|
بين نار زعل زوجي و نار الشغالة
السلام عليكم و رحمة الله ...
محتارة وايد .. في البيت عندنا عاملة أو شغالة أيا يكن .. هي مو خاصة بي .. وانما حقي وحق ام عياله لكن هم ما عندهم غرفة فاضية في قسمهم وآنه عندي غرف فاضيين ما فيهم أحد ف الطيبة بطبيعة الحال بتكون معاي .. باقي من مدتها 6 أشهر وبتتيسر و زوجي بيجيب غيرها آنه مو محتاجة لها بإذن الله مهامها عندي بسيطة جدا تغسل وتكوي ثيابي آنه فقط 3 أو مرتين بالاسبوع تغسل المواعين ويوم الجمعة اخليها تعزل البيت غرفتنا آنه و زوجي آنه انظفها وثياب زوجي اكويهم واغسلهم طول الاسبوع الشغل علي... لعدة أسباب اهمها ان احس لو خليتها تسوي كل هالاشياء عندي راح اتصل بالشيخ يجي يعقد علينا اهيه و زوجي! .. اذا آنه بصحتي واخليها تسوي كل هذا عني! و زوجي يفضل ان آنه اباشر امورنا بنفسي... يعني قادرة استغني عنها المشكلة وين ؟ آنه مو مرتاحة لوجودها بتاتا واحس نفسي غاصة فيها صحيح البس على راحتي لانها تجي وقت النوم غالبا لكن لقافتها مؤذية تسألني حتى عن العلاقة الخاصة! اذا صادف ان زوجي طالع من عندي وهي موجودة تغمز لي وتسألني .. ما راح تسبحين ؟ وافهم يا فهيم!!!! وفيه أمور ما تنقال لأن كأنه بيكون وصف لي أو تسألني ليش بابا اذا عندج وايد يضحك ؟؟ و ليش بابا يضحك مع ولده فلان اكثر من ولده فلان! وليش لابسه طويل ما تلبسين قصير! او ليش ملابسج وايد جذي ؟ اذا ما تبينهم عطيني اياهم ومن فترة لقيتها ماخذه تيلفونها تبي تصور صورتي ! وتبي اسم ريلي واسم امه ! كلمت زوجي ان يشيلها عني قال لي ما فيه مكان حاليا لها وين اوديها ؟ كلمته مرة ثانية .. قال لي شسوي يعني ؟ حاليا ما اقدر ابني لها مكان كلمته مرة ثالثة زعل .. وقال خل تشيل اغراضها راح اخليها تنام بمكتبي اللي بالبيت وانا بتصرف مو لازم اقضي اشغالي بمكتب.... اضطريت اسكت ووصل لي رسالة ان آنه كأني امن عليه! قلت مو مشكلة بتحملها 6 اشهر المشكلة ان لو تحملت هالاشهر بتجي عاملة جديدة و هم بتسكن عندي! لذلك ابي أسس للأمر من الحين وآنه مستاءة و حاملة هم كيف اقنعه بدون ما اضايقه! او استسلم للأمر !!!؟ |
رد: بين نار زعل زوجي و نار الشغالة
اصبري حتى تذهب واحذري منها واطلبي منه ان يجد مكان قبل استقدام الجديدة قولي له انك لست مرتاحة لوجودها واحكي له عن تصرفاتها ان شاء الله يتفهم
|
رد: بين نار زعل زوجي و نار الشغالة
استغفر الله ، اتخلصي منها بأسرع وقت ، دام انها أدور اسم زوجك واسم أمه ، هاذي ما يبحث عنها الي ناوي يسحر ، الظاهر ناويه عليكم ، وبعدها شو هاذي البجاحه و الوقاحة اللي فيها ، اهم شي تخلصي منها بهدوء دون مشاكل و لا تسبيها و تضاربيها ، وتحصنوا بقراءه سورة البقرة ، وان شاء الله هي بنفسها تقول لكم ما ابي اجلس معكم سفروني
|
رد: بين نار زعل زوجي و نار الشغالة
ادعي اللهم اصرفها عني واكفنيها بماشئت وبماانك ماتحتاجينها قولي انا استغني عن جميع خدماتها وتجلس تحت تنام بالمخزن بالمطبخ مع عيالك مايعنيني اهم شي تحصني بالاذكار
|
رد: بين نار زعل زوجي و نار الشغالة
استخيري الله قبل الاقدام على اي امر ..
