|
تقصّد زوجي الاساءة لي في بعض المواقف
السلام عليكم ورحمة الله وبركاته
أحيانا موقف بسيط يجعلك تقف طويلاً لتعيد ترتيب حياتك من جديد.. حصلت مواقف كثير في الفتره الاخيره مع زوجي استغربتها منه وتقريبا فقدت الصفات الحلوه اللي حبيتها فيه قديماً صفات تقريباً ماتت بإراده منه ومااعرف ليش! !! بدأت أسلوب مختلف ومشى معاه الحمدلله تركت اللي كان يكرهه فيني تلقيحي بالكلام ولكن إلا حقي مااقدر اسكت عنه أطالب بحقوقي وحقوق عيالي ماابيه يظلمني لانه معاي حق. . وهو يبي كل شي على كيفه ويقولي انا عمري كبير 55سنه مو صغير وااعرف ادبر اموري لا والله عمر الواحد ماينحكم على عقليته من سنه مثلاً يبي يسفرها هي وعيالها بالاجازه وقال انتي بعدين أن شاء الله اشوف كيف! ! رفضت واصريت اني أسافر مثلي مثلها وقال انا اعرف ايش اسوي طبعاً عذر مو مقنع ومافيه أي منطق للعلم هذي السفره الثانيه اللي يقول نفس الكلام هالمره رفضت بشده وقلتها له حقي وحق عيالي مااتنازل عنه بالاخير طلبت منه لو مايبي يسفرني يعطيني فلوس السفره ولحد الآن بين مد وجزر هذي نقطه والنقطه الثانيه وهي الأهم بالنسبه لي. .. تذكرون قصتي مع اللبس طلع متقصد يعطيني ظهره وقاصد انه يطنشني تماما انا غالباً أحب اللبس الجديد وكل شي يعني عشان نفسيتي وعشان نفسي مو إستعراض ولاشي كذا طبيعتي معاه وهو متعود مني هالشي وان قللت لو يومين يتضايق وينتقد على طوول هالمره كل ماشاف علي شي يطالعني باحتقار مدري كذا حسيت لما كلمني من كم يوم قالي بمزح انتي تحاولين تلفتين الأنظار تبين لااازم الواحد يعطيك وجه ولو مااحد عطاك وجه تقلبين البيت فوق راسه @@! هذا على أساس مزح قلت بالعكس انا كلي وجوه مو منتظره وجه من أحد الحمدلله قالي لا والله وبصوت خااافت قال ماجاكي إلا الظهر قصده منه mhm تعجبت وانصدمت ماتوقعته يقصد ليش طيب ايش التعامل هذا احنا دخلنا زواج أو بحرب عايشين صار يبي يحطمني بكل الطرق بالغصب. . بصراحه حياتنا صارت سخيفه وصار يتلفظ على أهلي بألفاظ مافيها احترام مع أنه ربي يشهد ماجاه من أهلي شي ويقول انا مزاجي وعلى حسب مزاجي تحرقين في نفسك وتنحفين قلتله لا والله ان حافظت على وزني ف هوا مو منك ولامن حركاتك هذا من ارادتي الحمدلله 24 ساعه انتقادات مايسكت على أي شي مستقعد حتى على عيالي يتفلسف مسكين محد رباهم وتعب عليهم إلا أنا وهو من بلد لبلد بحجةالشغل. . ادري بتقولون لي عطيتيه أكبر من حجمه طنشي وعيشي زي ماتبين البسي زي ماتحبين وقوليله هذي طريقتي من زمان. . اوكي مااختلفنا لكن شي جاااارح لما مايقدر الزوج ويطلع متقصد يقلل من قدرك لسبب في راسه الله أعلم قد يكون تافه وتافه جدا ابي دعمكم ونصائكم انا مو محطمه واثقه من نفسي الحمدلله ولكني انصدمت من دناءة تفكيره .. تك تعديل العنوان ليتناسب مع المضمون |
رد: مواقف كثيره خلتني اعيد حساباتي
الدعاااء يصنع المعجزات
