معلقة من 18 سنة
 

السلام عليكم ورحمة الله وبركاته
كل عام وانتم بخير وعيدكم مبارك
عدت لكم من جديد بهم وحزن جديد
مو عارفه من وين ابدا وشنو اكتب احس قلبي مليان وابي افضفض واطلع كل اللي بقلبي ومو قادره محتاجه ارائكم وشوركم لان مالي من بعد الله الا انتو يااروع اخوان واسال الله ان يجزيكم عني خير الجزاء
انا عضوه قديمه وكثير منكم يعرفني ويعرف مشاكلي مع اللي اسمه زوجي واسال الله في هذه الايام المباركه ان ياخذ حقي منه اخذ عزيز مقتدر ويريني فيه عجائب قدرته اللهم امين
بحاول اختصر لكم كثر مااقدر
صارت بيني وبينه مشكله بسبب الخادمه وجاني انهيار عصبي وكلمت الوالد وجا بيتي واللي اسمه زوجي غلط على الوالد وفي وجود الخادمه وعيالي وماخلى ولا بقى فيه وفيني وكان واعي ومو سكران وبالاخير اختار الخادمه علينا انا والعيال وطردني انا وعيالي في وجود الوالد
وانا حاليا في بيت اهلي مع عيالي ومعلقه وصار لي ثلاث سنين على هالحال بس العيال يتواصلون مع ابوهم واهله وما قطعتهم عنهم وكل هذا لله مع انه مايستاهلهم ابد
كنت معزمه على الطلاق بس المحامي وبعض اخواني نصحوني بان اكون متزوجه بالاسم افضل لان بتضيع حقوقي في حال طلبت الطلاق لان العيال تعدو 18 سنه ولاني انا من طلب الطلاق
انا مايهمني اكون معلقه او لا لاني حتى لما كنت عنده كنت معلقه بس معاه بنفس البيت وصار لي منفصله عنه اكثر من 15 سنه وانا معه بالبيت واللي يعرفوني بالمنتدى يعرفون هذا الشي بس اللي خلاني اطلع من البيت اهانته لابوي ولي في وجوده ولان الوالد طلب مني اروح لبيتهم ومااجلس ثانيه مع هالنذل
اللي مضايقني حاليا واللي خلاني اكتب هالموضوع هو اني مو مرتاحه ببيت اهلي مااحس بالخصوصيه واحيانا تصير مشاكل بيني وبين اخواتي اللي بالبيت واسمع احيانا همسات عني واسوي نفسي ماسمعت وحتى معزتهم لي مو مثل قبل يمكن لاني صرت معهم ويشوفوني كثير ويحتكون فيني وحتى نظراتهم غير وقدري عندهم كان غير يمكن لاني كنت بعيده وفي بيتي ولاجل مااظلم بختي مو دايم كذا ولكن الوالد مو مقصر معي ويحاول يعوضني باللي يقدر عليه انا وعيالي ويمكن هذا الشي سبب غيره من اخواني واخواتي وحتى الوالده
صرت اعتزلهم واجلس في غرفتي ولكن مايتركوني في حالي يحاسبوني حتى على نومي وجلوسي في غرفتي كل شي محسوب علي فاظطر اجلس معم
احيانا اندم اني تركت بيتي واقول على الاقل كنت في بيتي وماخذه راحتي انا وعيالي ومحد يحاسبنا او يشين وجهه علينا ولكن مااقدر اكسر كلمة الوالد لما قال لي ماتجلسين عنده ببيته
واحيانا اقول الحمد لله اريح لي ببيت اهلي واحيانا اقول عيالي حرمتهم من بيتهم وجبتهم بيت اهلي وما ياخذون راحتهم وينحرجون
وربي اني ضايقه فيني الوسيعه ولاني بعارفه كيف اتصرف هل ارجع بيتي بس صعب كرامتي وكرامة الوالد فوق كل شي وصعب ارجع مو هين اللي صار بينا ولو رجعت برجع ذليله وبيهيني اكثر انا واهلي وغير اني اخذت كل حاجاتي من البيت انا والعيال او هل اصبر ببيت اهلي لين يتوظف ولدي واطلع ببيت لحالي مع العيال ؟ او اني اصبر لين الله يحلها من عنده؟
رجيتكم تشورون علي وتدعون لي بالفرج وراحة البال لاني تعبت تعبت ومابقى فيني حيل
الله يخليكم لاتبخلون علي بشوركم ودعواتكم وان شاء الله في ميزان حسناتكم
اسمحو لي على رداءة الاسلوب لاني والله مشتته ونفسيتي في الحظيظ

