|
زوجي يريد الزواج لاني لا أتقن الطبخ حلت رد52
السلام عليكم ..
اشكركم على هذا الموقع و الذي يهتم بالعلاقات الزوجيه و حل المشاكل .. بقولكم مشكلتي وبفضفض لكم وبطول عليكم اعذروني ... مشكلتي هي اني ببيت اهلي مثل أي بنت مدلله عند امها .. كانت امي كثير تصر علي ان ادخل معها المطبخ بس كنت ارفض بحجة الدراسة وبحجة العمل .. وكانت امي دايما تقول لي بكره هالدلع يطلع عليك ويجيك من يخليك تطبخين غصب .. المهم عند اهلي ماني شاطرة الا بالحلويات والمعجنات يعني اسويهم بنفس وبمزاج عااالي ولأن ماحد يضغط علي .. لما تمت ملكتي و اثناء المكالمات بيني وبين زوجي دار الحديث والتعارف الى ان وصل سؤاله وش تعرفين تطبخين ؟ قلت مالي في الطبخ وخاصة الاكلات الكبيره اخاف منها ومايضبط معي شي الا الحلويات والمعجنات شاطرة فيهم و اعرف اسوي بشاميل واعرف انواع المعكرونه اضبطها بكذا طريقه .. وعلمته كل شي بالتفصيل قال عادي مو مشكله و اصلا انا مايهمني هالموضوع وبتتعلمين مع الوقت .. المهم بعد زواجي اول شهر كنت عروس وبس اسوي فطور .. وثاني شهر بديت اسوي اللي اعرفهم فطاير كيك حلى و اتفنن فيهم وهو اجاد بشغلي واعجبه كثير والاكله الرئيسية اسوي معكرونه و شوربه و مقالي و اكلات خفيفه .. ومع هذا كنت احاول اتعلم الكبسه بس مره تطلع باهته مره مالحه مره زيت مره ناشفه بس قال لي الى متى ماتعرفين تطبخين وانا ما اعيش على المعجنات وعلى كبسه كل يوم شكل انا ماني فار تجارب والخ قلت هذا انا احاول وابذل جهدي .. وكان مرات يورطني وانا اطبخ يقول ترى عازم اخواني ضبطيه لاتفشليني و احاول اضبطه يطلع مقبول ماشي حاله ومرات يقول ابي انزل الغدا تحت عند اهلي ضبطيه و اتقنه قد ما اقدر وكنت اسئله عجبهم يقول ايه وحتى ابوي مدح ولخ حسبته يبالغ سئلت خواته قالوا ايه والله طبخك يجنن وماتوقعناك تعرفين .. كذا صار عندي دافع معنوي كبير و حب للطبخ بعد ماكرهني باللي كنت احب اسويهم .. بس كانت المفاجئه ان كرهت المطبخ و صرت اتعب من ادخله واكره بيتي بعد الطبخ و استفرغ .. طلعت حامل وكان وحامي ببيتي حتى لو يجيب اكل من برا مقدر اكل الا عند اهلي .. هو صبر علي شهرين و رجع يضغط علي ويقول وحام خلص .. رجعت احاول اطبخ مقدر بس ابي اخلص مقدر اتقن شي هو يكون بالدوام والله اني من المطبخ للحمام استفرغ و اجي دايخخخه و رجولي بالغصب واقفه و اكمل الطبخ ولما يجي يجلس يسب طبخي وانتي وانتي وانتي .. لما وصلت الشهر الرابع بالحمل الحمدلله اختفى الوحام ورجعت اطبخ بس رجعت مثل اول مابديت كل شي مايضبط معي تعبت احاول وبالغصب صرت اضبط الرز شوي ويطلع مقبووووول و اقل من عادي بس ينبلع يعني مو سيء .. و فجأه بيوم من الايام طلب مني برياني ! طيب خلني اتقن هذا بالأول وبعدين اطلب شغلات اكبر .. قلت ماعرف قال عندك نت تلقين الطريقه طبقيها .. لقيت طريقه مع ان هالطريقه صعبه بس هي اسهل طريقه لقيتها لان فيه طرق صعبه .. وانا امشي عالخطوات كلمني وانا تقريبا مخلصه الربع الاول وكان باقي نص ساعه ويخلص .. كلمني قال زيدي الرز لأن بعزم احد .. طيب كيف ازيده وهو يطبخ كيف ازيده والمكونات حطيتها حسب اللي بالنت .. ماحبيت ارفض لان مره رفضت ازيد وتفشلت عزم اخوانه وانا مسويه حق شخصين ويومها جا يلوم علي بعد قلت له مادري انك تعزم .. المهم نرجع لموضوعنا .. لما زدته انخبص الرز و طلع باهت وطلع ماااينبلع و جا وجلس يسب ويجرحني بكلامه وانا والله مو ناقصني عندي مشاكل حملي وتعبي يكفيني ومع هذا مو حاس فيني .. جلست ابكي لحد ماصدع راسي وهو يجرح ويجرح ويجرح وماخلى كلمه الا قالها وبعدها بساعات كشخت وجيت عنده لان ماحب الليله تعدي وهو زعلان حاولت اتقرب منه بس رفض وطول الليل احاول معه و هو راسه يابس تركته براحته ونام مع ان ماحبه ينام زعلان و اعرف نفسي اضل ابكي .. ضليت كل الليل ابكي لين الصبح جهزت فطوره واغراضه وملابسه للدوام وطلع بدون مانتكلم ورجع من الدوام ونام و صحى وطلع ومارجع الا بالليل متأخر .. حاولت اتكلم معه و اعتذر له وافهمه ان هالشي غصب عني وان الحمل متعبني و ان احاول ماقصر معه بس هالشي مو بيدي .. المهم ضليت ساعتين وثلاث وانا احاول وابكي .. قال اذا ماتعلمتي والله اتزوج عليك واجيب وحده تعرف تطبخ .. انا هنا انفجررررررررررررررت بالبكااا كأن مات لي احد .. هالفتره غلط انه يهددني بهالشي غلط انه مايراعي شعوري وانا حامل توني نهاية الرابع وعندي مشاكل تهددني بالاجهاض وعندي هرمونات توترني وعندي صداع وغثيان و الم ظهر وحيلي منهد .. المفروض يراعيني المفروض يهتم فيني ويقدر محاولاتي عشانه .. وش الحل كيف اطبخ وانا بهالحاله وكيف الاكل يضبط معي وكيف اصير شاطره بالطبخ .. لان والله احبه ومابي اخسره لان لو تزوج علي راح اتطلق ما اتحمل وحده تشاركني فيه .. وانا احاول اتعلم قبل يهددني يعني حاسه ع نفسي من اول لان احبه .. ابي حل انصحوني تم تعديل العنوان ليتناسب مع المضمون [SIZE="3"][/SIZEحلت الرد 52 http://www.66n.com/forums/showpost.p...8&postcount=52 |
رد: زوجي يبي يتزوج علي والسبب !!!!!!؟
وعليكم السلام ورحمة الله وبركاته..
