زوجي يخبر اهله بمشاكلنا ويذمني عندهم
 

مرحبا عندي مشكله من ايام الملكه وهي ان زوجي يخبر اهله بامورنا وتطور الوضع بيني وبينه يعمل نفسه المحب الطيب وعند اهله يذمني ويحش فيني اخر مره صارت مشكله بيني وبينه كبيره وبدل مانحلها بروحنا كالعاده علم اهله امه وخالاته وخواته وعماته وفضحني عندهم ولما تصالحنا وعدني انها اخر مره ينشر مشاكلنا وللعلم هذي مو اول مره يوعدني لكن هالمره اقسم ووعد انا بيني وبين نفسي ماصدقته لكن مشيت الامور الان اكتشفت انه متكلم عني عند اخته ومكلم عمته عني طبعا كلام ذم هل هذا الرجل يمثل الحب علي ؟ طيب كيف اعيش معه وهو فيه هالطبع؟

تم تعديل العنوان ليتناسب مع الموضوع

رد: هل يمثل الحب علي
 

هذا ماهو رجال الي يطلع اسرار بيتة

رد: هل يمثل الحب علي
 

الله يعوضك خير اختي

استخيري
واحسمي امرك معه

يا انك ترضينه بطبعه!
يا انك توقفين كذا

والله بيعوضك خير منه
بعدك في فترة سهلة لا تورطين نفسك معه وتندمي

أسأل الله لك الهدى والرشاد

رد: هل يمثل الحب علي
 

كم لكم متزوجين ؟
وايش هي طبيعة مشاكلكم ؟

يعتمد بالاساس على شخصية الرجل وتربيته ، ونظرته للامور بوعي
و بعد نظر ..

رد: هل يمثل الحب علي
 

لنا ثلاث سنوات عندي منه ولد مشاكلنا بعضها سخيف وبعضها كبير لكن حتى نقله للمشكله يحرف بحيث اطلع سيئه هالفضايح خلت اهله مايحبوني مثلا قايل لهم اني اطلب منه يساعدني بالبيت ومشتكي علي عندهم وهو ماكلمني ولا قال انه رافض لما نجي نتكلم عن المساعده يتكلم بمنطقيه ولازم نتعاون ومن وراي يذمني واجتمعوا فيني امه وعمته وافتحوا هالموضوع بعدم حضوره ولما زعلت منه يتعذر واخر مره وانتي علميني وش اقول ووش مااقول قلت له اي شي يطلعني بصوره سيئه لاتقول وبكذا مارح يحبوني وعلى كلامه اقتنع بس كلام طبعا مثلا مره زعلت منه وقلت انت مقصر ماديا ومع المشكله قالي اسرق قلت ايه طبعا انا ماقصد انه يسرق لكن مع النرفزه وهالشي بينا وتصافينا اكتشف انه قايل لهم احيانا لما اواجهه غالبا ينكر ولما اقوله امك قايله لي يعترف ويقول اهم اسالوني واخر مره قالي انتي علميني وش اقول ووش مااقول طيب انا مو معاهم بالجلسه وهذا قلت له اي شي يطلعني بصوره شينه لاتقول والحين اكتشف انه متكلم عجزت فيه

رد: هل يمثل الحب علي
 

معذرة

فهمت من كلامك الاول انك في الخطوبة

عشان كذا قلت سهل الامر

لكن مادام عندك ولد فكري بجدية
اذا بتتحمليه لو ماتعدل
فابدأي بتدريبه وتعليمه واجتهدي

وابتعدو عن اهله بقدر استطاعتك
حتى يتعدل

اما اذا عارفة انك ماراح تتحملي للمدى البعيد
لا تتحملي فوق طاقتك
طفل ولا ثلاث اطفال واربعة

