|
تطاول زوجي وشتمه لي مستجد 43-حلت رد74
السلام عليكم ورحمة الله وبركاته ...
هل هذا شك ام غيره !؟ .. اذا كانت غيره هل هي طبيعيه ام مرضيه ؟؟! .. من اول ماتزوجنا واشوف بزوجي .. غيره ، شك ، جنون .. ماعرف وش هي بالضبط .. المشاكل بسببه اقل شي 4 الى 5 مرات بالاسبوع بس سرعان مانتصافى ... كنت في البداية احس بفرح واتلذذ بغيرته علي لكن بعد سنه الى سنتين من زواجنا اصبح الامر لا يُطاق ... مشاكل مشاكل مشاكل.. حتى اذا طلعنا لازم تصير مشكله ... لازم نكد ... لازم زعل .. وبعد ساعات نتوصل لحل وكأن شيء لم يكن ... واذا طالت يوم يومين ويطيح الحطب ... مارح اذكر المواقف القديمه والمشاكل القديمه اللي بسببها الغيره ... لكنها كانت توصل لدرجة الغيره من اهلي سوا اخواني او اعمامي او والدي الله يرحمه ... حتى التلفزيون صرت اكرهه بسببه ... المشاكل من النوع هذي صارت روتين بحياتي وتعودت عليها بس لمتى ؟؟ اللي صار امس ... خرجنا للسوق نشتري فساتين لي ولبنتي ... الخميس الجاي ملكة اخته ... دخلنا محل صغير وفيه عامل واحد ... وكان راعي المحل يعرض علينا فساتين ويمدح القماش ووو...الخ ... زوجي اختار فستان ... وسأله في منه لون كذا ... قال موجود .. وطلع لنا اللي نبغاه ... واحنا لسى ماقلنا له المقاس بس طلبنا اللون ... زوجي سأله كم المقاس اللي عندك ... قاله نفس مقاس المدام ان شاء الله يضبط ... زوجي شافه طلع فعلا مقاسي ... حسيت زوجي تغير شكله .. " زوجي مسالم مو من النوع اللي يضرب او يعصب على أحد " ... قاله اوك .. وطلب من راعي المحل انه يشوف له فساتين غيره يعني بياخد اللي اختاره وبياخذ اكثر من فستان... جلسوا مايقارب النصف ساعه ... ولما جا يحاسب ... زوجي قال له ابغى ترتبهم وتحط كل واحد بكيس .. كانوا 4 فساتين ... " كنت عارفه انه ناوي على شي حتى جا ببالي انه بياخد الفساتين من غير مايحاسب لان مستحيل زوجي يصرف اكثر من 500 ريال على فستان " .. المهم بعد ماخلص الترتيب وحط كل واحد بكيس ... زوجي قال له كم الحساب ؟... قال 4500... طبعا مستحيل مستحيل زوجي يدفع هالمبلغ ... وجا بيحاسب ... وبعدين قال له ... تدري شلون خلاص هونت مابشتري ... ولو غضيت بصرك كان جاك رزق ... وانا مافتحت فمي بكلمه ... ولما طلعنا من المحل ... قلت له ليش سويت كذا حرام احرجته وقطعت رزقه " لأن كان يجي زباين وزوجي يقول انا جاي قبل وتخلصني اول شي انا.. والزباين يطفشوا لما طول ويطلعوا من المحل " ... وصلنا السياره وكان معصب ويتنفس بصعوبه وكأنه مقهور ... وانا رحمت الرجال والله مايستاهل كل هذا ... وقلت لزوجي مايستاهل كل هذا تسويه لو طلعنا من المحل من البدايه اهون من انك تسوي كل هذا ... كنت اتكلم معه بهدوء .. وهو يقول اسكتي وكلي " ... " انا ماعلقت على كلمته وسكت ... قال ليه تدافعين عنه ولا عاجبك يعني ... وانا ماسويت كذا الا عشان يتأدب ومايجلس يقز ببنات الناس ...قلت له مادافعت بس ماشوف انه غلط ولا تحرش ولا شي ... ورجع يسبني ويشتم ويتهمني اني اعرفه ... وكل هذا قدام بنتي وولدي ... قلت له لحد هنا وخلاص زهقت مليت وطفشت منك .. انت مريض وشكاك ... ابي اروح عند امي ... لسانه متبري منه ومايثمن اللي يقوله ... نعتني بأبشع المسبات وانا ساكته ... ومن امس الليل وانا ببيت اهلي ... اول مادخلت بيت اهلي قفلت الجوال الين الفجر... صحيت الفجر فتحته شفت منه مكالمتين ورساله وحده بالواتس كلها سب وشتم ... ولا رديت عليه ... وهو ولا ارسل الا بعد المغرب اتصل ومارديت ورجع سوا رساله ... متى بترجعين البيت ... مارديت عليه ... بعد كل اللي قاله لي يعتقد بهالبساطه اني برجع !!؟ ماما واخواني مايدرون بشي ... اعتذر على الإطالة بس حبيت اطلع اللي بقلبي ... تم تعديل العنوان ليتناسب مع المضمون مستجدات الرد43 http://66n.com/forums/showpost.php?p...1&postcount=43 حلت الرد 74 http://66n.com/forums/showpost.php?p...0&postcount=74 |
رد: تطاول زوجي وشتمه لي بسبب غيرته
بعتقادي المتواضع الغيرة محبة
انتي ستفزيتية ولكن بحسن نية منك يوم ادفعين عن صاحب المحل ماكان لة داعي انك تبررين عن البائع الخطئ الاخر والمشترك بينكم ان هالمسرحية قدام اطفالكم وهذا خطئ فادح يجب عليكم تفادية مستقبلا بصراحة انا ضد زوجك بخصوص الفاظة السوقية وسبة لك فانتي ام ابنائة وزوجتة فالاحترام بينكم واجب مهما صار |
رد: تطاول زوجي وشتمه لي بسبب غيرته
سمورة هل تلبسين النقاب؟؟
|
رد: تطاول زوجي وشتمه لي بسبب غيرته
انا مابررت ... بس ماحبيت هالتصرف يطلع منه ... وش كان بيخسر لو طلع من المحل من البدايه اذا ضايقه اسلوب الرجال ..
