|
أريد الزواج وأهلي لا يعينون في اختيار العروس
السلام عليكم ورحمة الله وبركاته
اخواني في منتدى عالم الاسره انا احد متابعين هذا المنتدى ودايم استمتع بقراءة النصائح من بعض الاعضاء فودي استفيد منكم ممكن اكتب قصتي بشكل مو كامل حالياً انا مبتعث عمري 24 والمغريات سواء بالسعوديه او الخارج كثيره فقررت اني اتزوج احصن نفسي واكمل ديني الحمد لله مو قاصرني شي وصحتي سليمه وسمعتي حلوه واذا على بعد التخرج من بيصرف علي لين اتوظف؟ الحمد لله الورث يكفي وزياده ومالمسناه تخصصي مطلوب والمعدل ان شاء الله انه يساعد كلمت اهلي وقلت لهم ابي اتزوج وكنت متوقع اني اتناقش معهم بالموضوع لكن مافيه احد ناقشني ولا فيه احد أيدني غير اخوي المهر وتكاليف الزواج الحمد لله جمعت لي مبلغ من اشغال جانبيه وقدرت اوفر مبلغ الموظفين مايقدرون يجمعونه الا بالقرض او الدين يعني ماطلبت من احد يساعدني ولا شي وقايل لاهلي عن هذا الشي مشكلتي مكلم اهلي لي اكثر من سنه وبكل مره اسأل عن الموضوع يقولون مالقينا لك بنت مناسبه وانا قايل لهم مابي الا وحده تخاف ربها ومحترمه وطيبه ماقلت لهم اي شي عن المواصفات الشكليه يمكن البعض يسأل عن الاقارب وليش ما اتزوج من احد يقرب لي لكن الاهل مايبون اتزوج من الاقارب ولا اقرب لهم وفي احد المرات قالوا لي ليش ماتاخذ اخت احد اصدقائك وبكل مره اقول لهم عن بنت يقولون ماتنفع الاسبااب مره اسم العائله او منطقة البنت او عمر البنت يعني مافيه شي عجبهم كلمت زميل لي متزوج وقال لي عن بنت من اقارب زوجته مدحتها يوم سألها تشوف لي بنت اخطبها على مواصفات اهلي يعيني مافيه اي حجه لهم قلت للاهل عن البنت وهي تدرس بنفس جامعة وحده من اخواتي ويداومون بعض المواد بنفس المبنى واعطيتهم معلومات البنت كامله حتى الجدول الدراسي معهم وانا اقدر اكلم ابو البنت واخطبها لكن الاهل قالوا خل يشوفون البنت ويسألون عنها بالاول ومر شهر الحين وكل ما سألت قالت لي اختي للحين مالقيت البنت ولا لقيت احد يعرف حتى اسمها ابي اتكلم عن كم نقطه في حياتي -من يوم وانا صغير ماتعبت اهلي بأي شي ولا اطلب منهم اي شي وطلباتهم اوامر عندي واخواني حتى الموظفين ياخذون مساعدات من الوالد قبل يتوفى الله يرحمه ومن الوالده للحين وانا معتمد على نفسي من كنت بالثانوي و اشتغل شغلات بسيطه تخليني اجمع لي مبالغ اعتمد على نفسي فيها -اخواني كل واحد متعب اهلي اكثر من الثاني وقبل يوم كنت بالسعوديه واحد من اخواني ماكان عنده وظيفه ولا دخل مادي كانوا الاهل يبحثون له عن زوجه يعني مره طلبت من الوالد الله يرحمه ابي اشتري سياره وكان فرحان لاني طلبت منه وقال لي امر بس انت ارجع لدوله اللي انت تدرس فيها واحول لك المبلغ اللي تبي لكن قدرت اوفر لي سياره -اقاربي دايم يتكلمون عني بالخير ومتأكد مليون بالميه لو اكلم احد منهم اتزوج بنته بيوافق ومن دون مهر بعد لكن الاهل مايبون الاقارب سؤلي معقوله الزواج صعب لهذي الدرجه؟ اذا لا ليش؟ دايم اسمع عن العنوسه و لكن سبحان الله بنات السعوديه كلهم اختفوا او الكلام مو صحيح ابي اقول نقطه ممكن البعض يتكلم عنها اللي هي ممكن الاهل يحسون اني صغير بالسن ومابعد صار عندي نضج بالعقل الحمد لله الاهل اذا صارت لهم اي مشكله يتصلون علي اساعدهم فيها حتى الوالده تتصل علي قبل اخواني الكبار تبيني اساعدها بشي ابي منكم تساعدوني بالحل كلمت اهلي وواجهتهم قلت اذا انتم ماتبوني اتزوج قولوا لي لا تخلوني معلق وردهم ماكان صريح يعني ماقدرت اطلع باجابه ايه او لا ودايم اذا جبت الموضوع يحاولون يضيعون الموضوع بأي شي ابي اعرف وش اسوي؟ انا شخص ما احب اصير معلق ابدآً اقدر اتزوج غصب عن اهلي او بأسوء الحالات اتزوج من الاجنبيات وطريق الحرام سهل جداً جداً جداً حالتي الماديه اذا تزوجت الملحقيه تدفع لي مبلغ يعيشني افضل من موظفين الحكومه اللي شهاداتهم جامعيه واذا تخرجت ولا لقيت وظيفه السكن متوفر والورث بيكفيني وزياده واذا ماكنت ابي الورث ولا ابقرب له اصدقائي مستعدين يساعدوني يعني مافيه سبب يمنع اهلي من تزويجي خصوصاً ان الوالده واخوتي ملتزمات جداً بالدين تم تعديل العنوان |
رد : الزواج وما ادراك ما الزواج
اذا بنتكلم من منطلق نقدر ونقدر..
احنا اكيد نقدر.. بس جهنم تحرق حاليا انت حاط ببالك انك تبي تتزوج وخلاص.. لاتسرع بزواجك اذا لقيت بنت الحلال.. لا تستعجل اعرفها كويس وخذ وقتك خطبة وملكة.. الزواج مو بس قدرة مادية اختيار البنت جدا مهم.. انت ذكرت الاجنبيات عشان كذا قلت ان فكرة الزواج لحالها مسيطرة وصايرة هي الهدف والغاية قبل كل شي هي واجهتك اجتماعيا.. وبتربي عيالك.. وسكن مودة نصيحة.. الخطبة اللي عالعمياني ابعد عنها اللي يناسب صاحبك مو ضروري يناسبك ومقياس البنت الكويسة يفرق من شخص لاخر |
رد : أريد الزواج وأهلي لا يعينون في اختيار ال
اقتباس:
موضوعك غريب جدا لكن عندي سؤال أنت بحكم معرفتك في أهلك هل هم يمانعون زواجك ولا معقدين بس في أختيارهم لبنات؟ وبعدين بصراحه أنت شخص ماشاء الله تبارك الله عليك كامل و الكامل وجه الله مو ناقصك شي لا مال ولا جاه يعني بالعربي أذا شفت أهلك مدقرين معك أتزوج من غير شورهم حتى لو تزوجت من برا مافيه شي أهم شي تعف نفسك بصراحه مافي مبرر لاهلك عشان يمانعون زواجك والله يصلح ما بينك وبين أهلك والله يرزقك بزوجه الصالحه اللي تتمناها أمين يارب العالمين |
رد : الزواج وما ادراك ما الزواج
اقتباس:
ـمقصدي من اقدر واقدر كتبتها وانا كنت متوتر شوي عذرا على طريقة الكلام ـصحيح ممكن حالياً حاط في بالي فكرة الزواج وبس لكن سابقاً ماكانت بس الزواج بهذا المقصد ـانا ماتسرعت وماكتبت الموضوع الا بعد ماصار وقت طويل ابكمل سنتين بعد كم شهر من كلمتهم باقي لي تقريباً سنه وابدا التطبيق العملي وابنقل لمدينة ثانيه وبعدها بسنه ابكمل دراستي الماستر وابنقل من المدينه مره ثانيه يعني الاستقرار الحالي بيخليني اتعرف على زوجتي في بداية الزواج بكل راحه قبل لا ابدأ في التنقلات وانشغل واجازة الصيف بدال ما ارجع للسعوديه كامل الفتره كان ممكن انزل مواد علشان جدولي الدراسي يخف لكن اضطر ارجع للسعوديه علشان هذا الموضوع ـاعرف ان الزواج مو قدرة ماليه فقط واعرف ان لازم اخذ وقتي بالزواج واتناقش مع البنت خلال الخطبه والملكه واحاول افهمها لكن وينها اللي ابتناقش وياها؟ ـفكرة الاجانب ،،عندنا في دولة بعثتي بنات فيهم جميع الموصفات اللي تبيها من اخلاق واحترام وجمال وفيه كثير مسلمات بعد اللي يتمنون يعيشون في السعوديه علشان مكة والمدينه والحجاب كل هذولا ادرس معهم وبسبب الدراسه يكون بيننا تواصل صحيح العادات والتقاليد تختلف بشكل جذري لكن انا عشت عندهم سنين واعرف عاداتهم وتعودت عليها واقدر اعود غيري على عاداتنا وتقاليدنا خصوصاً ان المسلمات مستعدين يضحون بأي شي لاسباب كثيره واحد منها يتمنون يعيشون قريب للمدينه ومكه ومن غير مبالغه بعضهم افضل بكثير من بعض البنات المبتعثات ـالخطبه ماهي على العمياني ما ادري عن المناطق الثانيه لكن انا من سكان المنطقه الوسطى بالسعوديه تبدا الخطبه بان الاهل يشوفون لي البنت المناسبه بعدها يصير مكالمه بين الامهات وام البنت تقول لزوجها علشان يسأل عن الولد وهذا ياخذ وقت طوييييل بعد موافقة الاب على الولد يقولون للبنت عني واذا وافقت نحدد موعد علشان النظره الشرعيه والملكه تصير بليلة الزواج بعد موافقة البنت علشان ما ادخل على البنت وعلشان اذا البنت بترفض كل هذا ياخذ اقل شي اربع شهور لكن وين البنت؟ ـ ياصديقي معك باختلاف الاذواق بشكل كامل ولولا اختلاف الاذواق لبارت السلع لكن هل من المعقول كل هذا الوقت ولا فيه بنت مناسبه لي؟ حبيت اضيف معلومه اهلي ماشاء الله عليهم عندهم معرفه بنص سكان الارض بحكم عمل الوالده والاخوات يعني وبصيغة المبالغه لو اعطيهم اسم واحد امريكي تعرفت عليه وكان عايش في مأتم لان اهله رامينه بالشارع يوم جابوه ، جابوا لي تفاصيل اهله وبرنت كامل عن اهله الاصليين |
رد : أريد الزواج وأهلي لا يعينون في اختيار ال
اقتباس:
اللهم امين وياك وجميع المسلمين الصراحه ما اعرف هل هم ممانعين او لا يعني ماقدرت اطلع منهم بالجواب الشافي لا شفت منهم الفرحه ولا شفت منهم الرفض بعض المرات احس ان فيهم شوية حماس وبعض المرات احس انهم مايهتمون اللي يخليني احس انهم مايهتمون الوالده الله يخليها تخطب لكثير من الناس وكثير من الامهات يسألونها عن بعض البنات اللي بيخطبونهم لعيالهم بحكم عملها واخواتي نفس الشي ما اخفيك اخوي اللي مأيدني اكبر مني بكثير وماعنده مانع لو يروح يخطب لي ويزوجني ولا يهمه رأي اهلي وبعد الاجنبيات والله ادرس مع بنات مسلمات ماشاء الله عليهم وبالنسبه لأخذ موافقة الزواج من الاماره فأمره ان شاء الله سهل |
رد : أريد الزواج وأهلي لا يعينون في اختيار ال
اقتباس:
يا أخوي والله لو كنت مثلك كان تزوجة شوفني أنا أكبر منك بسنتين تقريبا عمري 26 ماني قادر أتزوج المشاكل محاصرتني من كل ناحيه الا الماده ماعندي مشكله فيها بلعكس وضعي المادي ممتاز لكن المشكله عندي ماعندي وظيفه وشهادتي ابتدائيه و أبوي مسجون كيف أتزوج و أبوي في السجن والله أني محتار اكثر منك لكن الحمد لله على كل حال والحمد لله على نعمه التي لاتعد ولاتحصى |
