|
الزواج من طبيبه وشروطي هل هي مقبوله
السلام عليكم.. موضوع هو موضوع عادي نوعا ما,
انا طبيب حاليا و قررت الزواج من طبيبة لاسباب كثييرة لكن مااخترت البنت ولا في بنت معينة عندي الحين, لأن وضعي الحالي لا يسمح وانتظر حتى يسمح وضعي العائلي الحالي قريبا باذن الله راح اختار البنت او اختي وهي طبيبة تختارها لي. لكن هناك كم من الشروط في بالي واريد رأي الطبيبات فيها:- - ان تكون من التخصصات الطبية المناسبة للزوجات ( راديو، فاملي،ديرما) لقلة الاونكولات وضغط العمل فيهم وافضل ان تكون GP في مركز صحي او دكتورة Basic science بالجامعة يكون احسن بكثييير واريح لي نفسيا. - ان بيتي ما تدخله شغالة نهائيا حتى لو يصير عندنا عشر عيال !.. وبالنسبة لشغل البيت انا عشت عزوبي اكثر من 7 سنوات واستطيع مساعدتها بالطبخ ونظافة البيت. واحب ان اعمل ذلك في بيت ابي. - ان تلتزم بالنقاب واللبس الساتر وان البالطو يكون واسع وتحت الركبة بمسافة كافية وتلبس تنورة. وهذي لقيت كثيير ممن يلبسون الخمار وشكلهم مرة مشرف وساتر ماشاء الله وشكلي راح اخذ وحدة منهم !.. -بالنسبة للاطفال عليها ان تأخذ اجازة امومة وتتفرغ لترعى الطفل لمدة سنة على الاقل حتى يشتد بعدين نحطه بالحضانة, -بالنسبة لراتبها لا لي تدخل فيها وفيما تصرفه, ولها ان تصرفه كيفما تشاء. ولها مصروف مني شهري. ولا اريد منها شيء وانا لله الحمد لدي تجارتي الخاصة ودخلي ممتاز. لكن لا اريد ان ترغمني على شيء لا اريده لسبب مادي. كالسفريات مثلا قد لا احبذ السفر احيانا لارتفاع التكاليف تقوم تقول نسافر على حسابها. لا اريد هذا. وهذه امور في وقتها تنحل ونتفاهم عليها.. - في أي حال من الاحوال اصبح عملها عامل سلبي على البيت وكان لا مجال الا ترك العمل عليها ان تتركه .. ( ارجو عدم فهم النقطة غلط) اقصد انها قصرت كثيير او صار دوامها كان كثيير ومرهق جدا .. او صارت امور سلبية كثيير بسبب عملها.. وهذه شروطي وابي رأيكم فيها وهل قابلة كلها للتطبيق وهل اصرح للي اخطبها بشروطي هذه؟ تم تعديل العنوان ليتناسب مع المضمون |
رد : الزواج من طبيبه وشروطي هل هي مقبوله
ياسر.. مافي بنت تفصال بالمللي
خلك مرن شوي.. انت تبي وهي تبي بعد الطالبات المتزوجات اللي يدرسون معاي ماساعدهم بعد الله الا ان ازواجهم مرنين انت داخل زواج سكن ومودة.. مو معركة مين يفرض رايه اذا هي حاولت قد ماتقدر تريحك.. انت نفس الشي بدري على الكلام بالاطفال ومين يهتم فيهم وانت توك ماخطبت.. انا اشوف انك تحط طفل عند خدامة وحدة تحت مراقبتك وببيتك اهون من توديه حضانة ماتدري مين يلمسه ومين يشيله وهو مايقدر يعبر ولايتكلم مستوى حضاناتنا اقل من عادي ومافي شي يحفظ حقك! واقولك شي؟ عن اذا صار دوامها مرهق واقع الحال يقول دوام الطبيبة جدا جدا مرهق من غير شي يعني.. وطويل وفيه له سلبيات اذا كنت مانت متحمل الفكرة.. ماله داعي تغصب نفسك لان 80٪ ماراح تترك عملها.. لا تاخذه بشكل شخصي 😊 دايما بنقاشاتنا على هذا الموضوع نقول.. اننا ماتعبنا وسهرنا وضيعنا شبابنا ورغباتنا ووناستنا ومرضنا نفسيا وجسديا وفوتنا على نفسنا متع كثيرة عشان يجي فلان من الناس يهد تعب السنين كله و يقول اقعدي بالبيت مابيك تداومين ماعجبني.. ولا بلاها زواج 😊 |