عموما ارى في كلامها شبهة !! و في تصرفاتها ريب ! لذا ، فلا افضل من مصارحة زوجك كما فعلت معنا هنا تماما !! و الله المستعان |
رد: بين نار زعل زوجي و نار الشغالة
انا ضد وجود الشغاله
خاصة قبل العيال لان اضلا مافيه شغل و لا احد يخرب و يوسخ لو انا مكانك استغني عنها نهائيا بكذا تكون للبيت الاول و اكيد اذا كانت خاصة فيهم بتنام عندهم |
رد: بين نار زعل زوجي و نار الشغالة
اقتباس:
عموماً .. وبغض النظر عن موقف زوجج .. أعتقد إنج لازم تتعلمين كيفية التعامل مع الخدامة تحسباً للمستقبل .. سبحان الله يمكن تحتاجين بيوم يكون عندج وحدة وتكونين إنتي المسؤولة عنها بشكل كامل .. وقتها مب مقبول تشتكين لزوجج منها أو تطلبين منه يتدخل لحل مشاكلج معاها إن حصلت مشاكل لا قدر الله. لقافة الخادمة مقدور عليها بإذن الله .. وإنتي مب مجبورة تجاوبين على أسئلتها. لما تسألج سؤال خاص فإما أنج تضيعين السالفة وتشتتين انتباهها كأن تطلبين منها شغلة معينة تجبرها تمشي من جدامج في هاللحظة .. أو كوني مباشرة معاها وقولي لها: عيب تسألين في هالأمور. لا تهاوشينها أبداً .. فقط كوني حازمة وجادة معاها .. وخلي علاقتج معاها كلمة ورد غطاها وتعاملج معاها على قد الطلبات اللي تطلبينها منها بدون زيادة كلام وأخذ ورد .... حتى لما تييج هي تبا تسولف لج عن شي يخصها لا تظهرين اهتمام كبير واسمعي منها بدون تعليق أو مجرد تعليق مختصر عشان ما تسترسل .. إلا طبعاً إن كانت السالفة مهمة وكبيرة وتستاهل اهتمام وتعاطف منج. وهي لما تشوف إنج مب معطتها ويه بتخفّ عنج لقافتها وفضولها. |
رد: بين نار زعل زوجي و نار الشغالة
اسأل الله ان يكفيك شرها وشر كل ذى شر زوجك عنده استعداد يبنى غرفة لها .. اذن يبدأ من الان بالبناء للعاملة الجديدة ان شاء الله ولكن حذارى تكون هذه الغرفة منفصلة عن البيت لانه ممكن تدخل السائق او رجل غريب الى غرفتها .. لذا يجب الحذر والحفاظ عليها لانها فى النهاية آمانة لديكم من قبل آهلها بغض النظر عن دينها وسلوكيتها |
رد: بين نار زعل زوجي و نار الشغالة
مع راي مهرة 100%
|
رد: بين نار زعل زوجي و نار الشغالة
سالفه صورتك واسم ريلج وامه واضحه يازين
هذي ينخاف منها ومن حقك ترفضين وجود الشغاله داخل دارك يسوي لها لو غرفه بالسطح او الدور الي فوق او اذا عندكم سوداب هي تاخذ راحتها وانتي بعد عادي لو تطلبينه مافيها منه ولا شي |
رد: بين نار زعل زوجي و نار الشغالة
آنه ابي حل وسط
بحيث ما ازعل واضايق زوجي و بنفس الوقت آنه ارتاح ... زوجي يقول ان ما عنده امكانية حاليا يبني لها .. والبنيان راح يكلفه خصوصا انه حاليا داش في مشاريع... آنه ما ارد على اسألتها ولا ادخل زوجي .. ولا بيني وبينها أي مشاكل .. وصار لي فترة طويلة مسويه معاها اللي قالته مهرة .. مع ذلك ما تركت لقافتها... وكل اللي قلته لكم واكثر زوجي يعرفه بس يقول انه مجبور لان عياله ما يستغنون عن وجود العاملة .. ولا هو راضي يخليها مع عياله الصغار بغرفهم يقول مو شيء انساني اخليها تنام عالارض وفي مكان بلا خصوصية لها... فيه أمور صارت خوفتني منها... رغم ان ما اجزم ولا احط بذمتي ان اهيه... طذا مرة اشتري قفازات جديدة جدا جدا جدا ومو ملبوسين القاهم ثاني يوم مقطعة اطراف اصابعهم .. مقطعه ب مقص... ومرة كنت نايمة بروحي بالليل