رد : أريد الزواج وأهلي لا يعينون في اختيار ال
أول شي أنا أنثى ياسيد 😁
بنات الحلال كثار.. موقفك مبالغ فيه لان اهلك مامنعوك.. كلم امك بجدية في الموضوع.. يمكن انت تكلمها فيه وتسكت فترة فحاسة انك مو جاد او اخرته.. افتحه والح يعني كل ماكلمتها اسال ها لقيتي عروس؟ وحلاة الثوب رقعته منه وفيه.. انا برضو من المنطقة الوسطى واول مرة اسمع ان الملكة بليلة الزواج 😕 واربع شهور ماهي كثير على فكرة |
رد : أريد الزواج وأهلي لا يعينون في اختيار ال
اقتباس:
بكل مكالمه للاهل سواء امي او اخواتي اقول لهم عن الموضوع الملكة بليلة الزواج علشان الرجل مايدخل على زوجته او ياخذها من غير زواج فيه بعض العوائل تكون الملكه بعدها يتم تحديد موعد الزواج وفيه بعض العوائل يكون فيه حفل ملكه وحفل زواج وبعض العوائل حفل خطبه وحفل ملكه وحفل زواج وبعض العوائل تفضل الزواج يكون مقتصر على الاشخاص المقربين وبعض العوائل تفضل الافراح الكبيره ومعلومه خلتني انهبل احد اصدقائي قال لي عن عاده في عائلتهم طبعاً سألته لاني شفت اخوه جاه ولد ماشاء الله وماله متزوج 6 شهور اللي هي الرجل يدخل على زوجته قبل حفلة الزواج علشان يتأكد انها بكر الاربع اشهر هذي اذا كانت بين الاقارب وهي اقل شي ما اعرف اذا قصدك ماهي كثيره من ناحية اصبر اربع اشهر او ماهي كثيره من ناحية السؤال اذا على الصبر فانا لي مده ما اتوقع انها قصيره وانا اكلم الاهل عن الموضوع اما اذا على السؤال فهي تفرق من شخص لشخص وعائله عن عائله فيه عوآئل من بعض المناطق الوسطي من بداية الخطبه للزواج شهرين ونفس سؤالي اللي مخليني احتار هل الزواج والبحث عن المرأه بهذي الصعوبه؟ يعني انا عندي مبلغ مجمعه علشان ما اتدين اذا بغيت اتزوج المبلغ هذا اقدر اشتري فيه ارض او شقه صغيره بدال ما اخلي المبلغ معلق المفروض استثمره اذا الاهل مايبوني اتزوج |
رد : أريد الزواج وأهلي لا يعينون في اختيار ال
اقتباس:
ومسألة الزواج الله يسهلها عليك وعلى جميع المسلمين يعني ودي انصحك لكن الحال من بعضه صحيح ان فيه اختلاف بالظروف لكن الله ييسر ويفتحها عليك |
رد : أريد الزواج وأهلي لا يعينون في اختيار ال
اقتباس:
ويكون زواجي و زواجك في ليله وحده hhر |
رد : أريد الزواج وأهلي لا يعينون في اختيار ال
اخي الكريم
كلم امك وقول لها بتخطبون لي و بتزوجوني ولا لا؟ يا نعم او لا اذا نعم امنحهم شهرين واذا لا اختارها بنفسك و اخطبها مع اخيك على سنة الله و رسوله |
رد : أريد الزواج وأهلي لا يعينون في اختيار ال
احدهم تزوج بمساعدة زوجة صديقه المقرب هي من دلتهم على بيت طيب.. بل حتى أن أخاه الأصغر حينما اراد أن يتزوج تشجعوا أهله ليزوجوه فرفض مساعدتهم ولا يريد إلا مساعدة زوجة صديق أخيه .. متعللاً بأنها دلت أخيه على زوجة طيبة وخلوقة ويريد زوجة بنفس الصفات..