ريتاج حبيبتي أنت انسانه رائعة جدا.. لا تخشي من تهديداته وتوقفي عن البكاء كليا أمامه، عودي لحيويتك وبهجتك في البيت.. نأتي للطبخ الآن ولله الحمد خف الوحام مثلا لو لديك أعمال أخرى في البيت قسمي اعتمدي على هذه الطريقة كي تكون وطأة التعب أخف عليك اليوم الصبح غسيل وتضبيط البيت بكره كي الغسيل وهكذا أما الطبخ اساليه من الليل أنت ماذا تحب أن أطبخ لك اليوم وجهزي كل شيء من الفجر والصبح اطبخي باكرا وعلى مهلك لمن يعود من الدوام.. بحيث لمن تطبخي يكون مافي ضغط عليك من جهة زوجك واسألي هل أحسب زيادة حبيبي.. بالنسبة للتعلم تعالي هنا في قسم المطبخ وستكوني ممتازة في طبخك أنت لست فاشلة بل رائعة و مخاولاتك لذلك.. الآن عندما يعود من المنزل إياك إياك أن تظهري له زعلك بل كوني عادية ولا تلتفتي بتاتا لتهديداته وبالنسبة للخطر أثناء حملك خذيه معك للدكتورة ليسمع بأذنيه.. لا يصيبك الإحباط ولا شيء من ذلك أبدا كوني فخورة من نفسك ومحاولاتك اعلمي جيدا كلما كان وقتك يمشي على خطة التعب الذي ستواجهيه سيكون الأمر خفيف عليك.. ومنها تطبخي على مهل دون تسرع وتضبط الطبخة.. إياك أن تكون أنا لا أعرف بل أنت رائعة لا تدعي حديثه السلبي يتسلل لداخلك.. كوني بخير. |
رد: زوجي يريد الزواج باخرى لاني لا أتقن الطبخ
حاولي تسألينه من بدري اذا بيعزم احد وقوليله ان لاتفاجأني بأن احد بيجيك يتغداء واذا بتجيب احد جيب من برا انا ماقدر اضغط على نفسي
ومن ناحيه الطبخ تتعلمين شوفي النت وكلمي امك تعطيك وصفات واكتبيها عندك بالمقدار عشان ماتنسين والتهديد هو اصلا انتي قلتيه مجرد تهديد ولا تهتمين له كثير بس حكي عشان تتعلمين والله يسخر لك ويقومك بسلامه |
رد: زوجي يريد الزواج باخرى لاني لا أتقن الطبخ
ما شاء االله عليك انت زوجة رائعة
ارى انك فعلتي الي عليك وبذلت ما في وسعك لولا فلة صبر زوجك حبيبتي كوني قوية وثقي في نفسك ولا تخلي احد يثبطك كوني صبورة وانسي الكلام السلبي الي يثبطك شوي شوي رح تتعلمي وتكوني طباخة ممتازة ياذن الله كلنا بدينا هيك وعملنا كوارث مطبخية والحين الحمد لله تعلمنا اشياء كثيرة من اخطاءنا اما تهديده بالزواج فهو باذن الله وسيلة للضغط عليك لا اكثر ولا تنسي ابدا انك زوجة رائعة و |
رد: زوجي يريد الزواج باخرى لاني لا أتقن الطبخ
مكانه الانسب
|
رد: زوجي يريد الزواج باخرى لاني لا أتقن الطبخ
هل زوجك مقتدر؟؟
يعني لو فرضنا انه بيتزوج. وين بيسكنها و كيف يصرف عليها |
رد: زوجي يريد الزواج باخرى لاني لا أتقن الطبخ
مجرد تهديد لا تخافي كلنا في البداية عملنا كوارث وتفشلنا ونسينا اطلبي منه ان يصبر عليك لساتك جديدة ذكرتيني باول فشلة في رمضان كيف كان زوجي يعلق بسخرية وتركت الطاولة مسكين ابو زوجي اكل وحده ومدح وصعد لغرفتي ورضاني الله يشفيه
|
رد: زوجي يريد الزواج باخرى لاني لا أتقن الطبخ
اشكركم على الرد ..
