|
التغيير ..لماذا نتزوج ، مهره
صباح الخير ..
عارفين موضوعي .. وكيف حياتي مع زوجي ..ابغى استفيد منكم اكثر في التغيير بنفسي ... وبمعاملتي مع زوجي .. كيف اكسب في اي نقاش ... كيف اسيطر على نفسي وقت مايحور المشكله عن مساره ... واشيا كثيره .. حابه حياتي تكون جديده ... لان حياتنا اشبه بأطفاال يتهاوشون وبعد دقائق يتصالحون 😔 ... يعني نتمشكل على اتفه الاشيا ... لو لقى كاسة بالارض .. طبعا بسبب بنتي تحطه ومالحق اشيله .. يسوي فيها سالفه صغيره .. واذا قلت له تو بنتي شربت ومالحقت اخذه منها او اقولها ترجعه ... يروح يدخل لي بمشاكل ثانيه قديمه ... ونزعل دقايق ونرضى ... بصراحه هالمشاكل صحيح انها عاديه وتحصل بأي بيت ... بس والله استنزفت الكثير من طاقتي ... وغيرها من المشاكل وقت مانطلع ووقت مايوديني عند اهلي ... فياليت تساعدوني اغير من حياتي ... وتعلموني كيف اتعامل مع شخصية زوجي .. ولكم الاجر والدعوات اخيرا ... اخي لماذا نتزوج ... في ردود كنت تكتبها لي ... صراحة مافهمت .. ممكن تبسطها لي هنا ؟ شاااكره لكم 🌹 |
رد: التغيير ..لماذا نتزوج ، مه
اخر مشكله كانت امس ... طلعنا انا وبنتي وولدي ... رحنا المجمع ... وولدي الصغير ضاع ..تمينا نص ساعه حتى لقيناه ... الحمد لله .. بس حط اللوم علي .. واني مانتبهت له .. والعجيب انه هو كان شايله 😂 ... وحطه عالارض ومانتبهت او كان انا شلته ... وانفلت من زوجي ... ولما ابي اقوله انت اللي كنت شايله ... يسكتني يقول هذا جزاي اني طلعتكم ... ويقعد يحور المشكله الين طلعنا من المشكله الاساسيه اللي هي ضياع ولدنا .. ودخلنا بمشكلة اهلي 😅 .. ويقعد يقول هذا لانه تدلع من اخوانك وامك صار مايسمع الكلام ومدري ايش ... الحين تصافينا ومافي مشكله ... وهذا هي حياتنا 😔 ساعه بساعه
|
رد: التغيير ..لماذا نتزوج ، مه
السلام عليكم ورحمة الله وبركاته
صباح الخير حياكي الله اختي موضوعك طويل وبه عوامل متداخلة كثيرة وفيه اشياء لازم تتغير قبل اشياء ثانية وهكذا طيب قبل مانبدأ 1-هل انتي مستعدة لدفع ثمن هذا التغيير في نفسك وبعدها التغيير في طريقة تعاملك مع زوجك وبعدها تغييره هو (ان امكن ذلك؟)؟ 2- ماهو الدافع خلف ذلك؟ انا عندي اجابات ولكن حابب نبدأ حبة حبة عشان نشوف كيف نرتب الافكار والموضوع اما بخصوص الاشياء اللي ذكرتها قبل كذا ومافهمتيها فياريت تذكريها هنا لو سمحتي |
رد: التغيير ..لماذا نتزوج ، مه
وعليكم السلام ورحمة الله وبركاته
الله يحييك اخي نعم مستعده مهما كان الثمن ... الدافع .. ابغى حياة مستقره ... من ناحية اهلي ومن ناحية زوجي ومن ناحية صغار .. ونبغى حياه جميله خاليه من هالتوافه اللي تعكر صفو حياتنا ان شاء الله سأرجع لموضوعي وانسخ وارجع لهنا 😅 شكرااا لك اخي |
رد: التغيير ..لماذا نتزوج ، مه
" زوجك يبيله احترافيه في التعامل "
انا حابب اركّز على جزئية واحدة من موضوعك لأني اشعر انها ذات اهمية كبرى الا وهي جزئية طريقة تفكيرك طريقة تفكيرك على عيننا وراسنا وانتي ماشاء الله سيّدة عاقلة وغنية 💰 الله يبارك لك طريقة تفكيرك لازم تفهمينها انتي قبلنا نحن - على اي اساس قائمة - ماهي مراجعك - ماهي خبرتك - على ماذا تقيسين - مدى هيمنة العاطفة عليها - هل بتعدلينها بين فترة وفترة وهكذا فعندك مثلاً لما قلتي انك مبسوطة مع اخوانك من اجل ان يتعوّد على الوضع على اي اساس حسبتي انه بتكرار الخطأ (من وجهة نظر زوجك) والمجاهرة به (اخبارك له) بأنه سيجعله يتقبل الوضع! هل قستيه على نفسك؟ اسأل من جد والله يعني هل انتي من النوع اذا فيه شي يزعلك من زوجك وهو مايشوف هذا الشي يزعل وقام بتكرار هذا الفعل وارسال الرسائل انه بيفعله الان، هل سيجعلك ذلك تتقبلين هذا الأمر وماتزعلين منه بعد ذلك؟ هذا واحد (اللي هو طريقة تفكيرك انتي ياسمورة) اثنين: ماهي طريقة تفكيره هو: - كذكر - كفلان من الجنسية الفلانية (المجتمع) - كفرد من القبيلة الفلانية (العادات) - كابن من الام والاب الفلانيين (نشأته وتكون العقد النفسية) - كقريب لي (عنده تصوّر مسبق عني (سواء صحيح او خاطئ)) - كرجل يبلغ من العمر العدد العلاني من السنوات - وضعه المادي والاجتماعي والصحي الان ثلاثة: كيف اوصل له المعلومة التي اراها (أ) وهو يراها (ج) ؟ اعتقد بفهمك للثلاثة النقاط السابقه سوف يتحسن وضعك بشكل كبير وجوهري بمشيئة الله تعالى 1- معرفة وفهم كيف افكر انا كسمورة 2- معرفة زوجي كيف يفكّر 3- معرفة كيف اوصل له المعلومة (مثل فكرة توحيد المقامات في جمع الكسور، فماينفع ابداً انك تجمعي 1/5 مع 1/9 وكأنها ارقام صحيحة عادية، لابد من تحويلها (واحد منهما او كلاهما) لصورة متكافئة) والله الموفق __________________ ممكن اتعلم الاحترافيه منكم ..؟ وباقي كم رد في موضوعي القديم سأرجع له واعود هنا |
رد: التغيير ..لماذا نتزوج ، مه
اقتباس:
قبل لااقول ماهو التصرّف المثالي للزوجة في هذه الحالة خلينا اوصف الوضع الذي امامنا نحن امام زوج ضعيف الشخصية مع الاخرين ويحاول يظهر العكس مع زوجته (او يعوض النقص الذي في داخله) وضاع الولد بسبب تقصير منه غير مقصود فما يقدر ابداً انه يظهر بمظهر الضعف امام زوجته، مابقي اللي هذي تصير وبعدها يصبح وجهه طايح في الارض امام زوجته، ويصير كل ماصار موقف في المستقبل تقول له : انتبه لاتضيع الولد مثل ماصار هذيك المرة (سواء بمزح او من جد)! فيقول لها : انا ماضيعته وانما اللي حصل كيت وكيت فتقول لها : انت اعترفت بنفسك وقلت انك قصرّت في مراقبته! فيقول لها: شفتي انك ماتنعطين وجه واني كنت مغفّل لما سمعت كلام المثقفين اللي قالوا صارح زوجتكوخلك واضح وشفاف معها! تقول له وهي ضاحكة : انا امزح معك حياتي وانت الخير والبركة ( والكلام اللي مامنه اي فايدة بالنسبة للزوج) لذا فالتصرّف الأمثل في هذه الحالة هو احتواء مشكلة هذا الزوج ( ضعف الشخصية) والستر عليه وذلك بأن تعيش دور الشخص الملام في ضياع الابن لفترة مؤقتة وكل من الزوجين (الزوج والزوجه عارفين بداخلهم من المقصر) وتنظر له بوجه خجول من انها قصرّت في ضياعه، وتقول له الحمد لله لقيناه وتبدأ في سرد الاعذار وكأنها تتكلم بلسانه (معليش السوق كبير - انشغلت عن الولد - ظنيته معاك - ماتوقعته يضيع وهكذا) وتعطيه مساحة بسيطة يلقّط فيها وجهه وتعتذر له (وكأنه هو اللي بيعتذر، يعني تقول له اللي مفترض هو يقوله لها) بعدها ان كرّر السالفة في المستقبل (تذكيرك بهذه الحادثة) وقتها تقولي له ( اعتمادا على حدة الموقف) : "ترى احنا دافنينه سوا" بمعنى انه انا وانت عارفين انك انت اللي ضيعته ولكن انا تواضعاً مني وحبا مني لك كملّت التمثيلية عشان احفظ ماء وجهك لكن الظاهر انك ماتنعطى وجه |
رد: التغيير ..لماذا نتزوج ، مه
عطيكي هي من الاخر؟
بس مااعتقد انك راح تستوعبيها لأنك عاطفيه واللعبة اكبر منك بكثير ولكن خليني اقول اللي عندي لعل وعسى الله يفتحها عليكي شوفي انتي الان بين اربعة نيران اقوى نار ( الان خافته لكن هي اللي لها الغلبة في الاخر ) 1- انتي - كينونتك - نفسك والنار اللي بعدها (اقل حدة) 2- زوجك ( له الاولوية شرعاً اكثر من والدتك نفسها فما بالك باخوانك!) والنار اللي بعدها ( اقل حدة ) 3- والدتك والنار اللي بعدها ( اقل حدة حقيقة ولكنها اقوى اعلاميا يعني صوت بس ) 4- اخوانك شوفي ياأختي ياسمورة انتي لستي مقبلة على حرب وانما دخلتي الحرب خلاص حرب اثبات الذات - كل واحد بيثبتها بطريقته وبيستخدم فيها كل اوراق الضغط والحيل والالاعيب عشان يوصل لمبتغاه ( طموح او اطماع ) اجلسي مع نفسك وابني لنفسك قاعدة نفسية متينة تتحمل الصدمات المقبلة اجعل اهم اولوياتك في الحياة هي 1- سمورة نفسها ثم سمورة نفسها ثم سمورة نفسها حددي اولوياتك في الحياة على اسس سليمة ومتينة بحيث تمشين فيها واثقة الخطى وماعليكي من لومة لائم في المستقبل الدنيا مافيها خير وصدقيني كلهم مافيهم خير لكي ( حتى لو والدتك نفسها ) اهم واحد في المعادلة الان هو زوجك ( مع انه ممكن يتخلى عنك في اي لحظة بواسطة الطلاق او الزواج عليكي ) واخر هم اخوانك ( لانك لستي من اولوياتهم وراح تشوفي بنفسك كيف راح ينكرونك او يدخلونك في معمعة المشاريع اللي مالها اول ولا اخر ) تحتاجي استشارة مع متخصص ( نفسي - محامي - شيخ ) عشان تبني قاعدة متينة ضد العاصفة الهوجاء اللي انتم الان تستقبلون اول بوادرها والله يعينك هذا رد من ردودك ... كانت تتكلم عن الورث ... لكن هل ينطبق برضو على الحياه العاديه؟ اتمنى تكون فهمت سؤالي [COLOR="rgb(0, 100, 0)"] كلام كبير وعين العقل بس للأسف مهي معاكي مره ولاهي مستوعبه المستقبل المظلم اللي مستنيها عاطفيه لابعد درجة باعوها بالاكراه وهي تقول لك ابي اشد ظهري فيهم! شدي يختي بس انتبهي على ظهرك لاينقطع منهم. اختي سمورة شيلي نفسك بنفسك واعملي بكلام اللي يقولوا لكي خذي حقك بالطول وبالعرض وبكره هم اللي راح يجرو وراكي هذا حقك شرعاً 100٪ اضغطي على قلبك وبقوة واكتميه معليش خليه ينزف كلها كم سنة ( من بعد ماتاخذي حقك) وراح تلاقيهم يحسبون لكي الف حساب لكن ادرسي وضعك مضبوط واعرفي انك ممكن تخسري حتى زوجك وتتزوجي غيره اهم شي في المعادلة هي سمورة والله راح تعرفي قيمة كلامي هذا خلال العشر السنين القادمة [/COLOR] استفدت منكم الكثير ... لكن ذكرت هنا انني عاطفيه ... هل تعتقد هااشي هو اللي اثر على حياتي ... هل ترى ان كرمي مع زوجي غلط ؟ مع اني اثق فيه ... بس كثر الكلام هنا خلاني اشك شوي ... انا من النوع اللي ماهتم بالفلوس كثر حرصي واهتمامي بالعيله والاهل والحياه السعيده [COLOR="rgb(0, 100, 0)"] كلمة للمستقبل : زي ماالفلوس عمت قلوب اخوانك وزوجك ( بشكل مؤقت وممكن يصبح بشكل مستديم ) ترى ممكن تعميكي انتي زي السلام عليكم فتنة المال مهي هينة ابداً مرت علي قصص زوجات جاتهم ورثة محترمة ( منهم وحدة خلعت زوجها لأنه رفض يدخل اولاده مدارس اهلية ( لعدم مقدرته الماليه) ورفض اجراء عمليات تجميلية لزوجته، خلعته وعملت اللي براسها) هذي فلووووووووس ياماما فلوس تعمي النفوس عارفة ايش يعني فلوس عصب الحياة مصدر قوة لايستهان به فإن حبيتي تلحقي نفسك فعليكي بالاعتدال خير الامور الوسط [/COLOR] 😁 هذا الللي كنت ابحث عنه ... مريت تقريبا سنه على استلام ورثي ... ما رأيك الان ؟ لان زوجي يقول من يوم ماصار معك فلوس تغيرتي ... مع إني أطيه ومابخل عليه ... بس احسه انه يحس بالنقص ... يعني مايقدر يصرف علينا مايقدر يعيشنا مثل العالم والناس .. اعترف لي بهالشي قبل فتره ... مرينا بمشكله كبيره شوي وجلس يفضفض لي .. المهم هالموضوع انتهى ... بس ابي اخليه يعزز الثقه بنفسه وما يحس بالنقص ... لان هالشي يكسرني ... |
رد: التغيير ..لماذا نتزوج ، مه
😒 ماضبطت الملون ... ان شاء الله مايختبص عليك .. والمعذره اخي
|
رد: التغيير ..لماذا نتزوج ، مه
اقتباس:
جزاك الله خير ... كلامك عين العقل ... بس كل شي بحدود ... يعني يقهرني بحاجات يلبسني تهم كلها غلط ... عشان اتركها ... الحين هو يبيني اترك القروب اللي مع اهلي ... لما ضاع الولد ... يقول كله منك مانتبهتي له .. مشغوله بالقروبات ... طيب جوالي في السياره ماخذته معي المجمع !! اقوله كذا يسكتني ويقول اهلك مخربينه ومدلعينه وهو صغير اصلا مايفهم ماكمل السنتين ... زمان لما يجي والغدا لسى ماجهز ... مايقول شي .. يقول عادي ماني مستعجل ... اما الحين اذا جا والغدا ماجهز ... يقول كله من الجوال والقروب ... إخوانك بيخربون حياتك ... اهلك بيسببون لك الطلاق .. امثله كثيره ..طفشني بحياتي فيها ... وانا ااحاول قد ما اقدر إني ماتناقش معه ... واعطيه كم كلمه حلوه ... بس مابيطيح اللي براسه الا اذا حذفت القروب وقطعن اخواني ... بضياع ولدي ... تاسفت له مع انه هو اللي غلطان ... عشان مابي اعكر مزاجنا ... شكراااا لك اخي ... اول نقطه استفدت منها ... وان شاء الله اطبقها في اي موقف يحصل |
رد: التغيير ..لماذا نتزوج ، مه
لي عودة يا سمورة. انتظريني حبيبتي. |
رد: التغيير ..لماذا نتزوج ، مه
اقتباس:
في انتظارك 💓 وخذي راحتك حبوبه 🌹🌹 شكرااا لك مقدما 😁 |
رد: التغيير ..لماذا نتزوج ، مه
بتكلم اكثر عن شخصية زوجي .. يمكن يتضح لكم شخصيته .. ويساعدكم بها
