السلام عليكم و رحمة الله,,,,
صباح الخير جميعاً,,,

في البداية ابغى اشكركم على جهودكم بهذا المنتدى الرائع والمفيد واسأل الله أن يجازيكم كل الخير و الاجر العظيم,,,

ابغى أكتب هذا الموضوع كنوع من الفضفضة و اعتبروني اخ صغير لكم و ارشدوني,,,

بالبداية هذه مقدمة بسيطة على شكل نقاط:

متزوج منذ 6 اشهر.

ولله الحمد رزقة بزوجة صالحة و طيبه جداً جداً و نعيش بحب متبادل.

زوجتي تضحي بنفسها من أجلي و ما أدري بصراحة هذه التضحية بسبب حبها أو انه هذا طبع فيها.



زوجتي يا ناس لا تتكلم لا تشتكي و لا تعاتب كل شي تشيله بقلبها و تسكت و لا يبين عليها أي شي...


اذا تضايقة تروح تكتب بمذكرة صغير كل شي بقلبها و بعدها تمسح كل شي و لا تسمح لي ابداً اقراء اللي تكتبه !!!

و على حسب كلمها هذا طبعها من لما كانت صغيرة و أهلها يعرفون هذا الشي و أنه و لا أي احد من خواتها او امه يعرف أذا كانت متضايقة أو لا ؟؟


أنا عملي جداً سيء و أتاخر كثيراً بالعمل و أهلها بمنطقة بعيدة عنا,,,

مرة من المرات حصل سوء تفاهم بسيط بسيط بسيط و على طول بعدها بدقائق اعتذرت مني و قبلت اعتذارها و قلت اهم شي لا يتكرر هذا الموضوع و أنه أحبك و أساساً مستحيل ازعل منك.


رجعت للبيت و حصلت مذكرتها قدامي و قرات اللي كتبته هذا اليوم بعد سوء التفاهم البسيط جداً و ملخص الكلام هذا :

-تتمنى أنه لم تتزوج الى الان ولو انها ببيت أهلها و بدون مسؤلية البيت و التعب اللي هي فيه. (هي قالت لي هذا الكلام من قبل و تقول لانها تحبني ما كان تقدر تطلب مني تأجيل الزواج مع أن عمرها صغير فقط 19 سنة)


-تحس بالوحدة كثيراً كثيراً تفتقد أهلها و صاحبتها. (مع أني اخليها تزور أهلها مرة بالشهر و تجلس يومين عندهم و بالاسابيع الثاني نروح زيارات لناس معارفي بنفس مدينتي و هي بالجامعة مو راضية تكون أي علاقة صداقة)

لحد هنا كلمها عادي و شي متوقع لاكن بعد هذا الكلام صارت تقول كلامي مو صحيح مثلاً

زوجتي تقول أحس أنه مالي قيمة بالبيت و ما احد يهتم برأي. (يا ناس والله مو مقصر بأي شي لا من الناحية العاطفية و لا الكلام الحلو و لا المادية)

و تقول عندي آمال و أشياء كثير نفسي اسويها بس ما راح اتأمل كثير علشان ما انصدم. (أنا ليل و نهار لما أتكلم معاها اسألها شنو تتمنين بالحياة شنو تبين و هي ما عمرها قالت شي تقول ما فيه شي ببالي عادي اهم شي أكون معاك)


فيه أشياء كثير كنت أسويها ببيت أهلي و ابسط فيهم واللحين نسيتهم كلهم و لا راح اقدر اسويهم مرة ثانية واساساً ما عاد أعرف شلون أسويهم !!! ( ما أدري شنو هالاشياء)

و تكلمت عن كلمة عادية قلتها لها قبل فترة و جلست تكتب مبرراتها و ليش سوت كذا و أنه ما عمرها سمعت هالكلمة من قبل عند أهلها و أنه خلاص مستحيل تطلب مني أي شي علشان ما تسمع هالكلامة مرة ثانية. (الكلمة عادية جداً قلت يا قلبي انتبهي تراك اسرفتي شوي بالموضوع الفلاني تكفين انتبهي شوي "من الناحية المادية")



أنا ودي اناقشها بهذا الكلام اللي كتبته بس مستحيل لانها وقتها راح تعرف اني قراءة مذكرتها و بنفس الوقت ما راح تنطق بأي حرف.


يا ناس أنا ابغى اسعدها لانها مو مقصرة معاي بأي شي بدون ما اطلب منها أي شي تسوي كل شي بدون ما اطلب همها الوحيد سعادتي و رضاي عنها و انا ابغى اعاملها بالمثل...

شلون تقول فيه أشياء تتمنها بس ما تبغى تتأمل كثير ؟ أنا راح احقق بأذن الله كل شي لها بس هي تتكلم و تقول ابغى كذا !!!

