|
رفع صوته علي أمام أختي
قبل شوي بنتي كانت تلعب بصوت عالي بينما زوجي يحاول أخذ قيلولة بعد العمل ،
حاولت اخليها تقصر صوتها وكل دقيقة رايحة عندها مع اني تاركتها بابعد نقطة عن غرفته لكنه فتح الباب بكل قوته واختي جالسة وجلس يصرخ علي حتى بنت صغبرة منتي عارفة تسكتينها!! واخذ فراشه وراح ينام عند اهله !! صراحة مصدومة جدا جدا خير ان شاءالله يصرخ علي عشان بنته !! وش اسوي فيها طيب اللي علي سويته !! مو مشكلتي انه حاجرنا ببيت ضيق عشان يفتك من الايجار ويلومني بعد لو ماسكتها ! انا من كثر الصدمة والله مو عارفة افكر ! |
رد: رفع صوته علي أمام أختي
اصلا كان توه داخل غرفته وكنت اسمع صوت تشغيله فيديوات بجواله لسه مانام
كان يقدر يقول يرسل لي سكتي بالبنت .. او خليها تروح لاهلي او اي يدق علي يهاوشني بالجوال اي شيء بين الزوجين ! بس يفتح الباب بكل قوته ويصرخ علي كاني اصغر عياله هذي جديدة علي والله ! ما اقدر اسكت عن الموضوع بقلبي حرررررة ما اقدر اخلي الموضوع يمر مرور الكرام .. اهلي جايين لمدينتي ببالي ارجع معاهم واخليه يفضى له البيت صح ينام على راحته عشان يعرف قدر زوجته .. ابغى ادخل اهلي بالموضوع ابغى ارجع كرامتي احس اني حاجة رخيصة يصرخ علي وقت مايبي وقدام اللي يبي !! جمرررررة بقلبي |
رد: رفع صوته علي أمام أختي
استهدي بالله ولاتكبرين الموضوع
السالفه ماتستاهل هذا كله اغلب الرجال يعصب من الازعاج وقت نومه وخصوصا ان الموضوع كلام بس اختي غاده الله يهديك لاتصيرين مثل بعض البنات هاليومين اي شي راحت لـ اهلها حتى مع الوقت يصير روحتها لاهلها عادي عنده ترك البيت والروحه للاهل تكون على شي قوي مو بهالشكل ولايكبر الشيطان اللي حصل ويخليك تسوين شي وتكون عواقبه وخيمه |
رد: رفع صوته علي أمام أختي
واضح انه لو رفع صوته عليك ليس امام اختك ما كان اهتميتي اختي اصلا ولا تهتمين للموضوع ومن يرجع قولي له اني اسفة حقك عليه وبخلص الموضوع
|
رد: رفع صوته علي أمام أختي
وشي بسيط أو عادي يصرخ عليها جدام أختها؟!! .. أو جدام أي حد؟!!
لا طبعاً .. ومعاج حق تزعلين يا غادة. لكن خلي زعلتج في بيتج. |
رد: رفع صوته علي أمام أختي
مره تصرفه غلط وانا مع مهره. زعلك ببيتك مو تروحي زوجه. استهدي بالله. والشيطان. شاطر الللخ طيب الزوج. لازم يوسع صدره ويحترم زوجته ! يضبط أعصابه ! على الاقل. مو قدام احد. رغمه غلطان |
رد: رفع صوته علي أمام أختي
نعم لو كانت صرخته لي لوحدي كنت تقبلت وعلى قلبي احلى من العسل وهذا طبعه ينفخ بصوت عالي ويطلع الحرة واسكت انا كلها كم ساعة ويتندم وانا ارجع احلى مايكون وصافي يا لبن ..