ربما تستأنس بمثل طريقة هؤلاء والرزق عند الله.. |
رد : أريد الزواج وأهلي لا يعينون في اختيار ال
انا اشوف كلم أصحابك يدورون معك لا حصلت المناسبة كلم أهلك خطبولي فلانة بنت فلان صاحبي دلني و المواصفات ناسبتني باقي تروحون تشوفونها
|
رد : أريد الزواج وأهلي لا يعينون في اختيار ال
اعانك الله قبل الاهل والناس اجمعين<<لا املك لك سواها
|
رد : أريد الزواج وأهلي لا يعينون في اختيار ال
اقتباس:
اذا تزوجت ابكون حول اهلي من زيارات وطلعات وغيرها فزواجي بهذي الطريقة بتسبب مشاكل بين اهلي وزوجتي وانا ماودي تصير مشاكل يعني اخلي زواجي بالسر ولا اخلي امي تدعي على زوجتي بالطالعه والنازله ولا تصير بينهم مشاكل وبعدين ما اقدر افرق بينهم وتصير قطاعه |
رد : أريد الزواج وأهلي لا يعينون في اختيار ال
اقتباس:
شخصياً ما امانع على هذي الطريقة لان اولاً واخراً بيصير بيني وبين البنت فترة ملكه وخطبه وثقتي بزملائي كبيره هدفي ان الوالده تختار لي بنت وتكون راضيه عنها فالجنه تحت اقدام الامهات |
رد : أريد الزواج وأهلي لا يعينون في اختيار ال
اقتباس:
جبت لاهلي كل شي واصحابي ماقصروا معي جبت لهم بنات من جميع مناطق المملكه وبنات منهم العاقلات الملتزمات ومنهم الغير ملتزمات لكن محافظات وجميع فئات البنات لكن بكل مره يطلعون لي بعذر |
رد : أريد الزواج وأهلي لا يعينون في اختيار ال
اقتباس:
يعني ممكن كلمت امك ناس ورفضوك ممكن ناس تشوفك لسا طالب ماتوقعت ماراح توهق بناتها يعني ابحث عن الأسباب ،وممكن اهلك صادقين ماعرفوا بنت بهذا الاسم او ماشافوها وارى تأجيل الزواج لبعد الوظيفة أفضلكم انت وزوجتك مستقبلا رغبتك راح تكون راكده ، بالنسبة لي شخصيا ولا ادرى عن غيري ماكتبته في الأعلى لايعتبر رغبه لايجب وراها ندم لانك رغبته اغلب شيء لحاجة مؤقته وهو اكبر من هذه المساله اعني الزواج |
رد : أريد الزواج وأهلي لا يعينون في اختيار ال
اقتباس:
الاعذار اللي اشوف انها فقط مرتبطه بأهلي ما احط بذمتي واقول امي ماكلمت ناس يمكن كلمت ناس لكن لما سألتها قالت للحين تبحث البنت اللي تكلمت عنها جبت لهم معلومات كامله عنها لو اعطيك اسم شخص يدرس معك في نفس الجامعه واسمه نادر واعطيتك المواد والجدول على سبيل المثال قلت لك ان عندها محاضره الساعه ٩ الصبح بالقاعه الفلانيه بالمبنى الفلاني يوم الاحد والاربعاء والخميس هل معقوله ماراح تلاقين هالشخص؟ وانا معطيهم جدول المواد كامل اللي قال لي عن البنت زوجة صاحبي وهي تقرب لها يعني مو وحده سألت عنها واعطوها معلومات ممكن تصير صح وممكن غلط بامكاني اقول لزوجة صاحبي تكلم اهل البنت واخطبها ومعي اخوي الكبير لكن انا ابي اهلي يتقبلون البنت قبل لا اقدم على اي خطوه ما احب المشاكل ولا ابي تصير مشاكل بعد الزواج ابي بنت اهلي يحبونها قبل لا احبها انا بالنسبه للزواج بعد الوظيفه انا معك بهذا الشي لكن لو افكر بالموضوع ليش لا؟ ماودي اعمم لكن اذا شفت الناس اللي حولي خصوصاً في هذا الزمن التكنولوجيا توضح اشياء كثيره صعب اخفائها ، كثير من الشباب اللي بعمري واللي اصغر مني بكم سنه يامخاوي له بنت او متعرف له على بنت والهيئه كل يوم والثاني تصيد بنت وولد طالعين مع بعض او بينهم شي الله يستر على الجميع ويهديهم، ولأني ادرس بالخارج اشوف اشياء ماشفتها بالسعوديه ، يعني علاقات وبالعلن من شبابنا وبناتنا انا اتكلم عن ناس اعرفهم مو بس اقرا عنهم وانا ما لي بهالطريق الحمد لله ، صحيح تجيني ايام اقول لو اخاوي لي بنت وما افكر بالزواج احسن لي واسهل لي لكن اتعوذ من ابليس واقول عندي خوات وقبل كذا الزنا من الكبائر بالجامعه اضطر اني احاول ابتعد عن قروبات يدرسون مع بعض او بعض زملاء الجامعه لان دايم اذا طلعت معهم لازم يصير فيه بنت تقول خل نطلع لمكان او شي او يعرفوني على بنت وابليس شاطر وحتى شبابنا الله يستر عليهم ويهديم اذا رحت لهم لازم يصير فيه شي مرتبط بالحرام والعلاقات وفيه موقع مشهور عن شباب مخاوين لهم بنات "اجنبيات" ويوم البنات حملوا تركوهم ورجعوا للديره يعني طريق الحرام سهههل جداً فليش انا ما استمتع بحياتي لكن بالحلال؟ كثير من هالشباب اللي اعرفهم اهلهم يتمنون لو يزوجونهم لكن هم يعترفون ويقولون فينا طيش شباب للحين ولا نبي الارتباط وفيه كثير شباب متزوجين لا معهم وظيفه ولا دعم من اهلهم وحتى وضعهم المالي صعب ودايم ينصحوني بالزواج المفروض ان طريق الحلال يصير اسهل من طريق الحرام مو العكس وثاني شي انا ناوي ان شاء الله اكمل دراستي الماجستير والدكتوراه يعني لو ابتخرج بكالوريوس بعد سنتين ان شاء الله واخذ الماجستير بسنتين ونص والدكتوراه بسنتين ونص هذي سبع سنوات من غير تأجيل او اجازه او انتظار القبولات يعني بيصير عمري ٣١ سنه وانا مابعد توظفت وهذا اسهل واسرع طريق اقدر اخلص فيه دراساتي ودي اكمل دراستي بأي طريقه لو ارجع للسعوديه واتوظف غالباً ماراح اقدر اكمل دراستي بعد التخرج اغلب الوظائف الحكوميه يصير فيه تنافس وواسطات علشان اكمال الدراسه وماتحصل الا بعد سنوات ماعدا الوظايف اللي بالجامعات مثل المعيدين والمحاضرين وهالوظايف يبيلها واسطات قويه بعد ، ماودي احط بذمتي لكن عندي اقارب واصدقاء معيدين من بينهم كلهم اثنين توظفوا من دون واسطات او واسطات صغيره جداً لكن الوقت اللي توظفوا فيه كان فيه نقص باقسامهم والباقين كلهم واسطات كبيره، اعرف شخص جايه فصل من الجامعه ورجع بواسطه وقعد يمكن ست سنوات على ماخلص الجامعه والحين معيد لان ابوه يشتغل في منصب عالي وثاني تخرج الاول على دفعته وقعد سنه كامله على ماقبلوه ، اذا رجعت واستقريت ما اتوقع ابطلع واكمل دراستي لاني بالقوه وافقت على البعثه وودي اخلص دراستي اليوم قبل بكرا علشان ارجع للسعوديه والحين فيني همة الدراسه اذا كبرت بالعمر وصار فيه فتره مادرست فيها بيصير صعب اني ارجع لمقاعد الدراسه ويمكن الحماس يذبل عندي لك كم سؤال ويمكن يصير خارج ايطار الموضوع وارجو الاجابه بكل صراحه اول شي انا ما اعرف انت ولد او انتي بنت لكن السؤال موجه لك سواء بنت او ولد "رغبتك راح تكون راكده ، بالنسبة لي شخصيا ولا ادرى عن غيري ماكتبته في الأعلى لايعتبر رغبه لايجب وراها ندم لانك رغبته اغلب شيء لحاجة مؤقته وهو اكبر من هذه المساله اعني الزواج" ١-وش المقصد من الرغبه بالضبط؟ وهل انت/انتي مجرب لهذا الشي وصار في ركود؟ ٢- اذا كانت الرغبه شيء مؤقت ليش نشوف شباب و شياب متزوجين وعزاب في اماكن مشبوهه وعندهم علاقات محرمه، ليش دايم نسمع ونشوف بعلاقات محرمه من نساء متزوجات و عازبات كبار وصغار؟ انا سافرت لدول كثيره وشفت ناس من ديرتي ما اتكلم عن قصص اسمع عنها ليش الرجل اللي مغنيه الله بعد كم سنه يتزوج الثانيه والثالثه والرابعه وبعضهم يطلق علشان يتزوج؟ واتكلم عن ناس يقربون لي وكثير من هالشياب يتزوجون بنات اصغر من اصغر بناتهم وش الهدف الرئيسي من الزواج؟ ابناء؟ فيه اكثر من طريقة اقدر اوفر الابناء فيه واسهل طريقة التبني والنبي صلى الله عليه وسلم قال "انا وكافل اليتيم كهاتين في الجنه" واشار بالسبابه والوسط يعني متعة الابناء ومتعة الاجر وفيه طرق ثانيه بالعلم الحديث حب؟ دايم نسمع ان الزواج هم وغثا وتعب ومشاكل ومسؤليه ليش اتعب نفسي وارهقها علشان الحب ومعروف الشي اللي يتعب ويجيب المشاكل يخلي بالشخص كراهيه لهذا الشي! الاستقرار؟ من غير الزواج انتاجي الوظيفي بيكون افضل واقدر اجمع من راتبي واسوي مشاريع من غير ما اشيل هم احد انا مسؤل عنه لاني غير مرتبط في احد الخساره لي والفايده لي اسافر واروح واجي من غير ما اشيل هم احد غيري اغلب اللي قلته فيه مواضيع في منتدانا الغالي تشهد عليه فماهو الهدف من الزواج بجواب واقعي؟ انا شخص تعلمت ان لكل شي تفسير واقعي مثل واحد زائد واحد يساوي اثنين سواء بالدين او اي شي ثاني وش المعنى من الزواج؟ ليش الزواج ستر للمرأة وستر للرجل؟ حتى المطلقات اللي اعمارهم بالثلاثين والاربعين نشوفهم يتزوجون وغالبيتهم مو بحاجة احد اساساً علشان مايقولون انهم بحاجة لرجل يخلص اشغالهم لان غالبيتهم موظفات ساكنين بين ناس يحبونهم ماعليش واعذروني على الاطاله او الكلام اللي ممكن يصير غير لائق لكن من زمان وانا ابي تفسير من الناس اللي يقولون ان الزواج مسؤليه وان الشهوه او الرغبه تصير مؤقته مع ان الحقائق تقول عكس الكلام اللي يقولونه اغلب الاشخاص اللي اناقشهم او اسألهم بالموضوع سواء في الانترنت او على ارض الواقع تكون اجوبتهم من غير معنى وغير واقعيه وغالبية الردود تكون عن الاستقرار والابناء الاستقرار العاطفي او النفسي بيقابله النكد والمسؤليه من الزواج يعني مافيه استقرار عاطفي الاستقرار المادي بيقابله مسؤلية الصرف على الزوجه او الابناء الابناء بامكان الشخص تبني ابناء وايضاً مع تطور الطب الحديث بامكان الشخص بالخارج باختيار مواصفات امرأه خاصه و معينه يتم زراعة جيناته الخاصه وانجاب طفل "بحكم تخصصي اعرف عن هالاشياء" |
| الساعة الآن 12:33 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©