|
كيف اعلق زوجي فيني !! :(
السلام عليكم ..
كل مشكله صعبه تواجهني كنتوا العون لي بعد الله و اطبق نصايحكم و نتصالح والخ ولله الحمد .. هالمره مافي مشاكل الحمدلله بس مرات احس برود بعلاقتنا .. كثير خايفه انه يتزوج علي او يشوف غيري .. طبعا ادري الشرع حلل له بس انا طبيعتي غيوره وما اتحمل .. يعني ابي املي عينه و ابي نصايحكم تكفون ابيه يتعلق فيني .. طبعا زوجي مثل اغلب الرجال اللي مايقول كلمة احبك الا نادر وغالبا انا اللي اقولها له ويردها وانا احبك ومرات مايرد .. واذا قلت له انت ماتحبني يقول الحب مو كلام اقدر اغرقك بالكلام انتي فكري وشوفي احبك ولا لا .. لما افكر القاه مو مقصر معي ويهتم و مايرفض لي طلب - مع ان ما اطلب الا شي مهم - انا ابيه يتعلق فيني و ابيه يطلعني مشاوير بدون ما اطلبه وابيه يشتاق لي ومايقدر يبعد عني .. طبعا انا مهتمه فيه وبنفسي وببنتي وبيتي بس توني اول سنه زواج وماعرف اتصرف كل شي جا ورى بعض زواج وحمل ولاده نفاس وهالحين الشهر هذا رجعت لطبيعتي قبل الحمل بس لاحظت انه مايقرب لي كثير مثل اول يعني مثلا قبل كان يحضنني وانام واصحى وانا بحضنه .. الحين ننام كل واحد بطرف واذا حضني يحضن لما يغفى بعدها يقلب ع الجهه الثانيه و كذا .. الجماع قبل كان ب استمرار والحين يمر 4 ايام ومرات اسبوع بدون شي .. ماني عارفه كيف اجدد علاقتنا .. ادري بتفكرون ممكن الولاده خربتني والخ .. بس لا الحمدلله واذا تفكرون ان اهمل نفسي لا اهتم بنظافتي ومظهري لكن المظهر صراحه مو 24 ساعه لان اتعب بالبيت ومع البنت بس النظافه دايم .. يمكن فيه شي انا اجهله او شي قصرت فيه بدون ما انتبه .. يعني سؤالي للرجال .. كيف تحب تكون زوجتك بكل الامور سواء بالطبع او بالكشخه او ب امور الفراش يعني اللي تستحي ولا الجريئه و اللي تطلب ولا اللي تنتظر يجي منك .. وسؤالي للبنات .. اذا كنتي متزوجه و زوجك متعلق فيك كيف تتصرفين كيف مليتي عينه وخليتيه يشتاق لك ومايحب يبعد عنك .. ادري ممكن تشوفون موضوعي تافه بس والله انه مهم عندي واتمنى تساعدوووني |
رد: كيف اعلق زوجي فيني !! :(
مرحباً أختي
واحد من أصحابنا يقول : لما كنت عازب وكنت أنزل السوق أو بالشارع أو أي مكان وأشوف رجال ومعاه إمرأة .. أقول في نفسي هذا أشفيه مضيع وقت وماشي بالسوق أو يتمشى بالحديقة أو البحر .. روح البيت الله يهديك وتمتع بأهلك وعيش أحلى جو يقول بعد ما تزوجت وطاح إللي براسي صرت أمشي مثل الناس بالسوق وبالشارع وبالحديقة والبحر خلاص الواحد يبي التجديد الحياة ماهي حب ورومانسية وعلاقة أختي لا تشغلي نفسك بالزوجة الثانية .. فقدر الله إذا وقع فلن تستطيعي تغيره .. كل ماعليك أن تدعي الله أن يحببك لزوجك ويوفق بينكم ويسعدكم ويكتب لكِ في علمه وقدره أن تكوني زوجته الوحيدة أما بالنسبة لتغير زوجك عليك كما تريه .. فهو تقريباً شئ طبيعي إذا كان كما وصفتيه في ردك .. فنفسية كل إنسان بعض الأحيان تكون متغيره ومتقلبه فيوم يقبل على الشئ ويوم يبتعد ولا مانع أن تبادري زوجك بالحضن أو العلاقة أو كلمات الحب .. وحتى لو صدك أو أنشغل عنك فهذا لا يعني أنه غير راغب على طول .. بل ربما ذيك المرة نفسيته غير متقبلة .. وكذلك لا تبالغي أنتِ مع نفسك وتبتعدي عنه بحجة أنه جرحك وصدك . بارك الله فيك |
رد: كيف اعلق زوجي فيني !! :(
اقتباس:
|
رد: كيف اعلق زوجي فيني !! :(
اخواني .. اخواتي
اتمنى تحسون فيني وتساعدوني بشي ينفعني واساسا كنت متردده قبل كتابة الموضوع .. لاتخلوني اندم ان فضفضت لكم وطلبت مساعدتكم بهالشي .. افهموووني مافيها شي اذا ابي احافظ على زوجي و بيتي لان لو تزوج راح اتطلق وانا احبه بس ما ارضى وحده تشاركني فيه |
رد: كيف اعلق زوجي فيني !! :(
ممكن اسلوبك في الزعل جعله يطنش ويبعد الرجل يحب المرأه الودود الهينه حتى لو أخطأ عليها لا تقسو عليه وتعامله بحنيه اذا أقبل عليها
|
رد: كيف اعلق زوجي فيني !! :(
كوني متفهمه لنفسيته وتقلباته...التغيير اللي حاصل في حياتك طبيعي وتحتاجي انتي وهو وقت حتى تتأقلمو وبالتفهم كلشي حلو بس أتركي عنك الملاحقه وقت جى رحبي به وأغدقي عليه وقت ابتعد إنشغلي عنه...هذي اهم نصيحه من خبرة15سنه
|
رد: كيف اعلق زوجي فيني !! :(
موضوع الزعل بهالطريقة بصراحة منفر...
