النقاش بعد الملكة
 

السلام عليكم
انا بملك قريب ان شاء الله وافكر بعد الملكة اجلس فتره اجس النبض تطلب تتواصل معي او لا
على كل حال انا بتواصل معها .. بناقشها بأمور حياتنا والاساسيات الي بنطبقها والاخطاء الي نتجنبها .. وبسفط العاطفه على جنب بوقت الملكة بخصصها استكشاف لشخصياتنا وبناء اساس العلاقة انا متثقف بأمور الزواج والحياة الزوجيه من مشاكل وكل شي وتعلمت من خبرات متزوجين كثير سواء بالمنتديات او من حولي
حتى بليلة الدخلة ماني مسوي ... ماراح استعجل طبيعي البنت بتكون خايفه ومرتبكه بخليها لين نكسر الحواجز الي بيننا وتسلك امورنا لاني من وجهة نظري اعتبرها انانيه من الرجال وعدم مبالاة لمشاعرها بليلة الدخله الي ... من اول ليلة احس مالها طعم بدون مشاعر متبادله

حتى شهر العسل افكر اأجله لبعد العرس بشهور ثم نخطط لشهر العسل سوا

على كل حال المتزوجين والمتزوجات عندكم تعديل او اضافات او وجهات نظر او نصائح كلن يدلي بدلوه اتقبل من الجميع بصدر رحب

رد: النقاش بعد الملكة
 

التواصل انت اللي تطلبه.. مو هي يا اخوي..

حتى لو كانت تريد تتواصل ماراح تطلبه..

الرجل يتخذ المبادرة الاولى دائما! حط ببالك هالشي

وصح كلامك ان الملكة تكون تعارف واستكشاف بدون مشاعر مصطنعة.. قول اللي تحسه بدون مبالغة بس..

شهر العسل مايتاجل حرام مايصير له طعم.. ويتنحسب ضدك..

في بنات ماعندها مانع تكنسل حفلة الزواج ولا تكنسل شهر العسل

مستحيل ينعاد حتى لو دفعت فيه دم قلبك بعدين ورحت افضل مكان

لان المشاعر والتوقعات وكل شي فيه غير.. ماتقدر ترجع لوقت لنقطة مريت فيها

بس استشيرها فيه وبتخطيطاته بمكالماتكم وزياراتك بوقت الملكة

رد: النقاش بعد الملكة
 

ايه هذا الي ناويه اكره التصنع والمثاليات المزيفه وبالاخير ينصدمون ببعض وبعدين
كيف ماله طعم وحنا جديدين على بعض ومتوترين وضغط السفر والغربه احسها صعبه glh
ومالها طعم وبعدين انا ناوي اخذ فيها شهر عسل بالمانيا والنمسا يبيلنا فيز ومواعيد ونطلع للسفاره ومستحيل تطلع معي بوقت الملكة ماعندنا هالسوالف حتى الزيارات مافيه ماشوفها الا بليلة الدخلة

رد: النقاش بعد الملكة
 

اسالها عن رايها بذلك لان الموضوع قد يهمها ويعني لها ولا تنسى ذلك

لا تقرر كل شي لوحدك

تقدر هي تروح السفارة مع اخوها عادي!

رد: النقاش بعد الملكة
 

فيه دول تكون الفيزا بالمطار.. ماهو شرط اوروبا
اوروبا هي حلاتها بالصيف
بعد فتره رح تصير كلها ثلوج وبرد..

على حسب توقيت العرس باي شهر تكون الوجهه.. '

واذا على كلامك.. جس نبض واختبارات و تخطيط لوقت الدخله.. ماعتقد تنفذ اي شي منهم.
لان الظروف تتغير مع الوقت.. و كانك تبي تسوي شي فريد
غير عن كل الناس..