المواضيع السابقة
http://www.66n.com/forums/showthread.php?t=251419

http://www.66n.com/forums/showthread.php?t=238175

http://www.66n.com/forums/showthread.php?t=145495




تم تعديل العنوان ليتناسب مع المضمون

رد: بموت من همي وحزني رجيتكم شورو علي
 

السلام عليكم ورحمة الله وبركاته.

الله يفرج همك ويزيح غمك.

كوني مع ربك يكن معك.

بالصراحة وضعك لا تحسدي عليه!

بالصراحة اللي يهين زوجته وعياله وعمه بعد! هذا ما عنده إحساس.

نصيحة لا ترجعي حتى تتأكدي من زوجك ، هل طبعه تغيير من بعدكم للأحسن؟ ولا مثل ما هو. إذا كانت أمورة طيبة بإمكانك استخدام أولادك كوسيلة للرجوع لبيت أبوهم لكي يراعيهم ويتربوا معاه ولا يكلفوا على والدك. هذه نقطه.

وهل ممكن يوفر لكم سكن بما أنك لست مطلقة؟

بالصراحة ما أدرس إيش أقول،
إلا أن ادعوا الله بأن يعينك على محنتك هذه ويفرجها عليك في أسرع وقت.

رد: بموت من همي وحزني رجيتكم شورو علي
 

الله يجزيك خير اخوي على تكرمك بالرد والدعاء
طبعه مثل ماهو ولو ترجع لمواضيعي القديمه بتعرف ان اللي اسمه زوجي ماعمره ركع ركعه وحده لله في حياته كلها ولايعترف بالاسلام ويقول انه يهودي ويشتم الله والرسول عليه افضل الصلاه والسلام والعياذ بالله وديوث وبخيل مايطلع منه ولافلس انا اللي متحمله كل مصاريف البيت من الى ووالدي مايقصر يصرف علي وعلى عيالي وعليه مع اني موظفه
وعاق لوالدينه وقاطع لهله ولهلي ولايواصلهم لابمناسبات ولاغيره مريض نفسيا ومدمن شرب وخيانات وتوصل للزنى ومقصر معي في كل حقوقي وعشت معه منفصليين مابينا حتى الكلام فوق 15 سنه وعشت الحرمان العاطفي وانا في عز شبابي لاني تزوجت وانا صغيره كنت اسمع منه انواع الشتم والقذف مع اني ماعلي قصور بشهادة الكل والكل يضرب فيني المثل بالصبر ووو وش بقول وش بخلي
يعني مافيه خير ابد ابد بس صبرت على امل يتغير وينصلح حاله وربي ياجرني على صبري عليه عشان عيالي
وانا صبرت وتحملت وشلت حمول ماتشيلها جبال ولارجال
اعذرني اخوي مااعرف كيف انزل روابط لمواضيعي القديمه عشان تعرفه كويس
اكرر شكري لك

رد: بموت من همي وحزني رجيتكم شورو علي
 

أسأل الله العظيم رب العرش العظيم أن يفرج همك ويصلح زوجك

رد: بموت من همي وحزني رجيتكم شورو علي
 

الله يجزيك خير
اللهم امين
يهمني رايكم وش اسوي واللي يرحم والديكم

رد: بموت من همي وحزني رجيتكم شورو علي
 

أولاً - الله يكون بعونك ويفرج همك ويجزاك خير على صبرك وتحملك..

الحقيقة هذا الشخص إذا كان بهذه الصفات التي ذكرتيها فلا حياة معه نسأل الله العافية

وبما أن عيالك كبار وأنتي موظفة، ليش ما تسـاجر أو تشتري بيت قريب من أهلك..؟

الأولاد إذا كبروا كل واحد منهم يحتاج عالم خاص، عشان يرتاحوا ويشعروا بشي من الخصوصية..
أهلك ما بيقصروا ولكن مهما كان الإستقلال لهم أريح وأفضل..