طبعه ومتقبلته طالما مايتلفظ او يقل ادبه علي ، معليش خله يطلع الحرة زي مايقولون ، مايهمني والله بس قدام اختي لا والله جديدة علي ، وكبيرة بحقي انا ماسويت شيء يستاهل كل هذا !! والله كبيرة بحقي . طبعا كل العصر كنت طالعة ماشفته ولا كلمته معزومة بمزرعة وحصلته المغرب مرسل لي رسالة يعتذر باسلوب رسمي ورسالة قصيرة جدا ومختصرة يعتذر ع الموقف ويظن اختي كانت طالعة برا بالحوش !!!! والله كذاااب بعد ماصحصح وتندم كتب الرسالة والا يدري اني انا واختي بنجلس بالصالة .. اصلا وش يطلعها الساعة 3 ونص بعز الحر !! طبعا مارديت ولالي نفس ارد وعارفة انه اذا شافني ما اكبمه بيقلب علي ويزعل هو سبحان الله .. انا منب طااايقة احط لساني ع لسانه منب طايقة اشوف وجهه والله العظيم كل مرة على مدى 6 سنوات زواج عمري ماصعدت اي مشكلة .. كل ماتصير مشاكل اسكت واموت المشكلة ونرجع سمن ع عسل .. عمري مادخلت اهلي او اهله بمشاكلنا تصير اشياء تقهرني وتحرقني بس اسكت وامشي ويجي يكلمني بكلمتين وارضى واتجاهل وبس المرة هذي لا . ما ابغى اسكت ولا ابغى امشي الموضوع .. فيني حرررة هو اللي صعد المشكلة مب انا طول عمري ستر وغطا له وهو اللي فضح نفسه مب انا اللي فضحته ابغى اكلم ابوي وابكي ابغى احس ان فيه احد يقدرني ابي ابوي بنفسه يكلمه ويفهم اني مب ملطشة عنده يرفع صوته متى مابغى .. انا انسانة محترمة واستحق الاحترام . المضحك بالموضوع بعد رسالة الاعتذار مرسل لي رسالة ثانية ان مكتب الاستقدام مكلمينه بيجيبون الخدامة هاليومين 😂 يعني انبسطي وارضي واكلي تراب ماقصرت معك طبعا كذاب المكتب محددين مهلة خلال اسبوعين باي يوم تجي ولا عمرهم كلموا احد عشان يستعد لخدامته دايما يكلمون ويقولون الخدامة رحلتها اليوم استقبلها من المطار وبس بس انا كنت ازن عليه يدق ع المكتب يشوف وينها ودايما رده اذا جت بيدقون علي ماله داعي المكالمات يعني وحده من ثنتين يا انه يكذب وبس بيلهيني عن المشكلة يا انه هو ينفسه تواصل مع المكتب عشان يقولون له هالكلمة اللي بزعمه بترضيني وتنسيني بلواه . توني راجعة من مناسبتي ولاا ادري وش كانوا يقولون متنكده والعبرة بحلي ومقدر اقول شيء عشان اختي معي . وتوني راجعه وبكيت لحد ماصدعت .. يارب اقدر انام من الصداع |
رد: رفع صوته علي أمام أختي
المضحك قبل شوي لما دخلنا دخلت افرش اسناني واسمع بنتي بالصالة رافضة تجلس مع ابوها وهو يترجاها تجي عنده وتجاهلته وجت عندي 😂
اول كنت شغالة مرسول الغرام وياللا بوسي بابا ويالله حبي بابا وبابا جاب لك واشترالك الخ بس يبدو لي ان مهمتي انتهت يبي بنته تحبه خله يبذل مجهود عشان هالشيء وانا مالي علاقة بينهم ببالي حاليا بكره بكلم ابوي ان شاءالله ، بس بقوله الموقف ولاول مرة بزواجي احكي لابوي شيء ، بس هو اللي حدني لهالشيء ابوي رجل هيبة وحكيم وله كلمته ، انا بشاوره بس .. ان قال لي اصبري وتحملي الخ فانا بمشي ع كلامه وان قال بكلم زوجك بخليه يكلمه ويعلمه اني منب جاية من شارع ووراي اهل ولازم يحترمني . مارح اخليها تكر مرور الكرام .. هذي البداية يصرخ علي قدام اختي وبكره قدام اهله واللي بعده قدام الناس الغرب .. ما ارضى بهالشيء |
رد: رفع صوته علي أمام أختي
حبيبتي غاده باين عليك تحبينه ماشاء الله. ان شاء الله هو كذالك ودك تعطينه قرصه عشان يتوب 😂😂 خليه يتوب. ان شاء الله ماتتكرر الأخطاء بينكم ان شاء الله ربي يؤلف بين قلوبكم دايم على المحبه والسعاده دايم اللهم امييين |
رد: رفع صوته علي أمام أختي
عزيزتي غادة..
