اصلا قال لي اياه لو عاندتيني ب امد يدي مره ثانيه ! ومن وجهة نظري : اي انسانه تنضرب وتمشي هالشي لأول مره تستاهل تنضرب ألماسه هو مو مراهق عمره قريب الثلاثين ولا مدلل ابداً بس احسه سفيه وافكاره تافهه واحسه يبغى يثبت انه رجال علينا ! حتى دايم يكرر انا رجال .. من ناحية انو لو قوية كسرتي يده : انا كنت كلما يضربني ارجع امسك يده واطالع ب عيونه واقول له لا عاد تمد يدك علي ! آه من ناحية الإستخاره راح استخير و راح ألجأ الى الله سبحانه وتعالى كليا بهالأمر انه يفرج عني همي - الشماغ والله ضحكتيني عليه هههههه هو المقصد انه ما يبغاني المسه لما يتكلم او يصارخ يحس اني هزيت هيبته - البودرة البيضاء لا انا متأكدة انه للحشرات لأنه اختي معاها العلبه هي شاريتها ! طيب عطيني حل كيف اتصرف معاه ؟ هل ادخل شخص كبير .. ؟ |
رد : اخوي ضربني !
افكر اني اروح اقول له ايش فكرتك عن ضربك لي ؟ تحس نفسك نادم
اذا عاد نفس كلامه لي اليوم الصباح بقول له خلاص اعذرني انت تضطرني اطلع مشاكلنا لبرا البيت وبخلي عمي يتدخل ! بس متوقعه يضربني مره ثانيه احس ب يستفزه كلامي !! و مفكره اخليه يكتب توقيع خطي انه ضربني ( ادري ان فكرتي تضحك ) بس عشان اوريها اعمامي او خوالي اذا عادها مره ثانيه عشان مايقدر ينكر او يكذب و افكر بعد اقاطعه كليا واقول له علاقتنا بس بتكون صوريه ! عشان يندم وما يعيدها بس ماني قد هالشي لاني عارفه حكمه الشرعي ( ما تجوز القطيعه ) ابي احد يناقشني .. حتى لو يغلطني ب تصرفاتي عادي انا راضيه بس م ابغى اعيش ب خوف مع اخوي |
رد : اخوي ضربني !
والله دام مفقع وجهك كذا وبعد الاستخاره وان الله يلهمك الرشد
يتعلق بعلاقتك بعمك كيف هل علاقتك قويه اذا قويه ويمون فيه طريقه انه تكلميه بعد ماتكلميه تتفقي معاه على انه جاء عمك وشاف وجهك والح عليك وعرف ويتصل عليه ويوريه شغله منتي ملطشه بس اقسم بالله احس اخوك فيه خلل بيثبت شخصيته امكن احد يعايره ويقول منت رجال ومالقى غيرك يثبت الرجوله شوفي قلة الدين والصلاة تخلي الانسان يسوي كل شيء بالرغم ذلك برضه احس فيه بذره خير طالما حاول يعتذر وبس امكن قلة الدين والاهمال خلت منه كذه ادعي له قبل ماتدعين للابتعاث اسألي الله يرزقك الزوج الصالح ويرزقه الهدايه واتصدقي بنيه هدايته والله يوفقك |
رد : اخوي ضربني !
لا تدخلين احد .. ياحليله اخوك عزوة الوحدة اخوها وفعلا نادم و يحبك و لاتصارخين عليه و لاتعاندينه بس حسسيه بهيبته و بشخصيته وانصحيه بالصلاة و ادعي له دايما . يكسر الخاطر يوم يعتذر منك ..
|
رد : اخوي ضربني !
لاتعلمين احد ماله داعي خلاص الامر بينكم وهو اعتذر .. يعني فيه رجا ماله داعي تنشرين غسيله و تجينه بالقوة و فيه خير دامه ندم و اعتذر و لاتستفزينه وتحمليه
|
رد : اخوي ضربني !
عادي بس نفسيتك تعبت بلا توقيع خطي ههه بلا خرابيط الحين عشان مشاعرك مجروحه وتنزف
بعدين تفتكرينها وتضحكين بقهره منه يعني ضحكه صفراء سوي لك شيء يهديك اي شيء نعناع عصير ليمون استغفري كثيري وقولي دعاء الهم اما التوقيع اخاف يقول لك مثل الازواج بليه واشربي مويته وتجيك ضربه جديده |
رد : اخوي ضربني !
بصراااحة انا اشوف انه في المووضوع أغلاط كثيره ،،، أولها سكوتج عن ضربه ،،، اي عزوه هذا يورم وجهه اخته بهالطريقه الغبيه ،،، اي اخو يخلي اخته بلا اكل ولا فلس والباب مفتوح ،،، ابدا ما انصحج تساااافرين معاه
ًو انصحج تتدخلين حد كبير لانه واضح انه الموضوع أعجبه و ضربج اكثر من ثلاث مرات !!!!!! |
رد : اخوي ضربني !
أبوك موجود ليش دخلي غيره هو يكلمه و يحاسبه و يحطله حد |
رد : اخوي ضربني !
