|
تدخلات والد زوجتي بحياتي وتحريضها علي
السلام عليكم
باختصار، والد زوجتي يتدخل الله يهديه. الحمدلله انا وضعي كويس وراتبي زين وموفرين سكن لحالنا وعندنا 3 ابناء. بالبدايه عمي كان يزن علي اني استجار فله له جمبهم وانت رفضت بحكم ان اهلي اولى منهم اني اسكن جمبهم. جلس فتره طويله يزن علي الى ان قلت له مره الدعوه غصب قال لا وبعدها تأجرت الفله وسكت. بعدين صار يقولنا بشتري لكم فله قريبه منا وانا هم بعد رفضت لاني بصراحه ما احب احد يشتري لي شي احب اقوم بنفسي علشان مايجي يوم من الايام واحديمن علي اضافة اني ما ابغى اسكن في بيت ملك لزوجتي علشان مايجي يوم نزعل وتطردني كما صار مع ناس كثير اعرفهم. الام عمي يبغى يشتري لها فله ومن حقه ولا الومه، الرجال يبي يأمن مستقبل بنته وقال اسكنو فيها وادفع لي ايجار ورفضت وبدت سلسله الزن مره اخرى. هو من جهه وزوجتي من جهه. وقد قالها لي من قبل بنتي ماتطلع من عندي (هالكلام بعد زواجنا بكم سنه) و وقتها سكت. قبل كم شهر دخلت اسلم عليه وجلسنا نسولف ومع الكلام قلت له اني جالس ادور سكن عند اهلي واني لقيت فله بستاجرها و وريتها زوجتي بس ماعجبها قالي بنتي ماتطلع على مكان ماتبيه قمت رديت عليه والله عاد اذا بنتك جتك وقتها وقالت لك ما ابي ارجع عنده ذيك الساعه خلها عندك وصار بيننا حساسيه وطلعت. يوم وصلت الباب انبني ضميري ورجعت اعتذر له وقلت له بهداوه ياعمي تراك جالس تدخل بحياتنا وانا مايعجبني هالشي وبدا النقاش الحار مره ثانيه وانا طلعت لاني خفت اني اقول كلام كبير جارح. بعدها بكم يوم صار تتش بينيوبين زوجتي وسألتها انتي احد معبي راسك علي؟ شفيك وقالت مافي احد وقلت لها عموما ترا تدخل ابوك في حياتنا مايعجبني. قالت هو مايتدخل قلت قد قالي بنتي ماتطلع من عندي ورديت علي لا قالك ماتطلع على مكان ماتبيه مما اكد لي ان ابوها قالها على النقاش الس صار بيني وبينه الاخير وفجاة انقلبت بركان وقالت ابوي يدور مصلحتنا ومن هالكلام قلت انتهى النقاش كلمه وقلتها لك. ابوك ماتعجبني تدخلاته. وقتها واقفين عند بيت اهلها وقالت اجل انزل الان وقل لابوي انك ماتبيني قلت ماني نازل ادخلي جيبي العيال علشان نروح للبيت قالت ماني راجعه وجت بتنزل قلت لها تعالي معي ولا ترا والله ما ارجع قالت بسلامتك ومشيت وخليتها. وصلت للبيت ولقيتها وشكلها مغصوبه على الرجعه ونمت. اليوم الثاني لقيت منها رساله طوييييله عريضه كاتبه فيه ان ابوي يتعب ويدور مصلحتنا ويعبي ثلاجتنا اكل (مع اني قايلها من قبل ان حركه تجيبين اكل من بيت اهلك ابدا ماتعجبني) وان اهلك مايسألون عنا ومن هالكلام وياليت بعد الدوام تمر ابوي وتتفاهم معه. مسحت الرساله لاني ما ابي ارجع اقراها وانحرق زياده. رجعت من الدوام ولقيتهم موجودين ومادريت والا سواق اهلها جا واخذها هي وعيالي الثلاث وراحو على بيت اهلها. بالله وش رايكم؟ الي احسه ان ابوها يعبي راسها بالكلام وانا ادري ان الرجال يبي مصلحة بنته بس انا وين رحت؟ الحمدلله انا قايم بالبيت ولا احتجت لأي احد وهي عارفه هالشي. والان صار لها هي وعيالي شهرين عند اهلها ولا بيننا اي تواصل. ما رأيكم؟ علما بأن سبق وغلطت عليها وراحت لاهلها وانا الي اعتذرت لها ورجعتها للبيت. من جد سي يغبن اني اتعب واكرف علشان بيتي ويجون اهلها ويقولون بنشتري لكم بيت. طيب ليش زوجتوني بنتكم؟ وبصراحه الان عايفها لان بعد كل جهدي هذا ترسلي كلام وتمن علي بقوله ابوي الي يعبي ثلاجتنا مع اني ماكنت ادري. العائله هذي والنعم فيهم لكن ما ادري وش اسوي بعمي.وللعلم سبق ان اختها الكبيره ابوها شرا لهم بيت والان زوجها مطرود منه. وبعد الولاده الاولى صارت تكثر المشاكل بيني وبين زوجتي ولاعاد تهتم فيني. تخيلو صار لي سنتين اغسل ملابسي بنفسي لان ماعاد شفت اية اهتمام منها. لا بالملابس والاكل يمكن مره بالاسبوع وبالفراش يمكن مره بالشهر. من جد تعبت والحركه الاخيره هذي هي الي على قولتهم طيحت الجمل وخلتني ما اسال عنهم. ما رأيكم؟؟ تم تعديل العنوان ليتناسب مع المضمون |
