|
طلقني بشهر العسل حلت الرد 390
السلام عليكم حبايبي لي فتره عايشه في هم وغم لي ثلاثة اسابيع تقريبا ومو عارفه شسوي او شلون استوعب شنو اللي صار
انا الله يسلمكم انخطبت تقريبا قبل 6 اشهر وملجنا وتم العرس وخططنا لشهر العسل وين نبي نروح المخطط كان على اوروبا 3 اسابيع وكنت متحمسه جدا وفرحانه المهم رحنا على المطار بعد ليلة العرس ثاني يوم كانت طيارتنا المسا وكنا ناوين ناجل الدخله لي اوروبا يعني اول ليله بس كنا نسولف ونمنا من تعب ليلة العرس المهم نزلنا في فيينا وكانت اول وجهه لنا في اوروبا المهم اول ليله الحمدلله خلصنا ..... ثاني يوم بعد ما تمشينا ولفينا في فيينا رجعنا على السكن عشان تعبنا ونبي نرقد يعني هاي ثالث ليله لنا تقريبا المهم تقريبا كانت الساعه 12 بالليل عندنا وفي بلدي كانت الساعه عشر تقريبا الفرق ساعتين نحن متقدمين يعني بساعتين .. في هذا الوقت اتصل علي نسيبي زوج اختي . جلست اكلمه وعشان اوضع لكم الصوره نحن متعودين ان نسايبنا ازواج اخواتي من اخوانا يعني نطلع معهم نسولف معهم ونتكلم تلفون وكل واحد يسال عن الثاني يعني في حدود الادب يعني شي عادي . المهم تكلمنا تقريبا نص ساعه . زوجي انزعج من الوضع وكان معصب حيل ويقول خلاص سكري الخط كنت ااشر عليه شوي واسكر ماعليش كان يسال عني وعن احوالي وهيك يعني نحن متعودين عادي كلن يسال عن الثاني مثل الاخوان . وانا بصراحه استحيت اقول له يسكر من غير سبب شو بيقول . المهم زوجي طلع وراح يقعد في الصاله يوم قفلت المكالمه بعد تقريبا نص ساعه . سالني منو هذا اللي تكلمينه . قلت له هذا نسيبي علي . قال على اي اساس تكلمينه في ها الوقت المتاخر ومنو هو حتى تكلمينه . قلت له نحن نسايبنا مثل اخوانا متعودين في بيتنا نكلمهم ونطلع معهم وكان يسال عني بس . قال اليوم تسوين بلوك على رقمه انا هذا الاسلوب ما يمشي معاي نسيبج هو نسيبج وبس ما يتعدى ها الشي كيف تقولين بحسبة اخواني . قال لي المهم انا قلت اللي عندي والحين روحي نامي ورانا جدول باكر وانا بنام بالصاله . انا عصبت من ثالث ليله يبي ينام بالصاله . قلت له انا ما سويت جريمه عشان تعاملني كذا واحنا تعودنا على هذا الوضع ولو بغير ما بغير بيوم وليله . المهم قال روحي نامي الله يرضى عليج . بصراحه انا مو مستوعبه شو الغلط في الموضوع اذا نسيبي يتصل علي ويسال عن احوالي وهو صار له 3 سنوات من اخذ اختي والوضع عادي مادري ليش زوجي مكبر الموضوع . المشكله انه في رابع ليله اتصل علي وانا احترت ارد والا لا .. قلت لو ما رديت اخاف يحاتوني هو يعتبرني مثل اخته ودايم اذا تصير مشاكل معه ومع اختي يتصل يستشيرني .. المهم انا ماعرفت شسوي قمت رديت عليه ولاحظت انه زوجي خلاص معصب ع الاخر وانا احاول انهي المكالمه بس سالفه تجر سالفه الى ان قال لي عطيني زوجك ابي اكلمه . قلت لزوجي فلان يبي يكلمك . تم ياشر علي يقول قولي له نايم نايم . بس انا قايلة له قبل انه مو نايم فكيف اكذب عليه شو بيقول علينا . المهم زوجي استلم التلفون ويكلم نسيبي من غير نفس .. اللي زاد الطين بله ان نسيبي يسولف مع زوجي ويقول له ترا مو طولون ترا فلانه لها وحشه في البيت ( وقال اسمي بطريقة الدلع ) والبيت فاضي بدونها مافيه اكشن . انا مادريت الا عقب ما سكر زوجي المكالمه بشو اللي دار بينهم من كلام . المهم زوجي قال بعد ما سكر انه نسيبك يقول كذا وكذا