|
اهل زوجي اهانوني !
السلام عليكم ورحمة الله وبركاته
اخواتي واخواني في الله رجعت لكم من جديد هالمره الموضوع احسو كبير في حقي وحاسة بإهانة الحمدلله على قضاء الله وقدره سافرت مع زوجي بسبب كورس ( دوره عمل ) اترشح لها ، وانا اللي شجعتوا عليها وكان رافض انو يروح بس اصريت عليه وقال لي اذا بتجي معي بروح قلت اوكي واتوكلنا على الله وحجزنا وسافرنا ، كان مده الدوره تقريبا 5 ايام وحجزنا لمدة اسبوع قدر الله على زوجي انو يسير له حادث خطير بس بقدرة ربنا ولطفه ورحمته فينا ، نجي من الحادث والكل مستغرب كيف نجي سبحان الله !! طبعا الله يعلم بحالي وقت مادريت وحامل وبدخل السابع اسأل الله انو مايفجع اي احد منكم ولايوريكم مكروه في احد تحبوه حاولت في زوجي انو اخبر اهله مارضي قالي بعد العملية خبريهم ، قلت انا حرمة وفي بلد غريب وحامل مابعرف اتصرف ، قال لا ومعند بس انا ماسمعت كلامه وبعد الحادث بيومين بلغت اخوه بالموضوع وقلت له انت بلغ اهلك ماعندي الجرأه اني افجع ابو زوجي وام زوجي بس ولله الحمد ، اصحاب زوجي وحريمهم والشركة المسؤلة عن تدريب زوجي وقفت معانا وشالوا الشي الكبير عني مددوا اقامتنا وعلى حساب الشركة ، ووفروا لي خط مصري ، ووفروا لي سواق وسياره توصلني وترجعني ، واعطوني تأمين احتياط لي انا، ووفروا كل شي احتاجه كان يتطمنوا عليا كل يوم واضطريت اتواصل مع مسؤولين الشركة سواء حريم او رجال سرت كل يوم ازور زوجي وارجع لأنو في العناية وممنوع ابات عليه وطبعا وقت محدد للزيارة بس كان يتكلم شويا بس تأثير الحادث عليه قوي فكان يدوخ ويتعب واغلب وقتو نايم اخوه جاء بعد كم يوم ، وكلموني ابوه وامه وطمنتهم انو سليم وطيب ويمشي بس عندو شرخ في الحوض واصابع يدو تحتاج عملية بسيطة وتجميل في الجبهة والخشم وبسيطه ان شاءالله وطبعا خدوش وكدمات وجروح في الجسم طبعا اهله كانوا دوبهم جايين من سفر سياحة والصراحة ما استفدت من اخوه في شي والله والله انا اللي اتكلم واسأل واجري واسعى واشوف الدكاترة واتواصل مع الشركة واخوه مدري ايش فايدتو استغربت انو ابو زوجي وام زوجي ما جووو عشان ولدهم ، لمن فاق زوجي واتطمنوا عليه من ولدهم ، شكلهم هونوا عمي ( ابو زوجي ) كان بيخرج ولدو من المستشفى ويسفرنا على طول ، طبعا انا عارضت وقلت مايصح ماكمل اسبوع على الحادث الحوض لازم فتره راحة والعمليه تبع يدو لازم يتابع مع الدكتور ، طبعا محد سمع لكلامي وكان دكتور الشركة غير موافق على خروج زوجي وقالوا لي مابيسافر الا لمن نتأكد من سلامة زوجك ، ونحنا بنتكفل بالحجز وبكل شي طبعا كانت في حركات من اهله ، بطريقة او بطريقة تانيه حطوا فيا السبب انو ما اخلي اخو زوجي يركب معي السيارة ونروح للمستشفى وانا والله بلغت اخوه وام زوجي واخته انو السيارة ببلاش والمشوار بعيد يجي معايا اخو زوجي طبعا طناش ماردوا عليا !! ولا دريت انو جاي اخوه الا في نفس اليوم ! وبعدها بيومين نقل من الفندق اللي انا فيه بدون ما اعرف لفندق اقرب ! لمن اهلوا عرفو انو بيطول في المستشفى حجزوا وجوووا ، وعلى حظ جيتهم خرج زوجي من المستشفى اليوم ، واهلوا قدهم حجزوا في فندق قريب من المستشفى طبعا مادريت انهم جاييين اتفاجئت بوجودهم في المستشفى !!! سلمت عليهم وضيفتهم ، وطبعا كنت مزهرية قاعده جنب الجدر ، وبس اتلقف و اجاوب على حالة زوجي ومواعيده ، واسماء وارقام الدكاتره تبع زوجي ، واهلوا يسكتوا ومايعلقوا بعدها ! قالهم زوجي امس ماجات زارتني كانت تعبانة من الحمل وتبغى تكشف قبل مانخرج ( يقصدني انا ،الله يعلم بحالي والالم اللي جاني ) طبعا ما اهتموا وطنشوني ، ابو زوجي قالي جيبي اغراضك واغراض زوجك وتعالي الفندق اللي حجزنا فيه ، قلت له ياعمي انا مرتاحة في الفندق اللي انا فيه ، وغير كذا الشركة غير موافقة ولا زم اعطيهم خبر ! والشركة متعاقدة بالفندق اللي نحنا فيه ماعجبه الكلام وزعل مني وشاوح بيده وقالي مع السلامة يعني زي انقلعي وطلع من غرفه المستشفى !! زوجي قالي نجلس في فندق اهلي وبعدين نرجع فندقنا قلت طيب ، ام زوجي بدأت ترمي عليا كلام مو شايفتو تعبان تبغي تتعبيه زيادة ! ومو طايقة مني كلمة ! وركبوا معايا ام زوجي واخوه ، وابوه وزوجي راحوا بسيارة ثانية للفندق اللي حجزوا فيه ! طبعا في السيارة ساكتين محد يتكلم معايا ، وام زوجي