رد: والد زوجتي يتدخل
عفوا لم اقصد يكلمه عايفها اني ما ابيها ولكن قصدي اني مليت من هالحياه معها، لا احترام ولا تقدير وان كملنا على هالحال بتكثر المشاكل وبيتم الطلاق والي بيروحون فيها العيال
|
رد: تدخلات والد زوجتي بحياتي وتحريضها علي
ينقل الئ قسم المتزوجين
حيث مكانه الانسب |
رد: تدخلات والد زوجتي بحياتي وتحريضها علي
كم عمر زوجتك؟
|
رد: تدخلات والد زوجتي بحياتي وتحريضها علي
ماجربت ابوك او احد حكيم من اهلك يتدخل وينصف الموضوع ؟؟
|
رد: تدخلات والد زوجتي بحياتي وتحريضها علي
اخوي الكريم
اسمحلي انت غلطان ببعض الامور طالما انك ماتبيه يتدخل لاتفتح معه مواضيع وتاخذ رايه وبعدين تزعل تجيب سيرة البيت وانك تدور بيت وبكذا انت عطيته الـ اوك انه يتدخل ويعرض عليك اللي عرضه ثانياً المفروض انك تتجنب الاحتكاك فيه يعني اذا شفته سلم واضحك واطلع واذا انه جاب سيرة البيت فهمه انك قادر على دفع الايجار وعلى مصاريف بيتك بطريقه زينه |
رد: تدخلات والد زوجتي بحياتي وتحريضها علي
اشوف عمك ماقصر معك وبدل ماتشكره تغلط عليه بالكلام ترى قليل تلقى مثله
هذا عمك والمفروض تحترمه وبالنسبة لعرضه تقدر ترفض بدون ماتجرحه |
رد: تدخلات والد زوجتي بحياتي وتحريضها علي
’’
وانت هداك الله ليش تبي تسكن قرب اهلك ؟ يا أخي جزى الله عمك خير الرجال يبي مصلحتكم اثنيناتكم ووده انك توافق بطيبة نفس قال لك الدعوه ماهي غصب وهذا يدل على انه يحترمك بس وده بنته تكون بجنبه بعد هو قال لك ادفع انت الأجار يعني مو متمنن عليك سكنك بجنب اهلك مو ضروري انت رجال تقدر تروح وتجي على اهلك كل يوم بس زوجتك ماتقدر محتاجه تكون جنب اهلها واصلا هذا الشي راح يريحك انت بالاول وافق على عرض عمك وشوف ... ليش تحط في بالك احتمال السوء ؟ لنفترض انهم طردوك بيضل أطفالك بأمان مع أمهم في بيت ملك لأمهم وانت رجال تقدر تدبر نفسك هذا لو افترضنا سوء الظن لكن باذن الله مابيصير الا كل خير ,, |
رد: تدخلات والد زوجتي بحياتي وتحريضها علي
الله يفرج همك ويصلح حالكم
|
رد: تدخلات والد زوجتي بحياتي وتحريضها علي
حد يحصل له بيت ملك و يرفض
قوله موافق بس بنكتب البيت باسمي و اسم زوجتي وادفع ايجار كم سنة |
رد: تدخلات والد زوجتي بحياتي وتحريضها علي
باختصار ذكرت انك سبق وغلطت عليها زوجتك ماتحسن بالامان معاك لاسباب انت اعرف بها مننا وابوها اتوقع بعد غلطك عليها ماصار يامن لك حسسها بالامان وانك سند لها مهما صار وماتجرحها باي شكل
|
رد: تدخلات والد زوجتي بحياتي وتحريضها علي
في البداية دام ان عمك اخذ بنته من دون مشورتك ولا استأذن منك وفي نفس الوقت بنته وافقت فهنا لديك حجه عليهم بالنسبه لي لوكنت مكانك كنت رحت اخذت اولادي وتركت بنتهم ومصيرها ترجع
ولاكن بحكم انك كنت تتهاون معى عمك وزوجتك ومافرضت شخصيتك عليهم من البدايه فيستحسن انك تروح منزل عمك وتجمعهم وتحطهم بين خيارين 1-يعطوك زوجتك واولادك وانت المسؤل عنهم مثل ماجرت العاده بين المتزوجين وعمك يعتبر المرجع في حال وجود اشكال 2-يسكنو زوجتك اين ماارادو ولاكن مانت مجبور تسكن معها يعني متى ماودك تجي عندها جيت بالنسبة للشرط الثاني ليس المقصود منه الموافقه على تسلط عمك ولاكن المقصود منه غاية راح تفيدك وتكون بصالحك ان تم الاتفاق والموافقه عليه |
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
اقتباس:
اما ليش احط في بالي السوء هو لان مثل ماذكرت ان عمي شرا بيت لبنته الكبيره والان طارده زوجها من البيت. لا سمح الله صار لي كذا وين اروح؟ انا بعد ابي اامن مستقبلي ولا ابي اكون تحت رحمة زوجتي. |
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
يا اخي ايش اللي يخلي زوجتك تجيب الاكل من بيت اهلها؟؟!؟!