اقتباس:
و فكرتك حلوة ، بس انا ماعرف اسوي هالأفكار حابه اكلم عمي دايركت بدون ما اكذب على اخوي ومن ناحية المعايره فعلا دايم يعايرونه ( هو صح اخوي وغالي علي ) بس بقول الحقيقه عشان اوصل لحل ! يعني خوالي يعايرونه انه عديم مسؤوليه ومو رجال ابوي نفس الشي دايم ينتقده ع هالسالفه وانه ما يغار علينا صراحه ألماسه احس كنك عايشه معانا كل تحليلك صحيح ! بالذات لما قلتي السبب تقصيره في الدين ( لانه هو كان لما يضربني او يسبني يستدل بآيات من القرآن انه الرجال قوامون على النساء و آيات ثانيه ) ولما قلتي فيه بذرة خير ( اعتذاره اللي استمر 3 ساعات ونص نقطه تحسب لصالحه ) بس انا ابغاه يلغي فكرة الضرب |
رد : اخوي ضربني !
اخوك حنون ولكن مندفع لا أكثر
انتي كوني ذكيه ولاتتصادمي معاه وخذيه بالكلام انتي اللي بتكسبي بالنهاية البعثة روحي وكملي اجرائاتك لكن اعتبريه محرم صوري لاتعتمدي عليه هناك نهائيا،،، موضوع التحرر في حلقه مفقوده ،،، اذا تأكدتي انو اخوك متحرر ( التحرر اللي ممكن يوصل للإنحلال) مو متفتح ،، الأفضل ماتآخديه لبرا يمكن يعتبرك جسر يوصل هناك و يعيش ملذاته ببلاد الغرب بلاحسيب ولارقيب ،،، موضوع الضرب اذا اول مرة ( اذا متعود في حلول ثانيه )لاتتجاوزيه مهما صار دخلي ابوك يآخذ حقك ولا اعمامك ويعتذر ويحلف مايعيدها ،،، انا انضربت ووصلتها للشرطه وماتنازلت الا لعيون ابويا وبمبلغ وقدره ،،، مسكين اللي يعتبر الرجوله اهانة انثى ضعيفه ،،، |
رد : اخوي ضربني !
اقتباس:
لانه قال لي اسلوب الضرب ما راح أبطله أبدا وبصراحه كلمة عزوة منك استفزتني كثير صح اخوي واحبه و انا من الحين مسامحته بس ابغى حد لسالفة الضرب بس مسألة عزوه ؟؟ احسك ما قرأتي الموضوع زين .. العزوة اللي يخليني بدون اكل ولا فلوس ايام وهو يطلع ويسهر ويخلي الباب مفتوح ويدخلون علي حراميه ويستمر بهالشي ؟ العزوة اللي يمنعني أصلي ويتحكم ب حجابي ونقابي ؟ العزوة اللي يشوف انه رجولته فقط ( محصورة بأنه يمنعني آطلع و أجي ) لكن ابد مو سائل عني العزوه اللي يقذف اخته العفيفه بشرفها دايم ؟ العزوة اللي يخلف وعوده معاي ( كثير مو بس أمس ) ويحرجني دايم ؟ العزوه اللي كلما يدخل البيت ما يسلم ولا شي يدخل يصارخ ! والله العظيم هذا اسلوبه معاي طول الإجازه يدخل على طول يصارخ وانا ساكته واقول ان شاء الله ماعمري رفعت صوتي عليه او بديت اغلط عليه لكن لما تعبت منه وقررت اطنشه اليوم .. استفزه هالشي و مد يده ! خوش عزوه ! من خلال مواقفي بالحياة ومع خالص حبي لكل الناس اللي حولي ( مهما صار ) اكتشفت ان عزوتي وسندي الحقيقي هو الله سبحانه وتعالى فقط ! اعرف انه نادم واعرف انه يكسر الخاطر ومايهمني حقيقة ندمه ب قد ما يهمني انه ما يمد يده علي مره ثانيه فقط ! بالنسبه للصلاة لما اكلمه يقول انتي متشدده وارهابيه وأمثالك يخلون الناس تكره الدين يعني يقول كلام اتوقع انه يقدح ب عقيدته .. الله يصلحه و يهديه لاني حتى لو ما انصحه بس اقول له وقف السياره ب اصلي يبدا يفتح هالإسطوانه ( وش هالتشدد ومحسستني ان الله ما يغفر ) |
رد : اخوي ضربني !
اقتباس:
طيب عطيني حل كيف اخليه يشيل فكرة الضرب عن باله ؟ لانه معطيني مهله يقول لو قهرتيني خلال هالثلاث أيام او طنشتيني برجع امد يدي ولي الحق لأني رجال ! |
رد : اخوي ضربني !
اقتباس:
كلامك يريحني لانك تذكرين الله وتذكريني بالله في كل ردودك |
رد : اخوي ضربني !