تتكلم مع ولدها وتأشر عليا بكيفها تجي ولا ماتجي براحتها حتى اسلوب احترام مافي وتدق بالكلام انو الوحدة مكان زوجها ماتتعبوا وتوقف معاه ، انا ما استحملت رديت عليه وقلت ياخالتي محد انفجع على زوجي زي ما انفجعت انا ، محد خاف عليه وشال همه وهم الوحدة والغربة وانا حامل وتعبانة زي انا محد جري عليه ويسعى ويتطمن عليه زي انا كيف ما وقفت مع زوجي وماتهمني راحته ما استاهل هالكلام والله ولا المعامله دي صرخت فيا ام زوجي وتقولي انتي تتمنني على ولدي ، انتي ماوقفتي معاه زي اي زوجة توقف مع زوجها حتى بيات ماجلستي معاه في المستشفى قلتلها كان في الرعاية ممنوع ! تقولي برضو ماحاولتي على كنبة على كرسي ،! تقولي حتى انا تعبانة وعمك تعبان جايين من السفر اليوم وتعبانيين واخوه ساب كل اشغالوا وجاء مو بس انتي تعبانة !! تقولي انا وقفت مع زوجي 8 شهور ولا اتأففت سهرت عليه وتعبت ، كيف تقولي راحتك اهم من ولدي قلت انا ماقلت راحتي اهم قلت ابغى ارتاح في فندقنا وامدد تعبانة ! تقولي الا قلتي انو راحتك اهم من راحة ولدي قلتلها ياخالتي زوجي ادخلوا الحمام واروشوا واغسل له واحطوا في عيوني كيف تقولي عني كذا الله يسامحك والله زعلت قالت انا زعلانة انتي بتتعبي ولدي ، وقام ولدها لف عليا ورفع صوته عليا بس انا ماسكت وقلت له لاتكلمني بدا الاسلوب وارخي صوتك واصحك تكررها مره ثانيه فاهم !!! وصلنا الفندق خرجت ارجف وابكي من السيارة واتخبط في مشيتي جات امه وولدها اخذو اغراض زوجي وقبل ماتمشي قالت بنت الاصول توقف مع زوجها قلت كل دا وانا مو بنت اصول الله يسامحك !! وقالت لو امك دريت كان اعطتك على راسك وغلطتك قلتلها طيب نشوف رأيها حسيت انها خافت لمن دريت اني بوصل الكلام لأمي قالت امك ! قلت ايوة يسير خير ، قالت طيب يسير خير وطلعت من الغرفة طبعا الله لايوريكم حالتي مصدرمة حسيت نفسي ملطشة قدام الكل دخلت في بكاء هستيري وتعبانة ونفسيتي زفت طبعا محد اتصل فيا ولا سأل فيا ، وانا جالسة في الفندق لحالي اهلي غضبانين وزعلانيين من الطريقة اللي عاملوني فيها اهل زوجي، وخايفين عليا |
رد : اهل زوجي اهانوني !
اضافة بسيطة
مسؤولين الشركة كلموني ، وقالوا لي كيف يروح فندق ثاني وممكن يتحاسب زوجي وتسير مشكلة بالنسبة لنا !! لازم يرجع للفندق ، ولأن الفندق اللي فيه اهل زوجي ، في منطقة قريبة من الفندق سار فيه مظاهرات قبل كم يوم وانفجرت فيه قنبلة على حسب مابلغوني .!! وانهم جووو يستقبلوا زوجي في الفندق اللي نازلة فيه وطبعا مافي زوجي اتأسفت لهم واعتذرت وقلت مو بيدي وشرحت الموقف لهم بإختصار واتفهموا الوضع وعذروني ميزة الفندق اللي فيه انا ، انو قريب من المطار وبعيد عن وسط البلد لاسمح الله سار شي على طول على المطار وامان وتفتيش وكلاب حراسة والشركة متعاقدة مع الفندق !! وربي يعلم بحالتي كيف اخاف وعندي فوبيا من الاماكن المغلقة والمصاعد ، بس عشان زوجي سرت اركب المصاعد لحالي عشان كده ماكنت حابة انقل لفندق جديد لاني اتعودت وحسيت بالامان بالفندق اللي انا فيه |
رد : اهل زوجي اهانوني !
زوجي كلمني وطلب مني رقم السواق عشان يرجع للفندق !
الصراحة ماكنت ناوية اعطيه ، لأن اهلوا اهانوا السواق وثاني شي ، قلت اهله هما يدفعوا ويرجعوه ويتحملوا مسؤليته بس حزنت على زوجي لمن قالي محد بيرجعني من اهلي ، وهو خارج على كرسي متحرك من المستشفى ، انا قلت له يريح في فندق اهله اليوم بس مارضي ، لأنو يمكن مسؤل الشركة كلموا ابوه واخوه انو زوجي لازم يرجع الفندق اللي انا فيه عشان لاتسير مشكلة ! اعذروني على الاخطاء الاملائية اكتب لكم من الجوال اول حمل لي وتعبانة والنفسية سيئة كيف اتصرف مع زوجي اذا رجع ؟ |
رد : اهل زوجي اهانوني !
الحمدالله على سلامه زوجك
والله يهون عليك حملك ويقر عينك بجنينك خلي زوجك يتفاهم مع اهله اذا رجعتو بالسلامه انتي لاتحتكي فيهم اسلم لك |
رد : اهل زوجي اهانوني !
امييين يارب
ربي يسلم عمرك انا فكرت وقلت مابشغل زوجي بالموضوع دحين عشان نفسيته وراحته بس راح ابين له ، لاننا مطولين شويا عشان مراجعه زوجي مابعد العملية واكيد بقابل اهله واشوفهم ، والصراحة ماعندي قدرة اجاملهم واستقبلهم بعد اللي سار انا مدري اذا امه واخوه قالوا له اللي سار او لا ربي يعين وينصفني وياخد حقي |
رد : اهل زوجي اهانوني !