داايم ادعي بكل سجود ان ربي يسخره لك وعيالك ويجعلك اجمل النساء بعينه واحبهن لقلبه والله اعرف وحده معرفه شخصيه عن قرب لاتتزين لزوجها ولا عندها اي نوع من الاغراءات ودايم ساكته مهي راعية كلام لكن انها دايم تدعي بتسخير زوجها لها وهي زوجه ثانيه والله زوجها مرا معطيها حقها وزياده ولو احد جاب طاري عنها يتغير وجهه ويدافع عنها ويعطيها بدون لاتطلب شي |
رد: مواقف كثيره خلتني اعيد حساباتي
اقتباس:
فتره من الفترات كان كويس معايا وماشيه اموري ماكان ينتقد وان انتقدني بطريقه هاديه وفيها محافظه على مشاعري بشكل كبير كنت وقتها دااائمة الدعاء وانشغلت بعدها عن الدعاء بأمور الدنيا استغفر الله واموري ساءت معاه حالياً بشكل ماتوقعته فعلاً الدعاء يصنع المعجزااات الله يجزاك خير ياقلبي |
رد: تقصّد زوجي الاساءة لي في بعض المواقف
بس صايره كثير أفكر بيني وبين نفسي
ليش انا ايش سويت وحتى لو سويت هل استحق أن أعامل بهالطريقه المتعجرفه منه أسلوب شديد الجفاف أخاف يجي يوم وماعاد اطيقه واكرهه من تصرفاته مو بسيط على نفسيتي اشوفه كذا يتقصد يرد الكلمه بعشر أحس سخافه كذا. عمره وييين وتصرفاته وييين |
رد: تقصّد زوجي الاساءة لي في بعض المواقف
استغفري كثيير وسترين العجب ان شاء الله
|
رد: تقصّد زوجي الاساءة لي في بعض المواقف
بالعكس احس كل مايكبر الرجال تزود حنكلته وغثاثته
وتضيق اخلاقه ويقل صبره وهذا الي اشوفه من حولي بس مع الدعاء وذكر الله تسهل الحياة وكل مابعد الانسان عن ربه سواء بقلة الذكر او دعاء ربه صعبة عليه الحياة |
رد: تقصّد زوجي الاساءة لي في بعض المواقف
الحمدلله بدأت بالاستغفار لي مده
الله يفرجها لأن كل اللي قاعد يصير معايا ماله أسباب |
رد: تقصّد زوجي الاساءة لي في بعض المواقف
يلف ويدور وماألقى أجابه صريحه منه
هل معقول أن الرجل مايحب زوجته تتزين له؟ ؟؟ تكفون بس اجيبوني غلط اتزين له دايم ماني شايفه شي غلط ينفر أو يبعد بالموضوع يعني لو بنسمع شكوى بتكون زوجتي مهمله أو ماتتزين لي مو معبرتني ومن هالكلام اما العكس ف ماأظن انه مشكله بل على العكس! !! |
رد: تقصّد زوجي الاساءة لي في بعض المواقف
انا نفس السؤال يدور فبالي .
لاني لاحظت عدم الرضا واللامبالاة !! معقولة فيه رجال ما تفرق معاهم ؟؟ |
رد: تقصّد زوجي الاساءة لي في بعض المواقف
كثرة الاملاس تفقد الاحساس وكل ممنوع مرغوب جيد ان تتزيني لزوجك من حيث الشكل لكن الاهم ان لا يكون ذلك مبالغ فيه لانه قد ينفر ويمل لهذا قللي من الامر حتى يشتاق اليه ثم عندها تفاجئيه بمظهر جمالي مغاير تماما فينبهر اما ان يراك جميلة في كل وقت فهذا يجعل الامر عاديا مع مرور الوقت ثانيا انت في حاجة الى ان تشعريه بحبك وتقديرك واحترامك حتى يباذلك نفس المشاعر ثالثا لا بد من عنصر الايمان والعبادة ان يكون حاضرا في حياتكم فتتعاونو على خير والتقوى فبادري الى ذلك شيئا فشيئا والله هو المعين
|
رد: تقصّد زوجي الاساءة لي في بعض المواقف
اقتباس:
كل اللي اسويه من اهتمام مايدل على شيء ولايعني بشيء! !؟؟ |
رد: تقصّد زوجي الاساءة لي في بعض المواقف
اقتباس:
باختصار مايعجبهم العجب! !!!! |
رد: تقصّد زوجي الاساءة لي في بعض المواقف
-