استهدي بالله وقولي لا إله إلا الله. أن يصرخ عليكِ زوجكِ أمام أي شخص .. فعلاً مسألة كبيرة .. وفعلاً لا يجب أن تمر مرور الكرام. وأن تصعدي الموضوع وتأخذي حقكِ وتضمني ألا يتكرر ما حصل .. كل هذا من حقكِ .. ولكنكِ تستطعين فعله وحدكِ دون تدخل أحد .. على الأقل باعتبارها المرة الأولى التي يفعل فيها زوجكِ ما فعل إن لم أسيء الفهم. أما إدخال والدكِ في مثل هذه المشكلة فأراه أمرٌ لا يصح .. لأن الموضوع ـ وإن كان كبيراً ـ لا يستحق أن يتدخل فيه أحد. تقولين إنه إن شافج ما تكلمينه بيقلب عليج وهو اللي بيزعل .. فماذا تتوقعين منه إن أدخلتِ والدكِ في موضوعٍ كهذا؟! وما أراه أنه مدرك لخطئه ويحاول الاعتذار ـ بطريقة بعض الرجال ـ وليس أنه يلهيكِ أو يحاول الضحك عليكِ. ومع ذلك لكِ أن تظلي متحفظة معه وزعلانة حبتين حتى يدرك أن الموضوع بالفعل أكبر من يمرّ ببساطة .. وقد تتاح لكما فرصة النقاش والعتاب وعندها قولي كل ما في خاطركِ. . . . الاحترام ضروري جداً بين الزوجين .. ولكن مسؤولية بناء هذا الاحترام هي مسؤولية الزوجين فقط .. لا أن يفرضها طرف آخر على أحدهما. عالجي موضوع الاحترام بينكِ وبين زوجكِ يا غادة .. حتى يكون الاحترام نابع من نفسه وبقناعته وأنكِ بالفعل تستحقين الاحترام .. وليس لمجرد أنه خائف من والدكِ أو عامل له هو اعتبار. |
رد: رفع صوته علي أمام أختي
غاده دامه جالس يرضيك خلاص لا تصعدين المشكلة و يقلب هو الزعلان خلي الكورة بملعبك
كنتي منفعلة و الحين شكله قل الانفعال😁 بصراحة انا للاسف مثلك مارضى بس ياختي يا إن فيه بعض الحريم يصرخ عليها زوجها قدام الناس و عادي ماتتفشل يارب اصير زيهم انتي تخيلي انه اخوك اللي صرخ عليك عادي صح😁 |
رد: رفع صوته علي أمام أختي
مو عارفه شنو اقولج
انا يمكن اقولج تفاهمي وياه بالعقل واعتذريله لان ماقدرتي تسكتين البنت وهو بيستحي منج اصلا وينكسر قلبه |
رد: رفع صوته علي أمام أختي
اكون صريحه قبل فتره اختي جت قالت فلان (زوج اخت زوجها) 😅 قالت صرخ
ع زوجته قدامنا قلت لها عادي ايش فيها ليش الناس تكبر المواضيع bht |
رد: رفع صوته علي أمام أختي
ياغبائي يا غبائي يا غبائي
طبعا كنت من امس مرة مكتمة ولا كلمته ولاشيء قبل شوي جاء عندي وانا كنت لاهية مع بنتي وسألني قال بسوي لي هوم ميد برغر احسب حسابك؟ انا نااااسية كل ام السالفة قلت ايه طبعا ابتسم هو يحسب خلاص رضيت وراح للمطبخ !!! انا للحين زعلانة مدري شلووون قلت ايه 😭 والله ما اخلي الموقف يمر بسلام ! ابوي اليوم كلمته اول ماصحيت وعزمته بيجي المغرب يتقهوى عندي وافكر اقول لزوجي اني مناديته عشان اشتكيه .. بس كبرت عقلي وبمشيها لانها المرة الاولى وبعض الكلام القوي.. مدري مدري محتاارة 😭 انا كان عندي خطة واضحة وخربت فجأة حتى الغداء شكلي مارح اكل برغره بسخن لي من رز امس حق الغداء .. مادري شلون بيصير موقفي بعد ماقلت ابغى وقلتها عاادي ناسية اني زعلانة مدري شلون برجع اكتم واقوله مابي غداك . |
رد: رفع صوته علي أمام أختي
عزيزتي مهرة ردك قريته مرة ومرتين وثلاثة .. جدا جميل ومنطقي