الحمدلله على سلامته
حبيبتي طنشي وكبري دماغك ﻻتفكرين حاليا إﻻ بزوجك وبس |
رد : اهل زوجي اهانوني !
شوفي يا بنت الحلال
ابعطيكي اياها من الاخير مالك عن الاحتكاك باهله مهما سوو وعملوا فيكي ومالك الا احترامهم غصباً عنك ان كنت تبين حياتك مع زوجك تمشي فحلك الوحيد ، كان ما صار شي واهتمي بزوجك ولا تزعجينه بخرابيط اهله وكملي حياتك عشان ما يخربونها لك مانت اول ولا اخر وحدة تشتكي من اهل الزوج |
رد : اهل زوجي اهانوني !
يا اختي عند الله مايضيع شي
اترك اجرك على الله واتجنبي تحكي معهم نهائي حتى بالمستشفى الا اذا سلام او اجابة سؤال وجاوبي بالمختصر وقومي بخدمة زوجك واجبه لاتقصري وهو راح يعرف بقرارة نفسه مين على حق الله يوفقك |
رد : اهل زوجي اهانوني !
لا تلومينهم مفجوعين بولدهم وغربه
فقط قللي الاحتكاك وطنشيهم |
رد : اهل زوجي اهانوني !
اقتباس:
الله يسلم عمرك انا الصراحة مفكرة بوضع زوجي ونفسيتو بس قلبي شايل من أهله ، امس جاني واستقبلته في اللوبي وطلبت له كرسي متحرك واخذت اغراضه وطلعوه للغرفة وروشته ونضفته ، قلت له ليش جيت اليوم تعب عليك كان ريحت وجيت اليوم الثاني قالي ازعاج المنطقة اللي فيها اهلي ، ونمت وصحيت ولقيت اهلي مافي خرجوا يتعشوا !! |
رد : اهل زوجي اهانوني !
اقتباس:
اههه كيف ما احتك وانا ساكنة معاهم ، قبل السفر كنت بجهز الشقة واشوف الاثاث والفرش عشان قلت بعد الولادة ونفاسي عند اهلي بنقل لشقتي وبيتي بس الحمدلله على كل حال ، خيرة بإذن ربي مااقدر افوت هالموضوع وكأن ماسار شي ، لو فوت هالمره راح اندم واتوقع يجيني الاسوأ بعد كذا من اهله |
رد : اهل زوجي اهانوني !
اقتباس:
الحمدلله اجري على الله ، ما استنى منهم لاشكر ولامدح وانا فعلا راح اتجنبهم ، لحد ما ارجع بالسلامة اما حكاية اني اسكت لا والله مو ساكتة ، استحملت من اهله الكثير |
رد : اهل زوجي اهانوني !
هو عارف اهله .. حالياً تناسي المشكلة واهتمي بزوجك.وانسي الدنيا.. ولا ترجعي تفتحي الحسابات معاهم عشان تمشي حياتك .. اخاف ان كلمتي ولدهم عبو راسه عليك ويصير في النص بينكم ومو عارف يرضي مين وباين اهله قويين مرره.. اشتري دماغك وارتاحي مو كل مره انتم في وجه بعض واتعلمي تتفاديهم واستفيدي من اللي حصل واعرفي نفسياتهم
|
رد : اهل زوجي اهانوني !
اقتباس:
الا الومهم ، عندهم خبر من قبل مايجوا وكلموه واطمنوا عليه ، وكانوا مابيجوا !! ووقتها عمي كلمني يتحجج انو الشغل كثير ومابجي بس هو بخير خلاص ! بس لمن عرفوا انه بيطول جوووا ، وعلى حظ جيتهم خرج من المستشفى بس بيقعد فترة عشان مراجعة مابعد العملية واهلي كمان خايفين علي ومفجوعين بغربة وحامل وعارفين اني شايلة موضوع زوجي من إلى ، ومافي احد من اهله اتصرف حتى اخوه لو جلس في بيته ابرك |
رد : اهل زوجي اهانوني !
اقتباس:
كيف حالك العقد الفريد dvf عارفة بعد مانزلت موضوع اشتكي من تدخلات امه وانها طيبة بس قوية مو هينة لمتنوني وقلتوا معليش واهون من غيرها ووو الصراحة سرت كل يوم اكتشف انها تتدخل بطريقة مزعجة في حياتي وسرت اصبر نفسي واهونها واقول يابت انتي ماشية وناقله لاتكثري من الفضايح اصبري هانت انا الصراحة امس قلت لزوجي عن الموضوع وحاول يستعطفني قلت له انا ما ابغاك تكون بين نارين وتكون في النص انا عارفة انهم اهلك وانا برضو مرتك وام عيالك تان شاءالله بس انصفني وقلهم كلمة بسيطة تبردني وتطيب خاطري كرامتي من كرامتك واللي يمسني بكلمة كأنو ضرك انت ! الصراحة حسيت بخيبة من ردة فعله واتوقعت كذا ، قعد يتحجج لهم ويتعذر قلت اوكي اذا انت مابتاخذ حقي انا راح اخذ حقي وانصف نفسي قالي طيب ، قلت له لاتلوم اسلوبي وطريقتي مع اهلك ماراح اقدر اجامل واستحمل انا مشيت لأهلك كثير وسكت وقلت كبري دماغك بس شي كبير كذا في حقي اسفة ما اقدر اسكت ، وانا لو سكت اهلي مابيسكتوا !! وبيت اهلك ما اقدر ادخله بعد كذا لو رجعنا بالسلامة نفسي والله ماتهون عليا ادخل البيت واكل معاهم وكأنه ماسار شي ، فوق طاقتي لمن بس اتخيل احس بالغبن سكت وماقال شي ، بس قضينا الليل عادي حاولت اكون عادي معاه وعاذرته وهو شافني بالي مشغول جاء جمبي وحضني ونام |
رد : اهل زوجي اهانوني !