رد : الزواج من طبيبه وشروطي هل هي مقبوله
شنو الآسباب انك تبيها موظفه عشان تفهم بيئه عملك ولا في حاجه ثانيه ؟ من حقك تختار مثل ماتبي بس مافي حد كامل و ان شاءالله ربي يرزقك ماتتمنى |
رد : الزواج من طبيبه وشروطي هل هي مقبوله
اقتباس:
ما اختلفنا باول كلامك.. انا مو فارض رأيي.. انا فقط اقول الي ابيه وبالنسبة دوام الطبيبة مرهق كثير صح. لكن مو كل التخصصات قريباتي تخصصاتهم مثل ديرما وسايكتري مرتاحين .. غير طبعا يكونو نيوروسيرجري او كذا.. بالنسبة الى الشغالة مستحييل اخلي عيالي عند الخدم بعد الي شفناه وسمعناه من المصايب من الخدم, وصراحة بعد الحرمة كليا عن شغل البيت يقلل المودة بين الزوجين.. حلاة الحياة الزوجية لما اشوف حرمتي مهتمة بالعيال واكل لقمة من طبخها واشرب شاي من يدها.. بعدين بداية الرضيع لازم احد يهتم فيه على الاقل لمدة سنة.. بعدين يا احطه وقت الدوام عند امي او عند الحضانة. ويمكن صح الحضانات مو بالمستوى الي نبيه.. لكن امي موجودة وراح اكون قريب منها. بالنسبة انها تترك شغلها لا ان شاء الله. لو بيصير كذا كان اصلا اخذت ربة بيت ولا اخذتها.. كنت اقول في ظرف خاص وضروري تترك الشغل وهذي الحرمة هنا لازم تقدر ولا تحط وظيفتها على حساب بيتها.. ومن رأي الشخصي من خلال ما شفته من الطبيبات المتزوجات الي شفتهم.. انهم يقولو ان البنت في البداية تقول طموحها اهم شي ووكذا لكن بعد ما تتزوج وتجيب عيال بتحصل عيالها هم طموحها وتربيتهم هي هدفها.. وهذا هي الفطرة لأنو من رأي الشخصي انو وظيفة الحرمة الاساسية هي تربية الاجيال ! وبالنسبة بلاها زواج. شوفيهم بالمستشفيات ياكثر الي جالسين في بيوت ابوهم .. يعني احس ان حياتهم جالسة تروح هباء hhf |
رد : الزواج من طبيبه وشروطي هل هي مقبوله
اقتباس:
بالنسبة لربات البيوت حاليا الوقت هذا لا ينفع صراحة لأنو جلسة البيت فضاوة مو كويسة وتخلي الحرمة مو مرتبة وقتها وتقضي وقتها سهر . وايضا انو انا انسان بيتوتي ولا احب الطلعات .. وهذي ربة البيت بتكون طفشانة تبي تطلع وانا ابي ارتاح جاي من الدوام. |
رد : الزواج من طبيبه وشروطي هل هي مقبوله
اجدها شروط معقولة
بالتوفيق |
رد : الزواج من طبيبه وشروطي هل هي مقبوله
هذي عقود شركات الله يهديك
اخي من جدك طبيبه تعبت وتعبوا اهلها وخرجوها وخذتها جاهزه مجهزه تترك وظيفتها سؤال ثاني وش اعتراضك على الشغاله لا هي عيب ولا حرام ولا من علامات المرجله ان بيتي ما تدخل الشغاله زادو العيال والمسئوليات اجيب وحده تريح زوجتي وتريحني بعشر اولاد وطبخ ونفخ وين بيكون الدلع وتنفيذ طلبات الزوج و اللحظات الخاصه بينهم بتلقى نفسك من تعب الدوام الى تعب البيت والعيال انت تركض وزوجتك تركض ومو ملحقين واصلا مستوى الحضانات عندنا متردي تحسب نفسك بامريكا اللبس اطلب اهلك يشوفون لبسها بمقر عملها اذا لبسها ستير ماله داعي تشرط ماراح تغيره بعد الزواج خلك مرن ولا تحاتي كل نقطه من الحين الله يوفقك |
