|
طليقي يريد ارجاعي بلا مهر
السلام عليكم
اتمنى من الجميع ان يعتبرني مثل اخته ... ويرشدني لما فيه خير لي ، انا تزوجت وجلست عند زوجي شهرين وكان فيه عيوب وايجابيات مثل إي انسان " ثم تطلقنا بسبب تدخل الأهل ... ] طبعا المشاكل اللي كانت بيني وبينه تافهه جدا لكن مع تدخل اهله واهلي كبرت ووصلت للطلاق قدر الله وماشاء فعل فعل الان صار لي منفصلة اربع سنوات وهو جاء عند اهلي يبغى يرجعني .. واستخرت وشاورت اهلي والناس المقربين مني ووافقت ثم بعد ماقالو له اهلي اني موافقة وسألهم عن شروطي قالو .. تجيب شقة لحالها ومصروف شهري ومهر عشر الاف ووافق على كل شي الا المهر يقول ماقدر اجيب لان ماعندي شي الا حق الشقة بس ( وهو صدق عليه ديون واقساط ) وقال خليها تفكر ... ( انو ترجع بدون مهر ) وبعد اسبوع اتصل على امي وقال شرايها قالت امي نفس شروطها الاولى قال ملزمه ان تبي عشرة الاف قالت امي ايه قال الله يوفقها بواحد غيري وقفل الخط عمري ٢٤ سنه وهو من يوم ماطلقني ماتزوج ابي رايكم باللي صار بصراحه واعتبروني زي اختكم انتظر اجوبتكم 💕 تم تعديل العنوان ليتناسب مع المضمون |
رد: انا وطليقي
راينا ترجعين له والمهر ممكن يتخفض للنصف الرجل جاي وصادق بجيته وشي تعرفينه احسن من شي ماتعرفينه
|
رد: انا وطليقي
المتواضع305
اشكرك على الرد ... لكن هو انهى الموضوع وقال الله يوفقها بواحد غيري |
رد: انا وطليقي
الله يسعدكم تفاعلو معي 💔💔💔
|
رد: انا وطليقي
خلي احد من خوالك ولا عمامك القريب منك يكلمه بعيد عن اهلك
يعني يكون الامر بينك وبينه بواسطه الخال او العم سواء حلو الامر او لا يكون بسريه الله يوفقكم |
رد: انا وطليقي
لاترضي تتزوجي بدون مهر
المفروض يطلب تقليل المهر مو يقول اتزوجها بدون مهر !!! هذا يبى يرجعك بدون مايدفع مهر والمهر واجب عليه، وواجب يدفعه لو ريال ! |
رد: انا وطليقي
انا شايفه امك لسه متدخله بحياتكك امي قالت وامي قالت طب انتي اش رايك تبي ترجعي بدون مهر بيني رايك وارجعي لزوجك .. اما اذا بتبقي كذا امك متحكمه فيكك ف لاترجعي لو وتبلشيه
|
رد: انا وطليقي
اقتباس:
الله يجزاك خيرررر ياعمري والله المشكلة ماعندي عمام وخالي ماقدر اقوله احس صعب |
رد: انا وطليقي
اقتباس:
صح كلامك ... وهذا المفروض يصير .. لكن مابيدي شي الله يسعدك بقدر ما سعدني ردك حبيبتي . |
رد: انا وطليقي
عندك اخ كبير يكلمه!!
مرات احس الكبار يعقدو المشاكل وبصراحه عني انا ارضاها لنفسي ارجع بدون مهر في حاله كانت اخلاقه جيدة والطلاق سببه تهور او سؤ فهم مثلا |
رد: انا وطليقي
اقتباس:
الله يسعدك حبيبتي ويجزاك خير .. لا بالعكس امي مو متحكمه بحياتي ولا شي ؛ صحيح امي تتواصل معاه عشان توصل كلامي له لا اكثر لاني ماقدر اتواصل معاه بحكم انه طليقي |
رد: انا وطليقي
حبيبتي لازم مهر خير إن شاء الله بدون مهر
لاترخصي نفسك يعني لو انه في النص وقال راعو ظروفي وقللو القيمة لكن هذا يبغ ببلاش ليه خير ؟ انتي اللي اتطلقتي وانكسرتي من حقك يجبر كسرك ويعوضك ولو انه مافي شي يعوضك واذا مايبغ الله يوفقك وهو لو خطب وحده ثانية بيدفع مهر كامل مكمل مع طقم وكااااااافة مطالب الزواج |
رد: انا وطليقي
اقتباس:
اي عندي اخوان ، انا عشت معه فترة اني كنت ( عروس ) ماعرفته زين .. وانا بالنسبة لي عادي ارجع بس بمهر ولو قليل احس صعبة ارجع كذا ... بدون ولا شي مو طمع مني لا ... لكن شي قليل ارضى فيه ... |
رد: انا وطليقي
اقتباس:
كلااااامك ع الجرح مدري شسوي محتارة .. والله صار لي يومين جالسة بدون شي بس افكر .. ذبحني التفكير فكرت اني اتواصل مع اخته .. بس بعدين اتراجع احس اني اهين نفسي مع انه دايم يكلم اخوي يبيني ارجع اكثر من مرررة ... وشكررررا لك حبيبتي على تفاعلك معي 💕. |
رد: انا وطليقي
اتمنى احد يقرا موضوعي يتفاعل معاي ....