للأسف مقتدر و عندهم شقق لهم و اهله مقتدرين يسكنونها بأحد شققهم .. بكمل و افضفض لكم وتحملوووووني لان والله ماسجلت الا عشان ارتاح انا امر بظروف نفسيه صعبه .. الحمل لحاله مسبب لي ازمة نفسيه ابكي بدون سبب .. عند اهلي متعوده اطلع كل اسبوع بس هنا لا .. جاني اكتئاب ومع هذا متحمله عشانه . بس للحين يجرحني عشان الطبخ .. على اساس امس تصالحنا .. اليوم يقول لي ابي اخلي اختي تجي تعلمك الطبخ او انتي روحي لها .. اخته اصغر مني ب4 سنين والله اهااااانه لي .. وبس يمدح لي طبخ اهله امه خواته حريم اخوانه .. والمشكله بس امه طبخها حلو اما الباقي لا .. يمدح طبخ مرت اخوه ولما ذقته والله باهت ومافي طعم نهائي .. و اخته اللي يبيها تعلمني مره مسويه كبسه معجونه عجن مع خضروات .. مره اخوه عزمنا عنده و زوجته مسويه اكلات بحريه والمشكله كله يابسسس وماينبلع و زوجي علق ع طبخها بس تدرون زوجها وقف جنبها وقال ترى النوع اللي جايبه انا هو كذا صعب و ام فلانه ماقصرت بس الغلط مني و و الخ .. والله مافشلها ... لو كنت انا مكانها القى زوجي هانني قدامهم .. والشي اللي يقهر ان دايم اطبخ واتعب نفسي وماياكل هالفتره هنا وانا ماحب طبخ بيتي قلت لكم كرهته من حملت و اطبخ عشانه ومع هذا والله يروح كب كله .. يقول مابي اكل هنا بروووح لمرررت اخوووي .. ويروح ويصور طبخها مع تعليق يازين هالطبخ مو طبخك والخ .. وقال ان مرت اخوه عندها اخت ويمدحها يقول اكيد طباخه مثل اختها .. المصيبه مو هنا .. هو كان متزوج قبلي وحده جلست عنده شهر وطلقها قبل تحمل .. ايام الملكه سئلته عنها وعن طبخها قال عادي و اقل من عادي وبعد الزواج سئلت اهله قالوا طبخها يجنننن ونتغدا عندها و احيانا تجي تطبخ عندنا و و الخ .. هو طلقها لان ماتفاهموا و لأنها عنيده وفيها سلبيات كثيره ومع هذا طلقها .. قلت له مره لو كان الطبخ كل شي بالزواج .. ماكان طلقت فلانه .. الطبخ هو الشي الايجابي فيها ومع هذا تخليت عنها و الناس دلوه علي بحكم اني انا عكس صفاتها وان راح نتفاهم وفعلا تفاهمنا 7 شهور الا بمسئلة الطبخ .. من كثر مايفشلني ويجرحني والله كرهت حياتي لاتقولون سالفه بسيطة انا هرموناتي تتقلب والحامل بدون شي تكره نفسها كيف وعندها شخص كذا يضغط عليها .. تدرون صرت ادور بالنت اسهل طرق الاجهاض وقبل اجرب اتعوذ من الشيطان .. ومره بعد مافشلني وخانقني رحت قفلت ع نفسي الحمام وجلست ابكي وفجأة شفت شفرة حلاقة سحبتها بس امي جت بين عيوني وش ذنبها تتعذب بموتي .. ومره طلعت انزل القمامه - الله يعزكم - جا فبالي اهرب او احط نفسي بوجه سياره .. حتى ودي اهرب لبعيد لان اهلي ظروفهم ماتسمح و عندي اخو شيطان مايرحم ومتسلط .. صارت تجيني هالافكار من دخلت الشهر الرابع ومن بدا يضغط علي وكل مايضغط احاول و افشل واجلس ابكي وتضيق فيني الدنيا .. وكثير فكرت اروح لاهلي بس اللي ببطني اخاف اندم بعدين .. مادري وش الحل تعبت والله تعبت والحين اكتب لكم وانا ابكي .. يعني لهالدرجه الرجال همهم بطونهم ؟؟ لهالدرجه الطبخ صار اساس الزواج ؟؟ مع العلم ماني مقصره بأي شي ثاني من ناحية نظافتي وكشختي ومن ناحية نظافة البيت و ملابسه غسيلهم وكويهم .. اتحدا بيوم يحتاج لبس من ملابسه ويسئلني عنه لسا ماغسلتيه ؟ اذا ماغسلتيه عادي هاتي أي شي .. اقوله الا غسلته وكويته و اجيبه له .. بأيام الدوام حاطه منبه اصحى قبله بربع ساعه اجهز قهوته وفطوره وملابسه و حتى المشط و المويه وكل شي هو يلقى كل شي جاااهز و اذا عنده شي رسمي اهتم بثوبه وشماغه وكل شي يكشخ فيه انسق له وهو يكون نايم وانا سهرانه اغسل اكوي و المع نعوله الله يعزكم وكل شي من تزوجته ماخليته يقوم يجيب شي له حتى جواله انا اشحنه له بدون مايقول .. ما اعانده ما ارفع صوتي عليه و أي شي يقوله البيه .. والله معيشته أمير وهذا كله من واجبي تجاهه ولو بيدي بسوي اكثر بس هو مسح كل هالايجابيات و ركز عالطبخ بس .. مع العلم هو فيه سلبيات كثيررررررره ويتدخل بشغلي حتى بالمطبخ ليه هذا كذا ليه مانظفتي هذا ليه وليه .. يتدخل بكل صغيره وكبيره .. هو تغير عن اول .. وانا احاول الحمل مايغيرني ولسا مثل ما انا و احسن .. جرحني كثير ويهددني يقول لي تنتظرك ايام سوده .. بالله وش الحل ؟؟ اجلس انتظر الايام السوده ولا اهجره وانا بالبيت والا اروح بيت اهلي وش اسوي ماني عارفه وماني قادره ادخل الاهل بيننا عشان مايكبر الموضوع اكثر |
رد: زوجي يريد الزواج باخرى لاني لا أتقن الطبخ
من كثر الدلع صاير فاضي ينتقد ..
