|
هل ينسئ زوجي تغيري للافضل مقابل خطاء بسيط
السلام عليكم و رحمة الله
شلونكم ؟ هالمرة ولله الحمد ، مو جايتكم بمشاكل مع زوجي ، الفضل لله ثم لكم... وإنما جيت لسببين :- الأول : واجب علي اشكركم ومن أعماق قلبي على اللي قدمتوه لي ، وما اطلع من يزاكم .. احب اطمنكم ، حياتي ولله الحمد تمشي نحو الاستقرار ... فيه مشاكل ؟ اكيد اي ، ما فيه بيت يخلو ، وكانوا لما يقولون فيه مشاكل لذيذة ما اصدقهم ، بس فعلا صرت امر ببعض المشاكل اللذيذة ذات نهاية سعيدة الحمدلله.... فالشكر لله ثم لكم ❤️ الثاني : فيه سؤال محيرني احب اوجهه لأخواني الرجال على وجه التخصيص لا الحصر واوجهه لأخواتي البنات عموماً هل زوجي ينسى ؟! الحمدلله في علاقتنا انجزنا الكثير ، الرجال تغير للأفضل ، وآنه بعد تغيرت للأفضل.... لكن ، لما نكون بلحظة صفاء أحياناً يقول لي : انتي صرتي وايد احسن بس ساعات تنتكسين طبعاً تتسائلون شلون ... آنه اقول لكم شلون مثلاً : من زمان ما اتصلت فيه قلت له تعال متضايقة 😁😂 على اساس انه فوزية الدريع يا عيوني... المهم ، بس الجمعة قبل لا يروح المسجد كان طالع يجيب لي شغلة اتصلت به قلت له : حبيبي لا تطول اذا تقدر ابيك شوي حسيته تنرفز بس مسك نفسه قال لي : حبيبتي مو خلصنا من هالسالفة ؟ سابقا كنت اقول له : شدعوة كلها خمس دقايق ابيك شوي ... واغني له موال عتبانه عليك لحد ما يعصب وانه اعصب ويقول لي الاسطوانة : انه ابي اطلقج جننتيني ... اللي صار قلت له : اوكي حبيبي مو مشكلة ، المعذرة المثال اعلاه يوضح لكم قصده ب " تنتكسين " الغريب ان ليش ما يشوف تغير ردة فعلي عند رفضه ؟ ليش يقول ان انتسكت من موقف واحد ؟ مو حابه اسأله بنفسي ، لأن اعرف ما باخذ منه جواب فما ابي اخسر مخزون كلماتي في موضوع عقيم... فقلت ما لي من بعد ربي الا انتو * استشارة هامشية : ام عياله لازالت تأذيني وتقط علي كلام جارح ... طفرتني شسوي معاها؟!! تم تعديل العنوان ليتناسب مع المضمون |
رد: اخواني الرجال : فسروا لي موقف زوجي!
من رايي ماعاد تطلبين منه نهائيا يجيك
ان جا من نفسه حياه وان راح الله يحفظه هذا شي يريحه وترجع النتيجه لك بيريحك نفسيا بسبب راحته وحرمته دافعي عن نفسك لاتنتظرينه يدافع عنك كانك طفله ولاحتى تردين له خبر ولاتعلمينه وان درا وقالك ليش ماقلتي لي قولي ماابي ازعجك وانت مشغول بمافيه الكفايه وانا افضل ادافع عن نفسي من غير ماازعجك معي وبس خليك واثقه وتكلمي بثبات وبطريقه توحي له ان ماسويت الا الصح الله يوفقك ويرزقك بالذريه الصالحه |
رد: اخواني الرجال : فسروا لي موقف زوجي!