يعني بعد المتابعات و الخبرات من النت والناس المتزوجين..
هذا اللي طلع معك تأجيل الدخله و شهر العسل ؟ من اللي نصحك كذا؟

رد: النقاش بعد الملكة
 

المكالمات لاتجس نبضها ولا شي اطلب رقمها وكلمها مافي بنت ماتبي خطيبها يتواصل معاها خذ الرقم ولاتكسر بخاطرها

اما السفر افضل شي انك ما تاجله حلاته وانتوا لسا خجلانين من بعض وبما انكم في مكان واحد فكذا تضطر انكم تكسروا الحواجز اللي بينكم وتكون علاقتكم اقوي

اما الدخله هذا شي راجعلك الظروف هي اللي تحكمي مالها تخطيط مسبق ..


موووووووفق ياعريس 🎀

رد: النقاش بعد الملكة
 

و عليكم السلام
الف مبروك مقدما
مسالة انك ما تتصل عليها اخاف هي تجي تكتب هنا بعنوان "خطيبي لا يكلمي "
تجيب لها هواجس و افكار سلبية هي في غنى عنها

و معك حق ان فترة الملكة هي فترة تعارف و استكشاف للاخر لكن كلامك انك تسفط العاطفة على جنب اشوفه مثالي و بعيد عن الواقع .فحاول تجمع بين العاطفة و العقل و فهمها كمان بهذا الشئ حتى ما تفكر انك اخذتها غصب
دور على دورات تدريبية عن الزواج و سجلها معك حتى تتثقف هي الاخرى و تحس انها شريكة حياتك فعلا .
حلاة شهر العسل بوقته و طالما انت مثقف قليش ما تترك لها الخيار بهذا
اسال صاحبة الشان عن رايها بالموضوع و اتخذ قرارك بعدها
موضوع الدخلة شئ خاص راجع لكم

رد: النقاش بعد الملكة
 

الرجال هو المبادر
وبصراحة اللي يستحي ابد مايعجب البنت !
انت بادر وخلك واثق من نفسك واطلب رقمها وبالعكس هي بتفرح
والسفر لازم تروحون شهر عسل!
السفرة بعد كم شهر هذي ماتعتبر شهر عسل خلاص سفرة عادية!
وليلة الدخلة اتركها للظروف على حسب علاقتكم بالملكة وجرأتكم

رد: النقاش بعد الملكة
 

ليلة الدخلة ليلة مهمة في حياة المرأة و الرجل على حد سواء
و لازم ما تضيعونها في جس نبض أو عطف غير مبرر
أصلا اغلب البنات صح يستحن و يصير عندهن ارتباك شوي بس اكيد ما يحبون هالليلة تفوت
بدون أي علاقة حميمية
أنا أقول خلك طبيعي و لا تنظر للمرأة انها كائن ضعيف و مختلف و ليست له جاذبية و شهوة
المرأة مثلك و لكن تستحي شوي
عليك تكون حنون معها و تطمنها تقول لها انه عادي لو ما سوينا الشيء هذا الليلة اهم شيء تكونين مرتاحه
و خلك حنون معها
ابدأ بالقبلات البريئة على يدها و رأسها
و تدرج قليلا و تكلم كلام مديح لجمالها و قل عبارات ثناء فيها
و لا تخلون هالليلة تعدي كذا
و انا اقول عيشوا شهر العسل بعد الزواج على طول
لا تضيعون اول ايام زواجكم بانتظار و جس نبض ليست له حاجة
مع العشرة تبي تعرفها زين
و الانسان تعرفه بوقت الشدائد
وفقك الله

رد: النقاش بعد الملكة
 

حلاتها اوروبا .. ومثل ماقلت التخطيط يمكن ما اقدر اسوي شي منه حسب الظروف
اما تأجيل الدخله وشهر العسل محد نصحني بهالشي بس شفت ناس مجربه فيه فرق لما تسافر تستمتع ولما تسافر متوتر ومستحي وشايل هم و انا اشوفه اغلب مشاكل المتزوجين سببها الفتره مابين الملكه الى ليلة الدخله بالذات ليلة الدخلة اشوفه ماهو شي ضروري يكون من اول ليلة الا الظروف تساعد هالشي

رد: النقاش بعد الملكة
 

صادقه انا قلت اتناقش معها بكل شي حتى موضوع شهر العسل ان رغبت تقديمه او تأجيله ماعندي مشكله

