كوكي - الإشراقة ❤️
 

السلام عليكم
الحمدلله لست اعاني من أي مشكلة
ولكن أريد توجيهي في أمر ما
حقيقة لازلت أحياناً اتعامل وفق اهوائي لا بطريقة تكتيكية ومدروسة
أما الآن فأريد أن اوازن ما بين التصرف العفوي و التصرفات العقلائية المدروسة

زوجي مسافر ، واعلم بإنه كثير الإنشغال
وهو حاليا في مكان تكاد تكون فيه شبكة الانترنت معدومة
وإذا كان لديه وقت مناسب يفتح " الواتس اب " لتتمة اعماله المهمة
فبالتالي وقته يكاد يكون معدوم لمحادثتي
ولعلمكم بإن شخصيته شمالية شرقية
فكيف تكون طريقة تواصلي معه ؟
حقيقة اجهل الطريقة الأمثل للتواصل معه وهو بعيد فهذه المرة الأولى ...

رد: كوكي - الإشراقة ❤️
 

وعليكم السلام ورحمة الله وبركاته

هلا بالزين ,, شو الاخبار ,,,, الله يعلي مقامش :D كوكي وفي قسم ساعدني قوووويه مره jh


ان شاء الله اكون عند حسن ظنش بي

للمعلوميه انا عزباء hhر .... ما فهمت مشكلتش زين اسهبي اكثر

رد: كوكي - الإشراقة ❤
 

رد: كوكي - الإشراقة ❤️
 

😊 شدعوة مقامج عالي والله
واخترتكم انتو الثنين لأن آرائكم تعجبني
وعقلانيين ما شاء الله ..

هي حقيقة مو مشكلة بس حالياً زوجي مسافر
وما ابي اتصرف بعفوية حالياً ولا اخلي مشاعري تتحكم بي
😁 لأن بجننه من الاتصالات والرسايل
ومحتارة شلون اخلي طريقة تواصلي معاه
هل اسأل على طول
ولا اتغلى ولا شلون
ابي اتصرف بحكمة اكثر

وفي نفس الوقت بنات اذا رجع بالسلامة ان شاء الله
في اليوم اللي مش يومي
شلون اخلي التواصل
او اكتفي بزيارته الظهر و زيارته لي بالليل قبل النوم

ابي امشي حياتي صح
ما ابي اغلط
ولا الي مشاعري هي اللي تحركني بشكل واضح وصريح فشلون اكون متوازنة

رد: كوكي - الإشراقة ❤️
 

تسلمين زين

ها بشري جننتيه اتصالات :d ولا كبحتي جماح عاطفتك gnn

تبين رأيي ,,,, خليه هو يدق ويبادر ,,, عطيه حق المبادره كوني مستقبله ,,, فرصه تجربين شو الي ممكن يناسبه

مو الي يناسبش

ممكن يشعر بالتغير واظنه التغييير للافضل ,,,, تواصلي فقط بالواتس وتحيني الوقت المناسب له ولا تسألين كثيييير ؟؟؟؟؟؟

لا تكثري من التساؤلات .... متى بتجي ووين مقيم ومن الاسئله الي شبه معروفه


هو رجل مو طفل mhm فلا تخنقينه ... اكيد بيكون مشغول فخليه على راحته ,,,


اذا رجع بالسلامه تحمدي له فقط من خلال الواتس وخليه براحته لا تسألينه بيمر عندش او لا ولا تنزلين له للمكتب ggl

ولا تكتبين له كلمني ,,,,,,,,, لا تكررين نفس الاخطاء

اذا جى عندش برغبه منه لا منك ، استقبليه واذا حابه تهدين له اهديه ,, قعد خير وبركه ما قعد الله وياك :d


لاحظي انه زوجش يحس ومستشعر اكثر مما تتخيلينه ,, انش تغارين وعندش حب امتلاك

فأنتبهي لتصرفاتش

بس عندي تساؤلات : كم مدة غيابه ؟ بيطول


وليش تحاتين كثييير هل مريتي في فترة سفره وتواصلكم مع بعض بمشكله ومو حابه تكررينها ,, اذا مريتي بها حاولي ما تكررينها


وتفادي ما فعلتيه بالسابق ... اخر نصيحه لش لا تبالغين في ردود فعلك ، واجهي مخاوفك ، زوجك لا يحب الضعف