انا تمام يا نعومة يا حادة يا انت محد يقدر يقرب منك ولا يدوس لك على طرف
ليت حماتك تجي تشوف معرفك هنا .. طيب خليكي زي السكين الناعمه ذي ان احد لعب فيها جرحته من غير ما يحس ..dvf لا من جد خلينا نتكلم من الواقع واللي يصير .. الان هذول الاوادم عملو دور بطولة وكثرو كلام معاك وسمعوك كلمتين هزت بدنك وماتحملتي ورديتي وزاد الجفا بينك وبينهم الان حايصير لهم كذا لو حاولتي تعملي نفس المشهد.. وانت شايفتهم متحزبين الام والاب والاخ.. وزوجك عكسهم وما يحب المشاكل معاهم ووضح هذا الشي فالاسلم تنسي الموضوع والرد السليم والصحيح في عيشتك مع ولدهم وتمكنك من حياتك وادارتها بالطريقة الصحيحة.. وعمر الكلام يابنتي والسب مانقص من قيمة أحد.. وفيه ناس مواقعهم حساسة في حياتنا حتى لو ما نحبهم .. لازم نجاملهم بحدود ونكتفي شرهم لان فيه هدف اسمى واعظم حياتك وبيتك وزوجك واطفالك واستقرارك .. كل هذا راح يتأثر اذا حصلت مشاكل مع اهل زوجك وزوجك مو ما يحبك او شايفهم ماغلطو لما حب مايتدخل بس هو يعرفهم ويعرف طينتهم وعارف ان الموضوع راح يكبر ويكثر الكلام واختصر عليك الطريق.. وسكوتك مو ضعف ولا قلة حيلة بالعكس ان دخلتي عليهم تضحكي ولا كأنه حصل شي راح يصير شي من اثنين.. يا يستحو على دمهم او يكتشفو الحقيقة المره انهم مايشكلو شي في حياتك ولا قامو ولا قعدو وتزعلي ليه من ناس ماتعني لك شي!! انا عارفه انك من الناس اللي يقولو اثبتي شخصيتك ولا تخلي الموقف يعدي بسلام عشان مايكرروها بس هذا المنطق مايمشي مع كل الناس .. فيه ناس الحماقه تغلب العقل وماهمهم بيت ولدهم يخرب ولا يعمر يابنتي وولدهم عندهم تركوه وراحو مطعم ووصل عندك لوحده كيف بالله اذا استوت مشكله بينك وبينهم وبصراحه ومن الاخر باين عليهم لو تقولي كلمه ردو بعشر يعني ماراح تخلصي منهم وراح يسحبوك لادنى المستويات في الادب والاحترام وانت بكيفك.. موفقه يارب |
رد : اهل زوجي اهانوني !
السلام عليكم ورحمة الله وبركاته. .
أختي الكريمة ، على ما أعتقد تذكرين قسوتي موضوعك السابق وكان عن أهله ... أنت اﻵن حامل ووضع زوجك لا يسمح بأن تفتحي مواضيع عتب لأهله والكلام الذي أخرجوه ، فلا تتكلمي كي لا ينقلب ضدك ... مادام الكلام ليس بك لا تتأثثري فزوجك ربما يعرف أهله وطريقة تعاملهم لكنه صامت يقول أهلي ماذا أفعل بهم ؟! ضغي كل ماتفعليه لله ، لا يهم نكرانهم فأجرك عند الله لن يضيع واطمئني .. فلينكر من ينكر ! تعلمي فن التجاهل وعدم التدقيق لكي ترتاحي ... وفقك الله .. |
رد : اهل زوجي اهانوني !
يابنتي الله ينور لك بصيرتك،، إنت كل همك وتفكيرك ظلموك!!
زوجك كان بين الحياة والموت وعمليات،،،،وإنت استقبلتيه أهلك قالوا وفعلوا،،، والمبكي إنك جالسة تطالبي انسان يرد لك كرامتك واعتبارك وهو مريض عنده مصيبة أعظم من مصيبتك، والله لو أنا مكانه حتى لو برد لك كرامتك راح أبطل من أسلوبك. يابنتي أهله متدخلين ظالمين افتروا عليك.....الخ ماشي ما اختلفنا، بس لكل مقام مقال،، يعني هوني ع نفسك عشان تقدري توقفي مع زوجك وتسانديه وتدعميه نفسيا، زوجك محتاج حنانك ووقفتك،، مو واحدة تبربر ع راسه تزيد همه. ثم خدمتك لزوجك ترجين منها رضا الله ثم رضا زوجك وحبه لك، يعني اش ماقالوا أهل زوجك مايهمك،،المهم زوجك، نصيحة أخيرة ألتمس في زوجك الطيبة والخير فلا تخسريهما. |
رد : اهل زوجي اهانوني !