رد: النقاش بعد الملكة
 

الراءي هذا لو طلع من البنات ممكن اصدقه بس من رجل !
هذي ليلة الرعب بالنسبة للبنات

رد: النقاش بعد الملكة
 

ع كل حال مشكورين فيه اشياء ماكنت منتبه لها تو انتبهت

رد: النقاش بعد الملكة
 

صدقني انها هاذي الحقيقة
و انا قرأت موضوع لاحدى الاخوات و تقول انها لا تريد تضييع ليلة زفافها بالخجل
" يتمنعن و هن راغبات "
و انت اصلا اذا كنت طيب و سويت نفس ما قلت لك قبل
تحبك و قد قرأت موضوع سابق لاحدى الاخوان تقول ان ليلة الدخلة لم تكن موجعه او ليلة سوء بل كانت ليلة خيالية و استمتعت فيها
لذلك لا تأجل و عش " ليلة العمر "

زي ما قلت لك طمنها و قل لها ترا عادي مو لازم نسوي الشيء الليلة اهم شيء راحتك حبيبتي

واذا سمحت الفرصة خن العهد ههه و ابدأ بالتدرج ولا تنسى الكلام الحلو و المداعبات

وفقك الله

رد: النقاش بعد الملكة
 

لا تأجل شهر العسل لانه ممكن تحمل بدري ولو حملت قل على شهر العسل السلام ...

رد: النقاش بعد الملكة
 

رد: النقاش بعد الملكة
 

بالنسبة للتواصل قصدي ان ما اكلمها ع طول يقولون ذا ملهوف بثقل شوي بكلمها انا طبعاً ماتوقع تبادر هي
اخيراً احد يفكر مثلي السفر بعد العرس ع طول ماله طعم لما نتعود ع بعض شوي اقل شي اسبوع اسبوعين
بالنسبة لشهر العسل تنصح بالجزر يعني وانا ناوي افر فيها بسبع مدن اوربيه مابينا المانيا والنمسا فنادق خمس نجوم والتنقل بالسياره وكلها مسافات قريبه من بعضها مجموع مسافات الرحله حول 588 كيلوا

وادي اسوي شهر عسل فخم

رد: النقاش بعد الملكة
 

ليش ماتبغها تقول عنك ملهووووف
بالعكس اجمل شعور للبنت لما تحس خطيبها ملهوووف عليها
وفرحان وطاير فيها ..
ياحبكم لثقل خلك على طبيعتك لااااا تتصنع ابد
ان اشتقت عبر وان حبيت بين لا تتثاقل عليها ابد

انا ضد كتم المشاعر هذي خطيبتك خذ راحتك بالمعفوووول



🎀

رد: النقاش بعد الملكة
 

ماراح اتصنع بس ماراح اكب المشاعر كب ماراح يبقى شي بعد العرس خصوصاً الملكه بتطول سنه وشوي
وبعدين ان اهتمينا وصرنا ملهوفين تسوي نفسها البنت الثقيلة وتهايط حطيته خاتم بأصبعي
وان طنشنا جلست تراكض وراي وبالاخير تتشكى لايهتم فيني وان خليناها بالوسط تصير حياة ممله مجرد علاقه سطحيه زوج وزوجته ^^ هذا الواقع الي اشوفه الا بعض البنات النادرات جداً وان شاء الله انها منهن
بس الاحظ بالبنات بعضهن فيهن تناقض

رد: النقاش بعد الملكة
 

لا ماهي رعب ولا هم يحزنون... هذي ليله استثنائية تبي تخربها بخططك..

شوف.. اول شي الملكه سنه طويله جداا.. هنا اساس المشكله واللي مخليك تفكر بخطط..
انت بتفكيرك.. تبي توازن العلاقه على هالفتره هذي كلهاا و محتار..
لكن اقولك ان كل المعلومات اللي عندك خطأ.. و اعذرني..