رد : الزواج من طبيبه وشروطي هل هي مقبوله
حتى الشروط بعد الزواج قد لا تلتزم انت بها
استخير وربك بيكتب فيه الخير |
رد : الزواج من طبيبه وشروطي هل هي مقبوله
مايصير تبني على سمعت وشفت
اي مراة عاملة غالبا ماراح تقصر اذا كان وقت فراغها طويل.. وعيالها اكيد بتهتم فيهم ساعات الفراغ القليلة تحتاج ترتاح فيها مو تكنس وتنظف..الخ هي مو الة بالنهاية لان الموضوع مو شاي او اكلة تسويها وانتهينا.. اللايف ستايل يفرض علينا هالشي بيوتنا كبيرة والحياة الاجتماعية متوسعة ومتعبة.. لذلك تعتبر شي اساسي مو كمالي ومايسوى ابد تشقي امك عشانك مقتنع بامر معين.. لو بتحطه مع خدامته نقول معليش انا برضو اعرف اكثر من طبيبة خيروهم ازواجهم بين الانفصال او ترك المهنة واختاروا عملهم وفعلا انفصلوا 😊 قلنا بلاها زواج اذا ما كان في شخص مقدر ومراعي.. هالحكي كنت بقوله حتى لو ماكنت ادرس طب 😊 عموما حكيك بيتغير لما تتزوج صدقني |
رد : الزواج من طبيبه وشروطي هل هي مقبوله
طيب ليه من اﻻساس دكتورة شروطك صعبة عليها ماتقصر في البيت وهي بترجع هلكانه مالها حيل للتنظيف دوام المشتشفيات طويل ومتعب والمرة تتعب اكثر من الرجل اما تاخذها طبيبة ومعها خادمة وتراعي تعبها واما تاخذ ربة بيت متفرغة لك ومو صحيح راح تكون طفشانه على طول اي نعم فيه اوقات تطفش فيها لكن مو دايم وتراعي الاطفال والبيت من غير شغله وتكون روحها مرحة وفرفوشة وفيها طاقة ما استهلكت ف الشغل ،،،هل فعلا طلبك لطبيبة هو التوافق الوظيفي والفكري بس
|
رد : الزواج من طبيبه وشروطي هل هي مقبوله
مشكله البعض يطلب كل شي
الموظفه المتعلمه ربه المنزل العشيقه الجميله المتانقه دائما تظل امراه ليست اله وليست سوبروومن |
رد : الزواج من طبيبه وشروطي هل هي مقبوله
اقتباس:
|
رد : الزواج من طبيبه وشروطي هل هي مقبوله
كلام فانتي صحيح تماما لوقلت شروطك هذي على موظفة ثانية كان ممكن اتقبل كلامك أنا زوجي رفض وظيفتي وتنازلت عنها بقناعتي بس طبيبة لا والف لا ماوصلت لهذا المكان الا بتعب وجهد ومشقة مستحيل تتنازل عنها ... إذا انت مقتنع بشروطك ابحث عن غير طبيبة صدقيني مستحيل بتوافق عليها اي طبيبة .
|
رد : الزواج من طبيبه وشروطي هل هي مقبوله
اشوف شروطك معقوله .....لكن لو حصل خلل بعد الزواج لاي سبب لا ترجع تقول اشترطت عالج الخلل بالطريقه المناسبه
الشغاله ضروريه للنظافه مو للاطفال ترى صعب انه الوحده تشتغل برى البيت وكمان داخل البيت ...ولو رفضتها هذا يفقدك التمتع بجمال الحياه الزوجيه خاصه في الفراش لانه ارهاق ارهاق ارهاق ايش يولد وحده دلوعه في غرفة النوم ومهتمه بزوجها ...الا اذا اخر همك انها تدلعك وتهتم فيك ممكن .... تفكيرك انه تاخذ وحده عمليه والله تفكير رائع جداً اتمنى التفكير هذا يكون في شبابنا لانه الزوجات ملو من السهر والطفش في البيت ورفض الزوج للوظيفه لكن لاتغير رأييك بعد الزواج زي ماتبغاها توزن أمور حياتها الزوجيه بحيث انه الوظيفه ماتأثر عليك انت برضه التزم بهذا ...ولا تحملها بشي فوق طاقتها ..... والله يوفقك... ولاتنسى تطلبها تحط شروطها زييك احلى شي التفاهم بين الزوجين من بداية حياتهم خاصه في أمور الاطفال والاجانب ماشيين ع كذا وإحنا همنا سفريات وبس ... ع اني اقول انت والي بتاخذها بإذن الله أحوج ماتكونو لتغيير جوكم في الاجازات بالسفر للترفيه والخروج من اجواء العمل ... |