اقتباس:
الجمعة كان يومي وهو كان معاي وطلع بيجيب الغرض ومبرج روحه ان بيحط الغرض وبيطلع المسجد مبچر وحتى لو فرضاً مو يومي ولا معاي بكل الاحوال تضايقه الكلمة بس جبت الموقف على سبيل المثال واساسا من فترة طوياة تركت هالحركة بس كنت الي اقول له شيء ومتضايقه من الشيء وابيه يعرفه فطلبت منه ان يعجل في موضوع الغرض عشان يمدي اكلمه قبل الصلاة جبت الموقف على سبيل المثال والتعداد لا على سبيل الحصر فسؤالي : معقولة كلمة وحده ومن زمان ما صار .. يقول عني انتكست ويغفل جميع الاشياء ؟ شنو التفسير ؟!!!! اما بخصوص زوجته شلون اوقفها عند حدها ؟ ابي طريقة .. طقت چبدي والله |
رد: اخواني الرجال : فسروا لي موقف زوجي!
طيب كيف تأذيك؟!
الافضل ما تتقابلون مع بعض ولا تحتكين فيها تجنبا للمشاكل |
رد: اخواني الرجال : فسروا لي موقف زوجي!
زين هو عارف انك تغيرتي لكن يبغى يحطمك عشان تتوبي ماتعيدها فهمتي؟؟؟
انا خبرة بالرجال 😂 اما زوجة زوجك ردي عليها ماعندك لسان سبيها زي ماتسبك حتى توقف عند حدها |
رد: اخواني الرجال : فسروا لي موقف زوجي!
المسألة يبيلها وقت عشان تثبت الصفة الجديدة في مخه وتتمحي القديم
وحلو انك تذكريه بالجانب الايجابي كلما قال لك :(انتكستي؟!) وتقولي له مر اسبوع او اسبوعين من غير مااطلبك اما بخصوص زوجته الاولى فياريت تذكري الموقف |
رد: اخواني الرجال : فسروا لي موقف زوجي!
وعليكم السلام ورحمة الله وبركاته
زين ما فيه احد ينسى او تنمسح المواقف من ذهنه تماما ، لكن .. يقدر يتعامل معاها بشكل مختلف اذا تغيرت الصورة الذهنيه عنده .. بالنسبة لزوجك اعتقد انه مثالي شويتين زيادة عن اللزوم ، لكنه بدأ يتعامل بمرونه لما تغيرتي انتِ .. والمواقف السابقة ارتبطت عنده ارتباط شرطي سئ ، يمكن تشوفينها مواقف عادية جدا بين الزوجين ،لكن عصبيته وحدة انفعاله تخلي ردة فعله قوية شوية..ولما تغيرت افعالك في هذي المواقف تغير هو .. والدليل انك حسيتيه تنرفز بس ما عصب وانفعل مثل قبل .. وهذا مؤشر جيد انك تقدرين تأثرين عليه بالإيحاءات الايجابية بأفعالك وبتشوفين انه يتغير ويتفاعل معاك للافضل ان شاء الله.. بالنسبة انه يقولك احيانا تنتكسين ,, بصراحة ما اشوفه نقد سلبي وسيئ ابدا هي رسالة منه .. انا مبسوط وفرحان فيك بالتغير الجميل ، بس فيه أشياء ما تسوى تخرب هذا الجمال ..لكن خلينا نقول خانه التعبير .. لا تدققيين كثير على كلامه واستمتعي بالمدح الايجابي وركزي عليه.. ولا تنسين لفتره مو بسيطة كان يركز على السلبيات ويضخمها ومو شايف الا هي انتِ الآن خلي رصيدك يمتلئ بالتصرفات الايجابية بدون ما تلفتينه او تذكرينه بها خليه هو يلاحظ من نفسه ومع الوقت ما راح يتذكر الانتكاسة ابدا.. اما بخصوص ام عياله تجااااااااااهلي يا زين واقطعي اي تواصل معاها لا تردين عليها ولا تشوفين رسايلها احذفي رقمها وارتاحي وسكتي اي احد يوصَل لك كلامها .. اذا تسمعين صوتها في البيت طنشي وسدي آذانك بقطن ،أو حطي سماعات الجوال وشغلي اي شي عالي ولوحصلت منها تجاوزات كبيرة ما ينسكت عنها كلمي زوجك بهدوء ولطف بدون عصبية يحط حد ..عشان ما يضطرك لتصرف غصباً عنك ،يزعله وما يعجبه ويلومك عليه.. |
رد: اخواني الرجال : فسروا لي موقف زوجي!
