|
أليس من حقي زوج احبه ويحبني مستجدات رد31ــ50
اليس من حقي زوج احبه ويحبني افهمه ويفهمني ....
والله ماني عارفه من وين ابدأ.. وايش اقول لكل نفس طاقة و درجة تحمل ... سأسرد لكم ماحصل معي ولكم الحكم .. انا لا اجمل صورتي امامكم فأنتم لا تعرفونني ولا احد يعرف احد هناء .. اتكلم لكم بكل صدق والله على ما اقول شهيد .. ولا يهمني بالأعتراف بالخطاء ولو اعرف خطاي ما همني الي يصير واعتبر مايحصل ردة فعل .. انا شخصيتي ضعيفه اسكت كثير على الي يخطي علي واتحمل كثييييييير حتى انفجر فجأه.. لا ارد ابد على من يخطي علي امام الناس واخذ منه موقف .. لا احب المشاكل احب الهدوء والاستقرار في كل شي.. رغم المشاكل الي صارت بيني وبين زوجي.. الا انه اهلي في كل مره يجبروني على الرجوع اليه .. وارجع عشان خاطر ابوي وامي.. وكل مره تحصل مشكله بيني وبين زوجي .. امي تسئ معاملتها لي تحاول تحصل مشكله بيني وبينها عشان تهيني بزوجي واهله وتقول انت الغلط وهم الصح انتي تستاهلين وانقلعي لبيتك هذا بيتي انا ... سكت ومارديت . رغم انهم على يقين تام انه زوجي واهله غلطانين. ..!!! تتضايق كثير لما تشوف ابوي متعاطف معي و تلزمه بالشده معي وكل مره نفس الشي رغم انه زوجي الي يوديني بيت اهلي ويقولي انتي معاد تلزميني اذا تأدبتي علميني اجي آخذك .. انا بشر ياعالم عندي احساس مشاعر صمتي وسكوتي لا يعني اني ماحس.. امي تحرض اخواتي علي لما يطلعون يتمشون او اي مكان تقولهم لا يعلموني عشان مااروح معاهم .. تطلع تروح و ماتبيني اروح معها او حتى بناتي يروحون .... حتى الأكل تشيله عشان لا أكل وأبوي يجبر الخدامه تحط لي الاكل و تجيبه لين غرفتي .. وامي طبعاً تعصب وتقول انت الي خربتها و دلعتها...وووو وعادي تسبني قدام خالاتي وتحط اللوم كله علي ... تضرب بناتي وتخلي خواتي يضربونهن وتقول لبناتي يله روحن بيتكم يله مانبيكم ولا تجلسون عندنا بالبيت .. بناتي يجون لمي منهارات بالبكاء ويقولون ماما يله نروح للشقه .. انا صرت ما اطلع من غرفتي نهائي عشان لا اتمشكل معها ولما ينام البيت كله انزل ادور لي اكل .. وقبل اسبوعين تقريبا كان الوالد طالع من البيت 3 ايام و جدتي طالعه البيت مافيه احد غيري انا وخواتي و امي .. وطلعو من البيت رايحين المول وبناتي يبكون يبغون يروحون ورفضت امي وبدت تقولي كلام مثل السم وتدعي علي .. خذيت بناتي ورحت غرفتي على طول .. بعد مارجعو من مشوارهم نزلو بناتي يركضون عندهم فجأة سمعت بناتي يبكون بقوه نزلت اركض مرعوبه عليهم سألت وش فيهم ماحد يرد علي سألت باني شفيكم قالو ماما هاوشتنا وتقول يله انقلعي امك.. انا هنا عصبت وقلت لهم شوفو محد له دخل بناتي ولا يتكلم عليهن بشي.. مالكم دخل انا امهم وانا المسؤله عنهن .. فجأه ثارت امي بوجهي وتكلمت علي وقالت تستاهلين كل الي يصير لك وانت الغلط واهل زوجك الف نعم وانتي الكلبه .. و و و واخذت الجزمه تبي تضربني وانا جامده بمكاني وقامو خواتي يهدونها وقامت تدفع خواتي تبي تضربني وتقول والله لا اذبحها . وجت وحده من خواتي تبي تضربني وتكلمت علي وانا لا زلت جامده.....!!! وجت الي بعده والي بعده يقولون انقلعي غرفتك .. انا انهرت و كنت بضرب اختي ما قدرت بديت اصارخ عليهم كلهم حاولت اكسر البيت جاني شي مو طبيعي. . و و حده من خواتي تقولي خلاص روحي غرفتك .. رحت غرفتي منهاره .. لفيت عفشي كله ولبست بناتي اتصلت على سواق ابوعشره مالقيت مشغولين اظطريت اترك اغراضي واخذت بناتي وطلعت من بيت اهلي من الباب الخلفي بدون مااحد يحس .. رحت بيتي على رجولي كنت امشي بالشارع منهاره وابكي .. طلعت عشان بناتي .. طلعت مايهون علي الي صار مع امي واهلي .. عندي اتمشكل الف مره مع زوجي بس أمي وابوي وأهلي لا .. وابكي بنتي بالشارع تهديني تقول ماما خلاص انا اضربهم كلهم. جيت بيتي ودخلت مالقيت زوجي في البيت .. بعد ساعتين تقريبا افقدوني من البيت .. لقيت اخوي الصغير يتصل بي وانا ما ارد ويتصل اكثر من 20 مره ويرسل ردي بقولك كلمتين ولا رديت عليه .. نومت البنات ونمت عندهم عند التلفزيون. . ولما اذن الفجر دخل زوجي البيت و القى نظره علينا بعدين شال بناته ينامون عنده .. حتى ماقال السلام .. كملت نومتي عند التلفزيون وقمت الصبح وصلحت الغداء و القهوه والبيت كان معفوس وجلست انظف وارتب واغسل ملابس واقول لنفسي لك أجر وعشان بناتك بس .. وهو ياكل ويشرب ويلاعب بناته ولا تكلم معي بحرف.. ينظر لي بسخريه واستخفاف يأمر علي بطريقه سخيفه لو هي خدامه مارضت وانا البي له كل مايبي ولا بينت له شي .. يوم يومين ثلاثه .. وافكر واقول لنفسي عشان بناتك راضيه عشان ربك راضيه وانا مو قادره ابلعه ابد .. وشي بداخلي يصرخ لالالالا .. قلت راضيه وغصبن عنك هالمره بتراضينه غصب غصب ... لبست وجيت عنده وهو نايم حضنته من راء ولا تكلمت .. لف علي وقال انتي اخطيتي علي كثير انتي اعتذري لي يله اعتذري انا زوجك موعيب تعتذرين ويصرخ اعتذري .. قلت له كوني جيت اراضيك مايعني اني اخطيت عليك يمكن عصبت يمكن رفعت صوتي واعتذر لاكن هذا كله ردة فعل للي سويته قال لا لا اعتذري بسرعه اشوف قلت اسفه قال اقوى قلت اسفه قال اقوى قلت شلون اقوى ...!? قال انتي تحسين بعيب او غلط لما تعتذرين لازم تعتذرين ....... قال انا رجل وكلمتي مسموعه والي اقوله يمشي ... انا موعاجبني موضوع انك تقطعين امي هاذي وهذا بيتي وابي امي تدخل بيتي قلت امك على العين والرأس وحياها الله بأي وقت وبهلي به وبرحب وبحط الي تبي .. قال لالا انا ابي كل يوم امي تجي لمي .. قلت له انبغيت كل دقيقه قال لالا ابيك انتي الي تروحين وتعتذرين لأمي .. قلت له انا ما اخطيت عشان اعتذر لحد قال غصبن عليك تروحين طال الزمن او قصر ... قلت وبعدين انت ماتمل مشاكل ... قال لا ما امل اذا مليتي انتي امل .. ازعلي يله ياله روحي ازعلي ليش تقومينن عشان تغثينن كان خليتيني اكمل نومتي.. طلعت من الغرفه شوي لاني احس اني اختنقت .. ورحت عن التلفزيون وحاولت امسك اعصابي ولا ابكي .. و رجعت نمت وقمت ولا كأن شي صار اسوي غداء وقهوه وعشاء واهتم بالبيت وتنظيفه غير البنات و الوحام ذابحني امش خطوتين واستفرغ و انتم بكرامه.. جاء الدوام وصرت اخذ بنتي الصغيره معي على الحضانه طبعاً هذا غير قلق الصبح ويبدأ فوق راسي يله يله.. وانا اكون مجهزه كل شي والفطور وهو يفطر ويشبع ويقوم ويقول مولازم تفطرون وان لا زم اكل الصبح عشان الوحام والبنات حرام يقومون جوعانين .. ولا همه قمة الأنانية. ..! اروح الدوام يتاخر علي بالطلعه يطلع من دوامه ويروح للاستراحة ومته ماشبع جاء والله اناالي اسكر الباب لان اخر من يروح انا .. صرت اعتبره مريض وله نوع خاص من المعامله والافكار وانه شخص مستحيل الرضا وانا البي له رغباته ورضاه لجل اعيش بسلام... طبعاً لما يسافر وهو كثير السفر يجبرني على الجلوس بالشقه وكنت ارفض واروح بيت اهلي .. هالمره قال بسافر واجلسو بالبيت.. قلت انشالله. . بدأ يكرر علي قلت طيب جب مقاضي للبيت جاب مقاضي وقال مافيه قعده بالبيت !!! قلت ليش قال بس خلي اخوك ينام عندك قلت عنده جامعه ومايقدر فجأة صرخ بوجهي ليش ليش تكسرين كلمتي ليش لما اقولك خلي اخوك يجي تقولين لا .. قلت له مايبي كيفه قال سالتيه قلت ايه مره قلت له وعيا ... والصراحة امي الي كانت ترفض ينام عندي بالبيت وتقول مابق الا تشتتين اخوك عشان مصلحتك.. طبعاً من طلعت من بيت اهلي ولا أحد اتصل او سأل مايدرون انا حيه او ميته اليوم زوجي بيسافر وفتحت الواتس لقيت ابوي مرسل صور بناتي في قروب خواتي وكاتب شعر انه مشتاق و و و المغرب طق الباب اخوي الصغير ودخل سلم وقال بأخذ البنات مشتاقين لبستهن وراحن معاه زوجي قاى لأخوي انه مسافر الحين وطلع و طلع اخوي.. ............. قبل لايطلع يقول ليش ماتودعيني قلت له تروح وتجي بالسلامه.. ويناظر لي بسخريه ويطلع.. علما اني طلبت من اكل من بر قبل كم ليلة ورفض وقال مافيه قلت انا تعبانه وجوعانين قال يله بس وسكر التلفون. . طلبت منه حلاق احلق بنتي قال بعدين وكل شي يرفض ويحقق ويحاول يكون السيد وذو الكلمه المسموعه .. مليت منه اكرهه وقايله لأهلي هالشي احاول اتقبله واقول ربي يزين اموري انشاالله بس مافيه امل اسوي فيه خير ماينفع.. انانفسيتي تعبانه .. واتقبل النقد ولاكن مو حده مثلا اقولها زوجي ظالم ايش اسوي تقول لانك انتي ظالمته وهي ماعندها دليل ولاشي بكذا تتكلام وتنمق كلامها لتجعل من نفسها الرأي السديد. . (مستجدات الرد31) http://66n.com/forums/showpost.php?p...0&postcount=31 (مستجدات الرد50) http://66n.com/forums/showpost.php?p...1&postcount=50 |
