|
غيرت اسلوبي في التعامل مع زوجي مستجد رد13
السلام عليكم حبايبي
رجعت لكم اختكم عروس الروض من جديد وطالبه منكم الاستشاره.. اخواني و اخواتي انتم الحين صار عندكم خلفيه نسبيه عن اطباع زوجي واطباعي وخلفيه بسيطه عن حياتنا ومابها.. قبل كم يوم كملنا سنه من زواجنا وانا بالأشهر اللي طافت كنت لما تصير مشكله بسيطه او نقاش او اي حده في الكلام كنت ما اقصر ومستحيل اسكت كنت لازم ارادده حتى لو بشي بسيط وسكتت. المهم اني لازم اقط كلمه او كلمتين ثم اندم واحس السالفه تنقلب علي حتى لو كانت لي واروح انا اعتذر منه حتى لو هو غلط بحقي ابرر واقول لا لازم انا اعتذر لاني راددته وعيب ومن هالكلام واروح اعتذر له.. وتعالو شوفو انواع التغلي والتصدد وكأني كفرت استغفر الله.. تالي يرضى بعد طلوع الروح الحين انا ومن فتره بسيطه من حوالي شهرين كذا ياناس تغير حالي ومادري ليش صرت ما ارادده لو يقول اللي يقوله. اسكت واطنشه واطلع من المكان اللي هو فيه.. وما اعتذر لو على قص رقبتي اذا مو انا غلطانه حتى لو بوز وكشر ورفع صوته. اعرف نفسي اذا مو غلطانه ما اعتذر ولا ارد بولا كلمه اسسسسكت منه كلش.. احياناً اقول بخاطري لازم ارد عليه لانه رفع صوته عشان سبب تافه. ثم ارد واتعوذ من ابليس واسفهه.. واللي يقهرني زود انه فيها هذا الطبع ومن زمان سوا انا غلطانه او هو مايعتذر لو يقصون راسه انقهر انا يرفع صوته واطنشه واسكت واروح من قدامه ومع كذا مايجي بعدين ويعتذر مو شرط يقول آسف يسوي اي فعل دليل اعتذار عادي وانا بمشيها لا ابد اسمع كثير هنا تقولون اذا سكتي وماراددتيه يجي بعدين ويعتذر منك. هذا ابد يقهرني واقول بنفسي ليتني راددته ع الاقل يبرد قلبي شوي.. تكفون قولولي طريقتي صح ولا هذي اهانه لي والمفروض ارد حتى لو بكلمه بسيطه عشان يعرف اني ما ارضى ينرفع صوت علي.. (تم تعديل العنوان ليتناسب مع الموضوع) (مستجدات الرد13) http://66n.com/forums/showpost.php?p...8&postcount=13 |
رد: انا صح ولا غلط
وعليك السلام ورحمة الله وبركاته
الموقف هو من يحكم تصرفك فبعض الأحيان من الحكمة السكوت في نفس اللحظة إذا كان الوضع مشدود ولكن في كل الأحوال... لامانع من أن تخبري زوجك برأيك وتوضحي الصورة وتدافعين عن نفسك ولكن إختاري الوقت المناسب... فالهدف هو إيصال صوتك حتى لو بعد الموقف أما طريقة الإعتذار ومن يعتذر... فتحتاج إلى مصارحة مع زوجك في ساعة صفا... لتوعية بعض بأنه ليس في الإعتذار إنتقاص من قدر النفس بارك الله فيك |
رد: انا صح ولا غلط
والله كأنك تتكلمين عني ...
كنت اذا عصب لازمم اعصب وارمي عليه كلام في الاخير تنقلب علي .. وتركت ذي السياسه وصار ا اذا عصب اسكت وانا مققهورة ابي ارد علييه ... بس طبعان في الاخير مايعتذر بس يتكلم عادي ماكان صار شي واجلس انا مبوزة ماتكلم معه ... ونفسسك محتاره طريقتي صح او غلط |
رد: انا صح ولا غلط
المشكله انا مع الطريقه الجديده اسكت عنه ساعه ساعتين كذا وانا ابدا اتكلم كن شي ماصار ونسولف عادي..
