|
عصبية زوجي
السلام عليكم ورحمة الله وبركاته
كيفكم انشاءالله بخير اخواني واخواتي انا مرا مقهوره من اللي صار ومو عارفه اصنف ردة الفعل زوجي طيب وحنون لكنه عصبي انا حملت الناس تفرح هو فرح بعدين شال هم المسؤوليه وصار يخوفني منها واحس كسر فرحتي وزعلت وزعل مني ولما بديت اراجع المستشفى هو طفش من الانتظار وصار يعصب من الزحمه والانتظار ودخل ع الدكتوره معصب وقال ساعه ننتظر ومن هالكلام ودخلتني الدكتوره وقال ليه عصبي قلت هو عصبي ولان حملي ضعيف صار يومين تحاليل و اشاعه الرجال مل وقال خلاص روحي مع السواق ..اول حمل ولدك.. انا تضايقت مره مره احس جرحني هالموقف ومن يومها ماكلمته ولا كلمني ابد ولا ادري ليه زعله يطووول .. من اول صح يتحسف بس مايبادر لو ما ابادر انا بعيده عن اهلي ولا لقيت وظيفه تطلعني من الجو اللي انا فيه الله يهديه بس مدري ايش اسوي يمكن الموضوع سخيف بس انا بديت امل من حركاته الواحد له طاقه انا صوتي مو عالي ولا اهاوش اذا عصبت اطلع من الغرفه عشان محد يقول قلتي كلام منا ولا منا ادعو ربي يسخره لي |
رد: عصبية زوجي
هم كيذا الرجال كلهههم ما يطيقون المستشفيات والانتظار .. ويخافون من المسؤوليه لين شاف ولده بعدين يتغير كل شي
الله يعينك ويسخره لك ولايضيق صدرك انبسطي الله يتمم عليك بكره باذن الله تولدين بالسلامه وتجيك بنوته ولا ولد ان شاءالله سليم معافى يسليك ويبر فيكم ويصير هو يلعب معه و وتدورينه تلقينه هو وابوه يلعبون انتي بس مشى هالايام وباذن الله ربي بيسخره لك ويلين قلبه لك ويحببه فيك |
رد: عصبية زوجي
مو هذي مشكلتي
مشكلتي مابي يعتمد مشاويري مع السواق ابيه هو يوديني ويجيبني اخاف يشيل يده ويتكل علي انا اذا تهاوشنا احس اني وحيده ولا احب اشكي لاهلي لاني بعيده مابي يتضايقو ولو تعود على السواق فعلا احس اني وحيده بهالغربه انا اقدر اعتمد على نفسي بس مابي ينقطع حبل المسؤوليه وبكره عندي موعد مستعجل لاني حملي في خطر وماودي اروح مع سواق مو متعوده لحالي وهو ماتكلمنا امس حط لي فلوس بس |
رد: عصبية زوجي
حبيبتي ربي يتمم لك على خير
لاتعودي زوجك انو تركبين مع السواقين تعذري بعذر الخوف وانك ماتثقين باحد الى زوجك خلي لسانك حلو بس بطريقه ذكيه فترت الحمل بذات اول طفل البعض تطغى عليهم الفرحه وتنسيهم المسؤليه والبعض هم المسؤليه وكثرة التفكير بمستقبل الطفل يبين عليهم انهم مو فرحانين ممكن زوجك يتهرب من اي شيء يخص حملك عشان يتجنب هالحساس ابحثي عن نمط زوجك وابحثي عن نمطك وحاولي تقريبها لبعض اسعدك ربي واتمم عليك حملك |
رد: عصبية زوجي
اقتباس:
انا فكرت كذا بس مدري كيف اكلمه يجي ياخذني من دوامه بيعصب وانا نفسيتي ماتتحمل هالاسبوع كله شد من ضغط العمل الى هم المسؤوليه والدكتوره محرصه علي اجيها اسوي الاشاعه زوجي نمطه شرقي وانا نمطي والله اعلم جنوبيه غربيه انا اعرف لزوجي بس زعله يطول بطي الرضاء وله اسبوع زعلان واذا زعل يعاملك كانك مو موجوده ولانه تنرفز امس بالمستشفى خلاص بس هو من اول زواجنا وهو يبيني اعتمد على نفسي بس هالموضوع مابيه يتطور ان كل واحد يكون بحاله |
رد: عصبية زوجي
اقتباس:
انا كمان زوجي نمطه شرقي النمط هذى مره متعب للي ماتعرف تتعامل معاه انمط الشرقي مو تتصلي وتقولي تعال خذني ودني المستشفى كمثال لا قبلها بفتره اعطيه خبر انو عندك موعد وهو يرتب نفسه وصدقيني بيوديك انمط هذى لاتستعجليه ابدا ابدا بكذا تشتتيه وبعصب عليك |
رد: عصبية زوجي
اقتباس:
وانا مابيه يتعود اني اعتمد على احد ثاني غيره واصلا هالنمط مايحب ان الزوجه تهمشه صح الشرقي منظم جدا ومجدول وادري مواعيدي خربت جدوله صدمتني قبل تصدمه وكلها ورا بعض مافيه فكه وخاصه ان شغله ضغط حتى بالويكند يشتغل ويحبون شغلهم يبدونه على نفسهم بس حاله طارئه يعني هو الحين حطني عند الامر الواقع حط لي الفلوس وقالي روحي وبصراحه ماقد عمري ركبت مع سواق لحالي الا باص الجامعه بعد ماينزل البنات انا زوجي كان في بيئه منفتحه تختلف عن بيئتي بس ماتعجبني سالفة ان علاقة الزوج والزوجه مافيها شي مشترك والمسؤوليه كلها على الحرمه والرجل يشتغل طول النهار للفلوس وللامانه بالاول كان ودي اخذ راحتي اروح واجي بس بالعقل انا بفقد زوجي بعدين بصير فعلا وحيده الله لايوحدني اذا تهاوشنا معد لقيت احد اتكلم معه ومو عارفه بكره ايش اسوي اروح مع السواق ولا ايش اسوي والدكتور محرصتني لانها تخاف يكون حمل خارجي اعوذ بالله |
رد: عصبية زوجي
اقتباس:
طيب حاجه مره حلوه انك فاهمته ارحميه شوي دامك عارفه ان دوامه ضعط هو ماقصر اعطاك قيمة المستشفى دامه هو كذا مضغوط قولي له وصلني ولما اخلص ابلغك وتاخذني اهم شيء لاتركبي مع سواق مومحرم لك لان فيها خلوه |
رد: عصبية زوجي
معليش عالمداخله
قصدكم شمالي شرقي ؟ ولا جنوبي شرقي ؟ |
رد: عصبية زوجي
اقتباس:
بس هو الجنوبيه والشماليه متقاربات مره |
رد: عصبية زوجي
كل الأزواج اعصاب في اعصاب لكن قلوبهم طيبه وسرعان مايطخون ويعتذرون ، غالباً عصبيتهم اما ضغوط واما ردت فعل وبلحظات يهدأ وتاخذين منه الي تبين هذا هم الرجال ، مادام يمل وماهو صبور ويطفش من المستشفيات ومراجعاتها روحي مع السايق ووحده من خواتك تجسرك بالطريق ...!!! وين المشكله اسمع حس خفي يقول لاتعوديه خليه يتعود يوديك ويجيبك زوجك وين المشكله اذا وداك السايق ....!