فيا تتصلين الحين له وتقولين ترا زوجي مو عاجبه الوضع ولا تتصل علي مره ثانيه او من بكره ارجعك بيتكم وكان شي لم يحدث . انا بصراحه انصدمت ماعرفت وش اقول وما توقعت اصلا انها بتصير صدق عبالي فتره عصبيه وتعدي . المهم انا قلت له ماقدر الحين عطني فرصه على الاقل لين نرجع وافهم اختي بالموضوع وانا اصلا مو مقتنعه .. قال لي ماعلي من قناعتج هالشي غلط وانا لا يمكن اني اتقبله .. فقلت له مو مشكله يصير خير لين نرجع بعد ها الثلاثة اسابيع . فخامس يوم انصدمت انه يرتب اغراضنا وشنطنا وكان من الليله اللي قبل يرتب حجز العوده عن طريق النت في تلفونه ونا مادري .. فقال لي جهزي اغراضك وعلى بيتكم طوالي . نا اهني تنرفزت قلت له اولا اللي اسويه مو حرام ولاعيب ونحن متعودين مادريت عنك معقد .. من قلت له معقد . قال لي اي صح انا معقد وانتي طالق من الحين .. انا انربط لساني ماعرف شنو اللي صار وشلون ابين لاهلي وللناس . اشلون تونا في بداية الطريق ماقلنا بسم الله ويطلقني .. انا الان من رجعنا لي اسبوعين والحين في الثالث مو عارفه اشلون ها الشي صار .. ولاني قادره اقول لاهلي شنو السبب . قلت الهم حنا ما نصلح لبعض والرجال معقد بس ماقلت شنو المشكله بالضبط .. ما صار اي تواصل بيني وبينه .. الا في اول اسبوع من رجعنا امه ( عمتي ) اتصلت علي وتسالني عن الاسباب .. قلت الها والله يا عمتي ماعرف شنو السبب بالضبط اسالي ولدك اهو اللي طلقني مو نا اللي طلبت . الحين موعارفه شسوي ومالي غيركم افضفض . اتمنى تشورون علي ربي يخليكم (مستجدات الرد119) http://66n.com/forums/showpost.php?p...&postcount=119 (مستجدات الرد175) http://66n.com/forums/showpost.php?p...&postcount=175 (مستجدات الرد260) http://www.66n.com/forums/showpost.p...&postcount=260 (مستجدات الرد325) http://66n.com/forums/showpost.php?p...ount=325<br /> (مستجدات الرد350) http://66n.com/forums/showpost.php?p...&postcount=350 (حلت الرد390) http://66n.com/forums/showpost.php?p...&postcount=390 |
رد: طلقني بشهر العسل !!
اسفه مادريت اني كتبت كثير .. كنت اكتب بدون حاسيه اعذروني ماعرفت اشلون اختصر :(
|
رد: طلقني بشهر العسل !!
(مكانه الأنسب)
|
رد: طلقني بشهر العسل !!
الله يهديكم ..أختي زوجك أولى تدارين خاطره أكثر من زوج أختك..ولما شفتيه معصب كان حاولت تلينين معاه..وهو بعد تسرع بالطلاق بس من شدة غيرته ماتحمل الوضع حاولي تصالحينه لان أشوف الحق معاه يعصب غلط أنه تتواصلين كذا مع زوج أختك حتى لو القصد والنية طيبة لازم يكون في حدود ضيقة حاولي تتواصلين معاه وخليك هادية أظنه الآن ندمان بس ينتظر منك اعتذار على اللي صار ..وحتى كلمة معقد غلطتي فيها لانه مو معقد هو صادق أن التواصل بينكم غلط ووضحي لأهلك وأختك السبب حتى تتفادين مشاكل التواصل مع أزواج أختك مستقبلا.
|
رد: طلقني بشهر العسل !!
برايي لازم تقولي لاهلك ولاهله عن السبب عشان تنحل المشكلة .
اما سكوتك فعند العرب ماله الا تفسير واحد ... شاف عليها شي يمس شرفها او حصلها مو بنت .. وهو يستر عليها ما يقول السبب وهي ساكته ولنتو متفقين من هناك انك تبلغي اختك عن موقفه تجاه علاقتك بزوجها يعني ما راح تكوني تفشي باسرار الزوجية . شو وجهة نظرك بخصوص تكتمك عن السبب ؟؟ ليش مو حابه تقولي ؟؟ |
رد: طلقني بشهر العسل !!
