محتارة .. هل اكمل تعبئة تقسيط سيارة لزوجي !
 

السلام عليكم ..

طبعا قبل فترة نزلت موضوع شراء سيارة لزوجي .. وبالفعل شريت السيارة كاش وهو يقسطني المبلغ على شكل أقساط شهرية .. ومع استخدام السيارة طلعت متعبة مرة في السفر وماهي مريحة خآصة سفراتنا كثير .. وزوجي يشتكي من عدم رساوتها في الخط وانها خفيفة ماتقاوم الهوا والعزل فيها سيء جدا .. (طبعا الرجال هنا بيفهمون كلامي هذا وأكثر احساسا فيه ) .. في مرة كنت اقرأ اعلان عن طلب تنازل للبنك من شخص اشترى سيارة كبيرة وحلوة وراسية وقوية .. فكنا نتكلم انا وزوجي انو وش رأيك اتقبل السيارة وانت تدفع لي الاقساط .. المهم واحنا نتكلم ونحسبها الفكرة عجبت زوجي وانا ايضا كنت متحمسة لها (والفكرة انه نبيع سيارتنا اللي اشتريتها وندفعها مقدم لسيارة قوية بس غالية شوي والاقساط يدفعها زوجي على مدى خمس سنوات والدفعة الاخيرة يجمعها زوجي او يستلفها المهم انه يدبره وأنا مالي دخل فيها ابدا ) طبعا زوجي قالي انتي الحين اكيد مستغربة اني وافقتك (لاني كثير مرات كنت اكلمه في موضوع مثل كذا وكان يرفض) قلت ايه .. قال شوفي انا كذا ولا كذا بقسط سيارة وبنخسر على سيارة بس نخسر ونقسط سيارة تستاهل وتبقى لي عمر وكبيرة في تكفى اولادنا ان شاءالله في المستقبل ومريحة في اسفارنا وقوية وتتحمل وتمسك سعرهااحسن وافضل من هذي السيارة اللي بعد سنتين ثلاثة بتتفكك وبيطيح سعرها ونرجع ندور سيارة من جديد ولا كأننا سوينا شيء.. وقلت ماعندك مشكلة توكل على الله..

المهم راح المعرض وحسب له الحسبه وهي كالتالي:70الف مقدم (طبعا ببيع السيارة اللي اشتريتها وادفع المبلغ)+ 1500قسط شهري لمدة5سنوات+40الف دفعة اخيرة .. قيمة السيارة كاش160الف .. وفوائدهم 30الف لخمس سنوات .. السيارة بعد خمس سنوات حتكون باسمي لاني حاشتريتها عن طريق البنك ..

المهم راح اليوم زوجي وجاب الاوراق وجاء واخذني من الدوام ورحت جبت تعريف بالراتب .. والمفروض اننا نروح العصر اليوم نودي الاوراق ونرفع طلب للموافقة المبدئية .. بس مارحنا لاني حسيت اني مترددة .. واستخرت ومتخوفة اني اندم .. وبنفس الوقت اقول الفلوس اللي بدفعها مقدم احطها مع الفلوس اللي ناويه ابني فيها افضل .. ما اعرف اخاف اندم بعدين .. وخايفة من الديون اللي صارت على راتبي .. قرض شخصي وقرض لما اشتريت الارض والحين سيارة مع ان زوجي حيدفع اقساطها والدفعة الاخيرة...

وفي المقابل سيارتنا أبد مو مريحة ومتعبة واخاف مع الوقت تتعبنا وتنهري بسرعة ونصير مضطرين نغيرها بعد ماخسرنا فيها .. وايضا اقول في نفسي زوجي طيب وحباب ويستاهل وفي النهاية انا مستفيدة من السيارة لانه والله مايقصر اي مشوار اطلبه او اذا بغيت اسافر يوديني أي مكان ان شاءالله خارج السعودية وكريم معي لابعد الحدود اخرها قبل اسبوع مسفرني منطقة حلوة لمدة اربعة ايام ومشتري لي جوال جديد ب2700ريال مع ان جوالي جديد بس لاني نفسي فيه اخذني واشترى لي اللي نفسي فيه..