اقتباس:
والله لا انا قوية ولاشي ومن مواضيعي اللي فاتت ماعرفت اسوي من اللي في بالي لايغرك اسمي المستعار في المنتدى دنا غلبانة والله ههههه بالنسبة للحزب ، عمي كان يعاملني معاملة حلوة بس مدري ايش فيه اتغير لمن جاء وزعل مني هالزعل وعاملني بأسلوب مو حلو حتى ما اعطاني خبر بجيته هو ووزوجته !! اخو زوجي كان موجود صح بس ما استفدت منه قاعد على الجوال او رايح كافيه قريب حاولت المح اقول له انو معي ارقام رجال والدكاترة اذا حابب يتواصل معاهم عشان حالة اخوه لأنو عيب طبعا عندنا حرمة وتتواصل وفيه رجال موجود. !! بس ولا كأني اتكلم تحقير وطناش منه بس بعد ما جاووو اهلوا اتنفش ريشه ورجل على رجل ويضحك ويطالع في وجهي وعادي واخرتها لمن صرخ عليا بس انا قصيت ريشه هههههه خالتي ، ام زوجي كانت تكلمني عن حالة ولدها وانا اطمنها واهديها بس بعد ماجاء اخو زوجي وقفوا كلهم تواصل معايا فجأة وقطعوني ، ولمن جات هي وعمي مبين انها شايلة عليا ومو بالعتني مدري ليش ! زوجي مو ضعيف ابدأ شخصية ، زوجي الكبير وله كلمته وهي مسموعة تقريبا في البيت ، ابوه ياخذ برأيه ، امه تاخذ برأيه وتسمع له زوجي مو عشان يعرف اهله انهم حقون مشاكل ومايحب المشاكل ، بالعكس زوجي لو ماعجبه شي يقول بكل صراحة رأيه . بس حسيته في مواقف كثير مايرضى على اهله كثير، ويتحجج له ويتعذر لهم واذا حكيت له موقف حصل لي انا انضريت او اتأذيت من اي شخص ، واحكيه عن شعوري واحساسي مايوقف معي يوقف مع الطرف الثاني حتى ولو كان شخص غريب مايعرفه ودا يزعلني كثيير احس بخيبة وخذلان منه لا الحمدلله مو بالسب ولا بالشرشحة والبهدلة اخد حقي مو كدا تتآخذ الامور بس لازم احد يوقفهم لازم يكون في شي يردعهم ويوقفهم عند حدهم واللي مخليني مصره كمان انا في مدينة بعيدة عن اهلي ، وساكنة مع اهل زوجي في نفس البيت وبسبب حالة زوجي ووضعه مابنقل هالفترة لشقتي الجديدة مع انها جاهزة بس ناقصها اثاث وفرش وشكلي راح اطول على ما انقل حتى شغل زوجي في مدينة ثانية ويطول في شغله ويغيب شهر ، شفتي كيف وضعي عشان كذا ما اقدر اسكت واعدي هالموقف ، ممكن على الاسبوع الجاي نسافر ونرجع ، ما اقدر ادخل بيتهم بدون شي يطيب خاطري وانا حلفت ايمان مغلظة ، بكون في بيتها وهي بتكون في موضع قوة مع بنتها كمان ، ما اقدر اعيش معاهم ، واكل معاهم عادي كأنه ماسار شي ، نفسي شايلة شايلة وشايلة عليهم نفسي مو هاينة ابدا عليا ، حتى زوجي كأنو كان عارف وحاسس قبل ما اقول له ، بس كان عادي حتى هو ماطيب خاطري بكلام حلو ، كل اللي سواه قعد يتحجج لأهله ويتعذر لهم ، اقوله وانا طيب يرضيك اللي سار لي يسكت حتى ماحاول يراضيني بالكلام مستهين في زعلي مرا ولا كأنه ساير شي !! |
رد : اهل زوجي اهانوني !
اقتباس:
نعم اتذكر كلامكم لي وقسوتكم علي ولمتوني في اشياء كثيرة وغلطتوني مع اني ماطالبت الا بحقي وهو كان غلطان زوجي ،وشوفي اخرتها ايش حصل لي ، سار اللي يسوى ومايسوى يبهدلني قدام الكل والله اني حاولت وحاولت اهدي واسكت اصلا انا مستغربة منهم تعاملهم وتحاملهم عليا بدي الدرجة !! يعني مافي سبب قوي يخليهم يعاملوني هالمعاملة طبعا انا اجري على الله بإذن ربي والحمدلله كيف ما اتأثر بكلامهم واسلوبهم غصب عني راح اتأثر وأعاني وسكني بيكون معاهم ومطولة على ما انقل لبيتي ، الحمدلله على كل حال خيرة ان شاءالله من ربنا زوجي مو ضعيف شخصية ياسقيا بالعكس قوي ويحاور ويغلبك في الكلام والحجج ، ويقول رأيه بكل صراحة حتى لو كان امه او ابوه . بس انا زعلانة كمان من ردة فعله هو كمان حتى بعد ماعرف ما طمني او ريحني بكم كلمة ودا اللي مخليني شويا زعلانة منه وحاسة بالغبن والقهر |
رد : اهل زوجي اهانوني !
اقتباس:
اهلين عزيزتي مكلومة ابشرك ولله الحمد والمنة و يارب لك الحمد حمداً كثيراً زوجي خلال هاليومين اتعافى واتشافى احسن من اول بكثيير ورجع لوضعه وحالته زي اول يضحك ويتريق ويعلق ويمسك الجوال ويتفرج حتى انه سدد فاتورة جوالي ، ويقوم بنفسه زي دخول الحمام اللي يكرمكم بدوني ، ويتكلم مع دكتوره وكل شي عادي الحمدلله وسحب مني الجوال المصري الثاني ويقولي خلاص رجعتلك ولا تحسبي عشان سبتك كم يوم وفلتك خلاص يعني تتصرفي من راسك وتكلمي فلان وعلان والا بيقوم يكسرني طبعا قالها بشويه مزح بس جاد بكلامه مين قالك انا ازن على راسه ، لا والله مازنيت هيا مره وحده فتحت معه الموضوع وخبرته باللي حصل وعليها وسكت ومافتحت معه الموضوع مره ثانية زوجي طيب بس برضو لاتدوسي له طرف والا مايرضى على نفسه حتى لو كنت انا او امه وابوه ياخد حقه وانا كمان والله طيبة وغلبانة هههههه لايخسرني بأسلوبه |
رد : اهل زوجي اهانوني !
اللي حصل امس
امس امه وعمته جووو فندقنا عشان يزوروا زوجي طبعا استقبلتهم العمة سلمت علي واخدتني بالاحضان الام لاسلام ولاكلام ولا قبلت ضيافتي جالسة جمب ولدها وانا نفس الوضع طناش بس العمة جالسة تلمح وتدق بالكلام ايش دا الطريق بعيد وزحمة فندقكم اخر الدنيا ويلا بس تعالوا فندقنا احلى على النيل وناس وعرب وصجة وتحسي فيه حياة ومن هالكلام يعني عارفة باللي سار وامو مع ولدها جالسة واي شي تعلق على ولدها وتقصدني بالكلام لانو نبرتها تتغير وتكون حاده وعصبت لمن عرفت الادوية ماجبتها انا انا المفروض اللي حرمة وحامل اللي اجيبها ولا هما ابوه واخوه !!! وبعدها في الليل صرخ عليا واستنقصني قمت صرخت عليه انا وقلت سايرة ملطشة للكل الكل يصرخ انت وابوك وعمك واخوك !! باقي احط على ضهري وجبهتي للملطشة سكت مارد |
رد : اهل زوجي اهانوني !