اتمنى اكون افدتش mhm

رد: كوكي - الإشراقة ❤️
 

في موضوع جميل جدا وممكن يفيدش زين

موضوع الفجوه العاطفيه بين الزوجين في قسم السعاده الزوجيه للعضوه المؤيده بنصر الله


اتمنى لك الرضا والسعاده fdgrg

رد: كوكي - الإشراقة ❤️
 

مشكورين بنات ❤️
قرأت كلامكم والمعذرة ما كنت قادرة ارد
والحمدلله ألحين لقيت الفرصة

هذي اول سفرة له تصادف بحياتنا الزوجية
وهو اكيد بيمر عندي من غير طلب فمستحيل اتصل عليه واسأله وعلى فرض - و فرض المحال محال - انه ما بيمر هم ما بتصل

مستانسة من نفسي وشكراً لأنكم ساعدتوني ❤️ ممتنة لكم وايد

ما اتصلت فيه .. هو اللي يتصل
وصار موقف ما زعلت فيه بس سويت نفسي زعلانه وطلعت من الواتس اب وفي نفس الوقت بتوقيتنا كان وقت الصلاة بس بتوقيت البلد اللي هو فيها للحين ..
هو يعرفني اذا اسوي نفسي زعلانه بس ما ادري ليش تفاعل هالكثر 😂😐 الظاهر عجبه الدور
وظل يكتب رسايل وايييييد واتصالات وواتس اب

ما اسأل عنه وايد بس على قولت الاشراقة عشان لا يحس ان اهملته فاسأل احياناً رفوع شره
و رغم انشغاله ما قصر معاي بالسؤال والتواصل ومعيشني جو سفرته وانشغاله واجتماعاته بالصور

فيه أمر صاير مكدر خاطري
ومحتارة اخبره او لا!
معلمة ابناءه متصلة بي تشتكي من الام
لأن الام متصلة بالمعلمة ومهزئتنها!
لان المعلمة سبق وحاولت تتواصل مع الام والام ما ترد
والطفل متدهور مستواه لان محد يدرسه حالياً
والشغالة هي اللي تحل معاه واجباته او يروح بدون ما يودي معاه الواجب
الطفل ذكي بس مستواه ضعيف وكثير الغياب

اخاف اخبر ابوه ويتضايق
اخاف اسكت وبعدين يحط اللوم علي ليش سكتت؟!
هل ارجع ادرس عياله ؟؟

رد: كوكي - الإشراقة ❤️
 

الحيرة تاكل قلبي ..
هو يحس ان انه مسؤولة عن ابناءه وان المفروض اخبره بكل شيء
لأنه يعرف ان بناته يفضفضون لي
وانه مو كارهه هالمسؤولية بالعكس عيوني له ولعياله
بس ما ادري شالتصرف المناسب الحين!!!

رد: كوكي - الإشراقة ❤
 

رد: كوكي - الإشراقة ❤️
 

الحمدلله رب العالمين بفضل الله ثم بفضل النصائح اللي تلقيتها منكم ومن بنات وشباب المنتدى .. وآنه بعد احس بالراحة لهذي التطورات و زوجي أيضاً قال لي انه بدأت تتعدل نفسيته ويشعر بالراحة اللهم لك الحمد .

بخصوص ابناءه ما ادري حبيبتي اذا تعرفين مواضيعي السابقة أو لا
من أول يوم جاني يخطبني قال لي عندي نقطة مهمة جداً .. عيالي ما فيه من يهتم فيهم ولا في نفسيتهم وتعليمهم وآنه ابي زوجة اعتبرها امهم تهتم لشؤونهم وتعليمهم ونفسيتهم وتخبرني بتطوراتهم خصوصاً اني كثير الانشغال...
امهم الله يخليها لهم ويحفظها موجودة وما ابي اتكلم عن بنت الناس..

خايفة ان اخذله .. وخايفة اتسبب لنفسي بمشاكل آنه في غنى عنها
ما ابي فجأة اسحب نفسي من كل شيء
احبه وما يهون علي ضيقه أو زعله ... احس نفسي في حيرة

قلت له خل المعلمة تتواصل معاك ما وافق ، خصوصاً ان المعلمة نفسها حاولت تتغزل به مرة عن طريقي احيانا تقول لي حطي صورته
واحياناً تقول لي شخبار " شيخ الرجال " 😐👋🏻😏 يا زعم مطيحة الميانة لأنه شخص معروف فتفكر ان عادي تقول هالكلام
المهم انه ما يبيها تكلمه ولا تتواصل وياه
والادارة يحاولون يتواصلون مع الام والام ما ترد
وعمات الطفل سبق وصارت مشاكل مع ام الطفل فما بيتدخلون

رد: كوكي - الإشراقة ❤️
 

طيب تقدري تنتظري الين يرجع وتقولي له ؟ ولا شيء مستعجل؟

رد: كوكي - الإشراقة ❤️
 

مقرره انتظر ما ابي اخرب سفرته
اذا مزاجه اعتفس معناته ما بيقدر يعطي في شغله
واذا ما عطى في شغله معناته بيرجع الديرة متكدر وبيحس روحه ما انجز مهمة عمله!