اسبوع كامل عشان شيء مثل هذا ! إذا اليوم يراضيج .. باچر راح يقول خلها مع نفسها حلوة الزوجة الهينة اللينة المرنة لو كنت مكانج ممكن ازعل بو 5 دقايق بس مو إلا العلاقة الخاصة اروقه بها .. اغير الجو بالضحك والفرفشة والوناسة شوفي راح اقول لچ رأيي أي رجل أو أي امرأة يحب يقعد أو ينجذب مع الشخص اللطيف اللي إبتسامته طبع فيه والكلمة الحلوة قبل كل شيء.. واللي نفسيتها عالية .. ما يشوف فيها حقد أو حب انتقام لأحد المزوحة اللي جوها وناسة وتتدلع بدون تصنع .. وانما فطرتها تحركها كأي امرأة اللي مو كل شيء تزعل عليه واللي اذا زعلت ما يطول زعلها على اشياء ما تستحق و حلوة كل هالاشياء تكون طبيعية وتلقائية بدون تصنع لكن الحب يا صديقتي ينمو بهالأمور ولكن لا يُخلق .. اذا الحب موجود هالاشياء تنميه بس ما فيه حب ينخلق كوني بخير |
رد: كيف اعلق زوجي فيني !! :(
ريتاج خففي تعلق بزوجك ولا تستخدمي عدسه مكبره في حياتك
التعلق الزايد يخليك تتوهمي اشياء ماهي موجوده زي خوفك من التعدد خوفك يكون عافك خوفك انه حبه لك تغير وهذي كلها ماهي موجوده بس اذا بتكبريها في عقلك بتطلع لك صدقيني بالله في رجل يقول لزوجته يالله ياقلبي اليوم بطلعك السوق بعده بوديك ع البحر بعده بوديك فندق نغير جو الرجل مو مستخدم معاك العدسه الي انتي قاعده تستخدميها لذلك هو مايفكر كيف يسعدك زي ماتبغي انتي يستخدم لغته واللغه هذي التماشي والطلعات بعيده عنها:) هو يحبك وضامن حبك له فليه يقعد يفكر وين اودي زوجتي الاسبوع وين اوديها لاسبوع الي بعده صح ولالا انا لما اعرف انه زوجي عنده موعد نهاية الاسبوع مع اصحابه انسق رحله مع صديقاتي واروح من البيت قبله واصبح يغار ويكنسل موعده ويطلع معانا:( استخدمي الحيل اذا ماتحبي تطلبيه |
رد: كيف اعلق زوجي فيني !! :(
اختي الرجال سهل تكسبينه وتخلينه مايقدر يستغنى عنك
شوفي اختي الرجال يحب يكون هو مركز الاهتمام بحياة زوجته الرجال مهما بلغ عمره يبي الحنان واللي قال ان الرجل طفل كبير صادق يبي اللي يحس فيه ويشاركه همومه ومشاكله ويخفف عنه يبي اللي تقدر تعبه وماتنظر له على انه صراف آلي مهمته الدفع وبس يبي اللي تحسسه ان رأيه مهم عندها يبي اللي تشبع عاطفته وحتى لو بحاجات بسيطه ممكن مالها قيمه عند الزوجه ولكن لها تأثير قوي على الرجل يعني مثلا تتذكرينه بهديه بيوم ميلاده او بيوم زواجكم تخلينه ينام على رجلك وتلعبين بشعره هالحركه انا كـ رجل احسها قمة الحنان وغيرها من الحاجات البسيطه ولكن لها تأثير حلو على الرجل اما عن الفراش اختي لاتخلين الموضوع يتم على انه واجب المفروض ياديه وبس الرجل يحب اللي تلوعه يعني لا تطلبين منه بشكل مباشر اللبسي واكشخي بيني له انوثتك تدلعي واذا بادر هو انتي وقتها خلك جريئه وسوي كل شي يخطر على بالك وحاولي تغيرين من الوضعيات فاجئيه كل مره بشي جديد لاتخلين الملل يدخل بحياتكم وفيه مواقع اختي تثقف بهذي المواضيع |
رد: كيف اعلق زوجي فيني !! :(