لكن اذا كل مرة نفس رد الفعل مارح يردعه هالشيء! طيب ليه انا احترمه واستر عليه وهو بكل قلة ادب ماحترمني ؟ هالشيء مو عدل ليه حتى يوم سفّل فيني قدام اختي اظل حاشمته قدام اهلي ؟ انا ابغى ارد اعتباري امامهم مثل ما هاوسني قدامهم . المشكلة يابعد عمري يا ابوي شاقي عمره له اسابيع يدور السوق يدور له هدية قيمة بمناسبة ترقية زوجي ! والله مايستاهل هدية ولايحزنون عقب سواته استنكار عزيزتي فعلاً انا مازعلت ولاجلست بمكان لوحدي بس مكتمة صحيت وكلمني ورديت عليه وجلست بالصالة وهو فيها .. بس الى متى ؟ متى بيعرف اني ما ارضى بهالشيء ؟! ضوء القمر شكرًا على ردك لكن مو انا الغلطانة ليه اعتذر ؟ هو اعتذر لكن ما ارضاني .. تصرفه غير مقبول ابدًا ولازم يعرف هالشيء . اسعد فتاة فعلاً لأنه تصرف سيء ووضيع زوجته وشريكة حياته يصرخ عليها قدام الناس !! عيب والله عيب يصرخ علي واذا جاء الليل جاء ياخذ حقه ؟!! هذي حياة لا تليق بإنسان . همس القلوب فعلاً انا احبه واتغاضى عن عيوبه ومكبره دماااغي ع الاخر ، لكن يهينني قدام الناس لا والله ما أرضاها . |
رد: رفع صوته علي أمام أختي
طيب هو اعتذر،،،وجاي من عمل
ويمكن متهاوش يمكن متضايق يمكن زعلان التمسي له مية عذر،،،طيب قدرك حاول انه يلم الموضوع فهميه قولي انا لاتكرر معاي هذا التصرف الي ماترضاه على نفسك لا ترضاه علي انك قدام الناس ايا كان ماتحبينه يغلط عليك او ينرفزك لا تدخلين اهلك ابدددددددددددا انتي عايشه مع زوجك مو احد غريب!!!! تحصل يا غاده الاخطاء خلي الكلمة منك والله غلط تندمين كثيييييييير قد شعر راسك وبتتذكرين كلامي اذا دخلتي الوالد انتبهي ولا حتى تبينين هذا مو ضوع تافه انتي تتفاهمين مع زوجك ترى يقدر التفاهم لكن بينحرق اذا الوالد تدخل وانتي بكيفك نصيحه نصيحه نصيحه انتبببببهي مرا لااااا طيب واذا حصل موضوع اكبر من هذا!!!!ايش بتسوين؟ هذا الاشياء تحصل ويغلط فيها الانسان انا حذرتك لان اتذكر وحده كل ماحصل زوجها عصب عليها هو اشوي عصبي بس يرجع يهدا كانت تتصل على اهلها مرا تدخلهم ومرا تروح يعني هو مايضربها او خاينها،،،،فأخر شي تركها مل يا عمري بالتفاهم بالسياسه بالكلام الحلو فهميه راح يفهم ،،بس اذا بتبدين بهذي الخطوه بيملك يمللللل وينقهررر خاصه انك بتعلمين ابوك انتبهي يمل منك ترى الرجال مايتحمل هذي الحركه،،،،،،تبين تكونين رسميه معاه بكيفك بتطولين الزعل بكيفك دام بينكم بس تقولين لا ابوك انا مو معاك بهذي |
رد: رفع صوته علي أمام أختي
شوفي اختي زوجك حس بغلطته وجالس يحاول يراضيك
استغلي موقفه لصالحك وليس ضدك يعني لو اشتكيتيه لابوك رح يتضايق منك اكثر وبتطيحي من عينه بيقول وحده تدور مشاكل زودتها عليا لما عطيتها وجه فالحين دام انه يتودد لك وشافك زعلانه شوي روحي له وخبريه وعطيه كذا كلام يحسسه انك مره زعلانه وماسكه نفسك وخليه يوعدم انه ما يكررها والله كذا افضل لك من انه ابوك يدري طلعه من البيت وتدخل الوالدين خليها لوقتها مو اذا جاء وقتها يكون هو تعود ع زعلك وابوك يتعود ع زعلكم ومشاكلكم ومايعطيكم وجه بعدين ابوك وزوجك واحد كلهم رجال ما بيفسر الموضوع مثلنا صرخ عليا واهانني لا بيقول كلمها وهو متضايق لانه مرهق من الدوام بس هي تحسست شوي ;) خلاصه الكلام استغلي اهتمام زوجك وتدلعي شوي وبالكلام حطي نقاط ع حروف وفهميه انه الموقف مره اثر فيك وانك تضايقتي وو اتوقع كذا رح تستفيدي اكثر من ان اهلك يدرو لانهم مارح يوزنو الموضوع صح انا انهم يزعلو ويكبروه او يضحكو ويمشوك باي كلام :) |
