|
زوجي يتهمني بحسد ابنته
السلام عليكم ورحمة الله
بادخل بالموضوع على طول اليوم رحت زرت ام زوجي من زمان ما شفتها وكانوا بنات زوجي موجودين البنت الكبيرة سلمت علي وقعدت معاي والبنت الصغيرة ما سلمت وقعدت بغرفة ثانية تلعب مع بنتي قعدت يمكن ساعة وطلعت بعد ساعة اتصل زوجي يصارخ علي وحده معصب يقولي بنتي الصغيرة طاحت علينا وتشنجت كله من عينج انتي حاسدتها وعينج حارة حاولت ابين له باسلوب هادي ان ما ادري عنها ولا سلمت عليها ياني البيت وقعد يصارخ وشوي ويطقني وانتي اللي حسدتي بنتي وهذي ثالث مرة وانتي ما تدكرين الله وانتي عينج حارة الصراحة انا طول الوقت ابجي ماني قادرة اتحمل اتهاماته اخر شي خذيت سجادتي ورحت بغرفة بروحي وقعدت اشكي همي لله شوي واسمع صوته يناديني رحت له حاول يراضيني بس انا كارهته وكارهة العيشة معاه حاول يحضني بس ما خليته لان وايد مضايقة منه واساسا ما ودي اشوفه قالي اذا ما ييتي احضنج الحين ماراح احضنج طول حياتنا قلت له طلقني اساسا محد يبيني منكم وانا وايد ضاغطة على نفسي عشانك بس لي حد اهني وخلاص قالي اوكي اذا طلعت الحين ماراح ارجع خليته شوي وعقب حضنته طبعا طول الوقت وانا ابجي لا زال يراضيني بس نفسي خلاص عافته اكرهه ما ادري اذا فيه حل والا لا اعتبروها مجرد فضفضة احس اني صج انظلمت منه |
رد : زوجي يتهمني بحسد ابنته
الله يعينك حبيبتي والله ماعندي شي اقوله الا الدعاء لك ان الله يسخرلك زوجك ويهديه
|
رد : زوجي يتهمني بحسد ابنته
الله يعينك
|
رد : زوجي يتهمني بحسد ابنته
وعليكم السلام ورحمة الله وبركاته ...
موهبة العزيزة عندما كنت أقرأ تغيراتك مع زوجك للأفضل ، أرى هدوء ماشاء الله تبارك الله وسعدت لأجلك جدا قلت لنفسي الله يثبتها دوما .. والحمدلله بأنك ذهبت تشكين همك لله أولا فهنئيا لك القليل يفعل بمثل ذلك .. أقدر شعورك ومؤلم هذا اﻹتهام عليك ، بما أنه حاول أن يصلح الأمر فلتقبلي ياحبيبة وتقولي كل مابداخلك .. الموقف الذي مررت فيه هو اختبار هل موهبة ستقف أم ستكمل مسير حياتها الجديد والذي تعبت عليه وحاولت الكثيير ؟! انجحي قي هذا ولا تطيلي الوقوف ... الرسول صلى الله عليه وسلم قالوا عنه ساحر مجنون لكنه لايأبى بويلات البلاء أبدا ... أسعد الله قلبك . |
رد : زوجي يتهمني بحسد ابنته
اشكركم حبيبتتي على سرعة الرد
والله شعور القهر مؤلم اختي سقيا اي نعم ولله الحمد من قبل ومن بعد فما انا عليه هو فضل من الله وحده هو الى الان يحاول ارضائي وان ماكان فيه شي بس النفس عافت ،،،، ابيه واحبه بس مو حرام عليه يتهمني هالاتهامات؟؟؟ بناته اصلا معورين قلبي لا ام ولا جو اسري لما ناداني بعد الصلاة قلت له دعيت حق بنتك الله يشافيها ويعافيها واخذ من وضوئي اذا تبي بس والله النفس طابت خلاص |
رد : زوجي يتهمني بحسد ابنته
زوجك جد بضحك .. اول مرة بسمع حدا بصرخ ع حدا لانو حسد حدا !!