مشكلتك معاه مو بالطبخ .. المشكلة انك ضعيفة قدامه وماتدافعين عن نفسك .. اذا تبغين مساعدة بخصوص الطبخ عيوني لك وعلمت كثير من زميلاتي بالواتس او بالكلام وكلهم يدعون لي .. فلو محتاجة طبق معين اكتبي موضوع بقسم المرأة وبنساعدك لكن مبدئيا اشوف انك تقللين اهتمام فيه وتبجيل زايد عن حده .. اجب تشحنين له الجوال وتلمعين جزمه بدون ما يطلب ؟ اهتمي بنفسك واهتمي بنفسيتك واهتمي بعباداتك .. من جدك تفكرين بالانتحار ؟!! ومتوقعة اننا بنرحمك ونطبطب عليك ؟!!! اصحي على نفسك الله يهديك ! حاولي تشغلين نفسك بوظيفة او دار تحفيظ اي شيء يبعدك عن البيت وجو زوجك .. احس من كثر الفراغ صار زوجك هو كل حياتك وهذا خطأ .. تابعي استشاريات اسريات في انستغرام .. طوري من نفسك طوري من مهاراتك ولو تكلم وسبك لا تبكين خلاص عرفتي ان بكائك ما أثر فيه . تكلمي بوضوح وبنبرة ثقة قولي انا اسوي واسوي واسوي واسوي ومن ناحية الطبخ اهلك كلهم يشيدون بطبخي كوني ما اعرف اضبط الرز بسس تقوم تنسف كل جمايلي ؟ و ع فكرة ترا اخواتك يسبون طبخ زوجة اخوك يقولون ماصخ ومافيه طعم ؛) بس اخوك بصف زوجته ويدعمها ويشجعها ماشاءالله الله يديم عليهم ولو حطيتي الاكل قدامه لا تسبين وتخافين وتسألينه عن رايه .. قدميه وانتي واثقة من طبخك واكليه قدامه وانتي تتلذذين فيه .. هل هو يشكرك ويشوف مزاياك ؟ والا بس يطلب بدون شكر ؟ |
رد: زوجي يريد الزواج باخرى لاني لا أتقن الطبخ
استهدي بالله يا أختيي واستعيذي من الشيطان لا تخلي تفكيرك يوديك لبعيد على شيئ بسيط انت حامل ونفسيتك متقلبة اسالي اي زوجة ان ضبطت الاكل في البداية الا ان تزوجت في سن كبيرة
اليك تجربتي جعل الله يغفرلي على الاكل المسكوب بعد الاحراجات التي تعرضت لها عندما اكون وحدي اطبخ بكمية صغيرة ان ضبطت اظهرها وان خابت الله يغفر لنا حتى نجحت ولله الحمد وبكل تواضع اصبح اكلي لا يعلى عليه لا تياسي وحاولي |
رد: زوجي يريد الزواج باخرى لاني لا أتقن الطبخ
طيب ما يصير يأكل من اكل أمك ، يعني أمك لما تطبخ تزيد و تطبخ لكم ، مره او مرتين في الأسبوع ، والباقي انت ، قول لامك و اشرح لها الوضع ، وهو قول له بتعلم من عند امي
|
رد: زوجي يريد الزواج باخرى لاني لا أتقن الطبخ
تذكرت نقطة
باليوتيوب يطبخون بفيديو كامل تقدرين تفتحين المقطع وتسوين مثلهم بالضبط وبرضو سناب شات طباخات ماشاءالله طبخهم يفتح النفس وبانستغرام فيه ناس ماشاءالله يطبخون ذبايح وشيء مرررة ويصورون كل شىء اذا تبغين الحسابات بعطيك اياهم |
رد: زوجي يريد الزواج باخرى لاني لا أتقن الطبخ
يارب يفرج همك وهم كل زوجه مكلومة
|
رد: زوجي يريد الزواج باخرى لاني لا أتقن الطبخ
الله يفرج همك ويصلح زوجك
|
رد: زوجي يريد الزواج باخرى لاني لا أتقن الطبخ
انا ما ابجل فيه بس اقوم بواجباتي كزوجة مدلعته عالاخر وهو كااااان مدلعني .. وبالنسبة للشغل عندي وظيفه الحمدلله بس قلت لكم عن بعد لان مقدر اروح لهم وبسبب حملي وتعبي اخذت اجازة .. وكنت بروح بيت اهلي فترة الوحام والتعب بس هو رفض اخذني يومين لاهلي ورجعني بحجة انه اشتاق لي .. انا حساسه و عاطفيه يعني غصب عني ادلعه ومن كثر ما اهتم فيه صار يبين عليه عند اهله واصحابه وحتى وزنه زاد عالراحه النفسيه .. وتغير عن اول .. يعني قبل ماكان يفطر .. عودته عالفطور و ان مايصير يداوم بدون فطور .. ولما اقول لاهله يفطر يستغربوووون كيف و احنا ياما يكون جاهز ونفطر وهو مايطيع يجلس يفطر معنا والخ .. انا ما احب اقصر بأي شي تجاهه و احب املي حياته فيني احب اعوده علي لان احبه و عشان لاغبت عنه يفقدني من اقل شي يلاحظ الفرق .. وعشان مايلقى حجه علي ويقول مقصره بغير الطبخ .. عشان كذا مالقى حجه الا الطبخ وما ادري وش فيه فجأه قلب وصار هالموضوع قالب حياتنا وحاسه انه ينتهي بالطلاق لان انا صحيح اصبر