اقتباس:
بس اذا ما انتهى موضوع الضرب اكيد ماراح اسافر بإذن الله ( ياروح ما بعدك روح ) اختي ما ضربني 3 مرات ضربني كثيييييير .. كلما اسوي شي يحس بالاستفزاز ويمد يده اقول له جيب مفتاح الغرفه يقول : تبين تتحديني يعني ؟ ويمد يده !! كل كلامنا الصبح كذا كلما قلت كلمه رجع و مد يده !! طيب تشوفيني ساكته : ( مره يوجعني هالكلام لاني قاعده احاول اخذ الحل الصحيح عشان يوقف : ( انا ما ابغى ادخل خوالي او اعمامي الصغار لأننا بننفضح يعني احسهم ما بيحترمونه و احس بينتشر خبرنا لكن عمي يحبه واحس فاهم شخصيته واحسه بينصحه وسكت الين المسا اليوم عشانه كان حابسني وماخذ مفتاح غرفتي و جوالي والتيلفون ما يبغاني اكلم احد : ( |
رد : اخوي ضربني !
اقتباس:
اصلا لو موجود ماكان تجرأ يخربط علينا كذا بكلم ابوي بس ابوي بعيد يعني مهما كان ماراح يقدر يناقشه و لانه هو مو مقتنع ب أبوي ككل - يقول ابوي ساكت لكم ف احس لو دخل عمي بينحرج اكثر لو شاف عمي يفكر غير لانه هو ماخذ فكره ان اي حرمة تستفز رجال ( من وجهة نظر الرجال ) له الحق يضربها عادي عشان تتأدب ويتوقع ان كل الناس يفكرون زيه |
رد : اخوي ضربني !
اقتباس:
والله يا اختي ابدا ما اتصادم معاه اساسا ما احتك فيه لانه طول الوقت برا بس يدخل ويصارخ .. ! يعني طوال ايام الاجازه اللي راحت ماحس صار في أخذ وعطا واحتكاك حقيقي بس أوامر وصراخ و سب مررررررررره خايفه من مسألة الابتعاث ، بقولك شغلة : انا انسانه ما اتحمل الألم النفسي ابدا و من بعد سالفة الضرب ما احس بالأمان معاه امممم احس مسأله الابتعاث يبي لها توازن ، يعين لو كان ضرره قليل علي ( مثما كنت اتوقع سابقا كان ما فتحت الموضوع ) لكن احسه فعلا قاعد يجرحني بالكلام والأفعال بالنسبه للتحرر : هو مو متفتح ، هو ما عنده مباديء شرعيه يمشي عليها ثوابت نص عليها الشرع بنصوص صريحه صحيحه يجلس يناقش فيها ويسمح لنفسه يفتي و يحلل مثل ( الصلاة الاستغفار العباية الساترة النقاب الموسيقى الافلام ) يعني مو مقتنع انه مسوي ذنوب بالعكس مقتنع ان كل النصوص غلط ! ودايم يقول لي انا اتبع القران فقط ! وفي القران مافي شي زي كذا ومالي دخل بتفسير العلماء لانه كل شي حرموه ! و انا شاكة بالنقطه الاخيره انه يعتبرني جسر يسوي فيه اللي يبغى لانه الحين يسوي هالشي صاير يوميا يعزم ناس للبيت ويقفل عليه جناحه كله ويخليهم ينامون عنده واشكالهم ما تريح ( اقرب للإناث ) وهالشي بوجود اهلي عمره ما سواه ! مو اول مره يضربني مره قبل 7 سنين ونفس الشي ابوي كان عنده انتداب وكان يضربني هذيك الفتره على نفس الاسباب انه طلبني احط له الغدا على السفره قلت له اوك شوي و اجي ( كنت اكلم صديقتي تيلفون اخذ منها تحديد مادة للاختبار ) و انتظر شوي بعدين جا و كسر التيلفون و ضربني بالحزام و العقال ! تدرين انك فتحتي ذهني على شي ما قد فكرت فيه هو ما يمد يده الا لو ابوي سافر سفر طويل احسه يبدا يحس بٌاحساس الرجولة والسيطرة بهالطريقة ! |
رد : اخوي ضربني !
اعتذاره لاجل انك جسر عبور للسفر
هدديه ما في سفر واخبري عمك اخوكي جبان يختبأ خلف يده ثلاث ساعات اعتذار لاجل ما تلغي السفر فقط لا غير ويهدد انو رح يكرر ضربك لكي نختي وما تلغي السفر خوفك من الضرب الغي السفر واجلسي واخبري عمك |
رد : اخوي ضربني !
اقتباس:
بالأساس انتي مو قريبه منه وعلاقتكم رسميه مالو حق بالأساس يطلب منك أي شي استغرب اهلك يعرفو انو عديم مسؤولية ويحملوه مسؤوليتك ؟ |
رد : اخوي ضربني !