وقافلة الباب .. حتى قبل لا اقفله كاتبة في قروب بنات خالاتي باقفل باب غرفتي خوفا من العاملة رغم انها طيبة قفلته وكتبت لهم قفلته و جيتكم اوتعيت الفجر حق الصلاة والاقي الباب مفتوح على مصراعيه قعدت مفجوعة نزلت حق زوجي المكتب سألته اذا هو فتحه او لا .. قال ولا جيت قسمج ولا قربت يمه... وسبق وقالت لي ان تبي ترش ماي وملح في البيت قلت لها شلون وفيه كاميرات وورتني طريقة انها ترشه بدون ما زوجي يدري من خلال بعض الكاميرات ما اظن نيتها سيئة في هالشيء .. بغض النظر عن كل هالامور ابي صرفه ان لو تحملت هذي ما تدش وحدة جديدة قسمي بس بدون ما يزعل زوجي... |
رد: بين نار زعل زوجي و نار الشغالة
طيب ما دام ما عنده إمكانية لبناء غرفة لها حالياً فشو البديل؟
بصراحة إنها تنام مع عياله أحسها صعبة .. يعني حتى لو حط لها سرير .. تظل إنسانة غريبة وهم بعد لهم خصوصيتهم. |
رد: بين نار زعل زوجي و نار الشغالة
عياله 4 سنوات و 5 ..
ما ادري يا مهرة مخي متوقف ما اعرف شنهو البديل اذا عندكم افكار خبروني |
رد: بين نار زعل زوجي و نار الشغالة
زين مانتكلم عم بينان
نتكلم عن شي بسيط في كثير يعملوا غرف الشغالات زي الدواوين الجاهزه غرفه جاهزه تتركب وماتكلف مره |
رد: بين نار زعل زوجي و نار الشغالة
اقتباس:
بينك وبينها...بدون مايدرى زوجك قولي لا تجي خالص الا لليل تعي نامي و اتحملي الاشهر اللي باقية اشتغلي وحدك ..و اذا في مجال بقسمك تحطيها تنام بمكان بحيث تكون محاصرة فيه للصبح ( ما تطلع الا للحمام ) و الصبح تعي عنفسك و فيقي شوي بكير و كوني معاها لين تطلع من قسمك مادري اذا وصلتك الفكرة و اذا كانت مناسبة اتمنى غيري يفيدك |
رد: بين نار زعل زوجي و نار الشغالة
اقتباس:
اذا كنت قادرة تجيبي الغرفة الجاهزة بنفسك يعني من مالك جيبيها |
رد: بين نار زعل زوجي و نار الشغالة
ما بعرف حبيبتي زين بشو انصحك
ايه انا وعم اقرأ ومتت رعبة فكيف كون عايشة مع عاملة من هالنوع مع انو في كتير اشخاص كان نصيبهن عاملات عندهن ضمير واخلاق وبيحافظوا عالبيت واهل البيت شخصيا ما بحب حدا يكون معي بالبيت وطبعا انا مش افضل من حدا بس بختنق بوجود اي شخص خارج عن عيلتي معي بنفس البيت ومن بعد القصص اللي عم اقراها او اسمعها عن بعض العاملات واعمالهن مع اهل البيت او الاولاد كان عندي سابقا الرفض وهلئ صار عندي فوبيا منهن انا لو مكانك بحاول اي غرفة من البيت اذا في مجال يكون الها حائط بيطل عالمدخل او على بلكون وينفتحلها باب خارجي ويتسكر الداخلي وتسكن بغرفتها لوحدها ما معقول تكوني لوحدك وعايشة مع شخص ما بتوثقي فيه صعبة كتير حاولي حبيبتي تفكري بطريقة ما تكلف وبنفس الوقت تصير اقامتها او اقامة غيرها خارج بيتك ومهدي الطريق لزوجك وقت تلاقي الوقت مناسب وبس بدك تقفلي الباب حاولي تحطي المفتاح بالعرض كرمال اذا في مفتاح تاني ما حدا بيقدر يفتحه الا ليخلع الباب اسأل الله ان يفرج همك حبيبتي ويحقق لك مرادك دعواتي ترافقك يا رفيئتي |
رد: بين نار زعل زوجي و نار الشغالة
أخذ الصورة مع طلب اسم الشخص وأمه من أكبر علامات الساحر حتى أخذ اجزاء من الملابس الشخصية (القفازات)
|
رد: بين نار زعل زوجي و نار الشغالة
اقتباس:
صحيح خصوصا التعقيب الثاني مخيف فعلا !! يا ساتر يا ربي .. يظهر لي من تصرفاتها انها انسانة لا تؤتمن على شيء قطعاً !!! |