وفقك الله

رد: بموت من همي وحزني رجيتكم شورو علي
 

الله يفرج لك

هانت يا بنت الحلال .... راح الكثير وما بقى الا القليل ..

ان شالله يتوظف ولدك وتطلعين بيت .. بس مو من اول وظيفته اصبري سنه واطلعي

بالعكس بيت اهلك افضل لك ...

وصدقيني .. انتي نسيتي عيشتك ووضعك ببيت زوجك .. عشان كذا تقوولي هناك افضل

والحقيقه تراها مو افضل .. لا لك ولا لعيالك

عالاقل عيالك هنا يحسون فيه احد يراقبهم ..

طولي بالك واصبري .. وحسسي اهلك بوجودك وخلي لك روح حلوه بينهم وصدقيني بتتغير شعورهم تجاهك

رد: بموت من همي وحزني رجيتكم شورو علي
 

أسأل الله العظيم رب العرش الكريم أن يفرج همك و ييسر أمرك و يشرح صدرك

آمين

رد: بموت من همي وحزني رجيتكم شورو علي
 

طيب ليه ظلمتي نفسك وصبرتي عليه ليه ماتطلقتي منه
لاتقولين عشان الاولاد
لاني فهمت انو مو شايل مسؤليتهم اصلا

رد: بموت من همي وحزني رجيتكم شورو علي
 

اذا انت موظفة
استأجري شقه غرفتين وارتاحي انت واولادك

رد: بموت من همي وحزني رجيتكم شورو علي
 

الله يفرج همك عاجلا غير أجل يا رب

رد: معلقة من 3 سنوات ..
 

لا ترجعين له ..

رد: معلقة من 3 سنوات ..
 

انصحك بعدم الرجوع لوفية امل بحل المشكلة كان نحلت قبل 15 سنة
لايصلي ويشرب وضعيف جنسيا ولايصرف على البيت لايوجد شي من مقومات الحياة معة فرجوع مرفوض هنا
اسال الله لك الفرج والانسان مبتلا في هذي الحياة ليختبر الله مدى صبرنا وقوة يماننى على الشدايد ولكن مابعد الضيق الا الفرج..اعرف شخص كان يسكر وعربيد وصاحب سفرات
وسبحان الله وبقدرات قادر تغير حالة 180 درجة صار يصلي وترك الشراب وستقام
يقولون سبب استقامتة رؤيا شافها بالمنام..الله الهادي

رد: معلقة من 3 سنوات ..
 

اذا موظفة اشتري لك بيت واولاد كبارماشاء الله خلاص يخدمونك

رد: بموت من همي وحزني رجيتكم شورو علي
 

انتظر ولدي يتوظف عشان يساعدني في اجار البيت لانه مكلف جدا جدا والله يعيني على محاولة اقناع اهلي بهذا الشيء
مشكور وماقصرت وجزاك الله خير

رد: بموت من همي وحزني رجيتكم شورو علي
 

اللهم امين والله يريح بالك ويجزيك الف خير وكلامك ريحني بس صدقيني مانسيت عيشتي ببيتي واللي سواه فيني وانا مااحلله ولا ابيحه لادنيا ولا اخره بس في بيتي غير مدري كيف اوصل لكم شعوري
مشكوره ياقلبي على ردك

رد: بموت من همي وحزني رجيتكم شورو علي
 

اللهم امين والله يجزيك خير اخوي

رد: بموت من همي وحزني رجيتكم شورو علي
 

ماتطلقت لان الوالد واخواني واخواتي والعايله كلها ترفض مبدأ الطلاق لو كانت عيشتك جحيم هذا نصيبك وقدرك
وكنت اخاف اتسبب في مرض الوالد والسبب الثاني عشان عيالي اي عيالي لاني مااتحمل اشوف نظرة حزن في عيونهم او نظرة شفقه من اي شخص لهم لانهم بينحرمون من لمتهم ببيت مع امهم وابوهم ولاني ماابي تتاثر نفسيتهم بالطلاق وبالتالي مستواهم الدراسي يتاثر لانهم كانو بزارين بس لما كبرو ماشاء الله صارو هم اللي يطلبون مني اني اتطلق
والسبب الثالث انه كان عندي امل انه في يوم يهتدي وخاصه بعد ماربي بلاه بامراض ولكن الله ماكتب له الهدايه ولكن زاد في طغيانه لدرجة انه يتحدى الله حتى بالمرض والعياذ بالله
جزاك الله خير على تكرمك بالرد