اقتباس:
انه يعتذر عشان سفرتنا بعد ايام وخااايف اغير رايي لاني قد انخطبت قبل فتره قصيره و كان يحاول يفركش الموضوع خايف اني اتزوج وما اسافر معاه اعرف انه جبان لأنه قد صارت مشاكل كثير شباب ضربوه ومدوا يدهم عليه ما فكر ينتقم منهم او حتى يرد لهم ! لكن انا لاني اضعف منه مد يده علي كم مره دخل علينا البيت و اثار ضرب عليه انا متوقعه انه يذبحني لو كلمت عمي ويرجع يسجني بالبيت لانه حبسني اليوم ! رايك اكلم عمي بدون ما اناقشه ؟ ولا اناقشه واذا حسيته نادم اقفل الموضوع ؟ بعد الانسان ما يحب الفضايح ! انا افكر اتكلم مع عمي بكره انه يجي بيتنا ويسوي جلسه لنا معاه وينصحه ! بليز فكري معاي لان الموضوع حساس و مهين ويجرح ! |
رد : اخوي ضربني !
الافضل انك تكلمين الوالد عشان توقفينه عند حده وماله حق ابدا يضربك ولو ضرب خفيف دام ان الوالد موجود
بس على فكره هو كان محق لما قال انك شخصية قوية ومعتده بنفسها لانك كنتي صامده ومتماسكه بشكل عجيب وهو يضربك مره تلو الاخرى |
رد : اخوي ضربني !
اقتباس:
وقلت له هالكلام اليوم الصباح : انه انت دخلت شباب وناس غير مريحه للبيت وابوي لو درا ماراح يرضى قال مو لازم يرضى أحد انا رجال و اقرر ! و صح انا مو قريبه منه وهو اصلا يطلبني انظف البيت مع انه عايش بجناح خاص فيه وما يدري عني بس يقول انا اطلبك كذا عشان تتطورين للأفضل وانا يهمني يكون كل البيت نظيف آه عانيت من مسألة انه عديم مسؤوليه واحساس اهلي لاني قبل ايام كلمت الوالد يرسل لي فلوس لانه اخوي ما يعطيني و مجوعني راح ابوي اتصل عليه و هزأه وقال له برسل لها على حسابك وعطيها جا عندي قال انا قلت لأبوي ما يعطيك خلاص انا بعطيك و مرت 5 ايام ما عطاني شي و امس طلبته فلوس قبل اروح بيت صديقتي قال مالك عندي شي لانك تأخرتي بالتنظيف !! |
رد : اخوي ضربني !
اقتباس:
راح تكون بردت السالفه واخاف يضربني بعدها ويتمادي : ( ترا والله اكتب وانا خايفه اخاف يدخل وهو متنرفز ويمد يده مره ثانيه ! - اخي الكريم بالنسبه لشخصيتي انا ما انولدت بهالشخصيه يمكن انولدت بجزء منها لكن الأكبر كان سببه بفضل الله نمط حياتي وظيفتي ( منصب قيادي بعمر صغير ) اغترابي عن اهلي لوحدي للدراسه بعمر صغير حالياً وتحت قيادتي فرع لمؤسسه تطوعيه كبرى على مستوى مدينتي وانا اعتز بشخصيتي لاني ماشوف نفسي ( جباره او ماعندي مشاعر او حجر ) واحس اخوي سبب من اسباب اهانته لي وقذفي وسبي و ضربي انه شخصيتي تستفزه مره قال لي ( الله يكسرك وانا بكسرك وانتي قدرتي على غيري بس ما بتقدرين علي وانتي جباره وظالمه) وانا اشوف كل كلامه فاضي لانه حكم علي من خلال موقفي مع عملي ( كما اخبرني ) تماسكت معاه ؟ لانه يبغى يكسرني وانا ماراح اعطيه هالفرصه ولا راح ابكي قدامه لانه ما راح يرحمني ( لو كان فعلا راح يرحمني كان ما جوعني الايام اللي راحت ) وبصراحه السبب الاقوى الصلاه وصلتي بالله هي اللي تخليني اتماسك ! |
رد : اخوي ضربني !
اقتباس:
واستغلي موضوع السفر لصالحك خاصة انو متحمس للسفر وجالس يحط خطط لحياته هناك هوه متفوق في دراسته عشان كدا يبغى يسافر ولاعشان يبغى منبهر بالحياة هناك ويبغى يعيشها ؟؟ من دحين لاتطلبي منه شي وخلي طلباتك من ابوك مباشره وهو يكلمه واذا ما عمل لك الشي زي ماطلبتي ارجعي كلمي ابوك ،،، اعرف انها بتطول الهرجة بس لازم يحس بردة فعل منك على الضرب،،، انتي لاتتصادمي معاه ولاتغلطي بالكلام وتستفزيه وتأكلي علقة جديده ،،، خلي ردودك معاه مقتضبه كلمة ورد غطاها،،، جدا متعاطفه معاك على موضوع الضرب انتي مو حيوان يجلس يجرب قوته فيك 3 مرات انا لما انضربت وصلتها للشرطة ودار الحماية وحقوق الانسان وكان بيني وبين الإعلام شعره دحين اخواني يفكروا ألف مرة قبل مايتجرأو يمدوا يدهم وعلاقتي فيهم اسوأ من علاقة اخوك فيك سألتك عن تصرفاته بشكل عام بالذات موضوع التحرر فكري ودققي ملاحظاتك واربطي المواقف ببعض،، اول مرة اعرف أخ يقول لأخته اخلعي النقاب حتى لو كان مو مقتنع فيه أكيد بيخاف المجتمع ومن كلام الناس ،،، ارجعي تذكري لما يكون الباب الخارجي مفتوح تذكري المواقف قبلها وبعدها ،،، |
رد : اخوي ضربني !