رد: أليس من حقي زوج احبه ويحبني افهمه ويفهمني
اذا امك كذا متسلطه الله يعينك
كلمي ابوك يجيك في البيت ولا يخبر امك و يتفاهم مع زوجك حتى لو يحط لك ابوك غرفه في السطح لاااااازم تتكلمين مع ابوك بعدين انتي شخصيتك ضعيفه مررره ياختي ادعي ريك يهدي زوجك ويحنن قلبه حياة لا تطاق الله يعينك |
رد: أليس من حقي زوج احبه ويحبني افهمه ويفهمني
ياعمري ماتستاهلين اسئل الله العظيم في هذه الساعه ان يفرج همك
انتي مظلومه كما يبدو علاجك بين يدي خالقك دعوة المظلوم مستجابه لاتدعي عليهم بل تقربي لله الان في نظرك ليس لك سند سوى أبيك فالجميع ضدك انصحك بقيام الليل بنيه تفريج كربك وإصلاح حالك الحي بالدعاء فهم بشر وليس امام الا رب البشر الذي بيده قلوب البشر لاتحزني قد يكون البلاء سبب في دخولك للجنه لاتشكي لاحد اشكي ضعفك لله فهو الوحيد الذي بيده حل مشكلتك |
رد: أليس من حقي زوج احبه ويحبني افهمه ويفهمني
الله يفرج همك ويرزقك سعادة ..
أختي من مواضيعك السابقه واضح ان الموضوع فيه سحر ... الوضع جدا غير طبيعي جربي علاج الرقيا واستمري عليه. .والقرآن خليه شغال ببيتك 24 ساعه ليل ونهار |
رد: أليس من حقي زوج احبه ويحبني افهمه ويفهمني
اقتباس:
المشكلة من اهلها و امها بالتحديد زوجها يشوف اهلها تاركينها و ما يبغوها فيقوم يعاملها معاملة سيئة و يستغلها لو كان بظهرها اهل ما كان تستمر معه اصلا |
رد: أليس من حقي زوج احبه ويحبني افهمه ويفهمني
الله يفرج همك
أنت في وضع لا يحسد عليه ومن وجهة نظري ما تفعلينه الآن صح أسأل الله أن يكتب لك الخير في الدارين |
رد: أليس من حقي زوج احبه ويحبني افهمه ويفهمني
اقتباس:
ولا ننكر ان الكثير ينكر اصلا السحر والعين ولا يؤمن بها ..أو يرون محدودية تاثيرها مثل مافي فئة مبالغه بالعين والسحر توجد فئة مفرطة بتاثيرهما على فكرة هي كتبت بأحد ردودها انه يوجد مرض روحي بزوجها وهو رافض الرقية |
رد: أليس من حقي زوج احبه ويحبني افهمه ويفهمني
أسأل اللهَ لكِ يا مجرومةَ كلَّ خيرٍ يشرحُ صدركِ...
وأن يُبدِل حُزْنَك سعادةً ..... و يُحَوِّلَ شقاءَكِ راحةً .... و أن يُسخِّرَ لكِ زوجكِ حتى ترضين ... و أن يعوضِكَ عن كلِّ ما فاتكِ ... آمين لا تقسين عليَّ يا اختي بكلماتِكِ الاخيرة .... فإني و الله أتألمُ لحالِك ، و أسعدُ لراحتِك.... و لكِ مني دعواتٌ أُخرياتٌ طيباتٌ في ظهرِ الغيب ... |
رد: أليس من حقي زوج احبه ويحبني افهمه ويفهمني
حبيبتي انتي فترة وتعدي ان شاءالله ❤️ واللي سويتيه عين الصواب لخاطر بناتك كل شيء يهون .. الله يكون بعونك
|
رد: أليس من حقي زوج احبه ويحبني افهمه ويفهمني
وضع محزن للغاية جبر الله كسرك
|
رد: أليس من حقي زوج احبه ويحبني افهمه ويفهمني
هل زوجك يعرف بمعاملة أمك لك ؟
من متى وزوجك يعاملك بقسوة وهل يوجد سبب لذلك وهل يمكن ان يتغير .؟ |
رد: أليس من حقي زوج احبه ويحبني افهمه ويفهمني
اقتباس:
والله قلبي مو شايل ولا اقصدك لذاتك و اعذرك لسوء فهم ربما .. انا قلت كلامي الاخير لان نفسيتي تعبانه ومحتاجه حل او اقتراح او اي شي ممكن يحسن حالي شكر لك ولردك ولدعواتك❤ |
رد: أليس من حقي زوج احبه ويحبني افهمه ويفهمني
الله يجبر كسرك ويرحم ضعفك
ويجعل بناتك من الصالحات الي تقر عينك بهن ما عندي لك غير الدعاء اسال الله ان تكون ساعة استجابة |
رد: أليس من حقي زوج احبه ويحبني افهمه ويفهمني
اقتباس:
بدأ من بدت المشاكل بيني وبين اهله رغم اني كنت اشوف منهم واسكت وعمري ماشكيت بالبدايه وهم يتذمرون مني ويشتكون له مني .. ويقولون زوجتك ماتحترمك زوجتك ماتسمع كلمتك وزوجتك مو مثل باقي الحريم و و و السبب لا اعرف وما اقدر اقول اهله بس .. ومسألة يتغير الله واعلم .. رغم انه وعدني كثير انه يتغير فقط لرتجع المياه لمجرها ثم يرجع اسوء من قبل .. |
رد: أليس من حقي زوج احبه ويحبني افهمه ويفهمني
أمك من زمان كذا معاملتها لك يعني من قبل الزواج ولا شيء جديد ؟؟؟ لأنه بصراحة وضع غير طبيعي !!
