|
الاستمرار او الانفصال
السلام عليكم
كيفكم طيبين ان شاء الله باقي على الزواج 3 اسابيع واحتمال كبير اني اطلقها والله يستر عليها زوجتي معترضة ع حاجتين اولا شهر العسل وثانيا قصر الافراح وانا للامانة ما عندي القدرة بالنسبة لشهر العسل انا انسان ما احب السفر وكم مرة تجيني عروض من اصحابي محفول مكفول انت بس تعال ومع هذا ما اروح حتى وانا احوش للزواج ما ضربت حساب شهر العسل لانه امر مو مهم بالنسبة لي زوجتي الله يهديها يوم عرفت زعلت وقطعت التواصل معي حاولت افهمها يوم شفتها مطنشة وقلبت الدنيا ع شهر عسل طنشتها المهم تجاوزنا هذا الشيء بعدها جت مشكلة القصر راحت مع اهلها وما عجبهم القصر وكلموني وجا ابوها وقلي والله ما زوجت بنتي في القصر ذا حاولت افهمه ان هذا الي اقدر عليه وما نفع قبل يومين وصلت لهم اني ما راح استمر مع البنت والله يوفقها مع غيري يطلعها شهر عسل ويزوجها في احلى قصر تغيرو 180 درجة صلي ع النبي خلاص ما يخالف القصر يمشي الحال والبنت الي كانت قالبة الدنيا ورافضة تتواصل معي صارت تكلمني وانا احبك بس زعلت شويتين ومدري وش الي ابغى اوصله ان النفس طايت وما ابغى ارتبط في عقليات زي كذا هذه ما همها الا كلام الناس لا تبى الستر ولا شي حاليا جالس استخير اطلقها والله يعوضنا الاثنين |
رد: الاستمرار او الانفصال
اقتباس:
المهم أن تكون هي في قناعة، وحاول أن تتواصل معها وتوضح لها أسلوب حياتك في العيش، ولها الحق أن تقبل أو ترفض. |
رد: الاستمرار او الانفصال
وجهة نظري
إذا من دحين مو مرتاحين ، لا تكملوا .. هي و اهلها واضح تهمهم المظاهر و الماديات و انت تبغى وحدة همها بيتها و زوجها و استقرارها العائلي |
رد: الاستمرار او الانفصال
في أحد يكره السفر؟ إذا ماديتك تسمح ليه تحرم نفسك! ، محد قالك سافر شهر أقلّها أسبوع أما تقضي أول زواجك بين أهلكم وأصحابكم شي ممل ، والقصر وش أعتراضهم عليه؟
|
رد: الاستمرار او الانفصال
استخر لا تنسى الاستخاره
ثم اكتب ايجابياتها وسلبياتها وقرر ولا تغفل موقف اهلها وخاصه ابوها من اول مشكله وقف مع بنته وجاك بكل قواة عين يقول والله ما تتزوج بنتي في ذا القصر! ولا تغفل نقطة تغيرهم بمجرد اصرارك على رايك اذا بتستمر معها حط ببالك انهم ناس ما يجوا الا بالعين الحمرا يعني طيبه زايده ما ينفع لازم تكون وسط وحازم اقتباس:
مو معقول يجيب فوق طاقته واضح ان البنت واهلها كانوا بيستمروا في الطمع والطلبات لو انه عطاهم وجه لكن يوم شافوه رجال حازم وكلمته سيف عرفوا حدهم ووقفوا عنده وعلى فكره فيه ناس يكرهوا السفر وانا منهم مو شي غريب! |
رد: الاستمرار او الانفصال
1- هل لها ميزات اخرى
2- هل يوجد لديك خيارات افضل من هذه الفتاة 3- هل العرف ان السفر شبه إلزامي |