اخوك حبيبتي جوته بدره طيبه يبغاله احد يطلعها
اخوك يحب احد يحسسه انه رجااااااااااااااااااااااااااااااال حطي تحتها مليون خط قريبه شخصيته م اخويه امدحيه دايما بالطالعه والازله في ناس كدا تحب المديح وحسسيه انه فعلا رجال وقوليله طلباتك اوامر وكلميه بهدوء في مسالة الضرب قولي اخاف تضربي واا بالغربه اعطي الامان ولا اكسلها وبيصير زي العسل معاك صدقيني الله يهديه ويوفقك بدراستك |
رد : اخوي ضربني !
اقتباس:
كلما تمر اللحظات تزداد عندي فكرة اني ما آروح معاه آبدا لانه شخص لا يؤتمن - بالنسبه للدراسه انا كان طموحي الإبتعاث وهو شافها فرصه يروح معاي لإنه معدله جدا منخفض وانا معدلي عالي هو مش طموحه الدراسه بقد ما هو طموحه ياخذ درجه علميه عاليه ويرجع ويصير معيد او دكتور عشان يضمن وظيفه مريحة بدخل عالي لأنه كان موظف على شهادة البكالوريوس و وظيفته مرهقه جدا وساعاتها طويله وانا فرصته الوحيده للإبتعاث و احس فيه نوع من الانبهار لانه متأثر جدا بالحياه الغربيه بشكل لايوصف بس احس الأكثر انه يبغى وظيفة مريحة ! شوفي حبيبتي هو من بدا مشوار السب عنده والإهانات صرت أخلي ابوي الرابط بيني و بينه و هالشي يستفزه ججججججججججدا اذكر المره الاولى لما ضربني واتصلت على ابوي و سمعني انقهر و ضربني اكثر ! لكن خلاص انا ماعاد بطلب منه شي عشان يوصل الموضوع لأبوي بطلب من اي احد غيره ! - لا هو من النوع اللي يتأثر بكلام الناس ججججدا خاصة الجيران والاقارب اذا كان في البيت يعني هو بعد ما ضربني قال لي الحين مين بيتزوجك وانتي طالعه مع السواق افرضي جارنا شافك ؟ قلت له : طيب انت قبل ايام لما رحت عزيمة صديقتي دقيت عليك ترجعني قلت لي ارجعي مع السواق قال : لما اكون تعبان عادي ارجعي معاه قلت له : ما شاء الله والناس راح تدري انك بهذيك اللحظة كنت تعبان وراح يرجعوا يخطبوني ! و لما نبعد عن البيت العكس اكثر من مره نروح لدول مجاوره ويضغط علي آشيل النقاب انا سبق وكتبت انا متأكده لو رحت معاه راح يبعدني عن الله ! |
رد : اخوي ضربني !
اقتباس:
طيب حبيبتي هو ما يحس بالرجولة الا ب شيئين لاحظتهم : 1- اذا طلعت مع السواق بدون ما اخذ رايه علما بأني سويتها بس مرتين لانه طول الاجازه اطلب منه يطلعني و استأذن ويرفض رفض قاطع يقول انا مزاجي يقول لي انك ماتطلعين اليوم وانا رجال وانا اللي اقرر ايش تسوين 2-اذا امرني و ما فذت بنفس اللحظه سبق وكتبت هو ضربني لاني تأخرت بالتنظيف وعشان موضوع السواق يقول لي ليش تتجاوزيني وتكلمين ابوي قلت له انت اضطريتني لهالشي لا ترحم ولاتخلي رحمة ربي تنزل ! يعني انا ايش ذنبي اتحمل مفاهيمه المغلوطه عن الرجوله : ( |
رد : اخوي ضربني !
اقتباس:
بس زي ماقلتي فاهم الرجولة خطا تلاقي احد سحب البساط من تحته ( ابوك اخوانك الكبار ) او أصحابه من النوع اللي يهايط وانت رجال وانت مو رجال وياكثر ماسمعناها او عنده مشكلة نفسيه ( احساس بالنقص خاصه لما يقارن نفسه فيك )ويبغى يثبت لنفسه انو اقوى منك في اشياء ثانيه غير مجال العمل اخوك يشبه اخويا الكبير في بعض تصرفاته وكان واضح فيه لمحه من جنون العظمة ( اذا جاء صعيف تحت يده استقوى ونسي قوة ربنا ) بس الحمدلله دحين هجد شي كثير وصار اهدأ ومايتصادم كثير مع انو الهياط وحكاية انا رجال لازالت موجوده بس بدون حدة زي زمان |
رد : اخوي ضربني !
تحليلك انت لشخصية اخوك تحليل..دقيق في ظني..