دايما اقوله يصون لسانه وخاصة قدام الاطفال بس مايفهم .. مسك نعم البس النقاب من بعد زواجي .. والبس عباه فضفاضه لكن على الكتف .. |
رد: تطاول زوجي وشتمه لي بسبب غيرته
اثنينكم غلطانين
وهالبائع قليل أدب مااعطاك مقاسك إلا وهو مفصل جسمك تفصيل وعتبي على زوجك مفروض اخذك وطلعتوا مباشرة لمحل آخر اي رجل بمكانه بيتضايق ويخرج من المحل ويقول للبائع استحي على وجهك ولا تناظر إلا عاد كان عبايتك جسمك فيها واضح وينعرف مقاسك وزوجك ساكت ومايبي الناس تناظر هذا خطأ زوجك بالنهاية مفروض ماتكلمتي معاه عن هالبائع ابدا لأنك عارفه انه مووووولع وقابل للانفجار وبنفسك قلتي انه تغير وجهه من الموقف والجن كان سكتي لازم تدافعين عن البائع مو مسكين انا اعرفهم أغلبهم بعد ماتطلع يسب في اللي خلفوك لأنك ماشريت منه |
رد: تطاول زوجي وشتمه لي بسبب غيرته
وعليكم السلام ورحمة الله وبركاته
الله يخليكم لبعض ولا يفرق بينكم .. انا معك أن الغيرة مدمره ولا تطاق لكن وأنا أخوك أحمدي الله أن زوجك وأبو عيالك أقل من غيره بكثير يطلع معك وتخرجون وتمشون طبيعي .. لو أقولك عن واحد من جيرانا واللي يسويه ماتصدقين أذا طلع هو وزوجته يمشي وراها ويحط يديه مثل السياج عليها وعيونه مثل الرادار يمين ويسار يناظر خلق الله على باله بتنخطف منه وياويل اللي تجي عينه بعين هالأدمي الله أكبر تصير سالفه مالها أول من تالي .. أختي بما أنك فاهمه زوجك وعارفه وش طبيعته .. كان سايرتيه وقلت أيه العامل مخطئ وغلطان ومن هالكلام ولا كبرتي الموضوع .. عندك ولدين اسأل الله أن يحفظهم لك ويطرح فيهم البركة وشلون تبين تغيرين طبعه الحين ماتقدرين وأنا أخوك ... أرخي الحبل شوي وأرجعي لبيتك ونبهي عليه بموضوع الشتم والسب من ناحيه دينيه وأنه حرام ولا يجوز وأذكري له من الأحاديث تبين مدى حرمة هالأمر .. زوجك يحبك ولا يقصد ولا يتعمد الأساءه لك فتغاضي عن مابدر منه ليسير مركب الحياة وأنتم مع بعض .. اسأل الله أن يجمع بينكم في الخير وعليه ..🌷 |
رد: تطاول زوجي وشتمه لي بسبب غيرته
اقتباس:
عليك انا الومكان زوجك ويقولي هذا بيضبط على زوجتك وربي للقطة مع رقبتة وبالعقال لين يتفل العافية مو هو الي يقيم لبس زوجتي بيضبط او لا بس زوجك اعقل من شاطي الراحة😅 |
رد: تطاول زوجي وشتمه لي بسبب غيرته
الرجل من خبرته في البيع والمقاسات صار يعرف حتى والوحده لابسه عبايه
ما اشوفه قليل ادب انا مره كنت مع اختي في السوق واخويه سال البايع عن جاكيت لاختي قام البايع من باب النصيحه قال ما يناسبها يمكن يناسب الاخت ⏩يقصدني ولا جا ببالي ولا بال اخويه انه قليل ادب او بصبص على اجسامنا مع اننا يومها كنا لابسين عبايات واسعه وعلى الراس وفهمناها انه من باب خبرته ولا تناقشنا حتى في الموضوع مر مرور الكرام |
رد: تطاول زوجي وشتمه لي بسبب غيرته
اقتباس:
العباه وسيعه ماتفصل الجسم ... وانا قلت يمكن البائع يعرف المقاسات بسبب شغله ليه نظن بظن السوء ... اقتباس:
اقتباس:
|
رد: تطاول زوجي وشتمه لي بسبب غيرته
اقتباس:
مثل ما انا فكرت ... الرجال اكيد له خبره بسبب شغله ... عشان كذا قلت انه ماغلط ولا يستاهل اللي سواه زوجي.. |
رد: تطاول زوجي وشتمه لي بسبب غيرته