رد: رفع صوته علي أمام أختي
عزيزتي عنود شكرًا لحرصك ولردك
هو عصبي وأنا اتحمله جدا ومكبره دماغي والله وتصير مواقف ينكد علي بطلعة والا بسفره والا اي شيء .. لكني والله ولا مرة كبرتها مرة بثاني عيد لنا مع بعض تونا صاحين ولابسين ومبسوطين ركبنا السيارة رايحين نعايد اهله وصار موقف اتفه اتفه من التفاهه وصرخ علي وجلس يهاوش ! تخيلي بصبحية العيد !! مع ذلك والله ماكبرتها ولا اي شيء .. لما رجعنا البيت اعتذر مني وقلت له حصل خير وانتهى الموقف . وموقف ثاني باخر سفرة لنا كنت اقوله نروح بالمترو وهو يبغى تاكسي المهم واتفقنا نروح بالميترو ونرجع بالتاكسي وهو ماشي بالميترو ويسحب عربية بنتي وبمدخل المترو علقت رجل بنتي بالباب وهو يسحب بكل قوته والبنت تبكي بقوه والسيكيورتي يصرخ عليه بلغتهم يبلغه برجل بنتي العالقة .. المهم نبهته بسرعه وانتبه وطلع رجلها .. طبعا حط الحرة بمين ؟ كالعادة فيني انا :) وهزءني وكله صار بسببك ومدري ايش ههههههه نكد علي نكد بالمترو العبرة بحلقي وش دخلني انا !! ومع ذلك والله ماكبرتها قلت له نرجع للاوتيل وعطيته لطاقات المترو وعلمته اي واحد نروح له لكنه تندم وقالي خلينا نروح للمول . ورحت والله ولا كبرتها ولا اي شيء ! بس ما اقدر والله ماقدر امشي صرخته علي قدام اختي كرامتي ماتسمح |
رد: رفع صوته علي أمام أختي
هل في قرابة بينك و بين زوجك كإبن عّم أو ابن خال ؟
أختك كم مره تجيكم عادة في الأسبوع أو الشهر ؟ و كم عمرها ؟ و كم أعماركم أنت و زوجك ؟ اشتغلت تحقيق شوي |
رد: رفع صوته علي أمام أختي
ياااااااااغاده ياحبيبتي مشاكلك بسيطه
انا قبل اسبوع تقريبا ماكنت ابي اتكلم بموضوعي بس علشانك بقول زوجي يكلم اخوه انا وحده عندي فوبيا من الحشرات وشفت حشره ههههههه حتى مادري ايش شكلها حشره وبس ركضت له كان يكلم اخوه قلت تعال شوف الحشره قام يتتريق يقول لاخوه زوجتي تقول فيه حشره خايفه منها ههههه المهم لما انا برجع بروح اشوف وين راحت كررر ثلاث مرات كلمة خلاص بصوووووووت عالي وانا امشي وقتها واسحب ولدي معاي انا قلت لك طيب خلاص من اول مرا مالحيت عليك ماجلست اقوله قوم علشان كذا مستغربه ليه سوا فيني كل هذا واطالع فيه مذهوله منه الرجال يرفع صوته ويقول خلاص يعني روحي بكمل سالفتي واخوه على الجوال سكت رجعت جلست جاء يسوي نفسه يكلمني ويضحك معاي ويقول وينها بذبحها انفجرت عليه مافيه كلمه ماقلتها خمسه ايام وجهي بلاستيك ولا اضحك ولا اكلمه ولا اطالع بوجهه ولا كأنه مو جود والله انقلبت عليه مرا وحده عفت انحرقت،،انتي اقلها اختك لاكن انا اخوه!!!ايش بيقول اخوه؟،!بيقول شكله على طول كذا يعاملها؟!