رد: بموت من همي وحزني رجيتكم شورو علي
 

ان شاء الله تتيسر الامور ويتوظف ولدي وربي يفرجها علي وعلى عيالي
جزاك الله خير

رد: بموت من همي وحزني رجيتكم شورو علي
 

اللهم امين والله يفرجها على كل مسلم يارب
جزاك الله خير اختي

رد: معلقة من 3 سنوات ..
 

مابرجع له ولاهمني هو بس ابي بيت يضمني انا وعيالي وبسسسسس
الله يجزيك خير اختي مريم

رد: معلقة من 3 سنوات ..
 

الحمد لله على كل حال وكلامك ريحني كثييير اخوي الفاضل
الله يجزيك الف خير ومشكور على تكرمك بالرد

رد: معلقة من 3 سنوات ..
 

نعم موظفه
اشتري بيت صعبه ولكن مفكره استاجر بيت لما يتوظف ولدي
جزاك الله خير

رد: بموت من همي وحزني رجيتكم شورو علي
 

إنا لله وإنا إليه راجعون! !!

دامه هكذا الموت أرحم منه
والله إنك صبرت صبر ثقيل!!! لو عن نفسي والله أعيش مسجون ولا أعيش معاه،فكيف بالعائلة ؟!
لكن على قولة المثل : (يا صابر سنة يعينك الله على يوم )

يا أختي هوني أمرك، واعلمي أن الصابر على البلاء يدخلون الجنى بلا حساب ولا عذاب.
ولعل الله يريد أن يرفع منزلتك بهذا البلاء. والله إذا أحب عبد ابتلاه. فاتخذي قلبا من حديد واصبري على القليل فقد تعديت الكثير بإذن الله. والزمي طاعة الله والذكر وقراءة القرآن وعلمي أبناء القرآن والتوحيد والصلاة لكي يكونوا عونا لأنفسهم ولك في المستقبل ولا يسلكون طريق والدهم، فالله هو الحافظ والمعين.

ولا تخافي ولا تحزني واصبري فإن الله مع الصابرين.

أسأل الله أن يرزقك الزوج الصالح الوفي
وأن يعوضك خيراً مما مررت به،
ويسعدك سعادة لا تتخيلينها إنه سميع مجيب.

والله صدق من قال:( من شاف مصيبة غيره تهون عليه مصيبته. ).

رد: بموت من همي وحزني رجيتكم شورو علي
 

[QUOTE=مخترق الآفاق;3314116]إنا لله وإنا إليه راجعون! !!

دامه هكذا الموت أرحم منه
والله إنك صبرت صبر ثقيل!!! لو عن نفسي والله أعيش مسجون ولا أعيش معاه،فكيف بالعائلة ؟!
لكن على قولة المثل : (يا صابر سنة يعينك الله على يوم )

يا أختي هوني أمرك، واعلمي أن الصابر على البلاء يدخلون الجنى بلا حساب ولا عذاب.
ولعل الله يريد أن يرفع منزلتك بهذا البلاء. والله إذا أحب عبد ابتلاه. فاتخذي قلبا من حديد واصبري على القليل فقد تعديت الكثير بإذن الله. والزمي طاعة الله والذكر وقراءة القرآن وعلمي أبناء القرآن والتوحيد والصلاة لكي يكونوا عونا لأنفسهم ولك في المستقبل ولا يسلكون طريق والدهم، فالله هو الحافظ والمعين.

ولا تخافي ولا تحزني واصبري فإن الله مع الصابرين.