البايع عرف مقاسك لانه خبره وهذا مجال عمله
مثله مثل مصممي الازياء .. مايحتاج انه يدقق بك كثيرا ما نستعين بخبرة البايعات والبايعين بتحديد المقاس المناسب حتى للاطفال و المواليد .. --------- |
رد: تطاول زوجي وشتمه لي بسبب غيرته
والله يا اختي ذكرتيني باختي لما ذهبت لتلد
كان في دكتور وقال لزوجها تفضل برة اشوف شغلي لم يكمل كلامه حتى اسقطه ارضا مسكين اصبح في مركز الامن ومحضر لكن في النهاية لم تولدها الا طبيبة |
رد: تطاول زوجي وشتمه لي بسبب غيرته
أنا لا أفهم ماعلاقتك بما فعله البائع حتى يصب جام غضبه عليكِ ؟!
أفهم غضبه من كلام البائع رغم أني لا أراه مبرر لكن غضبه منكِ هو الذي لا أفهمه!!! لزوجك نسخ كثيرة مستوى الغيرة عندها زائد بكثير عن المستوى الطبيعي وترى نفسها طبيعية |
رد: تطاول زوجي وشتمه لي بسبب غيرته
ما أدري اختي بس أرى المسألة سخيفة (اعذريني عالكلمة بس مالقيت غيرها)..
بالله شو يبصبص على وحدة بلباس فضفاض ونقاب بعد.. لا أفهم!! شو الي يبصبصو على منقبة يا جماعة هونوها بتهون.. البائع هاد شغلو.. وأصلا لو يفهم وعقله وسخ ماتجرأ يحكي هالكلام أمام زوجك.. ليش يجيب لنفسو المشاكل؟؟ يعني هاد شغله ومبين ما في شي براسو والا ما حكا من الاساس.. اشوف صعبة يعني امرأة بنقاب وعباية وين يبصبص أصلا.. مجرد رأي.. |
رد: تطاول زوجي وشتمه لي بسبب غيرته
حطيها قاعدة بحياتك لما تشوفي زوجك مرا معصب ومشعلل لا تناقشينه ولا تجادلين معه ..
يا عمري منتي مستفيده شي ترا الضربه بتجي على راسك .. مثل ماحصل بهالموقف .. صح زوجك يقهر وماله داعي ابد يسبك بكلام سخيف بس لو جينا بعد للعقل ياختي من هو هالعامل اللي بسببه انهان؟ ويجين كلام سخيف بسببه .؟عساي مادافعت عنه ..بسلامته عساه ينحرج . ولو زوجك دافع عن حرمه سبتيها من غيرتك عليه بتنقهرين من تصرفه صح والا لا ؟ على اي اساس يدافع عن حرمه مايعرفها فالزبده اننا مانحط انفسنا بمواقف مالها داعي زي ماحصل بدفاعك عن العامل |
رد: تطاول زوجي وشتمه لي بسبب غيرته
حجابك كان كامل لم تكلميه واخذ حقه من البائع
ماذا يريد اكثر الله يصلح النفوس ربما اتخذ هذا الموقف سببا للتنفيس عن غضب سابق |
رد: تطاول زوجي وشتمه لي بسبب غيرته
يا اختي ماله داعي تدافعي عن البايع
واحد مايعنيك وهو مجرد بايع واذا زوجك غلط عليه فالموضوع بينهم انتي دخلتي نفسك ليه ماني فاهمه! يقصد البايع والا مايقصد مايهمنا.. واحد غريب لا راح ولا جا مايستاهل تستهلكي طاقتك مع زوجك خصوصا وانتي شايفته معصب ومتضايق استوعب لو هو غلطان على احد من اهلك بس البايع مايعنيك لامن قريب ولابعيد حبيبتي الصمت بهالمواقف حكمة |
رد: تطاول زوجي وشتمه لي بسبب غيرته
اقتباس:
|
رد: تطاول زوجي وشتمه لي بسبب غيرته
الله أعلم ، زوجك اخذها من قلة الإحترام ، يعني أنا أسالك كم المقاس ، تقوم تجاوب بيظبط على زوجتك ، وما إحترمت وجودي ... تصورت الموقف واجد ان زوجك له حق يتضايق ، لكن بالغ انه وصلت للسب و الغضب الشديد ، واغلب محلات القماش اللي يبيعوا فيها رجال ، حتى محلات العباءات و الخياطين رجال ، فلا اعلم صراحه ان كان ما يقمون به من أخذ القياس سواء بالنظر العادي ، او استخدام المتر مثلا جائز .. تكمن المشكله في مبالغة زوجك .
