|
طلبت الطلاق بعد العقد .. بتنصحوني أرجع او لا؟
بـــســم الله الـرحمـن الرحــيـم السلام عليكم ورحمة الله وبركاته كيف حال الجميع.. يارب تكونوا بخير إلي اكتر من تلات شهور وانا بأجل الكتابة بالموقع ما بعرف ليه! يمكن الموضوع يكون طويل يلي ما حبب يقرأ ع راحته بس كل الموضوع بيدور حول هالنقاط إنو عقد علي شاب اصغر بسنتين, امه متسلطة ومتعلقة فيه عيرتني بعمري واكلت حقي بسبب عمري بعد ما ضحكوا علي واقنعوني بإنو الموضوع عادي, هوي ضعيف الشخصية, بخيل, بينقل كل يلي بيصير بيناتنا لامه, بيسمع كلام اخته وامه واهله بالامور يلي بتخص حياتنا,لكنه حنون وطيب ولين وانا شخصيا ارتحتله وهوي بيحبني, طلبت الطلاق كرمال هالاسباب واستخرت وهلأ بستشركن ارجع او لا؟ انا عندي مرض روحي من صغري وما كنت اعرف كان عندي وما زال تعطيل باغلب امور حياتي ..بلشت علاج بمنتصف العشرينات وببداية الثلاثينات تقدملي شاب من بلاد الشام بس مش من نفس بلدي كان ببداية الثلاثينات كمان بس اصغر بسنتين رفضته كرمال العمر بس وكان الوحيد يلي ارتحتله من بين كل يلي تقدمولي.. ما بقدر احكي يلي تقدموا قبل مش مناح يعني التقييم صعب بما اني مريضة روحيا وكنت ارفض لاسباب تافهة او بس اوافق هني ما بيرجعوا المهم رفضته وصار يقنعني انو العمر مش هداك الفرق وسيد البشر صلى الله عليه وسلم فعلها وانو عنا كتير قواسم مشتركه .. ما اقتنعت لان بعرف مجتمعنا وبعرف كيف تفكير الرجل العربي غالبا يعني اقل ما فيها تعيير وكأنه العمر عيب, او يتزوج علي بس كرمال شي نفسي بسبب كلام المجتمع انو تزوج وحدة اكبر منه بسنتين فأكيد رح يحس بنقص لحتى يجي يوم ويتزوج الاصغر بالرغم من انو هوي يلي اختار وكان يقنع بالطرف التاني اصريت على موقفي وكان عندي صوره في الموبايل لما تقدملي اخدتهم كنت اشوفهم بعض الاحيان وانا بقلب بالجوال ولاني ارتحتله حسيت انها فتنه انو تضل صورته بجوالي فدعيت من كل قلبي انو يارب انا كتير ارتحتلو وصعب امحي صورته من عندي لكن رح امحيها لوجهك الكريم وطاعة الك فإذا فيه خير يرجع او عوضني بالاحسن سبحان الله رجع تقدم بعد شي سبع شهور كنت كتير فرحانه لان فعلا نفسي بشخص ملتزم وملتحي وكنت اخاف من الشباب الغير ملتزمين لان ممكن غير الملتزم ما يخاف الله فيي ويعذبني بحياتي معه رجعت قلتلو انا بس عندي مشكلة العمر.. وهوي ع فكرة مطلق من قبل وتعب وهوي يتقدم ويرفضوه البنات .. قلي اظن نهينا هاي المسألة وخلينا نتفق ع امور تانية اهم قلي كمان إمي بتقول اقبلي فيي وما تخافي ما رح اغلبك كرمال عمري اصغر بسنتين وقال انو ارتحلي من اول مرة تقدملي بس انا رفضت وانو ضل يفكر فيي وانو بيحب يرتبط باكبر منه بشوي لان الاصغر ممكن تتعبه بحياتي ومش ناضجه ومن هالحكي مبدئيا اقتنعت لكن من داخلي لا ..بس خفت ما يتقدملي شخص ارتحلو وهالنقطة مهمة بالنسبة إلي لان مستحيل اقبل بأي شخص بس كرمال الناس تقول ماشاءالله تزوجت! بالنسبة لشكلي قال هوي وامه وحطوا الف خط تحت امه.. إني حلوة والحمدلله انا بعرف فضل ربي علي من هالناحية وما محتاجه تقيمهن.. بعدين بتعرفوا ليه ذكرت هالنقطة اتفقوا اهلي واهله انو يجي يخطبني واذا الموضوع مناسب نقعد بنفس الوقت لانهن بيتهن بعيد عننا قبل كان التواصل من بعيد وبالكتابة معه وبالتليفون مع امه وقليل كتير اجوا لعنا وقعدنا وكنت مستحية اتفرج فيه وامه عجبها خجلي كتير وكانت تحضني ومبسوطة كتير فيي وبخجلي ..بعدين عرفت ليه! تاني يوم قدرت اتفرج فيه شوي وعقدنا القران المسا.. نعم بسرعة! لكني ما كنت اعرف المخفي وغرتني المظاهر للامانه اول يوم كانت الام لطيفة كتير وابنها ما كان إلو دور تالت يوم بلشت شخصية الام تظهر بعد عقد القران وكمان شخصية ابنها بلشت توضح اكتر كانت علاقتهن ببعض قوية لولا الحرام لظنيت انهن متزوجين بتحكي معو بطريقة وكأنه بعدو ابن تسع سنوات رأيها نافذ وهوي قدامها ولا كأنه عمره بالثلاثينات بعد رابع يوم طلب مني قبلات وهيك وانا قلت التدرج حلو وانا مش متعودة على الاختلاط فصعب علي من رابع يوم اسمح بأي شي اكتر من مسكة إيد.. تفهم وقال طيب لكن تفاجئت انو قال لامه .. وانا بعرف انو الشاب الملتزم بيخجل يحكي هيك امور لامه! وطبعا امه قالت لامي وانا انصدمت وخجلت انصدمت كيف ما عندو الحياء يحكي لامه وكيف امه المفروض كبيرة وحكيمه بدل ما تحكيلو اصبر ولسا البنت ما بتعرفك لكنها كانت للاسف وقحة مع احترامي للجميع الا هاي الست راحت تشكي لإمي انو هيك الحال ما بينفع انو بنتك تضل خجولة .. والمصيبة اني ما كملت اسبوع لحتى تعلق على خجلي! والطامة الاكبر بتهدد بتقول لاهلي اذا ما بيصير شي من تاني يوم من ليلة الدخلة انا رح اشكيها لعمها.. والله إني انصدمت من قلة حياها والغريب انها بتحكي بالدين وصيام اثنين وخميس وكان بدها اتنقب! طبعا ابنها غالبا ما بيعلق ع كلامها بطلت اقعد معها بس تكون عنا بالبيت لاني حساسة وما بتحمل الاشخاص الفظين وخاصة لو كانت شخصية متسلطة وفظة كنت بس اطلع مشاوير برا البيت مع خطيبي مثلا اذا طعميتو بإيدي متل ما بيطعميني قال إنتي بتطعميني متل إمي! مرة عصبت وقلت إن شاءالله اموت قال بتمنى تموتي ساجدة انتي وإمي! طلبت اشيا خاصة وبديهية واساسية للعرس قال فكرتك زاهدة متل إمي! كنت احكي معو بالليل لان بالنهار مشغولة دايما فالهيئة امه ما عجبها وفجأة صار يعطيني دروس عن اهمية النوم ساعات الليل مع انه هوي يلي اخترع قصة الحكي بالليل! ما جبلي شي يوم كتب الكتاب ولا قبله ولا بعده ولا حتى حلويات ولا امه حتى! واهلي