زوجي مايعرف كلمة" لا "للغير ... هذي الكلمة مسحوبه من قاموسه ... الا معي .. ولا بعد يكثر منها ... حتى بأبسط حق لي ... مثلا زوج خالته قبل فتره طلب منه مبلغ وقدره .. طبعا سلف .. دق صدره وقال حاضر ... وهو مامعه .. جا لعندي وقال لي كذا وكذا وكذا ... قلت له أسفه ماقددر ... لو لك ممكن ... زعل شوي ورضى ... واضطر انه يتسلف من احد ثاني .. عشان دقة الصدر . .. ومو اول مره يسويها .. داااايما حتى قبل مايكون معي الورث .. هذا طبعه ... عجزت اقوله .. مانت مضطر تعطيهم كلمه .. عادي قول لهم لا مامعي .. مافي داعي نأزم نفسنا عشان تبين لهم موقفك النبيل .. مايفهم يقول ماقدر اقولهم لا ... حتى اذا خرجنا نغير جو .. واذا جا اتصال له من اي أحد .. سوى اخوه او احد من اهله او اصحابه .. يقول له تعال اجلس بالورشه جنب سيارتي لان عندي مشوار .. او تعال نروح سوا الصناعيه .. او طفشان تعال نطلع سوا ... او اي شي.. يقطني بالبيت ويروح لهم ... دايما تصير اذا طلعنا .. وضغطي يرتفع مليوون .. يقهرني .. اقوله قولهم لل معي عايلتي ... يقول عيب ... اما انا اذا اقول له تعال ودني المكان الفلاني .. يجيني رد منه لاااا ... مره قلت له ليتك تعاملني مثل ماتعامل الغير ... ما تقول لي لا ابدا .. يظل ساكت .. او يقول مالك شغل فيني ... يحبني اكون مطيييعه وخاضعه لأوامره ... وهذي مو شخصيتي ... احيانا أمثل له ... بس احيانا أرجع لشخصيتي .. شي صعب ومتعب التمثيل .. وفي برضو مثال .. امه لما طلبت منا نسكن معهم .. طبعا هو اللي رافض ومو حابب نسكن مع بعض .. على حسب كلامه ان البيت فيه إخوانه وماحنرتاح ... طيب انت قولهم كذا ... يقول لاااا ماقدر ... ويروح يقولهم والله حاولت اقنع زوجتي ورافضه السكن معكم .. ولاوا تراني حابب اسكن معكم بس هي الله يهديها رافضه هالشي !! 😒 تسبب بمشاكل بيني وبين اهله ... وهو قاعد يتفرج .. بس الحمد لله زانت علاقتي فيهم .. وكسبتهم بمعاملتي لهم اشيا كثيره كثيره يقتلني فيها من القهر 😭 .. بس متحملته لأسباب كثيره 😔 |
رد: التغيير ..لماذا نتزوج ، مه
الان كل اللي اقتبستيه مش فاهمته؟
|
رد: التغيير ..لماذا نتزوج ، مه
تقريبا 😁 ... المعذره اخي مو ضروري تشرح كل شي ... يهمني استفيد منك ... كيف الاحترافيه في التعامل مع زوجي ... وكيف اغير من شخصيتي ... وكيف اخليه هو برضو يتغير
|
رد: التغيير ..لماذا نتزوج ، مه
شكل موضوعي صعب 😔 .. المهم جزاكم الله خير 🌹 ...بس حبيت اقول اني قررت اكلم عمي 😔 .. اليوم افتعل مشكله من لاشيء وخلاني احذف القروب .. نهاية الاسبوع بروح عندهم واخبره بكل شي 💔
|
رد: التغيير ..لماذا نتزوج ، مه
حل سحري وسريع ليس عندي
عشان كذا قلت لكي سابقاً تحتاجي الى مستشار تتفاهمي معه وجه لوجه لكن بما ان موضوع المستشار صعب عليكي فسوف اتعاون واحاول نتعاون في فهم ابعاد الموضوع وعلاجه ولكن احتاج الى ووووووقت |
رد: التغيير ..لماذا نتزوج ، مه
المستشار .. صعب مرره .. عشان كذا لجأت لكم ... واخر شي بلجأ لعمي واهلي .. شكراا لك اخي على تعاونك .. مابي اضغط عليكم ... وبحاول اطنش المشاكل الين ربي يفرجها ... وارضخ لاوامره عشان اريح راسي .. مابي وجع راس 💔
|
رد: التغيير ..لماذا نتزوج ، مه
اذا عندك استعداد نشتغل على نار هادئة
فأوكي على بركة الله نكمل هذا اسلوب حياة وشخصيات وقناعات تكونت خلال عشرين سنة فمو معقولة نحلّها بردين ثلاثة! |
رد: التغيير ..لماذا نتزوج ، مه
اوك .. مستعده ان شاء الله ... ومعكم للنهايه ... شاااكره لكم .. وماحنساكم من دعواتي .. متحمسسه كثير لحياة افضل 🌹
وماجيتكم الا وانا كلي ثقه فيكم ... وبخبرتكم ... |
رد: التغيير ..لماذا نتزوج ، مه
شو اللي صار عشان تحذفين القروب؟ |
رد: التغيير ..لماذا نتزوج ، مه
مهره 🌹 ... نااشب لي في كل صغيره وكبيره ... يسوي مشاكل من لا شيي ... ومشاكل تاافهه .. ويختمها بقولته كله من هالقروب .. احاول اتحاشاه .. وماهدا الا لما حذفت القروب ووريته قلت له كذا ارتحت ... وفي الليل يسولف عادي ولا كأنه صار شي .. وانا ساكته ومبين اني زعلانه .. بس هو مسوي نفسه مايدري اني زعلانه .. ولا عطى الموضوع أهميه ...