|
رد: تطاول زوجي وشتمه لي بسبب غيرته
ماقصدي اني ادافع عن البائع.. بس انا ماشفت انه غلط وكلامه عالمقاس هذا مجال عمله .. اسلوب زوجي غلط غلط مو حلو بحقه يكسر بخاطر الرجال ..وماحبيت يكون زوجي بهالنذاله !.. وانا تكلمت معاه عادي ماكنت معصبه بس حبيت افهمه ان الرجال مو قصده شي عشان لايظلمه ويدخل بسوء الظن ويأثم .. وهو فهم اني ادافع عنه ولا بعد معجبه فيه !! .. كلامه جرحني وقلل من قيمتي وتربيتي ...
لست كغيري ... مامعه هالمبلغ ولا ناوي يشتري بهالمبلغ وقيمة الفستان الاول مايتجاوز ال 350 ... والبطاقه رجعت معي .. |
رد: تطاول زوجي وشتمه لي بسبب غيرته
ليس لك اي ذنب
والبائع لا اظنه يقصد خرجت الكلمة عفويا من فمه خليه يهدا ويطيح الي براسه لان ردت فعله مبالغ فيها |
رد: تطاول زوجي وشتمه لي بسبب غيرته
اقتباس:
|
رد: تطاول زوجي وشتمه لي بسبب غيرته
سمورة إلي صار صار..
صحيح الأمر مايستاهل وغلط.. لكن بالأخير زوجك مقتنع ان البائع تحرش فيك.. لذلك عصب بهذا القدر.. اذن كلامه كلو كان غير مقصود كلو من الغضب الهائل.. أول شي، ارجعي بيتك.. ارجعي بيتك ما افهم ليش بعض الحريم على اي شي بتروح بيت اهلها،، لا غلط،، بكره بيتعود على روحتك وغيابك وماعاد تفرق معو.. وشوفي هون كم وحدة راحت تزعل فترة بيت اهلها فبيكبر الجفا وتبرد مشاعر زوجها ويتصير قاعدة بالشهور ومافي حماس من زوجها لترجع.. اسمعي الكلام.. ما اقول ما تزعلي.. بس ازعلي ببيتك،، وانتي قدام عيون زوجك،، وقعها أقوى حبيبتي.. واذا اعتذر، اقبلي اعتذارو واطوي الصفحة.. لانه زوجك عنيد ماراح يعتذر ثاني،، مين بيحلها بعدين الله يصلح أحوالكم |
رد: تطاول زوجي وشتمه لي بسبب غيرته
مرحباً أختي
إذا تبين رأيي الشخصي أنتِ غلطانة في بداية الموقف تصرف البائع هناك من يفهمه ويتقبله وهناك من لا يفهمه ويتقبله والتصرف الذي فعله زوجك يعتبر بينه وبين البائع والأصل أنه كان غيره على عرضه ( طبعاً لا يفهم هذه النفسية إلا الرجال أما النساء فبعضهن قد يراها عادي أو مبالغة ) والمفترض .. إما أن تسكتي وإما أن تشكري زوجك في أن تصرفه كغيره عليك محمود ثم تقترحي أنه لو تركته من البداية وطنشته لكان أفضل عشان زوجك لا يزعل نفسه وأن نفسيته وصحته أهم أما أنك تكرري على زوجك لومك وتصرفه السئ مع البائع فهذا ما أثاره أكثر ضدك .. ( أما مسألة إيش كانت نيتك وماتبغي زوجك يظن بالسوء أو يقطع رزق الرجال ) فهذا داخل قلبك وزوجك لايعلم إلا الظاهر من كلامك وأما شتمه لكِ أو تجاوزه حدود الأدب .. فهذا غلط منه وعليه أن يعتذر وألا يعودها وأما الصراخ أمام الأولاد فالظاهر أنه كان غير مقصود ولكن ربما ثورته أعمته عن وجود مشكلة أمام الأبناء وإهانة الأب للأم أخيراً الحل .. أن تتناقشي مع زوجك وكل واحد يكون صريح في نسبة الخطأ والإعتذار لبعض والوعد بعدم التكرار والله أعلم |
رد: تطاول زوجي وشتمه لي بسبب غيرته
سموره حبيبتي استهدي بالله ماكان مفروض تروحي لاهلك الموضوع بسيط