صح ولا لا المهم الرجال وراي وراي بكل مكان ومنحرق ماعطيه وجه هههههههه ويحاول يضحك اي شي بكل رسميه ابغاه يجيبه وهو ساكت هههههههه مايقول لا ويضحكني يبغاني اضحك ولما خلاص لميت الموضوع ورجعت اكلمه واسولف لكن للان بحدود ابيه يحس وطبعا مارفعت صوتي لما فهمته لا صح انفجرت وبان قهري بس صوتي عادي وما كشرت وجهي لا ندم ندممممم والله مرا انتي خلي الموضوع لصااااااالحك انا لو بتكلم بمواضيعي اكيد بتقولين كيف متحمله عصبيته عصبي مرا زوجي بقوووووه مواضيعك هذي ولا شي عندي مو معاي بس حتى مع اخوانه عصبي اعوذ بالله ههههههههههههه مايحبون يتفاهمون معاه على الرغم عمره 33وانا 25 يعني الي مثله واعي يكون بس ايش اسوي خف لاني انا اطنشه واقلب كل شي لصالحي مادخل الغرفه واقفل على نفسي لا لا ولا ارد عليه ابدااااا سسسساكته اسوي القهوه والشاي واكلي بس هو ماكانه موجود معاي بيبي شي طيب وانا ساكته هو من داخله ينحرق اني مو معطيته وجه وبنفس الوقت مارديت ولا رفعت صوتي ولا شي حتى لما يجي واكون مشغوله ادخل الغرفه اقول السلام بس مو اسولف ساكته واطقطق على الجوال واضحك مع اي احد هو ينقهر ماطالع حتى فيه ولا نظره مني ههههه عرفتي انتي اعرفي كيف تمتصين غضبه والكوره تكون بملعبك على كيييييفك ههههههههههه اسلوب تكتيك😂😂😂😂😂😂😂😂😂ساعات ودي يعصب عليه فيه اشياء ابغاها علشان انا مارد وعاد يعتذر وابدا اتدلع😝😝😝 هههههههه علشان وهو مغمض يجيبها لي نهائيا ماكنت ابي اطرح موضوعي لانه يغثني ههههه بس ابيك تشوفين |
رد: رفع صوته علي أمام أختي
اقتباس:
واخر مرة زارتني اختي كانت قبل 3 سنوات تدرس بالجامعة وغير متزوجة انا 26 وزوجي 31 |
رد: رفع صوته علي أمام أختي
أحياناً على كثر الزيارات بين أهل الأزواج يأخذون على بعض
و كذلك أحيانا بسبب القرابة و أحيانا بسبب العمر فيكون الزوج ينظر لها على أنها صغيرة في سن أخته الصغيرة أنا لا أقول أن ما فعله شيء طبيعي و لكن تفكير الناس و طباعهم يختلف بين الأخوان الذين ولدوا من بطن واحد نصيحتي لك لا تدخلي و الدك في الموضوع و لكن جلسي مع زوجك جلسة مصارحة و حدثيه باللي في قلبك كله و قولي له أنك ما تعرفين إِيش ممكن يكون ردت فعلك في المرة الجاية لأن الموضوع بالنسبة لك كبير و ما تقدرين تتحملين هذا الأسلوب هذا الأسلوب بيأثر على حياتنا و يطلع أسرارنا برا لأن الموقف صار قدام شخص غريب حتى لو هي أختك لكنها تعد من برا عشكم الأُسَري ومثل ماهو ينتظر الإحترام و التقدير يزيد بينكم و خاصة قدام أهله كذلك أنت تنتظرين هذا وفقك الله |
رد: رفع صوته علي أمام أختي
اقتباس:
|
رد: رفع صوته علي أمام أختي
اقتباس:
من كثر ما يشوفهم عنده -أحيانا- بعض الأزواج لا ينحرج من أخوات زوجته ساعتها ممكن يتعامل مع زوجته كأنه ماحد غريب موجود كأنه هو وزوجته و أطفاله فيأخذ راحته في كل شيء الكلام المشاكل و الصوت و ممكن حتى الغزل يجلس يتغزل في زوجته قدامهم بعكس لو كانوا قليلي الزيارة و لا يراهم كثير سيراهم غرباء عنه و لا يكسر الحواجز بينهم و البعض من كثرة الزيارات يمل و يعمل هذي الحركات (خاصة افتعال المشاكل) يوجه فيها رسايل لزوجته و أهلها إنه متضايق من هذا الوضع و طبعا بعضهم على نياتهم و عفويين يأخذ راحته في كل شيء و في كل مكان و امام أي حد و بعضهم من حيائهم مستحيل يعمل أي شيء من هذا هذا و الله اعلم |
رد: رفع صوته علي أمام أختي
اخوي محب السنة عجبني رأيك منطقي