زوجي قالي بصحيك العصر عشان نروح نودي الاوراق .. صحيت قبلها وبعدين صحي قبل المغرب وطلع يصلي وماكلمني ابد عن الموعد ما ادري حاس بترددي ولا كيف ..

سؤالي للعضوات/ انتي لو كنتي مكاني وش حتسوي؟

سؤالي للاعضاء/طيب تأثير هالشيء لو بطلت اشتري على زوجي وش حيكون؟




تم تغيير العنوان ليتناسب مع المضمون

رد: محتارة .. ساعدوني..
 

كم تضيفي علي قيمة السيارة
هذا الي يعنيك
قلتي القسط هو يدفعه

رد: محتارة .. ساعدوني..
 

حنبيع السيارة اللي اشتريتها وحندفعها مقدم حتجيب 70ألف اللي هي قيمة الدفعة المقدمة

نعم القسط 1500 شهريا لمدة5سنوات هو اللي يدفعه + الدفعة الاخيرة 40الف ريال حيتكفل فيها هو ايضا

رد: محتارة .. ساعدوني..
 

رأي توكلي علي الله
اعتبري كانك اشتريت سيارة لتفسك ما دام هي باسمك
و في الاول و الاخير انت مستفيدة منها ايضا
استخيري قبل تروحي معاه

رد: محتارة .. ساعدوني..
 

سبحان الله عقلي يقول انتي اللي المستفيدة وبتظل باسمك في النهاية وزوجك يستاهل والحمدلله شايل كل مصاريفي من سواق لمستلزمات دوامي لملابسي واغراضي وشحن جوالي اقول في نفسي منتي خسرانة شيء .. بس ارجع اتردد واقول بنفسي ازيد الديون علي مع انه متكفل في الاقساط .. ما أعرف محتارة..

رد: محتارة .. ساعدوني..
 

كتبت رد و طار

الخلاصة
توكلي على الله
و إياك وظهري ترددك او مخاوفك امام زوجك. تراه بينجرح و ياخذ موقف
خصوصا ان حقك محفوظ

رد: محتارة .. ساعدوني..
 

ولو ماني متأكدة من حرصه على مالي ماكان اقدمت على موضوع مثل هذا ..

السيارة اللي ناوين نشتريها جايه بفئتين .. طبعا زوجي اختار الفئة الاقل سعر عشان مايزيد المبلغ .. يعني اقول في نفسي لو انه مايفكر فيني او انه يستغلني كان قال في نفسه باخذ الفئة الاغلى وادلع نفسي

رد: محتارة .. ساعدوني..
 

طيب و حنون و شايل مصاريفك حتى و انت موظفة و .. و .. الخ
و محتارة ؟

توكلي على الله و ما انتي خسرانة باذن الله
بس زي م قالوا لك لا تظهري ترددك و لا تجيبي طاري السيارة تكون باسم مين

رد: محتارة .. هل اكمل تعبئة تقسيط سيارة لزوج
 

اختي بما انه ماشاء الله علاقتكم طيبة الله يديم عليكم النعمة ومو مقصر معاك اشتري السيارة
انت ذكرتي نقاط جميلة ان السيارة بتخدمكم اثنيناتكم ومومقصر معك بها مشاوير وسفريات
لو كنت مكانك حاوافق
على الاقل بعد عشرة ومعروف ومودة بينكم
ايش تقولي على وحدة يوم عرسها وهي بالفستان الابيض يقول لها جيبي الف ريال ابي اشتري سيارة

رد: محتارة .. هل اكمل تعبئة تقسيط سيارة لزوج
 

زوجك كريم وقايم بكامل مصاريفك ،،


يوديك جميع مشاوريك ! ليش مترددة؟



انتي لو تفكري فيها ،، حتى لو كنتي انتي اللي حتدفعي قيمتها


فأنتي الكسبانة ،، قيمتها راح تجيبي سيارة وسائق ولا راح يطلع عليك اغلى


وما تأمنين ع نفسك معاه ،،


توكلي ع الله ،،

رد: محتارة .. هل اكمل تعبئة تقسيط سيارة لزوج
 

توكلي على الله وبلاش تردد وحيرة
زوجك انسان طيب ومحترم ويستاهل اكثر
انا المدام موعدتني بسيارة لكزاس 2016
وتكون بسمها بس مابي احد يدري
عشان ما يقولون كاشخ بحلال زوجتة
ومتردد اخاف لازعلتها تسحبها
وروح لدوام تاشيرة حكم القوى على الضعيف😥

رد: محتارة .. ساعدوني..
 