تدرين ياسموره زوجي فيه غيرة الدنيا كلها انا مازدتها بالعكس طفيتها كانو يقولون لي خواته بداية الزواج الله يعينك عليه لما اشوفه غار من شيء كنت اعزز له وقوله اعجبتني وكبرت بعيني و بعد مايهدا وتروح ثورة الغضب اللي الشيطان حاضر فيه اسولف معاه واخذ بخاطري عليه وكان يقولي صادقه وراح اخفف منها موقف مره كنا بمنطقة اخته واخذناها معانا لسوق وصار موقف مااحب اذكره بس ولاربع موقفك وبغت تصير هوشه لما ركبنا السياره كنا ساكتين قالت اخته تبي الصراحه يا....تقصد زوجي لوكان زوجي بنفس شخصيتك ماقعدة معه دقيقه الله يعين فلانه تقصدني قلت لها والله لو فيه مليون رجال مااستبدله بفلان وذكرت اسم الدلع لزوجي بس هو ماشاء الله بادي يتحكم بغيرته الحمد لله الان خف بكثيييييير بعض المشاكل ياسموره نحتاج نتصادم معاها عشان تنحل وماتتطور والبعض تحتاج نسايرها عشان تخف وتعدي على خير لو احتويتي غيرته ياسموره وماناقشتيه وعززتي الجانب الرجولي فيه ادري بتقولي انا كنت هاديه وماتكلمت بكلام يزعل بس هو يستنى الكلمه منك عشان يخرج اللي جواته وبصراحه بداية كلامه ماعليه غبار بس لما شافك تدافعي عنه ثاروسب لاتنسي الشيطان حاضر استعدي بالله اخيتي واخرجي مبلغ لصدقه واستغفري وارسلي لزوجك اعتذار بطريقه ذكيه |
رد: تطاول زوجي وشتمه لي بسبب غيرته
زوجك غيرته مرضييية
من البداية ماحطيتي حد لغيرته عشان كذا تجرأ عليك وسبك بالكلام هذا مدري كيف راح يحترموك اولاد بعدين وهم يشوفوا ابوهم وقدوهم يتصرف كذا ابد لاتستهيني بالموضوع لازم زوجك يتأدب على قلة احترامه لك صراحه الكلمه قوييييه اكتشفت انه النساء عندهم طاقة تحمللل كبييره صراحه تتحمل مدري عن نوعية مشاكلك ولاشخصية زوجك بس اللي شفته من مشكلتك معاه انه مستوى النقاش عندكم متدني جدا ومافي احترام الله يعينك ياربب |
رد: تطاول زوجي وشتمه لي بسبب غيرته
اقتباس:
خوذي راحتك لما تكوني تتكلمين مع صديقتك ..اختك ..امك..ابوك لكن مع زوجك لا حبيبتي لاتاخذين راحتك ولاتكلمين باريحيه لازم حدود وتنميق ومراجعه للكلام قبل مايطلع وليتك تسلمين بعد لانو ياقلبي فهمه غير فهمك ممكن تتكلمين بطابع معين لكن تصل لتفكيره بقالب اخر .. وهالشي مو سهل لكن مع الاطلاع وفهم الشخصيات وفهم طبيعة الرجل يكون سهل والله يرزقنا الصبر عليهم وندخل الجنه على هالجهاد |
رد: تطاول زوجي وشتمه لي بسبب غيرته
ما اشوف ان زوجج غلط بشي بصراحة راعي المحل عيونه زائغة وقليل أدب
على الأقل المفروض يحترم زوجج ويسال عن المقاس بس ما يقول بيناسب المدام ويع على بعض البائعين يلوعون جبد الواحد وانتي الله يهديج بعد زدتي النار حطب جان سكتي ولا قلتي ولا كلمة |
رد: تطاول زوجي وشتمه لي بسبب غيرته
انا مارحت بيت اهلي عشان اللي صار ... رحت بعد السب والشتم ... كيف ارجع لبيتي مستحيل بعد كلامه هذا ارجع مستحيل ... حتى مافكر يعتذر عن كلامه من أمس الى اليوم رسالتين فقط ... رساله شتم وبعدها متى بترجعين ..؟ يعني انا ماعندي كرامه ! ..