زين.. تقولين الموقف من رمان ما صار. من زمان يعني من متى بالضبط؟ .. أسبوعين ثلاثة؟ .. شهر شهرين؟ .. هذي ما تنحسب فترة طويلة. تكرار التصرف بعد فترة قصيرة نسبياً يخلي زوجج يفكر إن تغيرج لا يزال مؤقت .. عشان جذي هو مضطر يذكّرج عشان تنتبهين .. وما ترجع حليمة لسوالفها. امسكي نفسج سنة .. وعقب اعترضي لو اتهمج بالانتكاسة. gnn بخصوص زوجته .. إنتي من البداية مترفعة عن الرد عليها .. ورايي إنج تستمرين على ترفعج .. إلا إذا تصرفت تصرف جايد وغير معتاد وما ينسكت عليه .. ساعتها زوجج هو اللي المفروض يوقفها عند حدها. لأنج لو إنتي اللي رديتي فالموضوع بيصير سوالف حريم هي ترد شوي وانتي شوي .. لكن تدخل زوجج بينهي هالحركات تماماً. |
رد: اخواني الرجال : فسروا لي موقف زوجي!
ليش بتسكتيلها ع فكرة الرجال ما بحب المرة الضعيفة الي ما بتعرف تاخز حقا بايدها
خليكي قوية و ان حكت معك كلمة ردي عليها بعشرة كوني مستقلة و لا تنتظري المعونة من احد و لا تسنحي لخدا يغلط عليكي بما انك على حق لا يهمك حدا المسلم القوي خير و احب الى الله من المسلم الضعيف |
رد: اخواني الرجال : فسروا لي موقف زوجي!
اقتباس:
اقتباس:
وآنه مقتنعة ان انه انسان لي حدود وقدرات ومو مثالية ، بس اقدر اطور نفسي بإستمرار! اقتباس:
وان مو مقتنعة وان اسوي الشيء عشان اوريه هو يبي يشوف بنفسسسه!! # ام عياله ما اشوفها ولا تشوفني # ما اقدر ارد عليها بسب أو شيء من هالقبيل ، مو شيء اقدر اسويه الامر فوق طاقتي ، احس إن آنه مو متربيه ، وإن آنه ما مثلت اهلي التمثيل الصحيح اللي تربيت عليه .... كل ما اقول راح ارد عليها اتذكر كلام ابوي قبل لا اطلع من بيته لبيت زوجي قال لي ... اذا احسنتي التصرف بيقولون ونعم التربية ، اذا غلطتي بيقولون ابوها ما عرف يربيها ، وانه اثقق انج بتكونين ذات خُلق ومبادئ فلا تخذليني... لو سبيتها و رديت عليها بالمثل راح اكون نسخة منها! ابي اوقفها عند حدها دون سب وتراشق بالكلام! # الموقف أو عدة المواقف المتشابهة :- 1- سبق واتصلت فيني وما اعرف رقمها ، وظلت تغلط وان انه ام السحور والطبوب وان شايفتني اكتكت ماي تحت جنب بارك سيارتي وسيارة زوجي ... وسب +18 2- انه لي باب خاص ، وهي باب خاص ، بس نشترك في المدخل والمخرج ، فتجي عند بابي وتفتحه وتتكلم بكلام مُهين... اللي صار أمس يا طويل العمر آنه نازلة بأمان الله رايحة بيت اهلي شفت ولدها الصغير واقف جنب بابي ولما شافني ركض وقال : يممممممه كاهي يت / الترجمة : يمه كاهي جت وفجأة اسمع صوت ضحكة رنااااانه ، وتبتدي الكلام بصوت عالي ، كلام مهين عني وان هي احسن مني ، وعلى شنو تزوجني ، وان فيه اللي احلى مني ، واشفق علي لأني مطلقة ( على اساس ان زوجي وزارة الشؤون الاجتماعية gfg ) ، وان انه عجوز ( مع ان انه اصغر منها تقريبا ب 10 سنوات ) .. ومن هالكلام اللطيف بس ابي اعرف شلون اوقفها عند حدها دون ان اتنازل عن اخلاقي |
رد: اخواني الرجال : فسروا لي موقف زوجي!