ذكرت كم موقف هنا في البدايه .. وامس الصباح كنت اتراسل مع أختي على الخاص مو على القروب .. طبعا اسوي رساله واخلي الجوال مفتوح على المحادثة ...واسوي كم شغله في البيت وارجع اخذ جوالي ... بعد كم دقيقه مو ساعه ! لما خرجت من المحادثه تبع اختي لقيت رساله منه .. من 10 دقايق .. ورديت ... قال ماشاء الله تو تردين !! قلت له توني أشوف رسالتك وبعدين انت تو مرسل الرساله .. يقول انا قاعد أشوفك متصله ولا تردين ... قلت له مانتبهت واسفه .. قال لي .. مانتبهتي ولا مشغوله مع اهلك ومطنشتني .. مارديت عليه ولا بررت .. بس قلت له الله يسامحك ... ومارجع يرد علي .. وثاني مشكله ... كل شوي يقول لي 24 ساعه متصله .. ارحمي الجوال ... من وقت مارجعتي القروب وانتي ماتهدين الجوال من ايدك ... قلت له .. شايف اني مقصره في البيت ؟ مقصره في حقك ؟ يقول وش دخل تقصيرك وجلوسك عالجوال 24 ساعه ... قلت له .. عجيب مانتبهت اني اجلس عالجوال وقت طويل الا لما رجعت لقروب اهلي .. قال لي الحمدلله والشكر ... انا الحين جبت طاري اهلك ؟ قلت له اوك قفل الموضوع .. والجوال ماحتشوفني مره ثانيه ماسكته او متصله ... واخر مشكله اللي خلتني احذف القروب .. كنت احفظ بنتي قران .. هذا كان الظهر بعد الغدا ... دايما أجلس معه بس امس كنت مو طايقه اجلس معاه من بعد ماقال لي إني طول الوقت على الجوال .. وادري لو جلست معه بيفتح الموضوع عشان كذا صرت اتحاشاه ... كنت جالسه مع بنتي بالصاله وهو بالغرفه ... جتني رساله على الواتس .. لسى فتحت الجوال .. وهو دخل الصاله .. انا نقزت قلت بسم الله عالاقل تكلم تنحنح قول شي ...قال لي ليه او عشان يمديك تسكرين الجوال .. ولا بعد تسوين نفسك تذاكرين للبنت وانتي قاعده على الجوال ... انفجرت .. قلت لع وش فيك مترصدلي بكل دقيقه .. والله ماهي عيشه .. انا لسى مسكت جوالي اشوف من مين الرساله .. تخيلي يامهره ان الرساله كانت منه هو ... يعني سواها مقصود عشان يجي ويشوفني ماسكه الجوال ويسوي مشكله ... لما شفت ان الرساله منه .. عرفت انه متعمد ... قلت له شوف وهذا القروب حذفته ... وهذا الجوال خذه ..، مابي شي بس ابي ارتاح واريح راااااسي ... تعبت من المشاكل وترصدك لي ... قال انا ماطلبت تحذفي القروب اصلا .. بس دامه جات منك خير وبركه ! اسلوبه استفزني .. ومن وقت الظهر الى الحين مروق ولا حتى يقول لي ليه ماسكه الجوال ... ولا بعد ينكر انه يبيني أحذف القروب ... الحين مطنشته .. وتعاملي معه رسمي ... وهو مسوي نفسه بريء مايدري اني زعلانه او على شنو زعلانه ... |
رد: التغيير ..لماذا نتزوج ، مه
غلطتي لما حذفتي القروب. احنا متفقين أن زوجج غلطان ومبالغ .. ونصحتج سابقاً لما يكلمج عن أهلج أو تواصلج معاهم لا تبررين .. وتتجنبين الرد تماماً .. أو تقولين كلمة وحدة: عيييييب. لكن مب إنج تطلعين من قروبهم أو تمتنعين عن التواصل معاهم. إنتي بنفسج قلتي أن مسايرتج تخليه يتمادى .... إذاً نستبعد هالحل ولا نتوقع مثلاً لما يشوفج سمعتي الكلام وما تتواصلين معاهم في القروب ولا تطلبين زيارتهم أنه بيي من نفسه يقول لج كلميهم أو زوريهم. فاهمة طبعاً أن ضغطه المستمر متعب .. لكنج مضطرة تتخملين شوي لين تتجاوزون هالمشكلة بطريقة ما تحسسج إنج مقيدة ومعزولة عن أهلج. الحين كيف الوضع؟ بعدج ماخذة منه موقف (أميل. لهذا) .. والا خلاص رجعتي تتعاملين معاه بشكل طبيعي؟ بخصوص الموقف الأخير اللي أرسل لج فيه الواتس .. سألتيه أو ناقشتيه؟ |
رد: التغيير ..لماذا نتزوج ، مه
حاولت يامهره اني مابرر .. بس اتعبني ... واذا قلت له عيب .. يقول طالعوا مين يعلمني العيب ؟! .. ويستنكر علي هالشي .. انا لحد الان زعلانه منه وماتكلم معه .. وهو يسولف ولا كأنو صاير شي .. ايه تناقشت معه في نفس الوقت .. قلت له انت أصلا مرسل لي عشان متقصد تسوي مشكله .. قال لي يتهيألك ... وحاول يغير الموضوع ... اقوله كذا ... يقول لي هاي صدفه ... ورجعت تعبت وحذفته وقلت له ارتاح وانا بعد اريح راسي من نكدك .. والحين هو مبسوط ... وانا ناويه ارجع للقروب بس المشاكل بترجع ...