وأرى من اهم اسباب تسلطه عليك هو نجاحك وفشله.. وربما قد يسمع كلام جارح من الاقارب..شوف اختك بنت وناجحة وقد المسئولية.. وانت الرجال فاشل وما يعتمد عليك.. ومن هذا الكلام الذي يكون له أثر سلبي عليه.. فيحاول ان يظهر تفوقه عليك بكونه رجل ومسئول عنك..ولا تستطيعي فعل شيء بدونه لا خروج ولا سفر..بل وانت ترضخين لأمره فتطبخي وتنظفي...وغيره.. بمعنى ليس عنده شيء يرى فيه تميز عليك في ظنه إلا أنه ذكر..فيريد توظيف هذه الميزة..اسميها ميزة تجاوزا..يريد توظيفها للتغلب على عقدة النقص.. عقل أخيك وحس المسئولية فيه أصغر بكثير من عمره وكأنه في سن المراهقة.. |
رد : اخوي ضربني !
انت لديك طموح ولكن سفرك وتحقيق طموحك مع اخيك سيتعبك نفسيا .. اخيك غير متحمل مسؤليتك حتى وانت بين اهلك .. فكيف عندما تسافرين بعيد عن اهلك .. قد ذكرتي ان اخيك ادخل اصدقاءه عنده وناموا ايضا فهل ستضمنين ان لا يدخل عليك احد هناك ..
يحتاج تثقيف في الدين وهذا لا بحصل الا بالرفقه الصالحة بإذن الله .. احساسه بالرجوله مشتمل بفرض الاوامر فقط .. وهذا ليس في صالحه لانه سيتزوج بعد ذلك وقد تنقلب حياته بسبب ان زوجته ليست كأخته فهي من بيت اخر واوامره متعبه حيث يحدد شروط وهذا مرهق ذهنيا .. من نظرة محايده لا اعتقد انك سترتاحين معه في غربتك لان لوحدها الغربة كربة ويحتاج المغترب مكان مريح واناس يرتاح معهم ليسلي غربته وتمر السنوات بسرعة دون مشاكل وارهاق ذهني .. استخيري واستشيري لان ضربه لكي قد يتكرر ليحصل على رجولته اعانك الله |
رد : اخوي ضربني !
بعد كل هذا العذاب ولساعك تبين تروحي معه برا بعثه
وبعدين وين اهلك عن البيت تاركينك وحدك معه وهو يمنعك من السواق واختك لا ما يمنعها ويقول انه ولي أمرك وأبوك عايش عجيب والله انتي تبغينه جسر للطموحك وهو يبيك جسر عشان يفلها برا انتبهي منه مليون مره بالعربي لا تروحييييييييين معه أبد أبد |
رد : اخوي ضربني !
بحكم خبرتي اخوك أولا مهمل لما يقول لك تفشليني النقاب هذا ضعيف شخصيته واكبر دليل يقول انا رجال انا سافرت مع اهلي اوربا كانوا يلبسون النقاب وغطاء وجهه مافي أي فشيله كل واحد هناك حر في تصرفاته ثانيا لما ترك الباب مفتوح وراح هذا ليس عدم غيره عليك لاكن عدم مباله عدم مسؤليه هذا يرجع السبب ابوك ماعرف يربيه من الصغير على اعتماد نفسه والمسؤليه ثالث شيء كيف يقول لبنت انا بعتمد عليك لازم نسافر بعتمد عليك هههههههاي والله احسها مافي رجوله يوم تقول لبنت اصرفي علي او مستقبلي بين يدك المفروض هو يصرف عليك وتعتمدي عليه انتي ثالث شيئ أصدقائه رفقاء سوء وهو يأخذ منهم الحل لكي تسافرين مع خالك افضل او تتزوجين الحل الأفضل ترتاحين منه ومن كل همومك واحد يجيبك ويوديك
|
رد : اخوي ضربني !
نصيحه لاتروحين معه للابتعاث لانه قليل دين كما تقولين وهناك كل شئ مفتوح لارادع الا الوازع الديني والخوف من الله واذا لم تتوفر تلك الروادع فيه فأنصحك بأن تلغي البعثه خوفاً على دينك وسيغنيك الله من فضله ومن ترك شيئاً لله عوضه الله خيراً منها.
|
رد : اخوي ضربني !
سبحان الله نفس الموقف الضرب وعدم المسؤوليه الافكار الخاطئه كلها بسبب الصحبه السيئه اذا متأكده انه مستقصد اهانتك وكسرك فعلا ، مع ان الضرب والاهانات والقذف مو تصرفات اخ وسند وولي امر مثل مايقول! يقذف اخته شرفه ! اهلك لازم ياخذون حقك ..لانهم مسؤولين عنك ، ليه السكوت ابي اعرف ؟ اذا سكتي بيتمادى ،وتستاهلين الضرب وقتها بيكون بوجودهم !! هل اذا عرفوا بتكون ردة فعلهم عاديه لانه اخوك ؟ ولو مو من حقه والا؟ صوري اثار الضرب الي بوجهك وش تنتظرين ؟ حاولي تسجلي له صوت وهو يتلفظ عليك او يضربك .. الخ من اي جهاز غير جوالك لانه بياخذه زي المره الي قبلها عشان اذا رجعوا اهلك بالسلامه يوقفونه عند حده وومستحيل يتركونك عنده او يستامنونه على شي بالمستقبل! ويكون سبب قوي تلغين الابتعاث هذا الي سويته والحمدلله انحلت ، اسفه بس هالموضوع حساس جدا بالنسبه لي وسبب لي عقده |
رد : اخوي ضربني !