الحمد لله على كل حال
والله ياجرني في مصيبتي ويخلفني خيرا منها
جزاك الله الف خير وان شاء الله في ميزان حسناتك
كلماتك ريحتني كثير وبكتني في نفس الوقت
ابشرك عيالي فيهم خير وربي عوضني فيهم فهم من حفظة القران الكريم ومتفوقين علميا وفرق بينهم وبين ابوهم مثل الفرق بين السماء والارض
وحبيت اوضح اني معلقه من 18 سنه ومو مثل مو مكتوب في العنوان انا قصدت اني معلقه 15 سنه في بيتي وثلاث سنوات في بيت اهلي يعني 18 سنه وانا صار لي 25 سنه جحيم وعذاب

رد: معلقة من 3 سنوات ..
 

اتمنى من الاخت المشرفه تعديل العنوان لاني معلقه من 18 سنه منها 3 سنوات في بيت اهلي
مع الشكر الجزيل على تنزيل روابط مواضيعي القديمه

رد: معلقة من 3 سنوات ..
 

يعني خلال ثلاث سنوات معقوله ماجاكم واعتذر وطلب رضاك وطلب السماح من ابوك
اذا كان جاء وانتي اللي كابرتي فتحملي ماحصل لك
واذا كان ماجاء فهذا وضعه مشكوك فيه يمكن الخادمه حاطه شي بينكم
كيف هانت عليه العشره وزوجته وعياله

رد: معلقة من 3 سنوات ..
 

15 سنه صابره على هذا الحال لا متزوجه ولا مطلقه ،،،يا اختي المفروض من ثاني سنه شفتي وضعه واخلاقه وتعامله مو اوك كان سحبتي عليه وطلبتي الطلاق .. خليك قوووووويه وروحي ارفعي عليه قضيه وبهذليه في المحكمه .. اما يصير رجل يحترمك ويتعدل ويعطيك كل حقوقك او يطلق ويدفع نفقه للعيال وطالبي بنفقه الثلاث سنوات .. لا تخافي ما يقدر يسحب الاولاد منك ،، او .. حل ثاني اطلبي من والدك يستأجر لك شقه قريب منهم وعيشي مع اولادك بعيد عن اخوانك ومشاكلهم ،، كوني قويه وحبي نفسك ما احب الزوجه الضعيفه السلبيه .. طالبي بحقك واكثر

رد: معلقة من 3 سنوات ..
 

اذا كان هذا الرجل غني وفيه شي يستحق ممكن تورثيه اذا مات لا تطلبي الطلاق اصبري بس الله يعينك ويكتب لك الاجر

رد: بموت من همي وحزني رجيتكم شورو علي
 

الله يفرج همك

رد: معلقة من 18 سنة
 

ياليت تطلبي من الاداره تغير اسمك الى منبع الأفراح ،،، غيري من نفسك وحياتك ،، وافكارك ،، اعملي للماضي ديليت ،، غيري اجواء الحزن اللي عايشه فيها ،،، خذي اولادك واحضنيهم العبي معاهم وارقصي وافرحوا احجزوا وسافروا ،، خذوا استراحه والعبوا في المسبح واتسابقوا ،، وزوجك الملحد سجلي كلامه وهو يسب الله والرسول عليه السلام وبلغي عليه الهيئه وهم يضبطوا في السجن ،، كوني انانيه شوي وحبي نفسك واولادك ،، لا تشيلي هم زعل احد حتى لو ابوك ،، سوي الشي الصح واللي فيه مصلحتك انتي واولادك ،، كفايه حزن وعذاب ،، عوضي نفسك وعيالك عن سنين الحرمان ،، الي عاشوها مع اب قاسي ملحد وام ضعيفه ،، انتي موظفه استأجري شقه وعيشي مع اولادك وبعد خمس سنوات جمعي مبلغ كويس مع ولدك واشترى بيت ، ، لا تزعلي من كلامي اعتبرك مثل اختي انصحك عشان مصلحتك ،، صراحه وانا اقرأ معاناتك جاني اكتئاب كيف انتي اللي عايشه هذه الاجواء ،، العمر مره واحده عيشيه صح ،، حتى وان حصل الطلاق عادي انتي امرأه ولك متطلبات تزوجي مسيار وعيشي حياتك ،، اذا مستحيه من اهلك ومجتمعك خلي ولدك الكبير يكون ولي امرك وهو اللي يعقد لك