اللي قاهرني اني ابين له اني زعلانه وامس ماتعشيت معه .. ولا قال لي تعالي مثل كل مره .. حتى اليوم وقت الغدا .. ولا كأنه يدري اني زعلانه .. مع انه يدري بس مسوي نفسه غبي .. |
رد: التغيير ..لماذا نتزوج ، مه
طبعاً يدري إنج زعلانة .. بس أكيد ما بيتكلم في الموضوع لأن ما عنده كلام منطقي يقوله. إذا بترجعين للقروب فلازم تكونين جازمة يا سمورة .. ولو شو ما صار ما تطلعين منه .. لأن السالفة مب لعبة شوي داخلة وشوي طالعة .. وزوجج ما بياخذ موقفج بجدية ما دمتي مع كل مشكلة تتركين قروب أهلج وتطلعين. |
رد: التغيير ..لماذا نتزوج ، مه
صحيح كلامك يامهره .. انا قررت خلاص برجع .. وكلمت أختي ترجعني ... قلت لها الجوال علق .. ومهما صار ماحطلع بصبر واشوف وش آخرته .. وبظل زعلانه كم يوم .. واخليه يدري اني رجعت للقروب ... الله يجزاك خير يامهره تعبتك معي ... شكرااا لك حبوبه 💓💓 ..
|
رد: التغيير ..لماذا نتزوج ، مه
في موقف ضياع الولد .. وغيره من مواقف مماثلة .. ربما لا يكون احتواء شخصيته الضعيفة هو الحل دوماً. نعم بالطبع يجب على الزوجة أن تحترم زوجها وأن تغذي فيه روح القوة والقيادة .. وربما لها أن تحتوي ضعف شخصيته وتستر عليه .. ولكن ليس على حساب ظلمها وإلباسها تهماً باطلة. عشان جذي أقترح أنج تطبقين حل أخوي لماذا نتزوج أحياناً .. وأحياناً أخرى لا تسايرينه ولا تخلينه يرمي عليج غلطته .. وفي نفس الوقت لا تتكلمين كثير ولا تدافعين عن نفسج ولا حتى تقولين له: يا حبيبي أنت اللي غلطان مب أنا .. لأنه ببساطة عارف أنه هو الغلطان ولأن كثرة الكلام تعطيه فرصة يحوّر كلامج وينط لمشاكل أو مواضيع فرعية .. لذلك اسكتي تماماً ولا تعلقين أبداً. وازني بين الحلين على حسب المواقف اللي تمرون فيها وشوفي متى الأصلح إنج تحتوين وتطبطبين وتعتذرين عن غلط إنتي ما سويتيه .. ومتى تسكتين وتكتفين بنظرة تترجم عبارة: لا ترمي أغلاطك عليّ. |
رد: التغيير ..لماذا نتزوج ، مه
هل من الممكن اختي ام سلطان انك تتكرمي علي
وتشرحي للاخت سميرة ردودي التي اقتبستها اعلاه؟ لأنه انتي ماشاء الله تملكين نفس الشفرة التي تملكها هي وبالتالي ستفهمك اكثر مني |
رد: التغيير ..لماذا نتزوج ، مه
اقتباس:
حاضر. أمهلني للغد بإذن الله. |
رد: التغيير ..لماذا نتزوج ، مه
اقتباس:
ان شاء الله حبوبه بمشي على نصايحكم .. الله يجزاكم خير 🌹 امس الليل درى اني رجعت للقروب .. سألني ليه .. قلت له انت قلت لي انك مامنعتني من القروب .. قال لي انتي تسمعين الكلام اللي يعجبك ... والكلام اللي مايعجبك ماتسمعينه .. يقول في أحد مسلطك ومقويك علي اكيد إخوانك ... وانا مارديت .. وجلس يبربر فوق راسي ومعصب وانو انا ماسمع الكلام ... وبالاخير نطقت .. قلت له شاللي بينك وبين اخواني عشان تعاديهم كذا قدامي وتعوذت من الابليس .. قام عصب اكثر .. وش قصدك انا ابليس يعني ووو .. قلت له خلاص انا ابليس بس بالله قفل الموضوع .. اتعبني قسم بالله 😢 بس قبل ماينام ... قال لي انا اسف .. مدري شاللي خلاه يتأسف او يمكن شافني ابكي .. بس قلت بيني وبين نفسي زين انه تأسف .. |
رد: التغيير ..لماذا نتزوج ، مه
اقتباس:
شكراا لكم .. سمر مو سميره 😁 |
رد: التغيير ..لماذا نتزوج ، مه
المعذرة على التأخير.