بس لاصديت صعب ارجع ومستحيل احد يأثر علي ... عشان كذا اقولكم اخاف اروح لاهلي و اندم لان أي قرار اتخذه ما اتراجع عنه .. الحين انا ما اكلمه الا اذا كلمني او ارسلني اجيب له شي .. وحتى بالفراش بعيده عنه و اول مره ما اضعف قدامه . لانه جرحني والله و راح ابقى اتصرف كذا لان كل ماجيت ابي استقبله مثل اول وكل ماطالع بوجهه اتذكر تجريحه لي وتهديده وضغطه علي .. ماكرهته بس احساسي برد تجاهه .. افكر ادخل الاهل بالموضوع بس الاهل مصيبه مافي مشكله تدخلوا فيها الا و وصلت للطلاق .. حتى لو ماكنت حامل .. مابي اتطلق لان والله احبه ودي يحس فيني ودي يحس انه جرحني .. هالمره مابكيت وانا عكس الناس .. لما ابكي اكون متضايقه سطحيا ... ولما ما ابكي معناه داخلي ناااار وحقد وزعل من قلب وكل شي .. بالنسبه للطبخ افهموووني انا بأصعب مرحلة وحتى لو دخلت لسا ريحة الدجاج تضايقني وريحة الطبخ تزعجني ومايضبط معي شي
|
رد: زوجي يريد الزواج باخرى لاني لا أتقن الطبخ
بعيدا عن موضوع الطبخ لان واضح انك مجتهده وحتتعلمي
ينقصك حسن التصرف وحب الذات |
رد: زوجي يريد الزواج باخرى لاني لا أتقن الطبخ
انا كنت اثق بنفسي وبطبخي بس هو خللاني ما اثق وخلاني اكره الطبخ .. و احسن التصرف و احب ذاتي بس مادري ليه هو خرب ثقتب وخلاني من سيء لأسوأ .. يمكن من حملي ؟ اغلب المشاكل والطلاق يصير بهالفتره .. زوجي فجأه قلب علي كله لان طبخه ماضبطت و اول مره اسويها وهو قال زيدي وانا ماشيه ع خطوات معينه وقلت له اول مره اجرب يمكن مايضبط وقتها كان يمزح .. بس لما ماضبط قلب489964 درجه .. يعني الحين سؤالي للاخوات . وش تسوين لو انتي مكاني ؟؟؟ سؤالي للاخوان .. لو انت مكان زوجي تتصرف مثله وتهجر زوجتك وتفشلها وتجرحها بسبب طبخه ؟
|
رد: زوجي يريد الزواج باخرى لاني لا أتقن الطبخ
اقتباس:
وبكون رسمية معاه .. أوضح له حزني وزعلي من وضعنا .. يعني أجهز أكله .. أجهز ملابسه .. اتكلم بالاشياء الضرورية فقط .. واحاول انشغل عنه بوقت فراغنا اغسل الصحون مثلا او اكوي او اقرا كتاب او اي شغلة ثانية بعيد عنه وبكتب بجوالي بملاحظة الأشياء اللي مزعلتني منه على شكل نقاط .. ولو سألني ايش فيني برسله الملاحظة أو بقولها له بدون دراما وصراخ .. ممكن تنزل دمعتين تبيّن زعلي :) بس بحاول أتكلم بكل وضوح وبدون لف ودوران .. ع فكرة ، انا متزوجة من 5 سنوات ومثلك ام دميعة ودراما كوين واذا تزاعلنا كنت اسكر ع نفسي واذبح روحي بكى ولا اكل واكبر الموضوع واكتشفت ان طريقتي غلط * غلط صرت اتعامل مع المشكلة بوضووح والحمدلله ارتاح من صداع البكاء والتجويع 😂 ونتائجه افضل من الطريقة الاولى .. |
رد: زوجي يريد الزواج باخرى لاني لا أتقن الطبخ
والله ياغاده جربت هالاسلوب ودافعت و عددت و قلت له انت جحدت كل ايجابياتي مقابل الطبخ ! قال الطبخ اهم شي و و و و الخ .. قلت ياكثرهم بالنت يشتكون زوجتي مو شاطره الا بالمطبخ ومهملتني وو الخ قال ياليتني منهم والله محسسني ان جدددد ماعرف اطبخ بس والله اعرف لكن طبخي عادي لان توني بديت اتعلم ماصارت لي فرصة اتعلم كنت عروس وبعده وحام
|
رد: زوجي يريد الزواج باخرى لاني لا أتقن الطبخ
وعلى فكره وقفت اهتمام و صرت بس اسوي الاشياء المهمه بدون ماطالع له
|
رد: زوجي يريد الزواج باخرى لاني لا أتقن الطبخ
اقتباس:
مايهمه المساج وتدليك الرجول وشحن الجوال الخ .. بس يهمه اكل حلو ؟ ممكن تطلعين له الحين وتكلمي معاه بوضوح .. حبيبي ماعندي مشكلة عشانك وعشان حياتنا بضغط ع نفسي خصوصا اني الحين بوضع حساس ووحم .. فـ ابغى تعذرني شوي بالامور الثانية مثل الكوي والغسيل .. وبخصص وقتي وجهدي للطبخ عشانك وعشان حياتنا .. ومري صيدلية واشتري لك كرتون ماسك ب30 ريال عن ريحة الدجاج والكشنة وغلقز سميك واطبخي براحتك . عارفة شيء متعب الخ .. بس لاجل حياتك الزوجية اضغطي ع نفسك وجربي ممكن تكتبين لي ايش الاكلات اللي ماتضبطينها بالضبط ؟ |