رد: الاستمرار او الانفصال
الا اذا كان السفر بالطياره فعادي احبه*
|
رد: الاستمرار او الانفصال
اقتباس:
|
رد: الاستمرار او الانفصال
عارف ايش المشكله اذا استمريتو انك بتمسك عليها هذي الحركه مو عاجبك يافلانه بطلق
ياخوي لو غيرها كانت قالت بما إنه هددني واحنا لسى ع البر مع السلامه ماعاد أبغاه وبعدين ماقالت مشني برى ولا طلقني عشان يكون عقابها الطلاق البنت تحبك لو ماتحبك ماكان غيرت رأيها بسرعه انظر للموضوع بإيجابيه الزواج مو لعبه وبكره المشاكل تكثر اكثر واكثر يعني لو طلقتها بتلاقي وحده كامله مكمله ؟؟؟ المشاكل وراك وراك الحمدلله تصرفت وانحلت مشكلتك وتعوذ من الشيطان أسعد ما عنده انه يفرق بين زوجين البنت ماعندها خبره في الزواج توقعت الهجوم بيفيد معك وميزتها انها تغاضت عشانك وياليت ماتاخذك العزه بالأثم وتكابر بالطلاق عشان سفر وقصر لو سويتها بتطلع لعاب والطلاق تستخدمه في غير محله |
رد: الاستمرار او الانفصال
حلو إنهم تنازلو وتأسفو معناها شارينك ، إستخير وتمم زواجك الله يوفقك ، ولو طلقتها وين بتروح مافيه أحد مايحب المظاهر في هالزمن ، لكن أنت فهمها ظروفك وإمكانياتك عشان ماتطالبك بشي فوق طاقتك ، وبالنسبه للسفر روحو لمكه يومين أو ثلاث أيام ماتكلف حلو السفر أول الزواج قبل الإنجاب والمسؤوليه 😢
|
رد: الاستمرار او الانفصال
يااخوي
ترى الدنيا تفاهم انت ماتحب السفر هي تحب ليه تلقي شخصيتها خير الامور اوسطها ماعندك ماديه ودها مكان قريب لو اربع ايام ودور ديره رخيصه وعش اجواء شهر العسل يمكن يجوز لك السفر انت منت شاري جاريه ولا سبيه تبغاها نفس ماتبغى بالضبط والقصر مااطلعنا عليه بس ذوقيا تاخذ رايهم وتشوف حل مرضي للطرفين يمكن القصر قديم او يفشل او او ماندري حنا لانا نسمع من طرف واحد غيره ماقصرو لما شافوا انك فعلا متضايق وانفصال قالوا مايسوى غيرهم قالوا طلق وخذو نص المهر الموضوع لايستحق الطلاق ويمكن الي يايدونك بالطلاق ماتدري يمكن مسفرين حريمهم بشهر العرس وقصر عرسهم معقول لاتخلي احد يشحنك على زوجتك واضح انها تحبك واذا ماتبغى المظاهر كان تزوجت بالبيت مو مساله مظاهر يمكن فعلا حابه تسافر وحابه قصر حلو |
رد: الاستمرار او الانفصال
السلام عليكم ورحمة الله وبركاته ..
مع رأي الكريمات متفائلة والوفاء ومبتعثة ، الطلاق لا يستحق على أمور تافهة الحياة القادمة لابد فيها من صبر وتنازل كي تسير الحياة والمهم تحافظا عالإحترام الذي بينكما .. وفقكما الله وتعوذ من الشيطان ،بنات الناس ليس لعبة وتطلق قرب الزواج ! |
رد: الاستمرار او الانفصال
الي اوله شرط آخره نور ، والحمدلله انك كنت واضح معاهم وكنت صارم وارضخوا لمطالبك ، انا اشوف انك تكمل الزواج اذا شفت انها مناسبه لك ....!