رد: هل يمثل الحب علي
 

كيف ادربه واعلمه وش اسوي رجال كبير وفاهم وعرف اللي يزعلني ومااقدر ابعده عن اهله رغم اني احصل تعليقات من امي ان جلسته الكثيره عندهم مو لصالحي حتى مره صديقتي كنت افتخر فيه انه يحب اهله وبار بامه ويحب يجلس عندها وهي اقصد صديقتي ماتدري عن مشكلتي معاه قالت كلمه بما معناها حق التحريش قصدها جلسته لتعبئه راسه علي انا انصدمت من فكرتها لكن شكله صحيح طيب انا ماقدر امنعه من اهله وتسعدني علاقته بامه وخواته يحسسني ان الدنيا بخير وان في اخوان يتزوجون ومايتغيرون على اهلهم لكني زعلانه انه يفضحني ويتكلم علي عندهم يعني ماينفع يطلعوني من جلستهم هذا انا ماسولف عنهم بجلستي معاه وهو اصلا يخبي اسرارهم عني وانا مااسال ولا اجيب طاريهم

رد: هل يمثل الحب علي
 

يمكن يكون بدون قصد نقله للكلام ويمكن يكون الكلام اللي جاك عنه انه يتكلم عنك غير صحيح
في حالة تأكدك من ذلك
أفضل حل انك تصارحيه وتقولي ودي تعاهدني ان أي مشكلة تصير في بيتنا انها ماتطلع ابدا
ونقل الكلام واسرارنا للناس فضيحة
و عيب على الرجال نقل الكلام
ومن هالكلام

رد: هل يمثل الحب علي
 

هالنوع من البشر طيب
وتراه طبع فيه ناس اعرفهم كذا
تعرفين المثل اللي يقول :
لسانه يحكه ههههه
يعني يحب يحكي ولما يحكي يحب يبهر ويملح ، يا خيه الموضوع مايستدعي طلاق ، ولا انك تواجهينه كذا كل مرة وبس ..
شوفي مستشار نفسي ، او اقري عن مثل هالنوع من الشخصيات وحاولي تساعدينه إنه يترك هذا الطبع
بدون ما تطلبين منه مباشرة إنه يتركه
حاولي تلهينه وتبعدينه عن اهله قدر الامكان
والله الله بالدعاء .. الله يهديه ويفتح عليه ويصلح حالكم ..
وانتي تجنبي المشاكل او النقاش معه
وانتبهي تعطينه اسرارك او خصوصياتك ..

رد: هل يمثل الحب علي
 

سواء بقصد او بدون قصد النتيجه وحده وكم مره اصارحه ويعاهدني ومافيه فايده

رد: هل يمثل الحب علي
 

كيف يعني ابعده عن اهله ماهو لازم بيجتمع مع اهله هو بيتوتي يامعي يامع امه وخواته. وانا اكيد بروح لاهلي بدونه واذا انا رحت لاهلي اكيد اهو بيروح لاهله

رد: هل يمثل الحب علي
 

عطوني اسماء استشاريين مختصين بحالته

رد: هل يمثل الحب علي
 

كيف تعرفين أنه خبر أهله ؟

رد: هل يمثل الحب علي
 

أولاً
إخبار أهله بمشاكلكم ما لها لازم، لو كانت هنام مشاكل ويريد يحلها على الأقل يخبر أم الزوجة أو أبوها حسب نوع المشكلة، أما أهل الزوج فما أرى له داعي.

وثانياً نشر المشاكل الزوجية بين الأهل وعند الأقارب هذا يزيد الطين بلة ويسبب تدخلات في الأمور الزوجية التي من المفترض أن يحسمها الزوج بنفسه، وبالتالي تكثر المشاكل ويكثر القيل والقال مع بعض تشويه سمعة الزوجة ، والحريم ما شاء الله أروع من بث قناى الجزيرة في نشر الأخبار، إلا من رحم الله.

ثالثًا : يجب أن تتفقوا على إجراءات في حل أي مشكلة:
1 مناقشة المشكلة للتوصل الى حل.
2 في حالة عدم وجود الحل بالإمكان الاستعانة مستشار أسري
3 ثالثاً إذا لم تجدوا حل حكموا اثنين من أهلكم بينكم وتنتهي القضية بإذن الله.

وأخيراً : المشاكل لو لم تنهى بسرعه تزيد آثارها في النفس.

أسأل الله لكم التوفيق السداد في دينكم ودنياكم.