خاصة انو الحسد مو بايد الواحد و بعدا انتي ع شو بدك تحسدي بنتو !! شو هي من عمرك حتى تحسديها جد تفكير غريب بدل ما يجي يصرخ عليكي ياخدا لطبيب في كتير امراض من اعراضها التشنج و باسوأ الاحوال ازا كتير داخلة الفكرة براسو .. يطلب منك تتوضي و يحمم بنتو بماء وضوءك على اختي لا تزعلي صدقيني زوجك ما بيحسن يسطير ع انفعالاتو و لا هو بحبك وما بيرضا ع زعلك اكبر دليل انو حس ع غلطو و ما هان عليه يشوفك عمتبكي الحل انك ازا مو قادرة تغيري من عيوبو تحاولي تتعايشي معها و تدربي نفسك على انو ما تاخدي شي من كلامو بساعة الغضب خدي موقف و حسسيه انك زعلانة بس بدون ما تقهري حالك و تنكدي ع حالك |
رد : زوجي يتهمني بحسد ابنته
اولا ماشاءالله عليك رحتي صليتي و ناجيتي رب العباد
ثانيا ربي استحاب لك واعتذر لك بسرعه زوجك الحمدلله الموقف صح سخيف لكن خلاص اعتذر وانتي قلتي الي بخاطرك خلاص مشيها الله يبارك لك ببنتك يارب ويخلي له بناته |
رد : زوجي يتهمني بحسد ابنته
الله يهديه زوجك من صجه يهاوشك و يتهمك بالحسد
ولا تدرين الحمدالله قال حسدتيها ما عملتي لها عمل الله يعينك عليه وعلى تفكيره .... وسلامتها بنته ما تشوف شر هونيها يا اختي تهون هو صج الموقف صعب و يضيق الخلق و صدمه لكن دامك تحبينه استحملي وادعي له ربي. يحنن قلبه عليك دعواتي لك يجبر قلبك غاليتي |
رد : زوجي يتهمني بحسد ابنته
زوجك قلبه ضعيف
ما يفكر و ينفعل مع اللي اتعاطف معاه بس نقطة ضعفه انه عاطفي يعني بميل للي شايغه يتألم بدون تفكير شاف بنته تتألم و ما اتحمل عليها و شافك تتألمين و ندم الله يعينك و الله حاسه فيك موقف صعب بس ﻻ تسامحي بسهولة خلي يتذكر زعلتك هذي و يحكم عقله في مواقف بعدين ان شاء الله الله يهديه |
رد : زوجي يتهمني بحسد ابنته
هو يحاول يراضيني الحين
بس انا رافعة الجام انا ادري هذا تفكير امه عندها كل الناس يحسدون الا اهما الله ينصرني عليهم والله امس دعيت قلت يارب مثل ما وضحت للناس كلهم براءة يوسف عليهم السلام توريهم براءتي من هالاتهامات وانا مالي شغل طلب مني وضوئي عطيته بدون نقاش عشان يعرف اني مالي شغل طبعا فجاة طلع كلام الغزل والحب اللي كنت اتمنى بس بوقت مو مناسب كلش دعواتكم وايد مجروحة |
رد : زوجي يتهمني بحسد ابنته
رددي اللهم إني مغلوب فانتصر
|
رد : زوجي يتهمني بحسد ابنته
الصراحة ماني راضية الا لما تسفرني
هو قالي ان بيسافر البحرين يوم واحد وباقوله باروح معاك بس ما اعرف شنو الطريقة الصح |
رد : زوجي يتهمني بحسد ابنته
السلام عليكم ورحمة الله وبركاته ...