وخلك حازم معاهم انك ماتحب السفر ووضعك المادي بسيط تبون رجال او تبون ماكينة صرافه ووجاهه ...! |
رد: الاستمرار او الانفصال
وانت لاتكون برأيك متعجرف ويابس
شهر عسل تراه ومافيها شي لو طيبت خاطرها وسافرت القصر صح معك حق ..لكن السفر اذا ماسافرت بشهر العسل متى بتسافر ؟ انت ماتحب السفر خلك وسط بوجهة نظرك ..انت ماتحب السفر لكن توازن شويه خلها سفره بالعمر مره وبعدها لاتسافر ابد |
رد: الاستمرار او الانفصال
واضح انك متعنت جدا اوكيه ماتحب تسافر روح لو كم يوم اي مدينة جو المملكة مافيه مشكلة يعني عرسان وتبغو تقضوها جو البيت لاراحة ولاجية مرة صعبة ... لاتسمع للي قاعد يشحنك على البنت ترى طلباتها معقولة مو مبالغ فيها وبعض القصور فعلا تكون سيئة وماتستاهل ينحط فيها ريال واحيانا يكون فيه ارخص منه وأفضل .. يعني معليش لاتحسب انك اذا تركتها بتلقى شي واو وحدة كاملة مكملة وبس تقولك سمعا وطاعة البنات الآن تغيرو والواحد يكون فيه مرونة مو ياخذ البنت ويبغاها نسخة من أفكاره ماتخالفه بشيء الكلام اخذ وعطا مو على طول ماعجبك انت طالق ترى لو طلقت زي ماهي راح تتضرر انت نفس الشيء الآن الغالب اذا جاهم مطلق يترددون كثير فلاتحسب المسألة هينة .. الله ييسر لكم أمركم ويجمع بينكم في خير .
|
رد: الاستمرار او الانفصال
اقتباس:
كمان يا أخي هي مرة في العمر شهر العسل .. ليه ملغيه تماماً من حساباتك ؟ هل بسبب التكاليف تفوق طاقتك ؟ والله يصلح حالك |
رد: الاستمرار او الانفصال
الرجال يقول ماعندي فلوس يعني رجال على قد حاله ماهو متعنت الحريم هنَّ المتعنتات ....!
والله مشكله يقول لكم حالتي الماديه على قدي وتقولون سفرها لو مره .....! حيل الله اقوى ...! |
رد: الاستمرار او الانفصال
اخوي المتواضع
هو يقول بعد مااحب السفر وياما انعرضت علي سفرات مجانيه ورفضت يعني مو ماده بس ماعنده رغبه بالاطلاق والحين اختلف الوضع صار عنده زوجه وشخص ثاني عليه انه يراعي مشاعره و السفر الان الحمدلله في اماكن معقوله واسعارها زينه |
رد: الاستمرار او الانفصال
وضحت لابوها كل شي قبل الملكة ضحك وقال يا ولدي احنا ما علينا من هالخرابيط يقصد شهر العسل والقصر قال احنا نشتري رجال وطبعا ما كان عند كلمته للاسف
وضع شروطه ووضعت شروطي والمسلمين عند شروطهم الحمدلله اثثت الشقة كاملة وانهيت كل شي من دون ما اتدين ريال واحد يعني تبوني اتسلف عشان سفرية بعد الملكة تنازلت عن بعض شروطي وقلت ما يخالف بس هم يبوني اتنازل عن كل شي طيب ليه وافقو من البداية والله اني متفاهم معهم ومقدر ظروفهم وهم العكس تماما ما تركو لي مجال اتفاهم معاهم وقفلو كل الابواب في وجهي يقولو لمن تلبي مطالبنا تعال نتفاهم طيب انا وضحت لكم كل شي ووافقتو مفهوم شهر العسل عند زوجتي سفرية للخارج ولا انا كانت نيتي اسفرها