إذا أنت راغبه مثل ما تقولي توكلي على الله..
أهم شئ توثقي حقك ..... سواء تكتبي السيارة بإسمك أو توثقي بأي بطريقة تناسبك ..

رد: محتارة .. ساعدوني..
 

جزاك الله خير ..

رد: محتارة .. هل اكمل تعبئة تقسيط سيارة لزوج
 

من جد العشرة تكشف معدن الشخص .. الله يجزاك خير

رد: محتارة .. هل اكمل تعبئة تقسيط سيارة لزوج
 

والله مايقصر معي .. الله يجزاك خير..

رد: محتارة .. هل اكمل تعبئة تقسيط سيارة لزوج
 

ماشاءالله الله يهنيك ..

وأنا بعد ودي افرح زوجي بهالسيارة لانه جدا انصدم في السيارة اللي شريناها قبل وتعبته مرة..

رد: محتارة .. هل اكمل تعبئة تقسيط سيارة لزوج
 

أكبر جرح لزوجك هو ترددك ومخاوفك..
مو لائق توصلين معه لنهاية الطريق وتتراجعين
وإذا عزمت فتوكل على الله

رد: محتارة .. ساعدوني..
 

السيارة عن طريق البنك واكيد راح تكون بأسمي .. جزاك الله خير..

رد: محتارة .. هل اكمل تعبئة تقسيط سيارة لزوج
 

رد: محتارة .. هل اكمل تعبئة تقسيط سيارة لزوج
 

رد: محتارة .. هل اكمل تعبئة تقسيط سيارة لزوج
 

يستاهل من يكتب السياره باسمه بعد

توكلي ع الله ونفذي مااتفقتوا وعزمتوا عليه

ولايحس بترددك ومخاوفك لأنه بينجرح جرح ماراح تقدري تداوينه بالفلوس

والله يسخر بعضكم لبعض أحبه 💑

رد: محتارة .. هل اكمل تعبئة تقسيط سيارة لزوج
 

لا أنصحك ...

رد: محتارة .. هل اكمل تعبئة تقسيط سيارة لزوج
 

السلام عليكم ورحمة الله وبركاته..

مع هذا الرد..

السبب الرئيسي ارجعي لمواضعيك القديمة عن المال وستعرفي..

وإذا تمت الموافقة لا تأتي في يوم ترددي عليه بأن من سجلت السيارة وعليك أن تفعل مافعلت بمجرد لو قصر معك أو مشاكل قد تحصل وهذا جرح عميق للرجل..

ربما يكون عطاؤك أفضل من عطاؤه أو العكس..

لا تعتبري السيارة هي ستغيره وتريديه كما أنت تريدي..

والضمان الآمن لحياتك.

استخيري ووفقك الله عزيزتي.

رد: محتارة .. هل اكمل تعبئة تقسيط سيارة لزوج
 

استخيري قبل كل شي بس نصيحه ولا اعمم مهما كان الشريك طيب وكريم ومايقصر وكل شي فيه زين هذا الشي مو ضمان لك ابد.
والشراكة بين الزوجين مع اتفه مشكله بتخافين وتفكرين و و و و.
عندك أكبر مثال اخونا شاطئ الراحه يقولك زوجته بتطلع له سياره آخر موديل وهو ناوي يتزوج عليها ههههه يعني انتبهي وفكري انك دايم تطلعين بأقل الخسائر.