موهبة أختي الكريمة هل عندما تصادفك مشكلة ستأتي بالماضي والحاضر والمستقبل ؟!!! لا يعقل أبدا، الماضي مضى .. لا تضعي هذا على ذاك ، التفتي لزوجك تأسف لك وأعتذر .. لا تضيعي لحظات السعادة بالزعل الطويل .. عشان أريحك أختي قبل خمسة سنوات إنتي حسدتي بنتي نشرت الخبر ورحت توضيت وأعطيتها ووكلت أمري لله ..: ) تذكري الأنبياء أشد بلاءا منك ، لا تسلبي سعادتك بيديك .. الله يسعدك .. |
رد : زوجي يتهمني بحسد ابنته
وان قال لا يا موهبه
|
رد : زوجي يتهمني بحسد ابنته
انا هني افكر بصوت عالي معاكم
ابي شوركم سقيا حبيبتي مافتحت الماضي بس امس كنت فعلا مضايقة باتهامه انا قاعدة احاول امسح الماضي السيء واحط بداله الذكريات الحلوة بالنسبة لي المسالة يبيلها وقت اختي مبتعثة الصراحة ما ادري شاقول لو رفض ابي شي يرجعلي حقي بعيني على الاقل اعتذاره مو كافي بالنسبة حق هجومه |
رد : زوجي يتهمني بحسد ابنته
ماتوقع ان هالكلام من نفسه،،اصلاً لو من نفسه ماكان عصب بهالشكل،،اتوقع محشي كلاااااام من جنس الافعى شوفي مين عاد بصراحه كنه كلام نسوان ..بس شوفي مين يشيشه عليكم بهالخرابيط،،نصيحه 😈لاتخربين حياتك عشان وحده حاقده خليها تموووت قهررر
|
رد : زوجي يتهمني بحسد ابنته
اقتباس:
|
رد : زوجي يتهمني بحسد ابنته
زهرة حبيبتي
اعرف كلام منو كلام امه دايما عبالها الناس يحسدون عيالهم واهم لا انا الفترة الاخيرة ترقيت في عملي جدا جدا وهي سالت وبدت تنتقد عملي طبعا ما خذيت كلامها بمحمد الجد لان كلام عجايز بالنسبة لي فاتوقع هي محترة باعتقادي مهما سوت وحطت ماراح توصل للي تبيه لو وصلت جان خلت ولدها يكره زوجته وهو الى الان يموت فيها حسبي الله عليها ونعم الوكيل |
رد : زوجي يتهمني بحسد ابنته
السلام عليكم ورحمة الله. .
الله يهديك ياموهبة اتركي والداته في حالها ولاتدعين عليها واكتفي بالدعاء لها بالهداية... هل يعقل كل مازعلت من زوجك ستطلبي سفرية ؟! وهو حاليا كما قلت في موضوعك السابق ماديته لا تسمح عفكرة اﻹعتذار الذي قدمه زوجك لك أبلغ بكثيير عندنا يعتذر لك بوسيلة مادية سواء سفر أو غيره ... زهرة أختي الكريمة لاتؤججي مشاعرها . فا أنت لاتعيشي معها ... موهبة تظنين أنت بعد الصلح مع زوجك ستكون حياتك خالية من المشاكل ، لكن لا بد منها ولكن لا نطيل الوقوف عليها فهي تضيع وقتك ... الله يصلحك .. |
رد : زوجي يتهمني بحسد ابنته
هذي هي الحياه يوم حلو وعشره مر
خليه هو يدور رضاش لا تطلبين سفر او شي ثاني هو وضميره خليه يأنبه موهبه شو صار في البنت بعدها تعبانه |
رد : زوجي يتهمني بحسد ابنته
حبيبتي سقيا اشكر لج اهتمامج بموضوعي
كثيييييييييير من المشاكل ما اوقف عندها وبكلمة اسف منه احلها وخلاص انتهى الموضوع بس انتي ما شفتي شلون يصارخ علي ويهاجمني امه خرابة بيوت بدليل هي بنفسها قالت لي انا اهي اللي قالت حق ولدها يطلع مرته من بيتهم كله واحد حبيبتي سقيا بس احس هالمشكلة ما لازم تتطوف بهالسهولة وانا اعرف زوجي كل ما الين معاه يدوس على راسي اكثر خليني هالمرة احط حد كوكب حبيبتي علميني اشلون ازعل تعرفيني ما لي بهالسوالف امس ماكان عندي احتمال الليلة ينام عندي شلون اتصرف |