|
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
اقتباس:
انا معك 100% انك ماتقبل عرض ابوها انه يشتري لكم بيت ومعك 1000000% انك لازم تصير حول اهلك طالما ان والديك ماعندهم م يخدمهم بارك الله فيك لكن انت اللي عليك الحين انك تاخذ ابوك لعمك وتروحون وتتفاهمون على كل شي بكل هدوء وانتبه لا تستفز لازم تمسك اعصابك مهما كان رده ولازم يفهم عمك انك لايمكن تقبل انك تسكن ببيت زوجتك او انها تصرف على البيت وانك قادر على دفع الايجار حتى ربي يوسعها عليك وتمتلك بيت وخل الوالد هو اللي يتكلم لان واضح انك عصبي |
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
الله يهديكم لبعض زوجتك طبيعي تتاثر هذا ابوها وكمان مدلعها وش تبغاها تسوي الحل الان بما ان بينكم اطفال المكابر بينكم خففوه شوي ولا سمح الله لو تطلقتوا فانتم بتظلمون اطفالكم والعتب على الاعقل في حل الامور ،،،،،،،، اولا ثلاجتكم فللها اول باول وقولها اي شيء تبغينه وبخاطرك لك وللعيال بس قولي لي تبشرين هنا قفلت باب يسير حتى لو جابت من عنداهلها هيا حره لانك منت مقصر ،،،،،،،،، النقطه الثانيه زوجتك تتاثر كثير بابوها كونه مدلعها اصلا وابوها ،،، ولو حصل الطلاق بسبب قله عقل واحد منكم حيضيعوون العيال ولا تقول ماني مقصر معهم حتى لو سويت لهم كل شيء مافي زيالعيال لادخل الواحد منهم البيت لقى امه وابوه وفكر بعد زمن عشره عشرين سنه ،،،،الان خلك الاعقل والمتحكم بالامور وبذكاء روح جيب زوجتك وعيالك ورجعهم البيت وهدي الوضع كم يوووم وبعدين امسك زوجتك بهدوء وقولها انا للحين شاريك وترا خروجك من البيت شيء كبير عند ربنا انا لاضربتكم ولا شتمتك ولا اساءت عشرتك ليه تشتتين اسرتك الله يطول باعمار والدينا لكن ابوي وابوك وامي وامك مصيرهم بيروحون يوم من الدنيا ،،،،، ومايبقى للوحده غير زوجها وبيتها وعياله فكري بعقل اش حتستفيدين وفهمها بحزم انك مو كل مره بتسلم الجره وللصبر حدود انا صح شاريك لكن من باعني يجبرني ابيعه بيتك لاعاد تخرجين منه وخروج الحرمه من بيتها دون سبب معناته بايعه زوجها انتبهي ،،، وبعدين فمهما انو من قوه شخصيتك وحسن تدبيرك للامور محد يعرف حرف من الي يدور ببيتك دخول الناس بيننا يسبب مشاكل ويضيع العيال ،،، ربي ييسر امرك
|
رد: تدخلات والد زوجتي بحياتي وتحريضها علي
كلام الاخت ( وكيلي الله) درر الله يرضى عليك.