داخل المملكة مو زي ما ذكرتو اكثر كلمة سمعتها منها ومن اهلها وش تبى الناس تقول علينا انا قبل ما اتقدم لهم ضربت حساب الكماليات وجمعت لتأثيث والقصر والعشا ولاني ما احب السفر للخارج قلت انه مو مهم ما كنت داري انه صار ركن من اركان الزواج البنت وضحت لها كل شي وما كانت ترد عليا بالاسابيع للاسف تبغى الواحد يقلها طيب ما تبغى تتفاهم او تتناقش شفت كل الاساليب ما نفعت معهم وحسيت اني ذليت نفسي معهم قلت خلاص مالها الا الانفصال والله يعوضنا ما بعتها او شايف بنات الناس لعبة التنازل لازم يكون من الطرفين وهي شايفة ظروفي ليه ما تنازلت خاصة انه شي كمالي مو مهم ربي بعدين يفرج علينا ويوسعها من عنده واعوضها قلتلها هالكلام وما عجبها بالنسبة للبنت عاجبتني وفيها ايجابيات وسلبيات زي ما انا فيا الايجابيات والسلبياتوالبيوت مليانة بنات يبون الستر ما فكرو في شهر عسل في ماليزيا ولا عرس خيالي وعلى فكرة القصر عجبهم بس قالو صغير ما يكفينا طيب هذا الي قادر عليه |
رد: الاستمرار او الانفصال
خلاص اخوي ارجعوا ووافقوا
وش مزعلك منهم الحين |
رد: الاستمرار او الانفصال
طيب رجعو لهالاسلوب بعد الزواج
اشوف الانفصال الحين افضل من اول موقف كانت هذه ردة فعلها وعلى شي ما يستاهل |
رد: الاستمرار او الانفصال
مرحباً أخي
سأقول رأيي والله أعلم لابد أخي أن تكون متفهم ولا تكون عنيد وتأخذ الأمور فقط من مفهومك أخي شهر العسل وحفل الزفاف حلم كل فتاة وهي تنتظره بفارغ الصبر .. كما أن العادة بين الناس جرت على هذا الأمر إلا أن يحصل بينهما تراضي وتفاهم فالمفترض أن تكون لين مع خطيبتك في مسألة شهر العسل وأن ترضيها ولو لفترة بسيطة مثل أسبوع ولو في نفس بلدك في مدينة أخرى أو بلد عربية قريبة .. فلابد تقّدر أن هذه فرحتها وستبقى هذه الأيام عالقة في ذهنها وسترى أنها عملت مايعمله كل بنت تزوجت جديداً وفرحت بزواجها .. وعدم ذهابها لشهر العسل سيشعرها بالنقص وأن هناك شئ من فرحتها لم تكتمل .. لذلك أنصحك أن لا تتشدد في هذا الأمر وتفّرح خطيبتك مرة أخرى وتفاجأها أما القاعة فلك حق وأنا معك .. فعلت مقدورك وأتيت بقاعة.. وهم سيكونوا بين أمرين .. إما أن يقبلوا أو يتشاورو معك في أن يدفعوا من جيوبهم إما مشاركة أو كاملاً لتغير القاعة للتي يريدونها أما تفكيرك بأن فعلتهم هذه من البداية ستخيفك منهم وأنه سوف يتجرءون عليك مستقبلاً ويطلبون طلبات أخرى .. فأعتقد أنه ليس بالشكل الذي تتوقعه بدليل أنهم تنازلوا عن طلباتهم لمصلحة بقاء بنتهم وربما لرغبتهم وشرائهم لك وعلى العموم يمكنك أن تكون واضح معهم وتخبرهم بطريقة مؤدبة وغير مباشرة أنك لا تحب من يرغمك على أشياء لا تحبها أو يستغلك بارك الله فيك |
رد: الاستمرار او الانفصال
* إنك تكون مرن وتقدر الأعراف شئ مهم انتبه له في حياتك عموما..