كثر العرض يقل الطلب ويمكن انك انتي دايم تقولين له ليه ماتنتبه لي فعرف نقطه ضعفك واستغلها استفزاز طيب انتي كم عمرك اذا كان عمره 55 كلما كبر الشخص زادته عصبيته وانتقاداته ماتشوفين اجدادنا وجداتنا يدققون في كل شي وهو مااحترامي الشديد ماباقي شي على ال60 ماعليك منه ولاكانك تسمعين شي |
رد: تقصّد زوجي الاساءة لي في بعض المواقف
اقتباس:
مو كذا الزوجين يعيشون على استفزاز ترى مره ممل .. وصادقه هوا يقولي انتي إلا تلفتين الإنتباه لو محد كلمك تقلبين البيت على راسه ويضحك بمزحه جابها لكن حزت بخاطري قلت معناها متقصد اوكي .. بس بصراااحه خليتيني اعصر بمخي وأتذكر زززين فعلا كثير مرات اطلب منه الإهتمام لو قل إهتمامه بشكل حتى لو بسيط اسارع واطلب الإهتمام أخاف مع الأيام يزيد ف أحب أذكره. . صدقتي والله انك جبتيها بمحلها ماشاء الله عليك الله يسعدك على هالعقليه والذكاء jyjy بس كملي جميلك وقوليلي ليش يستفزني ايش السبب!!!؟؟ |
رد: تقصّد زوجي الاساءة لي في بعض المواقف
ختي ألزمي الأستغفار فقط يعني كل يوم في أي وقت أي مكان أي زمان فقط أستغفري رطبي لسانك بقول الله ووالله أمرك ينصلح ومشاكلك كلها تتحل ^-^ فقط أستغفري ترى ساهل وفوائده عجييبه والله ومشكلتك راح تنتهي لو أستمريتي في الأستغفار
|
رد: تقصّد زوجي الاساءة لي في بعض المواقف
هل كان يهتم بك سابقا ؟ هل تغير فجأة بدون مقدمات ؟ أتوقع ـ والله أعلم ـ 1) الرجل في هذه السن يمر بحالة ضعف في صحته ونفسيته وفي كل شيء. 2) هناك أمور تشغله ، فهو حين يأتي عندك يتمنى أن يجد الهدوء والراحة والاحتواء ، فهو مشغول في أمور كبيرة ، زوجته الأولى ، أبناؤه ، عمله ، صحته ، تعبه. 3) أحسنت حين طالبتي بحقك ، لأنه من الخطأ أن يشعر الرجل أن زوجته بلا رغبات وليس عندها هموم فينساها ، لكن المطالبة تكون بهدوء ومرونة وبحكمة ورحمة. 4) حين يصل الرجل لهذه السن ربما يكون ضعفيا في العلاقة الحميمة ، فحين يراك متجملة ، يظن أنه يجب عليه الممارسة فيتعب ويتشوش ذهنه ، فحسسيه بأنك تتجملين لأنك تحبينه وتريدين أن ينشرح صدره. 5) حين يكون بيتك هادئا وتعرفين متى تفاتحين زوجك بما تريدين ، سيحرص على الحضور وهو مشتاق ويعرف أن بيتك هو جنته وحصنه الآمن من هموم الدنيا ، وتخطفين قلبه ، وحين يقوى الحب تزول الكثير من المشكلات. والله أعلم ، وفقكما الله لكل خير وجمع بينكما بسعادة ونور |
رد: تقصّد زوجي الاساءة لي في بعض المواقف
اقتباس:
سؤال قمة في الروعة ايش سويت عشان استحق الجفا وسوء المعاملة؟ طيب الرسول اللهم صلي وسلم عليه عليه ايش سوى عشان يضربوه عيال الطايف بالحجارة؟! وش سوى لقبيلة قريش عشان تطرده من مكه؟! وش سوى لله سبحانه وتعالى عشان يعيشه في تلك الفترة من شظف العيش ومن عدم تطور الدنيا؟! وش سوى لله عشان يجعله يربط حجر على بطنه الشريفة من شدة الجوع؟! سؤال وش سويت عشان استحق كذا؟ يحتاج منك ان تقولي لنا ماذا سويتي ومن اجل من سويتيه؟ ومن قال لك ان حسابها بالدنيا؟!؟!؟! |
| الساعة الآن 06:13 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©