ملييت من البيت و من أفكار زوجي
 

السلام عليكم.و كأني كنت في غيبوبة و صحيت. قبل اتضايق و اتوتر لأني على الاغلب ما اعرف احلل الوضع صح.الحمد لله وايد اشياء قاعدة توضح لي مع الايام.
الزبدة من هالمقدمة اني خلاص فهمت اني سجينة و لازم اتحرر.ارجوو من الي يدش موضوعي يساهم و لو بالقليل و بالدعاء الكثير.
صار لي سنوات متزوجة،زوجي حارمني من اشياء واااايد!للحين مو صايدة التكنيك المفيد للتعامل وياه في هذي البند تحديدا! كل يوم اقعد الصبح اعرف انه يوم بايخ! روتين و يوم طويل لا انيس و لا ونيس! انا وحيييدةبكل ما للكلمة من معنى ! زوجي مشغوووول طول اليوم،ونهاية اليوم يجي يحط راسه وينام.
_اهلي بعيدين و باقي الاقارب علاقتنا فيهم رسمية منذ الصغر او مقطوعة بسبب المشاكل! لذلك خيار الزيارة غير متوفر الا حسب فضاوة زوجي.و زوجي مو فاضي لي !
_زوجي و الزمن علي!مانعني من سواقة السيارة.هذا يعني ان ماكو طلعات الا وياه و للأسف هو ما يطلعني😊 شيء اسمه ترفيه كشتات طلعات سفرات مستحيل محدووفة من قاموس علاقتنا!* تصدقون صارو خواتي يحزنهم وضعي و ساعات يخبون طاري طلعاتهم و حتى سفراتهم خوفا على مشاعري!مع اني دائما اظهر قوية قدامهم و مو مبينة لهم ان هذا الشيء ماثر فيني.بس هم شايفين و فاهمين! اولادي صارو يتحسرون على اماكن الالعاب !
_و علاوة على ذلك مانعني اشتغل او ادخل دورات !

اتوقع وضحت الصورة.أنا_يمكن بعيد_ بين اربع طوف..
الزواج بالنسبة لي خنقة و حبسة و ملل و تقييد و شخص يهندس لك كل شيء وإن رفضت يا ويلك يا سواد ليلك ! حااااااولت وايد أتأقلم مع وضعي السيء والله ما قدرت! صاير الشيء اووفر علي،حتى اهتمامي بعيالي صاير مو ذاك الزود قاعد يفتر وااايد.
والله حاولت اتكيف مووو قادرة!و إذا رجع شافني حزينة ومتضايقة يزعل علي.اقوله انت السبب مو مقتنع! ما ابغى احسد و لا احقد على احد،بس انا ودي اصير مثل كل خلق الله مثل ما احب أنا و أتمنى و أستاهل!
و كأني في عقاب أبدي !

المطلوب:
_رحم الله والديكم دعواتكم طبعا،و ثانيا علموني اشلون اقنع هالرجال يغير من نفسه و افكاره.و كأني متزوجة واحد شايب علما بانه يا دوبه في بداية الثلاثين.يا ناس ابغى اطلع و اروح و اجي و استانس و اتطور و اعيش

رد: ملييت من البيت و من أفكار
 

الله يكون بعونك
هو عارف انك متضايقه من وضعكم ؟؟
جربتي مره تكلمية و وضحتي له اللي تريديه ؟؟؟

رد: ملييت من البيت و من أفكار
 

عيالك مايحنون عليه طلعنا

رد: ملييت من البيت و من أفكار
 

الله يفرج همك ويصلح زوجك

رد: ملييت من البيت و من أفكار
 

زوجي حسب تحليلي شخص اناني و ديكتاتوري و عباله فاهم كل شي و الناس ما تفهم شي! الناس تهتم للتفاهات و الشكليات و هو الي يهتم بالاساسيات و المهم. يضغطني وايد عشان بس لا يظهر قدام اهله و الناس انه غير فكرته او ان احد قدر عليه لذلك كبريائه عالي و مؤذي! عايش عزوبي ما يبي يتغير عليه و لا شي! ما يبي احد يغيره و لا احد يطالبه بشيء دايما يكرر اذا بسوي شي بسويه من نفسي! انسان ضد الحوار و النقاش.انسان مع الروتين و التشبث بأفكاره و صوته الداخلي. عزوبي و ما يبي يحس انه متزوج،يقضي يومه كااامل لنفسه. و طبعا كبرياءه ما يسمح له يتودد لزوجة بطلعة او سفرة.شخصيته جاااافة حاااد و انتقادي و جبان أيضا يخاف التغيرات و ما فيه شدة مغامرة و لا تغيير!
غيور و غيرته متعبة بالنسبة لي!


يدري اني متضايقة،و المضحك يقول اذا كنتي متضايقة لا تضايقينا وياج! احساس ماكو!.
فاهم الزواج غلط،ماكو متعة في علاقتنا على جميع الاصعدة.
يدري اني متضايقة بس هو اهم شي في ايده مفتاح البيت و سويج السيارة يروح وين ما يبي و يرجع وقت ما يبي!