رد: هل يمثل الحب علي
 

الاغلب امه تقولي سواء بشكل مباشر او غير مباشر تنحيز او تلميح واحيانا احس هالحكي مو كلامه واورطه اقوله علمت اهلك وينكر ولما اقوله امك قالت لي يعترف ومن قريب صرت افتح جواله وهو يدري اني افتحه لانه اكثر من مره يشوفني فاتحه الجوال طبعا سابقا ماكنت اتجرا افتح جواله لكن حاليا افتحه وبعلمه

رد: هل يمثل الحب علي
 

سابقا كان مو مقصر ينشر مشاكلنا للطرفين اهلي واهله لكن انا كنت اقوله من ضمن الحكي لاتغث اهلي بمشاكل تافهه ومره بعد مره بطل يقول لاهلي لكن اهله مازال مو راضي يبطل

رد: هل يمثل الحب علي
 

المشكله مانستفيد من اخبار اهله لاني نحلها بدون تدخل لكن مادري ليه يقول لهم ونعم تشوهت سمعتي كثير عندهم وصرت مو محبوبه حتى ابوه كان كويس معاي وتغير وصار يطلع فيني عذاريب احيانا اقول يتعمد ينشر المشاكل بصوره تطلعني غلطانه علشان اذا عمل شي كبير معاي ماحد بيوقف معي من اهله

رد: هل يمثل الحب علي
 

صح مو حلو يخبر اهله
انتم تنسون مع الوقت لكن الاهل لا
واحد من اقاربائي مثله .. ينشر اخبار حرمته والحين عياله
سارت الحرمه ماتقول له شئ.. حتي لو سار خطا من عيالها مثلا سارت لهم مشكله مع احد هي تحاول تحلها ولاتعلمه
لانه ينشر كل شئ بحسن نيه لكن الناس ياخذون الموضوع تريقه وشماته علي عياله..

رد: هل يمثل الحب علي
 

رد: هل يمثل الحب علي
 

اهله مايجيب طاريهم وانا مااسال لكن لما قالي اهم يسالون جربت اساله ومايعطيني الاجابه يقول ماادري وانا ادري انه يدري فعرفت انه يحب ينشر مشاكلنا لكن مشاكل اهله لا فبطلت اسال لانه بالاساس مايهمني اعرف

رد: هل يمثل الحب علي
 

ومااعتقد ينسحب منه الكلام مو طفل اهو. لكن يتعمد يخلي نفسه المظلوم مادري مثلا هو يعتقد اني اقول لاهلي فيخاف يجون اهلي يشتكون لاهله فيقول اسبقها طيب الحين ثلاث سنوات ماعرف اني مااقول مشاكلنا لاحد انا قلت وامي كثير تتفاجا من المشكله لما يبون يدخلونها وتقول انها ماتدري وهي صادقه. مايصير مااستوعب انه هالطبع مو فيني. جنني ماعرف وش هدفه وايش يشوه سمعتي هناك. صاروا بكل سهوله ينقدون علي عنده وهو يايدهم متخيله حتى عمته تنقد علي بشغله وتقولها لاخته واخته توصلها لها وهو من فتح هالباب

رد: هل يمثل الحب علي
 

هذا طبع وللاسف ماتوقع انه بيتغير كان بيخف بس شوي مع تقدم العمر..يااما تستمرين معه بطبيعته هذي وتتجاهلين خرابيطه او تصرفي بمايناسبك ويريح بالك

رد: هل يمثل الحب علي
 

الحين نبهتوني لشغله انه هالامر رايح يتضرر منه حتى اطفالي وبيخليهم بطبعه هذا غير محبوبين عند اهله

رد: هل يمثل الحب علي
 

ادخلي له من الناحية دي انه طبعه هذا بيضر اولادكم و هو كدا فعلا و انه الكل يصير يعرف اسرارهم و حياتهم مكشوفة للجميع
يا شين هذا الطبع في الانسان رجل او امراة

رد: زوجي يخبر اهله بمشاكلنا ويذمني عندهم
 

لا تعيشين معاه ببساط احمدي وتفتحين له قلبك .. لان اللي بقلبك بيووصل للناس

رد: زوجي يخبر اهله بمشاكلنا ويذمني عندهم
 

الله يعينك ويقويك

شوفي اختي زوجك تبع اي نمط شخصية

اتوقع هو جنوبي او غربي
هذين الاثنين طبعهم ودود ومتحدث
بخلاف الشرقي والشمالي
طبعهم الصمت والعمل