بصراحة الاحترام المفروض يزيد بين الزوجين اكثر امام الاخرين ،،،والزوج احيانا ينسى نفسه خاصه اذا كانت شخصيته عصبي ،، لازم الزوجه تحذره ويكون فيه حدود امام الناس حتى مايتعود او يكررها،،،بارك الله فيك...... |
رد: رفع صوته علي أمام أختي
احس كبيرة تقولي لوالدك
لانك في كل مرة تمشي له وتسامحيه فعليه الموقف انتهى. فالمسامحة تعني ان قلبك صافي له و الموقف عدى على خير فيبقى لديك الموقف الاخير فقط. فهل يستحق الامر اجتماع مع والدك لاجله؟؟. طبعا معك حق بالزعل رأيي صارحيه. قولي له يا فلان انا مرة صار بخاطري انك صرخت علي امام اختي انحرجت كثير. انا عارفة انك متعصب و انا غطاء لك. لكن حسيت بكسرة كرامتي امام اختي و انت ما ترضاها. و من هالكلام ورتبي الكلام حسب ما يتقبل هو و معرفتك لشخصيته و اللي قالو لك اعتذري ما عندهم سالفة |
رد: رفع صوته علي أمام أختي
انا ماقلت عادي الوضع والاحترام طبعا مطلوب بين الزوجين هذا شي مفروغ منه
ولكن كلامي على تصعيد المواضيع بشكل مايتناسب مع الخطأ نفسه يعني رجال وصحى معصب من صوت بنته ورفع صوته صح خطأ ولكن مو هذاك الخطأ اللي عشانه تدخلين اهلك والا تروحين لبيت اهلك عشانه وخصوصاً اصلا مافيه اللفاظ مهينه او مد يد او غيره اذا كنتي تظنين ان ماراح يصير اخطاء منك او منه فانتي غلطانه ولو كل خطأ اشتكيتوا لاهلكم معناته تحكمون على بيتكم بالخراب هذا رأيي انا وانتي حره الله يهدي النفوس ويوفق الجميع |
رد: رفع صوته علي أمام أختي
اخي الكريم
محب السنة التعود على الأشخاص ووجودهم لا يلغي الاحترام انا بيت اهلي جيراننا و حصل ن سافرت انا وزوجي معهم اكثر من مرة فلك ان تتخيل مدى التعود لكن مستحيل سواء مني او من زوجي ان نظهر انفعالاتنا او اي تعصيب او غضب أمامهم. ليس الامر باتفاق. لكن هذا شيء طبيعي و احترامي له ولي ان لا نظهر امر خاص. زعل غضب غزل. أمامهم. لذا اجد كلامك غير صحيح ومنطقي. لا اقصد انه بغير منطقي انه لا يحدث عند بعض الأشخاص بلى يحدث. لكنه تصرف خاطئ |
رد: رفع صوته علي أمام أختي
أختنا الفاضلة مسز داني
أنا قلت أنه غير طبيعي و كذلك ذكرت بعض الأسباب التي تجعل البعض يعمل مثل هذه التصرفات حتى الواحد ممكن يفهم ليش زوجي أو زوجتي تتصرف مثل هذه التصرفات و لم أقل أنه صحيح أو منطقي و لكن طباع الناس تختلف و كذلك أرى أنه غير صحيح حفظ الله لك عائلتك و أدام عليكم نعمة الإنسجام و التفاهم وفقك الله |
رد: رفع صوته علي أمام أختي
ياليت كنت منهية الموضوع من بدايته
ياليت مانتظرت 6 سنوات والضحية بنت وحامل بطفل آخر . هذا كل افكر فيه اليوم. والدي اعتذر عن الحضور لظروف حصلت له ، وهو قبل شوي جايب لي ايسكريم وانا بسجادتي بعد صلاة المغرب قال لي هذا ايسكريم الاعتذار !! حطه عندي وراح الى متى ؟! ما ابغى ترضية ولا ابغى اعتذار ، ابغى يرد لي اعتباري ويوعدني ما يكرر هالشيء من كل قلبه . هذا اللي ابغاه ويخلي اسكريمه له |
رد: رفع صوته علي أمام أختي
مالي خلق ولاشيء .. اهله عازمينا ع العشاء ومالي خلق ابد
راسي بينفجر وعيوني مورمه من كثر مابكيت ولا لي خلق اشوف اهله بالذات وانا كذا مزاجي |
رد: رفع صوته علي أمام أختي
