|
زوجي يفضل سيارته علي
زوجي عجز يفهمني وعجزت أفهمه في موضوع السيارات ..
13 سنة زواج وما ابالغ إذا قلت في السنة يبدل سياراته بين 3 إلى 5 سيارات .. مممم والله ما أدري يمكن حدث وغير سياراته 6 مرات بالسنة .. بصراحة توقفت عن الحسبة منذ زمن بعيد .. في السابق كنت ازعل وأتهاوش معاه وأقول انت تلعب بفلوسك وماله داعي تبيع وتشتري . سيارتك زينة وإنت لما أخذتها قبل شهرين كنت مقتنع فيه أشد الاقتناع وطاير فيها وتمدح لي مواصفاتها .. والحين لما جات في بالك سيارة ثانية صرت تطلع عيوب الاولى .؟؟ المهم .. بعدين شفت مافيه فايدة .. وقلت دام مب قاصرنا شي أنا وبناتي ليش أنكد عليه .. خله في هواياته .. يبدل في هالسيارات لين يشبع .. وياليته يشبع .. قبل سنة تقريبا أصر ياخذ سيارة (بوحوض) اللي نفس البيك اب .. باحط لكم صورتها عشان اللي مايعرفها : http://87421a79fde09fda7e57-79445249...898499972/main قلت له ياولد الحلال إحنا 5 شلون بنركبها كلنا لو بنطلع .. قال لي عندنا سيارتج .. وأنا أبغي هالسيارة للبر والكشتات بتفيدني كثير .. وهو اصلا في السنوات الاخيرة صاير بيتوتي مايطلع مع أصحابه ولا يطلع رحلات وكشتات كالسابق .. يمكن في الشهر مرة .. قلت له كيفك فلوسك وعقلك في راسك وسو اللي تبيه .. وراح شراها .. في يوم كان عندي معهد قال لي أنا بوصلج .. وكانوا بناتي في بيت جدتهم .. طلعت من باب البيت لقيته ينتظرني في سيارته هاذي .. أنا تعوذت من الشيطان وقلت معليه بركبها ولو اني استحي اركبها أحس عيب وفشيله .. هاذي سيارة بر مش سيارة مدينة والسيارة عاالية جدا .. لازم أنط عشان أركبها وانط عشان أنزل .. قلت أقصر الشر ولا أبغي مشاكل ودام انا لحالي معاه والسيارة تكفينا بركب وانا ساكتة .. ورحت المعهد ورجعنا .. لما قربنا من البيت شفته تعدى لفة بيتنا بيروح بيت أمه ياخذ البنات .. قلت له وين بتخلي بناتك؟ أرجع البيت وخلنا ناخذ سيارتي ونجيب بناتي فيها .. قال لا عادي بقعدهم ورا .. قلت له لا ماتقعدهم ورا (بناتي الثنتين ومعاهم الشغالة) وبنتي الصغيرة في حضني قدام .. قال وشفيها لو قعدتهم ورا ؟ قلت له لا مايصير أنا مارضى على بناتي .. وحتى الخادمة ماراح ترضى على نفسها .. ورا للأغراض وللحيوانات الله يعزكم خرفان ومعز وغيره .. مش للبشر .. وعيالنا .. المهم الرجال عصب وزاد في التعصيب وأنا مصرة مانحطهم بهالسيارة .. وهو مواصل طريقه لبيت أمه .. ولما خلاص وصلنا قدام بيت أمه قام ورجع بيتنا وقال خلاص خلاص برجعك البيت وروحي جيبيهم وكان قمة في الغضب وشكله يخوف بصراحة .. نزلت من سيارته وركبت سيارته ورحت آخذ بناتي .. نزلت عند أمه وكلمتها وانا ارتجف وخانقتني العبرة .. أقول لها أخاف أرجع البيت هو معصب .. كلميه إنتي وقوليله إن أنا معاي حق وحذريه من إنه يكلمني الليلة ويتهاوش معاي على الموضوع نفسه .. أمه قالت لا خلاص أنا بكلمه بكرا .. يعني وش يقدر يسوي ؟ ماراح يسوي شي .. أدخلي غرفتك وقفلي بابك وخليه ينام بالغرفة الثانية .. أنا جدا جدا كنت خايفة منه .. والله كأني حاسة .. رحت البيت وأرسلت بناتي الكبار لغرفهم والصغيرة بغرفتي نامت .. بعد فترة جه الأخ وطق الباب وقال لي أفتحي بتكلم معاج .. قلت له مابي أتكلم في هالموضوع والوقت تأخر خلاص خلنا ننام .. قال افتحي وصار يضرب بالقوة .. أنا خفت بنتي تصحى من نومها قمت فتحت الباب وقال تعالي .. وأخذني للغرفة الثانية . وأول مادخلت الغرفة الثانية قام قفل الباب وشال المفتاح ... صار يصارخ ويهاوش وعلا صوته وعلا صوتي .. تخيلوا الموقف .. أنا لازقة بالحائط وهو واقف مقابلني هو ضخم عريض وطويل .. فرق كبير بالبنية بيني وبينه وجاب يده قدام ويهي رافع صبعه يهددني يقول لا ترفعين صوتج علي .. أنا بصراحة خفت يده قريبة جدا من ويهي .. رحت بيدي بعدت يده عن ويهي .. كنت بقمة الخوف .. يعني ماسويت هالامر وأنا أظهر له قوتي لا ؟؟ كان واضح علي الضعف والخوف ( بس عشان ماتقولون مديتي يدك عليه .. مامديتها بس حاولت أبعد يده عن ويهي).. راح فقد أعصابه وعطاني كفين بأقوى ماعنده يمين ويسار ويقول لي ماتمدين يدك علي .. أنا هناك والله دفاعا عن نفسي كنت بيدي أحاول أبعد يده ويقوم يدزني بكل قوته واطيح على ظهري على الأرض ويضرب راسي الرخام .. والله إن صوت ضربة راسي للحين يرن بأذني .. طحت بالقوة لدرجة إن راسي أرتد وضرب مرة ثانية ..دار راسي وماقدرت أقوم .. أشوف الغرفة تلف فيني .. وألم مو طبيعي وجلست أصارخ وأسبه .. سبيته بكل الكلام اللي عندي .. كان أقصى شي أقدر أسويه .. تميت على هالوضعية يمكن ربع ساعة ماقدر أقوم .. وهو قاعد يصيح ويعتذر ويحاول يضمني ويبوسني وأنا أحاول أدزه وابعده عني بس مافيني قوة مب قادرة ولا أشتهيه يقترب مني بس ماقدرت أتحرك ولا قادرة أصده .. على فكرة .. أول مرة يضربني .. لما استعدت توازني قمت ولبست عبايتي بروح المستشفى .. أبي آخذ تقرير للشرطة .. قال لي أنا بوديج انتي ماتقدرين تسوقين .. وأنا طبعا مارضيت ورحت بروحي .. وكان راسي يدور جدا والوقت متأخر لكن ماكنت أبي من شي .. زوجي عسكري .. لو وصل موضوعه الشرطة ممكن فيها ترميج .. أنا ماكنت ناوية اوصلها للشرطة بس بغيت آخذ تقرير عشان في المستقبل لو تكرر الموضوع يكون عندي شي ضده .. ورحت المستشفى وفحصني الطبيب .. فكي الأيسر يؤلمني بشدة من الكف اللي عطاني أياه وماكنت أقدر أفتحه .. وحتى وانا أتكلم يألمني .. وتحت عيني فيه رضة صغيرة.. على فكرة زوجي يده كبيرة جدا وكفه جاني بكل ذمة وضمير عشان أيش ..؟ لأني وخرت يد عن ويهي يقول لي ماتمدين يدج علي .. ألحين هاذي تعتبر مدة يد ؟؟ اصلا انا ماعندي الجرأة أضربك .. وراسي من ورا انتفخ من أثر الطيحة .. شافني الطبيب .. قلت له أبي تقرير للشرطة .. جلسوني برا ساعة كاملة .. ولكما سألتهم قالوا أنتظري شوي .. بعدين عرفت إنهم عشان يعطوني تقرير بالاصابات اللي فيني لازم يجيني استشاري أجتماعي .. طيب أنا مابي أتحدث بالموضوع ولا أبي أشتكي .. أبي تقرير يوضح اصاباتي وأطلع .. كانت الساعة 12 بالليل .. وواضح مافيه استشاري بهالوقت .. وهم يجرون اتصالاتهم وأنا انتظر وأتألم .. ودورة الراس ترجع لي على أقل حركة براسه .. مجرد ألف راسي أو أوطيه تبقى الدنيا تلف فيني دقيقة كاملة أضطر أصك عيني وما أتحرك لحد ماتروح .. وأنا أبكي على حالي .. آخر شي تركتكم من غير أي كلمة وطلعت من المستشفى وكنت مقهورة لأنهم اخروني بهالشكل وهم يشوفون تعبي ويشوفون بكائي وحالتي ومخليني حتى مايجي أحد يكلمني ويعتذر ويوضح لي ليش التأخير .. ثاني يوم الصبح رحت للمستشفى عشان أعمل أشعة مقطعية لراسي يتأكدون لو فيه كسر أو نزيف داخلي.. والحمد لله ماكان فيه بس دورة شديدة وقوية .. (اسبوع كنت انام وأنا جالسة ماقدر أرقد على ظهري من قوة الدوار) .. طلعت من المستشفى على المطار.. كان عندي سفر لأهلي عشان امي بالستشفى .. وكان موعد طيارتي بالليل .. بس رحت المطار وغيرت رحلتي وسافرت على طيارة الظهر .. وأول نزلت من الطيارة أتجهت للمستشفى عشان أمي .. لقيت أبوي .. وكلمته .. وأنا كنت ناوية ما أخبره .. أقول يكفيه شايل هم أمي ومرضها .. بس من شفته ماقدر أقاوم وجلست أشكي واصيح .. يتبع .. موضوع البارحة .. تم تعديل العنوان ليتناسب مع المضمون |
رد : أو مرة أسمع بواحد يفضل سيارته على زوجته
عفوا .. ماكان ودي أذكر مشكلتي السابقة بالتفاصيل .. بس رجعت لي الذكريات بسبب مشكلتي الحالية ..
زوجي بعد هالمشكلة باع السيارة .. قبل اسبوع تقريبا أشترى سيارة نفسها .. لا حول ولا قوة إلا بالله .. انا كرهت هالسيارة حتى اشوفها بالشارع فما بالكم اني اركبها .. أول امس كان طالع وأنا دقيت عليه وسألته متى بترجع؟ ودي أطلع شوي أخذ آيسكريم أو عصير طلعة ليلية سريعة ونرجع .. بس كنت محتاجة أغير جو لأني تعبت من تدريس بناتي للإمتحان .. لما قرب من البيت قال لي أنا قريب من البيت بس بنطلع في سيارتي (البوحوض) .. قلت له لا خلاص مشكور بس مب لازم أطلع .. قال كيفج ودخل البيت .. وأنا ماكنت زعلانة أبد .. ولا هو .. لكن هو قعد يفكر يوم كامل .. وينسق كلامه (كالعادة) وفتح الموضوع معاي أمس .. يقول أنا خاطري زوجتي تطلع معاي في السيارة .. قلت له خاطرك أطلع معاك بطلع ليش لا ؟؟ بس مب بهالسيارة .. قال انا ودي اطلع بهالسيارة .. قلت له اطلع بالسيارة بس بدوني .. عادي .. اللي في خاطرك بيصير بس خاطرك تطلع معاي وبهالسيارة . أنا آسفة أنا ماحبها ولا أحب أركبها وعندنا غيرها سيارتين (سيارتي وسيارة ثانية شراها عشان الدريول اللي قدم عليه) ولما خذتها كنا متفقين لو بنطلع عندنا سيارات ثانية نطلع فيها .. (( ولا يعني احنا لما أتفقنا كانت نيته بقول لها أيه ولما يصير الجد وتكون سيارتي عندي بجبرها تركبها وبنسى الاتفاق)) !!!! أنا حاولت إني ما أشد في الموضوع .. بس بنفس الوقت خلاص مستحيل بركبها دام فيه سيارات غيرها وماني مجبورة فيها .. خصوصا إني تعقد منها من المشكلة الأولى .. وهو بكل قلة احساس يشتريها مرة ثانية وتعالي غصب اطلعي فيها معاي وأنا خاطري وتعالي أفهمي تفكيري وحسي