يلي جابوا الحلويات وقت العقد.. لكن بستحي احكي انو امه جابتلي اشيا ما بعرف اوصفها والله بالنسبة لهدايا عروس وبمناسبة عقد القران.. جابتلي تياب مستعملة حلق مستعمل وعليه بقع اخضر وابيض يعني خربان وساعه مستعملة واقلام مستعملة تجميعات حاطيتهن بمحفظة اقلام كمان مستعملة ولكن للامانه في بعض الاغراض باكياسها لكنها ايضا قديمه لانها ستوكات قديمة تباع بالاسواق الشعبية والغريب كانت بكل وقاحة تحكي لوالدتي خلي الشاب يلبسها .. قصدها الحلق المستعمل والساعه.. الله المستعان.. حابة تحس انو ابنها بيلبسني طقم دهب زي باقي العرسان بس بهالقطعتين الخردة! كل مرة بتطلب مني اقيس الملابس وانا مش متحملة ريحتهن ومستعملين كيف بدي البسهن! وهالحكي كله قدام ابو الشباب وهوي مبسوط بأمه وتصرفاته وكأنها ملاك من السما ما عملت ولا موقف خارج حدود الذوق والعرف العام كنت اتساءل هل عنجد هني مش منتبهين ع تصرفاتهن او بخلا او حابين يوفروا او شو؟؟! طلعت معه اكتر من مرة بالسيارة و عطوووول بالسيارة .. ولا مرة نزلت من السيارة ولا مرة عزمني ع مطعم .. الا مكان واحد هوي بيحبه محل اشيا باردة وبيطلب من السيارة للامانه كان يسأل اي حجم بطلب كنت اطلب الصغير وهوي يجيب اكبر حجم حتى يعطي الباقي لامه.. توفير؟؟! ما بعرف فتحنا مرة موعد العرس واتفقت الحماه يلي ماخدة دور الكل رجال ونسوان وقالت بدا العرس بتاريخ كذا وكان جدا قريب وانا مش جاهزة.. فقلت عن مزح بس ليه ما حدا سألني؟ قالت انتي ما دخلك! لما اكتشفت ابنها بينقل الامور الخاصة وكل شي رحت مزحت معه قدامها رسالة غير مباشرة إلها وقلتلو مش حرام يلي بيفسد وشديتو من دينيه .. قلي والله هيي يلي حلفتني! قلتو بس الرسول صلى الله وسلم نهى عن نقل الامور الخاصة وحرام عليك! وهيي كانت بس بتتبادل النظرات معه ولا حكت ولا كلمة وهيك اغلب الوقت بوجودهن مع بعض ومعي كان بغيابها يعاملني منيح بس ما يعصب الا اذا ذكرت المادة وبوجودها يتمسخر ويعلق علي ومن هالحكي! في البداية وقت العقد اهلي ما ذكروا اي شي عن المادة ولا طلبوا شي وقللوا المهر جداااا وانا قبلت بناء على انهن رح يكرموني فما ذكرنا لا دهب ولا فستان ولا عرس ولا عشا ولا اي شي و ذكرت من قبل انو حتى حلويات وقت العقد ما جاب هوي وإمو! قرب موعد العرس ونحنا ساكتين وإمو كل فترة تتصل وتسأل جهزت البنت واهلي يحكوا لا وحماتي عاملة حالا انو مش فاهمة لان الكسوة عليهن وخاصة انو المهر قليل جدا ونحنا قللناه كمهر بس ع اساس الكسوة من العريس لان المهر ما بيشتري اصلا غير فستان زفاف عادي والشيخ قال المهر للبنت تتصرف فيه كيف ما بدها مش مجبورة تشتري منه وخاصة اذا ما في اي اتفاق انها تجيب من المهر كذا وكذا المهم طلب مني ابو الشباب اجهز قلتلو بس تيجي إن شاءالله ووعدني بس يجي يشتريلي كسوة عروس عادية بس اجا وبعد انتظار طويل بيقول إمي بتقول ما الك كسوة! اهم شي إمو وكأنه كلامها قرآن طلبت نشتري فستان قال طيب اديه بعد بدك ما حددت شي قلت بس تيجي منشتري سوا قال تاني يوم إمي بتقول رفيقتها عندا واحد! اولا نقل كلام وما بيعرف يتصرف بالامور يلي بتخصنا بيني وبينه يعني لما يفتح بيت رح يضل يقول إمي قالت وإمي بتقول! قلتلو ما بدي مستعمل.. مش ملاحظين كل شي مستعمل؟! سألت حماتي المتسلطة, بدي اعمل عرس او لا؟ سبحان الله انصدمت إني بدي اعمل عرس وكأني اول وحدة بطلب هيك, قالت اعملو حفلة صغيرة بالبيت! يعني لا حفلة وقت عقد القران ولا حفلة عرس! كنت احكي لأيمتى مسلسل التوفير رح يضل ماشي هيك؟! اهلي اصروا اعمل حفلة, اجت حتى ما تطلع خسرانه قالت طيب بس منعملها إلها بالصالة وابني بالمسجد.. طبعا توفير مش اكتر! قال فرحة عمر قال!!! اهلي وافقو وانا حزينه بعد كل هالصبر يصير فيي هيك! نقلت حماتي لمحاولة التوفير التانية.. قالت متساءلة.. إن شاءالله بدكن عشا؟؟! بعاداتنا وعاداتهن في عشا.. يعني كلها ليلة بالعمر مش كل يوم او كل سنه! اهلي قالوا ايه بدون تبذير قالت إيه لاااا ما في عشا قالوا اهلي طيب كيك! ارتاحت حماتي تقريبا محاولة التوفير زبطت! بعدين عرفت انها مش طالع من نفسا تعملي عرس وخاصة عشا لان محينة تصرف قرش وخاصة حسب كلامها مافي حدا من طرف العريس ياكل! بخل؟! بالنسبة للدهب كمان عند حماتي مافي وبس اهلي اصروا فكرتنا من النوع يلي طلبنا دهب كرمال كلام الناس او نتباهى فيه.. فقالت بعيرها دهبي بالعرس! الدهب يلي استعملتو اكتر من تلاتين سنه!! ومرة قلي بالنسبة لتجهيز البيت ولا يهمك ما رح تفوتي عالبيت ويكون ناقص شي! انا من طيبتي صدقت! بس زارنا بعد فترة بيقلي انتي مملكتك بس غرفة النوم! والباقي مش من حقك تختاري , وانا جبتلك غراض المطبخ. انا انصدمت وقلتلو شو عرفك انو مملكتي بس غرفة النوم..