ولا تلوم بنت بأبوها أو اب ببنته والباقي مقدور عليه. زوجتك تحتاج منك الحب بكل ماتعنيه كلمة حب ياشيخ الزوجه اذا كانت مرتاحه ومستانسه ببيت زوجها تكنسل روحتها لأهلها وماتروح لهم كثير انت لاتصير تشتكي وتهاوش على كل شي. كل شي بالتفاهم والصبر ولو تحسسها بحبك لها واهتمامك بتترك الدنيا عشانك إلا بحالة انها تكرهك هذا شي ثاني الله يصلح حالكم. |
رد: تدخلات والد زوجتي بحياتي وتحريضها علي
اقتباس:
ومثل ماقلت لك سابقا انتبه انك تستفز وتعصب وخلي الوالد هو اللي يتكلم بعد ماتشرح له الموضوع بالكامل |
رد: تدخلات والد زوجتي بحياتي وتحريضها علي
مدري كيف اشرح لك مكانة الاب في قلب ابنته
نصيحة لا تحاول تتصادم مع اي فتاة عشان ابوها طول ما انت عايش لو طالت المدة كبرت الفجوة ابحث عن حل للمشكلة الاساسية يصمن لك راحة طول عمرك |
رد: تدخلات والد زوجتي بحياتي وتحريضها علي
مرحباً أخي
ممكن تذكر... هل أنت مقصر عليها مثلاً بالمصروف أو إحتياجات البيت الأساسية أو فساتين السهرة أو غير ذلك ..؟؟ هل تذكر لك بعض المقارانات عن حياتها معك وحياتها في بيت أهلها من ناحية الرفاهية وتلبية الطلبات.. ؟؟ سأقول رأيي بعد جوابك بارك الله فيك |
رد: تدخلات والد زوجتي بحياتي وتحريضها علي
اقتباس:
|
رد: تدخلات والد زوجتي بحياتي وتحريضها علي
اقتباس:
وبالنسبه للمقارنات ياما قارنت بين حياتها الان وحياتها عند ابوها كلام مثل كانت عندنا شغالات وسواقين وابوي ماد قصر علينا ومن هالكلام |
رد: تدخلات والد زوجتي بحياتي وتحريضها علي
الله يفرج همك ويصلح زوجتك
|
رد: تدخلات والد زوجتي بحياتي وتحريضها علي
فرج الله همك وأعانك على صلاح بيتك .
قرأت موضوعك من البداية واتضح لي أن المشكلة تكمن في اهتمام عمك بإبنته وأنها محصورة بالبيت وقربها منه وهذا طبيعي ويبدو انه "مدلعها بعض الشيء " ويحاول يوفر لها احتياجاتها كاملة وهذا لا يعني استنقاص من قدرك كزوج فهو ابوها وانت بمثابة إبنه ولعلمك كونها تسكن قريب منهم هذي تريحك بعض الشي لكونك تخدم اهلك وانت مرتاح بوجودها قرب اهلها .. الأمر الآخر .. مشكلتكم محصورة في موقف معين فلا تحاول تعميمها على حياتك مهما حصل فهي زوجتك ولها ايجابيات وانت تحبها وهي تحبك نصيحتي لك اجعل حياتك معها جميلة بالتعامل اللين والتلطف بالكلام الحسن معها ومع اهلها لا تتصادم مع والدها مهما حصل غير معاملتك له وبإمكانك تبيان وجهة نظرك من غير تجريح .. بالرضى أو الرفض .. ونصيحتي بالمنزل ابحث عن مكان متوسط بين أهلك واهلها واشرح لهم أن هذا هو الأفضل .. وتذكر .. بحسن المعاملة تحلو الحياة .. وفقك الله لما فيه صلاحك وصلاح أهلك . |
رد: تدخلات والد زوجتي بحياتي وتحريضها علي
احب اوضح انه الزوجة بعد الأطفال شي طبيعي يقل مجهودها ...
اذا كانت تسوي الي تقدره عليه اعذرها على تقصيرها.. وبعدين تقول تاخذ ملابسك وتغسلها بيت اهلها ... اهم شي يااخي ملابسك مغسولة وتحاول تقوم بالي عليها .. والبيت فيك تشتري نصه والنص الاخر لزوجتك .. وتدفع المبلغ اقصاد لعمك وبكذا يكون نصه لك ونصه لها.. ......... واذا كان يملي الثلاجه اكل فصدقني يعتبرك مثل ابنه... والا كان ما حصلت الميانه الا لانه يعدك مثل اولده .. استغرب منكم يا الرجال.. انا ابوي كل شهر يجب لبيتي مقاضي من والى .. وزوجي يتضايق مررره ويعصب.. وكلمه ابوي وقال انت مثل اولدي واذا تبيني اعدك مثل الغريب ابشر .. وبعدها ماعاد يقول شي.. بصراحه انت جدآ حساس .. ويمكن تغار من زوجتك انها بتكون قريبه من اهلها وانت لا ..!! وتفكر انه انت المفروض الي تكون جنب اهلك...!!! اخي ارى انك تفكر بمصلحتك وين يمكن بكرى تندم وتقول ياليت وافقت .. الحياة صعبه والبيت ماراح يجيك بالساهل .. يبغى مبلغ كبير .. فأنت شوف الأولى وين ... الله يصلح حالك وجميع المسلمين. . |
| الساعة الآن 06:26 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©