|
جرحت زوجتي و ندمان
السلام عليكم و رحمة الله مساء الخير جميعاً,,, أخواني وخواتي الله يجزأكم كل خير عن النصائح القيمة التي تقدمونها لأخوتكم بالله. متزوج منذ سنة و عايش مع زوجتي بسلام و محبة ولكن فيه شيء وحيد منكد علي حياتي ! زوجتي عمرها عشرين سنة حساااسه كثييير و اذا أحد زعلها تشيل بقلبها و لا تتكلم ابداً و المشكلة انها لو تكون فهمت الموضوع غلط ما راح تعرف انه سوء فهم لانها ما تتكلم خلاص تزعل و تشيل بقلبها و قلبها ضعيف مستحيل تواجه أي شخص جرحها. و أنا قبل الزواج كنت غبي و جاهل كثير و اسمع كلام الناس انه لازم تفرض هيبتك على البنت من اول الأيام و انا طبعي باااارد و احب المزح و الضحك و مستحيل ازعل او اسوي مشكلة مع أي احد بالعكس بالي طويل و علشان كذا خفت زوجتي تشوفني كذا تستغلني قلتي لازم اطلع لها عضلاتي بفترة الملكة !!! " أغبى مني مافيه" مع أني رجل يشهد لي الجميع بالعقل و الجميع يشاورني ووو بس ما ادري كيف تأثرت بهالكلام !!!! المهم اللي صار: خطيبتي كانت متضايقة من موضوع "تذكرت احد اقاربها المتوفين" و انا ما كنت اعرف انها متضايقة لانها كتومة و ما تتكلم ابداً لما تكون متضايقة عرفت طبعها من بعد الزواج. كنت اكلمها و بصراحة كنت ابحث عن الزلة علشان اعصب و اهاوش و اسوي مشكلة من لا شيء صار اللي كنت مخطط عليه و صارخت عليها و بصراحة جرحتها و مع كذا سويت انها الغلطانة و اعتذرت كثير مني و بصعوبة رضيت بعد يومين "انا غبي و جاهل جداً جداً" و كان الموضوع تمثيلية مني لا كنت زعلان و لا أي شيء بس ابغى ادبها و ما كنت اعرف انها قمة الادب و طيبة القلب. بعدها استمرينا بالمكالمات أسبوع و احسها تغيرت علي صارحتها و قلت متغيرة علي ؟ انكرت بالبداية و بعدين صارحتني انها زعلانه علي لانها ما اخطت ابداً و مع هذا اعتذرت مني و انها وقتها كانت محتاجة الكلمة الحلوه مني و وووو بصراحة وقتها صحيت على نفسي وعرفت خطأي واعتذرت منها كثييير و قالت خلاص مسامحتك و انتهى الموضوع. تزوجنا و مبسوطين سوى بس الاحظ عليها بين فترة و فترة تحزن و لا تتكلم و تفضفض لي ابداً حاولت معاها كم مرة و رفضت و بعد فترة بعد نفس الشيء سالتها ما ردت علي و بعدين قلت لها لا يكون تتذكرين هذاك اليوم الى الان جلست تبكي و قالت ايه انت جرحتني كثييير كنت حاطه آمال كثير عليك بس من بعد هذاك اليوم خلاص ما ابغى منك شيء اهم شي لا تجرحني مرة ثانية و خلاص تأثرت مكانتك عندي و صرت أخاف منك كثيير !!! وقتها كرهت نفسي جداً جداً واعتذرت مرة ثانية وثالثة و بينت لها ندمي و انه الشيطان وسوس فيني و كنت جد ندمان من كل قلبي وووو و بعد نفس اول مرة قالت خلاص انسى الموضوع و أنا مسامحتك و راح أحاول انسى الموضوع. المشكلة الى اليوم تجيها حالات الحزن و هي بالماضي عانت شوي فقدت أقارب و أصدقاء لها فجأة. و أنا من أول يوم زواج معاملها مثل الملكة ما تسمع مني الا احسن و اطيب كلام و اطلعها و امشيها و كل شيء تتمناه و هي مبسوطة جداً معي لاكن هالحالات اللي تجيها تضايقني كثير. دايم اللوم نفسي و احس اني السبب مع اني يا ناس ندمت و اعتذرت و لا كررت الخطأ و مع كذا احس بتأنيب الضمير كل مرة اشوفها حزينة !!! وش الحل يا ناس ؟؟ مرات أحس زوجتي من البنات اللي يحبون يصيرون حزينات و مرات أقول لا أنا السبب ووو تعبت و رب الكعبة تعبت خصوصاً هالحالة تصير لها فجأة و حنا نسولف و نضحك أو طالعين نتمشى فجأة تصير حزينة ؟؟ معقولة طول هالفترة و الاعتذار و المعاملة الممتازة جداً ما نفعت و خلتها تنسى الموضوع ؟؟ و كيف اخليها تنسى ارجع افتح الموضوع هذا معاها او لا ؟ شنو أسوي بالضبط ؟؟ محتاج ردوركم الله يخليكم و اذا تبغون أي توضيح أو شرح أكثر أنا حاضر,,, |