فيني ومدى رغبتي في إني اطلع مع زوجتي فيها!! لا يا شيخ .. حسستني إنها رولز رايس ودك تطلع مرتك فيها .. المهم طلع من البيت وباين انه مستاء وأنا مليت من التنازل وأعتقد إني مو ملزومة أطيعه في هذا الامر .. واصلا ماكان فيه مشوار ضروري .. بس يبيني أركبها ويرضى غروره إنه انتصر علي وخلاص .. (على فكرة زوجي دايما يقول لي إنتي على شنو شايفة نفسك .. وأنا ما أخذتك من بيت ابوك وعندكم ملايين .. حالتنا ممتازة الحمد لله .. لكنه يقول أنا أبغي اعيش أعلى من مستواي .. ويقول مدي ريلج على قد لحافج ومادري شنو .. أنا ماعشت اعلى من مستواي .. هو يبيني أبقى أعيش على نفس الحالة اللي تزوجته فيها .. كان راتبه ضعيف وديونه كثيرة وأنا ماكنت أشتغل .. فطبيعي أشتري ملابس من محلات متوسطة ) وأعيش حالة متوسطة .. وبعد ما هو ترقى وزاد راتبه وأنا توظفت ةراتبي قوي والحمد لله .. تبيني أعيش على نفس المستوى السابق؟ ) المهم لما طلع مستاء .. أتصل .. وايضا جلس يناقش في هذا الموضوع .. وانا ماحبيت أفتح الموضوع السابق .. قلت خلاص موضوع اغلقناه وطوينا صفحته .. وخلني اركز على المشكلة الحالية واجباره لي إني أركب في سيارته .. هو بس يبي يحس إنه نزل من راسي وكسر غروري .. وأنا والله مش مغرورة .. بس سيارة أشوفها ماتليق باسرة وزوج وزوجته يطلعون فيها إلا للضرورة مش للخاطر .. رجع بالليل متاخر وهو عافس ويهه علي ومايكلمني زين وأنا كنت على فراشي بنام .. والله مليت مليت ولا ودي أتنازل واركبها مرة لأنه بيركبني فيها كل مرة .. ولا راح يهتم فيني وفي مشاعري ورغبتي .. أحس كأنه يعامل السيارة كأنها انسان ولها مشاعر ومايبي يجرح مشاعرها في عدم تقبلي لها ... |
رد : أو مرة أسمع بواحد يفضل سيارته على زوجته
يختي اركبيها عادي
شوفي الزوج يحب زوجته تشاركه الاشياء الخاصه الي يحبها وماتتقرغ منها بعضهم يربي غنم لعضهم طيور السالفه الاولى ماعجبني سالفه الضرب والعنف واتضايقت منها والحمدلله شكلها مرت وسالفه قديمه السالفه الجديده جدا عادي اطلعي وانبسطي معاه |
رد : أو مرة أسمع بواحد يفضل سيارته على زوجته
اقتباس:
شوفي انا ماحب تعقيدات الحياة .. بس هذا الموضوع مأثر فيني كثير وأحسه يلامس كرامتي من بعد الضرب اللي جاني منه عشان هالسيارة .. وهو لما أخذ مثلها للمرة الثانية عارف إني مش متقبلتها واتفقنا لو بنطلع نركب غيرها .. ليش ياخذها ويجي يحطني بالامر الواقع ويقول خاطري وماخاطري .. ليش أنا امشي على كلامه وهو ماضارب برغبتي عرض الحيط ؟ خلي نوع السيارة .. أنا أتحدث عن المبدأ .. |
رد : أو مرة أسمع بواحد يفضل سيارته على زوجته
ترى الرجال ماعندهم هالتعقيدات الي عندنا
ماعنده مبدا ما مبدا تدرين ام الدانه وماتصحكين علي لو يصير لي نفس موقفك ويقول اركبي سيارتي بنبسط انه مشاركني شي غالي عنده صديقتي لها منصب بالوزاره ماشاءالله تو زوجها شاري زي سيارتكم موضع الخلاف قامت وش سوت ظللت له السياره كهديه منها له وانبسط ومدحها مع انها كارهه السياره ودايم يقول لها ماعمدي فلوس ولما طلعت فلوسه شرى السياره بس هي عاقله ماشاءالله عليها مانكدت عليه وصار امر واقع وماخذتهت بحساسيه ام الدانه الوحده تتعوذ من الضره عشان ماتنقهر تقومين تخطين راسك براس سياره وترفع ضغطك كانه حاط فوق راسك مره |