* كون زوجتك قطعت التواصل معك + قلبت الدنيا ( على حد قولك ) عشان شهر العسل ، فهي فعلت كل ما بوسعها لتصل لرغبتها ، ( وإن كنت لا أرى صحة موقفها ) لكن الكثير يفعل ذلك وبالأخص لو كانت صغيرة .. * كونكم ( تجاوزتم هذا الشئ) دليل على أنها تكيفت مع رغبتك ( ما في شهر عسل ) وهذا يحسب لك ولها . |
رد: الاستمرار او الانفصال
أنت عنيد وأتوقع ملول وتدور أسرع الحلول عشان تشتري راحة بالك bht
بقولك شي يارامي النضج العقلي عندكم يالرجال نادراااااا بتحصله في بنت بمعنى أنك حتى لو طلقتها ورحت خطبت وحده ثانيه تتوقع بتحصل بنت ماعندها متطلبات وأحلام وتبي اشياء كثيرة ! اشياء انت تشوفها انها كماليات وتفاهه ترى البنات يشوفونها أساسيات أنت صح وأنت مسؤول ورائع ممتاز انك تبدأ بدون ديون وممتاز يكون عندك أهداف بس الزواج لازم تصبر وتتنازل وتناقش وتعرف كيف تقنعها وتوصلون لحل وسط أنا أشوف تجلس معهم جلسة مصارحة رسمية اسمعي يابنت الناس انا شاري مو بايع لكن هالإسلوب انا ارفضه من الآن اقولكم كيت وكيت وكيت وكيت ان قبلوا فيك وفي شروطك ورحبوا اهلا ان رفضو بسلامتهم والله يوفقك ghgjgf |
رد: الاستمرار او الانفصال
اذا بندخل الزواج لاتدخل وانت شايل على البنت واهلها
خلاف وانتهى |
رد: الاستمرار او الانفصال
اقتباس:
يا اخي حس واستشعر ان الزواج ميثاق غليظ بعدين وش الانانية هذي انا وانا يا اخي الزواج شراكة مشكلتي معك مهب ان ما عندك امكانية مشكلتك الاناية لو قلت صح وحق لها و ودي اسعدها واسويه لها بس ما عندي امكانية كذا نوقف معك لكن تضرب باحلام وطموحات البنت ولا كانها همتك ولا راعيت احتياجاتها !!!!. موضوع القاعة الحق معك مية بالمية بس حط في بالك الزواج مهب تكسير رؤوس الزواج حب وعطاء وتفاهم . تمسكوا فيك لانهم يشوفون فيك رجال فيا تكون قد الموقف يا اتركها للي يسعدها . علما فرصك كشخص مطلق اقل بكثير جدا تلقى المواصفات اللي تبي وتتشرط. موفق |
رد: الاستمرار او الانفصال
مشكلتك مو هنا لان خلاص انحلت واقتنعت البنت
المشكلة اللي عندكم المال الواضح انها من بيئه مبذره وانت اقتصادي اذا كانت غير موظفه بتتعبون في متطلبات اخرى |
رد: الاستمرار او الانفصال
خلنا من شعر العسل و القصر
في انسانة دخلت حياتك وأصبحت شريكتك هذي الإنسانة لها رغبات واهتمامات وأحلام وتحب أشياء وما تحب غيرها نفسك بالضبط ! لما تأخذ القرار وكأنك وحدك بالمشهد أنانية منك . وقس على ذلك في كل القرارات بحياتك مستقبلاً والله يوفقك . |
رد: الاستمرار او الانفصال
لو اذا كنت بينت لها ولاهلها من البداية عدم مقدرتك المالية على السفر وهم وافقوا على ذلك فيحق لك أن تنزعج من تصرفهم ااما اذا كان الكلام كان بشكل عام ولم تتطرؤا لموضوع السفر وتفاصيل القصر فلربما املت البنت نفسها باشياء لم تكن تجزم انك غير قادر عليها فحينها من الافضل ان تتكلم معها وتناقشوا الامر بروية.