اقتباس:
|
رد: طلقني بشهر العسل !!
اقتباس:
ابوي اتصل له بس ما رد عليه وانا كنت عادي لما نرجع كنت افاتح اختي بالموضوع بس هو ما اعطاني اي مجال .. بصراحه سبب لي جرح مو مستوعبه اللي صار .. وتكتمي حتى ما ازيد الطين بله واجرح اختي و زوجها واهلي رايح يستغربون منه وراح هم بيقولون عنه انه معقد |
رد: طلقني بشهر العسل !!
اقتباس:
|
رد: طلقني بشهر العسل !!
اقتباس:
الوضع غلط وعيب .. وهو لا معقد ولا شي .. إنتو اللي عايشين غلط .. |
رد: طلقني بشهر العسل !!
اقتباس:
|
رد: طلقني بشهر العسل !!
اقتباس:
|
رد: طلقني بشهر العسل !!
الحين زوج اختك يكلمك نص ساعة😳وأختك بكبرها ما كلمتك
الوضع مررررررة غلط و عيب. و ذَا زوج اختك تصرفه مخجل و هو عارف. بس انت مو مستوعبة لو قلنا زوج اختك رجل كبير بالسن و صار له متزوج اختك20سنة و انت حسبة بنته. نقول هه. يمكن تمشي السالفة. و هي غلط بعد لكن الأخ توه 3سنوات. و يقول اسمك الدلع😳 ممكن اختي تقولين لنا سالفتين من اللي قلتوهم خلال نص ساعة. يعني وش يقول انا اختي اسولف معها 10دقايق. بالكثييير و نخلص. كيف نص ساعة!!! |
رد: طلقني بشهر العسل !!
اقتباس:
كون هذا الشيء عندكم عادي لا يبرر تصرفك فالفطرة التي فطرنا الله عليها تخليك تعرفي انه هذا الامر خطا و تتفهمي ردة فعل زوجك انت تكلمي رجل من غير المحارم في ساعة متاخرة من الليل لمدة نصف ساعة وهذا الامر تكرر وزوجك حذرك وبين لك انه الامر يزعجه وعصب عليك رغم ذلك ما راعيتيه بل وقدمتي رضا زوج اختك على رضا زوجك وزدت على ذلك انك ما تفهمت غيرته فعاندتيه وما احترمتي كلامه بل وعايرتيه انه معقد! هذا في ايامك الاولى وانت عروس خجولة ودلوعة فاكيد هذا لا يبشر بزوجة حريصة على طاعة زوجها ورضاه فاختار اسهل حل وهو الخلاص والطلاق اهلك واهله لازم يعرفوا الي صار حتى لا تروح ظنونهم لبعيد وخلي الكبار يصلحوا بينكم ومشكلتكم ليست كبيرة ان شاء الله تنحل وترجعي لزوجك اهم شيء انك لا تعاندي خاصة انه في الامور الي ما تضرك وقدمي رضا زوجك وطاعته عن اي كان وكوني حذرة اذا ردك فالظاهر انه خفيف ومتسرع في قراراته فلازم تكوني حكيمة ورزينة حتى تتوازن حياتكم الله يصلح بينكم |
رد: طلقني بشهر العسل !!
زوجك دقي عليه وتفاهمي معه وطولي بالك وكوني هادئه وأنت تتكلمي معاه وسمعيه كلام حلو وانك تحبينه وتبيه واعتذري عن الموضوع ..وعاتبيه عتاب لطيف على تسرعه بالطلاق ومو كذا تنحل الأمور وبااهدوء والتفاهم تنحل ولما تكلمي ابوك لاتغلطي ف زوجك وبيني وجة نظرة بالموضوع وأنك تبغي زوجك وتحبيه عشان أبوك لما يتفاهم معه مايقفلها بوجهه ويحاول يصلح الموضوع.
|
رد: طلقني بشهر العسل !!