رد : أو مرة أسمع بواحد يفضل سيارته على زوجته
زوجك سالفة الضعف في الانجاب هي الي ماثرة عليه و عاوز يتبث قوته في امر ثاني يعني انا راجل و كلامي يمشي
لانه اساسا شايف الضعف قله رجولة طيب قولي له اشتري الي فيها كابنتين عشان البنات يركبوا من وري ما امزح ارضي غروره عشان بعدين تنجح المفاوضات عشان الحمل اذا استأنفتوها |
رد : أو مرة أسمع بواحد يفضل سيارته على زوجته
اقتباس:
أقول لك نعم .. لهالدرجة الزواج معقد .. ffb هو يقول لي عشان خاطري لو مرة .. طيب أنا لما رحت المعهد ركبتها المرة السابقة ماجابت خاطرك؟.. أنا لو أدري بركبها مرة وخلاص كان تنازلت وركبتها .. |
رد : أو مرة أسمع بواحد يفضل سيارته على زوجته
اقتباس:
من صوب نصلح ومن صوب يخربون .. ليه مايكبر عقله ويتنازل عن مسالة ركوبي السيارة زي ما أنا أتنازل دوم عن أمور كثيرة ؟ الله يعينا بس على عقولهم .. نعاملهم نفس الاطفال ويالله يالله ينفع معاهم .. قلت له عن اقتراحك .. هو يبي غمارة يقول أكشخ وأرز .. وين الرزة في الموضوع ؟ ""gg بس مشكلتنا هالمرة يبيني أنا لحالي اطلع معاه فيها .. وأنا مش مجبورة . أنا انسانة لي كياني ولي رايي والحياة ماوقفت على طلعة في سيارتك .. |
رد : زوجي يفضل سيارته علي
السلام عليكم ورحمة الله وبركاته
لا تركبي السيارة ولكن لا تصعدي الموضوع يعني بهدوء قولي له: حبيبي خاطرك على عيني وراسي بس انا أيضاً لي خاطر اتمنى تراعي خاطري ولا نعيد موضوع السيارة لأنه يرجعني لذكرى مؤلمة احاول جاهدة ان انساها بالتوفيق ان شاء الله. |
رد : زوجي يفضل سيارته علي
اقتباس:
عموما ما اشوف مشكلة كبيره خاصة انه عندك على ما اعتقد سيارة نسيان باترول يعني لما تطلعين معاه اطلعي بسيارتك وهو يسوقها ، وخليه يمارس هوايته على راحته بسيارته |
رد : زوجي يفضل سيارته علي
اقتباس:
فهمتيني وحسيتي فيني .. dvf ياليته يحس .. جاتني فكرة أرسل له هالكلام برسالة .. لأني أمس أبدا ماجبت طاري الموضوع السابق .. |
رد : زوجي يفضل سيارته علي
حشى يا ام الدانه هذي شريكه hhر موب سياره
صدق ومن الحب ماقتل ترى زوجش يحبش ويبيش تشاركينه هوايته المفضله تبين رايي في الليل بعد ما ينام روحي وخربي فيها خليه بس يتوهق ويعدل فيها لين ما يمل hyi شو رايش في استشارتي ffhhf |
رد : زوجي يفضل سيارته علي
اقتباس:
على فكرة هو يداوم باللاند كروزر يوميا .. والبوحوض واقف عند باب البيت .. نطلع بسيارتي كذلك بعض الاحيان .. بس من أول أمس مصر إلا يمشي كلمته علي وإلا أتنازل وأركب السيارة غصبا عني .. ماخذ السالفة نحاسة وبس .. هو كذا لما يحط سالفة في باله يعمل منها مشكلة .. |
رد : زوجي يفضل سيارته علي
اقتباس:
|
رد : أو مرة أسمع بواحد يفضل سيارته على زوجته