ممكن احب المطبخ اكتر.. الخ ورفضت غراض المبطخ ومن هون لهون عرفت انو كمان مستعملين وستوكات قديمة! في صدمة اكتر من هيك! قلتلو انا مستعدة اشتري غراض جدا بسيطة ورخيصة ولا اقبل بهالاغراض المهم إمو الظالمة بعدين قالت وكأنها هيي زوجي بتقول ما في عندي غير غرفة نوم وإنو ما من حقي اختار شي تاني وحقي بس غرفة النوم! ما حدا يجي يقلي انو منعرف يلي بيخاف الله من خلال لبسه الشرعي او صيام اثنين وخميس او نقاب او لحية.. هالكلام مش صحيح.. يلي بيخاف الله ما بيظلم ولا بيكذب ولا بيفتري ولا بيبخل او بياكل حق الناس! المهم المفاوضات على امور العرس يلي ذكرتا اخر مرة كانت بجلسة وحدة وخلال هالجلسة واخيرا حماتي ام قلب ابيض طلعت السم يلي بقلبها ونطقت قالت إنو كل شي وإلو سعره وانا مش بنت 22 او 25 حتى اطلب! لو بتخاف الله بتحكي هالحكي! وكأنها بتعيب على زواج أم المؤمنين خديجة رضي الله عنها بس بطريقة غير مباشرة! قالت كمان ابنها قادر ياخد وحدة صغيرة! وهالحكي مش صحيح وابنها بنفسه قلي فرصي قليلة وما وحدة عم تقبل فيي! قالت جمالي متواضع! تتذكروا لما قلت قالت عني حلوة وابنها كان طاير فيي ومش مصدق .. بس سبحان الله بس قربت على المادة صرت امنا الغولة! قالت مش كل شي قرآن ونحكي بدع وما بدع.. الكفار يلي بيطلبوا! صرت كافرة لاني يا اخوات طلبت شي بسيط وبديهي فستان وعرس وكسوة عادية! ابنها بسبب هالطلبات وعدم تنازلي عنها قلي ما كنت عارفك متعلقة بالدنيا! سبحان الله مع اني نادرا ما اروح السوق الا لحاجة ولا بصرف على الامور التافهة وما همي المظاهر بس كل ما في الامر بدي حقي الطبيعي حسسوني إني طلبت احجز شهر العسل بأوروبا واسكن بقصر واشتري تيابي من فرنسا واعمل عرسي بنص البحر! ممكن حدا يفهمني وين الحق لان شككوني بحالي؟ هيي باختصار بتحاول تقول إنتي مش صغيرة ولا حلوة بنظري وابني ممكن ياخد احسن فلهيك تنازلي عن كل شي لان مش من حقك بهالعمر تفرحي متل باقي البنات.. طبعا نسفت كل شي اسمه حق وعدل واخلاق طبعا ابنها بخيل وما بيصرف غير الضروري جدا فلهيك هوي ساكت بكل الوقت وهيي عم بتفاوض على المال لكنه طيب وحنون ومتفهم بس بشرط ابعد عن المصاري والمادة انا محتارة هيي قلبت علي عشان الطلبات البديهية يلي ذكرتا فوق او لان كنت احكي لابنها(يلي طبعا بينقلها كل كلامي) انو ما بدي امك تعرف بخصوصياتنا وانو ما بقبل تتركني كل النهار وتقضيه مع امك بس لانها متعلقة فيك؟ لان هيي قالت لو كل ولادي موجودين وخطيبك موجود ما رح اطلب غير من خطيبك كانت تغار مني حتى اذا مجرد حاولت امسك جواله! كانت بدا نسكن بشقة مباشرة قدام شقتها من خلال تعاملي وكلامي معها حسيت يقينا لولا ما بدا تشوف حفيدها من ابنها يلي متعلقة فيه ما كانت رح تزوجه ابدا! وهاد سبب تهديدها انو اذا ما صار شي تاني يوم من العرس رح تشكيني لعمي! وهاد سبب عجلتها بموعد العرس! المهم بعد رفضهن يعطوني حقي يعني الاشيا الاساسية للعرس والكسوة ورفضه يطمني انو رح يعطيني حقي( لانه قال رح يسمحلي بس بقطعة تياب وحدة بالشهر ومرة وحدة اكل بمطعم) بعد الزواج لانه كان شايف انو امه واخته واهله اولى مني بالنفقة وبكل شي وانا بس للعلاقة الخاصة هالشي حسيتو وانتو عارفين انو الرجل قوام بالنفقة كمان! فإذا قبلت وتنازلت عن امور العرس كيف رح اضمن حقوقي العادية بعد الزواج واهله بيستغلوا طيبته وهوي شايف انو هني اولى ومتعلق بامه وهيي متعلقه فيه يعني حتى ما جمّع مصاري للزواج وكان كتير يعصب بس اسأله وين كنت تروح بمعاشك يعني الك فترة طويلة تدور على وحدة تقبل فيك! بس اهله كتير كانوا استغلالية امه تاخد مبالغ منه وابوه يرفض يرجعها وكله اجا براسي يعني عشان اثبت اني فعلا ملتزمة وما بحب الدنيا لازم ارضى بالموجود وبالبخل واهله يكملو مسلسل الاستغلال المستجدات شبه الاخيرة اني اخر مرة شفت امه بكيت وصرخت بوجها وهوي كمان وقلت انا بنسحب وقلتلو انت ما بتستاهلني وخلي التوفير ينفعكن بنفس الليلة بعتلي انو كل شي بينحل بالهدوء إن شاءالله بس وقت قعدتي معه ومع امه كان ع طول ساكت وهيي المتحدث الوحيد فضلوا يحاولوا يصالحوني وهيي اعتذرت بس سمعت من ناس انها رجعت تحكي علي نفس الكلام واكتر يعني اعتذارها كان بس لارجع وضليت رافضة كل ما اتذكر كيف جرحوني بالكلام وانا ابكي كلما اتذكر كيف صبرت كل عمري وعفيت حالي واخترت الملتزم حتى ربي يعوضني فيه لكن تسلط حماتي وتعلقها بابنها واعتبارها اني ضرتها مش كنتها وضعف شخصية خطيبي وبخله كان كله عائق اصريت على الطلاق وتطلقت وبنفس يوم الطلاق طلب مني ارجع رفضت لاني مجروجه مش قادرة انسى كيف قعدوا سنة يقنعوني بانو العمر عادي والرسول صلى الله عليه وسلم تزوج اكبر منه بسنين .. ولما وصل الموضوع للمادة صاروا يقللوا من قيمتي بس عشان ارضى واتنازل يعني عشان اوافق عليه كان عمري عادي.. بس طلبت حقي صار عمري عار علي ولازم اقبل بأي شي لان عمري ما بيسمحلي اطلب ذرة! شفت اكتر من رؤيا إنو اجا يرجعني واني ركبت معو بالسيارة وانا ما عم بقبل حدا هلأ خايفة ما انساه وانا ما برضى حدا يرتبط فيي وهوي بيفكر بطليقته فما برضاه لغيري انا ارتحتلو وهوي حنون وكان لين معي بس امه واخته كلمتهن ماشية وعيوبه الابرز شي هيي البخل ونقل الكلام وبيسمع كلام امه واخته خاصة وعيلته عامة باللي بيخص حياتنا وامه متعلقة فيه كتير حتى بسبب ظلمها والحزن يلي سببتلي هوي رجعت انتكست حالتي بعد ما ربنا اكرمني ووصلت لمرحلة متقدمة من الشفا والحمدلله على كل حال هل بتنصحوني ابعت وسيط يحكيلو انو نرجع لبعض او لا؟ مش عارفة اقرر وكل يوم بستخير سامحوني طولت كتير بالكتابة وبدون تنسيق بس مستعجلة ومضطرة |
رد: طلبت الطلاق بعد العقد .. بتنصحوني أرجع او
الله يعينك ويصبرك ، قبل كل شي انصحك لوجهه الله الكريم ، بالحجامه راح تشعرين بفرق من اول مره باْذن الله ، احفظيها و طبيقها و لا تنسيها ، اما بخصوص طليقك وأمه بصراحة صعبين و متعبين ، و حقوقك ضايعه ، يعني تحايل و مكر ، يعني من حديثك أتوقع تصرفات افضع من كذا ، يعني توقعي ان تطلب ان يطلقك بعد ما تنجبي ، او انك ترجعي و تكوني حازمه معهم و اطالبي بكل حقوقك او تقلبي الطاولة عليهم تشتكي عليهم صراحة.
|
رد: طلبت الطلاق بعد العقد .. بتنصحوني أرجع او
وعليكم السلام ورحمة الله وبركاته...