|
رد: أليس من حقي زوج احبه ويحبني افهمه ويفهمني
اقتباس:
لاكن بعد الزواج الامر زاد طبعاً تحولت لشخص آخر بنظري .. والا انا توي افتح عيوني واشوف.. |
رد: أليس من حقي زوج احبه ويحبني افهمه ويفهمني
هل أمك تعاملك بهذه الطريقة منذ الطفولة ؟
|
رد: أليس من حقي زوج احبه ويحبني افهمه ويفهمني
الله المستعان ابوك للاسف ماله سلطه على أمك ...
معليش بس مو سلطة الزوجه تجعل الأب يتخلى عن بنته تخرج مايدري هي حيه ولا ميته ع الاقل يروح بيتك يزورك يطبطب عليك حتى لو فيك الف الف عله انتي بنته خروجك مع بناتك لوحدك مغامره الاتصال لوحده مو كافي .... ادعي الله انه يسخر لك أمك اذا زان حالك مع امك زانت احوالك مع زوجك والله يخلي لك بناتك |
رد: أليس من حقي زوج احبه ويحبني افهمه ويفهمني
أسأل الله العظيم رب العرش العظيم أن يُبدل جروحك وأحزانك أفراحاً لا نهاية لها..
اللي لمسته في شخصيتك ليس الضعف إنما قلة الحيلة.. فأنصحك توجهي إلى الله بالدعاء وطلب العون منه.. حاولي التودد لأهل زوجك بطرق مختلفة بالإبتسامة والبشاشة والترحيب،والأطباق من حين لآخر، وهدية لأم زوجك،،حاولي تكسبي ودهم بالطريقة اللي تريها مناسبة لكن لا تبالغي في أي شيء.. نفس الأسلوب استخدميه مع والدتك لعل الله يُرقق قلبها.. وعودتك لبيتك أراه تصرف صحيح.. |
رد: أليس من حقي زوج احبه ويحبني افهمه ويفهمني
اقتباس:
|
رد: أليس من حقي زوج احبه ويحبني افهمه ويفهمني
ربما ابتلاء من الله
اوصيك بالصبر و الدعاء وباذن الله يتغير الحال امك جاهدي في برها عشان الاجر لاتتجادلين معها وزوجك كذلك حاولي قدر المستطاع ماتجادليه وكله عشان بناتك يستاهلوا وعشانك انتي باختصار بردي على قلبك و لا عليك من كلامهم |
رد: أليس من حقي زوج احبه ويحبني افهمه ويفهمني
اقتباس:
فأنا لست بحاجه لهم .. أهل زوجي ماينفع معاهم لا ود ولا غيره لو احط لهم الشمس بيد والقمر بيد راح يبقون يضايقوني ويهينوني و يتعمدون المشاكل معي .. رغم اني حاولت كسب ودهم بكل الطرق ومافيه فايده .. وياليتهم تاركيني بحالي وبس يحرضون زوجي علي .. انا لا اطيقهم ولا اطيق الذهاب اليهم فلماذا اتودد لهم .. انا عملت جهدي الجهيد معاهم عشان تستقر حياتي مع زوجي ما اشوفهم الا كل يوم اشد من الي قبل .. دخلت عليهم أهل مثل اهلي وام زوجي امي .. و الله على ما اقول شهيد .. كان عنده اخت اكبر مني ماتزوجت و وحده كبري و2 اصغر مني .. والله اعتبرتهم خواتي لاكن الحقد والكراهية منهم بدون سبب كل شي سوه فيني يبغوني خدامه تحت رجولهم امه كانت تقولي ساعدي الشغاله بالبيت و تشكي لولدها مني .. من وين ابتدي واحكي بأهل زوجي ماراح اخلص أبدا ابد .. |
رد: أليس من حقي زوج احبه ويحبني افهمه ويفهمني
اقتباس:
نصحتك بالتقرب لأهل زوجك ليس لأنك بحاجتهم ،،بل لأجل كسب ود زوجك..لأنه من كلامك اتضح لي أن لأهل زوجك تأثير مباشر عليه..وهو طلب منك أن تتقبلي مجيئهم لبيتك.. يا أختي توددي لهم بإعتدال بدون اندفاع،، لاتعتبري أخواته أخواتك، ولا والدته أمك،، لكن تقربي بالقدر الذي يقربك من زوجك..تقرّب مصلحة..إن كان هذا الفعل يحقق مصلحتك افعليه بلا تردد. والأمر راجع لك.. ربما حقدهم عليك وإساءتهم لك منبعها الغيرة منك،،،إذا كان كذلك فادرسي تصرفاتك وكلامك ولا تثيري غيرتهم.. الله يفرج همك ويصلح حالك. |
رد: أليس من حقي زوج احبه ويحبني افهمه ويفهمني
اقتباس:
قربي منهم يزيد الطين بله ... وانا احاول اخفاء كل ما يثير غيرتهم لاكن لابد من اشعال النار بيني وبين زوجي ... يعني .. اتفق انا وزوجي نروح لم أمه ويقولي سلمي على امي وخواتي واكسبي رضاهم .. اقوله انشاالله. . اروح لهم اسلم على امه وترفض اني احب راسها او خدها فقط من بعيد وتقولي لاتقربين وكأن فيني مرض .. طيب اتركها على راحتها وعادي ولا كأن صار شي اجي ابي اسلم على خواته يمشون ويتركوني عمدآ.. وانا اسكت وتاركتهم على راحتهم .. ارجع للبيت واقوله الي حصل عشان لا يلومني واكثر الاحيان يشوف بعينه .. يروح لم اهله ويبدون يشتكون مني قبل مايسألهم سبب تصرفاتهم ويقولون زوجتك جايه لنا من وراء خشمها ليش تناظر لنا كذا وزوجتك ما تحترم امي زوجتك ماتسولف ولا تبينا وكنها مغصوبه على الجيه اكيد انت غاصبها ..ليش ماتحط لها حد وتوقفها عند حدها و و و .... وانا والله العظيم كنت اسولف واضحك وعادي ولاكأن صاير شي ولايأثر فيني حركاتهم ابد .. وزوجي يجي لمي ويقول ليش تعاملين اهلي كذا وانتي الغلط ووو واحاول اشرح له الي صاير وابين له ولايسمعني ويقول انتي الغلط.. ومستحيل اقف ضد اهلي معك .. |
رد: أليس من حقي زوج احبه ويحبني افهمه ويفهمني
اقتباس:
|
رد: أليس من حقي زوج احبه ويحبني افهمه ويفهمني
قمة سعادتهم اني اتمشكل انا وياه ..