اقتباس:
ولو انك قلتي ان الرجل ك الطفل من باب السخريه ولكن هذا الواقع الرجل مهما بلغ قوته وعمره يبقى طفل لايحب العناد فيما يطلب ويحب المسايره وبصراحه زوجك احس التعامل معه سهل وهي اولا انسي موضوع له كيان ولي كيان والكلام الكبير اللي ماجاب لنا الا خراب البيوت بين الزوجين مافيه هالكلام وسايريه طالما ان اهتمامه مقدور علييها ومايضر يعني لو ركبتي وش يصير كل اللي براسه راح يطيح ومثل ماقالت مبتعثه الرجال ماييحب اللي تتغطرس على شي له وحتى لو ماتكلم يكون متضايق اما موضوع الضرب طبعا مرفوض لكن طالما انكم تجاوزتوا هالمرحله ف الحمدلله واكيد اخذ درس اختي حاولي تشاركينه حتى باهتماماته بكذا انتي ماراح تكوني زوجه فقط راح تكوني زوجه وصديقه وحبيبه الله يوفقك ويسهل امركم يارب |
رد : أو مرة أسمع بواحد يفضل سيارته على زوجته
اقتباس:
|
رد : زوجي يفضل سيارته علي
فعلا كلمة الاخ اللي قبلي
زوجك سهل التعامل معاه وانا اقرى موضوعك جلست اسأل طيب وين المشكلة اذا سايرتيه ! عطيه جوه ابو غمارتين ولا بسكليته حده شهرين ثلاث و بيمل منها راح يبدلها و تبقى له الذكريات الحلوة اللي عاشها معك و معها بعدين ابي افهم ليش البعض يتفشل من السيارات هذي يعني العالم عارفتك و عارفة مستواك تقدرين تركبين اطلق منها و تقدرين تركبين اقل منها ليش طيب مو كلها اداة للتوصيل و اهم شي اني اروح مشواري |
رد : زوجي يفضل سيارته علي
اقتباس:
وهاذي السيارة ابدا مش للتنقل في المدينة للأسرة .. وهو أخذها وعارف استخدامها .. ولما بغاها تحجج بحاجته لها للبر والكشتات .. يعني هو بنفسه عارف إنها ماتصلح للعايلة .. على فكرة هي غمارة وحدة .. كان من البداية اتفاقنا لما بنطلع نطلع بالسيارات الثانية .. واللي اوله شرط آخره نور .. بس زوجي دايما جذي .. نتفق على شي وبعدين يجي بكل بساطة ويغير الاتفاق ويقعد يناقش وشفيها لو وشفيها لو .. طيب ليش اتفقنا من الاول وليش رضيت ؟؟ بس تبي بعدين تحطني بالأمر الواقع وتجبرني على التنازل .. |
رد : زوجي يفضل سيارته علي
اقتباس:
بالعقل يعني ما تكفيكم يعني اذا بتطلعينها انتي واياه زين اما العيلة كلها ما ينفع لكن خليه بنفسه يشوف انو ما ينفع لا تقولينها انتي اركبوها و حيبين انكم متضايقين مرة و مرتين لين من نفسه يقر ويغير كلامه يبغاله ( مسايرة ) فقط بعدين يا ام دانة ترى سالفه اللي اوله شرط و اخره نور هذي تجي على المشاكل الكبيرة والحاجات العظام مو ونيت .. هو بكل بساطة يغير رايه امشي معاه للنهاية خليك بسيطة مثله يا بنت الحلال تراهم ما يحبون اللي يراددهم و اذا شافوا المرونة هم بينفسهم يصيرون اطيب مثل الاطفال خذيها مني و قد قلتها كثير والله ان علاقتي بااخواني زانت يوم قريت في تربية الاطفال الرجل طفل والأنثى احساس تحتويه هي باحساسها و يسلك معها ادري كلامي ما بيعجب البعض لكن قلته من تجربة ... جربيها و بتذكريني |
رد : زوجي يفضل سيارته علي
بطلع فيها مرة وحدة لما يتلطف الجو المكهرب .. وبعدها خلاص ..