اتصور ان بنتظر !!
في نفس الوقت خايفة يلومني اذا ما قلت له او ترتب امر ما على عدم اخباري له

بس غالباً ان بنتظر!

رد: كوكي - الإشراقة ❤
 

أنا برضو رأيي تنتظري،

وان شاء الله مايصير الا كل خير..

رد: كوكي - الإشراقة ❤️
 

كملي جمايلش ودرسي الولد .. ما بقى شي على الامتحانات ويخلص بأذن الله

وموضوع المعلمه أجليه مو لازم يعرف الحين

رد: كوكي - الإشراقة ❤️
 

هذا اللي افكر فيه يا كوكي
مو المشكلة ان الولد يروح يوم ويغيب عشر
وقاعد يغيب ايام الامتحانات
اتصور فاته امتحانين ..

رد: كوكي - الإشراقة ❤️
 

امتحانات ويتغيب فيها ,, الله يهدي امه ,, تنتقم في عيالها لا حول الله

طيب عم الاولاد خل يتدخل ويكلم زوجش .. الموقف مش مناسب تتكلمين فيه

امهم بتعتبرش الفتانه المخربه .. بعد ما يرد زوجش ناقشيه في هالنقطه ان مسؤلية الاولاد

لازم يحلونها بينهم ومالش دخل في الوضع لتنفهمين بطريقه غلط

رد: كوكي - الإشراقة ❤️
 

نصف الغياب لأن الولد على طول يمرض
أما النصف الآخر فالولد من يقول تعبان أو يكح شوي تخليه يغيب

صارت سالفة كبيرة لأن عمة الولد قالت حق امه ان الولد مستواه قاعد يضعف
بسبب ان محد يدرسه أو يحل معاه واجباته أو يهتم بأمور دراسته
ولما الأم ما اهتمت .. العمة كلمت خالته
وصارت مشكلة كبيرة أدت الى اتصال الام بالمعلمة وهزئتها

سبق وحاولت افهم زوجي ان انه انفهم غلط
قال لي انتي خبريني بكل شيء وانه بتصرف بطريقة ما توقعج في مشاكل

رد: كوكي - الإشراقة ❤️
 

وللأمانة الام مو قصدها تنتقم من عيالها ابداً عشان نكوم منصفين
قبل كان زوجي يقوم بهالمهمات .. من ايقاظهم وتلبيسهم للمدرسة ووو
لأن هي من البداية كانت ما تبي تسوي جدي
وكان بينها وبين زوجي مشاكل عشان هالنقطة

رد: كوكي - الإشراقة ❤️
 

ابوهم ما يدق على العيال يكلمهم ويشوف وضعهم ,, انتي لمحي له بأن يسأل عليهم وعلى دراستهم من غير استغراق في المشكله ويحط اللوم عليش

رد: كوكي - الإشراقة ❤️
 

البارحة سألته من سافرت للحين اتصلت بعيالك قال لا
قال انه يكلم البنات بالواتس اب ..
قلت له اتصل فيهم اسمع صوتهم اطمئن عليهم
ما اعرف شلون فهمها ان اعاتبه ان مقصر
حاولت ألطف الموضوع قلت له التقصير ما يجي منك واللي تقدر عليه تسويه
قال انه مو قادر يحك راسه وانه معتمد عليج شوفيهم اطمئني عليهم
ابي احس ان فيه احد اعتمد عليه في البيت

وقبل شوي صارت مشكلة جديدة عشان الشغالة
على طول كتبت له تسمح لي اتصرف بنفسي اذا فيه مشكلة بخصوص الشغالة ؟
قال لا مو مسموح انتظري اذا رجعت

ما كان ودي اقول له بس لازم آخذ الاذن
وانه بصراحة مليت..
ما ابي المشاكل احش نفسي على اعصابي
انه اصلا في بيت اهلي حاليا و ازور بيتي مع ذلك المشاكل لاحقتني
باقي 9 ايام على رجعته
ما اقدر ارد عليها وعلى مشاكلها والسكوت يحرقني بس ساكتة عشان خاطره
ولا ابي اكسر كلمته واخلاقي ما تسمح لي 😓😩

شسوي ؟؟؟

رد: كوكي - الإشراقة ❤
 

اللي فهمته انه صارت مشكلة بينك وبينها بسبب الشغالة،
وانت حاليا في بيت اهلك والشغالة مو معاك..