رد : جرحت زوجتي و ندمان
ملاحظة :
زوجتي متعلقة فيني جداً جداً جداً و هذا مستمر لحد الان,,, و كانت حاطه آمال كثير علي و أني الشخص اللي راح اخلصها و أخليها تعيش ملكة زمانها وووو و أنا فعلا جالس أسوي كل شي هي تتمناه بس من ناحيتها تحطمت من هذا الجانب بعد هذاك اليوم :( |
رد : جرحت زوجتي و ندمان
.......................
ما أشوف ان فيه شئ يستاهل ياصاحبي خذ لك لفه على مشاكلنا وتعرف انكم بنعمه اجلس معاها وصارحها انا ما اشوف ان الموضوع يستاهل كل هالحزن مع انك ماوضحت انت غلطت عليها بأيش بالضبط اذا انتوا مرتاحين ومبسوطين وعلاقتكم حلوه وتضحكون خلاص اما اذا كل كم يوم بترجع تقولك انا زعلانه من هذيك المره اللي انت هاوشتني فيها وماني غلطانه فانا اقول جا دورك تزعل وتطلع من البيت تتمشى وترجع بالليل زعلان وهي تراضيك وتقولك ابشر خلاص ماعاد افتح الموضوع اول مطب بحياتكم وحزن وجرحتني ومابي منك شئ وش تركتوا للمستقبل الله يجزاك خير توكم عرسان وهذا احلى ايام الزواج وتتذكرونها وتقلبون صور الذكريات بعد كم سنة وتتمنى ترجع للهدوء والمحبه استغلوا هالفترة بدون منغصات |
رد : جرحت زوجتي و ندمان
اولاً ماشاء الله تبارك الله الله يديم المحبه بينكم ويسعدكم ...
ثانياً اتوقع زوجتك نسيت الموضوع بس خايفه يتكرر انت لاتفتح لها السالفه هذي وحط في راسك انها خلاص انتهت حزنها اكيد له اسباب غير تصرفك معاها فقط قم بإحتوائها بلمسات واحضان بدون كلام وبدون ماتدخل نفسك انك انت السبب ثالثاً زوجتك صغيره وعاطفتها جياشه جداً رح تتتغير مع تقدم عمرها وتحكم عقلها وتزعل ع نفسها انها خربت أحلى ايام عمرها بالحزن والبكاء... |
رد : جرحت زوجتي و ندمان
السلام عليكم أخي ربي يرضيكم ببعض
أخي هناك شيء في المرأة أنو إذا أحبت شخص وتعلقت فيه راح تشوفو دايما مثالي في عينيها وخااااااااااااااصة زوجها لها الشسي إذا هو زعلها هي ما رح تتقبل الفكرة .. يعني هي الملكة في قلبو كيف يعني يتجرأ ويجرحها وهي تكن له هذا الحب بأكمله وتأكد أنو مازات هااااااائمة في حبك وهذا دليل تصرفاتها وإذا سوت معك تلك الحركات يعني هي خايفة أنو رح تعاود معها الزعل وهي ما تبي ها الشي ربي يرزقكم بالذرية الصالحةى إلي رح توطد العلاقة أكثر وتمحي الزعل من قلبها آآآآآآآآآآآآآآمين أم براء ولجين |
رد : جرحت زوجتي و ندمان
زوجتك حزينة بطبيعتها مو عشانك انت ..مو معقولة جرحتها مرة وسببت لها حزن دائم ...عاد انت بالكلام جرحت غيرك حتى بالضرب . بعدين عدد ايام السنة 360 يوم اذكر زوجي يجرحني فيها 150 مرة يعني يستحق اكون حزينة بس انا قدام الناس الكل يحسدني على سعادتي ومع زوحي تجيني زي حالة زوجتك وفجاءة بقمة حديثنا انا وزوجي اسرح لعالم ثاني كله حزن وبعدين افوق لنفسي وارجع لعالم زوجي ...