مافي حاجه اسمها حطيته خاتم باصبعي.. ومافي ليله رعب.. ومافي شهر عسل متأخر..
كل الاشياء هذي لو تعملها رح تسبب لك مشاكل.. و تزيد الفجوه بينكم..

خلك طبيعي.. وتعامل مع الظروف ايش ما كانت..
ابدا تدريجي.. مكالمات و رسائل.. حب و احترام و مزح و اتكلم بكل شي..
وعش حياتك..
قد ما تعطيهاا ف'رح تاخذ اكثر.. و خلها تشارك بالرأي.. ماهو غلط.
وعن شهر العسل..
ترى مايهما المكان وين وكم صرفت.. انا استغرب منك
يعني تبي تقضيه فنادق و مدن ومشاوير و سواقه تقطع الظهر وبس هاج..

الناس بهالفتره تدور الراحه واستجمام هدوء..

فكر من جديد ..

تحيااااتي **

رد: النقاش بعد الملكة
 

شكلي مثل ماقلت بخليها بجزر المالديف

رد: النقاش بعد الملكة
 

الف مبروك مقدما
وربنا يتمم لك على خير يا رب

انا من راي انت الواجب عليك ان تتواصل معها
وحاول ان تكسر كل الحواجز قبل الفرح بشهر
عشان في شهر العسل تعيشوا احلى ايام العمر
وفي نقطه ماحد منتبه لها من العرائس
اللي هيا لو كنتي مسافر شهر عسل مع زوجك لا تصرفي مهرك كله وتقضي ملابسك كلها من بلدك
حاولي مثلا اذا ميزانيتك لشراء الملابس 10 الاف من الافضل ان تشتري ب 3 الاف والباقي حاولي انك لما تسافري شهر عسل مع زوجك اشتري من هناك يكون افضل عشان ما تكوني ماشيه مع زوجك في المولات ونفسك في حاجات تشتريها وما عندك فلوس وزوجك نفس الوضع يا دوب مدبر فلوس السفريه

وربنا ان شاء الله يسعدكم دنيا واخره

ودمتم في حفظ الرحمن

رد: النقاش بعد الملكة
 

التصنع و المثاليه الي فيك راح تدمرك

عيش بعفويه
حلاه الخطوبه بالاحلام و الخيالات الي فيها
عيشها طول بعرض لا تخرب على نفسك و على البنت
انا كانت خطوبتي سنه و عليها
والوضع عادي جدا ما اعرف لا تاخذ بنصايح شباب متزوجين من سنه نسو الرومنسيه و نسو هم شو كانوا

شهر العسل ما ادري والله بس افضل بعد الزواج باسبوع

رد: النقاش بعد الملكة
 

بالنسبة للرومانسية
هي بتتقنن و تقل تلقائيا بعد الزواج
فلا تقللها و تقننها بداية فلا تكون زوجتك حصلت بلح الشام و لا اي شيء

رد: النقاش بعد الملكة
 

الي يخليها تقل وتنعدم بعد الزواج انكم ماخليتوا شي للزواج كل شي قلتوه بالملكة حتى سبق وسمعت نفس الشي من طارق الحبيب يقول مشكلة المملكين الجدد وخصوصاً الي فترة ملكتهم طويله يطيحيون بالغزل والرومنسية لين الزفاف ثم بعدها مايبقى شي لحياتهم كل شي طرى ببالهم قالوه وفكروا فيه واغلب الناس ماتعرف تفرق بين العشق والحب وقت الملكة ويطيحون بالعشق يعشقها من دون لايعرف عيوبها او يطنش لكن لما يدخل فيها ويرى بعض العيوب ينصدم ويقل او تنعدم مشاعره اما الحب فهو معرفتك بكل عيوب زوجتك ومع ذلك تحبها وتعشقها ويكون هالحب مع العشره لهذا ينصح بفترة الملكة تكون فترة استكشاف من الطرفين لبعض عيوب ومميزات ولامانع بالعاطفه بس يخلون شي يبقى لبعض الزواج مو لاجاء بعد الزواج لاعندنا سوالف ولا شي كل شي قلناه حتى كلمات الحب والغزل اصبحت مجرد كلمات عاديه تعودنا عليها لاتضفي اي تأثير بالمشاعر وهالشي شفته بنفسي ع ارض الواقع وانتن امثله حيه لهذي المسأله وقلتن بنفسك قلت الرومنسية بعد الزواج لأنكن مابقيتوا شي لبعد الزواج عشتوا احلام ورديه وهميه ولذلك انا اختلف معكم ^ وهذي وجهة نظري بكلمها بعفويه بدون مثاليات مزيفه او تغزل مبالغ فيه واترك الحب والعواطف تكون تتدريجيه مع العشرة لأن الحب لاكان مع معرفة عيوب الحبيب وتقبلها يكون قوي مايتزعزع مو ع اي شي تافه تتأثر العواطف بينهم بعدين انا قلت وجهة نظري ولاحظت ردود مندفعه