مستجدات اليوم
نزلته تحت عشان يحلق ودفيته بالكرسي المتحرك ووديته لحلاق الفندق وطلعت في مشكلة في بطاقة مفتاح الغرفة وهو كان مستحي من وضعوا ، وقال لي روحي انتي الاستقبال شوفي ايش المشكلة قلت طيب وطلعنا الغرفة ، ماجلست الا شويا قالي ايوه ترى اهلي جاييين عمي واخويا وعمي وعمتي والغرفة مو مرتبة وانا ماتجهزت ، وطاولة الاكل موجودة والادوية في كل مكان قمت قلت له متى جايين قال مدري !؟ قلت كيف ماتدري لازم تعطيني خبر قبلها وقمت صرخت في الغرفة وصرخت عليه قلت ابغى شويا احترام وبكيت وانا ارتب الغرفة وجيت بطلع طاولة الاكل قال لي سيبيها لاتطلعيها قلت خليني اطلعها لاتجيب لي الكلام قال لي لا ماعليكي وكنا واقفين عند الباب واندق باب الغرفة ووكانوا اهلوا دفيت الطاولة على جوا وجيت بفتح الباب قال انا افتح الباب ، قلت لاتجيب لي الكلام خليني افتح الباب مارضي وهو فتح الباب قامت امه قالت كمان انت تقوم تفتح الباب وتكلم عمته وتقول شفتي هو اللي قايم يفتح الباب انا دمعت وطالعت في زوجي بنظرة وهو طالع فيا ودحين ماسكة نفسي بالقوة عشان لا ابكي وهما موجودين |
رد : اهل زوجي اهانوني !
انت عصبية الله يصلحك،،لاتاخذي الأمور بعصبية وصراخ،،
لا تكوني دقيقة وجدية زيادة،،ترى في أمور الرجال ماينتبهوا لها زي متى جايين وغيره،، حتى لو اتفاجأت بحضورهم خذي الامور ببساطة ،،اقرئي في أنواع الذكاءات وركزي على الذكاء الاجتماعي. |
رد : اهل زوجي اهانوني !
انصحك قبل ﻻتخرب بيتك
افصلي تماما بين مشاكلك مع اهل زوجك وحياتك مع زوجك مو زوجك اللي اهدر كرامتك علشان يرجعها وﻻ له عﻻقة باللي صار انتي رديتي خﻻص انتهى الموضوع كذا زوجك بيقف بصف اهله مهما كان هذي امه وذوﻻ اهله خصوصا اذا شاف انك حتى معه لسانك طويل.. خليك ريلاااكس معه افصلي تماما بين حياتكم ومشاكلهم علشان ماتتأثر حياتكم.. بس اذا اسأوا لك عنده وضحي له الحق ووبس ربي يهديكم جميعا ويشفي زوجك |
رد : اهل زوجي اهانوني !
احبطت من ردودكم كلها تلوموني نفس مواضيعي القديمة
وحاولتو تركبوني الغلط لحد ماصددقت اني انا الغلطانة ، وجيت على نفسي واستحملت وسار اللي يبغاه زوجي في مواضيعي اللي فاتت ما عاد عضوة الله يذكرها بالخير كرستاله انصفتني وشافت الحق معي ، وماقدرت ارد عليها لأن الموضوع اتقفل انا اللي زاعجني سلبية زوجي ، لمن يشوف تصرفات اهله معايا مايعلق ويتم ساكت ، حتى كلمتين لي حلوة ياكل فيها عقلي مايقولها ليش ماتقولوا هو اللي راح يخرب بيته ، هو راح يخسرني !! وبيتي اذا انخرب مو انا اللي خربته ومو انا اللي بخسر زوجي هو اللي راح يخسرني بسلبيته وسماحهم لهم انهم يعاملوني بالطريقة دي انا ماطلبت يسوي مشكلة كبيرة ويكون بين نارين بيني وبين اهله بس قلت له انصفني ووقول لهم زوجتي عاملوها بالطيب ما ارضى عليها ، واحترام ويعطي اخوه كم كلمة على رفع صوته وصريخة علي واسلوبه معي والله انها كبيره عندنا انو اخ الزوج يطاول على حرمة اخوه وانا مقتنعة 100% لو سكت هالمرة راح يتمادوا اكثر واكثر وزوجي بيتم ساكت وسلبي ربي مايرضى بكذا ولا انا ارضى على نفسي شكلي راح اطلب الموضوع يتقفل ، ماراح استفيد من لومكم لي ولا راح اتنازل عن اللي في بالي ، على العموم شكرا على وقتكم وارآئكم |
رد : اهل زوجي اهانوني !
الله يكون بعونك وييسر لك حملك يارب ابعدي عن التوتر قد ماتقدري عشان نفسك وزوجك دامه محترم اما اهل الزوج هما كذا يختي والله لو انك ملاك نازل من السما وما دخلتي مزاجهم بيقولوا شيطان هما كذا مافي تغيير انتي بس تحملي واصبري عشان زوجك ولا تردي عليهم كمان طنشي ولاكنك سامعه شي دام زوجك معك وعارفك انك مستحيل تغلطي
|
رد : اهل زوجي اهانوني !
بعد زيارتهم الثانية
ألم يعلق زوجك؟؟ خصوصا انه طالع فيك لما فتح هو الباب و اتكلمت امه انه حتى الباب ما تفتحيه؟ حتى الفندق.الم يشرح لهم سبب بقاءكم بالفندق المحجوز من قبل الشركة؟ |
رد : اهل زوجي اهانوني !