رد : الزواج من طبيبه وشروطي هل هي مقبوله
شروطك تعتمد عالمجتمع اللي عايش فيه
بس طبيبة أخذت شهادة بعد جهد جهيد تتوقع تتنازل عن شغلها بسهولة كذا؟ اشترط ممرضة أو وحدة من خريجات المختبرات الطبية اللي لسه ما توظفوا لكن طبيبة من الصعب جدا يا أخي تحصلها توافق على شروطك خبري الأطباء من يتخرجون أمنيتهم التخصص والدراسة ولا شي يوقف طموحهم |
رد : الزواج من طبيبه وشروطي هل هي مقبوله
اقتباس:
الله يوفقك ويكتب من نصيبك بنت الحلال اللي تعوضك تعب وشقى هالسنين اللي لونته بالاحمر شرط لازم تنساه وتشيله من بالك 1 % من النساء تترك وظيفتها علشان وضعها الأسري تأزم و 99 % تتمسك بوظيفتها اكثر واكثر لما تلاحظ ان الوضع الاسري تأزم خصوصا لو كان مجال هي مبدعه فيه ولها مستقبل مستحيل تتركه بس ليه ركزت الا تبي طبيبه خذ معلمه تطلع بعد الظهر وتهتم بالبيت خذ ربة منزل متفرغه للمنزل والعيال طول اليوم ليه ماتبي تجيب خادمة تساعدها ترا كل الناس يجيبون خدم عادي وش السبب انك رافض ؟ بالنهاية دام هذي شروطك ودقيقه مافيها مرونه قليل اللي بتوافق عليك اهدى شوي واطلب المستطاع |
رد : الزواج من طبيبه وشروطي هل هي مقبوله
اقتباس:
اقتباس:
الشغالة ما فيه حاجة وتنظيف البيت انا بساعد فيه.. وفيه شركات تنظيف يجون بآلات خاصة.. وجارنا امام مسجد ماعند شغالات وبيته كبيير. ويجيب شركات تنظف والبيت يلقلق نظافة.. ما راح اطلب منها فوق طاقتها. بالنسبة للعيال انا استغرب صراحة تبون العيال يربونهم الشغالات .. للاسف ! هذي تربية الشغالات نشوفهم بالشوراع الحين وشوفو مصايبهم من قتل وتحرش وبلاوي !.. اقتباس:
اقتباس:
بعدين الي فضلو وظيفتها على بيتها وفضلت الانفصال .لا اعتقد وحدة عاقلة تسويها الا اذا زوجها كان سيء ! اما اذا كان الزوج طيب وكويس تقوم تفضل وظيفتها وطموحها على بيتها ! وش الفايدة كملت طموحها وهي بلقب مطلقة وجالسة ببيت ابوها ؟ تتوقعي حالها افضل من ان كانت ربة بيت وعند عيالها وفي بيتها؟ . اعرف واحد متزوج وحدة موظفة بادارة شركة. وحياتهم كل واحد بطريق لا يتقابلون الابغرفة النوم اذا كنتي تبي هذي الحياة فاقولك انها ما تنفع لأنو المودة تضعف وتروح. وبالنهاية انتي راح تخسري !.. اقتباس:
اقتباس:
وصح ربات البيوت اذا مافيه شي يشغل الفضاوة تجيب البلاوي والطفش وتكيات النت الي ما لها اي فايدة. اقتباس:
ماطلبت تترك شغلها.. قلت في حالة طارئة.. يعني اذا بتكون انانية وبتقول شغلي ! صراحة بيت ابوها اولى فيها ! اقتباس:
بالنسبة للخادمة ما ابي تربية الخدم لعيالي. اسال المعلمين اصبحو يشتكون من تربية العيال التي واضح انها تربية خدم وبعدين المصايب وحوادث القتل الي كل يوم نشوفها. الواحد يبعد عن البلاوي ويفتك. |