حبيبة قلبي شو حبيتك.. في الشام في متل معناه ابن أمه ابعدي عنه،بغض النظر عن مرضك الروحي لكن استغربت حقيقة بتفكير هذا الذي تقدم أمه للاسف ما ظهرت حقيقتها إلا بعد العقد وسبب طلاقه واضح جدا هو عدم اتفاق الطليقة معه بسبب أمه.. فكري بعقلك حبيبتي شو فائدة حتي وبيحكي كل شيء لأمه، الملتزم مش باللحية بس في ناس مش ملتحيين لكن كتير راقيين وناضجيين هيدا إنسان مش ناضج عكسك إنتي وتفكيرك مش كتل تفكيره.. هل السكن بجنب أمه؟! اجلسي مع حالك وفكري بعقلك بس وعمر الإلتزام كان سبب ناجح في الإرتباط المهم يكون رجل بمعنى الكلمة مصلي بار وليس متل هيدا.. واستخيري ولا ترجعي حتى تكون شروطك مجابة مع إنه مش مؤهل للزواج فكري كتير ولا تستعجلي.. إذا هيك تصرفاته من البداية شو حيكون بعد الزواج هيدا لطف من الله الك هلاك تشوفي حقيقتهن قبل أي شيء.. كل حدث سيء في وراءه لطف خفي من الله لنا.. ولك دعوات.. |
رد: طلبت الطلاق بعد العقد .. بتنصحوني أرجع او
اقتباس:
السلام عليكم جزاكي الله خير ومض القمر اللهم آمين واياكي يارب بالنسبة للحجامه بسبب مرضي بعاني كتير من التسويف بامور العلاج ومنها الحجامه ,كل ما انوي برجع بتردد لان ممكن تترك اثر على الجلد معك حق بكلامك! هوي قال طلق يلي قبلي لان هيي يلي تركته بسبب انو عاطفته قلت وانو بيبدي اهله عليها ,طبعا قال هيي بتقول بس هوي بنظره ما هيك! الله يقدم يلي فيه الخير للجميع |
رد: طلبت الطلاق بعد العقد .. بتنصحوني أرجع او
اقتباس:
السلام عليكم تسلمي حبيبتي.. أحبّك الله! جزاكي الله خير على ردك كلامك صحيح و رح ضل استخير وادعي ربنا يخترلي الخير إن شاءالله متل شو الشروط يلي لازم اشترطها حتى اضمن حقي بالمستقبل؟ هل ممكن الوحدة تكتب بعقد القران اذا مثلا نقلت اموري الخاصه لاهلك بكون طالق؟ نوع من الردع يعني او ما في من هالحكي |
رد: طلبت الطلاق بعد العقد .. بتنصحوني أرجع او
الله يفرج همك ويشفيك
استخيري ولاتجاملي احد على حسابك اذا عندك استطاعه تتحملي البخيل الله يوفقك واذا ماعندك استطاعه انسحبي من حياته احسن |
رد: طلبت الطلاق بعد العقد .. بتنصحوني أرجع او
اقتباس:
السلام عليكم آمين واياكي اختي ترانيم الفرح ما حدا ممكن يتحمل البخل لكني بدعي ربي انو اذا في أمل يتغير ارجعله واذا لا يعوضني احسن منه جزاكي الله خير |
رد: طلبت الطلاق بعد العقد .. بتنصحوني أرجع او
بس لو تعطوني طريقة كيف اقدر اتفاهم معه اذا تغير او لا واذا مستعد يعطيني حقوقي ويوفرلي حياة مستقلة عن تسلط إمو او لا انا عندي رقم تليفونه بس صعب اكتب لانه ممكن يحكي لإمو وهيي ممكن تحكي علي وتفتري علي قدام الناس وانا بصراحة شبعت ظلم |
رد: طلبت الطلاق بعد العقد .. بتنصحوني أرجع او
انتي مقتنعه بالرجعه
لاتقولي احتمال يتغير بوضعه الي مريتي فيه تقدري تتعايشي معاه استخيري |
رد: طلبت الطلاق بعد العقد .. بتنصحوني أرجع او
سؤال ومن خلاله قرري
هل ممكن تتحملين تعيشين معه حياتك كلها بنفس الضروف والا لا؟ حكاية شروط او محاولة تغير صدقيني مو مضمونة ابدااا وعلى الأغلب ماراح يصير فلا تبني حياتك وآمالك على احتمالات ضئيلة.. كثري دعاء واستغفار وربي يرزقك الصالح الكريم الصادق والتقي الذي تتمناه نفسك |
رد: طلبت الطلاق بعد العقد .. بتنصحوني أرجع او
لا ما تترك اثر ، ان شاء الله ، اذا وضعت كريم للجروح وبعدها دهنت باي كريم و الكريمات أشكال و انواع أسبوع تقريبا و يختفي ، اطلب يعملون لك تشريط. .
|
رد: طلبت الطلاق بعد العقد .. بتنصحوني أرجع او
اقتباس:
السلام عليكم الوضع يلي مريت فيه معه ومع أمه اكيد صعب اتحمله ..لكن لاحظت ان المشكلة الاساسية هيي امه بسبب تعلقها المرضي فيه وبتعامله كطفل وبدا تضل تتصرف بالكبيرة والصغيرة وهوي شايف انو هيك البر ..فهني بيعتبروا شخص واحد ودايما بتستخدم العاطفة والدموع والكذب حتى تأثر عليه نحنا الحمدلله حالنا ميسور ومتعودين على الكرم لهيك لقيت يلي عملوه صعب وهوي كان يبرر بخله بأنه الصدقة لبلاد المسلمين اولى ومش مضطر يعمل حفلة او يتكلف ويترك الناس جوعانين وبيقصد بالمسلمين والناس هني قرايبو واخته المحتاجين ببلده وانا كتير ذكرته إني شرعا اولى بالنفقه حتى من ابن السبيل والجهاد في سبيل الله.. حسب نص الحديث كان يقول انتي عليكي اعبيلك البراد! وكأني عايشة بس للاكل سبحان الله بس ممكن يتاثر عليه واقنعه يشتريلي اي شي ضمن حقوقي بس للاسف تاني يوم بياخد محاضرة من اهله وبيغير رأيه الخلاصة ممكن اشتغل واتحمل البخل يلي هوي بيسميه حرص لكن ما بقدر اتحمل تسلط امه على حياتي وكأنها زوجي ولا بتحمل ينقل خصوصياتي وما بعرف اذا في علاج لهيك او لا من اصعب الاشيا يلي عملتا إمو وبعدين هوي صار يعيد وراها.. إنهن بلشوا يقارنوني بخواتي الاصغر.. يعني كانت تقول هيي مش فلانه حتى تاخد حقها وهوي يعيد نفس الكلام بسبب انو إمو كلامها وحي صعب يكون غلط فمتل الببغاء بيعيد بس بغيابها بيدلعني وبيقلي حلوة كتير وما بعرف ليه لهلأ ما تزوجتي! كل المشكلة اني ارتحتله وانا بصعوبة لحتى ارتاح لاي انسان كزوج! تقدملي الشهر الماضي شخصين بس ما قدرت اتقبلهن |
رد: طلبت الطلاق بعد العقد .. بتنصحوني أرجع او
اقتباس:
السلام عليكم بظن صعب اتحمل ومشكلتي الوحيدة إني ارتحت لهالشخص غير هيك كنت قبلت بأي شخص تاني بدون تفكير في ناس بيعرفوه هوي وطليقته يلي قبل ..خبروني إنو من النوع يلي بيسمع كلام زوجته ولهيك إمو بلشت تخرب علي لما حست انو تعلق فيي وإني كنت اعلمه كيف تكون إلو حياه خاصة فينا بدون تدخلها الغير مقبول ومن قبل قالت لإمي انا خايفة بنتك تقطعني عن ابني! عندا خوف دايما يتركا ويتزوج ومسكينة ناسية إنو هيي كمان اخدت زوجها من عند إمو! ع كل حال كلامك كله صحيح وما إلي غير ربنا رح ادعي واكتر استغفار وإن شاءالله خير |
رد: طلبت الطلاق بعد العقد .. بتنصحوني أرجع او
اقتباس:
السلام عليكم جزاكي الله خير إن شاءالله بعملها .. انا سجلت بمنتديات الشيخ عبدالله الخليفة وبلشت اتابع مع معالج عن بعد وخلال البرنامج إن شاءالله بعمل حجامه حجامه التشريط نفس حجامة الاكواب؟ انا ببلد اجنبي واكتر شي فيه تبعت الاكواب وما بعرف اذا هيي نفس التشريط |
رد: طلبت الطلاق بعد العقد .. بتنصحوني أرجع او
نعم هي بالأكواب لكن الجرح يكون تشريط ، غير عن الجرح الطويل ، ابحث في النت Glk
|
رد: طلبت الطلاق بعد العقد .. بتنصحوني أرجع او
يا آختى استعيذى بالله وكل ما ذكرت آمور هينه بجانب زوج متدين ومحب ووسيم ولديه قبول لديك يا آختى الحياة فرص وربما اذا ضاعت منك هذه الفرصة تندمى طويلاً لانما ذكرتى من اسباب لا تستاهل الطلاق واعلمى ان الزوج المحب لامه والبار بها سيكون كذلك لك ولاطفاله اذا قدر الله لكم الذرية ان شاء الله واعلمى ان آمه ضيفة لديكم كم سنة وترحل ويبقى لك فقط وطبعاً لا احد يعلم الآجال كل شىء بعلم الله كم عمر آمه وكم لديه من آخوات وهل هناك آخوات لم يتزوجن آسخيرى الله وتوكلى على الله وآسال الله ان يصرف عنكم العين والحسد وشياطين الانس والجن .. اللهم آمين |
رد: طلبت الطلاق بعد العقد .. بتنصحوني أرجع او
اللي فهمته انه طلقك قبل الدخول
يعني اول شئ استخيري الله وشوفي المناسب لك واذا حبيتي ترجعي تتزوجيه فلازم عقد زواج وشروط من جديد يعني اللي ما شرطيه من اول اشرطيه في العقد الجديد اطلبي مهر وكسوه وعشاء وفرح وبيت شرعي خاص فيك اذا وافق على شروطك تزوجي منه واذا ما وافق انتي حره تبغي تتزوجيه او لا بالتوفيق |
رد: طلبت الطلاق بعد العقد .. بتنصحوني أرجع او
اقتباس:
السلام عليكم اخ أبو مريم جزاك الله خير على ردك انا معك بكل يلي قلته لكن كنت مصدومه اول مرة بصادف ناس بخيلة هيك بحياتي وحسيت إنن قللوا من قيمتي وخاصة إني ما طلبت شي فيه تبذير او خارج عن المتعودين عليه انا كنت من زمان بتمنى واحد بار بوالديه لكن من خلال يلي شفتو ما كان كله بر.. كان تعلق مرضي وبشكل اكبر من طرف الام يعني برأيك عادي ينقل الامور الخاصة لامه واخته؟ انا كنت احس حالي مكشوفة دايما قدامهن بسبب نقله لكل شي بيصير بيناتنا وللمعلومه ابدا ما كنت احرضه على اهله بس كنت دايما احكيلو من حقي تضل امور الخاصة بيني وبينك ..هوي كتوم على اخبار اهله وكل شي من طرفهن لكن اي شي خاص فيي حتى لو تافه متل الاطفال بينقله كمان بخجل منهن لما مثلا كنا اهلي او حدا يعزمنا ناكل برا كان هوي واهله يخلوني اعبي باقي الاكل بعلب لياخدوها ع البيت وانا عندي عزة نفس لو بموت من الجوع ما بعمل هيك وبما انه كان زوجي كنت اخجل منه ومن اهله وما احب اشوفهن بمناسبات فيها جمعة ناس واكل هوي الكبير وعنده اخ واخت اخته ببلد عربي ومتزوجه عمرها قريب ال 29 ونحنا ببلد اجنبي لكن شخصيتها قوية كتير واخوها بيسمع كلامها كتير حتى كانت تحكيلي ببداية فترة العقد اذا بيعملك شي خبريني حتى اشدلك دينيه اخوه قريب من عمره مريح راسه متزوج وسكن بمدينه بعيده عن والديه لان يمكن عارف طبع امه كمان شخصيته قوية ومستقل بعكس طليقي واختار زوجته برغم معارضة اهله بعدين تقبلوا الوضع وكل الحمل على طليقي وانت عارف يا اخي لما يكون في شخص طيب وشخص اناني ومتسلط كيف بيكون الوضع .. يعني مهما نصحت المتسلط ما رح يسمعك وما مهما نصحت الطيب رح يعتبرك شرير وما بتحب الخير حتى لو كنت تحكي ضمن الحقوق الشرعية البديهية اذا ربنا ما قدرلي اشتغل بعد رجعتي إلو.. وكان بخيل علي كيف ممكن اعيش حياتي؟ هالسؤال دايما بيخطر ع بالي إمو عمرها 56 مريضة وربنا شفاها لكنها بتضل تستغل هالوضع لحتى يلبيلها اي شي بدا اياه حتى لو كان مش من حقها شرعا عمي ضعيف شخصية طيب كتير لكن ما بيمون على شي وهيي الكل بالكل محتاجة رايك بهالموضوع لو سمحت هوي عنده مهنته وبيشتغل فيها وامه كانت تجمع بضاعه مستعمله وستكوكات قديمة وصارت تبيعها بسوق شعبي وهوي بيروح معها .. قبل العقد كان مخبي علي هالموضوع لانه متحرج منه بعد فترة عرفت وقال ما احكي لحدا.. قلت طيب بس كرمال نحنا ببلد اجنبي والبنات لبسهن شبه عاري وهوي ضعيف امام هيك مناظر حسب كلامه غير إنو عنده مهنته.. فأنا طلبت يترك روحة السوق وقلتله إنو امك عندا ابوك بيصرف عليها الحمدلله وانت بتساعدهن فياريت بلاش روحة السوق وخاصة إنها يوم عطلتك فبعد الزواج بسبب تعلق امك فيك رح تزورها كل يوم وعندك دوام كل يوم الا ايام العطلة فمش من العدل تروح معها عالسوق كل النهار وانا ولا شي قال معك حق لكن إمو رفضت واصرت على رأيها قلتلو خلص بتضل تروح لكن بعد الزواج لا وما رح ارضى قال إن شاءالله بستخير وبخلي والدتي تستخير رجع قال رفضت اقنعيها قلتلو هيي مش زوجي لاقنعها وانت المفروض تقنعها خاصة انها مش ارملة ولا مطلقة ومش بحاجة ماسة لهالشغل هل من حقي ارفض يروح للسوق بسبب الوقت وبسبب الغيرة .. انو كتير في بنات ولابسين شورتات جدا قصيرة وكمان كل الوقت قاعد ومضطر يتفرج لان ما عندو شي يعمله غير يقعد يتفرج على الرايح والجاي الا اذا اجا زبون وبيطلعوا من الصبح للمغرب يومين العطلة للمعلومة بهالسوق الشعبي في نشاطات واكل فطبيعي يكون كتير في ناس وحضرتك عارف لبس الاجانب وضعف ارادة الشباب وخاصة يلي بعدو ما تزوج كتبت هون لان ما عندي حدا مؤتمن احكيه بكل صراحة عن موضوعي واهلي بعد ما شافوا حماتي كيف اهانتني بنص بيتنا وطليقي ساكت خافوا علي بانتظار ردك اخي ابو مريم |
رد: طلبت الطلاق بعد العقد .. بتنصحوني أرجع او
اقتباس:
السلام عليكم اختي عيوشه شغلة حلوة انو اذا ربنا قدر ارجعله عندي فرصة اشترط لان قبل استغفلوني واهلي طيبين كتبنا العقد بدون شروط ولا ذكر اي موضوع بيخص العرس والكسوة وغيرها لكن بما انو في مهر وعقد جديد يمكن يخاف طليقي يرجع لان اساسا المشكلة بالنسبة الهن كانت معلقة بالمادة فحتى لو حابب نرجع لبعض رح يرده هالشي والله اعلم جزاكي الله خير على النصيحة رح اخد فيها إن شاءالله بعد الاستخارة والاستشارة إني ارجع او لا |
رد: طلبت الطلاق بعد العقد .. بتنصحوني أرجع او
عزيزتي..