حبيبتى الخوف اللى عندك خوف مرضى و غير طبيعى نعم نحن نساء و لا نريد أن يتزوج أزواجنا غيرنا لكن التعلق بمثل هذه الطريقة يجعله يبتعد عنك أكثر لا تشيلى هم البلاء قبل وقوعه و تعيشى نفسك بدوامات لها بداية و ليست لها نهاية أسألى نفسك من يملك قلب زوجك؟ الله سبحانه و تعالى هو من يملك القلوب إذا أطلبي من الله سبحانه و تعالى بصدق ألا يحول قلب زوجك عنك إلى غيرك.... و تقربى إلى الله ملك القلوب أضعاف أضعاف ما تتقربين به إلى زوجك. ثم بعد ذلك خذى بالأسباب الحفاظ على النظافة و التجمل قدر استطاعتك ... و لا تلتصقى بزوجك ليل و نهار و لا تكثرى من سؤاله تحبنى و لا لأ ... و لا تدخليه فى تحقيق ليش ما تفعل و ليه... و ليه ...و ليه ..؟ بارك الله فيك أختى و وفقك و قدر لك كل خير. |
رد: كيف اعلق زوجي فيني !! :(
مشكورين ماقصرتوا .. بالنسبه لطريقة زعلي اووول مره استخدمها معاه والله وبالغصب قدرت امنع نفسي وكان ودي انطلق عليه بأي لحظه بس ماقدرت لان من ولدت وهو يسوي هالحركه فيني و اسامحه وكأن شي ماصار .. ولما اقوله انا اروقك ماكنت اقصد بالعلاقه فقط .. وانا دايم مزوحه و دايم اضحك و ابتسامتي ماتفارقني بكل وقت .. وحنونه عليه وكل اللي قلتوه اسويه من اول ماتزوجنا يعني ادلعه اهتم فيه ومثل ماقال اخوي العب بشعره واذا تعبان مايهدا لي بال اهتم حيل و ما انسى علاجه واذا يبي يروح للدوام اجهز له كل اغراضه واذا جا يلقى الغدا جاهز وما اطلبه مشاوير الا بالشهر مره .. معناه حسب ردودكم اني ماني مقصره معاه الحمدلله .. وانا الحمدلله ماني متعلقه فيه بشكل مرضي مثل ماذكرت الاخت يعني عادي اذا لاسمح الله صار طلاق اتزوج غيره ماراح احبس نفسي مع ان راح ازعل كثيررر بس الايام تساعد على النسيان .. انا بس لان احبببه مابي اخسره ومافيها شي اذا خفت اني مقصره مع زوجي و اني ابي املي عينه هذا مو مرض بالعكس هذا سنع وبحافظ على بيتي عشان ماينهدم على راسي.. وانا اخاف لان اخوانه كلهم معددين على 2 و 3 وهو لما سئلته اول زواجنا ان غريبه اخوانك كلهم معددين قال كل واحد له اسبابه و شرحهم لي.. تركتوووا الاسئله اللي وجهتها و ركزتوا على موضوع التعدد و خوفي !! افهموا موضوعي والطلب اللي ابيه منكم .. يعني يمكن الاخ الوحيد هو الوحيد اللي فهم علي وجاوب بشغلات بسيطه يحبها الرجل واستفدت من تعليقه كثير
|
رد: كيف اعلق زوجي فيني !! :(
طيب هو ايش رايه في التعدد ؟
وقد لمح عليه ؟ شوفي حبيبتي ،، الرجال اذا يبي يعدد ماراح ينتظرك تقصرين بالعكس انا ماشفت عدد الا اللي زوجته تحابيه وتداريه وتستميت عليه عيشي حياتك عادي طبيعي لنفسك مو له ولاتخافين من الأذى قبل وقوعه ! |
رد: كيف اعلق زوجي فيني !! :(
اقتباس:
|
رد: كيف اعلق زوجي فيني !! :(
اختي الكريمة ما في شي يضل على حالو
كل شي يصل إلى الذروة ثم يبدأ بالنزول بمعنى ايام الملكة الخطيبان يكونان طايرين في بعض ويزيد هذا الشى مع ايام العرس الأولى والشهور الأولى ثم يبدأ يخف وهذا عادي حبيبتي اسألي اي متزوجين الان تعودتعما على بعض وهل اختي انت يعني لم يتغير فيك شي هل مازلت لما يجلس قدامك يحمر وجهك وتتزايد دقات قلبك هل تحصين على مظهرك كاول الملكة والزواج هذا لا يعني أنه لا يحبك اكملي ما انت عليه في حسن التبعل فهذا يجعله لا يستغني عنك ولو لم يعبر ويفقدك أن ابتعدتي والله يهنيك ويكمل سعادتك |