ياكثر الحريم الي تأذي زوجها جيب لنا سايق نطرشه للجمعيه والسوق ويقضي حاجاتنا ويقضي لوازمنا ...! الشوراع متروسه سواويق يودي ويجيب بالحريم ...! تراك مكبره الموضوع |
رد: عصبية زوجي
اقتباس:
زوجي للاسف زعله يدوم ايام وايام انا في منطقه مااعرف احد فيها الا هو من بعد الله بعد ماكنت بين اهل وصديقات ودوام رحت لفراغ ماقدرت املاه اهو طيب ومايقصر بالرضاء غامرني بس لو اتضايق يسحب نفسه بس لو شافني زعلانه يعاقبني على زعلي انه يقعد فتره مايكلمني اقعد بالايام ماعندي احد اكلمه الا تلفون ولا احاول اشتكي لاخد وهو مايسالني هو يسحب نفسه اذا كنت زعلانه وانا ابي احد معي زعلي مايطول انا كثر ساعه لدرجه يقول كنك بزر ساعه زعل وبساعه ترضين من نفسك سالفتي انا بغربه وابي احسه معي من زعله حتى ماسالني شقالت لك الدكتوره والبيبي يمكن ينزل لما قلت له يحسبني اكذب عشان يصير بينا كلام مايصدق قلت روح معي بالاخير يقول هذا انا تبين ولا انا ما اقدر اتغير الله يهديه بس ويسخره لي السالفه ان زوجي مو متحمس للاطفال حتى مو هامه لو نزل عادي عنده وهذا ماثر فيني |
رد: عصبية زوجي
انتي فرحانه بالحمل ومنتظرة البيبي
خلاص الحمدلله هذي نعمة عظيمة استمتعي بكل تفاصيلها حتى تعب الحمل ذكرى بتتخلد برأسك طول العمر خليها أيام جميلة وخفيفة لنفسيتك انتي زوجك متضايق شايل هم مو فرحان.. مشكلته هو لا تقحمي نفسك بمشاعره اتركيه هو حر بردات فعله.. لا تحاولي التحكم فيها ومو شرط كل الناس يستقبلون خبر بنفس الكيفية كل انسان له ثقافته وترسباته وتفكيره وهو الحمدلله ما منعك تراجعي مستشفيات واعطاك قيمة المشوار ولا حرمك من حقوقك الطبيعية كحامل لكن انتي متحسسة زيادة عن اللزوم وما ألومك.. الحمل يلخبط النفسية ويزيد الحساسية في الحامل بشكل كبير نصيحة لك روحي مع السواق زي ماطلب واتركي الرجال بداومه ونفسيته بعدين يا قلبي روحة السواق مافيها قلق ولا عصبية ولا نكد ولا صراخ يعني فيها ميزات برضو واريح لك وله بدل الزعل على أمور تافهه ولا تقولي أخاف يتعود مو شرط حبيبتي بالعكس يمكن اذا شافك قايمه بامورك بدونه يخاف تهتز مكانته ويرجع يوديك بطيب نفس واذا تقدم حملك بتشوفيه هو نفسه يجيك ويسألك ايش قالت الدكتورة ومن هالكلام عادي ترى فيه ناس تأخذ وقت حتى تستوعب انا بحملي الأول كل مواعيدي اروحها مع امي ما ارتاح الا معها الله يحفظها وكنت اذا طلعت كلمته وقلت له ايش صار اما الحمل الثاني فكل مراجعاتي معه لاني صرت استصعب مشوار اهلي وصار هو يمسك بنتي وقت دخلتي للطبيب عادي الأمور سهالات خليك مرنه حبيبتي الله يقومك بالسلامة |
رد: عصبية زوجي
اهلا اختي
العصبية اغىب الرجال يعانون منها لكن تختلف درجاتها المهم انه ما يغلط عليك وما يمد ايده خليه لين يهدا من نفسه اما وحدتك تعرفي اختي على جاراتك وكوني صداقات وبالنسبة لمرافقته معك للدكتورة اغلب النساء تروح وحدها في الغرب صح ثقافتهم كبيرة في هذه الامور تجدين الرجل يتابع الجنين في كل مرحلة ويحظر الولادة بعد اما عندنا لم نصل لهذا ورجالنا صبرهم قليل في هذه الامور الا من رحم ربك انا خلال حملي اذهب لوحدي وافظل هذا لا احب من يقف على راسي ويقلقني حتى اولادي اخذهم انا للطبيب الا الطوارىء او الليل الشي يختلف لا تكبرينها اختي وافرحي بحملك وكوني هادءة كي لا يتاثر الي في بطنك |
| الساعة الآن 12:58 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©