امه تحرضه علي وتقول ماكسرت راسها ماتحترمك وين الحشيمه والله انك انظلمت ياوليدي .. شف الحريم وش يسون لرجالهن و و تفتح مسامعه تحرضه على الزواج علي تحرضه على الطلاق. . بس اهم شي عندها اني ما اخذ ولدها منها ... تنقهر لما اسافر معاه وتصر على ذهاب خواته معانا .. تحرضة انه يسافر بدوني ومع اصحابه او يسافر بأمه وخواته بس بدوني .. واحيانا خواته بس يسافرون وانا يتركني عند اهلي ويقول ماتستاهلين... تكره بناتي كرهه فضيع رغم انهم بنات ولدها .. تحرضه اني مااتوظف تتدخل بأمور لا تعنيها ولا تخصها .. تفتح مسامعه على امور غير جيده بغرض ان يكرهني تسب اهلي تسبني امام الناس وتحسس ابنها انه المظلوم المغلوب على امره الي ماله كلمه على مرته ووووو وليس هذا فقط.. الكثير والكثير. . اهم شي يقضي حاجاتهم جميعا يقضي حاجات خواته المتزوجات وانا لما اطلب شي بسيط يرفض يدفع من جيبه لخواته عادي لاكن انا محسوب علي الريال .. بعدي عنهم خلاهم مو قادرين يمسكون شي علي .. فكل همهم الان انه شوف مرتك قاطعتنا شوف عمايلها.. وهذا ردة فعل لكلام امه الي قالت لاتزورنا ولاتدخل باب بيتنا ولا نبيها .. ولما اقوله هالشي يقول لا ما تستمر الحياة كذا وانت الغلط .. |
رد: أليس من حقي زوج احبه ويحبني افهمه ويفهمني
الله يعينك مجروحه طحتي على أم زوج سليطه
حبيت أنوه لك أنتِ أكيد سمعتِ من أحد قالك إنك ضعيفة وصدقتِ ، بس أقولك إنك مانتِ بضعيفة بالعكس عندك قوة وتحمل. حاولي تعرفين كيف طريقة التعامل مع الأشخاص هذول ولا تسمحي لأحد ابداً أن يتطاول عليك وجميل إنك دافعتِ عن بناتك. انصحك بالمداومة على قراءة سورة البقرة والله يحسن حالك يارب. |
رد: أليس من حقي زوج احبه ويحبني افهمه ويفهمني
الله يفرج عنك يارب
الزمي سجادتك ودعائك واستغفارك وسترين عجبا اكثري من دعاء ربي اني مسني الضر وانت ارحم الراحمين واكثري من الدعاء ان يسخر الله لك خلقه اهلك وزوجك واهله وان يحنن قلوبهم عليك وعلى اطفالك وان يجعلهم قرة اعين وان يجعلك احب الناس الى قلب زوجك ويذهب الغيرة والحسد من قلوووب الجميع ويآلف بينكم |
رد: أليس من حقي زوج احبه ويحبني افهمه ويفهمني
الله يكون في عونك و يسخرلك زوجك و يصلح حاله
الان اصبح واضح لك بعد الي صار عند اهلك انه الاستجارة بهم كالمستجير من الرمداء بالنار . طفلتين و حامل في الثالث ما الك الا بيتك و زوجك بكل عيوبه يظل ارحم من اهلك .علي الاقل تلمي عيالك و تحفظي كرامتهم .الحمد لله دام توظفتي تساعدي نفسك و تطلعي تغيري جو و تتونسي اصبري اختي و طنشي و عماليه معاملة المريض لا تدققي علي كل كلمة يقولها و خدويه بالمسايسة و ادعي ربك عسي الله يهديه لك و يصلح حاله |
رد: أليس من حقي زوج احبه ويحبني افهمه ويفهمني
عليك بالدعااااااااء
فرصتك اذا انت مظلومة أدعي لنفسك وبناتك بالخير بتشوفين دعواتك قدام عينك.. ربي يصلح حالك ويغنيك عن من يؤذيك |
رد: أليس من حقي زوج احبه ويحبني افهمه ويفهمني
اشكر كل من رد علي ودعاء لي. .