اقتباس:
ما عندي وياها اي تواصل ... بس يحز بخاطري ان احد يهيني ومو عارفه شسوي... لو باجر اللهرزقني بعيال وشافوها تتعدى علي ..!! حتى هم بيتجرؤن علي اقتباس:
لكن ، معقولة ببقى سنة كاملة ما اغلط ؟! هو حتى قبل لا يعرف ليش قلت له تعال حسيته متنرفز! مو معقولة سنة ما اغلط .. ما اعرف شالحل !!!!! ابي اوصل بحياتي لمنطقة هادئة جداً .. وتكون نفوسنا فيها صافة جداً قلت له لازم ما تشوف اغلاطي بعدسة مكبرة شوف الجانب الايجابي الحلو! الامر جداً مضايقني مهره فعلاً ولازلت عند خيار الترفع عنها... لكن ، ابيها توقف عند حدها ابي طريقة مناسبة! اقتباس:
راح يفلت لساني واكون قليلة أدب.. افكر اقول لزوجي يخليني اقابلها واكلمها بالحسنى وانصحها واذا ما ارتدعت اشوف خطوة أخرى ! صار الامر مزعج جداً وما ابي الجأ لخيار ان ارد عليها بنفس كلامها وخايفة فعلا انجر حق هالمرحلة لاني بدأت افقد اعصابي |
رد: اخواني الرجال : فسروا لي موقف زوجي!
تفسيري له
ان اكثر صفه اتعبته فيكي إلتصاقك الزائد وان اي كلمة دلاليه لتكثيف علاقتك به تستفز صبره وتحمله محتاج وقت طويييييل يشوفك متباعده عنه حتى يشتاق لك وتوصلوا للتوازن انتو ثنتينكم. يعني محتاجة تصبري ع الوضع الجديد لحتى يرسخ عندك ويشعر به تماماً وتهدأ نفسيته تجاهك وتصير ماتستفزه مثل هذي العبارات حتى لو انها نااادرة |
رد: اخواني الرجال : فسروا لي موقف زوجي!
الامر عادي .. وبتنتكسين فأنت مو ملاك ..
الا اذا انتفى السبب.. وهو لا زال باقي (: اقتباس:
بعدها بتحرم ! |
رد: اخواني الرجال : فسروا لي موقف زوجي!