ابشركم عندي مستجدات
من امس اتصل على جوال ابوي مغلق .. قلت لازم اعطي ابوي خبر بالموضوع قبل ما اكلم عمي و أستشير ابوي واليوم ارسلت لأبوي مسج ع المغرب قلت له بابا حبيبي احتاجك ضروري راح اتصل علي من كابينه قال جوالي كان خربان اعذريني بكيت وقلت له ضربني اخوي و شوه وجهي ومانعني اطلع حابسني و وعدني يتغير ويطلعني ويعطيني فلوس .. ولي من امس ما شفته ! مقفل على نفسه جناحه الخاص ويطلع يسهر ويرجع ولا فكر يعطيني ريال ! قلت له وانا عايشه بخوف منه لانه قال لي كلما تقهروني بستخدم يدي معاكم ! قلت له ابغى اكلم عمي قال انا بكلم اخوك الحين وانتي دقي على عمك و حسبي الله عليه ، ، وخذي فلوس من عمانك واطلعي متى ماتبين ! وقال لي ابوي حاولي تلينين وما تشدين معاه واحنا بنتفاهم معاه قلت له اساسا و ربي مانشوفه مانشوفه ! .. الحمدلله صح بكيت كثير ! بس كنت ادعي كثير واستغفر كثير والحين بروح أصلي ركعتين و بكلم عمي يجي البيت يكلمه باذن الله ! انا ناويه اقول لعمي بس كلمتين : 1-انه عادي عندي انك تغلطني او تقول اني اخطيت عليه و راح اعتذر بس ما يمد يده علي 2- اذا مد يده مره ثانيه بلجأ للشرطة و ب افضحه ! انا الحين سترت عليه بس عشانه اعتذر ، بس باقي موضوع الضرب .. ( برجع لبقية الردود باذن الله ) |
رد : اخوي ضربني !
كذي انتي تعجبيني والله
|
رد : اخوي ضربني !
هو أعتذر لك لانه خاف تعلمي أبوك خير ما عملتي انك كلمتي أبوك بالموضوع كامل
ولا تروحي معاه ابتعاث اخوك غير مسؤول أبدا أحد يمد يده بهالطريقه على أخته رحمت الانسانه الي بتكون زوجته هذا وأبوك حي الله يطول بعمره مره زمان اخوي مد يده على أختي وعطاها كف وهو كان متزوج قام أبوي طرده من البيت وكماله ماتدخله لين تعتذر لاختك والبيت كله قاطعه الين اعتذر وبعدها ما عادها ابدا |
رد : اخوي ضربني !
الحين عندي شي ثاني بسيط مأرقني و لازم أحسمه بسرعه :
- انا كنت أستخير اني اكلم اكبر اعمامي بالموضوع عشان اسباب كثيرة : لانه شخص حازم ولانه شخص يخاف الله كثير ( يعني مستحيل يتكلم بهالموضوع للأقارب ) ولانه يحب كثير يساعد الأقارب و يصلح ولانه قبل فتره بسيطه سبحان الله كنا انا وياه نتكلم وخبرته اني قدمت ع الإبتعاث قال نصيحه يا بنتي لوجه الله لاتروحين مع اخوك قلت له ليش ؟ قال بس كذا انتظري لين ربي يرزقك الزوج الصالح او قدمي على جامعات هنا ! اهم ما عليك دينك انا كنت افكر انه يقصد من كلامه انه بلاد برا فيها فساد بس احس الحين لما رجعت افكر بكلامه حسيته يقصد اخوي !! لانه جلس يعيد نفس الجمله اخوك لاتروحين معاه روحي مع زوجك قلت له طيب نفس الشي المهم هو المحرم ، قال انا نصحتك وانتي براحتك ! المشكله ابوي لما كلمته قلت له بخلي عمي ( فلان يتدخل ) قال كلمي عمك الثاني أفضل لأنه ليّن و راح يتفهم ! حاولت اتناقش مع ابوي بس فصل الخط ومافي مجال اكلمه جوال مغلق !! انا ما ابغى اصعد الموضوع لشخص انا اتوقع بنسبة كبيره انه ماراح يفيدني عمي الثاني جدا لين وراح ياخذ الموضوع ببساطه واحس ماراح ينحرج منه اخوي كثير لانه مقارب له بالعمر وابوي قال لي قولي له لانه مقارب له بالعمر عشان مايحرجه ! طيب انا هدفي انه ينحرج و يستحي ويعرف ان هذي مو حركات رجال وصراحه ما ابغى اطلع مشاكلنا لبرا الا لشخص ممكن يفيدني ! وما ابغى انتظر اكثر الموضوع ب يبرد مو عارفه ايش اسوي اختي تقول اتبعي نصيحة ابوي احس وجهة نظره صح ، مو لازم نكسر عين اخوي بس انا اقول لها : حبيبتي تشوهنا يعني لازم تنكسر عينه قالت عادي ربي ب يسلط عليه ! اجل ايش الفايده اكلم عمي ؟؟ لما اكلمه اي احد ابي موقف حازم فقط مو طبطبه هل اتصرف من ورا ابوي ولا انتظر لين بكره يرد ابوي علي واتناقش وياه ، مابي تبرد السالفه انا صورت وجهي قلت ب اوري ابوي لو رجع !! |
رد : اخوي ضربني !