أخي الأمور لا تحل بهذه الطريقة ولكن بالتفاهم والنصح.(ولو كنت فظا غليظ القلب لانفضوا من حولك) |
رد: الاستمرار او الانفصال
جزاكم الله خير
مو انانية مني ابدا وعمر الزواج ما كان كذا بالعكس في تأثيث الشقة اخذتها معي واخذت رايها وخليتها تختار الاثاث وغيرها من الامور بس كنت اظن ان هذا الشي غير مهم وممكن يتأجل الى وقت اخر وكنت ابغى استر نفسي في اسرع وقت خوفا من الوقوع في الحرام ولا تلوموني ممكن ترجعو لمواضيعي السابقة وتشوفو البيئة الي خرجت منها كيف وكيف كانت ظروفي صعبة المهم ع كلام اخوي متفائل ما اظن انه عندي قدرة اسعد هالبنت والله يعوضها بالي يسعدها وما ابغى اظلم الناس معي بيوت كثيرة كانت ظروفهم مثل ظروفي وما همهم هذه الامور ياليتني خطبت منهم وهي في النهاية ما زالت بكر ومو ناقصها شي علم ومال وجمال وبيجيها الي يسعدها والله يوفقها والله مستغرب صرت اناني ونذل ومتعنت ومو مقدر مشاعرها عشان ما سفرتها اي ذكريات واي شعور بالنقص اذا ما سافرت بالله وش تنفعها هذه الذكريات اذا زوجها كان سيء خلق وكرهها في اليوم الي تزوجت فيه المهم جالس استخير والله يكتب الطيب وجزاكم الله خير وما تقصرون |
رد: الاستمرار او الانفصال
اسمح لي اخ رامي
الحين ملكه وخطبه وطول الفتره توك تعرف نوعيه البنت الي خطبت منه وتوك تعرف ماتقدر تسعدها والبنت تكلمك وتطلع معك وعلى اختلاف وبالنهايه طاعتك فيه قررت تطلقها بدون اهتمام لمشاعرها بصراحه هذه نذاله تعلن لهم لرفضك لما طلبوه وعندما وافقوك تقوم تطلق اذا سالك احد وش تقول ماتقدر تقول يتطلبون لانهم بالنهابه ارضخوا لكل طلباتك البيوت الي تقول تبغى الستر ونفس بيئتك هل انت ضامن بناتهم وتربيتهم او حتى رغباتهم ممكن وحده من بيت فقير لكن لها طلبات وش كثرها تبغى تعوض تقول البنت اخلاق وعلم و جمال ليه تترك وحده بهالمواصفات |
رد: الاستمرار او الانفصال
والله يا جماعه أنا أقول الله يعوض البنت باللي أحسن منه
كفايه الأخ تخلى عنها لما قرب الزواج .. والبنت كانت تطلع معاه وتروح وتجي وأهلها معطينه راحته وما منعوه هذا جزاتهم اللي وثقوا فيه .. وفي النهايه يجي يطلق عشان شغلات تافهه تنازلوا أهلها فيها بعد ما رفض الأخ وقال لهم ماعندي امكانيات .. أنا أقول يطلقها الحين بدل ما يحصل موقف تافه بعد الزواج ويطلقها الأخ طلاق يوجع طلاق تكون فيه البنت فقدت بكارتها ويمكن تحمل وتتورط بطفل يتشتت مع هذا الطلاق الله يعوض البنت بالزوج الصالح المتفهم واللي يفهم الحياة الزوجية .. الحياة الزوجية يبغالها صبر وحكمه والطلاق لا يقع الا في أسوأ الأمور .. لا يقع عشان سفر والا قصر والا خرابيط صبرنا على شي ماينصبر عليه وقاومنا لغاية ماوقع الطلاق .. لكن متى وقع ؟؟ وقع لما كان هناك سبب قوي يستدعي هذا الطلاق .. ومن وراه راح تكون الحياة الزوجية عذاب على الطرفين .. لا حول ولا قوة الا بالله ما أقول الا الله يصلح شباب المسلمين .. |
رد: الاستمرار او الانفصال
صدقوني لو طلقها بعد ما رضخت لمطالبه ووافقت على كل شي وتنازلت عن السفر والقصر .. ومع ذلك طلقها
صدقوني صدقوني البنت راح تنتصر في الأخير أخ رامي .. انتبه من الظلم ترى ما مر علي شخص في حياتي وعمل معاي موقف ولو بسيط بس كان فيه ظلم لي الا وانتصرت عليه .. أحيان أقول يارب سامحت كل من زعلني وظلمني .. تدري ليش ؟؟ لأني ما أبغى أشوف ربي يعاقبه عقاب قوي وقتها قلبي بيحن عليه وأنا عارفه قلبي زين ترى الظلم مو زين وانا اختك .. الله لا يجعلني أظلم مخلوق في حياتي وتصيبني دعوته .. |
رد: الاستمرار او الانفصال
قبل يومين كنا أنا وولد أختي (عمره 23) طالعين مشوار ..