اقتباس:
شنو السبب اللي لازال باقي ؟ ☺️ عندي لها 4 تسجيلات .. شلون اسمعها وسبق وهددتها ان الكاميرا تسجل قالت عادددددي |
رد: هل ينسئ زوجي تغيري للافضل مقابل خطاء بسيط
ههههههه حرمة زوجك غيرااانه
ماعليك منها مادام زوجك ماينجر لها ولكلامها اللي مافيه ادب ولااخلاق بالنسبه لي اشوف انك لو جاريتيها بتتعبييين اهم شي زوجك مو مأثر فيه يعاملك تمام.. إذا خلاص الحمدلله اما هي قولي بنفسك حسبي الله ونعم الوكيل كرريها وبس وان جا يوم وزوجك سمع صوتها ماراح يسكت لها مو زوجك يحب المثاليه ويبغاك للأفضل اكيد يعاملها بنفس الشي ماراح يقبل حرمه المصون ماعندها اخلاق!!!! |
رد: هل ينسئ زوجي تغيري للافضل مقابل خطاء بسيط
للأسف اللي صار مع ان عياله أثر في نفسيتي وايد
امس واليوم اشعر بإكتئاب فضيع.... اسوأ شعور تحس ان فيه من يتجرأ عليك وانت ما عندك حل توقفه به عند حده نفسيتي جداً سيئة .. اكره شعور ان احد يحاول يهيني الامر يقتلني |
رد: هل ينسئ زوجي تغيري للافضل مقابل خطاء بسيط
اقتباس:
|
رد: هل ينسئ زوجي تغيري للافضل مقابل خطاء بسيط
اقتباس:
انسي وجودها.. وانتبهي لاتسجليها ابدا... حاولي تدوري وظيفة.. وانشغلي بعالم ايجابي جديد.. |
رد: اخواني الرجال : فسروا لي موقف زوجي!
اقتباس:
كل إنسان يخاف من افعاله الغير مسؤوله .. ويخاف ينفصح بها .. ويحاول يداريها بقدر ما يستطيع طيب ؛ زوجك ايش موقفه منها في مثل هالحاله وكيف تعامله معها ؟! |
رد: هل ينسئ زوجي تغيري للافضل مقابل خطاء بسيط
الغلط مو منش زين الغلط من زوجش الي عارف وما حل المشكله وخلها تتمادى ... تفاهمي معاه وقولي له اليوم اقدر اتماسك
وما افقد اعصابي لكن باكر الله اعلم شو بيصير ... ممكن نشد شعور بعض ونتطاول على بعض يرضيك هالحل !! |
رد: هل ينسئ زوجي تغيري للافضل مقابل خطاء بسيط
اقتباس:
لحد الآن الحمدلله النتائج مرضية .. ان شاء الله بتوفيق من الله ودعائكم تستمر جذي fffsg اقتباس:
بالعكس مو مقصر معاي يحاول يهديني ومو ساكت لها ... بس هي محد قادر لها! اقتباس:
اقتباس:
والكاميرات هم تسجل... هم اللي ما ودها تنساني ... الظاهر وايد عجبتها gfg عالمي حالياً حلو ، واحياناً يمشي الحال ، وفي لحظات نادرة اتملل والوظيفة ،، ولا في الاحلامممم hgh |
رد: هل ينسئ زوجي تغيري للافضل مقابل خطاء بسيط
اقتباس:
اقتباس:
ساعات افكر اتهور وادل طريج مركز الشرطة ، وعندي ليسن محاماة واقدر اشتغل عليها بقضية لكن مو تصرف عقلائي .. هي يختي لو هامها ومو عادي عندها جان ارتدعت!!! حبايبي كوكي وشقردية قبل لا تغلط علي هالمرة ، في المرة اللي قبلها لما دقت علي وظلت تغلط وتسب وتقذف صارت بينها وبين زوجي مشكلة كبيرة واتصل في اخوانها يجون ياخذونها وفعلاً حضروا و رفضوا ياخذونها وهي لمت اغراضها لان زوجي طردها ، وخذاها ووداها بيت اخوها ، بس رجعت من نفسها وقال لها يا تعتذرين منها " مني يعني " أو بتخذ معاج اجراءات وصارت مشكلة غيرها هم كبيرة وقالت له ما بعتذر قال لها خير... صار لهم حوالي شهرين أو