رد: معلقة من 18 سنة
 

اذا انتي موظفه او ابوك مقتدرماديا اطلبي منه ان تعيشي بشقه او منزل مستقل قريب لاهلك خصوصا ان اولادك كبار 18 سنه رجال ماشالله ترتاحين من اهلك ومن غثا زوجك

رد: معلقة من 18 سنة
 

حبيبتي إذا زوجك مايركعها اصلا مو طلاق اللي يصير بينكم فسخ عقد اثبتي عليه انه مايصلي ويفسخ العقد ع طول من رأيي أن بيت اهلك ارحم من واحد مايخاف ربي الله يفرج همك.

رد: معلقة من 18 سنة
 

عندي احساس ان زوجك مريض مرض نفسي والله اعلم

رد: معلقة من 3 سنوات ..
 

وربي لا جا ولاحتى اتصال وهالشي متوقع يعني واحد مافيه خير لهله ولوالدينه كيف تبيه يكون فيه خير للناس؟
والخادمه لاحاطه شي ولا سحر ومتاكده انا لاني اعرفه واعرف طبايعه من اول ماتزوجني هذا هو يتغير ولكن للاسوأ
الله يجزيك خير على الرد ومشكور

رد: معلقة من 3 سنوات ..
 

ماقدرت اتطلق اختي للاسباب اللي ذكرتها قبل
ماشاء الله عليك اختي كلماتك كلها طاقه ايجابيه وربي اني اتمنى واحاول اني اكون بهالنفسيه بس عجزت وربي كل ماحاولت تجيني ظروف وتخليني ارجع للسلبيه وللوراء نفسيتي تعبااااااااااااانه حيييل وبالنسبه للشقه استحي اطلب من ابوي وماتعودت اطلب هو يعطيني من غير مااطلبه
الله يجزيك خير ومشكوره على تكرمك بالرد علي وان شاء الله في ميزان حسناتك

رد: معلقة من 3 سنوات ..
 

نعم غني وعنده خير بس بخيييييييييييييييل حتى على نفسه

رد: بموت من همي وحزني رجيتكم شورو علي
 

اللهم امين
جزاك الله خير اختي

رد: معلقة من 18 سنة
 

اسأل الله العلي العظيم انه يفرج كربتك ويصلح لك اولادك

اختي اذا الصفات اللي قلتيها عنه صحيحه فـ المفروض انك تسجدي لله عزوجل سجود الشكر اللي خلصك منه ولكن اختي في نقطه بموضوعك استغربت منها وهي انك تقولين صابره انك تكونين على ذمته عشان ماياخذ عيالك مع العلم ان عيالك كبار واللي اعرفه من قاضي في المحكمه ان الولد يخير بعد 7سنوات واصلا اذا فيه شهود عند او دليل عليه انه بهالصفات اللي قلتيها القاضي راح يعطيك الحضانه

على العموم انتي دامك موظفه استأجري بيت بجنب بيت اهلك وماشاءالله ولد رجال وخوذي راحتك ببيتك انتي واولادك

رد: معلقة من 18 سنة
 

ابشري علشانك بطلب تغيير اسمي وكلامك مثل البلسم وربي ماشاء الله عليك كلامك يريح ويعطي التفائل والايجابيه وانا احاول وربي اني اكون بروح ايجابيه ولكن الظروف اللي حولي كلها ما تساعدني بس اوعدك بحاول وابي منكم تدعون لي بظهر غيب
ومستحيل ازعل من كلامك بالعكس انتي تبن لي الخير وتبين تساعديني عشان اطلع من الي انا فيه وان شاء الله لك الاجر والثواب من رب العالمين
بالنسبه للزواج مستحييل اتزوج كرهت الزواج والرجال وماصارت عندي ثقه في اي رجل وشايله فكرة الزواج نهائيا
واحراج اتزوج وانا اربعينيه وعيالي وصلو لسن الزواج وافكر ازوجهم مو انا اللي اتزوج