واخوي الرسمي.. قلت له كثير ان الاعتذار مو عيب ولا ينقص من قدرك شي بس مايرد احس انه مو مقتنع وفيه طبع بعد.. لما يصير موقف كبير كان اًو صغير واسكت انا ولا ارادد اخلي يطوف يوم يومين كذا ويكون الجو صافي وافتح معاه موضوع عشان تكون حياتنا اوضح مايعترف بغلطه حتى لو ساعة صفا على قولتكم. يقول انتي ترفعين ضغطي وعنيدده ومدري شنو جربت كذا مره في ساعه صفا افتح موضوع وينقلب علي عشان كذا قررت ارمي كل شي وراي بس اخاف يجيني يوم وانفجر انسان مايعترف انه يغلط خييييير شر |
رد: انا صح ولا غلط
اقتباس:
حسيت اننا مسوين كوارث بحياتكم . عموماً الله يصلح ما بينكم . ويحفظكم ويزين حالكم . حاولي تفتحين جلسه نقاش وقت ما يكون هادي ومو شرط يكون فيه مشكله بذاك اليوم . وشرط جو الجلسه يكوم بعيد عن البيت عشان ما يأثر سلبي على النفسيه . وأتمنى من الله يصلح الحال للجميع . dff |
رد: انا صح ولا غلط
بالعكس طريقتك صح
لا تراددينه الرجال ما ينحاكون إذا عصبو أكثر شي مرعب إذا عصبو أستغرب من ألي ترادد وتتحدى زوجها وسالفة الأعتذار أبداً ما ينقص من قدرك أنتي متضايقه لأنك لما أتبعتي هذا الأسلوب ما يجيك يعتذر حطي ببالك الرجال ما يعتذرون أعتذارهم مختلف عننا أذا نسى الموضوع ويكلمك عادي ما كأن صار شي أو إذا طلعك يمشيك أو إذا تغزل .................... [COLOR="Redهذا أعتذارهم 😒 وسعي صدرك |
رد: انا صح ولا غلط
اقتباس:
أتوقع في شي مو عاجبه في شخصيتك مع العناد مو أنه ما يشوف نفسه يغلط أبداً الأنسان مايرى عيوبه خليه يراجع نفسه الله يهدي النفوس |
رد: انا صح ولا غلط
ماعليك منه اذا انتي مو غلطانه واثقه من نفسك طنشيه ولا تردادينه
|
رد: انا صح ولا غلط
كما قلتيها ...يحط نفسه ماهو الغلطان ابدا بنظرو ليش يعتذر
يا ريت تكتبي بعض المواقف الي صارت واختلفتو عليها ...او عصبته منك يظهر ان تفكيركما مختلف كثير عن بعض لهذا يصير كثير الاختلاف في الراي حاولي تفهميه اكثر وتتجنبي قدر الامكان ما يجعلكما تختلفان فيه هناك امور تمس الكرامة وتجرح النفس ان كان اختلافكما بعيد عن هذه الامور فلا داعي للاختلاف وغيري تفكيرك و حاولي ترضيه وعيشي مرتاحة بلا وجع راس ولا وجع قلب |
رد: غيرت اسلوبي في التعامل مع زوجي ومحتارة
السنة الاولى من الزواج اذا كان باليوم على الاقل فيه اختلاف واحد الى ثلاثة اختلافات فانتم على خير في زواجكم وراح يكون مثالي ان شاء االه ، المهم هو تقبل الاختلافات ومرور السنة الاولى.
|
رد: غيرت اسلوبي في التعامل مع زوجي ومحتارة
شوفي يالغالية فيه أمور لازم تنتبهين لها.. أقرأي كلامي شوي شوي وركزي فيه
تقولين اسكت ولا ارد. هل سكوتك إيجابي بمعنى تظهرين له إنك رغم انك متضايقة من موقفه الا انك تستمعين له. أو سكوتك سلبي، بمعنى تصدين او تلعبين في الجوال وهذه برأيي أشد الما من كونك تردين عليه. بمعنى أخر ممكن سبب غضبه لانه يعتقد انك ماكنت تستمعين له بقدر ماكنتي تعطينه على قد عقلة وهذا بحد ذاتها مؤلمة الامر الاخر الطبائع تختلف. بعض الرجال يعتذر بالفعل وبعضهم بالكلام والبعض يفتح الله لا فعل ولا قول...... وهذا لا يعني انه سيء بل هذا طبعه وان كنت حريصة على بيتك تأقلمي مع هذا الوضع.. وعلى فككرة ممكن مع التنبية والاسلوب الحلو يعدل من طبعه قليلا بمعنى بين فترة والثانية قولي انا حساسة يأثر فيني الكلام، انا احب الشخص الذي ينتقي عبارته، انا احب الشخص الذي يسيطر على غضبه لاحظي كررت الانا لان ان ماكنت غلطانة اذكر لك موضوع كان الانا عندك صفر ... دائما احسك تقللين من قدر احتياجاتك كمرأة الامر الاخير، ماقدر اقولك ردي او لا تردين لانه على حسب الموقف... مثلا لو قالك لك انت مهملة ماغسلتي ملابسي اقولك لاتردين واتركيه يعبر عن غضبه وقولي يصير خير... لكن اذا لا سمح اتهمك في شيء عظيم هنا اقول ردي عليه وحاولي يكون الرد مقتضب الله يهدي نفوسك ويجعله مايشوف من النسوان غيرك :) |
رد: غيرت اسلوبي في التعامل مع زوجي ومحتارة
ان شاء الله ماكون لخبطت بينك وبين عضوة ثانية
مو انت اللي من فترة كنت حامل؟ وانت زوجة ثانية ؟ مادري وش يجيني اذا دخلت المنتدى تضرب المواضيع في مخي ماعاد افرق بين القصص هههه |
نفسية زوجي اتعبتني
مرحبا يا اخوان واخوات..