رد: النقاش بعد الملكة
 

انا الي ابيه بداية زواجي بداية حبنا تبدا عواطفنا تشعلل مو تنتهي بداية الزواج !

رد: النقاش بعد الملكة
 

اول مرة اعرف ان الكلام يخلص و له كمية محدودة و تخلص
لا يا اخي الكريم انت مو فاهم علي. انا ملكتي كانت سنتين و فيها عاطفة
و لازال. أنكا اقصد التقنين لان الاندفاع يتغير و الزوجة تحب الاندفاع و الإحساس
باللهفة لها. شيء طبيعي يقل بعد الزواج و لا يعني هذا عدم وجود الحب الصادق
انا يكون هادئ و متزن. انت تريد من البداية ان تطفئه بحجة الاستمرارية
و تظن ان إبقاءه متقد سيجعله يحترق. نعم اذا كان اندفاع مع إلغاء العقل
لكن بالإمكان ان يكون تعبير جميل و مشتعل للحب. مع استدراك العقل

انا ما ادري وش سالفة اعتقاد ان السواليف تخلص؟؟
الكلام ما يخلص مدام الحياة و (المواقف)جاية
ملكة. شهر عسل. ليلة دخلة. حمل. انتظار ولد. تربية. سفر. بناء بيت
الحياة كلها احداث و ممكن تطعيمها بالحب

رد: النقاش بعد الملكة
 

اولا الف مبروك .. الله يتمم عليكم بالخير ويسعدكم
ثاني شي .. ليه تخطط لحالك لكل شي !
هي وش دورها بالزواج !
خلك عفوي وخذ رقمها منها بيوم الملكه .. ترا شعور حلو للبنت .. وارسل لها بعد ما تطلع منها حسيها انها بدت حياة جديده..
ودخلها بالمود معك خلها تحكي اللي بخاطرها وانت اللي بخاطرك وتتفقون هذي حلات هالفتره تخططون سواء وتتخيلون و تحلمون سواء
عيشها بعفويتها

رد: النقاش بعد الملكة
 

انت قلت تبيها عفوية..

لكن القواعد اللي حاطها هنا لنفسك تتنافى مع العفوية ولا تمت لها بصلة..

على فرض ان الكلام وكل نشاطات الحياة بتخلص وقت الملكة.. واجلت كل شي لما بعدها..

دامها مخلصة مخلصة.. بتخلص الاشياء بعدها بسنة او سنتين..

يعني بعد الزواج بتقعد تجمع سوالف ماتقولها ولاتسويها للعقد اللي بعده عشان ماتخلص عليك؟ مو منطقي!

اقرا رد مسز داني بتمعن

رد: النقاش بعد الملكة
 

مشكورين على النصائح القيمة
اكتفي بهذا القدر ارجوا من الادارة حذف الموضوع

رد: النقاش بعد الملكة
 

اخر نصيحة قبل اغلاق الموضوع

تعامل مع الحب كشعلة نار

كل ما شعرت ان حبكم بدأ يرمد اضف قطعة من الحطب ليشتعل مره اخرى وينير حياتك

هدية جميلة - ليلة رومانسية بفندق - عشاء رومانسي - ليلة منزلية وغزل وهدية معبره

والله يديم افراحكم