انا الان في بيتي وزوجي مسافر واروح الدوام مع سواق و اودي بنتي للروضة. . وبنتي الصغيره اخذها معاي للحضانه. . وزوجي كل يوم يتصل يقول متى بتكلمين امي وتتعتذرين وتقولين لها الحمدلله على السلامة لانها مسويه عمليه ركب. . وانا اصلا ما بي العلاقه تتحسن معاهم لاني اكرهم واتضايق منهم ومايتفع معهم اي شي .. تبيني اعتذر لها ولاكأنها هي من اخطأ في حقي مستحيل تتنازل ومستحيل تحسن اسلوبها معي .. ايش اسوي بزوجي مع هالموال...!! واهلي لاحس ولا خبر .. ابوي يرسل لي اخوي كل يوم مغرب يجيب معه اغراض لنا ويسألنا اذا محتاجين شي ويروح .. واليوم مرسل لي رساله ابوي يقول فيه عشاء عندهم بالبيت بكرى .. وانا مالي خلق اروح و لا ابي اشوف احد .. هل الي اسويه صح لأني مليت و لا ابي اشوف احد علما اني اطلع لأجتماعات صديقاتي .. ولاكن اهلي ومجتمعي صرت اكرهه اروح واطلع معهم والسبب هو تعامل امي معي امامهم ولا تجعل لحياتي خصوصية امامهم فهي تقول وتتكلم عني وعن حياتي وهذا شي يضايقني .. مع اني سبق وافهمها واشرح لها واقولها من غير فايده تعصب علي وتقول ما بقى الا انتي تعلميني ... وزوجي اهلي واهلي مع انه هو واخواته واخوه مايعرفون اهلهم ولا يزرونهم وقاطعين بأهلهم لدرجه وحده من خواته لما قالو لها هذولي عماتك سلمي عليهم قالت انا مالي عمات!!! .رغم انهم طيبين جدآ وكافين خيرهم وشرهم حتى ايام وهم صغار كانو عايشين في جده ويرفضون يرجعون مع ابوهم عند اهلهم .. والسبب امهم تمنعهم ولا فيه مشاكل لاكن سلطه منها.. .وانا عمري ما منعت بناتي من اهلهم اخليهم يروحون وقت مايبي .. وانا يجبرني اروح لهم ما ابي .. لاتقولون عشان امورك تستقر مع زوجك سويت اشياء كثيرة لرضاه وللاسقرار حياتي معاه ولاكن ماينفع معاه ابسط شكوى من اهله يقلب الدنياء علي .. عادي عنده يخطون علي ولازم انا اعتذر لاكن ماتقطعين علاقتك بأهلي .. مااحس بأمان بحياتي معاه افكر في المستقبل كثير وكيف اقدر استقل بحياتي لانه ليس ضمان بالنسبة لي.. احس اني ضايعة ومافي احد جنبي .. معلومه هذا غير تحريض امه للزواج علي.. ولا يهمني كل الي يسونه.. وصلت لمرحلة انه لازم افكر بنفسي وبناتي وبس .. ايش اسوي برايكم |
رد: أليس من حقي زوج احبه ويحبني افهمه ويفهمني
نسأل الله لك صلاح الحال ...
|
رد: أليس من حقي زوج احبه ويحبني مستجدات الرد
عارفه نفسيتك تعبانه مررره من اهلك وزوجك واهله
دقي على امه وكلميها وتحمدي لها بالسلامه امشي حبه حبه عشان تكسبين زوجك هذا كله مصلحتك ممكن تسمعين منها كلام يضايقك خليك ماكانك سامعه شي شوفي بعدها وش بيصير ممكن بعد ما ترد عليك دقي مرتين اذا ما ردت ارسلي رساله بعدها عطيني زوجك خبر واهلك خوذي لك صينيه حلا روحي لهم خليك عادي ماعليك من كلام احد عشان خاطر ابوك اي احد يتكلم عليك وقفيه عند حده الله يسخر لك زوجك |
رد: أليس من حقي زوج احبه ويحبني مستجدات الرد
لو تسمعي مني
اذا رجع زوجك اتصل و قالك بتروحي لامي قولي له لما ترجع بروح معاك و ما دام مسوية عملية روحي تحمديلها بالسلامة مع زوجك رجلك علي رجله اجلسي معاه و اطلعي معاه حتي لو رموا كلمة طنشي و احتسبيه اجر زيارة مريض و اهلك نفس الشيئ لا تقطعيهم و تجافيهم زوري و خففي الزيارة بعدك باول حياتك و بتجني ثمرة صبرك ان طال الزمن او قصر. |
رد: أليس من حقي زوج احبه ويحبني مستجدات الرد
الله يكون في عونك