اليوم حدي مزعوجه ومضايقه صار بيننا نقاش حاد وصل اننا كل واحد فينا رفع صوته ع الثاني.. والسبب كان هو: اليوم عندي عزيمة عشاء لأهلي وكانت العزيمة فكرته اهو ومستانس فيها ورحنا جبنا نواقص العزيمه وكل شي حلو لما رجعنا البيت طافت ساعه ساعتين وانا احوس بالبيت والحبيب قاعد ع الشيشه والواتساب ويبتسم ويضحك وبصراحه فار دمي بنتي تصيح ولا همه وانا مشوار لبنتي ومشوار للترتيب.. وهو ولا همه رحت خذيت بنتي واعطيته ياها.. سكتت عنده شوي وقال لي يلا اخذيها قلت له مابي انا ابقوم اجهز خلها عندك وقمت قال لي كلمة كسرتني والله.. قال: محد بيكسر خشمك الا انا انا هنا قفلت معاي مع اني والله العظيم صار لي مده طويله ابلع نفسيته واسكت اقول لان شغله متكركب يلا مو مشكله فتره وتعدي. بس خلاص مافيني انفجرت والله قلت له صار لي مده صابره على تكشيرته نادر يضحك وعلت اصواتنا حيل.. بعدين كلام كثير مزعج ماعرف هل هو قاله من قلبه او قاله لانه منفعل ومعصب..؟؟ شوي وجو اهلي وما احتكينا في بعض ولما راحو بعد العشاء دخل الغرفه ولا حد فينا كلم الثاني.. شوي وسمعت باب البيت يتسكر.. دقايق وارسل لي في الواتساب انا رايح اتابع المباراه ومارديت عليه تكفون قولولي منو فينا الغلطان والله احس بنار في صدري احس في داخلي عصبيه وغضب ماعرف كيف اطلعها شسوي وانا اعرف مستحيل هو يعتذر.. |
رد: مزعوووووجه 100%
مو فرض و لا واجب عليه يمسك البنت
اذا مسكها من نفسه ما قصر و اذا رفض ما يلحقه شيء |
رد: مزعوووووجه 100%
اوك ادري مو واجب عليه
بس يشوفني مشغوله والبيت معفوس وهو ولا رحمني.. مابينقص منه شي اذا مسكها وشالها شوي (( رفقاً بـ القوارير )) من باب الرفق والرحمه مو اكثر |
رد: مزعوووووجه 100%
الموضوع بسيط إن شاء الله..