|
رد : زوجي يفضل سيارته علي
ودي اخذ هالوانيت الي دابل كبدك واريحكم منه
جاي الرييع والبر و الجو الزين بنحتاجه |
رد : زوجي يفضل سيارته علي
اقتباس:
نروح البر أنا وزوجي بروحنا ؟؟ ولا نخلي بناتنا ورا مع الأغراض ؟؟ سوري .. نسيت إنه عادي يسويها ..jh |
رد : زوجي يفضل سيارته علي
أحس الركوب فيها رومانسي زي الي راكب حصان و مرته ماسكة فيه من وري
انت بس استشعري الرومانسية و حتتحبيها اخي في الله رايك ايه ؟ |
رد : زوجي يفضل سيارته علي
اقتباس:
قريبي ركب بناته من وري واحدة سقطت و السيارة ماشية و كان حادث رهيب كانت البنت ارح تروح فيها و اظن حتي القانون يمنع هالشيئ |
رد : زوجي يفضل سيارته علي
اختي الفاضلة
احيانا قد نقدم تنازلات عن قناعاتنا رغم يقيننا بصحتها ولكن لتستمر حياتنا في التقدم للافضل اوافقك ان المبدا مبدا مهما يكن ولكن احيانا قد نقع في موقعة الند بالند ضد الشخص الخطا وبالتاكيد ان لم نقدم تنازلا سنخسره او يخسرنا موضوعك نعم ثقيل على النفس ولكن التعامل معه يحتاج منك تغيير قناعات ولو بشكل مؤقت لمسايرة الظروف وليكن ذلك التغيير مشروطا ببعض ما يحفظ مكانتك لايصال رسالة ايجابية اليه بانك فعلتِ ذلك تقديرا له وانك تحفظين له مكانا كبيرا في نفسك واظنه مع الوقت سيدرك ذلك نسال الله ان يفرج كربتك |
رد : زوجي يفضل سيارته علي
لولا قصة الضرب
كان قصتك قصة كوميدية خخخخخخخ شوفي عاد ترى ماحد يزعل مني هنا، لا تجين انت تزعلين وعلى فكرة جاييني الدور لانه مقرر يشتري مثلها لاغراض البيت وطيوره في القريب العاجل بس ترى انا ما عندي مشكلة اركبها ولو اني مثلك اعرف اسوق ابسوقها بعد اذا قال لك المره الجايه قولي ما عندي مشكلة بس انا اللي اسوق يا انت بتموتين ضحك على شكلك انت واياه وبتقلبين الذكريات الحزينة لهبال سهليها وفالك البنتلي |
رد : زوجي يفضل سيارته علي
مثل ماقالت شوك انتي سوقيها
أو عندي لك اقتراح قولي موافقه بس بشرط نطلع بها البر وجهزي العزبه ولوازم البر انتي وهو منها ذكرى ومنها وافقتيه ومنها علمتيه الغرض من ذي السياره 😉 |
رد : زوجي يفضل سيارته علي
تصدقين أم دانة ولا تعصبين مني
انا أقول لزوجي خاطري أركبهم هالسيارات وأجربهم 🙊 ترا جد حلوين .. 😍 المهم اللي صار صار .. ودامه الحمدلله غيرت فكرته بالعلاج وتنازل إنتي حاولي تسايرينه هالفترة وانتي المستفيدة إن شاء الله مثل ما لان راسه يبي يلين راسك .. لا تعاندي حبيبتي .. |
رد : زوجي يفضل سيارته علي
ام دانة انا لو مكانك بقوله مش قصة اني ماأتنازل أركبها بس كرهت كل سيارة على شاكلتها كل ماشفتها اتذكر الكف الي أخذته وانت كل ماطلبت مني أركبها تذكرني بالكف
لو ماحصل الي حصل ببداية الموضوع كان قلت لك عادي اهم شي سياره بس كل هالصراخ والظرب علشان مارضيتي بناتك يركبو ورى من حقك اصلا اولا واخيرا فيه خطورة كبيرة على البنات انهم يركبو ورى الله يهديه ويصلحه ويسخره لك يارب |
رد : زوجي يفضل سيارته علي
ما ادري ليش حسيت ان الموضوع عند زوجك مو سياره حوض ويبغاك تركبينها ..