حط في بالك مافي شي يدوم ولا أحد بدايم ومستحيل تعيشين حياة مضمونة نهائي ما أقول هالشي من باب التشائم على العكس علشان تنظرين للأبعاد والسنين الجاية علاقتك بأمك وخواتك و أهل زوجك متجه لمسار مجهول يخوّف انت لا تفكرين بوضعك الحالي وانا وبناتي وببعد ، حاولي تكسبين زوجك والاحظ الحاحه عليك من ناحية الاعتذار ما راح ينتهي ابد ، لا تضغطين الموقف وينفجر بمشكلة أعمق انت في غنى عنها وخصوصا الآن وانت بنفسية تعبانة. ابدي بالاعتذار وتحمدي لها بالسلامه على عمليتها وبعده انت حددي وارسمي علاقتك معهم من جديد دامك عارفه ان اسلوبهم كذا وماراح يتغير ، خففي زياراتك ، تجاهلي تلميحاتهم ، لا تسمحين لهم يغلطون عليك. اوقف عند اشياء وغض الطرف عن بعضها لو زوجك شخصيته غير او ظروفك غير، كان بقولك ما انت مضطرة ابد بس انت في منطقة حساسة جدا. بالنسبة لأمك ، اعرف انه ابتلاء وعليك بالصبر وحاولي تكسبينها ، ولابد يجي في البيت من البنات او الشباب شخص يأثر فيها وتسمع وتأخذ برايه، استغلي هالنقطه ان وجدت. مدري وش مضمون الكلام اللي تردده قدام الناس ، بس انت انفيه بهدوء او تجاهليه وفي أثناء زيارتك لهم، لا تشكين لها بالعكس امدحي وانه صارت تغيرات في حياتك لين ما تلقى شي تحكي فيه يضايقك. اذا مضايقك شي احكي لشخص يفهمك ويحفظ همك لا تردين عزيمة ابوك ، روحي وانت مستعدة لبداية جديدة الله يفرج همك ويسخر لك زوجك |
رد: أليس من حقي زوج احبه ويحبني مستجدات الرد
يابنت الحلال أحيانا المريض ينجبر يشرب دوا شديد المرارة لأجل الشفاء والشافي الله،،
كذلك في حياتنا أحيانا ننجبر على تجرع المُر بفعل بعض الأمور من أجل صلاح الحال.. اسمعي كلام موت النخيل.. وأضيف عليه لا تشكين أهل زوجك لزوجك،ترى ماراح يسمع فيهم.. |
رد: أليس من حقي زوج احبه ويحبني مستجدات الرد
اختي حاولي ماتعلمين اهلك بمشاكلك مع زوجك لجيتيهم او بيني لهم انك مبسوطه عشاان تسكت امك عنك يمكن هي تتضايق ماتبيك تطلقين والاغلب كذا بس ردت فعل امك كذا حاولي تحسنين علاقتك بالهل زًوجك من اجل مصلحتك حاولي تحتوين زوجك انا اشوف اذا مقضي لك وموفر لك بيت ينصبر عليه وش تسًوين انا انصحك وانا بهم مايعلم فيه الا الله
الله يسعدك ويبدل احوالك للاحسن |
رد: أليس من حقي زوج احبه ويحبني مستجدات الرد
الله يعينج و يفرج همج ويصبرج
بقولج كلام ومااقصد أبدا انج قصرتي او سويتي أشياء غلط . شوفي حبيبتي أحيانا تواجهنا مشاكل مع الناس و نحاول بكل الطرق انها تنحل لكن ما تنحل . نحاول نفهم ازواجنا وجه نظرنا .. لكن ما توصلهم او توصلهم لكن ما في شي يتغير نواجه مشاكل مع اهالينا .. أهل ازواجنا .. صديقاتنا و وننتظر يفهمون غلطهم و يتغيرون لكن ما بيتغيرون الا بطريقة وحده وهي مفتاح الحل و باذن الله سبب لراحتج النفسية . الطريقة انتي اللي تغيرين تعاملج الاسلوب اللي مشيتي عليه ما جاب نتيجة .. خلاص غيريه . وبيكون صعب شوي لانج مب متعودة بالاضافة لانج اطبقين أسلوب ممكن ما تكونين مقتنعه فيه 100% . رأيي والله أعلم ... تعاملي في حياتج على انج صاحبة القرار .. مااقصد عناد وضرابه ..لا عجبتني طلعتج من بيت اوبج و تفكيرج بنفسج و بناتج بالنسبة لأهل زوجج ... أمه اتصلي فيها تحمديلها بالسلامة و خليج مرحة مب كانج تتكلمين بالغصب و بنفس الوقت رسمية . خل لهجتج بالكلام توضح انج سعيدة . ان حاولت تستفزج وتذكر مواقف و تهين ... قوليلها كلام يصكر الموضوع ويبين انه مب مأثر فيج الكلام او ماخذ من تفكيرج .. مثلا : حصل خير .. سهلة .. ربي ييسر .. مافي بيت يخلى من المشاكل ...الخ او لو زودتها فجأة اقطعي كلامها و قوليلها بنتي خاطرها تكلمج كانت تسأل عنج و عطي بنتج السماعه . هذا لو فتحت مواضيع اما انتي لاتفتحين شي و لا تناقشين .. لانه ما في نتيجة غير انج تكبرين الجروح . زوجج .. لما يرجع من السفر . خليج عادية معاه ووضحيله من تصرفاتج انج مرتاحة بحساتج ومب شاله هم . وقوليله .. اوه كلمت امك و بنتك تسحب التلفون الا تكلم جدتها .. قولي السالفة بتلقائية . و اذا قال اعتذرتي .. قولي تراني كلمتها والحمدلله الامور طيبة . و الحمدلله صحتها تمام ان زودها وتم على راسج .. قوليله اش فيك الامور تمام وشو رايك ناخذ هدية ونروح لها . لاتعطيه جواب واضح . انج مااعتذرتي . لفي ودوري فهمتي شو اقصد انتي صاحبة القرار خذي حقج وسوي اللي تبينه بأسلوب يضمن حقوقج . أهلج شوفي ما في أحن عليج منهم وان قسوا تحملي يااختي سوي شي او خذيلج شي من برع .. و لبسي وكشخي وادخلي عندهم بثقة ونفسية حلوة وان كانت مصطنعه . و