حبيبتي حطي حلق بإذنك مو كل رجل عنده شجاعة يحق الحق،،
بمعنى لما يخطؤوا أهل الزوج وخاصة أمه وحطي تحت كلمة أمه مليون خط ،،يقابل الأمربالصمت،، هذا أكبر دليل اعترافه بخطأهم ،،لكن مايقدر يواجههم،،،والأكيد راح يسااااااااامح أمه ويلتمس لها الف عذر برا بها.،، كون ان زوجك مايجادلك ويحاسبك ويعاقبك ويطلب منك الرضوخ لها وتنفيذ ماتطلبه،،هذا دليل شايف الغط وما بده يتدخل عشان لا تكبر الخلافات ،،وبالتالي المواضيه التافهة البسيطة تتحول لمشاكل كبيرة ،، خلاص لاتعيري هتمام لتدخلاتها،،، تقبلي طبعها،،وتجاهلي تصرفاتها من أجل زوجك،ولأجل عين تكرم مدينة،، أنا صراحة ما أذكر مواضيعك،،بس لا تاخذي الحياة الزوجيه معادلة رياضية، سايسي وداري،،وكبري عقلك عن قالت وسوت،،عشان خاطر علاقتك بزوجك ماتتوتر،،، مهما كان الزوج طيب ويراعي خاطر الزوجة لكنه ما يرضى كلمة ع أهله حتى لو كانوا مخطئين...أهم شي هو مابيحملك عشانهم شي فوق طاقتك. |
رد : اهل زوجي اهانوني !
ع فكرة انا مو قصدي احطمك ولا يحزنون
بس حبيت انصحك باللي عندي |
رد : اهل زوجي اهانوني !
اصبري على ام زوجك خصوصا ، مو علشانها ، علشان زوجك ..
طنشي بقدر المستطاع لا يخربون زوجك عليك ما دامك واثقه ان علاقتك بزوجك كويسه ولا تناقشينهم نهائيا مره ثانيه .. |
رد : اهل زوجي اهانوني !
ذكرتي ان اهلش عندهم خبر بلي يصير
خلاص خلي أمش تكلم أم زوجش وتوصي فيش ، أو ابوش يكلم زوجش |
رد : اهل زوجي اهانوني !
نعومه تعالي لا تزعلي ياقمر.. مو انا قايلتك ماتحبي احد يدوس لك على طرف
بقولك شي اللي ردو عليك ردو من خبره إما شافوها في نفسهم او في غيرهم.. ما احد فينا يبغاك تاكلي المطب وتنعاد فيك المشكلة من جديد.. انت صح الصح وهم غلط.. بس لا يوديك الصح لطريق مشاكل لان الموضوع حقيقي ما يحمل وبكره تدور الايام وتفهمي انت عليك شي واحد حالياً .. حياتك الزوجية .. زوجك.. شخصيتك .. كيان نعومه هذا يبقى محفوظ امه خاطر في بالها الان انك ممشيه ولدها ومقومته ومقعدته وجالس يخدمك وهو مريض خليها تنهش في نفسها بنفسها هذا بحد ذاته كافي يجننها.. استريحي انت بس ومملكتك دوبها ناشئة مو وقته المشاكل مع هذا وذاك ابداً مو وقته .. ثبتي الحكم يابنتي وبعدها انطلقي في حفظ الله ومو حلوه بعد سنتين ثلاث يجي زوجك ويقولك والله اللي صار عادي بس انت تحبي المشاكل وكبرتيها وامي تخاف علي وانت من يومك تحبي المشاكل مع اهلي وتحبي لف الكلام!!@ فيه مشاكل كبيرة تحتاج وقفه اما مشكله زي ذي ورمي كلام انت اكبر من تضيعي وقتك فيها.. أتمنى رسالتي تكون وصلت.. في حفظ الله ورعايته يا نعومه ودايماً يارب اسمع عنك اخبار حلوه زيك.. |
رد : اهل زوجي اهانوني !
يا اختي غالبا الزوج مايغلط امه لو غلطانه
ترى صعبة لانه رضاها بعد رضى الله مباشرة يعني بتعيشي سلكي لامه وابوه خاصة اما اخوانه واخواته لازم يمنع تطاولهم عليك بس اذا ما ممنع اعرفي انك مو اول وحدة ولا آخر وحدة تنظلم الصبر يا اختي راح تجني ثماره بس لاتستعجلي صدقيني كثير نساء اكلوا هوا من اهل الزوج لين شبعوا بس مع العشرة وانجاب الابناء صار الزوج يمنع احد يغلط على زوجته بس اصبري لانه زوجك موقفه صعب الان صعب يتكلم لانه يمكن يحتاج لاهله وخاصة الرجال بسبب وضعه الصحي الاحترام ورفع القيمة يجي بعد صبر وعشرة طويلة |
رد : اهل زوجي اهانوني !
اقتباس:
هي دي المشكلة عارف اني مابغلط واني بحترم اهله واهله العكس بس برضو شايف انو الموضوع عادي ماعجبتهم براحتهم مو ملزومة اعجبهم وارضيهم يكفيني منهم احترام ويكفو شرهم وخيرهم عني الله المستعان |
رد : اهل زوجي اهانوني !