رد : زوجي يتهمني بحسد ابنته
بالنسبة حق بنته ما ادري عنها الصراحة
لاني ما كلمته |
رد : زوجي يتهمني بحسد ابنته
هههههه تبين اعلمش كيف تزعلين
ما طلبتي شي غالي والطلب رخيص خلش بااارده كوول انشغلي بالموبايل ودلعي نفسش وبنتش ، احقريه الجواب على قد السؤال وقومي بواجباتش على اكمل وجه حتى ما يمسك عليش مسكه اذا سألش شو فيش ( يحبون يستهبلون كأنهم ما سوا شي ) قولي سلامتك ابد ماكو شي خخخخخخخخخخ المنتدى خربني بعدين اذا واجهش وقوليله ابي منك الثقه والاحترام انا خلاص صرت منكم وفيكم وله انت بعد عاديني وحده غريبه ومش متقبليني حلو الكلام موهبه |
رد : زوجي يتهمني بحسد ابنته
اقتباس:
زعلش من ابوها شي وتطمنين على البنت شي ثاني انتي زوجة ابوهم واي زله محسوبه عليش ، على الاقل تواصلي مع عمتش تعرفين حال البنت jytt |
رد : زوجي يتهمني بحسد ابنته
موهبه انتي مثل الي يبني ويصبر وفي الاخر يهد الي بناه
|
رد : زوجي يتهمني بحسد ابنته
يسلمو كوكي
هذا اللي سويته امس الصبح سويت له فطوره وانا حتى نظرة ما اطالعه وارد على قد السؤال طبعا وقتها كلام الدلع والغزل كله طلع الكلام اللي كنت اتمناه طلع بس ماله اي طعم الحين هو شكله اللي قلب علي لان الليل ما كلمني واشلون اساله عن بنته؟؟ ادزله مسج؟؟؟ والا اسال امه احسن؟؟ |
رد : زوجي يتهمني بحسد ابنته
ارسلت له رسالة اسال عن بنته
بس ياخوفي يحسبها ان خلاص طاح الحطب |
رد : زوجي يتهمني بحسد ابنته
توه كلمني - بالمسجات - يسالني عن نوع القهوة اللي اشربها لان بيشتريها وهي الصراحة من نوع خاص وغالي
ما قدرت احقره.رديت على قدر الاجابة وشكرته |
رد : زوجي يتهمني بحسد ابنته
موهبه ترى زوجش باله مو طويل
وممكن يقلب عليش وتطلعين انتي الخسرانه خليش احسن منه وتطمني على البنت وطمنينا عليها |
رد : زوجي يتهمني بحسد ابنته
حبيبتي موهبة..
ذكريني الله يرضى عليج .. أمه ليش خطبتج له؟ وهل كان الاهتمام بالبنات من ضمن الأسباب؟ |
رد : زوجي يتهمني بحسد ابنته
بنته طيبة ولله الحمد
توه ياني البيت قعد مع بنته سويت له قهوته بس ما كلمته انشغلت بالايباد وهو بعد ما كلمني قعد فترة مع بنته وعقب سالني عن شنو باسوي اليوم وجاوبته على قد السؤال والحين طلع يصلي مهرة حبيبتي اهي خطبتني تبيني ام حق بناته وماصار اللي في بالها لا من جهة البنات ولا ابوهم ولا امهم ولا حتى انا يعني الخلاصة يابتني عون صرت فرعون ههههههههههههه عشان جذي الحين ما يهمني شنو تخطط وشنو تسوي لان بالنهاية اذا تبي تسويلي شي مو وين راح يقلب عليها مثل ما الظروف الحين صارت عكس مخططاتها ادري كلامي جريء وكبير كله واحد باطلع اللي بقلبي |
رد : زوجي يتهمني بحسد ابنته
وضعك وردت فعلك إلى الآن تمام
خليك رسميه بس بدون مدة بوز او تقصير في واجباتك مع الاهتمام بنفسك كشخه عروس:) |