الله اعلم انه حس بانك تنظرين له نظره دونيه وان هالسياره مو من مستواك وانها تليق فيه هو وما تليق فيك انت .. اذا هذي وجهة نظره فانتبهي اختي من حقده .. |
رد : زوجي يفضل سيارته علي
توكم تدرون ان السيارة اغلى من الزوجة fgfg
والله عندي زوجي ياويلي لو اسب سيارته ...ويداري عليها ويخاف عليها حتى من المطبات ...اذا ما انتبه للمطب واخذه قال ااااااح ياقلبي على سيارتي .. ومره رحنا مشوار كل العائلة وتبادلوا السيارات هو واخوانه وشاف اخوه مسرع ولا عليه من الحفر والمطبات والله اتصل على اخوه يخاصمه ويحرّص عليه fhfh حتى اخوه لما رجعنا يقول اخذ سيارتك وفكني منك والله انها اغلى من عيالك ffhhf |
رد : زوجي يفضل سيارته علي
تعرفي حبيبتي ... احسن شي تسووينه
بعد شوي قولي له تعال نطلع مشوار فيهااااا يعني انتي الي تطلبي ... واكيد بيوافق ولما تطلعوا فيها قولي له ترا هذا انا طلعت معك بس عشان خاطرك غالي عندي حبيبتي ... الموضوع ما يستاهل عناد معك حق تزعلي خصوصا من الي صار باول سيارة والضرب وووو لكن العناد ما منه فايدة ومعك حق السيارة ابد مو العائلة ولا ينفع تحطي بناتك ورا... اصلا اكبر خطا الواحد يعمله لكن اطلعي انتي معه و اقصري الشر ... واكسري العناد و اعمليها انتي بجميله احسن ما ياخذها عناد ووووووو وهذة عشرة عمر ما ينفع العناد يكون طرف فيها |
رد : زوجي يفضل سيارته علي
عاد تدري يا ام الدانة لو انا منك ... اطلع فيها و لا يهمني
بس بناتي .... لاااااااااااااااااا و طبعا زوجي على نفس الوضع كل فترة سيارة ما شاءالله ويبدلها ولازم ياخذ راي ولو قلت له لا تبدلها زعل وبدا يذم بالي عنده و يمدح بالي يبيها ولازم اقوله اييي بدل الجديدة احسن ههههه ويخاف على,سيارته وايد وحريص عليها ... ما يخليني اطلع فيهااااا ولو سكرت الباب بقوة .. حمر العين و عصب ووووووو الله يعين بس .. خليها على الله اخر مرة مشيت و تركت له الباب مفتوح ... قلت له انت سكره احسن ما تعصب علي |
رد : زوجي يفضل سيارته علي
يبغا يحس انكم ثنين تطعسون بالنفود ولا بالربع الخالي
اركبي وعيشي مع زوجك مغامرة التطعيس الخيالي وجيبي معك مكسرات وابسطيه بهالطلعه لا تحسسيه انك انسانه معقده يا الله ركبت ويوم ركبت كنها خشبه جنبه مو ادميه وبكذا وصلتيله رساله انو دامها طلعت وناسه انا وانت ابشر اما طلعة عائلية لا |
رد : زوجي يفضل سيارته علي
ضحكتني ردودمم .. لي عودة بكرا عشان ارد عليكم من الكمبيوتر ..
|
رد : زوجي يفضل سيارته علي
اركبيي السيارة وخذي اطفالك وركبيهم في الصندوق بعد;) وعيالك بينبسطوا وبتقولين ليش انا كنت مكبرتهاfgfgخليك فلاوية وبسيطة :17:لاتصيرين ثقيلةfhfh
وخلاص اهم شي الصحة و العافية والثقة في النفس ماشوفها فضيحة فواثق الخطوة يمشي ملكا |
رد : زوجي يفضل سيارته علي
السيارة مهمة عند الرجل ولاخلاف في ذلك
ورفضك للركوب على مثل هذا النوع من السيارات أؤيدك فيه سيارة لاتصلح للعائلة والأطفال ومعك كل الحق برفضها |
رد : زوجي يفضل سيارته علي
والله تعجبت من سالفتك ....
احس زوجك غريب وتصرفه معاك اغرب عموماً لو اخذتي حقك منه ممكن اقلك تسامحي معاه ولو اني ماارضاها لنفسي لكن ممكن انتي شخصيتك تتقبل هذا الشي لو مااخذتي حقك من زوجك يحق لك ماتركبي معاه ... انا تعجبت لما تركك تروحي لوحدك للمستشفى طيب كان لحقك وراح معاك المستشفى والله احيانا اتمنى سواقة السياره بس الاقي ملاحضات كثيييره تخوفني خاصه انه الي عندنا يترك كل شي فوق راسك وتصبحي الاب والام معليش شطحت بس الله يعينك ع ذا الزوج . |
رد : زوجي يفضل سيارته علي
السلام عليكم ورحمة الله وبركاته. .
أم الدانة الحبيبة أعتقد رفضك ليس من السيارة نفسها لكن بسبب الماضي، لا أرى مناسباً أن تفتحي مع زوجك الماضي وتعيد فتحه .. لو رافضة ناقشي أسباب رفضك بهدوء دون ذكر الماضي ومثلا بسبب خوفك عالبنات وو حتى يقتنع .. حفظك الله .. |
رد : زوجي يفضل سيارته علي
اقتباس:
أخي في الله ماعجبه الموضوع .. دخل وطلع ولا علق .. |
| الساعة الآن 11:10 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©