اخي الرسمي . صح انا غلطت بس ماكان يستدعي انه يسبني ويتكلم عني ... قبل كم يوم صار موقف ... واتهمني نفس الشي ... كنت ابغى اتكلم وادافع عن نفسي ماخلاني يقول خلاص اسكتي مابغى اسمع ... ومشيتها له ... بس هالمره لا .. يسب ويشتم وانا اعتذر ؟؟ لا صعبه ... ابغاه يتغير لازم يتأدب ورجعه مارح ارجع .. توتي لا مو بسيط .. زوجك يمكن غيرته طبيعيه .. بس زوجي غيرته تدخل فيه الشك ... ويختمها بالسب والشتم.. اما اعتذار لا .. |
رد: تطاول زوجي وشتمه لي بسبب غيرته
السلام عليكم أختي ، كنت كاتبة قبل 3ساعات رد وأخذ من وقتي ولم يكتب الله لي إرساله وانمسح ، ولازلت مصرة أكتب رأيي وإن كان فيه تشابه مع الأعضاء .
1- أنتِ قعدتِ تدافعين عن العامل ، لو كان لم يعجبك أسلوب زوجك وطريقته لا أجد أنه الآن وقته بوقت آخر أخبريه أنه من الأفضل أن يعمل هكذا دون أن تتطرقي للعامل نهائيًا . 2- بغض النظر عن أن الموضوع موضوع غيرة كما تقولي ، وأنه بين زوج وزوجة ، من الأحسن والأفضل أن لا تتكلمي وتدافعي عن الحق ( كما بدأ لك ) ، وأنت راح تخسري الشخص الذي أمامك مالم يُطلب منك أن تبدئي رأيك ، أو أن تفصلي بينهم ، ومع هذا كله أجد حالتك مغايرة جدًا فيها غيرة وأنتِ تعرفين أن (الغيرة) شعور لا يتحكم به الشخص فبالتأكيد أنه قد يكون التصرف غير سوي ،(وزوج وزوجة ) فالعلاقة لابد أن تصان وتحترم بكل ماأوتي الإنسان من قوة. 3- استغربت منك لمّا قال أنه فعل ذلك لأجل كذا ومازلت تدافعي عنه أو ماشابه ذلك ماتيقضتِ ! وعلمت أن الرجل ينظر من زواية مخالفة لك ( عمومًا لما قلت هذا أعلم أن الأمر قد فات ولكن في أي موقف لا سمح الله كمثل هذا ادركي مايشعر به الطرف المقابل من خلال كلامه ، وتدركي أيضًا أسباب ردات فعله ، وكذلك مع أنه كما تقولي سبك وماإلى ذلك فلا أحمله كامل الخطأ ( بنظري ) فأنتِ استفزيتيه مثل استفزاز العامل بل أجد أنه أشد وذلك لأن ردة فعله كانت أقوى من ردة فعله لدى العامل . 4- لا تقولي أنا لم أدافع و و ، هو سيفسر ذلك دفاعًا ومن الصعب جدًا إقناعه أنك مع الحق و و فلا يخفاك تأثير العلاقات بين الأشخاص ، وإلا لما كان يقبل شهادة القريب لقريبة ولا شهادة العدو على عدوة . لي سؤال هل من الممكن أنك تري أن انتقادك لفعله قد يكون باعثه أن انتقائك للفستان وتعبك وفرحتك به هو السبب ؟ أعانك الله وسدد خطاك . |
رد: تطاول زوجي وشتمه لي بسبب غيرته
هو اخطأ وإنتي أخطأتي ايضا واللي صار صار
أكيد إنتي الان محتاجة لحل إِيش تسوين الايام الجاية انا أقول ارسلي له رسالة اذكري فيها انه ليس من حق اي احد ان يسبك او يقذفك ولو كان اقرب الناس لك وغير مسموح هذا الشيئ أبدا وأنك قد مللتي من هذا الأسلوب الصبياني الغير مسؤول وان نفسيتك تعبت ومن الصعب ان تسامحيه صحيح انك استفزيتيه لما دافعتي عن صاحب المحل لكن هو لازم يتربى ويبطل قذف على الداخلة والطالعة ولازم يسترجل ويترك شغل المبزرة .. المفروض من اول مره قذفك فيها دخلتي طرف ثالث يتفاهم معاه ويحسسه قد إِيش هو متهور وغير متزن |
رد: تطاول زوجي وشتمه لي بسبب غيرته
ريماس ... كنت ابغى اوقفه عند حده لاني تعبت كل يوم على هذي الحاله ماتهنى إذا طلعت مكان ..