جربت مرات وايد اتكلم وياه،و اقول له شنو الي راح يخليني مرتاحة و سعيدة و ع الاقل مستقرة نفسيا! اذا اقول له متضايقة نفسيا يستهزىء يقول خلاص تبين اوديج الطب النفسي؟ و ساعات يقول هذا كله من المعاصي و الذنوب!! و الله ماتعبت نفسيا هالكثر الا يوم تزوجته ! انسان متعب من جد! يضخم السلبيات و ما يتقبل مني اي شي و كأنه في معركة وده ينتصر!!

انا محتاجة تكنيك كامل حتى صياغة الكلام وفقا لشخصيته ابمذكورة اعلاه! لأن و الله مو جاي ع بالي شيء ينفع وياه

رد: ملييت من البيت و من أفكار
 

عيالي اعمارهم اقل من ٥ سنوات.اذا حنوا عليه بطلعة وداهم لجدتهم او كلش كلش وداهم البقالة😊دااايما يقول لي لا تعودينهم على عالسوالف!!
تخلف وي الكل

رد: ملييت من البيت و من أفكار
 

حاولي تقنعيه تتوظفي استعيني باهلك يكلموه

رد: ملييت من البيت و من أفكار
 

انتظري يكبر اولادك وتنفك ازمتك
كلهم يشدو كثير في البداية بعدين يفكون ولما تروحي مكان وترجعي حسسيه بالفرق في نفسيتك الحلوة ومزاجك العالي
يصير يخرجك اكثر
الله يصلح حالك

رد: ملييت من البيت و من أفكار
 

أسأل الله أن يشرح صدرك و ييسر أمرك

هل إمكانياته المادية جيدة ؟

ماهي إهتماماته و هواياته ؟

هل مبادئة متخذها من جانب إجتماعي أو شرعي أم ماذا ؟

رد: ملييت من البيت و من أفكار
 

حاولت اقنعه و ما فاد اكثر شي يتحجج ان راح يقل عطائي لعيالي.ركزي قال عيالي ما قال اهو.يعني ساعات وفقا لكلامه احس وجودي في البيت مربية😊
لذلك كتبت الموضوع لعل احدهم يتقذني كيف اقنعه و اقوله انا مليت من نمط هذي الحياة!"
نقطة اني استعين بأهلي يقنعوه نووو وي!علاقة زوجي بأهلي رسمية و ما يعجبونه كثير عشان يصيرون مقنعين بالنسبة له،و اضافة الى ذلك هو ما يحب احد يتدخل بينا موووولية.
يعني لازم انا اكون بطلة القصة و انقذ نفسي بنفسي 💪

رد: ملييت من البيت و من أفكار
 

ان شاء الله يا رب..
فعلا اتبع هذي الطريقة ان ابين فرق النفسية إذا طلعت.
الغريب يا اختي اذا شاف نفسيتي حلوة تأثرا بالطلعة،يقلب علي و يشوف نفسه وايد! و يضل معصب بدون سبب🤣🤣🤣استغفر الله

رد: ملييت من البيت و من أفكار
 

شرعي و اجتماعي.انسان دقة قديمة وااايد! يخاف يحيد عن روتين اول😑

رد: ملييت من البيت و من أفكار
 

ا ذا الكلام والاسلوب الخلو مو نافع..معاه ادخلي معه بحوار ابدئي فيه بدكر محاسنه ومزايا حياتكم لكن مايعكر حياتكم..السابيات الموجودة وانك بوجودها لاتحسبن بالمرايا عطيه خيارين انك ستنفذين احدها لاثالث لهما اما ان يطلعكم ويرفعهكم مثل ماهو يطلع ويروح ويجي عشان كذا مو حاس فيكم ..او يعطيك حرية ان تقودي بحيث لاتلزميه بشيء ..وهذا الامر لن يضره..اخبريه انه طفح بك الكيل ولاتستطيعين الاستمرار بهذا السجن ولنك واولادك بدأتم تكرهون هذا النمط من الحياة ولاتريدين الاستمرار بتلك الطريقة ضعي غينك بعينه وتكلمي بجدية ليفهم انك جادة مو دلع او شي آخر..أصلح الله حالك وحال أولادك..والعمل ممكن تشتغلي بالبيت لو حابة تغيري روتين شوفيلك حل ترى عيشتك تجيب. الاكتئاب غضب ..

رد: ملييت من البيت و من أفكار
 

هل الدروس اللي يحضرها دروس علمية تخصصية مثل دروس أو دورات في الفقه و التفسير و علم الحديث و اللغة العربية ؟

أم مجرد محاضرات ؟

رد: ملييت من البيت و من أفكار
 

اقولك هذا الكلام عن تجربة
كنت اعراس ممنوع حتى اولاد وبنات اخوالي واعمامي
ممنوع ابات في بيت اهلي
اروح يستناني تحت
حتى اعراس اخواتي اقسم بالله اني اخرج من القاعة قبل الناس ما يرتاح حتى يحطني في البيت
قاطعت كل الناس
الدراسة وبس
لكن الان خف كثير وين كنا وين صرنا
اصبري بس ولا تياسي في محاولة تغييره