رد: زوجي يريد الزواج باخرى لاني لا أتقن الطبخ
بعلمك كيف يكون حب الذات وحسن التصرف في
موقف الطبخ طبخت ثم أتى بنص الطبخه وقال زيدي عندي شخص هنا اقول عذرا حبيبي الطبخه شارفت عالانتهاء هنا انا أحب نفسي صح طبخت له لكن مو معناته يحملني شيء فوق طاقتي باللحظة الاخيره لو من البدايه ذكر لك بأنه يوجد شخص كان حسبتيه واخرجتي لهم طعاما لذيذا ماذا استفدتي من زياده الكميه وانت لم تتقنيها من قبل ؟ هل شكرك !!او عاب أكلك حسن التصرف اما ان تذكري له بأن يجلب اكل من الخارج للضيف مع تقديم البرياني او تعملي طبق أرز ابيض عالسريع لتكثر الكميه وتضعيه بالصحن ومن فوقه البرياني سيكون شكله جميل خاصه ان البرياني ملون مابين الأبيض والأصفر والأحمر |
رد: زوجي يريد الزواج باخرى لاني لا أتقن الطبخ
والله ماكان كذا هو يحب المطاعم وحتى لما كنت اقول لعمتي - امه - ان كرهت المطبخ وكيف فلان والخ قالت مو من حبه لأكل البيت ماياكل هنا الا بالاسبوع مره لاتشيلين همه والخ ..طيب ليش قلب علي فجأه .. اضبط كل شي الا الرز وهو يبي اسويه مثل المطعم او مثل اهله .. و اهله قلتلكم طبخهم 3 من 10 وحتى الرز لما اسويه يمدحونه بس هو مايمدح ويجلس يقول ناشف .. ثاني يوم اكثر الزيت شوي يقول زيت وعلى هالحال المشكله مرتين او ثلاث اللي مدح طبخي فيهم وكل مره يقول اول مره تضبطينه كذا وياكل كثير وثاني يوم اجرب شي ثاني لان هو يحب التنويع بالكبسات ..انتي ماتعرفين تطبخين انتي ولا مره ضبط معاك والخ .. انا تعبت وماراح احاول خلص تعبت والله وبحافظ على جنيني يكفي ضغطت ع نفسي كثير عشان زوجي اللي مايبين بعينه شي
|
رد: زوجي يريد الزواج باخرى لاني لا أتقن الطبخ
مشكلتك انك علمتيه على نقطه ضعفك
وانتي بالنسبه لجيلك اصلا طباخه ماهره والطبخ لانك تطبخي متوتره خلاص ما يضبط اصلا دافعي عن طبخك واذا ضايقك بالوقت زي سالفه البرياني قولي ماراخ يضبط وانت تحمل المسئوليه |
رد: زوجي يريد الزواج باخرى لاني لا أتقن الطبخ
آْنَـْتي زوجه رائعه
وانا اقرأ موضوعك شعرت انك زوجه حنونه ودوده حبيبتي مثل ماقالت سكر ينقصك حب نفسك والثقه لن يمنع زوجك من الزواج الثاني طبخك الجميل لا وألف لا سيمنعه تقديرك لنفسك وحبك لها وانك زوجه تحترمين نفسك وتقدرينها شكرا لك اقولها لك نيابة عن زوجك فاهتمامك به ينقص كثير من الأزواج في مجتمعاتنا ممكن اقولك تكنيك بسيط ممكن يساعدك ((عيش ابوكاس)) روعه اذا زدتي الماء او انقصتيه لايمكن يتعجن او يحبب الى جانب اشتري جدر ايكيا فيه مقياس داخلي مثل زجاج رضعة الطفل تحفظين الكميه وخلاص . والدجاج طبخه سهل وتنظيفه كذلك انا اشعر انك فنانه بالطبخ ولكن تنقصك الثقه بما تصنعينه وفعلا مثل ماقالت سكر لاتسألينه عن رأيه ابدا . |
رد: زوجي يريد الزواج باخرى لاني لا أتقن الطبخ
اقتباس:
اغلب الظن انه سمع من اصحابه كلام "اياك تعودها على اكل المطاعم /خلها تتربى و هي اللي تطبخ لا تدلعها حتى ما تطلع عيونك ......الخ الخ من هذا الكلام انتي خليكي واثقة من نفسك و شوفي اليوتيوب و اقري كتب الطبخ جربي لما يروح الدوام بمقادير صغيرة يعني لو مكتوب كوب حطي نص كوب اقسمي المقادير على 2 حتى يسهل عليك التحكم فيها اسالي امه عن الاكلات اللي يحبها و حضريها بيوم هو يكون مشغول و ما يرجع بدري للبيت اصبري و كملي اللي بديتي فيه الطبخ نفس قبل كل شي فاذا مدحك اهله و هو انتقد لا تهتمي لنقده لانه يعتقد اذا مدحك رح تتكاسلي و تفتر همتك كان الله في عونك و ثبت حملك |
رد: زوجي يريد الزواج باخرى لاني لا أتقن الطبخ
يوم الا تروحي بيت اهلج خلي الماما تعلمج كل مره طبخه...لا تضغطين ع نفسج وايد وخلي ثقتش بالله كبيره
|
رد: زوجي يريد الزواج باخرى لاني لا أتقن الطبخ