رد: بين نار زعل زوجي و نار الشغالة
اقتباس:
اضف الى ذلك الرش ( الماء المرشوش ) !!! يا ربي سلِّم .. |
رد: بين نار زعل زوجي و نار الشغالة
مؤقتا على حسب ما تفظلت به عندك حلين لا ثالث لهما اغضاب زوجك او البقاء مع الشغالة التي خفتها من وراء الشاشة لو مكانك اختار الحل الاول لانه مصيره يتفهم لان اسبابك منطقية
|
رد: بين نار زعل زوجي و نار الشغالة
زوجك يدري عن افعالها ، قول له كل شي ، قول له كيف ترضى تخدم وأبناءك ، بِسْم الله هاذي شكلها جايبه معها جنودها من الشياطين ، وإذا رفض ، مالك الا سورة البقرة كل يوم تقراينها كامله ، او كل ثلاث ايام مع المحافظة على الأذكار ، وتمر العجوه سبع تمرات على الريق انت و زوجك كل يوم ، كفاكم الله شرها
|
رد: بين نار زعل زوجي و نار الشغالة
مافي إمكانيه لفتح باب غرفتها بطريقه يكون مو في قسمكم وتلغون الباب الموجود حالياً؟
|
رد: بين نار زعل زوجي و نار الشغالة
قال رسول الله : من تصبح سبع تمرات عجوة لم يضره في ذاك اليوم سم ولا سحر . صدق رسول الله صَل الله عليه وسلم.
|
رد: بين نار زعل زوجي و نار الشغالة
الله يكفيك شرها يارب
الحل الاول قلتي عنده غرفه مكتب بالبيت ممكن يخليها لها وهو ينقل مكتبه بغرفه عندك؟ الحل الثاني البيوت الجاهزه تجي ارخص من البناء واذا مو قادر وانتي عندك قدره ماديه اشتريها على حسابك وعلى فكره تكون على مستوى عالي خذي شي صغير غرفه بحمام بيكون سعرها نوعا ما كويس وارخص من البناء الحل الثالث اذا عندك قدره ماديه انتي تكفلي ببناء غرفه وحمام لها بالحوش حتى لو اضطريتي تستلفي من اهلك وقولي لزوجك انك متكفله واذا مارضي قولي له خلاص اعتبره دين ورجعه وقت ماتبي المهم اخلص منها الله يكتب لك الخير ويحميك وزوجك من كل سوء |
رد: بين نار زعل زوجي و نار الشغالة
اقتباس:
لكن فكرة لطيفة بقترحها عليه اقتباس:
وفعلا ما اسمح لها تجي الا وقت الليل وقت نومها مع ذلك اذا تجي تحاول تطول وتظل مدة في المطبخ ما ادري شتسوي لها .. وتحضر الماسك الليلي ووو ولازم تقط لها تعليق حتى لو ما رديت احيانا احس تعليقاتها من باب ان تبي تتقرب اقتباس:
هي تكسر خاطري بس ساعات تخوفني ما فيه مجال للتكسير والبنيان لان اوردي زوجي مسوي خريطة حق يبني جزء كبير فاضي من البيت ... ف موضوع البنيان الجاهز تو اسمع عنه وبقترحه عليه اقتباس:
الله اعلم يا اخي .. ولكن سبق و عرضت علي انها تسوي سحر وان اخوها يقدر يسوي لي اياه بس زفيتها وقلت لها حرام ووو الخ قالت اصلا اخوي ب اندنوسيا وانتي بعيد ما يقدر يسوي سحر اقتباس:
ما اعرف يا لوفتي .. محتارة فيها اشوفها طيبة وايد .. لكن تخوفني في بعض الامور |
رد: بين نار زعل زوجي و نار الشغالة
اقتباس:
لان تصميم البيت مو جذي اقتباس:
بس اذا راحت ما ابي وحدة جديدة اقتباس:
دايما محافظة على اذكاري الحمدلله اقتباس:
لو يموت من اليوع ما يرضى اعطيه دينار فما بالج وهو عنده و داش فيهم مشروع ولا يرضى اصرف من فلوسي على البيت بس فكرة البنيان الجاهز جديدة علي وباعرضها عليه عالاقل لما يجيب وحدة جديدة ما تجي تقعد عندي في وقت رواق بعرض عليه الفكرة والله يسهل مشكورين جميعا كل من ب اسمه والمعذرة اذا فيكم احد ما قدرت ارد عليه |
رد: بين نار زعل زوجي و نار الشغالة
زين حبيبتي..