رد : الزواج من طبيبه وشروطي هل هي مقبوله
اقتباس:
|
رد : الزواج من طبيبه وشروطي هل هي مقبوله
لا تحور كلامي عشان تقلبه ضدي.. اللي قلته واضح
اعد قراءته انا تكلمت عن الوقت اللي ماتكون فيه موجودة بالبيت 😊 ماقلت الخدم يربون.. ولا لمحت حتى وذكرني باي نقطة انا قلت هالحكي اذا كنت فاهمه كذا؟ لما هي تترك الوظيفة تتركها باختيارها وقرارها.. بنت الناس مو رهن الاشارة لها كيان وقناعات وتفكير مستقل انت تبي هالصفات لكنك قاعد تناقضها وحاط برنامج حياتها بالكامل.. ماودي ادخل بتفاصيل بس الوقت الصعب هو الريزدنسي اللي المفروض قاعدة تؤسس البيت والاطفال رضع ماتقدر تاجلها كثير لين منتصف او اخر الثلاثينات من عمرها وترجع توها تبدا التخصص من جديد! اذا اردت ان تطاع فاطلب المستطاع تبي تدور الله يقويك.. بس اعطي البنت واهلها معلقة الشروط هذي :) |
رد : الزواج من طبيبه وشروطي هل هي مقبوله
فانيتي عزيزتي
الوقت اللي هم مو موجودين فيه..تقريبا 9 ساعات لو حسبنا مشوار الروحة والرجعة وهو وقت طويل...ستدخل لهم عادات وطبائع من يجالسهم. |
رد : الزواج من طبيبه وشروطي هل هي مقبوله
اقتباس:
والحلول الاخرى المطروحة والواردة ايضا لها سلبيات وايجابيات لكن الاخ فارض امر مافيه رجعة.. نوادر النوادر من الطبيبات ترضى فيه اتكلم عن بيئتي ومن اخالط من طبيبات وطالبات :) مين تتخيل قبل ماتختار التخصص وتتجه للطب انها تحط بعين الاعتبار مين يقعد مع عيالها وقت النهار والدوام؟! |
رد : الزواج من طبيبه وشروطي هل هي مقبوله
ستضع ذلك بالاعتبار حين ترتبط وتفكر بمصلحة اولادها وحجم المسؤولية
هل سيضع الاخ ياسر ما كتبه هنا كشروط موثقة تقال للمخطوبة قبل ان ترد...ام سيتفاهم معها في كل شرط في وقته المناسب بعد عقد القران وبعضها بعد الحمل....ارجو ان يوضح لنا ذلك |
رد : الزواج من طبيبه وشروطي هل هي مقبوله
شروطك معقولة
الا انها تترك العمل من رأي لما يكثر عدد الاطفال تجيب خادمه على حساب الزوجة بشرط الاطفال يكونوا بالحضانه وقت دواماتكم ما ينتركوا معاها الا اذا هي استغنت عنها خاصة مع مساعدتك بالتوفيق |
رد : الزواج من طبيبه وشروطي هل هي مقبوله
اقتباس:
الشغالة مثل ما قلت مافيه حاجة .. الا اذا البيت صار فيه حاجة ماسة بسبب كبر البيت ذيك الساعة ممكن اقرر وقتها.. انالا اعرف هل اقول الشروط الباقية الوظيفة والشغالة هذي للبنت عند خطبتها اولا؟ اخاف البنت تفهم غلط او تحسب اني ابيها شغالة عندي او كذا ! مع اني راح اقدر عملها واصلا لو ابي وحدة فاضية لي كان اخذت ربة بيت !.. الاخت فانيتي !:- سمعت عن طبيبة تركت وظيفتها لتربية ابنائها وعندما كبرو رجعت لوظيفتها واعادت الامتياز من جديد والآن هي استشارية وان ضاع من عمرها شيء فهو لم يضيع.. انما كان لتربية ابناءها ونشئتهم نشأة صحيحة. وكانت طول تلك الفترة (جالسة بالبيت) لا تضيع وقتها .. بل قامت بتأليف كتب والقراءة والتوسع في اهتماماتها الاخرى.. هذا المثال المشرف للطبيبة ! |
رد : الزواج من طبيبه وشروطي هل هي مقبوله
.............