اقتباس:
اذكر مره ايام الخطوبه بعد الملكه ( كتب الكتاب ) .. كنا جالسين انا واختي وزوجها واخوي وزوجته في المجلس ونلعب ( اونو ) لعبة الورق اذا تعرفونها .. فكان زوجي جاي يزورنا فقلت له تعال ندخل داخل نلعب مع اخواني .. لما دخل انا كنت احسب انه خجلان لانه مو متعود .. فقعد معانا عادي .. فلما طلعنا قال لي كيف كذا الوضع مو متعود عليه اجلس مع حريم .. قلت له عادي هم اخواتك وبتتعود بعد الزواج عادي .. فما علق فحسبت ان الوضع مجرد تعود .. ماكنت ادري انه بيزعل وبيعقد الموضوع بالشكل هذا .. |
رد: طلقني بشهر العسل !!
اقتباس:
-باختصار الصواب مع زوجك. |
رد: طلقني بشهر العسل !!
اقتباس:
الحين اللوم كله علي انا مع انه هي اللي طلقني .. يعني اهو الغلطان مو انا .. مع ذلك انا اللي اتكلم وحارقه اعصابي اهني واهو ولا هامه حتى مسج ما ارسل لي .. وانا كل يوم بالليل اقعد اصيح واصيح ومحد حاس فيني .. انا بكلم ابوي اليوم في الموضوع وخل يعرف انا ليش تطلقت على سبب تافه عشان ما يرمون اللوم علي واني ما اصلح زوجه .. انا لو كنت اتكلم معاه بسوالف قلة ادب كان ما الومه .. بس كلامي معاهم مثل كلامي مع اخواني وخواتي .. اشلونك شخبارك اشتقنى لكم ولقعدتكم وسوالفكم .. مو انه قايلة له احبك واموت فيك .. ارجوكم كوني منصفين معايه .. اذا تعتبروني غلطانه فاهو بعد غلطان |
رد: طلقني بشهر العسل !!
اختي هل انت وزوجك من نفي الجنسية؟
وعادي عندكم او لا ما راح يفيدك شيء المهم انه عند زوجك غير عادي انصحك اذا كان اهلك ما رح يتفهموا الموضوع بل وينتقصوه لا تخبريهم احسن لنه ربما تكبر المشكلة وحاولي تتصلي بامه تعتذري وتخبريها بالمشكلة عموما دون تفصيل وخليها تصلح بينكم |
رد: طلقني بشهر العسل !!
اقتباس:
|
رد: طلقني بشهر العسل !!
اقتباس:
امي ما راح تتفهم ولازم تعرف شنو المشكله .. ابوي عادي راح يتفهم الموضوع مو شرط يوافق او يوافق يعني رايح اقدر اتواصل معاه .. المشكله انه عمتي اتصلت علي ولا رديت .. واخت زوجي بعد ترسل لي على الواتس اب بس انا ما رديت عليهم لاني مو عارفه شو اقول لهم .. ردك ريحني شوي |
رد: طلقني بشهر العسل !!
اقتباس:
اختي بلا مكابرة الي عملتيه خطا وكون عاداتكم هيك هذا لا يعني انها صحيحة ببعدين نصف ساعة فكيفك وكيف اخبارك مع زوج اختك! واحنا ما قلنا انه ما اخطا هو اكيد تسرع في قراره وكان بوسعه يحل هذه المشكلة بدون طلاق |
رد: طلقني بشهر العسل !!
اقتباس:
اكيد حابين يتصلو فيك عشان يصلحو بينكم اتصلي فيهم واخبريهم بالمشكلة عموما فقط دون دخول في تفاصيل ولا تخبري امك رح تنتقصو وتحقد عليه وتشوف انه فرق بين عائلتها ورح تفسدي العلاقة بينهم اختلقي اي عذر كوني حكيمة وشوفي لبعيد |
رد: طلقني بشهر العسل !!
اقتباس:
مشكلة بيتنا انه امي هي اللي تتحكم في القرارات وكل شي .. يعني هي لازم توافق مو ابوي .. ابوي راح يقتنع حتى لو قلت له الحقيقه .. بس امي ساعدنوي شقول لها عشان تقتنع .. بعد ام زوجي واخته شقول لهم .. مو عارفه شقول وشخلي .. انا محتاره وضايعه .. وهو ليش ما اتصل علي .. اقدر اتفاعم معاه افضل .. يمكن يبون يجرحوني اكثر بكلامهم اكثر من اللي ولدهم جرحني فيه .. راح ارد على اخته واتس اب لاني مابي اكلمها تلفون ابي اخذ وقتي في الرد مابي مباشر |
رد: طلقني بشهر العسل !!