اقتباس:
المعذرة منك أخي لماذا نتزوج .. رجعت لمشاركة سمورة المقتبسة عن ردودك السابقة ولم أجد أنها لم تفهمك .. بل وجهت لك أسئلة لتجيب عليها حسب وجهة نظرك. لذلك لم أتمكن من كتابة شيء لأنني شعرت أنني سأعيد كلامك ذاته. . . . بخصوص الاحترافية في التعامل .. فبصراحة لا أعرف الاستراتيجية التي يقصدها أخي لماذا نتزوج .. ولكن ما أعرفه أن الشخص الذي يتكلم كثيراً في الحوار ويتشعب ويفرّع المواضيع حتى تضيع الفكرة الرئيسية .. فالأفضل معه تقليل الكلام والردود قدر الإمكان .. وعدم مجاراته في تشعيباته بل إعادته إلى صلب الموضوع .. كما فعلتِ في حواركما الذي ذكرتيه في موضوعكِ السابق عندما صمدت لبعض الوقت وصممت أن تحصريه في نقطة (شو مشكلتك مع إخواني؟) تحتاجين فقط لمزيد من الصبر وطول البال حتى ينتهي الحوار دون أن تنفجري أو تستسلمي. |
رد: التغيير ..لماذا نتزوج ، مه
جزاكي الله خير اختي ام سلطان والله يعطيكي العافية على جهدك المبذول بدون تقصير مثل مااتعشمنا فيكي بل اكثر
لي عودة ان شاء الله يااخت سمر |
رد: التغيير ..لماذا نتزوج ، مه
اهلا مهره ... مشكوره حبيبتي 💓 .. انا الحين متبعه نفس طريقتك ... كل مره يحاول يفتح الموضوع واصده ماتكلم معه .. اقوله مو حابه اتناقش في هالموضوع ... ورجع يتحركش فيني .. الا يبييني افتح الموضوع .. عشان يستفزني واحذف القروب ... بس حامض على بوزه مارح احذفه نهائيا ... وقاعده اسايره .. واعطيه الكلمه الحلوه .. وهو الحين عباله اني ابي بكره اروح عند اهلي .. بس للحين على قراري ماحروح ... والله هالايام حاسه اني داخله معركه 😁 ... صار يعصب سريع امس واليوم ... يقول اني متغيره ... مايدري انه بسببكم 😆 .. بدل ماكنت انا لللي اعصب واكسر اللي قدامي .. صار هو اللي يعصب ويكسر .. رحمته والله .. لاني احس فيه ... بس لازم يذوق اللي اذوقه ... يقول لي لا تتمسحين فيني عشان بكره رايحه بيت اهلك يالمصلحجيه ... وانا ساكته .. ويرجع يقول غريبه ماتقولين ابي اروح ... قلت له حابه اخرج معك الا اذا عندك مانع فهالشي راجع لك .. يقول مافي طلعه من البيت اساسا .. قلت له عادي بجلس ببيتي احلل الايجار .. ويرجع يقول اذا جبتي ولد بسميه على اخوي فلان .. رفع ضغطي اسم اخوه مو حلو وقديم 😭 ... قلت له لا في هذا حنظلمه الاسم مو حلو ابد .. يقول اجل وش تبين تسمينه او على خوااله .. الااا يبيني غصب اتكلم عنهم .. قلت له اذا عرفنا جنسه ذيك الساعه يصير خير ... سحب جوالي ورماه .. كنت متوقعه انه جاب سيرة الاسم عشان ادافع عن اخواني وارجع اتنرفز واعصب واحذف القروب ... صرت حافظته حفظ 😒 ... بصير اقلل الكلام ومادخل بالنقاش مععه ...
مشكوووره حبيبتي مهره 🌷 اخي لماذا شكررااا لك مقدماا ... في الانتظار 😁 |
رد: التغيير ..لماذا نتزوج ، مه
بارك الله فيج يا سمورة ... شاطرة حبيبتي. لكن أرجع أذكرج .. لا تحطين في بالج إنه يذوق اللي إنتي ذقتيه .. ولا تتصرفين من باب العقاب أو الانتقام. اعتبري مثل هالحوار فرصة تضربين عصفورين بحجر .. أولاً يبطل يحط دوبه من دوب إخوانج لين يعترف بالسر الدفين والسبب العظيم اللي يخليه يعمل كل هالهلّيلة على علاقتج بهم .. وثانياً إنج تتغيرين للأحسن وتطورين حواراتكم وترتقين بها عن أسلوب الأطفال مثل ما قلتي في بداية موضوعج. بخصوض زيارتج لأهلج .. حابة أنبهج لاحتمال خطر على بالي .. وهو إنج حتى لو طوفتي الشهرين ممكن جداً لما تطلبين زيارتهم يقول لج: شفتي؟؟؟؟؟ .. أنا كنت عارف إنج في الموقف كذا والموقف كذا كنتي تتمسحين وتعملين مقدمات عشان تطلبين تروحين لهم .. حتى لو المواقف حصلت من فترة طويلة. قلت لج هالاحتمال عشان لو سوا جذي فعلاً - لا سمح الله - لا تتفاجئين ولا تطلعين من طورج. |
رد: التغيير ..لماذا نتزوج ، مه
حمستيني 😍 .. يعطيك الف عافيه يامهره ... والله ودي اغير من نفسي كثير ... وبرضو هو يتغير .. ونعيش كشخصين ناضجين .. لان فعلا احس حياتنا مثل بزران يلعبون ويتهاوشون على اتفه شي ... وحابه اطنش اي مشكله تافهه يفتعلها .. واترفع عنها ... وودي برضو اعرف وش فيه بينه وبين أخواني ... من قوة ما انا ابي اعرف ... رحت سالت واحد منهم قبل فتره ... يقول لي والله انه نفسيه ...يقعد معنا ويسولف ويضحك .. بس لما تكونين معه ينقلب شخص ثاني ... هذا كلام اخوي الوسطي ... اما زوجي اذا سألته وش بينك وبين اخواني ... ما احس بنفسي الا وأنا ابرر عن اشغالي في البيت او اي موضوع ثاني ! مدري كيف يقدر يتحكم فيني ويقلب المشكله ضدي ... وانا من زود عصبيتي انسى نفسي .. بس الحين الحمدلله قادره اتحكم بنفسي ... اما بخصوص بعد شهرين يجي يقول لي كذا .. صدقيني يابذبحه يابنتحر 😭 ..، بس ان شاء الله وقتها اقدر امسك نفسي .. مشكوووره حبيبتي اخذت من وقتك 🌹💓 ربي يجزاك خير وينولك اللي في بالك 🌹
|
رد: التغيير ..لماذا نتزوج ، مه
صباح الخير ...