ليه ماتتفاهمين معه انتي بنفسك بدون ماتكبرين الموضوع وتدخلين اهلك تفاهمي معه بنفسك اذا مانفع دخلي ابوك لنه من كلامك واضح يصارخ ويعصب عليك بعدين يراضيك وترضين هو يفكر مثل قبلها راضيه الأفضل تتفاهمين معه بنفسك اذا كررها كلمي ابوك
|
رد: رفع صوته علي أمام أختي
الأخت غادة
شاعر بألمك لكن لو تهدين أعصابك و فكري بروية ستجدين مشكلتك صغيرة ما تستاهل هذا كله أحيانا الشكوى و الحديث في المشكلة بدل من أن يكون علاج الهم و تنفيس للنفس يكون مثل رش الملح على الجرح و يزيد و يكبر المشكلة لا تكبري الموضوع في راسك و لا تجلسي حالسة عقلك في هذا الموقف الضيق فتضيقين على بيتك و وزوجك و عيالك و قبل هذا نفسك وفقك الله |
رد: رفع صوته علي أمام أختي
لا تكبرين الموضوع كان قلتي اه ام جاب الايسكريم ووضحتي اللي بخاطرك وقولي له انا ماترفع صوتك عليه
وخلاص تري انتي تعبتي كمان |
رد: رفع صوته علي أمام أختي
مدري هو أنا الوحيدة اللي حاسة إنك مكبرة الموضوع بشكل اوفر مرة ..حاسة إنك ماشاء الله حياتك خالية من المشاكل لدرجة تبغي توصلي موضوع زي هذا لأبوك .. ماسار لامدة يد ولا ألفاظ مهينة ولا غيره على ايش ياغادة عيونك منفخة من البكا وأعصابك تلفانة هدي ياحبيبتي ترى اللي كانت قاعدة اختك سترك وغطاك وإذا سار الموضوع قدامها مايحوج ابدا اللي انت تسويه الله يصلح حالك .
|
رد: رفع صوته علي أمام أختي
واضح من ردودك ان صغيرة في السن
او صغيرة في العقل بكل بساطة دامه يحاول يراضيك , امسكيه على جنب وقولي اللي جالسة تقوليه هنا ,, ردودك تبين انك مدلعة مع احترامي وما تعرفي تتصرفي في مواقف زي هذه ,, يعني هذا مجرد صراخ ,, طيب لو مد يده ولا سبك ولا سوا شي اكبر من كذا ,, وش بتسوين ؟ بتخلعيه؟؟ كبري عقلك شوي انتي الان أم , المفترض عقلك اكبر من كذا جيل غريب |
رد: رفع صوته علي أمام أختي
اقتباس:
اقتباس:
|
رد: رفع صوته علي أمام أختي
اقتباس:
غادة لا تخلطين الأمور ولا تشربكين المواضيع. خطأ زوجكِ في حقكِ شيء .. وعلاقته بوالدكِ شيء آخر. واحترامكِ لزوجكِ وأدبكِ معه مردّه في الأصل إلى أخلاقكِ وتربيتكِ .. وليس مجرد رد فعل .. فإن احترمكِ احترمتيه وإن طوّل لسانه طوّلتي لسانج. تقولين: (إذا كل مرة نفس رد الفعل فما راح يردعه هالشي) أنا افترضت أنها المرة الأول .. فهل صرخ عليكِ أمام أحد قبل هذه المرة؟ إذا لا .. فلا يصح تصعيد الموضوع بشكل مبالغ فيه .. مع حقكِ في الزعل وأخذ موقف. وبصراحة لا أفهم لمَ لم تتحدثي معه لحد الآن؟ .. ولمَ لم تفصحي عما في صدركِ وأن ما فعله أمر كبير لا يصح أن يتكرر؟! تريدين أن يعدكِ بألا يكرر ما فعله؟ .. طيب تكلمي معه وبيني مدى تأثركِ واطلبي منه وعداً بألا يفعل هذا مرة أخرى. |
رد: رفع صوته علي أمام أختي
المشكله
انتهت والسالفه ابردة ماله داعي ترجعين لها لانك ماراح تستفيدين شيء المفروض من سمعتيه صارخ سكتي بنتك وارسلتيله تصارخ علي قدام اختي يصير خير من وقتها وفي الليل تفاهمتي معه وحليتيها مو تسكتين وتعيشين نفسك دور الضحيه وتبكين وكاتمه بنفسك ادري الموقف يقهر بس مايستاهل كل هالاكشن |
رد: رفع صوته علي أمام أختي
لاتدخلين اهلك نصيحة راح تكبر السالفة وتعظم 😢
|
| الساعة الآن 03:48 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©