اقتباس:
للأسف ماعلق ولاقال اي كلمة اتأملت فيه واستنيت يقول اي شي بس ساكت كأنه مجبور يفتح الباب انا بعدها التزمت الصمت وانزويت على جمب في الغرفة بسبب اخوه وعمه لأنهم موجودين لا ماشرح ولاكلف على نفسه ، احزن على نفسي كل مره اعيد وابرر لهم ، حتى عمته لمن جات تزوره وتدق بالكلام عن الفندق ، جلست بشكل يحزن اعيد الاسطوانة ونفس الكلام اخواتي قالوا لي اسكتي خلاص لاتعيدي ولاتزيدي تبرير استنيت منه بعد مامشيوا اهله يطيب خاطري بكلمة يعلق يتكلم كل اللي حصلته من الصمت ، وطلب له اكل وحلا وعصير وقعد ياكل وكأن ماسار شي ، انقهرت من بروده وتطنيشه لي ، اتصلت اختي عشان تتطمن عليا وجلست اتكلم معاها ولأن الغرفه صغيره ما استحملت وحكيتها الموقف اللي سار وهو سامع اني اتكلم عليه وعلى اهله وهو ساكت وياكل قفلت من اختي ، وقلت له اظن انك سمعت الكلام واتناقشنا وطولنا بالكلام مفاده انو يطالبني بإحترام اهله بالذات امه وابوه واني اذا زعلانه من اهله هو ماله علاقة يعني لا انكد او ازعل منه قلت طيب وانا نفس الشيء انا ابغى احتراااام منهم عشان احترمهم وعلاقتي من هنا ورايح بتكون رسمية معاهم قالي خلاص كبري عقلك وطنشي لاتجلسي تسوي مشاكل ووووو اذا اهلي سووا لكي شي خلاص كلميهم وقولي لهم الصراحة واتفاهمي معاهم بس انا مابدخل لانه ماله شغل وعلاقة بالموضوع !!! انا استغربت مرا ، يعني لو اهله مرمطوني وهو شايف مابيدخل لانه ماله علاقة بالموضوع حتى تعليقه على موقف امه انو كلام عادي ولا ادخل في نيتها لأنو حرام |
رد : اهل زوجي اهانوني !
اقتباس:
كلامك صحيح واتكلمنا واتناقشنا وخرجت من النقاش معاه انو مستحيل بيدافع عني حتى ولو اهله غلطوا علي او اي احد غير اهله يقول مشكلتك ماهي مشكلتي ليش تدخليني !! قلت بس انت سندي وزوجي وانا جيت اتسند عليك وتدافع عني مهما سار ولو احد اتكلم عليك زي اختي ولا امي مابسكت على الاقل بدافع عنك او استفسر عن اللي سار بس مو كأنو ماحصل شي ! قال لي انا سألت اخويا ، وقال انه ماصرخ عليك وبعدين هو اسلوبه كذا وامي ماكان قصدها بس خافت عليا وابويا عصبي قلت الصراحة ماشاءالله مجهز لهم اعذار قلت خلاص انا عرفت انت كيف وغسلت يدي منك ماراح ارجع لك واقولك عن اهلك فعلوا لي وعملوا وووو مني لأهلك اعطوني مره عطيتهم 100 مره وانتهى الموضوع وخلاص |
رد : اهل زوجي اهانوني !
اقتباس:
وحسبي الله ونعم الوكيل اللهم اكفينهم بما شئت وكيفما شئت شكرا لك |
رد : اهل زوجي اهانوني !
اقتباس:
امي ودها تتدخل وتتكلم قدها زعلانة على وضعي بس انا كل شوي اقولها اصبري لو سار شي ثاني منهم اتكلمي ابويا متوفي الله يرحمه امي ماشاءالله عليها معتمدين عليها هي اللي تحل وتربط دايما مع مشاكل اخواتي وازواجهم بس انا ازعل عليها مابي اتعبها لانها كبيرة وتهمني راحتها |
رد : اهل زوجي اهانوني !
اقتباس:
ههههه لاتلوميني كنت زمان انا واخواتي نسكت ونصبر على اذية الناس لنا وكلامهم علينا ، وامي كانت تزعل مننا ماتبغى مشاكل مع انها قوية وتقدر تاخذ حقها لحد ما الناس ماستهونت فينا وتستقل فينا انا وخواتي اتعقدنا وسرنا نعرف اذا سكتنا عن موقف مره واستحينا من ناس ماتستحي راح ناكل على راسنا بعد كذا خلاص انا فهمت طريقة زوجي انه مابيسوي لي شي لو جيت استفزع فيه واطالبه يدافع عني وانا الصراحة رميت طوبته وغسلت يدي منه وقلت له انا لو طحت لو سار لي شي انت ماراح تنفعني خلاص راح احاول اريح بالي ونفسي سايره عصبية ومتوتره بزيادة بس اعرف انه اهله بيجووا اتوتر وقلبي يدق لحد ما احس انه بينشلع واقعد استغفر واردد الادعية صحيت اليوم تعبانة حاسة ببرود شديد في اطرافي مع ان التكييف طافي والم في بطني وكأني برجع وتنميل في رجولي وراسي احسها خفيفة كأني بطيح قال لي انه امه واخيرا ابوه كمان جاايين لفندقنا قلت له والله تعبانة يافلان بس قلت ماعليه قمت اتجهز وارتب الغرفة شويه وانسدحت على الكنبة ماصحيت الا وهو لابس ومرتب نفسه ومتعطر قلت فين رايح قال ولامكان قلت طيب جات امه ودخلت سريع سريع بتاخد ولدها عشان عمي ابو زوجي ماطلع جالس تحت وهو يقولي يلا اقوله فين رايح ؟؟؟ يقولي نازل يلا تعالي وامه واقفه بتحاول تاخده بسرعه اقوله ليش ماعطيتني خبر قبلها يقولي ماكنت ادري وبدأ يأشر لي معصب ويفرصع لي بعيونه وانا مو مستوعبة امه طلعت وقالي يلا انزلي قلت تستهبل انت ماقلت لي انا على بالي بيطلعوا هنا قال لا يلا انزلي انا وقتها عصبت لذي الدرجة مستهين فيا وبتعبي وبحملي قلت له معليش تعبانة مافيا انزل وهو يحاول اني انزل خرج وراح مع امه وانا جلست في مكاني مسدوحة وقلت لاحول ولاقوة الا بالله مافيك امل ولا رجا رميت طوبته خلاص مو نافعني والله بكرى لو صحتي راحت فيها ودحين شايله هم نفسي وتعبي والنونو الله المستعان يقطع الزواج وسنينه ، دحين بس حاسة بشوية نفور وكره منه حتى مراعاه لي مافي شكرا ليكي حبيبتي وان شاءالله دايما تكوني بخير وبسعادة يارب |
| الساعة الآن 02:47 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©