بقولكم وش صار امس وانتوا احكموا ... بصراحه قربت انجن ولا انجلط ... امس سألني الصباح بتروحين عند اهلك ... قلت له لا بجلس معاك ... ماقلت له بطلع معاك ... المهم ... عالمغرب بنتي تصيح ... قلت له طفشانه تبي تطلع ... وهو ساكت وطلع من غير مايطلعنا او حتى عالاقل يجلس معنا ... قلت معليه نتحمل ... وفي الليل تأخر ... قلت له وينك حبي عشان اجهز لك العشا ... قال لي لا تعشي وعشي عيالك ونامي ... اما يمكن أتأخر .. قلت له ليه صاير شي ؟ ... قام ارسل لي صورة هو وعيال اخوانه وعيال اخته .. والله اني شعللت من للقهر بس مسكت نفسي ...قلت له طالعين مع مين ؟ قال كنت طفشان طلعتهم .. قلت له وبنتك ليه ماطلعتها حرام قاعده بروحها ... قال خليها تجلس معك تونسك ... قلت كان طلعتنا جميع ماحيصير شي .. قال والله خفت اشغلك عن إخوانك واهلك .. اجلسي سولفي معهم واستانسي ... ماحب اخرب وناستك ... قلت له اوكي .. وأنا بداخلي بركان من القهر ... ودخلت على القروب وككنت بطلع منها ... وتراجعت ... قلت بنفسي دام بداتي لازم تنتهين بشي يسرك ... بس قمت اصرخ على عيالي ونيمتهم غصب وانا أبكي من القهر ... طلعت حرتي فيهم بالصراخ والعصبيه ... والحمدلله هدأت قبل مايجي ... ولما جا مابينت اني زعلانه ... وكان عادي ..، بس كان مبين اني طالعه من نوبة بكا ... قال لي اووه كنتي تبكين ؟ قالها بسخريه ... قلت مين قال ... بس جاني الم بجنبي وبكيت من الالم ... بس اخذت مسكن وهدأ ... قال اوك السبت آخذك للدكتوره ... قلت له مشكور مايحتاج الحين صرت احسن ... كان ودي اقوله بخلي إخواني يودوني او أروح لأهلي ... بصراحه مليت ... ودي اروح لهم اشتقت لهم .. ودي ارتاح من اللي يسويه عشان احذف القروب .. واحذفه وارتاح ... قلبي ماعاد يتحمل اكثر |
رد: التغيير ..لماذا نتزوج ، مه
لا حول ولا قوة إلا بالله. إنتي فاهمة طبعاً أن هذا كله ضغط عليج. وبدل ما تفكرين تطلعين من القروب دوري على السبب العظيم اللي يخلي زوجح يتصرف معاج بهالّلآمة!!! |
رد: التغيير ..لماذا نتزوج ، مه
ادري يامهره انه يضغط علي ... يبيني احذف القروب .. لاني لما حذفته رجع يتعامل معي طبيعي .. تدرين وش قال لي امس ... رجعي قروبك مع صحباتك واحذفي ذا اللي مالو داعي .. قلت له اهلي اولى من صديقاتي .. وسألته وش فيك ليه ماتبيني اتواصل معهم ... يقول مين قال اني مابيك تتواصلين معهم ... بس انا ماحب تتواصلين معهم ... وفي فرق بين اني مابيك وبين اني ماحب ... لو ما ابي كان اخذت جوالك وطلعتك منها ... او حتى امنعك من الجوال .... بس انا مو حابب جلستك معهم ... وابيك من نفسك تطلعين ... وذا سالته وش السبب يقول من غير سبب .. اقوله مافي شي اسمه من غير سبب اكيد في شي .. قام عصب ويقول شنو يعني عبالك انا غيران منهم ... عبالك انهم احسن مني ومدري شنو .. وقام يسب ويسفل فيهم .. واخر شي قال تبين تروحين لهم روحي مو مانعك ... قلت له ماقلت اني ابي اروح بس احب اعرف وش فيك عليهم ايش اللي ببنك وبينهم عشان ماتبيني اكلمهم حتى خوالي واعمامي صار بينا حواجز بسببك ... قال احسن وش تبين فيهم كلهم مامنهم فايده .، وعقبال اخوانك !!! ... قلت له من جدك حتى اخواني ؟؟ قال لا مو لهالدرجه بس صيري معهم رسميه وانا مابمنعك منهم ... قلت كيف يعني تبيني اصير رسميه اشرح لي ... قال يعني سلام كيف الحال وسلام يد بس ... لا تطيحين الميانه معهم .. لا تضحكين معهم ولا تكثرين سوالف معهم ولا تمزحين معهم !!! قلت له مو من حقك الا إذا قلت لي سبب يقنعني ... قال اوك براحتك اجل تحمليني ...
تنصحيني اكلم ابوه ؟؟ لاني احس مافي فايده معه بخلي الموضوع بيد ابوه وهو بتصرف |
رد: التغيير ..لماذا نتزوج ، مه
والله ما أدري يا سمورة. أنا كنت مأيدة فكرتج إنج تكلمين أبوه لما طرحتيها في موضوعج الأخير .. لكن بصراحة ما أدري كيف ممكن تكون ردة فعل زوجج مع عقله الصغير هذا. استخيري حبيبتي قبل كل شي. |
رد: التغيير ..لماذا نتزوج ، مه
ان شآء الله يامهره تسلمين حبوبه 💓
بعطيه مههله أسبوع وبعدها بستخير ... واللي ربي كاتبه بيصير ... 🌹🌹 شكراا لك 🌹🌹 الحياه صبر 🌹 ... والله اني خايفه من تدخل أبوه ... وادري بتكبر المشكله .. بس ابي احط حد للي يصير .. يمكن توقعك صحيح .. لانه لو اخواني دروا بيموت وقتها ... اكثر من مره يحذرني .. بس انا عطيته كلمه اني مستحيل اقول قدامهم شي .. وانا قد كلمتي ..الله يصبرني بس .. بحاول اعطيه فرصه وان شاء الله ربي يهديه ... شكراا لك 💓 |
| الساعة الآن 05:38 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©