|
رد : جرحت زوجتي و ندمان
اول شي.. وقف اعتذار خلاص وصلتها المعلومة وسامحتك.. ولاتبالغ دايما بالاعتذار.. على قد الخطأ تعتذر..
لو كان اعتذارك فعلا من قلب دون اسلوب منة او ما الى ذلك.. عداك العيب اهم شي انك اتعظت وصلحت الخلل والعيب ومايتكرر.. ولاتعطي اذنك لاحد.. كل النصايح اللي من برا ماتفيد.. حتى الصحيح منها مايناسب كل الشخصيات والتوقيت والاحداث! اذا بتاخذ نصيحة خذها من الشخص الصح مو بعشوائية.. لا تاخذ "الاراء" وتجربها على حياتك وتميّل اللي كان مستقيم.. ثانيا.. وحدة من الحلول.. انها تنخرط بحياة ثانية.. زوجتك فاضية ماعندها الا البيت صح؟ الفراغ نقمة احيانا.. اذا كانت ماتدرس تدخل جامعة.. تطلع وتروح تجي.. شجعها تشوف هواياتها واهتماماتها.. يصير لها استقلالية وكيان عشان يخف التعلق وتستقر نفسيا ويصير اهتمامها شوي موزع! وتنسى همومها ومشاكلها ويصير لها مجتمع جديد بعد! صدقني حتى هي بتحس بامان اكثر! |
رد : جرحت زوجتي و ندمان
لا زعلانه ولا شي هذي شخصيتها وطبيعتها
اللي صار ما يزعل لهذي الدرجه اكثر من سنه زعلانه !! هذي طبيعة شخصيتها والله اعلم.. |
رد : جرحت زوجتي و ندمان
السلام عليكم ورحمة الله وبركاته ..
اعتذرت وتحدثت عن الموقف معها وكل شيء فتوقف عن الإعتذار ، فعندما تراها حزينة لاتلتفت لها بالإهتمام بل استمتع وكون على طبيعتك .. تحدثا معا بالأشياء الجميلة ، ورُبما صغر سنها يلعب دور وهي من الشخصية الحساسة .. بالنسبة لعدم شعورها بالأمان بعد الموقف ، شجعها بأن تفعل شيء لأجلها هي سواء دراسة أو دورات وووإلخ شيء فشيء ستزول مشاعرها المحبطة إتجاهك .. ولا تجعل أي أحد يتدخل في تعاملك مع زوجتك .. فرج الله همك .. |
رد : جرحت زوجتي و ندمان
سبب حزنها ليس منك
شخصيتها كذا |
رد : جرحت زوجتي و ندمان
الله يديم المحبه بينكم ولايغير عليكم
من واقع تجربه ممكن تكون فاقده الأمان لأنه كان يصير نفس الشي بسبب مشاكلي مع زوجي وكنت جدا كتومه مااحب المشاكل واذا فتحت مشكله انقلب الجو كئيب خلهآ تحس بالأمان معاك وتثق فيك مع الوقت راح تصارحك أهم شي اذا تكلمت لاتقاطعها وخلهآ على راحتها وحاول تستمع لها وتكون متجاوب معاها وحاول تسحب الكلام منها بطريقه ذكيه الله يهنيكم ولاتنسى التحصين انت وزجتك |
رد : جرحت زوجتي و ندمان
ما شاء الله تبارك الله
أنا مع إختي ترانيم البنت إللي فاقده الأمان تجيها أيام تحزن و تخاف من المستقبل الأمان أهم شي بحياة أي مخلوق حسسها بالأمان بكلامك و تصرفاتك أهم شي الكككككلام طيب خاطرها بالكلام الطيب إللي يرفع المعنويات الله يخليكم لبعض و يبعد عنكم كل شر |
رد : جرحت زوجتي و ندمان