رأيي الشخصي ألا تعودي له. ولكن أود أن أنبهكِ إلى أن وضع شروط جديدة لن يكون خياراً متاحاً لكِ إن بادرتِ أنتِ بطلب العودة. لذلك إن أردتِ أن تشترطي شيئاً فيجب أن تنتظري مبادرته. |
رد: طلبت الطلاق بعد العقد .. بتنصحوني أرجع او
اقتباس:
السلام عليكم جزاكي الله خير اختي مهره على نصيحتك ورأيك على عيني وراسي بصراحة اذا قررت ارجع بعد ما استخير واشوف اكتر من رأي بهالمنتدى ما رح اطلب مباشرة, رح ابعت وسيط ما بيقربني واذا كانت اغلب النصايح اني ما ارجع فما رح ارجع اصعب شي بهالدنيا انك تكوني محتارة وما تعرفي وين الخير |
رد: طلبت الطلاق بعد العقد .. بتنصحوني أرجع او
اقتباس:
لا يجوز الرجوع له ابدا الا بخطبه وعقد زواج جديد ومهر وغيرها من الشروط هذا الشرع مو مني اما اذا كان طلاقك بعد الدخول فعادي ترجعي له في فترة العده كلامي فوق نابع من الحكم الشرعي |
رد: طلبت الطلاق بعد العقد .. بتنصحوني أرجع او
عزيزتي الله يسعدك دنيا وآخرة
ابدا ما تخليهن يضعفوا ثقتك بنفسك سنتين فرق ولا شي وبعرف شخص بيقرب بابا حب فتاة اكبر منو بتسع سنين وضل يحبها شي اربع سنين واتزوجها وجاب منها ولد هيي بال35صار عمرها وهوي 26ولهلئ طاير فيها واهله نفس الشي وطليقك ابن امه وضعيف شخصية وقلبه طيب زيادة عن اللزوم وهالشي بيخليه كلمة تاخده وكلمة تجيبه لو ساكنه بعيد عن امه كنت نصحتك ترجعيلو بانو بتكوريه متل ما بدك بس كلمة امه المسموعة وهالشي متعب متعب متعب فكيف وقت ينقل كل شي بيناتكن وهالشي ما بيتغير بيوم وليلة هالشي ربي عليه ممكن امه مفكرة اذا حلفته ليحكي لمصلحته بس ما رح تعرف انو هالشي جعل شخصيته ضعيفة وخربت حياته عزيزتي لازم تعرفي انو حياتك معو ما فيها اي خصوصية غير البخل وكل شي مستعمل يعني هالقد كتير استخيري واحسبيها منيح وربنا ما بينسى حدا صعب انك تاخدي رجل وبدك ترجعي تكونيله شخصية مستقلة اذا كان مرتبط بامه بالصغيرة والكبيرة واللي بينقل كل شي لامه او اخته او اي شخص بشكل عام ما خصه بالرجولة وين حرمة بيته وين احترام عرضه اسأل الله ان يرزقك الافضل والزوج الصالح الذي يستحقك احترامي |
رد: طلبت الطلاق بعد العقد .. بتنصحوني أرجع او
الله الغني عنه ..انفصلي انتي متزوجة الشب ولا أمه
|
رد: طلبت الطلاق بعد العقد .. بتنصحوني أرجع او
اقتباس:
السلام عليكم ونعم بالله! الهيئة إنو حماتي كانت عاقدة علي مش ابنها! جزاك الله خير على ردك |
رد: طلبت الطلاق بعد العقد .. بتنصحوني أرجع او
اقتباس:
السلام عليكم حبيبتي الله يرضى عنك! كلامك كل صح وسبب ترددي بنسيان الموضوع والله مش اكتر من إني خايفة انو ما يكون من نصيبي شخص طيب متله بالنسبة للخصوصية مرة بكيت بس عرفت إمو كانت تقرا رسايل الوتساب وطلبت يحط كلمة سر بس قالت لاهلي إنها تدايقت لما ابنها حط كلمة سر! وكأني قلتلو اسحب منها تليفونها او شي.. ما بعرف الظالمين كيف بيقدروا يناموا بالنسبة للعمر الحمدلله بشهادة الناس عمري بالشكل بيبين بمنتصف العشرينات وبشهادة الظالمة حماتي كمان لكنها ما لاقت طريقة توفر فيها تكاليف زواج ابنها غير إنها تقلل من قيمتي وتحكي كل شي وإلو سعره وانا طلبت الطلاق اكتر شي لاني مجروحه ومصدومه كيف تقنعوني سنة وشوي بإنو عادي العمر وانتي حلوة وبمجرد وافقت وعقدنا وطلبت زي باقي البنات صار فجأة عمري عار ولازم ارضى بأي شي لان ما ممكن حدا يقبل فيي فحماتي عملت فيي معروف وقبلت فيي لهيك لازم استحي ع حالي وما اطلب! حسيت إني انغدرت في محلل شخصيات حكالي انو طيب كتير وشخصيته منيحة وقال اذا فيكي اخطفيه بعيد وعيشي حياتك بس هالحكي من سابع المستحيلات |
رد: طلبت الطلاق بعد العقد .. بتنصحوني أرجع او
اقتباس:
السلام عليكم طبعاً لازم عقد جديد ما فيها كلام! جزاكي الله خير على التذكير |
رد: طلبت الطلاق بعد العقد .. بتنصحوني أرجع او
السلام عليكم تقريباً ما في غير الاخ أبو مريم بيشجعني ارجع بشكل واضح بعد ما استخير أهلي بيحكولي ما تذلي حالك اكتر من هيك وهني بيعترفوا إنو طيب بس بيحكوا الخوف من تسلط والدته وإنو ما عندو شخصية يقدر يمنع اهله من التدخل بحياتي الخاصة كيف بعرف نتيجة الاستخارة يعني هوي استنى تقريباً تلات شهور قبل الطلاق وانا زعلانه ما كنت اشوفو وبعدين طلبت الطلاق وبصعوبة لطلق يعني ما رح يخطر بباله ابدا إني بفكر ارجعله وبالتالي هوي ما رح يسترجي يتقدم مرة تانية ..كيف ع هيك بدي اعرف نتيجة الاستخارة!! اهلي حكوا لحماتي وقت الطلاق إنو الكل كان متفاهم كبير وصغير لكن انتي السبب بالطلاق الله ياخد حقي منها عن قريب إن شاءالله رح تستغربوا إنها كانت مريضة سرطان وربنا اكرمها ووقفت علاج كيميائي وصحتها منيحة بفضل الله .. المفروض تكون صارت اقرب لله وقلبا رقيق! اعذروني وجعت راسكن بالكتابة |
رد: طلبت الطلاق بعد العقد .. بتنصحوني أرجع او
كنت لانصحك بعدم العودة وخفت من نصيحتي لكن لما وجدت من سبقني فتشجعت السبب لقصة مشابهة الي حد ما - سببها تسلط الام - كما ذُكر لك لو كنت تستطيعين العيش بعيدا عن الاهل لنصحتك بالصبر وان كان احتمالية التدخل حتي بالهاتف لكن اعتقد ان الوالدة هداها الله لصيقة بولدها اسال الله ان ينير بصيرتك لما فيه الخير استخيري وفوضي امرك لله وما فيه خير يقدره الله نتيجة الاستخارة ليست رؤيا انما توفيق من الله بالاتمام او انتهاء الموضوع وفقك الله
|
رد: طلبت الطلاق بعد العقد .. بتنصحوني أرجع او
اقتباس:
السلام عليكم اللهم آمين واياكم معك حق اختي فرح كتير قالوا الزواج من ابن امه زواج فاشل .. الله يكون بالعون جزاكي الله خير |
رد: طلبت الطلاق بعد العقد .. بتنصحوني أرجع او
أم طلحة حبيبتي..