عزيزتي عاشقة..
أخي لديه صديق طفولة .. كانا معاً منذ المرحلة الابتدائية المبكرة .. كبرا معاً وظلت علاقتهما وطيدة وقوية على مر السنين. طبعاً دخل بيتنا .. ونعرفه جيداً .. وتعرفنا على زوجته فيما بعد بعد أن تزوج. علاقتنا به ـ نحن البنات ـ مثل علاقتنا بأخي .. بل إن أختي الآن تتصل به هو لمساعدتها في بعض الأمور التي يحسن هو التصرف فيها أكثر من أخي. منذ بضعة شهور كان هناك غرض ما يفترض أن أوصله لإخواني الذين يعيشون في إمارة أخرى .. وكان اقتراح أخي أن يقوم صديقه هذا بالمرور على بيتي وأخذ الغرض نظراً لأن بيتي في طريقه من عمله إلى بيته. ورغم عمق العلاقة .. ورغم أننا أنا وإخوتي نشأنا في عائلة كوول :cool: .. ومثل هذا الموقف طبيعي وعادي عدنا ولا يحمل في طياته أية شبهة أو عيب .. إلا أنني رفضت. لماذا رفضت؟ احتراماً لزوجي .. لأنني أعرف أنه لن يستسيغ مثل هذا الأمر. مع العلم أن الموضوع كان سيتم في غياب زوجي في عمله .. ولم يكن سيعلم به. لماذا أحكي لكِ هذه القصة؟ لأن كوني أملك عقليةً ما لا يعني أن أستنقص من عقلية شريك حياتي .. ولا يعني أن أكابر وأتهمه بالتعقيد. لأن كوني أملك عقلية ما لا يعني أن أتجاهل أنها عقلية غير شائعة وغير مقبولة أو مفهومة عند بعض الناس .. وبالتالي يفترض أن أتفهم هذا الأمر وأتصرف على أساسه .. خاصةً إن كان يمس شخصاً قريباً مني كزوجي. موقف آخر من صديق أخي وزوجته. كنت في بيت أختي .. وهما كانا هناك كذلك مع بناتهما .. وكان التخطيط أن نجتمع جميعاً على الغداء .... ويومها جاءني صديق أخي وزوجته وسألاني إن كان زوجي سيتضايق من مثل هذا الاجتماع بيننا .. لدرجة أن صديق أخي قال لي: لو أن زوجكِ سيتضايق فأنا مستعد أخرج من البيت وأتغدا برا. مع العلم أنهما ينتميان لجنسية عربية ومثل هذه اللقاءات عادية جداً عندهم .. ومع العلم أننا اجتمعنا كلنا أنا وهم وإخواني في وقت سابق على الغداء بحضور زوجي .. ورغم ذلك وضعا في اعتبارهما عقلية زوجي واحتمال رفضه لانضمامي لجلسة فيها رجل غريب وزوجي غير موجود. الخلاصة .. زوجكِ تسرع .. ولكن تسرّعه بسبب عدم إبدائكِ أي إشارة توحي بأنكِ متفهمة لموقفه أو لديكِ نية لطاعته .. وعبارات مثل (إحنا متعودين على جذي .. وأنا ما أسوي شي غلط) لا توحي أبداً بأنكِ مستعدة لمجاراته في رغبته. لذلك .. ضروري جداً قبل أن تحاولي حل المشكلة أن تعيدي النظر في رؤيتكِ لموقف زوجكِ .. لأنج طول ما إنتي شايفة إنه معقد ما راح تنحل المشكلة ومثل هذه المواقف سوف تتكرر. أخيراً.. كان ممكن ـ شخصياً ـ أن أتفهم اتصال زوج أختكِ الأول. لكن يتصل في اليوم التالي أيضاً؟!!! لماذا؟ يعني حتى من باب اللباقة لا يليق أن يتصل بعروس في شهر العسل يومين متتاليين. |
رد: طلقني بشهر العسل !!
اقتباس:
اقتباس:
اقتباس:
اقتباس:
و أزيد عليهم أن الرسول صلى الله عليه و سلم قال عن أخو الزوج (الحمو) : الحمو الموت . فكيف بمن هو أبعد زوج الأخت !!! راجعي فتوى العلماء في مثل هذه المساءل فالآن لنعلم من هو على و من هو على غلط فلا بد من حكم و الحكم هو الشريعة و ليست العادة |
رد: طلقني بشهر العسل !!