و كيف تقول ما لها أهمية بالبيت و هي أهم شي عندي !؟ و أنا أوضح وأقول لها هالكلام كل يوم حتى قبل هذا اليوم !!!

يا ناس أنا قلبي طيب لما اشوف واحد ضعيف بالشارع و انا ما اعرف يتقطع قلبي عليه !!! كيف لما احس زوجتي و اللي مو مقصرة بأي أي شي معاي احس انها ضعيفة و محتاجة أشياء كثير و أنا مو قادر أساعدها ؟؟ أنا حتى الشغل مو قادر اركز معها من هذا اليوم...


ساعدوني أرشدوني الله يرضى عليكم.

وأي شخص عنده أي استفسار يتفضل على شأن أحس فيه ناس معاي...

و السلام عليكم و رحمة الله و بركاته.

بالبداية أحب ان اشكر الجميع على نصائحكم و توجيهاتكم النيرة،،،

و اعتذر عن التأخير بالرد عليكم و لاكن مشاغل الحياة و محاولاتي أن أنفذ نصائحكم،،،

استأذن الجميع بالرد على رد "أبو حكيم" سبحان الله يؤتي الحكمة من يشاء و كانك تعرفني و تعرف أهل زوجتي تمام المعرفة !!


نعم أسرة كريمة خصوصاً الأم و توجيهات لبناتها باحترام الزوج و أهله و توفير جميع طلباته و عدم التثقيل عليه باي شي و ازيدك من الشعر بيت تطلب مني عدم تدليعها بأكثر من اللازم و انه جميع شي تفعله هو من واجب بنتها،،،

و البنت تنفذ نصائح أمها بالحرف و فوق هذا تحبني كثيراً و لله الحمد من قبل و من بعد و هذا كله بفضل الله ثم دعاء الوالدة،،،،


المهم أنا بالفترة الماضية تفرغت لها و جلست معاها كثير و طلعتها من البيت و خليتها تزور اهلها و تجلس اسبوع كامل و لاحظت تحسن نفسيتها كثيرا،،،


لاكن قبل كم يوم كنت اتكلم معاها كلام عادي عن أموري المادية كنت ابغى اخذ رأيها بموضوع و ذكرت لها كم راتبي لاول مرة وووووو احوالي و لله الحمد ليست سيئة و بنفس الوقت مو مرتاح كثيراً مثل اغلب الناس متوسط الحال،،،


بعد ما خلصنا السوالف و الكلام جلست تبكي كثيراً و هذه المرة أجبرتها تتكلم بأسلوب حلو قالت انا احس اني حمل عليك و كملت تبكي،،، بعدها انا صرت أهدي فيها و اقول لها انها مو حمل و بالعكس انها الخير و البركة و اني ادري انك منقصة اشياء على نفسك علشان ما تكلفين علي و اني اقدر هذا الشي و اني راح اعوضك بالمستقبل القريب الخ....

و بعدها بساعات جتني تقول يا فلان المصروف اللي تعطيني كثير و انا ما احتاجه و خلاص يكفيني .... (ربع المبلغ) و انه ما احتاج اي شي و كل شي عندي و انه انا مو منقص عليها اي شي و خلاص ما راح تطلب اي شي !!!

مصروفها بسيط جداً و لا يتعبني و لا يضايقني أبدا و لا احتاجه (لا يسمن و لا يغني من جوع) لاكن بساطتها خلتها تفكر انها تساعدني بهذه الطريقة مع انها تحتاج هذا المبلغ لانها تدرس بكلية المجتمع و بدون مكافأة،،،، طبعاً رفضت....


و خلال اليومين اللي راحت نفسيتها متنكده،،،


انا خلاص عرفت انه الكلام في الأمور المادية يضايقها و خلاص توبة اتكلم فيها معاها مع اني لا كنت اشتكي و لا اي شي بس سوالف عادية بين زوج و زوجته.،،



محتاج لكم في هذه النقاط :


- شلون أقنعها انها مو حمل علي هذا أولاً ؟


- شلون اخلصها و اخلص نفسي من حساسيتها الزايدة خصوصاً ناحيتي؟


(مرة زل لسانها قدامي و قالت كلمة عادية ما تزعل و هي كانت مشغولة و بالغلط وااااضح انها ما تقصد الكلمة أبدا و انا وقتها تركتها و رحت للصالة "ادري انها ما تقصد بس قلت بشوف ردت فعلها" اول ما وصلت للصالة على طول و هي قدامي تبكي و تعتذر و تحلف انه مو قصدها وووو ندمت اني فكرت حتى التفكير اني اشوف ردت فعلها)

من ناحية تعاملي معاها ما امدح نفسي بس مو مقصر باي شي أبداً أبداً اعاملها بالمثل و اكثر،،،


و بانتظار ردودكم النيرة و نصائحكم الأخوية،،،