بصراحة ما عندي علم كبير أو دراية عن أمور السحر .. لكن اللي أعرفه إن الملح أو الماء المذاب فيه ملح يستخدم لطرد الجن وحفظ البيت. يعني لو هي فعلاً تبا تستخدم الملح لهدف ما فهو لمصلحتكم. ;) ولو زوجج مقتنع إنها ممكن تكون مؤذية ما كان خلاها تخدم عياله وهم الأولى بالخوف عليهم .. وبصراحة بصراحة ما أدري كيف غابت عن بالج هالنقطة وكيف تقبّلتي اقتراح إنها تنام مع اليهال وإنتي شاكة إنها ممكن تكون تعمل سحر وخرابيط! وعموماً إذا هي فعلاً تبا تعمل سحر فما راح تكون بهالغباء وتطلب منج إنتي اسم زوجج واسم أمه بكل هالصراحة .. على الأقل بتروح تقص على عياله الصغار ـ اللي ما يستوعبون هالأمور ـ وتسحب منهم هالمعلومات. لازلت أعتقد إنج بشوية حزم تقدرين تتحكمين في لقافتها .. لكني مب حابة تسيطر عليج فكرة إنها تبا تأذيكم أو تعمل لكم سحر وخرابيط. معاج طبعاً إن من حقج إن الخدامة ما تكون عندج ما دمتي ما تبينها ولا بحاجتها .. لكن أعتقد إنج المفروض تتصرفين حسب الحلول المتاحة والممكنة .. مع الوضع في الاعتبار وين الضيق الأخف (مب حابة أستخدم كلمة ضرر لأني لين الحين مب شايفة ضرر حقيقي بصراحة) .. بمعنى شو الأهون؟ .. إنها تنام في غرفة منفصلة في قسمج وإلا تنام مع اليهال في غرفتهم؟ على كل حال .. ناقشي مع زوجج اقتراح الغرفة الجاهزة .. فهو اقتراح لا بأس به .. وشوفي إمكانية تطبيقه. |
رد: بين نار زعل زوجي و نار الشغالة
اقتباس:
عشان جذي سبق و نوهت يا مهرة اني اشوفها طيبة و ذكرت ان اتصور انها تبي تتقرب مني لاني مو معطيتها ويه رغم اني اخاف منها ... بسبب موقف ما حبيت اذكره وهو ان كلمتها بحزم ان لما اقول اكلمج توقفين لان كذا مرة اكلمها وتهدني و تمشي لما حزمت وياها تهددني ان تتبلى علي بأمر سبق وصدر من ام عياله وصارت مشكلة طويلة عريضة و سجلت كلامها و سمعته زوجي و هي فعلا مو سهلة و لكن موضوع السحر مو وايد حاطته في بالي... مع ان تصرفاتها مريبة احيانا موضوع ان تكون مع عياله .. فارغين من موضوع ان ما ابي لهم الاذية طبعا عياله عيالي .. لكن في النتيجة آنه مو محتاجة لها بتاتا بفضل الله فما احس اني مضطرة اخليها معاي وآنه مرتابة منها ما احس بالاطمئنان و آنه طبعي خوافة .. بس ما اقدر اقول له هالكلام ان انه مو مضطرة ووو لان ما ابي ازعله على فكرة ممكن يستسيغ عقلي فكرة ان تبي تأذبني لكن مستحيل تأذي عياله لان تحبهم ومتعلقة فيهم .. لدرجة ان تعرض روحها للمشاكل مع امهم بس عشان ترضي اليهال بطرح عليه فكرة البنيان الجاهز على رواق والله يهديه و يوافق .. عالاقل حق العاملة الجديدة |
رد: بين نار زعل زوجي و نار الشغالة
انا اشوف انه مافي حل عملي مقنع
الا حل واحد وهو تستغني عنها تماما يعني لاتحتاجين لها بأي شيء وبالتالي الشغالة ماهي شغالتك. ولاتحتاجينها فماله داعي تكون عندك ابدا... واذا استحال .الامر نهائيا بيكون وجودها فقط وقت النوم كم ساعة |
رد: بين نار زعل زوجي و نار الشغالة
لا حول ولا قوة إلا بالله
ادعي كثير اللهم إنا نجعلك في نحورهم ونعوذ بك من شرورهم. |
رد: بين نار زعل زوجي و نار الشغالة
اذا ما انحل الموضوع بالبناء الجاهز أنصحك تستغني عن خدماتها تماما .. لا جلي صحون ولو مرة بالاسبوع ولا غسل ولا كوي .. امنعيها تدخل أي حجرة من قسمك عدا حجرتها .