خليهم يفهمون من كلامج او هيئتج انج مرتاحة في بيتج . و اتبعي اسلوب الجواب المختصر المبهم . لاتخلين حد يعرف تفاصيل حياتج . امج مثلا سبت او عايرت بطلعتج من البيت .. قولي ترا كل اغراضي هناك فاريح لي . او اي شي تسكتين السالفة . حبيبتي حتى لو تضحكين من برع قلبج وتقولين الحمدلله بناتي مالين علي حياتي او فديتها فلانه طول الوقت تسأل عن أبوها ما هانت علي . اهم شي لا تعطين معلومات .. حاولي ما تتأثرين .. لا تناقشين .. لا تجادلين .. لانج ما بتطلعين بنتيجة غير نفسية مدمرة . و لا تمين مبوزة و داقه حزن .. خلج وسط يااقلبي فالبداية مثلي الدور لكن باذن الله مع الوقت تتقنينه وترتاحين من التدخلات . و من الدق بالكلام . و بيصير تفكيرج ايجابي و شوي شوي تنسين هالمشاكل . اهتمي بنفسج و بناتج . اهتمي بتفاصيل كنتي غايبة عنها حطي لج ورد من القران .. سوي حمام زيت لج وللبنات .. العبي معاهم و ابتكروا اشيا حلوة من تسريحات او لبس لون موحد .. اطبخي شي جديد .. ..الخ اخر شي يا في بالي هو انه تشغلين سورة البقرة في البيت و ترقين نفسج و زوجج و البنات . و فيه طريقة كتبها رجل الرجال بتلاقينها في قسم العلاقات الاجتماعية هذا اللي عندي واتمنى لو حد عنده رد معارض يكتبه .. مابا الحرمة تتورط بردي . |
رد: أليس من حقي زوج احبه ويحبني مستجدات الرد
مجروحة هل وظيفتك مريحتك ماديًا ؟
سبحان الله الوظيفة بالنسبة للشخص استقرار وأمان ، ياكثر اللي اعرفهم بعد ما يتوظفون يرتاحون ويرضون ع حياتهم ويعيشون بشكل طبيعي .. الحمدلله ربي رزقك الصحة ورزقك الوظيفة ورزقك الذرية الطبيعية .. الحمدلله اشكري ربي على هذي النعمة .. ولابد من المنغصات هذي الدنيا . ولو أنا بمكانك بصراحة بدق .. ولاا يهمني اول كنت اكل بنفسي واضيق خلقي واكتم ويضيق صدري .. بس الحين مطنننننشة ولا يهموني الناس وعادي بكلمها جوال واقعد اكش ع السماعة براحتي واكشر براحتي 😂 هي كلها دقيقة حمدلله ع سلامتك ماتشوفين شر .. ولو انا منك بدخل بعيونهم بروح مغربية واخذ معي بوكيه ورد او صينية تشوكلت واكشخ واكشخ بناتي واروح لهم .. اكيد بيكون عندها ضيوف ومستحيل تقط لك كلمة روحي نص ساعة وتلييوقي معها واطلعي وارسلي لزوجك رسالة انو عشانك اغلى شخص عندي اخذت اكبر بوكيه ورحت ازور اهلك انا وبناتي ورضاك اهم شيء عندي وبلا بلا بلا واهلك بعد سايسيهم ، تقولين امك تنشر حياتك خلاص بطلي تتكلمين بطلي تنامين عندهم .. روحي زيارة خفيفة مغربية او عشاء وارجعي بدري .. اضغطي ع نفسك لانهم اهلك ورضاهم عليك اهم من رضا اهل زوجك عليك خلي حياتك كلها مسايسة .. وعارفة انه مب هذا اللي تبين تسمعينه بس هذا الحل برأيي لانك جربتي تتصادمين مع زوجك ومع اهله ومع اهلك ولا استفدتي .. فجربي المسايس والذكاء الاجتماعي |
رد: أليس من حقي زوج احبه ويحبني مستجدات الرد
اذا أم زوجك عندها واتس اب ارسلي لها وتحمدي لها بالسلامه أو اتصلي عليها ..هي كلها دقيقه وخلاص, والزيارات لأهل زوجك خليها دايماً مع زوجك اتزوروهم وتجلسي معاه وتخرجي معاه اذا انتي ويا زوجك مااحد راح يقدر يتكلم عليك وهو موجود.
وأهلك روحي العزيمه وانتي كاشخه ومجهزة بناتك وملبستهم ملابس حلوة وخلك واثقة وتضحكي ولا تجيبي طاري حياتك عندهم لا بخير ولا شر أبداً واذا سألوك قولي الحمدلله وغيري الموضوع. حاولي انك ماتكثري زيارات لهم وخليك غامضة لاتجيبي طاري زوجك او حياتك لا لأهل زوجك ولا لأهلك. اطلعي لصديقاتك أكثر واننشغلي بهواياتك في البيت ودائماً شغلي القرآن لتهدئة النفوس .. زوجك الحين بعد هالمشاكل عرفتي ان مالك سند غيره لك ولبناتك مع اني ماافضل تقولي له أبداً عن اللي سووه أهلك. عشان كذا سايسيه في الكلام وطيعي أوامره وحاولي يكون مرتاح في بيته..ايضاً حاولي تتدخري من الراتب واشتري لك أي شيء ملك سواء ارض او شقة تكون امان لك ماتدري وش يصير في المستقبل.. |
| الساعة الآن 10:43 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©