رد: محتارة .. هل اكمل تعبئة تقسيط سيارة لزوج
 

زوجك موظف وينزل له راتب ماله داعي والله تحطي على ظهرك قرض طيب لو زعل منك شهر شهرين ماسددك والله المشاكل بتدب بينكم

عندك قريشات وانا اختك ابني لك بيت باسمك
ينفعك

رد: محتارة .. هل اكمل تعبئة تقسيط سيارة لزوج
 

عن تجربة مريرة

لا انصحك ابدا ابدا .. والقرار الأخير راجع لك

رد: محتارة .. هل اكمل تعبئة تقسيط سيارة لزوج
 

السلام عليكم

اختي صاحبة المشكله
بالنسبه اذا متردده بالموضوع علشان زوجك فانا اقول الموضوع عادي ووافقي عليه

لكن انا ضد فكرة الاقساط بشكل عام
ما احب اقسط او اخذ قرض او اي شي له علاقه بمديونيه

يمكن لاني عزوبي الوضع عندي عادي
سيارتي صغيره؟ عادي اتحمل مو اول واحد ولا اخر واحد يشتري سياره صغيره ولا عندي مسؤليات

اعطيك مثال
انا مغترب اول مادخلت الجامعه كنت احتاج سياره للتنقلات ولا كان معي مبلغ كبير
كنت اقدر اخذ لي سياره جديده اقساط باسم صديق اثق فيه جداً واذا اكملت المبلغ بيكتب السياره باسمي
اشتريت سياره صغيره وقديمه ومشيت نفسي،، اسافر فيها واداوم فيها واتنقل لكل مكان
وجمعت لي مبلغ خلاني اقدر اشتري سياره جديده وكبيره لا دين ولا اقساط ولا شي
صحيح كنت اعاني من السياره لكن ماكان عندي التزامات ماليه او ديون

وحسب اللي فهمت ان ماعندكم اطفال فماتحتاجون للسياره الكبيره،، واذا علشان اطفالكم بالمستقبل تجمعون فلوس ومتى ماجاكم اطفال واحتجتم تغيير السياره بيكون المبلغ جاهز

رد: محتارة .. هل اكمل تعبئة تقسيط سيارة لزوج
 

امين يارب .. الله يجزاك خير

رد: محتارة .. هل اكمل تعبئة تقسيط سيارة لزوج
 

لماذا اخي الرسمي؟؟

رد: محتارة .. هل اكمل تعبئة تقسيط سيارة لزوج
 

ماشاء الله زوجك حاجة نادرة حافظي عليه
انا لو زوجتي موظفة
كنت هاخذ راتبها كله او اخليها تترك الوظيفة
نصيحة مني لا تبيني ترددك له

رد: محتارة .. هل اكمل تعبئة تقسيط سيارة لزوج
 

استخرت حبيبتي .. ولا اقصد ابدا من السيارة تغييره او ان يكون كما اريد .. القصد انه اذا بيخسر على تقسيط سيارة يخسر على شيء يستاهل .. ونرتاح في السيارة وقت السفر لان مثل ماقلت لك سفراتنا كثير .. امين يارب واياك..

رد: محتارة .. هل اكمل تعبئة تقسيط سيارة لزوج
 

هو فعلا زوجي عملة نادرة مو لانه مخليني في الوظيفة وماياخذ راتبي لانه تزوجني وهو عارف اني موظفة واشترطت عليه وظيفتي ابقى فيها ووافق .. واذا بعطي زوجي شيء فبعطيه بنفس راضية وعن طيب نفس وابدا مو غصب عني..زوجي عملة نادرة لانه انسان طيب وحنون وتهمه مصلحتي ويبديني حتى على نفسه ..

رد: محتارة .. هل اكمل تعبئة تقسيط سيارة لزوج
 

زوجج يستاهل

لكن انتي يا احبه من خلال المواقف السابقة اللي بينكم
ومن خلال فتحج لمثل هذا الموضوع
اقول لج لا تقدمين على هالخطوة....
لو انتي تغيرتي جان قلت لج ان زوجج ونعم الزوج يستاهل اللي تساعده
بس انتي مثل ما انتي...