أكثر ، ما يبات في غرفتها ينام مع عياله واذا بيقعد ما يقعد بغرفة الجلوس لانها احيانا تكون متواجدة هناك ياخذ عياله ويقعد معاهم بالمكتب او بغرفتهم ( بس هالشيء ما له أثر عندها ، كونها متعودة لأنهم منفصلين في غرف النوم بياخذ لهم حوالي 6 سنوات ) ما يكلمها إلا اذا هي بغت اغراض حق البيت او يخبرها ان بياخذ العيال يوديهم المسجد الظهر يتغدى وينزل مكتبه ينام حاط له سرير بناته يقولون لي .. جذي احسن ارتحنا من سماع مشاكلهم وصراخهم! gfg اللي قاهرني زيادة ان قبل جم يوم - انه من اول ما تزوجت خليت حق بناته غرفة عندي يدرسون فيها - لان اذا يدرسون في قسمهم امهم كل 5 دقياق تناديهم وما تخليهم يدرسون.... امهم قالت حق بناتها خلو بنت خالتكم تشوف الغرفة .. البنات استأذنوا مني ووافقت دخلت بنت خالتهم ( في عمري تقريباً ) تخيلو انا واقفة ما سلمت علي ، واسمعها بعدين على الدرج تقول لهم : ابوكم ما يستحي ، متزوج وحده من عمري ، وواضح ان ما عنده ذوق بس هذي بردت حرتي فيها .. قلت لها عيب عليج جايه بيتي احترمي نفسج او عطينا مقفاج .. الحمدلله ان زوجي كان على وصول قال لها ما ابي اشوفج في بيتي مرة ثانية لاعت جبدي من حركاتهم والله |
رد: هل ينسئ زوجي تغيري للافضل مقابل خطاء بسيط
بصراحة يا زين مب شايفة إن طلب الاعتذار مناسب. فاهمة طبعاً إن زوجج يبا ياخذ حقج .. لكن الهدف الأساسي المفروض يكون إنهاء هالمهزلة .. مب إذلال زوجته. أبداً ما أقول إن تصرفاتها صحيحة .. لكن في النهاية هي تتصرف بدافع غيرة وقهر .. ونفسها مشحونة عليج .. فمب معقول نضغط زيادة ونقول: لازم تعتذرين .. ونتوقع إنها بترضخ. طبيعي بترفض الاعتذار. |
رد: هل ينسئ زوجي تغيري للافضل مقابل خطاء بسيط
اقتباس:
لازم توقف عند حدها.. الطيب ما نفع معاها هدايا وعطيت قلت يمكن تكف اذاها عني وترجعهم تقطهم علي.. غير الاعتذار شنو الحل المناسب ؟ كلمها بالطيب اخوانها كلموها هدايا عطيتها في عيد الام شاريه لها هدية .. وينردون علي زوجي هاوشها وهم ما وقفت |
رد: هل ينسئ زوجي تغيري للافضل مقابل خطاء بسيط
زين .. أنا ما قلت إنج ما تستحقين الاعتذار .. ولا قلت إن تصرفاتها ما تستلزم الاعتذار. أنا أقول إن كمية المشاعر السلبية اللي داخلها أو حتى الأخلاق الشينة اللي فيها ما راح يسهّل عليكم هالطلب. بعدين زوجج هاوشها وما اصطلبت .. كيف متوقعين تسمع الكلام وتعتذر؟!!!! يمكن صار ضروري تفكرون في سكنج بعيد عنها. |
رد: هل ينسئ زوجي تغيري للافضل مقابل خطاء بسيط
انتي باقي على موال تعال ابيك شوي!!!
صدقيني هذي الحركه تنرفز اللي ما يتنرفز عندك شي قوليله وهو عندك او اجليه لين يجيك اما تعال ابيك شوي هذا استخفاف وكانه ياهل تتحكمين فيه يا اختي اما زوجته دام وصلتها للقذف وما وقفتيها عند حدها طبيعي بتتمادى وتتمادى من فرعنك يا فرعون ما تبي تعتذر ولا تخاف من احد ؟؟ القانون والحكومه تخليها تعتذر وتخاف من ظلك يوم تشوفه |
| الساعة الآن 08:27 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©