ما قلت تحرق نفسها للبيت وللعيال.. وبعدين عيالك تربيتهم واجب عليك.. ومتى وقتهم؟ تبين تتزوجي بالامتياز وتجلسي الزردنسي كله بدون عيال؟ يعني اربع الى خمس سنوات؟ بعدين البيت والعيال اولى من الوظيفة. ولو علقتي شهادتك بالجدار راح تفيدك اذا مثلا تطلقتي او ترملتي. |
رد : الزواج من طبيبه وشروطي هل هي مقبوله
اقتباس:
هنا دور الوظيفة اللي تتحسسون منها شهادتي ووظيفتي ماراح تجحدني ولاتغدر فيني ولا بتخونني.. اقدر اهتم ببيتي وعيالي وانا موظفة نسبة كبيرة من الزميلات والداتهم طبيبات متزوجات اطباء وغيرهم .. متربين احسن تربية وصاروا افضل الناس وامتهنوا الطب.. هذا ايش معناه؟ |
رد : الزواج من طبيبه وشروطي هل هي مقبوله
ذكرت سابقا اني ضد فرضها بهذا الاسلوب.. لانه جدا منفر
مع كامل الاحترام لرأيك اذا ناوي على طبيبة اهم صفة لازم تكون فيك هي المرونة لانها بترضى فيك وهي متاكدة انك متقدم لها وانت عارف سلبيات وظيفتها وتخصصها وراضي فيها وتناقش معاها بهالمواضبع قبل عقد القران وجهة نظري وصلت الله يوفقك ويكتب لك الخير |
رد : الزواج من طبيبه وشروطي هل هي مقبوله
اخوتي الكرام
تمنع قوانين المنتدي تحويل الموضوع لدردشه بين الاعضاء ، و التدخل في خصوصيات الاخرين ، وتحويل الموضوعات عن مسارها ، نرجو الالتزام وشكرآ |
رد : الزواج من طبيبه وشروطي هل هي مقبوله
اقتباس:
اما من شروطك واضح انك بتاخذ وحده من خارج محيط العائلة ياخي مو كل الحريم زي بعض صدقني اليوم ترضى وهي مو حاسة بالتعب ولا المسؤولية بكرة تجي بيتك وهي موظفة وتتعب وتحمل وتجيب عيال اشياء كثير بتتغير بالنسبة لها ياخي اخوي زوجته ربة منزل من الصبح تقوم تصلح قهوة وفطور ويروحون العيال المدارس تربط راسها وتبدأ تنفض البيت وترتبه وتمسحه كل يوم وتركب الغدا وتستقبل العيال من المدارس وتدرسهم ويرجع اخوي من دوامه تغديهم ويرتاحون وهي خلاص جدولها منظم وتعب وبعد جامعية وتخصصها كيمياء بعد jyjy المقصد وانا اخوك التزم بشروطك لكن لاتجعلها القاضي والحكم كون مرن شوي اذا احتجت خادمة للمنزل جيب خادمة ولاتترك عيالك عندها بالبيت اعتبر انك ماجبت خادمة فهمت علي وعلى كلامك بعد الاجازة تاخذ ولدك او بنتك وتحطها بالحضانة وبعدين شكلك مستحي تجيب خادمة لزوجتك خايف يقولون لعبت عليك ولا شئ gnn عموماً الله يوفقك ولاتنسى تعزمنا على زواجك والله يرزقك ببنت الحلال اللي تسعدك وتهنيك |
رد : الزواج من طبيبه وشروطي هل هي مقبوله
أراها شروط مقبولة
وبالنسبة للشغالة أنا اؤيدك وبقووة واستغرب صراحه لماذا النساء يحاولن نشر هذا الفكر ان الموظفة ضروري يكون عندها شغالة رغم ازدياد الجرائم والمصائب الا انهن مازلن يروجن لهذه الفكرة رغم انه من الأفضل ترويج فكر مساعدة الزوج لزوجته الموظفة في شؤون المنزل أو طرق تجعل المرأة تحفز زوجها لمساعدتها في المنزل أهم شيء تلتزم أنت أيضا بالشروط وتساعدها في البيت وفي الأطفال أنا زوجة وأم وموظفة والحمد لله ماعندي شغالة وماافكر اجيب لاني اخاف منهم فكيف بامنهم على اطفالي واحاول ابدع وابتكر طرق علشان اشجع زوجي. واخليه يساعدني في البيت حتى لو هالشيء يضايقني نفسيا بس يبقى اريح لي من وجود شغالة ونعم التنظيف مو يوميا ومع وجود الاجزة الكهربائية بخف العبء |
رد : الزواج من طبيبه وشروطي هل هي مقبوله
مع إحترامي الشديد شروطك صعبة ليش معقدها فكها شووي .. الدنيا أخذ وعطا مو بهالشكل الله يرضى عليك ..!