رد: محتارة .. هل اكمل تعبئة تقسيط سيارة لزوج
 

من خلال مواضيعك انتي دائماً تذكري الجانب المادي وكيف انك ساهمتي وضحيتي وصرفتي على زوجك ..
اذا كنتي متأكدة انك راح تاخذي القرض ولا راح تذكري زوجك بهذا الشي ولا راح تمنّي عليه في كل مشكلة تصير لكم اتوكلي على الله ..

رد: محتارة .. هل اكمل تعبئة تقسيط سيارة لزوج
 

أحبه

لاتكملين

مش لان زوجك مايستاهل

عشان انتي بتتحسسين من هالموضوع من ابسط خلاف ممكن يصير بينك وبينه

رد: محتارة .. هل اكمل تعبئة تقسيط سيارة لزوج
 

بصراحة يا اختي احبه
انا كنت سأقترح انك ما تكملي
لكن المشكلة انك اقترحتي عليه فأجد التنازل محرج
ماذا تتوقعي ردة فعلة لو اختلفت عذرا بعدم إكمال ما اقترحتي عليه

رد: محتارة .. هل اكمل تعبئة تقسيط سيارة لزوج
 

يعني معقولة الاخت احبه من النوع الا يمن
ما ظنتي فيها كذا
اذا الامر راح يكون بهذي الطريقة فخلاص لا تقسطي لزوجك

رد: محتارة .. هل اكمل تعبئة تقسيط سيارة لزوج
 

و أنا لا أنصحك..

طلعت سيارة أقساط لزوجتي ( طبعاً تستفيد من قيمتها )..
ندمان قد شعر راسي
لأني تدبست فيها وأنا اللي قاعد أقسطها..
وسببت لي مشاكل كثيرة..

---
كمان مبلغ 160 ألف كبير جداً
فيه سيارات عائلية مريحة وقوية وسعرها أقل بكثير...

بالتوفيق

رد: محتارة .. هل اكمل تعبئة تقسيط سيارة لزوج
 

اشكر كل اللي شارك في موضوعي .. وجزاكم الله الف خير .. ومقدرة نصائحكم ومتفهمة كل اللي قلتوه .. لكن أبي اقولكم إني لو أني حاطة اعتبار للجانب المادي مع زوجي ماكان مكنته مني يوم من الايام وارتبطت معه بميثاق غليظ الا هو الزواج ولا كان صار بيننا الحين عشرة ومودة ورحمة مدتهاة4سنوات .. الحياة مع زوجي وتعامله معي وتفكيره فيني وتقديمه لمصلحتي عن مصلحته رسخ عندي مبدأ الشراكة الزوجية .. الشراكة اللي تخلي زوجي يدفع500شهريا للسواق عشان يرجعني من دوامي بس ، عشان مايأثر علي تأخيري أو غيابي عن العمل ، مع انه مو مجبور .. وأما متأكدة لو واحد غيره كان قال بكيفها تبي تدفع لسواق يوديها دوام ويرجعها ولا ماعلي منها .. من نفسه جاب سواق ويدفع راتبه الشهري .. كان هالشيء بالنسبة لي مثل الاختبار اللي تفوق فيه زوجي بامتياز .. أبعد هذا تلوموني إذا وقفت بجنب زوجي ولو بشيء بسيط وهو متكفل في الباقي .. إضافة الى ان اخوي قبل فترة طلب مني 40الف كان بحاجتهم بعد مشكلة اعطاء امي مبلغ شهري كما تتذكرون .. والله ان زوجي هو بنفسه حول المبلغ وبالعكس شجعني على فعل الخير دام اخوي احتاج ..

كما انه بالنهاية انا المستفيدة على اقل تقدير السيارة بأسمي يعني الحمدلله مو خسرانة شيء .. بالعكس كسبت العشرة الطيبة مع زوجي والذكرى الطيبة ورضا ربي أولا وآخرا..

رد: محتارة .. هل اكمل تعبئة تقسيط سيارة لزوج
 

من اللي لامك انك تساعديه؟
احبه
اذا صار بينكم موقف و تكلم معك زوجك بشكل جاف. كأي إنسان يمر بلحظات كدر و نفسية

هل مساعدتك له ستضعينها شماعة بأن لا يخطئ ابدا. ؟