الطيبة وحدها لا تكفي لعلاقة مستقرة. ولستُ مع محلل الشخصيات في نصحه لكِ بأن تخطفيه لبعيد وتعيشي حياتك .. لأنه كلام غير منطقي .. والزواج لا يعني الانفصال أو الانقطاع عن الأهل إن لم يكونوا على غير توقعاتنا .. فالأمر ليس أنتِ وهو فقط .. بل أهلكِ وأهله .. ومستقبلاً أحفاد سيرغبون في علاقة أسرية مستقرة مع أهل والديهم. ملاحظاتكِ عليه وعلى أمه كلها معتَبَرة يا عزيزتي .. ولو كنت مكانكِ لما رجعت لأناس يرونني سلعة بائرة ويعبرون عن هذا بمثل هذه الصفاقة. وقد مررتُ سابقاً بموقف مشابه بالفعل .. وإن لم يكن على نفس الدرجة من قلة التقدير وقلة التهذيب. البخل ليس له علاج يا عزيزتي .. خاصةً إن كان تحت غطاء ديني بحجة الزهد في الدنيا ومتاعها!! وإن كنتِ الآن تعتقدين أن كونكِ موظفة سيجعلكِ تتحملين .. فغالباً لن يحدث هذا بعد أن تعيشي معه بالفعل وتتكرر المواقف وتذوقي بخله أكثر .. خاصةً بعد إنجاب الأطفال. أما انسياقه التام خلف أمه وإطلاعها على كل صغيرة وكبيرة .. ومع احترامي لأخي أبو مريم .. فلا أراه من البر في شيء .. ولا حتى أراه أمراً مؤقتاً سينتهي بوفاتها مثلاً .. فالشخصية الضعيفة والإمعة هي هكذا في ذاتها .. وإن راحت الأم فسيبحث عن غيرها لينساق خلفه ويمشي على كلامه .. لأنه أصلاً لم يعتد على الاستقلالية والاعتماد على نفسه ورأيه الخاص .. وما دمتِ لم تكوني أنتِ هذا البديل منذ البداية فلن تكوني كذلك أبداً .. ناهيكِ عن أنكِ في الأساس لا تريدين بالتأكيد زوجاً تقودينه وتملين عليه ما يفعل وما لا يفعل. |
رد: طلبت الطلاق بعد العقد .. بتنصحوني أرجع او
ام طلحه انتي ندمانه ولا حيرانه ؟
|
رد: طلبت الطلاق بعد العقد .. بتنصحوني أرجع او
وانا اخوك ابتعدي عنه
تسلط امه يكفي راح تعانين طول عمرك مافي احد امه متسلطه الا وكانت زوجه الابن هي الضحية و الامر يعود لك |
رد: طلبت الطلاق بعد العقد .. بتنصحوني أرجع او
اقتباس:
السلام عليكم جزاكي الله خير حبيبتي كفيتي و وفيتي كل كلامك للاسف صحيح ومنطقي! طيب لو وافقت على شخص تاني كيف بضمن إني انسى الشخص الاول؟ خايفة من هالشعور كتير |
رد: طلبت الطلاق بعد العقد .. بتنصحوني أرجع او
اقتباس:
السلام عليكم جزاك الله خير .. انا عارفة كل هالحكي وعشتو حتى قبل الزواج لكن مشكلتي إني خايفة ما يجي شخص ارتحلو او يكون عصبي وانا بخاف من العصبية تبعت الرجال! عموما بلشت اقتنع بكلامكن |
رد: طلبت الطلاق بعد العقد .. بتنصحوني أرجع او
اقتباس:
السلام عليكم حيرانه كتير |
رد: طلبت الطلاق بعد العقد .. بتنصحوني أرجع او
لا طبعاً نقل الآمور الخاصة لا يحوز وحرام وانا متآكد انه لا ينقلها ولكن امه هداها الله تجر منه الكلام وتآتى لتبنى قصة يشعر معها السامع ان طليقك آخبرها مازلت اكرر هو جيد وانتى حساسة بزيادة وخصوصاً لوجود فارق العمر ولو كانت هذه الخطبة من عشر سنوات انا متاكد انك وقتها ربما تتقبلى هذه الاشياء بشكل عادى علماً انى لا ارى اى مشكلة فى فارق العمر .. قريب لى شاب صغير ووسيم وتزوج آمرة اكبر منه ربما بخمس سنوات مطلقه ولديها ولد وبنت والبنت تعيش معه وهو طاير بها ووقف امام الدنيا من آجلها علماً ان لم يسبق له الزواج اما موضوع البخل اعلم انك فتاه وتريدى ان تفرحى ولك هذا وان كان كلام طليقك منطقى اذا كان يريد قعلا الجهاد بالمال لان حال المسلمين اليوم مرير فى سوريا واليمن وووو استخيرى الله واعلمى ان الرجل يحبك وان شاء الله سيخرج من ضن آمه الى حضنك لانه لديك شىء هام جدا للزوج وهو العلاقه الخاصة والتى يمكن ان تستخدميها لكى يكون زوج مستقل ولا يكون ابن آمه والدليل ان سمع كلامك ووضع كلمة سر على الواتس آب اذن الرجل متفهم ولكن ربما اشياء تمر منه وانتى ستقوميها ان شاء الله تعالى وفى النهاية هو ليس له بعد الله الا انت وامه وابيه ولكن هل ستعيشى معهم فى نفس الشقه او فى مكان مستقل عن الاب والام |
رد: طلبت الطلاق بعد العقد .. بتنصحوني أرجع او
اقتباس:
السلام عليكم اخي الكريم أبو مريم الله يسامحك كل ما أبلش اقتنع إني ما أرجع بتكتبلي شي بيخليني اتردد وارجع افكر من جديد! سبق وذكرت سبب خلع طليقته يلي قبلي .. قال إنو بسبب كان يبدي أهله عليها وإنو عاطفته قلّت.. ختم كلامه وقال هي بتتدعي يعني كأنو بيقول مش صحيح هالكلام ولكني انا شخصيا شفت بعيني هيك شي.. هوي ترجاها ترجع بس رفضت.. وإمو قالت لأهلي الحمدلله أجت منها! يعني وكأنها ناطرة هالساعه! يلي بيقرأ لناعمة الهاشمي عن بوصلة الشخصيات.. هوي تقريبا جنوبي شرقي والله اعلم.. وطبعا هاد بيضل علم بشر فيه الصح وفيه الغلط نعم انا حساسة ولكن أي شخص حتى غير الحساس صعب يتحمل الاهانات والظلم هيك بدون اسباب حقيقة انا انجرحت كتير من كلامها وسكوته وسكوت عمي وهيي بتبهدل فيي بنص بيتنا خصوصا على موضوع العمر مش كرمال عمري نفسه.. يعني أنا بعرف عمري وما حدا فاجئني لما ذكر