وش اللي أبي موظفة ودكتورة تحديدا وما أبي خدامة متزوج ذا آيرون ليدي إنت .. كرف في العمل وكرف في البيت .. الخدامة بهالزمن ضرورة مو رفاهية صارت يعني الموظفة من بعد أول طفل لازم خدامة والغير موظفة من بعد ثاني طفل برضوا لازم مين يساعدها .. مو معقولة أقضي يومي مابين طبخ ونفخ وغسيل وكوي وتنظيف والحمام - تكرمون- والمطبخ يبغالهم تنظيف بشكل يومي مش أسبوعي لو بسوي كل هذا من الآخر متى أقابل العيال وأبو العيال أصلا بيكون مزاجي صفر من التعب ولا لي خلق لهم !!! ومتى أفضى لنفسي وأهتم فيها وأدلعها !!! بعدين وش اللي يربون عيالك خدم يالله من فضلك عندنا خدم لكن مو هم اللي ربونا نعرف مين جابنا و ربانا ! والحمدلله وجودهم ما أثر علينا بشكل سلبي .. يارجل قول خير جاتني حموضة وأنا أقرأ كلامك 😷 أختـي صديقاتها بالدوام عبوا راسها شلون تأمنين ولدك عند الخدامة وتروحين الدوام حطيه بحضانة، وفعلا سمعت شورهم وحطته بحضانة ومن أكبر وأغلى الحضانات بعد سعرها ناااااار في نص الترم الثاني العام طاح ولدها عندهم وانكسرت يده ! لا إهتمام ولا مسؤولية أصلا إحنا كنا نهاوشها والله ولدها يوم هو بالبيت مع خدامته مستصح ومربرب وزي القمر فديته ومن دخل الحضانة ذبلان وحالته حالة من قعدة الصبح اللي عذبته ووقلة الإهتمام بالأكل من ناحيتهم بس فالحين يبلعون فلوس! اللي بوصله لك لا تتوقع إنك حطيت ولدك بحضانة يعني هو بأيدي أميـنة وماعليه خوف .. وأمك مو مسؤولة لا عن عيالك ولا عن عيال غيرك من أخوانك جزاها الله خير كبرتكم وأفنت صحتها في تربيتكم وجاي بعد ما كبرت تبي تنطل عيالك عليها الحين وقتها ترتاح من الهم والمسؤولية .. لا تحملونها فوق طاقتها المسكينة ! اقتباس:
|
رد : الزواج من طبيبه وشروطي هل هي مقبوله
رغبت في المشاركة تأييدا لك أستاذ ياسر
في رغبتك بعدم وجود الشغالة في المنزل لأن وجود الشغالة في المنزل يعد شرخا كبيرا فيه ، يسير في صمت إلى أن يفتك باالمنزل وأهله دون شعور منهم ونحن منزلنا عائلي وتمكنت والدتي بفضل من الله منع الشغالات على أنواعهن من دخول منزلنا بعد تجارب مريرة من سابقات . وكل الأمور تسير على ما يرام ، ومع الوقت اعتدنا على العمل المنزلي وتنظيمه . فكل شيء ميسر بحمد الله من شركات نظافة ، وأجهزة متطورة ، وبيوت مرنة في النظافة . ولكن ثقافة المجتمع جعلت منها ضرورة ملحة بل وقدمتها على كل شيء ، حتى بعض الفتيات المقبلات على الزواج تشترط وجود الشغالة في منزلها قبل أن تزف إليه ! ولو لم يكن لها من سلبيات إلا تقييد حريتها في بيتها لكان كافيا لعدم وجودها . وقد عد البعض وجود الشغالات حاجة ملحة وضرورة قصوى بعد أن كان ترفا ومظهرا من مظاهر الراحة التي تفرد بها مجتمعنا العربي ، وفي المقابل احتاجت المرأة لمحاربة السمنة من خلال العمليات التجميلية أو ارتياد الأندية أو الأجهزة الرياضة لتعينها على الحركة والتدريب في ظل الراحة والنوم ووجود الشغالات في المنزل . |
رد : الزواج من طبيبه وشروطي هل هي مقبوله