معليش ب اعتبر هالصفحه مساحه للفضفضه الين يفرجها الله من عنده
لأني محبوسه ( من ناحية اخوي ) وحابسه انا بعد نفسي بالغرفه لانه جرحني صرت اخاف منه اخاف اسوي اي تصرف يستفزه و يكسرني اكتب و دموعي تنزل جسمي كله مكسر وشعري قطعه لي ! يا الله ايش يستفيد الرجال لما يزرع الخوف بقلب بنت منه ؟ يعني انا كنت اقول حركات الضرب هذيك اللي سواها معاي مراهقه عبط وكنا مبزره لكن الحين تنعاد والله قويه احس بخوف ما لي الا الله مقهوره مقهوره كلما اتذكر كم مره ضربني كل يوم استرجع ذكريات قديمه احس اني غبيه كيف نسيت من يوم واحنا في ابتدائي و متوسط وثنوي و جامعه والين تخرجنا كثيييييييييير ضربني ! بمراحلي الدراسيه كان يغار من حب ابوي لي ، وكان يضربني عشان هالشي وبنفس الطريقه : اهلي يسافرون و على طول يستفرد فيني ! ويضربني ضرب وحشي اذكر انه كان يضربني بالحزام و بالعصآ كان يجرم فيني بس انا نسيت كل هالمواقف لانه مرت فتره طويله 7 سنوات اختفى هو فيها بعدين رجع لحياتي هالسنه توقعته كبر و تغير ! اليوم انا ما نظفت الصاله بس نظفت البيت كله من و إلى ( اسبابي كانت خوف منه لانه مهددني انه يبطش فيني لو شاف في البيت شي مو زين + اتجنب الصدام معاه لانه ابوي نصحني ب كذا ) طبعا ما شفته لي يومين .. قبل شوي جا للصاله واحنا جالسين انا و اختي و نام ( وهذا سبب من اسباب خلافاتنا ) انه يدخل اي غرفه بالبيت تعجبه بأي وقت وينام وما يسمح لأحد يتحرك او يطلع صوت و امي كانت تقويه علينا بهالتصرفات ! انا و اختي خفنا ودخلنا غرفنا وقفلنا على انفسنا الباب خفنا يحس بحركتنا ويقوم يسوي فينا شي لانه متحلف فينا بعدين طلعت آخذ شغله و حس علي قال لي كيفك طنشته و ما رديت حسيت بمممممموت من القهر !! كيف يكلمني عادي وهو آخر حواري معاه تهديد + وعود ما نفذها لي ! جا لحقني لغرفتي و دخل قال انتي نظفتي ؟ ( ومسوي نفسه مبسوط ) ؛نشته ما رديت قال انتي نظفتي ؟؟ ويعيد السؤال بصراخ ويقرب من وجهي عرفت انه بدا يتنرفز و بيمد يده قلت له لو سمحت مابي اتكلم معاك قال لي مو بدينا امس صفحه جديده وتصافينا واتفقنا انك تبطلين هالحركات الوصخه ! قلت له لا مين قال بدينا صفحه جديده وانت مهددني تضربني مره ثانيه وما اعتذرت على ضربك امس ! قعد يناظرني و سكت و راح ! بعدين جاتني اختي ( تعبانه لها فتره طويله و عندها مواعيد بالمستشفى تتعالج ) وموعدها اليوم الصباح قالت ابي اروح المستشفى قلت لها مو هو قال بيطلعنا روحي اطلبي منه ! راحت طلبت منه قال ماني مطلعك ما نظفتوا بالطريقه اللي ابيها وان طلعتوا ب اكسركم انتوا و السواق قالت له ترا ابوي موافق قال مالي شغل ب ابوي جاتني ميتة بكى قمت بكيت معها قلت لها اوك حارمنا من اي طلعه و سكتنا بس الا المستشفى قلت لها امشي نتكلم معاه رحنا له وقلنا له نبي نقولك شي اعتبر ان علاقتنا فيك انتهت من اليوم و رايح والين نموت دامك مديت يدك ومستعد تمدها و مو راضي تعتذز لاتجي تطلب منا شي ولا نبي منك شي قام يضحك قال لا والله وكيف تطلعون طنشناه و رحنا ! وقفلنا على نفسنا الباب .. |
| الساعة الآن 10:44 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©