بصراحه ماني عارفه من وين ابدا مشكلتي بس كلي امل اني بلاقي عندكم حل مناسب واتمنى محد يمر على موضوعي ويطنشه بدون رد ولو دعوه لي فبكون شاكره لكم جميعا .
انا متزوجه الان من سنتين والحين حامل بشهري الثالث ولله الحمد على كل حال .. ماكنت ابي احمل لسه لكن شائت الاقدار بما لا نتمناه وكله خير باذن الله .
باختصار حتى لا اطيل عليكم كثير . انا في يوم من الايام كلمتني صديقتي انه صديقتها تدور على زوجه لاختها . وانا قلت لها طيب خل يدقون الباب وان شاء الله يبي يجيهم الجواب . المهم صديقتي طلبت مني رقم والدتي وانا اعطيته اياها واهل زوجي كلموا امي وانهم يبون يزورونا . امي رحبت بهم وهللت فيهم . صار اللقا وفاتحوا الوالده بالموضوع انا نبي القرب منكم بايد بنتكم فلانه واللي تامرون به نحن حاضرين . امي قالت ابشروا ووصلتوا خير . نبي ان شاء الله ناخذ بشور البنت فهي صاحبة القرار بالاول وبالاخير ونبي نسال عن ولدكم وان شاء الله ما يصير الا كل خير واللي الله كاتبه يبي يصير . وفعلا سألنا عن الولد في منطقته وقالوا بأنه خوش ولد وأبوه محترم وامه واهله كلهم عايله معروفه وما شفنا منهم الا كل خير وتمدحوا في اهله كثير كثير . فأنا فرحت الحمدلله جاني النصيب وباين على الولد بسم الله ماشااء الله . هذا فارس الاحلام . فترة الخطوبه ما كان يسال كثير واحيان اخته تتصل علي وتقول فلان يسال عليكي وعن اخبارك واذا انك محتاجه شي ومعليش هو يكلمني اكلمك لانه لسه خجول مو متعود على الوضع . قلت لا ابد ابي سلامتكم وما يخالف كلنا نخجل في البدايه شي طبيعي . مرت الايام بعد الخطوبه وتملكنا وصرت زوجته على سنة الله ورسوله وباقي تجهيزات الزفاف . انا لاحظت عليه عدم اهتمام وان كأنه مو ماخذ الامور بجديه وان الموضوع مستحيل يكون خجل لاني لا جلست معاه يفلها وكأنه جالس مع واحد من اصدقائه . فمره كلمته بالتلفون قلت له يا فلان ممكن تزورنا اليوم البيت نبي نتكلم في امور الزفاف رد علي ما يخالف انا مشغول ها الفتره ممكن تجلسين مع الوالده واختي و والوالد بيقعد مع العم وبيتفاهمون . قلت له هذا زفافنا مو زفافهم انا ابيك انت في اشيا ابي اقولها لك انت شخصيا واستحي اطلبها من احد غيرك . قال لي لا تعقدين الامور يا فلانه انا واهلي واحد . قلت ما يخالف لين تفضى مر علي نتفاهم . يعني متى ما فضيت . قال طيب طيب . بعدها بنص ساعه جاني اتصال من اخته وانه كلمها بالكلام اللي قلت له فقالت لي ابشري يا فلانه وامري وتدللي شنو طلباتج . قلت لها اول طلب لي انه يجي يجلس معي حتى نتفاهم على الزفاف وما بعد الزفاف من الالف الى الياء مو معقوله كل كلامي معكم وهو شايل ايده . قالت لي ما يخالف كلنا واحد ترا اهو عليه التزاما ودوامه بعد مضغوظ شوي فاعذر يه واي شي تبينه حنا موجودات باللي تامرين به . وهم قلنا ما يخالف ماندري شنو تاليتها مع هذا الريال . اتفقنا على يوم العرس وشنو اللي نبيه واللي ما نبيه والحمدلله عدت الامور علي خير . اتفقنا ان نقعد ثلاث ايام في البلد وبعدها نسافر . فهو قال لا اسبوع ما مره بعدين نبي نسافر قلت له مو مشكله نخليها اربع ايام خل نوفر صرفنا للسفره مو اهني . قال طيب مو مشكله . بعد ليلة الزفاف في ليلة الدخله قال لي ترا مو لازم من اول ليله . قلت له طيب . نمنا ذيك الليله ولمن صحيت الصباح على اساس هذه صباحيتنا ادور فلان مو جنبي . قلت يمكن انه صحى قبلي قمت ادور عليه الغرفه الثانيه او بالحمام ما لقيته . طار قلبي اخذت التلفون على طول واتصلت عليه . رد علي قال لي هلا .. قلت له اهلين وينك فيه طيرت قلبي عليك . قال لي لا ابد انا طلعت مع صديقي متعودين نفطر سوا اول الصباح !! في صباحيتنا !! قلت له ما يخالف ابيك ضروري . قال طيب اخلص واجيك . انا بصراحه استغربت اللي صار وقلت ما يخالف نطوف له تونا اول يوم مانبي زعل ومشاكل ونكد . رجع لي الظهر وانا طول هالفتره اتصل عليه وهو يقول الحين جاي . دخل علي وفي يده كيس الغدا قال لي هذا غداك انا حلفوا علي الربع الا اجلس اتغدا معهم . قلت له يا فلان حنا باول ليله واول صباحيه انت متزوج لازم تغير اسلوب حياتك مو كذا من اول يوم . قال لي تغدي انتي لا تكبري الموضوع بتحرميني من ربعي انتي . قلت له لا ما بحرمك بس وقت واغلب وقتك معي مو معهم انا زوجتك ترا . قال طيب طيب انا ابيك الحين تنامين معي . صحينا على العشا تقريبا بعد الصلاه قمت تسبحت وصليت وهو بعد وقال لي تبين تطلعين والا بتجلسين احسن لك او اوديك عند اهلك تجلسين معهم . قلت له اروح لاهلي ليش ان شاء الله .؟ في ثاني يوم تبيني اروح لاهلي خير ان شاء الله . قال لي لا لانه اذا ما تبين تطلعين انا عازميني الربع في الاستراحه وودي اوسع صدري معهم انا قهرني ها الكلام قلت له انت تشوفني نكد والا شنو حتى ادور سعة الصدر عند ربعك . ورجع يقول لي طيب طيب ماني رايح لهم ابي الغيهم من حياتي . انا زعلني كلامه وقلت له لا تلغيهم ولاهم يحزنون اذا تبي تروح توكل على الله ومسويه زعلانه . قام لبس ثوبه وطلع وجايني اخر الليل ريحته كلها دخان وقرف . قلت انت وعدتني تبطل تدخين قال لا هاذول الشباب يدخنون ماقدر امنعهم والريحه ذي منهم مو مني انا بطلت . قلت له يا فلان انا حامل ويبي الله يرزقنا مولود باذن الله انت ترضى عليه يشوفك ادخن ويقلدك لي كبر . قال لا طبعا ابحش رجوله حش . طيب قبل تحس رجوله انت امسك نفسك ترا انت بتكون قدوته في الحياه . ولكن ابد لا حياة لمن تنادي . بصراحه قبل اسبوع قال لي شوفي يا فلانه انا والله ماكان ودي بالزواج ولا اعرف وشلون ابمشي حياتي لاني مو مستعد . قلت له نعم يعني بعد سنتين تقول لي ذا الكلام وانك مو مستعد . قال ابد انا اهلي من كثر ما اني مأذيهم قالوا لي نبي نزوجك عشان تعقل وانا والله اني كنت رافض الفكره بس هم كانوا ملزمين وصار الزواج هذا وانا بصراحه قلت ابجرب ان زانت تراها زانت وان ما زانت ترا اللوم كله بحطه في راس اهلي . قلت له طيب وانا شو ذنبي من ها الزواج كله من اوله لاخره . قال لي طيب شو تبيني اسوي يعني شو اللي تبينه وانا حاضر . قلت له ابد تاخذني الحين لبيت اهلي اقعد معهم بصراحه بالي وفكري متشتت وابي اريح لي كم يوم وتبي الصدق من الاخر انا مو مرتاحه معاك ولا انت مرتاح معي . يعني اشوف الطلاق افضل الحلول . قال لي خلاص انتي روحي بيت اهلك وفكري فيها عدل وانا بعد بفكر وشاوري نفسك . قلت له انت شاور نفسك لان الغلط راكبك من راسك لساسك انا تعبت من التفكير ومن محاتاتك على كل طلعاتك بطيشك وتهورك ادعي ربي يردك سالم وانت ولا هامك . لا تنسى بيكون بينا ولد باذن الله لازم تشوف لك صرفه انت اشتبي مني ؟ . المهم انا صار لي الان اسبوع تقريبا في بيتنا ولا حتى رفع سماعة التلفون باتصال ولا جاني مسج منه واللي وصلني من اخواته انه يرتب يبي يسافر اذربيجان مدة اسبوع ويرجع . استهتار عجيب وعدم مبالاه . انا ودي الطلاق بس انا ولدي مابيه يتربي بعيد عن ابوه او انه يتشتت ولي كبر شبي اقول له عن ابوه . ساعدوني انا محتاجه نصيحة منكم . هل في امل بالاستمرار وانه يتغير ام ان الطلاق هو الحل الوحيد .