انا اشوف تبطل اعتذار لان الشغله بلفعل ما تسوة ... واذا دخلت بحزن من جديد طنش وازعل انت ... واذا سألتك ليش قول لها لان انصدمت انك من النوع الي ما ينسه ويسامح .... زعلها مو منك بس هل موقف اتخذته شماعه تعلق عليه شخصيتها المائلة للحزن ... الزوج حلو يشد شوي ويرخي شوي وترة احنا النساء اذا لقينا حبيبنا كله عسل ناكله ما نخلي فتفوته فيه
احلي شي في الانسان يصغر قلمه فلا يمسك علي الغير زلاتهم ويكبر مساحته (ممحاته ) فيغفر وينسي اخطاء الغير |
رد : جرحت زوجتي و ندمان
السلام عليكم جميعاً,,,
أشكر الجميع على الردود و الحمد لله ارتحت كثيراً من ردوركم... من خلال ردودكم تأكدت من احساسي الاخر ؟؟ زوجتي دائماً تتذكر اشياء محزنة صارت لها بالماضي و تندب حظها و انها وحيدة ووو و تحب تكون وحيدة بهذه الاوقات مع انها لما يكون عندنا ناس تكون جداً مبسوطة و اجتماعية جداً,,,, بصراحة طبعها هذا ينرفزني جداً لانه يجيب لي الكآبة و البيت كامل يصير ممل جداً و أنا كنت اسكت و احاول اواسيها لانه كنت احس انه أنا السبب باللي يصير لها و مع نفسي اتمنى لو اني تزوجت وحدة تحب الحياة و البسمة دايم بوجهها !!! مع أن زوجتي ممتازة من جميع النواحي الا من هذا الموضوع و بصراحة انه مهم بالنسبة لي ابغى ارجع للبيت من يوم طويل بالعمل ارتاح و اضحك شوي مو كآبة في كآبة " تصير يومين او ثلاثة بالاسبوع" "!!! كيف اخليها تتغير مع انها ما تتكلم يعني ما تجي و تشكي لي لا بس يبين بوجهها و اذا طنشتها و سويت حالي من منتبه انها متضايقة تصير تجلس قريب مني علشان الاحظها و بصراحة اني احبها لانه مو مقصر بأي شي و علشان كذا صعب اني اطنشها ؟؟ عطوني من خبراتكم بالحياة ؟؟ اخاف يستمر هذا الوضع سنين !!! يا ناس طاقة سلبية بالبيت ؟؟ خلاص لما اشوفها كذا اتذكر الموت ووو و الاشياء الحزينة باحياة و انسى الاشياء الحلوة ؟؟ ساعدوني ؟؟ والله يجزاكم كل خير,,, |
رد : جرحت زوجتي و ندمان
لما قلت تأكدت أحساسي الثاني أقصد :
أنه هي شخصيتها كذا مائلة للحزن و انها الضعيفة و المظلومة و المنحوسة وووو و ما فيه أحد يفهمها الخ.... و ارجع و أقول لما يعني تدخل جوء الحزن مستحيل مستحيل تتكلم حاولت مليون مرة و بجميع الطرق اخليها تتكلم مو راضية,,, ابغى اغيرها شلون ؟؟ صراحة حاولت اقراء بالنت مشاكل مشابهة حصلت وحدة نوعاً ما نفس المشكلة و اللي مخوفني صاحبة المشكلة تقول انها متزوجة من 10 سنوات !!! مستحيل و صعب جداً أصبر مثل هالمدة ملل و كأبة ؟؟ |
رد : جرحت زوجتي و ندمان
احتمال كبير انها طريقة تحاول تلفت فيها نظرك لها.. تبي اهتمام زيادة.. وجربتها كم مرة قبل ومشت معاها :)