تشتغل وتاكل وتحط ماسك وتدخل حمام وتجي حجرتها تنام وبس ... واول ما تقوم تطلع من غرفتها على هناك مباشرة تغسل وتتجهز وتفطر وتشتغل . |
رد: بين نار زعل زوجي و نار الشغالة
اذا تنازلتي من خدماتها
خلاص تعتبر مو خادمتك فقط للبيت الاول هم ملزومين بها وبالتالي مالها وجود عندك تماما |
رد: بين نار زعل زوجي و نار الشغالة
اقتباس:
واذا احتاجت شيء في منتصف النهار تجي لان اغراضها في غرفتها طبعا... فتصير كأنها رايحة رادة .. فاهمة علي ؟ اقتباس:
اقتباس:
قال خل افكر .. بس خل هذي العاملة الحالية تقضي مدتها معاي وقلبج على قلبي قلت له ما ابيها تسوي شيء بتاتا قال لي فيه عاملة وتبين تشيلين كل شيء فوق ظهرج قلت له عادي كلنا اثنينه .. مش كارثة لو اشتغلت... ومثل ما قلت حق ينابيع يا خالتو .. تظل رايحة راده على اغراضها ومن باب الانسانية ما راح اقول لها لا ... مضطرة الحين اسكت .. خل تخلص هالجم شهر على خير اقتباس:
99% بضطر للصبر على وجودها مع الاستغناء عن جميع خدماتها. حاليا جذي قررت.. ولما تيي العاملة الجديدة اكا خللص مهدت له ان ما ابيها عندي . مشكورين جميعا و رحم الله والديكم ❤ |
رد: بين نار زعل زوجي و نار الشغالة
زين
1- واضح ان الشغالة طيبة لكنها تربت على ان السحر أمر عادي بدليل أنها تعتبر أنها تقدم لكِ خدمة بالسحر و تصرح أن أخوها ساحر . 2- هي فضولية غالباً لأنها تربت في مجتمع مفتوح أو مجتمع قروي الناس كلهم يعرفون بعضهم عن قرب . 3- احذريها بحيث أن تكون علاقتكِ بها عادية جداً لأنها إن شعرت أنك تعاملينها بعدوانية أو متضايقة من وجودها فحينها قد تقدم على الإضرار بكِ فعلاً . أعانكِ الله و يسر أمورك و أصلح أحوالك و رزقكِ الذرية الصالحة . |
رد: بين نار زعل زوجي و نار الشغالة
زين هي من اي جنسيه ، ومن اي قريه ؟ ، اذا تعرفين ، عشان ناخذ بالنا ، لان في قريه تُمارس اعمال السحر و الساحر عندهم شي مقدس ، اذكر الخادمه اللي ضرتني كانت من سيريلانكا ، و بعد ما راحت اخبرتني الخادمه الاخرى ، ان هي أصلا تعبد الشيطان و الثانيه قالت عنها مع انها من نفس الجنسيه لكن كانت من قريه تُمارس السحر و انها كانت تحاول ما تزعلها عشان ما تاذيها ، وحسبي الله ونعم الوكيل فيهم كلهم .
|
رد: بين نار زعل زوجي و نار الشغالة
والله رجعت لي ذكريات سيئة للغاية ، كانوا يضحكون اذا تضاربنا انا وأختي ، يعني الثانيه كانت تعرف عن الاولى انها ساحره ، لكن عادي مش مهم نحنا نعمل و نحصل راتب ، و أهل البيت يمرضون ينسحرون سنوات يتسممون غير مهم ، اهم شي نحنا نعيش ونحصل راتب ونقضي السنتين ، والله انه في منهم هم الشياطين بحد ذاتهم
|
| الساعة الآن 03:18 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©