ع فكره اول ماتزوجت مااعرف ولاشييي انتي بالنسبه لي فنانه معجنات ومكرونات وحلويات وزوجي بالمقابل طباخ ماهر وهو الاعلمني يشرح لي واطبق لحدما سبقته الحين انا الااعلمه
|
رد: زوجي يريد الزواج باخرى لاني لا أتقن الطبخ
ياعمري انت اقولها لك من دون مجاملة زوجة ممتازة بالنسبة للطبخ طالما انت مثل ماذكرتي فانتي تتقدمين بشكل مستمر ..لا يستحق الامر ان تؤذي نفسك بسببه ولا اي انسان يستحق ذلك.. استمري على الاسلوب اللذي تنتهجينه حاليا وهو القيام بالواجبات والاساسيات لان زوجك سيشعر حينها بأن فيه شي مخليك متغيرة وراح يسألك وقتها افرضي شخصيتك انه انتي ترفضين كذا وكذا وتبين بوضوح الاحترام لانك انسانة قبل تكونين خادمة ومادمت تقومين بالمعقول فليس مطلوب منك اكثر..يوم يقولك بتزوج بسبب الطبخ لاتهتزي ابدا انت مصدقة انه بيتزوج عشان ذا الشي وانت ماشاء الله بتطوري نفسك دايم هو بس يستفزك وباين انه ملاحظ تأثير ذا الشي عليك..فاحرقي عليه هالورقة اللي بيلعب فيها وطنشي وابتسمي وبس بطلي تعذبي نفسك عشان غيرك
|
رد: زوجي يريد الزواج باخرى لاني لا أتقن الطبخ
مو متزوج ولاشي بس على باله اذا هدد انك بتفحطين،، مشكلة بعض الرجال يحسبه متزوج شيف اطبخي لفلان واطبخي لعلان ،،، ليش مايجيب اكل العزايم من برا،،،وانتي تلقين كل شي ب انستقرام حسابات طبخ تطبخ بطرق سهله ..اهم شي لاتبينين له انك بتموتين عشان ماتعرفين تطبخين لاتكونين ضعيفه ويهم فيك ،،خلي حجتك قويه واذا احتد النقاش قوليله دام الشرع حلل اربع ترا الشرع بعد مايطلب مني طبخ ولا انا ملزمه فيه واقرا عن هالشي وهذا تفضل مني وبحث عن الاجر ،،وابداً لاتكونين امامه غير واثقه بنفسك وشغلك ولاتكررين على مسامعه ماعرف ماعرف ..بالعكس قولي تعلمت والكل يمدح شغلي ،،
|
رد: زوجي يريد الزواج باخرى لاني لا أتقن الطبخ
اقتباس:
وش فهمني فرق الهرمونات والوحام والحمل ؟! لاعندي رحم ولاعندي دورة ولاعندي هرمونات متقلبة فمستحيل اني استوعب هذه الامور انه حقيقة وليست دلع منها!!! اذا تكرر هذا الامر ثلاث اربع مرات ( الحمل الرابع) وقتها اقتنع وخاصة اني ساكون كبرت ونضجت وش فهمني معنى " انجرحت " ؟! انا لما اعايرها واهددها بالزواج والايام السوداء ( اللي صدقيني مدري ايش هي ، بس اقول سودا من باب التخويف) مقصدي اني ابعد عنها الدلع واحمسها انا احبها واخيراً وجدت ضالتي فيها وخاصة اني طلقت الاولى اذن الطبخ ليس مهم عندي ولكن المشكلة تكمن في عدم تصديقي واقتناعي انها من جد ماتقدر تطبخ بسبب ظروف مختلفة مرت بها! زوجتي رائعه وابغاها تكون كاملة مكملة ومهما قالت لي او بررت لي فلن اصدقها او بالاصح سوف لن استوعب كلامها مالم اسمع نفس شكواها من اصدقائي او اذا قرأت عن زوجات يعانون من نفس المشكلة ( التجريح والتهديد واثره الخطير على زوجتي اللي انني مش حاسس فيه) وبعدين تعالو هنا كيف تريدوني اقتنع وثلاثة ارباع الكلام اللي كتبته هنا ماكنت ادري عنه ( احساسها - موضوع زيادة كمية الرز البرياني - موضوع الموس - بكاؤها الصامت - وووووو) كيف بالله اعرف كل هذا؟! انا رجال مش حرمة وهذه اول زوجة تستمر معي لمدة سبع شهور فبالله كيف افهم نفسيتها وانا تركيبتي مختلفه عنها وافسر كل تصرفاتها بمعنى مختلف عن تفسيرها هي لهذه التصرفات بعدين تعالو هنا مين ا ل غ ب ي اللي صدق اني راح ابدأ تجربة زواج جديدة وعيد نفس المعاناة من جديد! هو تهديد لها عشان اشجعها تصير حرمة سنعه مثل امي وسلامتكم |
رد: زوجي يريد الزواج باخرى لاني لا أتقن الطبخ
اشكر كل من رد علي .. التهديد انعكس سلبي علي يعني كنت متحمسه ومجمعة مواقع طبخ و اخترت الاصناف اللي بطبقها وكل شي بس من هددني يتزوج ومن بدا يجرحني ويهددني بالايام السوده .. وقتها عناد فيه مادخلت المطبخ وحذفت كل اللي مجهزته فقدت حماسي والله ..