هو مالقى حديث عندك بحث عنه عند اهله
عشان كذا ابحثي عن اهتماماته وهوايته وشاركيه فيها واسأليه عنها وخليه يتكلم لو اليوم بطوله
خصصي له اوقات تسأليه بتاهف وتنصتي له وهو يفرد عضلاته بالكلام
وبيني حماسك وشجعيه

في دراسة تقول ان الرجل اقل كلام من المراة
بمتوسط 7ألاف كلمة يقولها الرجل في اليوم مقابل 20 أله كلمة للمراة

فضي ال7 عندك وخليه يروح لأهله فاضي

ونقطة ممكن هو يحتاج تعاطف ولاحظ انه اذا سكاك لأهله وذم فيك وبين قد ايش هو يتحمل
هم يتعاطفو معه
فحب الشي هذا واستمر عليه

ضميه لك وتعاطفي معاه
الرجل مهما كبر يضله طفل وهذا النمط الجنوبي والغربي
هم زي الاطفال ماعليهم ملام
مايحب النقد ولا التوبيخ
يحب التعاطف والتشجيع والمدح

الاه يعينك ويقويك اختي
خليك قويةjyh

رد: زوجي يخبر اهله بمشاكلنا ويذمني عندهم
 

نفس مشكلتي بالضبظ يخبر اهله بمشاكلنا و خاصة امه و امه تخبر بناتها و الدائرة كبرت و المعاملة بيني و بينهم تغيرت و هو يريد ان يطلع برئ و حين تحدث اي مشكلة يرميها علي و علي اهله و هو سبب المشاكل في كل شي...
هو كبير في العمر لا اعتقد اني ساغيي فيه شئ و هو شريك و لي مهامي و مسؤولياتي فليس من المنطق ان اركض وراءه طوال الوقت بعكس اخ زوجي... و نظرة اهل زوجي اني انا و زوجي غير منسجمين و علاقتنا فاترة و دائمة المشاكل و ان اخ زوجي يعيش حياة مرتاحة و غير متشاكل مع زوجته و لست اقول الا و هل يخلو بيت من المشاكل و لكن بعض المشاكل تموت في مكانها و ترجع العلاقة بين الزوج و زوجته طيبة و لكن اهل الزوج ستظل تزن في رؤوسهم الي ان يأخد الله امانته...
بالنسبة لي قررت الانسحاب و النجاة من شره و شر اهله لانهم يكذبون جميعا فاتوقع ان يكذبو علي و يقولون عني ما ليس في ... و انتي يا اهتي اعانك الله علي ما ابتليتي و اجهي مشاكلك بالصمت حتي يقف مع نفسه و يتساءل مالذي غيرك و حينها ربما يتعظ

رد: زوجي يخبر اهله بمشاكلنا ويذمني عندهم
 

قلتي يحب يطلع مظلوم

طيب اول مايرجع من الدوام استقبليه واهتمي فيه وقولي ماتعبت
وتعاطفي معاه
خليه يلعب دور المظلوم من الدوام بلاش انتي

الله يعينك مع اني اشوف كذا دوامة
وما اضمن لك انه ينشغل بدوامه عن الشكاية منك

وممكن تطور حالته
هو ممكن عنده اضطراب والاستشاري النفسي بيفيدكم باذن الله

رد: زوجي يخبر اهله بمشاكلنا ويذمني عندهم
 

رد: زوجي يخبر اهله بمشاكلنا ويذمني عندهم
 

السلام عليكم ورحمة الله وبركاته.

لي عودة يالؤلؤة الحبيبة على موضوعك، لكن تناقض الأخت ريف في كلامها

مرة ترفع الرجل فوق ومرة تنزلهم أرض..

بلاش تعمي الله يرضى عليك وتحدثي بمنطق.

رد: زوجي يخبر اهله بمشاكلنا ويذمني عندهم
 

نعم سابقا اعتقد كان يعاني معي كثيرا من ناحيه السوالف فانا خجوله ومااتكيف بسرعه فكنت مااسولف كثير لكن بعد ماانجبت صرت اسولف بل اصبحت ثرثاره وايضا مو عاجب كثير اوقات يقولي ليه ساكته يلا سولفي مع اني احس سولفت وثرثرت لين اخلصت سوالفي. هو مايحب يطلع مظلوم او مسلوب حقه بعيني يحب يطلع البطل الفاهم ويتضايق لو ماعرف شي وانا عرفته وبصراحه هو نجح بهذا الشي فانا اشوفه فاهم ولبيب وماحد يقدر عليه وعنده سرعه بديهه مادري هو فعلا كذا او انا بس اشوفه كذا.