رد : زوجي يتهمني بحسد ابنته
موهبه
غلط واعتذر وخلصنا بتمططينها وتمدين البوز وحالتك حاله محد متنكد الا انتي ولا هو بسيل نفسه وبيسهر بديوانيه مادرى عنك اختي خلاص اعتذر موتي هالموقف باحظته لو كان ماد ايده قلنا بس موقف هذا طوفيه |
رد : زوجي يتهمني بحسد ابنته
اتصل علي وقالي ييبي البنت عند خواتها ووديتها
دزيتله مسج ( اقرا على بيتكم لا ينهدم من عيني) و ( اسال الله الذي برأ عائشة ان يريكم براءتي من هذا الموضوع) طبعا ردة فعله المتوقعة رد يصارخ وانت كريهة وغثيثة ولا تحمدين الله على النعمة - ما ادري اي نعمة يقصد يمكن نعمة الاتهام 😏) وخلاص الموضوع بالنسبة لي تصكر وانتي تحبين تعيشين دور المظلومة وانت طليقج ( اللي يحبج ) ما استحملج وطلقج وانتي حمدي ربج ان عندج ريل وانا امس حولت لج فلوس وما بين بعينج وانت ما تقدرين تضحياتي الزبدة ان قام يفتح الاكو والماكو وطليقي شدخله بالموضوع ما ادري طبعا رديت عليه وبينت له ان اللي صار شي وكوني احمد ربي واشكره شي ثاني وقلت له ان الفلوس شريت فيها ملابس حق الشتاء للبنت يقولي ( يمكن ) ان انتي السبب قلت له امس ما كان كلامك يمكن كنت واثق 100٪ لو قلت لي يمكن جان خذيت الاحتمال الثاني ولا زعلت وليش تبيني اخس فيك واراعي مشاعرك وانت لا لا تلومني لما ازعل على شي انا مالي شغل فيها ولا ادري عنه اساسا انا مجروحة ومو من اي احد من زوجي يقولي انتي وايد تأذيني قلت له ما اذيتك بس دعيت ربي لي شكله حاط حرته فيني كالعادة لا تقولون لي انتي اللي نقزتيه وبديتي لان اعرفه باييني ولا كان شي صاير وبيقولي انتي الغثيثة والمليقة والحقودة اللي ما تنسى وكلام سم اللهم يا كافي |
رد : زوجي يتهمني بحسد ابنته
مبتعثة حبيبتي ما ابيه يعيدها لان بتكرر مرات ومرات دام السالفة فيها تشييش امه
ابي يعرف انه مبدأه غلط. |
رد : زوجي يتهمني بحسد ابنته
ماعليش انتي غلطانه
كله من مده البوز ونصايح الخوات ازعلي صيري رسميه صرتي نكديه وراعيه مشاكل وانقلبت السالفه عليك للاسف مافيك ذكاء وكيد الحريم كان تقبلتي عذره وقلتي ماهي الهقوه منك احد يحسد بنته بنتك حسبه بنتي وكليتيه بالكلام المصفصف وكان بتلقين الي بيرضيك اصلا بتفشلينه بطيبك |
رد : زوجي يتهمني بحسد ابنته
اقتباس:
مالقيت الا انه كرهك وحقد عليك زياده |
رد : زوجي يتهمني بحسد ابنته
يمكن صح كلامج ما عندي ذكاء ولا كيد حريم
بس لازم يحس ان أذاني بتصرفاته وادري بيرجع البيت وبيزعل لاني ثاقله عليه باخليه شوي ومن اصبح افلح |
رد : زوجي يتهمني بحسد ابنته
لتنويه
انا قلت خليك رسميه بدوووووون مدت بوز وبدوووووون تقصير بواجباتك:) مع السنع والكشخه:) |
رد : زوجي يتهمني بحسد ابنته
فيلسوفة هذا اللي سويته اليوم الصبح
كشخت بس مو وايد الان صبح وسويت له قهوته وانشغلت بالايباد ولما كلمني رديت عليه هو الظاهر كان متنرفز وحط حرته فيني كالعادة |
| الساعة الآن 03:16 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©