و بالنسبة لجواب اخي لماذا نتزوج ... فعلا الزوج يجهل هذه الامور .. ببداية حملي كنت اقول له هرمونات وكان فيني الم اسفل البطن وكان يقول عادي اشتغلي والخ .. مايسمع النصيحه الا من اهله اذا امه قالت انتبه لزوجتك لاتستخدم المنظفات اللي ريحتها قويه والخ يجي يمنعني عنهم .. وبسبب الالم اللي جاني اهملت البيت يومين وحتى هو منعته من الجماع لأن الم لايطاق ومع هذا جلس يلوم علي وقمت اشتغلت ونظفت وحملت شغلات ثقيله ونزلت الدرج والخ وبعدها تجهزت له ولبيت رغبته بالجماع بس مامضى ساعات الا جاني نزيف و اسعفني وطلعت المشيمة نازله و مهدده بالاجهاض بسبب الجماع وشغل البيت وقتها جلست الوم عليه غصب عني قلت له لو صار له شي ماسامحك قال وانا وششش عرفني بمشاكل الحمل حسبتك تدلعين ومتكاسله تشتغلين والخ ... الواحد يكتشف زوجته ومشاكل حملها من الحمل الاول لان الثالث والرابع ماراح يرحمها وبيقول ليه اول مره تحملين ؟؟ هذا انتوا يالرجال تقلبون مية مره وتبون الحرمه تخدمكم وتجرحون فيها بدون ماتحسون بمشاعرها ؟؟؟ اللي جد يحب زوجته لازم يراعي ظروفها النفسيه والصحيه ولازم يقدر دمعتها ولازم يعطف عليها .. اللي مايقدر على هالشي نصيحه لايتزوج ويعذب بنت الناس معه .. نسيتوا وصية نبينا عليه الصلاة والسلام لكم ؟؟ ((((((((( رفقا بالقوارير ))))))))) ____________________________ ____________________________ |
رد: زوجي يريد الزواج باخرى لاني لا أتقن الطبخ
كلام غريب
حتى لو ما يعرف الآلام الحمل. هو بشر في النهاية و يعطف قلنا فيه اختلاف بين الرجل و المرأة بيكي مو لهالدرجة😷 على العموم اختي اللي حصل خطاك السوء منه لعله تنبيه له للرفق بك (أكثر) و صارحيه بنفورك من رائحة الطبخ. لكنك مستمرة فلعله يتوقف عن تهديداته و يتفهم الوضع |
رد: زوجي يريد الزواج باخرى لاني لا أتقن الطبخ
انا احس الرجال كلهم بدون قلوب احس حجره مكان القلب .. الحمدلله الذي خلقني انثى مع ان الانثى تتعب اكثر سواء بليلة الدخله و ايام الدوره والحمل والوحام والولاده وشغل البيت ومسؤوليات كبيره ومع هذا الحمدلله الذي جعل فينا العطف والرحمه والحنان والصبر
|
رد: زوجي يريد الزواج باخرى لاني لا أتقن الطبخ
عزيزتي هل انتي جالسة تبحثين عن حل ام للفضفضة وتنفيس عن الغضب فقط ؟
|
رد: زوجي يريد الزواج باخرى لاني لا أتقن الطبخ
الاثنين .. افضفض و ابحث عن حل .. الى الان مانتكلم وماني عارفه وش اسوي اروح لبيت اهلي ولا اجلس ونضل هاجرين بعض .. اجلس معاه و نتكلم ولا لا .. اطلب الطلاق ولا مشكله تافهه ماتسوى ! تعبت من كثر التفكير و الى الان مالقيت الحل المناسب
|
رد: زوجي يريد الزواج باخرى لاني لا أتقن الطبخ
وصلت الى قناعة ان الزوج لم تلده امك كي يحس بك يبقى غريب لماذا عندما تكون المرأة ابنة نخاف عليها من الهواء الطائر ويفهم في الحمل والهرمونات والتعب اللهم احفظ لي ابي من كل شر وخذ من عمري واعطه عندما نفست في بيت اهلي كان ياخذ الصغير عنده في الليل كي ارتاح ويحضر لي كل يوم السمك لانه مدر للحليب حسب اعتقاده
|
رد: زوجي يريد الزواج باخرى لاني لا أتقن الطبخ
كل ماطبختي قولي له انا طبخت طبخه لذيييذه تفوق مطاعم 7 نجوم
المهم اشتغلي على مدح طبخك على كل طبخه تطبخينها لان الايحاء الايجابي ينتقل لزوجك . وما عليك من كلامه حتى لو جدع هرجه عليك لاتتحسسين وضحي له ثقتك بنفسك وبطبخك مثلا قولي له يوووه من قالك انه اصلا كذا وكذا هو ناقص بهاراته لانو اصلا الطبخه كذا وشغلي الاستعباط بعض الاحيان يعني لا تقلبينها نكد وكلام جد |
رد: زوجي يريد الزواج باخرى لاني لا أتقن الطبخ
اقتباس:
برافو ريماس لازم تتعودي عزيزتي عالإيحاءت الإيجابية وهذا سينقل لزوجك، مهما تحدث بسلبية اقل بي حديثه إيجابي والحمل مؤثر على نفسيتك فلا تصعدي ردات فعلك فوق ما هي متصاعدة بينكما الآن.. كوني واثقة بالأشياء التي أعطاك بها الله.. اجعلي حديثه السلبي يصعدك للأعلى ولا لحسابك ذاتك حينها تكون فقدت إحترامك لنفسك.. جميلة جدا العقبات التي نتعرض لها عزيزتي فلولاها لما سي تعلم الإنسان.. لا تم تمارسي التنفس العميق عشان تسترخي مع لا إله إلا الله سيجعلك أكثر سكينة.. استمتعي بإحساس الأمومة الذي تعيشيه الآن نعمة جميلة جميلة دافئة فلا تسمحي لأحد يحرمك من الإستمتاع بهذه اللحظات.. |
رد: زوجي يريد الزواج باخرى لاني لا أتقن الطبخ
طالما يسمع كلام امه اشرحي لها الوضع واتركيها تفهمه
|
| الساعة الآن 09:15 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©