لا تزعلي نفسك ولا تتضايقي.. أحياناً بعض المشاكل. تكون بسيطة ولكن الشيطان يكبرها.. ... معاك حق مضغوطة طول اليوم من ترتيب وتجهيز.. ولكن خلي صدرك وسيع ولا تعتذري ولا تنتظري إعتذار.. لأن المشكلة ما تساتهل.. صلي ركعتين وأستغفري وتعوذي من الشيطان.. وبحول الله يذهب كل ما بصدرك.. وترجع المياه لمجاريها.. وفقك الله |
رد: نفسية زوجي اتعبتني
عزيزتي عروس الروض
من اسبوع تقريبا ..قلتي انك غيرتي اسلوبك معاه وما صرتي تراددين زوجك في الكلام ليه رجعتي لنفس الاسلوب وهو ما وصلك لنتيجة مرضية مع زوجك؟ بما انه ارسلك انه رايح يشوف المباراة يعني الموقف ا ن ت ه ى ارجوك افردي وجهك ولا تناقشينه في شي لانه أكيد ما يقصد الكلام اللي سمعتيه وقت ما هو معصب .. بإختصار انتِ مضغوطة.. مع وجود رضيعة صغيرة وأمور ملخبطة اللي حصل طبيعي ويحصل دائما في كل البيوت وقت العزايم .. ويمكن _ والله اعلم _ انك ما انتبهتي لأسلوبك في الكلام مع زوجك لما طلبتي منه يمسك البنت معليش مو حلوة ابدا تقولين له ما ابغى امسكها وبقوم اجهز! لو قلتي له باسلوب حلو حبيبي امسكها ثواني بس بروح اجهز بسرعة واجي وجلستي ساعتين كان تركك على راحتك .. كلامي مو معناه انك انتِ الغلطانه لكن حياتكم تفتقر للأسلوب الحلو في الكلام والنقاش.. ما ادري ليه تعطين الامور أكبر من حجمها .. اعتقد لو ان زوجك في وجهك يوميا وانتوا على هذا الحال بتوصلون للإنفصال لا سمح الله.. استغلي الفترة اللي يكون مو عندك في الاسترخاء وترتيب حياتك من جديد والله يوفقك.. |
رد: نفسية زوجي اتعبتني
الله يصلح الحال ويهدي البال
بنتك مسؤوليتكم انتم الاثنين واللي يقول غير كذا غلطان بس دوري عذر لزوجك يمكن انه تعبان او طفشان لانك اخذتي وقت طويل بعيده عنه في التجهيز والترتيب وهو يبغاك جنبه حاولي في المرات الجايه تنظمي نفسك سوي تجهيز مسبق للاشياء تبع العزيمه وقت تكون بنتك نايمه وزوجك في دوامه ترى معظم النساء يسو تجهيز مسبق ووظعه في الثلاجه حتى غرفة الاستقبال يتم تنظيفها وتجهيزها قبل بيوم ووضع كل شى فيها حتى اباريق الشاي والقهوه بس فاضيه عشان بس وقت جيت الضيوف تعبيه فقط بنتك اشتري لها كرسي من ايكيا او هوم سنتر كرسي اطفال وخذيها معك المطبخ منها تشوفيها وتكوني مطمئنة عليها وكمان هي تكون مستانسة وهي تشوفك ترى عادي احط عيالي من سن خمسة شهور فيه حاولي تمتصي غضب زوجك وتتركي غضبك بكثرة الاستغفار والابتسامه في وجهه حتى يتعود معد يخاصم اذا شافك مبتسمة |
رد: نفسية زوجي اتعبتني
الله يرضى عليكم جميعاً
كلامكم هداني كثير وريحني انا سويت تجهيز قبل بيوم بس يوم العزيمه عبالي المطبخ اغراض وخذيت وقت ارتبها واجهز بنتي واجهز انا. وبنتي الله يهديها كانت تصيح كل الوقت اقلقتني ويمكن طلعت اعصابي بدون قصد |
رد: نفسية زوجي اتعبتني
الله يصلح مابينكم
ي اختي مشكلتكم بسيطه جدا وتحدث بين اي زوجين حليها بينك وبين زوجك |
رد: نفسية زوجي اتعبتني
من متى الازواج يمسكون الاطفال ولا يهتمون الا من رحم ربي بالذات الاطفال مايتحملونهم ساعه عموما بعد مايرجع ولا كنه حصل شي وكلميه عادي الله يهدي سرك يارب
|
رد: نفسية زوجي اتعبتني
اقتباس:
اسفة للمداخله لكن سمعت الكلام اكثر من مره من متى من متى حرام نظلم الرجال كلهم |
رد: نفسية زوجي اتعبتني
عروس حبيبتي..