موهبه .. الرجال مو واضح عليه حركات فصعب نظلمه .. الواثقه ... شكرا لك ... صحيح انا غلطت لكن صعب اعتذر له الان بعد الكم الهائل من الشتائم ... وبالنسبه لسؤالك .. حبيت الفستان الاول وسعره معقول وكنت ابغاه وطلعنا بولا شي .. اقدر اقول ايه بس بنسبه بسيطه .. مزهريه .. ان شاء الله سأرسل الرسايل لكن ليس الان ... |
رد: تطاول زوجي وشتمه لي بسبب غيرته
اقرئي كل يوم سورة البقرة و كدلك سورة يو سف و راح تشوف النتائج،كلو بيهدأ انشالله.ما تكبري الموضوع براسك عادي،هادي محبة.
|
رد: تطاول زوجي وشتمه لي بسبب غيرته
وعليكم السلام حبيبتي
من وجهة نظري ومن منطلق ان زوجي غيور ايضا ، صراحه انتي اخطأتي وزوجك معاه حق في البائع بس هو حب يعاقبه بطريقته لو زوجي هو اللي قاله مقاس زوجتك هاهاهاي يمكن يعلقه من رقبته صراحه هذا بجيح جدا وماقد حصلي على كثر نزلاتي للسوق ان احد يقيم مقاسي يمكنهم مدربين على انهم مايتدخلون بخصوصية العميل ولو انا احد لمح لي انو يعرف مقاسي انا نفسي مابرضى انو قزقزني لما عرف المقاس ، اما الناحيه الثانيه انك تناقشين زوجك وتخاصمينه بسبب احد ثاني انا لا يمكككككككن اخاصم زوجي لاجل احد ثاني فكيف لو كان هالاحد لا يعرفنا ولا نعرفه مهما اخطاء زوجي بحق العالم بكيفه مو انا اللي اقيم سلوكه وانا ماحب احد بهالعالم كثره فمستحيل اجلس اخاصمه لاجل علان وفلان حتى لو من باب الانسانيه مالي شغل فيه هو حر بنفسه وانا الزم ماعلي زوجي ومشاعره يمكن انو يفهم دفاعي عنهم شيء ثاني ف ابعد عن الشر وغني له طيب تخيلي انك مسافره وفي بائعه اجنبيه تتميلح لزوجك وانتي عشان تغيضيها جمعتي من هالاغراض وبعد ماتعبتيها قلتي خلاص مابي وطلعتي وهزأك زوجك على فعلتك ومادري كيف بالله ماراح تنقهرين ويفور دمك ليش تدافع عنها ومن هي بالنسبه لك ولاب لاب لاب ايوا بالضبط اسقطي الموقف عليك عشان تتخيلي ردات فعل زوجك ونصيحه مني انو تكلمينه انك انجرحتي منه ومن كلامه وتوضحين وجهة نظرك وانك لربما اخطأتي بالشرح وان هالبياع وغيره مايعنون لي شيء لو اجتمعو رجال الارض كلهم هم في كفه وزوجي حبيبي في كفه وارجعي بيتك الموضوع سخيف يبي له تعهدات بس انو معاد يغلط عليك ورضاوه على السب وانتهينا وحطي ببالك معاد تدافعين عن اي رجل بالعالم زوجك الزم ماعليك وبس ❤ |
رد: تطاول زوجي وشتمه لي بسبب غيرته
ثاني مره روحي السوق مع أختك
بصراحه ماأحب الرجال اذا دخل معي السوق يايكون يبصبص على النسوان والا يدقق في اتفهه الاشياء مثل حركة فلان وعلان والا اطلع من السوق مااقتنعت يكون فوق رأسي |
رد: تطاول زوجي وشتمه لي بسبب غيرته
اقتباس:
احبه هو يوديني وانبسط كثير بوجوده لاني فاقده هالشيء معه يمكن بالسنه اطلع مرتين معاه الباقي مع امي 😭😭💔💔💔💔💔💔💔 |
رد: تطاول زوجي وشتمه لي بسبب غيرته
سموره انتي رجعتي بردودك تأكدي
انك قلتي كذا لانك تضايقتي من اسلوبه حبيبتي هذا زوجك مو ولدك مالها داعي تقولين له اخطأت بحق فلان خصوصا اذا فلان مايعينك ابدا فهمتي علي؟ تصرفك هذا جدا مستفز للشخص الغضبان لازم تقتنعي بهالشي وتتفهمي موقفه وتدركي ان تصرفك خاطئ لاتبرري لنفسك حبيبتي انا وانا مالي علاقه انقهرت فمابالك بزوجك إللي كان معصب وقتها النقطة الاهم الان ان زوجك غلط عليك غلط كبير لانه اهانك وتلفظ عليك انتي تفاهمي معه على هالنقطة بحزم وجدية سبحان الله كل المشاكل (الجديه) بهالقسم اساسها الاول: عدم الاحترام واعتقد هو السبب الاول لفشل الزواج بعد تجربتي ووقوفي على مشاكل غيري سموره اشتغلي على الاحترام بينك وبين زوجك علاقتكم تحتااااااجه بشده |
رد: تطاول زوجي وشتمه لي بسبب غيرته
مايخليني اطلع مع اختي ولا مع اي احد .. واذا طلعت مع اخواني يقلبها نكد وتحقيق ...