رد: زوجي يخبر اهله بمشاكلنا ويذمني عندهم
 

معك حق روح انتهت وانا هذا اللي بسويه لكن تعرفين شخص دائما معك شريكك اكيد بيعرف عنك اشياء مهما حاولتي تخبين

رد: زوجي يخبر اهله بمشاكلنا ويذمني عندهم
 

طبعا بعد المصارحه الاخيره ندم كثيرا وقال انه يحاول ومايدري ليه كل مايقفل باب يشوف روحه اخطأ من جديد وقال شي عن حياتنا ويقول اهو لو يدري ان الكلام اللي كان يقوله لاهله سابقا بيأذني او بتضرر منه ماكان قاله وانه قاله بحسن نيه وهذا هو الحين يمسك نفسه مهما انسال من قبل اهله ومايجيب طاري واخر مره ووعدني مابيتكرر طبعا هو واعدني قبل شهرين انه مارح يتكرر وهذا الحين وعدني ايضا لكن على كلامه انه الحين يسالونه ومايعطيهم جواب وانه صار يمدحني عندهم

رد: زوجي يخبر اهله بمشاكلنا ويذمني عندهم
 

انا يارينول تجيني فكره الانسحاب وقلت له ع الاقل اعيش مرتاحه بلا مغثه اهل زوج خاصه واني اصبحت اتجنب اجتماعاتهم واحس بانكسار لما ادخل مكان متواجدين احس الجميع يعرف مشاكلي وانا ماعرف عنهم شي اكيد منهم الشامت ومنهم المشفق علي او عليه ومنهم المستهزئ اللي يشوفني ماقدرت على زوجي او الزوجه الغير سنعه طبعا هو يقول اني اكبر المواضيع والحل اللي عطاني اياه اقطع اهله بشكل نهائي وهم كذلك بيقطعوني وانا مااشوف انه هذا الحل مو معقول تصل بينا القطيعه الى هذه الدرجه وايضا قطيعتي لهم ماتعني انه بطل يتكلم علي عندهم ممكن بياخذ راحته اكثر لانه بيضمن انه امه مارح تقولي شي طبعا هو وضع هذا الحل لما شافني فعلا تازمت نفسيا واني مو قادره احضر اجتماعاتهم

رد: زوجي يخبر اهله بمشاكلنا ويذمني عندهم
 

والله الموضوع مايستاهل طلاق خافوا الله ياللي تقولون احسن من تجيبين منه عيال واجد
اجلسي معه وصارحيه واحتويه وفهميه بأسلوب حلو بدون تجريح ورفع صوت وأسأله ترفع الضغط وتخرجه من طوره وليش قلت وليه سويت بيزيد عناد
الكلمه الحلوه والاخلاق الزينه تحرجه وتخليه يستحي ومايقول فيك الاكل خير
بس تضغطينه في البيت ومالقى من يفضفض له فيروح لاهله
يقولك المثلي كوني له امه يكون لك عبد

رد: زوجي يخبر اهله بمشاكلنا ويذمني عندهم
 

زوجك بيتوتي لايخرج ولا يجي من صغره طبيعي يطلع مثل الحريم في اشياء منها مايعرف يتصرف ولا يعرف يرد وينقل كلام ويفشي اسرار

رد: زوجي يخبر اهله بمشاكلنا ويذمني عندهم
 

زوجك مكتسب شغلات من جلسته مع امه وخواته

يعني الرجال يكرهون القيل والقال الغالب ومايحبون نقل الكلام انا مستغربه من بجاحة اهله كيف يستقبلون كلامه

مفروض يسكتوونه
وكيف يتجرأون يتكلمون معك في امور حياتكم حتى عماته وخالاته من المفترض مايتكلمون حتى ربع حرف الا في حالة انتم بينكم مشكلة كبيره فحكم من اهله وحكم من اهلك

اما من هب ودب يتكلم في حياتكم
للاسف بيتكم بلا أسوار حياتكم مكشوفه