قلت له بخطب لك ياخي (متعودين نتعامل مع بعض مثل الأخوان) المهم قلت له بخطب لك بس اختار المواصفات اللي تبغاها (أقصد العمر .. التدين .. الثقافة .. التعليم .. الجمال) قال لي والله شوفي أنا عندي قناعه إن غالبية البنات يبغون الستر والزوج المتدين اللي يخاف الله فيها .. قلت ممتاز بارك الله فيك لكن على العكس الخوف على البنات من شباب هالزمن .. قلت وضح أكثر .. قال باختصار عندك مثلاً بنت خطبتها وكانت دلعه ومتطلباتها كثيرة وفيها صفات يكرهها زوج المستقبل .. أنا عندي قناعه انه بعد الزواج راح تتعدل لأنها خلاص تزوجت وبتتكيف مع الحياة الجديده وبتخاف من شي اسمه طلاق الطلاق للبنت مو سهل .. على العكس البنت لو اخذت شاب فيه مواصفات كريهه وانسان لا يطاق .. البنت ضعيفه ولا بتقدر تغير فيه شي بعد الزواج هو راح يجيب لها المرض بتصرفاته لغاية مايحصل الطلاق .. ويمكن يحصل الطلاق منه هو مو منها .. باختصار .. البنت يقدر الرجل يشكلها بعد الزواج وفق لظروفه هو .. ويعدلها زي مايبغى لكن البنت صعب تعدل في الرجل شي والله يعين جميع البنات اللي يطيحون في ازواج مايخافون الله .. والله هذي نظرة شاب عمره 23 سنه الله يوفقه ويرزقه ببنت الحلال اللي تناسبه وتناسب تفكيره ودينه .. |
رد: الاستمرار او الانفصال
انا ما سافرت شهر عسل و بالموت وداني مكة عمرة
بس قدرت رغم انه قادر تكيفت معه على اللي يريحه و انا عند اهلي اروح كل مكان * داخل المملكة* الا ان هالشي ما اهتميت له و قلت فيه شي اهم الاخلاق و التعامل و الحياة ف المنزل بس ف النهاية تندمت اني تنازلت عن اشياء حبيتها لاجل شخص ماقدر قيمتي ماقدر اني رضيت بزواج بسيط في قاعة بسيطة ماقدر اني رضيت بالقليل علشانه و عشان ظروفه و هذا انا في ثاني يوم من انفصالي لا املك معي الا الحسرة على اللحظات اللي عشتها معه كانت اقل من عادية و لا فيها حلاوة بس كانت حلوة لان تفكيري كان اكبر من مجرد سفرة او مجرد طلعة لمكان فلاني ضيعت اشياء كثيرة على نفسي و انا اقدر اللي ما قدر شي حق البنت تعيش بما يقبله العقل و ترضاه هي اقسم بالله حقها |
رد: الاستمرار او الانفصال
اقتباس:
معك في كل حرف jk |
رد: الاستمرار او الانفصال
اختي زوتا دام الشي تافه ليه ما تتنازل هي
قالو تنازلنا خلاص والى الان مو راضين يتواصلو معي لنا اسبوعين كيف نتزوج على الحالة هذه عمري ما ظلمت احد والله شاهد على ما اقول غلط تحكمي وانتي ما عشتي حكايتي امور كثيرة تنازلت عنها ما اقدر اذكرها رغم اني شرطتها في العقد وقلت ما يخالف وكنت متفاهم معهم الله يهديكي جاية منفعلة بعد طلاقكك ومطلعة حرتكي فيا والله مايصير مو كل الرجال مثل طليقك الله يعوضكي خير وينصركي |