رسول الله صلوات الله وسلامه عليه مات عن تسع زوجات ومع هذا كان عنده خادم .. ليس من واجبات الزوجة أبدا تغسل مواعين وتنظف حمامات وتمسح أرضيات وتكنس وتمسح الغبار .. الخدمة للخدم شباب زوجتك وعافيتها النفسية والجسدية لا تهدرها على جمادات (أثاث ومواعين .....) ماتبي زوجة تستقبلك وهي مرتاحة مبتسمة ؟؟؟ والا مكروفة منهد حيلها ؟؟؟ جرايم القتل المنتشرة في البلد بين مواطنين أكثر والا جرايم الخدم؟؟؟؟
الشروط الثانية معقولة اسأل الله لك التوفيق |
رد : الزواج من طبيبه وشروطي هل هي مقبوله
وجارك امام المسجد زوجته دكتوره تشتغل شفتات وتتعب
مشكلتك تقارن تقارن بربات المنزل وتقارن بالموظفات بعدين ترى مو على كيفك اضغط زر اتركي وظيفه اضغط زر ارجعي للوظيفه هي ماهي عبده ولا مملوكه عندك تسيرها بالريموت كنترول لها مشاعر واحساس وعمر وجود الشغاله مو عيب ولا حرام ولا تربيه شغالات عشنا طول عمرنا بين خدم لا ربونا ولا طلعونا بالعكس خلو امهاتنا يتفرغون لنا ويربونا ويدرسونا بدال ماكنت امي تقضي وقتها بالغسيل والتنظيف وغيره كانت تقابلنا وتدرسنا وتسولف علينا وننام بحضنها يعني ترجعون من دوامكم تعابى وتاخذ هالبزر من الحضانه المترديه وعقبه تنظفون وتغسلون وتطبخون وينهد حيلكم وتنامون وين الوقت تربون الاطفال ولا تنسى التدريس ومادراك ماتدريس المناهج الحديثه مااقول دخل شغاله من اول يوم لكن للاسف بيوتنا واجهزتنا ومدارسنا وخدماتنا ماهي مهيئه ان الواحد يستغني عن الشغاله للمدى البعيد |
رد : الزواج من طبيبه وشروطي هل هي مقبوله
رجاء لا نخرج عن صلب الموضوع وبالنسبة للشغالة, مثل ما وضحت في الغالب راح اكون ساكن بشقة لفترة ليست قصيرة.. لا اجد حاجة للخادمة ! ابد..
مثل ما كثيير من الموظفات ماعندهم شغالات وعايشين وضعهم اوكي الامور تمشي اوكي ان شاء الله.. بالنسبة للاطفال ممكن وقتها افكر بحل ثاني.. او اني اجيب مربية اختارها بنفسها اروح اسافر واختار مثل احد الاصحاب خواله من دولة اسيوية ذهب الى الدولة واستقدم حرمة كبيرة من قرائبهم وخلاها تهتم بالعيال فقط .. وكان شيء جيد العيال بدأؤ يتعلمو لغة ثانية وهذا اشوفها حاجة حلوة! |
رد : الزواج من طبيبه وشروطي هل هي مقبوله
الحين انت مو ذكرت الشغاله
انت صلبتها بالموضوع مو حنا |
رد : الزواج من طبيبه وشروطي هل هي مقبوله
اقتباس:
اسف لكن الحياة هي اخذ وعطى ..وهذي الاشياء ان كانت مو واجبة على الزوجة.. انا من ناحتي راح تكبر بعيني الزوجة ويزيد تقديري لها لما اشوفها تشتغل بنفسها.. اذا كانت عايشة بطريق وانا بطريق ونتقابل بغرفة النوم فقط هذا راح يقلل المودة بيننا ! |
رد : الزواج من طبيبه وشروطي هل هي مقبوله
ومتى ترتاح
اذا تشتغل بالبيت وتشتغل بالعمل الله يعين هالدكتوره الي بهذلوتها من الحين |
رد : الزواج من طبيبه وشروطي هل هي مقبوله
خلاص وقتها اذا صار فيه حاجة ماراح اصير مصمم ان بيتي ينخرب عشان مافيه شغالة ! راح نلقى حل .. ما فيه داعي نطلع عن الموضوع !
|
رد : الزواج من طبيبه وشروطي هل هي مقبوله
طيب وش الموضوع
|
| الساعة الآن 02:50 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©