رد: كيف اعلق زوجي فيني !! :(
اقتباس:
|
رد: كيف اعلق زوجي فيني !! :(
الى متى راح تضلي تدلعي فيه ؟ لين يطفش ويمل ؟ الشي اذا زاد عن حده انقلب ضده ،، خلك وسط والدلع بحدود وبالقطارة بعد احسن ,, لان الانسان فية طبع شين ،، اذا لقى الشي عنده بكثرة استغنى عنه ،،
انا فاهمك انك تبي اشياء تسوينها تزيد حبه لك وتعلقه فيك ،، وانا اقولك الي تسوية كافي وزياده ماتحتاجين اضافات ،، نصيحه اخيرة ،، استمعي لنصائح الاعضاء ،، تكتب بماء الذهب ،، والله يوفقك |
رد: كيف اعلق زوجي فيني !! :(
حياكِ الله أختي ريتاج .. موضوعكِ ليس تافه أكيد .. ما يجعل الرجل يتعلق بزوجته ويحبها .. أن تكون له كما يريد .. كيف ؟ لا يستطيع تحديد هذا الكيف إلا أنتي !!.. نعم كيف يريدكِ زوجكِ أن تكوني ؟.. لكن تأكدي أنكِ ستتعبي . نعم أن تكونِ كما يريد 24 ساعه ليس بالأمر الهين .. لكِ متطلبات .. كما أن الحال لايدوم على حال واحدة .. مرة مبسوطة ومرة متضايقه .. لكن الأكيد أن هناك رجال يريدون من زوجاتهم أن تحبهم وتتعلق بهم دون أن يبين لها أنه مبسوط معها .. أما لماذا؟ .. حتى تظل تلاحقه وتسعى لرضاه دوماً وأبدا.. لايريدها أن تتوقف لنقطة نهايه .. لكن هذا بعض الرجال وليس الكل بطبيعة الحال . عليكِ أختي الكريمة أن تكوني طبيعية وزيادة قليلا .. تجددي في لبسكِ وتجملكِ له قدر استطاعتكِ .. وثقي أن الرجل لو كانت من أمامه ملكة جمال وقدر الله أن يتزوج بأخرى سيتزوج .. وفقكِ الله وأسعدكِ . |
رد: كيف اعلق زوجي فيني !! :(
اقتباس:
ولاعاد تسأليه اذا يحبك.... لان بعض الاشخاص ينفرون من هذي التصرفات. وانتي شفتي كيف بيجاوبك بتكرهي حالك بعدين.. خليك واثقة بنفسك وتدلعي بعيد عنه يعني خلي التزين والدلع جزء من حياتك،لنفسك، وليس مقصود للفت انتباهه.. |
رد: كيف اعلق زوجي فيني !! :(
اقتباس:
في كلام الأخ حكمة لكن بإختصار اذا حبك بيحب كل شي فيك بدون ماتتعبين واذا ماحبك بيعيش طول عمره ناقصه شيء الحب يخليه يدمح كل زلاتك |
رد: كيف اعلق زوجي فيني !! :(
مريت بفتره نفس تفكيرك
أفضل نصيحة أقولها لك وتطمن قلبك الرسول اللهم صل وسلم عليه يقول عن خديجه (إني رزقت حبها) الحب رزق فادعي ربك يرزق زوجك حبك ويرزقك حبه ويمتعكم بالمحبة الحلال والرسول صلى الله عليه وسلم يقول (لا يرد القضاء إلا الدعاء) بإمكانك تدعين إنه مايتزوج عليكوأن يجعل الله ذلك خيرة لكم حتى لو كان مكتوب انه يتزوج يرد الله هذا القضاء لكن ادعي بالخيرة دائما فربما تخافين من زواجه وتجيكم ظروف يكون زواجه خير الانسان نظرته قاصره لو سلم أمره لله وتوكل عليه سيكتب الله له أفضل مما يعتقد أنه الأفضل وفقك الله |
| الساعة الآن 03:51 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©