يمكن مثلها مثل اللي يتميرض عشان يهتمون فيه.. فاقولك بالاحوال العادية اهتم فيها ودللها واعطيها وكثر.. بس اذا جتها هالحالة لا تعلق على هالموضوع واسكت لا تبدي له اهتمام ابدا.. يمكن تزيد العيار هي شوي تجس نبضك عشان توصل للي تبيه وكمل الهدوء عندك "بدون ماتبين لامبالي" عشان تستوعب ان هالاسلوب ماينفع.. موفق |
رد : جرحت زوجتي و ندمان
اقتباس:
كيف تسوي هذا الشي علشان اهتم فيها بالعكس لما تسوي كذا ردي يكون كذا ؟؟ دائم اسالها وش فيك متضايقة ؟؟ تعبانه ؟ و جوابها لا مافيني شي ؟ خلاص اسكت و هي تسكت ساعة ساعتين ثلاث اربع او حتى خمس ساعات او لين اروح انام او هي تنام و نصحى الصباح كانه ما صار شي !!! يعني بالعربي ما تستفيد شي بس تضايق عمرها و تضايقني معاها !!! |
رد : جرحت زوجتي و ندمان
اقتباس:
الزبدة اذا شفتها كذا لاتبدي اي ردة فعل وتصرف بشكل طبيعي كنك مو شايف.. عاد اذا بدت تتشكى اسكت برضو بس اسمعها.. عشان مايصير في مدخل ان ماعندك احساس.. الخ واذا المشكلة تفاقمت.. فهي جدية ويمكن يمكن يبي لها جلسات علاج نفسي.. لو كان الوضع بمستوى السوء اللي انت قاعد توصفه.. |
رد : جرحت زوجتي و ندمان
اقتباس:
أجل وحدة تطلب من زوجها يطلعها يمشيها و يرد عليها زوجها ابشري و يكون يسولفون و يضحكون بالبيت و بعد ما تركب السيارة بخمس دقايق ينقلب وجهها و تسكت طول مدة التمشية ساعتين كاملة !!! و طبعاً أنا وقتها حقدت حقد غير طبيعي و سويت حالي جداً مبسوط و طلبت عشاء و من المطعم كأنه كل شي طبيعي ووووو ما ادري كيف تحملتها هذاك اليوم,,, ساعتين كاملة و لا حرف ما ادري كيف صبرت لو انا بالبيت انشغل بالتلفزيون او بالنت بس و انا برى طالع اخليها تنبسط !!!! و تسوي فيني كذا ؟؟ عموما يا حلاتها و هي طبيعية تكون عز الطلب و الزوجة اللي اتمنى !!!! صرت اتمنى يكون عندنا احد بالبيت دائماً علشان اضمن ما تجيها هالحالات لما يكون عندنا احد !!! |
رد : جرحت زوجتي و ندمان
بعض الحريم كذا كشريه بطبعها
تمد بوزها فجاه حتى وهي بعرس ولا طلعه بر<<شفت نموذج كذا |
رد : جرحت زوجتي و ندمان
اذا هالحالة تجيها بالشهر يومين او3 فهذي دورة نفسية طبيعية
وتقدر تقرأ كتاب الرجال من المريخ والنساء من الزهرة واذا هي تجيها كثير اكثر من مرة بالاسبوع فيمكن أنت دفش حبتين وهي حساسة فيقلب مودها عليك كنت كذا او ماتزوجت لحد ماتعودت على زوجي او انها تحاول تلفت انتباهك وتستلذ بقلقك عليخا فأنت وقف ردة الفعل عندك وخلك طبيعي لو مافاد قلها بصرررريح العبارة انا مااحب النكد مع الوقت بتتخلص منه اذا ادركت انه فعلا عيب ومشكلة عندها |
رد : جرحت زوجتي و ندمان
يمكن قلقانة لان للان ماحملت...
مرت سنة وشويه؟ وحست بقلق! |
| الساعة الآن 12:59 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©