فهمت صح؟!

رد: كوكي - الإشراقة ❤️
 

لا عمري مو صح

بيني وبينها مو مباشرة
انه من سافر زوجي انتقلت بيت اهلي
بس امر بيتي اشوف مكاني ووو

الشغالة زوجي مقسم وقتها بيني وبينها
انه تجيني 3 ساعات في اليوم وباقي اليوم عندهم
هي تسأل الشغالة انتي شتسوين فوق
وووو وتطرش بناتها تبيهم يشوفون انه شنو اخلي الشغالة تسوي
واليوم الصبح مهاوشه الشغالة تقول لها انتي تروحين تنامين فوق
زين هذا وقتي ان شاء الله اخليها تتشقلب وتسوي رياضة هذا شأني
واشياء وايد 😢 مليت!
وتسالها عني انه في البيت او لا ووو

لاعت چبدي. . زين ليش نطرشين بناتج يتجسسون علي!

رد: كوكي - الإشراقة ❤
 

أها فهمت..

خلاص طنشيها زين ولا تحرقي قلبك عشانها

واضح تصرفاتها أبد مو ناضجة !

صدقيني هذه النوعية من الناس احسن طريقة لرد اساءتهم عدم الرد عليهم..

استمتعي بوقتك مع أهلك ولا تحطي في بالك المشاكل لاحقتك أو شي منها

العلاقة الوحيدة اللي تحطي لها اعتبار، علاقتك مع زوجك

غير كذا كبري المخدة وحطي في بطنك بطيخة صيفي :d

رد: كوكي - الإشراقة ❤️
 

😢 ابي اعيش بسلام .. احس بالقهر
تخيلي تقول حق معلمة العيال ان انه ما كنت احل معاهم واجباتهم وووو

قلت بتودد لها طرشت لها هدية وقطتها علي
قالت ما تبي مني شيء..
زين شسوي لها !!!

او توقف قريب من بابي وتقول عني كلام

باحاول اطنش .. واصله حدي
دايماً ادعي ان الله يطهر قلبي وعقلي
عشان ما اخلي في قلبي شيء عليها

انه مو ملاك
وهي مو شيطان
بس الله يهدينا شسوي

رد: كوكي - الإشراقة ❤
 

رحمة الله على الشافعي لما يقول :

إذا نطق السفيه فلا تجبه .. فخير من إجابته السكوت
فإن كلمته فرجت عنه .. وإن خليته كمدا يموت


يخاطبني السفيه بكل قبح فأكره أن أكون له مجيبا
يزيد سفاهة فأزيد حلما كعود زاده الاحتراق طيبا

إنت راقية بأخلاقك وترفعك عن مجاراتها،

الناس اللي يعنوا لي في حياتك هم اللي تزعلي بسببهم،
بس وحدة ما لك أي خاطر عندها ليش بالله تنقهري؟!

تأكدي كل واحد يشرب من نفس الكأس اللي شربه غيره، في الدنيا قبل الآخرة..

الله يقويك ويكفيك شر كل ذي شر❤

رد: كوكي - الإشراقة ❤️
 

زين العيال مو مسؤليتش .. مسؤلية امهم وابوهم ,, بعد ما يرد زوجش شيلي يدش من الموضوع


وبعدين ليش تهدينها وانتي عارفه انها ما راح تتقبل منش اي شي .. لا تكونين في حالة ضعف وتعطينها

الفرصه بعدي عنها بأقصى حد ممكن ,,, مسألة السكن مع شريكتش حتى لو كان بجناح ومدخل منفصل



راح يجيبلش القلق والتوتر ,, مالش غير تتقبلين الوضع او تحاولين مع زوجش تسكنين في سكن قريب