عمري.. الجرح هوي إنن غدروني .. انا من البداية رافضة وبشدة موضوع العمر وهني قعدوا سنة يقنعوا فيي وبالاخر وافقت ولما اجا موضوع المادة بلشت تجرحني بالكلام رغم انها عارفة انو ابنها تعب وهوي يتقدم لبنات لاكتر من سنة ونص وما وحدة عم تقبل فيه وهوي متل الطفل بيعيد ورا كلاها بيقول نعم فيي اخد وحدة بالعشرينات! والواقع بينفي هالكلام وكتير كان يترجاني ما اتركه وإنو رح يسعدني وكان يحكي فرصتي قليلة ما تتركيني لكن متل حكيت كله كرمال التوفير بيهون حتى لو يخرب بيته بس للامانه هوي ببعض الامور قال ماشي بروح معك وبنشتري.. ببعض الامور بس .. لكن تاني يوم قال ما في او بيقول إمي قالت لا.. فبدل ما تشكر ربها على النعمة صارت تقلل من قيمتي كرمال اهلي يحسوا إني فعلا ولا شي ويقبلوا يتنازلوا عن حقي.. بكيت كتير كتير وكنت مصدومه لدرجة إنو رجعلي الجاثوم بنفس الليلة .. يلي غاب سنين عني بفضل الله وانتكست حالتي بعد ما ربنا من علي بالتحسن الكبير بعد ما خبرتك شو صار .. زعلي طبيعي او انا حساسة اخي ابو مريم؟ بالنسبة لاستخدام العلاقة الخاصة كطريقة لحتى يبطل ابن امه.. ليه طليقته السابقة ما نجحت وامه يلي كسبت وهربت طليقته وخلعته؟ هيي كانت اجنبية مش عربيه لكن فعلا نقطة ضعف طليقي حسب كلامه هي النساء لهيك خبرتك إمو خافت مني لما حست إنو فعلا تعلق فيي وحس إن طيبة .. لان ما بدا حدا ينافسها بحنانها على ابنها لكن مهما أثرت عليه اهله بيقلبوه فجأة وهوي بيشوف هاد من البر لو فيه ظلم لإلي وبالنهاية ربنا أعلم وين الخير كان اغلب الوقت يقلي بس نصير ببيت واحد الموضوع بيختلف تماما بالنسبة للسكن مستقل لكنها طلبت يكون مباشرة قدام شقتها او عالاقل بنفس المبنى وانا رفضت لما شفت تعلقها فيه وقبل كنت موافقة بس رفضت بتقول لاهلي إني خايفة اسكن قريب منها حتى ما تضل فايته طالعة لعندي! الحمدلله عارفة حالها شو كانت ناوية تعمل حتى يا أخي لما بلشت اقنعه بكل ادب إنو أمك بتحبك وبتغار عليك مني فمش من الحكمة نسكن حدها لما تشوفك بتعاملني منيح ممكن تزعجها..قال صح كلامك مرة تانية رجع قال رح نسكن حد إمي و انا رفضت ..قلي إدعي إدعي.. يعني رجل بس الامر مش بإيدو وما بيقدر يحل هالموضوع بالنسبة للمادة لو كان ياخد بالاسباب ويجمع مصاري لزواجه مهما كان قليل المبلغ كنت رضيت وما تدايقت.. لكنه بيصرف كل مصاريه على اهله لان بنظره اولى ومطلوب مني أرضى بأي شي أو بكون مش ملتزمه وبحب الدنيا وسبحان الله إمو يلي بتاخد منه كتير برغم وجود زوجها بيحكي عنها زاهدة! لو كان مسحور ما بيحكي هيك في شغلة بسيطة حابة احكيها.. مرة أهديته بنطلون وقميص وكانت هيي عنا بالبيت فلبس البنطلون على جنب لكن هيي بكلت الزر والسحاب لابنها يلي عمرو بالتلاتينات, هل هالشي بيبشر بالخير اخي ابو مريم؟ بعرف وجعت راسك وراس الاخوة والاخوات بكتر الكتابة بس كله بأجره إن شاءالله فتحملوني الله يبارك فيكن بتمنى تعلق على كلامي و جزاك الله خير |
رد: طلبت الطلاق بعد العقد .. بتنصحوني أرجع او
نسيت اعلق على كلامك بالنسبة لحبه الجهاد بالمال! هالحكي مش صحيح طليقي شخصيته ضعيفة قدام اهله كلهن والمصاري بس بيبعتها لاخته وقرايبه لان اكتر من مرة ذكرت بدي اعطي الاغراض المستعملة للفقرا قلي لا جزاكي الله خير اعطيني هيي إمي بتهديها لصديقاتها.. يعني ما بيتحملوا يروح عليهن شي فمش متل ما حضرتك فهمت إنو بيحبوا يتصدقوا على المسلمين بشكل عام. لا والف لا بس للقرابة القريبة وهوي ما بيقدر يرفض طلب والديه يعني ضل عالحديدة ما معو بحسابه اكتر من الفين دولار وهوي متعلم منيح وعنده مهنته.. لكن متل ما وحدة من الاخوات قالت بسبب طيبته الشديدة كلمة بتاخدو وكلمة بتجيبو عمي كان يشوف ابنه يصرف على إمو وما يرجع وكان يشوفو يشتري اغراض البيت وما يرجع وهني عارفين إنو ابنن مقبل على زواج والزواج إلو مصاريف حتى لو عالقد بس ما بحكي غير الله ينصر الحق وبما إننا مسلمين اخي ابو مريم ولازم نمشي على الكتاب والسنه فلهيك بنص الحديث الزوجة اولى بالنفقه من الجهاد وابن السبيل لان المجاهدين في كتير ناس تعطيهن اما الزوجة ما إلها بعد ربنا غير زوجها! واختي مهرة حكت كلام مهم وطليقي وامه عايشين هالشي وهوي إنو بيغلفوا البخل بالزهد يعني غلفوا بخلهن بالدين حتى ما حدا يحس او يعترض! وهيي مش زاهدة ولا شي لان عندا احدث جوال ماشاءالله من ابنها طبعا وما بتحرم حالها من شي وابنها المسكين هوي الضحية ..لما تكون الام أنانية فعلى الدنيا السلام! فكيف لو كل العيلة بتفكر بحالها على حساب هالمسكين |
رد: طلبت الطلاق بعد العقد .. بتنصحوني أرجع او
نصيحة لوجه الله انفذي بجلدك وادعي اللهم اجرني في مصيبتي واخلفلي خيرا منها فقط فري الي الله وان شاء الله مع الوقت تنسي تتالمي شهر شهرين احسن من عذاب عمر
|
| الساعة الآن 12:55 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©