رد: الاستمرار او الانفصال
اقتباس:
حبيبتي لا تتأسفي ولا تتحسري على ما فات مأجوره بإذن الله أنا مثلك تزوجت ولا سافرت شهر عسل .. ولا سافرت حتى مكه .. ومابيني وبين مكه الا 100 كيلو بس وش رايك بالله ؟؟ إلتمست له أعذار وقلت المسكين مامعاه سيارة تتحمل سفر وروحات لمشاوير بسيطه قلت له في شهر العسل حبيبي فلوسي وفلوسك واحد واقنعته وشريت له سيارة آخر موديل أصلاً ماحلم في حياته يركب مثل ذيك السيارة الفخمه .. وهل سفرني بعد ما شريت السيارة ؟؟؟ هههههههههههه لا والله .. لا ذقت لا سفر ولا غيره ومع ذلك صبرت وتحملت .. كنت اسافر مع أهلي عشان دراستي ولما رحت بعثه حضرته جلس معاي شوي بعدين رجع وتركني .. كان ما يملك الريال !! هل تكبرت عليه ؟؟ لا والله ويشهد الله ماعمري حسسته .. صحيح طالعه من بيت حلو ومن اسرة كانت توفر لي كل شي .. بس احنا عندنا الزواج يعني الستر والمظاهر ذي مالها لزمه يعني لو تقدم لك شاب ومدحوا دينه وصلاته خلاص تتزوج البنت .. ووش يعني هي غنيه وهو فقير .. هالكلام ذا مو عندنا .. المهم ياستي رغم هذا كله ماقدر ولا احترم التنازلات ذي كلها خيانه .. ترك صلاة .. تهاون في صيام .. وفوق كذا صبرت وأنا عارفه اني مابخلف منه الله يشفيه ويرزقه .. هذا اللي اقدر اقوله .. والله مافكرت بالعقم مو ذنبه ربي خلقه كذا ويشهد الله ما حسسته وصبرت وصرفت أموال كثيرة عشان يتعالج .. في النهايه جازاني بالخيانات والاهمال .. سيبك من الخيانات والاهمال .. أتعبني بتركه للصلاة .. وقتها الطلاق ماصار مني .. صبرت وتحملت واخترت اني أبعد عشان أركز في دراستي وأحاول أخلص بعثتي ولا اخسر حاجتين وهو راح للقاضي وطلق .. قال له القاضي ووش السبب ؟؟ قال أنا ما استاهلها .. بنت الناس ماقصرت معاي .. طيب ياخي ماقصرت معاك .. مافيه أمل تعدل من نفسك وتصلح الخراب اللي ماشي فيه .. في النهايه شوفيني عايشه والحمدلله من تقدم لتقدم وهذا من فضل ربي علي .. وهو حتى سيارة مايملكها .. يمشي على رجوله .. ياكل من عند الناس .. عايش مثل اليتيم لا حول ولا قوة الا بالله .. من جد احيان تستغربي من بعض القصص والمواقف .. |
رد: الاستمرار او الانفصال
أخ رامي ..
أنا مستغربه فقط من اللي صار لي إقرأ ردي فوق 👆👆 وحكم عقلك .. ترى البنت تتغير بعد الزواج وفقاً لظروف زوجها .. وقصتي مثال على المخاوف اللي تدور براسك بعد الزواج .. |
رد: الاستمرار او الانفصال
الله يكتب الطيب
قبل شوي تواصلت معها وكالعادة قرات المحادثة وما ردت كلمت ابوها وبالقوة رد وقال العصر تجيني ونتفاهم ما اقدر ارد حاليا بعد ما اقابله وانتو طيبين ارجعلكم تصبحون على خير |
| الساعة الآن 01:15 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©