من بيته

رد: كوكي - الإشراقة ❤️
 

تصدقون فكرت بكلامكم
خصوصاً الجزئية اللي عن العيال


من كذا يوم فات وحده من بناته قالت انه بيسوون سبرايز حق وحده من صديقاتهم
( من تزوجت ابوهم للحين ، وانه اساعرهم بهالأمور لأن يكسرون خاطري امهم مو ملقيتهم وجه قدام صديقاتهم فقلت ابيض وجوههم )
لأول مرة اقول لوحده من بناته ( بافكر وبشوف وضعي اذا يسمح اساعدج )
مع ان اقدر اساعدها لو بغيت
بس تذكرت كلامكم .. بالخصوص كلام كوكي إن آنه اهدرت طاقتي بالإلتفات لأمور الآخرين ونسيت آنه شاللي ابيه
توها الحين بنته كلمتني قالت ها خالة شقلتي عشان موضوع الكيك والهدية ..

قلت لها موضوع الكيك ما بقدر اساعدج فيه ( لأن في داخلي زين ما تبي تروح هالمحل اللي يبون منه كيك لأن بعيد و زحمة واتنرفز من هالطريج بالذات )

لأول مرة بنته تقول لي : (( ليش؟؟!!!! )
وحطت علامات تعجب ومستغربة من رفضي
وهي قايله حق صديقاتها وجازمة لهم ان انه ما راح ارفض المساعدة
تصدقون للحين ما فتحت الواتس اب ولا رديت عليها
بس شفت الكلمة من خلال الاشعار

هل غلطت بقول لا ؟
هل محتاجة ابرر سبب رفضي ؟

احس انبني ضميري لما رفضت اساعدها وانه اعرف ان ما بتقول حق احد غيري
في نفس الوقت ما ابي اكون العصا السحرية اللي كل شيء تنفذه لهم حتى لو على حساب نفسي

شرايكم

رد: كوكي - الإشراقة ❤️
 

هل غلطت بقول لا ؟
هل محتاجة ابرر سبب رفضي ؟

احس انبني ضميري لما رفضت اساعدها وانه اعرف ان ما بتقول حق احد غيري
في نفس الوقت ما ابي اكون العصا السحرية اللي كل شيء تنفذه لهم حتى لو على حساب نفسي

شرايكم[/QUOTE]


شوفي يا زين انا دوم ما ارد احد بمساعده او استشاره لكن في الفتره الحاليه حسيت اني تعبت ,, وهم تساهلوا


واعتمدوا علي حتى في امور يقدرون عليها ,, اعلنت الانسحاب hg ونفسي ألزم ما علي


ضميري يأنبني وكثيييير بس احاول ما اتراجع ... العطاء من غير حساب مو لصالحش

انا ما راح اقول انتي غلطتي بقول لا ,, بل يحق لك تقولينها وخصوصا اذا كان الطلب

مش مهم وتقدر تدبر وتعتمد على روحها .. عندكم سايق وعندها امها وعندها تدق على اي مخبز يوصلون لها احلى كيكه ...وعندها اكثر من حل ولكن اعتمدت اعتماد كلي على زين لانها الحل الاسهل ولي ما تقول لااا ,,,,,,, اوقات كثيره لازم نشد على روحنا ونعلمها العطاء بحكمه


انت غلطتي بتجاهل الرد على الرساله ,, كوني اقوى وواجهي بلطف


وبرري لها بأي عذر

رد: كوكي - الإشراقة ❤️
 

كوكي حبيبي هذا اللي قاعد يصير
اعتذرت منها بلطف وقلت لها ان عندي ارتباطات
رجعت كتبت : يعني ما بتساعدينا ؟
قلت لها لا

احب اساعد ، لكن ما احب احس نفسي في موقع الاستغلال فاهمتني شلون

صح اكسرت خاطري
بس لازم اتعلم اقول لا
تدرين ان احياناً يطلبون مني شيء صعب علي اسويه مع ذلك اسويه بس لأني ما اعرف اقول لا
لهم او حتى حق غيرهم ...

واليوم بنته الثانية مكلمتني تبيني اصلح تيلفونها
امها كاسرته .. قلت لها ما اقدر
لأن انه قبل عرضت عليها قالت لا لأن امها مو راضية
والحين خايفين يرجع زوجي ويعرف الموضوع فقالوا لي انتي صلحيه
بس قلت لهم لا
لأن بيكون في الامر احراج لي لان خبرت اخوي وبعدها لما قالوا لا قلت له خلاص ما يحتاج
والحين استحي ارد اخبره


فيه امور لازم ارتبها

رد: كوكي - الإشراقة ❤️
 

استمري ورتبي امورش واولوياتش

الله يوفقش زين ويهدي بالش