كنافه ... مو اول مره يسويها ... تخيلي مره طلعنا انا واخته وهو المول وهو جلس يلعب بنتي .. واخته قالت له بنروح دورة المياه ونرجع .. قالنا لا تتاخروا...ورحنا واحنا راجعين اخته قالت خلينا ندخل هالمحل فيه اشيا حلوه .. قلت لها لا خلينا نرجع عشان اخوك مايعصب ... قالت وهو وش دراه ندخل بسرعه نشوف ونرجع.. دخلنا واحنا طالعين من المحل شفناه بوجهنا ... اول شي اتهمني اني اعانده واني انا اللي قلت لاخته ندخل .. وثاني شي ماصدق اخته لما حلفت ان هي اللي عرضت علي ندخل ويقول انها تدافع عني ... وثالث شي يقول اللي تدور بالاسواق من غير محرم هذي ماعندها اهل يربونها ... وبعد كل هذا يقول ليش اخترتي هذا المحل بالذات اكيد شفتي احد او متواعده !! .. وكل ما اجي اتكلم يسكتني .. هالشي صار برمضان .. تغاضيت عن الموضوع ولا سويت مشكله ...ورجعنا البيت ونسينا الموضوع ... وقبل ايام ... دق على جوالي رقم غريب " وانا ما ارد على ارقام غريبة بطلبه " دق اول مره مارديت ورجعت حطيت الجوال عند بنتي ورحت اشوف شغلي .. ودق مره ثانيه وبنتي ردت .. جيت باخذ الجوال شفت المكالمات ... وبعد ساعه اتصل زوجي معصب كيف تردين على ارقام غريبة.. طلع هو اللي دق من رقم الشركه لان جواله ماكان فيه بطاريه ... كنت ابغى احاول افهمه وقفل بوجهي ... ولما رجع وابي اقوله ان بنتي هي اللي ردت يقول خلاص قفلي عالسالفه مابي تبريرات .. واسكت اقول ماله داعي اسوي مشكله دامه بيتقفل ونرجع طبيعي ... المشاكل من هالنوع والله مابالغ لو اقولكم انه شبه يومي ... حتى اذا شاف اني اتابع مسلسل او فيلم واندمجت فيه ... تصير مشكله بس لمتى ؟ وموقف قبل امس فجر اللي بداخلي ومليت من ذا كله ... صح اني أخطأت لما بررت للرجال بس لاني طفشت كل مره نطلع يسوي فيها مشكله ... |
رد: تطاول زوجي وشتمه لي بسبب غيرته
حبيبتي الله يعينك
فعلا موضوع متعب ليتك ناقشتيه من البداية بدل ماتشيلي بقلبك وتكتمي لانه صار متعود.. ويشوف تصرفاته شي طبيعي احيانا سكوتنا على الامور الغلط تعطي الطرف الثاني احساس بالقبول وتشعره انك متكيفه مع تصرفاته وتعطيه ثقه اكبر يتمادى ويستمر لانه حس ان هذا دوره وواجبه وتقبلك هو يتوقع انه تأكيد لهالمعنى ويعطيه ثقه انو له حق يغضب عليك وانك ساكته لانك عارفه ومقره بغلطك والمشكله بعض ردات الفعل المتأخره تنفهم غلط من الطرف الثاني يقول: ايش غيرها! يمكن احد محرضها! يمكن ناويه تعمل شي! تتحداني! وخذي لك من هالتفسيرات الغريبه لانه يكون سلوك غير معتاد بالنسبه لك وهذا عيب رده الفعل المتأخره ببساطه: ليه توها تتكلم!!! اذا تناقشتي معه فضفضي عن موقف رمضان وغيره حتى يعرف ان القصه مضايقتك من زمااان وان سلوكه هذا يطعن بثقتكم واستقراركم ويسبب بينكم نكد ومشاكل بكل مشوار وان شاء الله يتفهم |
رد: تطاول زوجي وشتمه لي بسبب غيرته
بغض النظر عن الموقف الاخير
سلوك زوجك جدا سيء في ها الناحية لازم تحطين له حد و يوقف كلام جارح اهلك ماربوك ليه دخلتي المحل هذا بالذات مواعدة أحد هذا كلام غير مقبول تخيلي كان ردك انا ماخترت هذا المحل اختك اختارته يمكن اختك مواعدة أحد مو انا والله ينجن كيف تقولين كذا على اختي ؟ فعلشان كذا عيب يقول هالكلام إذا هو مايقبل هالكلام على أهله نصيحتي حلي المشكله هالمرة والمرات الجاية مالك دخل وش يقول أو وش يسوي مع الناس لو يكسر المحل خليه بيشتكون عليه ويعوض راعي المحل ويتأدب أو ينسجن لكن معاك راح يستمر بالغلط لأنه مافيه رادع ارجعي له وقولي له هالمرة ماراح انسى الموضوع كلمة جديدة تشك فيني والله مااعديها ومااسمح لأحد يشكك باخلاقياتي وتربيتي |
| الساعة الآن 09:44 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©