طبعا انتي الغلطانة..
تراعين زوج اختك وعيب ماارد وعيب اصرف والعريس اللي ينتظرك ساحبة عليه!! مفروض قلتي له بعد اذنك مشغولة وسكرتي والمرة الثانية سحبتي عليه ليه كل يوم يتصل!! وعموما طبيعة العلاقة بينكم خطأ وزوجك معه حق هو مجرد نسيب مهما كان بلغي اهلك وصلحي بيتك ترا ماراح يخسر إلا أنت |
رد: طلقني بشهر العسل !!
اقتباس:
علمهم ورضاهم لا يعني أن الامر جائز وطبيعي .. وإنتي عمرك 25 سنة ماله داعي اللف والدوران أكيد عارفة إن اللي قاعد يصير حرام .. ممكن بنت عمرها 12 أو 13 سنة نفهمها إن لا يا ماما هالشي حرام ومايجوز وربنا مايرضى .. بس إنتي نقول لك هالكلام .. أعتقد قوية شوي .. |
رد: طلقني بشهر العسل !!
ارجوكم لا تقسوا عليه في الردود .. انا تربيت وعشت على انه هذا الشي عادي
|
رد: طلقني بشهر العسل !!
كيف تربيت على هذا الشيء
كم زوج اخت عندك؟ |
رد: طلقني بشهر العسل !!
زوجك لا يلام على الطلاق ابدا
الساعة 12 بليل تكلمين رجل غريب عنك ويدلع اسمك بعد ومكالمات متكررة وحذرك ونذرك وعطاك فرصة ولا رتدعتي مافية شي اسمة متعودين وماهو عذر ابدا عسى الله يعين الزوج بس |
رد: طلقني بشهر العسل !!
اقتباس:
كذلك امي وخالاتي نفس الشي .. نقعد مع ازواجهم .. ونقعد مع اولاد خالاتي .. والوضع عادي جدا .. |
رد: طلقني بشهر العسل !!
اقتباس:
ولا فية شي بدين يقول متعودين |
رد: طلقني بشهر العسل !!
اقتباس:
ومرات يحصل ويتصل فيني من رقمه ومرات تتصل اختي نقعد نسولف على لسبيكر كلنا كانا في جلسه عائليه .. مافي شي بيني وبينه والله .. |
رد: طلقني بشهر العسل !!
غريب وضعكم!
طيب أزواج خواتك. خصوصا الجدد مثل اللي توهم مخطوبين واللي صار له 3سنوات هم يقعدون عادي مع زوجات اخوتهم!هم ايضا تربوا على هذا الشيء عادي في عائلتهم؟ |
رد: طلقني بشهر العسل !!
يا حبيبتي لايضيق صدرك
إن شاء الله الفرج جاي وزوجك الله يهديه فعلاً استعجل بالطلاق .. كسرك وكسر أهلك وأنت حرصاً على رضا الله قبل كل شي لا تخالطين غير محارمك فقط زوجك كيفه من النواحي الثانية؟ إذا يستاهل دخلي أحد للصلح واعتذري وبإذن الله هو كذلك يعتذر وترجع الأمور للأحسن |
رد: طلقني بشهر العسل !!
اقتباس:
اول خطوة تقتنعي انه الي عملتيه خطا |
رد: طلقني بشهر العسل !!
الان بعيدا عن اللوم
لدي سوْال قبل الولوج الى الحل هل تجدين فكر زوجك يستند الى الأعراف او الدين؟ |
رد: طلقني بشهر العسل !!
اقتباس:
|
رد: طلقني بشهر العسل !!
اقتباس:
انا اذا حبيبت .. فاحب بجنون .. فماقد اتخلى عن زوجي .. صدري ضايق ومو عارفه شلون احلها .. ماقدر اتخلى عن شي انا حبيته .. |
رد: طلقني بشهر العسل !!
اقتباس:
بس في الدين والله اني ما ادري .. بس ما اعتقد يتعارض مع الدين لانه اذا قعدنا مع بعض نكون متسترات وكلام عام وعادي وفي التلفون نفس الشي ولا حصل مره انه يكلمني من غير وجود اختي معاه .. بل اغلب الاوقات هي اللي تتصل ويتعطيه التلفون يكلمني |
| الساعة الآن 08:06 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©