لله الحمد زوجي من النوع اللي يساعدني في عيالي .. من أول ما ولدت كل واحد منهم وهو يساعدني في كل تفاصيلهم .. يأكلهم ويسبّحهم ويلبّسهم وينوّمهم .. حتى البامبرز يغيره لهم .. ولما نطلع هو اللي يمسك الصغير اللي فيهم ويكون مسؤول بشكل شبه كامل عنه .. وعمره ما تذمر أو استثقل هالأمور أبداً. وفي نفس الوقت أنا عندي قناعة إن تربية الأطفال والاهتمام بتفاصيلهم مسؤولية مشتركة بين الزوجين. ومع ذلك عمري ما حسيت بيني وبين نفسي إنه فرض عليه أو مجبور أو ملزوم يسويه .. وعمري ما طلبت منه يساعدني فيهم بصيغة الأمر أو الإجبار .. رغم إني أدري إن هالمساعدة على قلبه مثل العسل. يعني: الأسلوب .. ثم الأسلوب .. ثم الأسلوب. بعدين .. تقولين: عندكم يمسك عادي لأنهم عياله مثل ما هم عيالج. تتكلمين عن مجتمعج ام مجتمعه هو؟ |
رد: نفسية زوجي اتعبتني
الحياة مشاركة بالحلو و المر
وبما انك مشغولة و الأخ فاضي من الواجب عليه انه يمسكها عنك ويعتبر نوع من أنواع المشاركة أنتي طبيعي تتنرفزي مثلك مثل أي كائن بشري له طاقة و له حدود وبنفس الوقت عليك ان تعلمي أن مشكلتكم هذي طبيعية جداً و تحدث داخل كل بيت والدليل أنها طبيعية انه وضع لك اعتبار يوم راح يطالع المباراة ولا تجاهلك نصيحة مشي المشاكل و الأختلافات الصغيرة و المتوسطة وبالتوفيق |
رد: غيرت اسلوبي في التعامل مع زوجي ومحتارة
(تم دمج الموضوعين لترابط المحتوى)
|
رد: نفسية زوجي اتعبتني
اقتباس:
اسأل عن الجنسية اوالبلد والمذهب احيانا ويفهمون غلط مع ان الاجابة توضح امور كثيرة في مجتمعات مايمسك عياله نهائيا وفي بعض المجتمعات بساعدها حتى بأعمال البيت وانا من اول ماقرأت انها تركت البنت عنده عرفت ان بيصير زعل....... كلامي هذا للتوضيح... |
رد: غيرت اسلوبي في التعامل مع زوجي مستجد رد13
مبتعثه ايوه هي انا ياقلبي
بس مافهمت كيف اسلوبي يفتقر لكلمة انا وناسيه حقي كأمرأه وضحيلي اكثر بليز مهره.. هو عادي يساعدني ويوم كنت حامل حتى الطبخ وتنظيف المطبخ يساعدني فيه وترتيب البيت بشكل عام وبنتي بعد يساعدني فيها ويداريها كثير بس هذاك اليوم استفزني قاعد يشيش وعلى جواله ويقول لي تعالي اخذيها يمكن قصده خايف عليها من الشيشه الله العالم مع إننا انا وهو متفقين مستحيل يشيش في مكان تكون اهي موجوده فيه وكثير اهو اللي ياخذها ويوديها غرفه ثانيه بس جد تنرفزت وانفعلت منه.. |
رد: غيرت اسلوبي في التعامل مع زوجي مستجد رد13
طيب حلو .. يعني الريال مب مقصر تبارك الرحمن.
يصير عاد ما نذكر له كل الأوقات اللي كان يساعدنا فيها .. وننفجر ونعلّي صوتنا عشان موقف؟! شوفي يا عروس. في زوج يمكن يي بالانفعال والصوت العالي .. وهذا ما أعرفه ولا مرّ علي. :D وفي زوج الانفعال والصوت العالي يعفرته ويفرعنه حتى لو كان الغلط راكبه من ساسه لراسه .. لأنه ياخذ انفعالج وعصبيتج على كرامته .. وما يشوفه حق أو رد فعل طبيعي لأنه هو اللي غلطان .. وهالعينة أعرفها عدل. :D والهدف الأساسي من النقاش هو أن تكسبي الموقف لصالحج وتوصلين للي تبينه .. فإن كان كسب الموقف وتحقيق اللي تبينه ما بيتم إلا بالمسايسة واللين فسايسي وليني .. لأن المهم هو تحقيق الهدف اللي تبينه وليس كسر راسه وإجباره بالغصب على تنفيذ مطلبج. خصوصاً لو كان الزوج متجاوب ومتفاعل بشكل جيد وإيجابي في مواقف أخرى. يعني شي يشيل شي .. وموقف حلو يخلينا نتحمل الموقف اللي مب حلو. |
رد: غيرت اسلوبي في التعامل مع زوجي مستجد رد13
مشكوره مهره حبيبتي..
|
رد: غيرت اسلوبي في التعامل مع زوجي مستجد رد13
بس لا تقللي من احترامه يمكن يجي يوم و ينفجر
|
رد: غيرت اسلوبي في التعامل مع زوجي مستجد رد13
كلام الاخت مهرة درر استفيدي منه
|
| الساعة الآن 04:59 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©