بليييز واتنمى منككككم تحطون نفسكم بمكاني وتجاوبون !! |
رد: طليقي يريد ارجاعي بلا مهر
اخوك ايش كان رده لما كلمو عشان يرجعك؟؟
|
رد: طليقي يريد ارجاعي بلا مهر
اقتباس:
اخوي اكثر واحد موافق اني ارجع |
رد: طليقي يريد ارجاعي بلا مهر
خلي اخوكِ يكلمه انك موافقة ترجعي
لكن لازم بمهر و خليه يسأله كم يقدر يدفع ؟! وكمان يتناقش معاه انه المهر شرط أساسي لعقد النكاح . اصلا اللي بيعقد لكم راح يسأل عن كم المهر ولو عرف انه مافيه مهر بيرفض يعقد. |
رد: طليقي يريد ارجاعي بلا مهر
في الشرع واجب على الزوج يعطي مهر
واجب يعني مو على مزاجه وكيفه يعطي أو لا حتى الفقير والمعدم يعطي مهر على حسب استطاعته، وفيه حديث لرسول الله صلى الله عليه وسلم قال للصحابي : التمس و لو خاتما من حديد .. ما أسقط عنه المهر لعدم استطاعته. وهذا مايبى يدفع شي ، أحس انه مستخسر يدفع !! تتوقعي لو بيخطب بنت ثانية راح يقول لأهلها نفس الشي ؟! |
رد: طليقي يريد ارجاعي بلا مهر
كم راتب زوجك؟
بصراحه ما أشوف 10 آلاف كثيره وهو لو بيتزوج بيدفع للي بيتزوجها أكثر من هالمبلغ بمرتين على الأقل ، صح لو لا؟ |
رد: طليقي يريد ارجاعي بلا مهر
اقتباس:
ليس شرطا ان يكون المهر عاجلا كله .. من الممكن ان يكون اجلا ويصبح دينا عليه يستحق عند احد الاجلين لو عاد شوفو ممكن يدفع كام عاجل ورحلو الباقى كمؤخر صداق .. |
رد: طليقي يريد ارجاعي بلا مهر
اقتباس:
لانه اصلا الشيخ مايكتب العقد الا بوجود مهر ولو ريال اما الاخت صاحبة الموضوع بعيد عن الامور الماديه المهر وخلافه هل طليقك فيه مميزات تخليك تفكري ترجعين له وتكرري التجربه من جديد اذا الجواب نعم فـ ارسلي له انتي رساله بموافقتك وخليه يجي والامور الماديه اتركيها على جنب ولاتردين على اللي يقولك ترخصين نفسك وهالكلام الا اذا انك شايفه نفسك سلعه وقيمتها على حسب اللي يندفع فيها فـ الانسان يعز نفسه ولايحط قيمته فلوس ومن يدفع اكثر هو اللي يستاهلني كذا يصير الموضوع بيع وشرى مو زواج ابداً ولكن مثل ماقلت لك الحين انتي ركزي على ايجابياته وسلبياته وشوفي وهل تعلمتوا من الدرس وعرفتوا اخطائكم هذا المهم |
رد: طليقي يريد ارجاعي بلا مهر
اقتباس:
استخير ي أكثر ربي يرزقك الزوج الصالح |
رد: طليقي يريد ارجاعي بلا مهر
اقتباس:
شوفي هل انتم مناسبين للعودة لبعض و تعلمتم من الدرس والطلاق او لا .. المسالة ماهى مهر فقط وان كان المهر يدل انكم لازلتم مختلفين .. اما الاخ هنا لست اعلم من الله تعالى حين جعل المهر حق للمراه فيه كرامتها ( واتوا النساء صدقاتهن نحلة ) اى فريضة واجبة .. والاننسان يعز نفسه عن شي ليس من حقه ، اما حقه فما يسمى تركه عزه . |
رد: طليقي يريد ارجاعي بلا مهر
اقتباس:
اولا اشكرك على ردك الجميل .. الله يسعدك يارب المميزات والعيوب اللي فيه مثل اي انسان عادية جدا واحب اذكر انه كان يقول انه سعيد معي ومرتاح وماتوقع انه بيتزوج وحدة نفسي وبعد ماصارت المشكلة ( اللي سبب تدخلها الاهل) وبعد ماصريت انا على الطلاق ... قالي انا بطلقك لكن مستحيل اتزوج غيرك ومستحيل القى مثلك لكن انتي الله يوفقك باحسن مني وقالي انتي تزوجي وشوفي نصيبك وانا ماراح اتزوج ..... وبعدها تطلقنا ومرت سنين بنكمل الان خمسة سنوات متطلقين ... ) وهو اسمع من الناس انه مايبي يتزوج وفعلا الى الان لم يتزوج مع ان بنات قرايبه يبونه وهو رفضهم وهو قال لاخوي يوم جاء بيرجعني انه ندم على الطلاق و قال هذاك الوقت ماقدرت اتفاهم بسبب المشاكل والضغوط وحابه اعقب اخوي على كلامك اني اراسله واقول انني موافقة هو خلاص قال الله يوفقها بغيري ؛ شلون ارسله بما انه انهى الموضوع ابي مشورتك .... بما انك رجل ويمكن تفهمه اكثر مني |
رد: طليقي يريد ارجاعي بلا مهر
اقتباس:
اشكرك على تفاعلك معاي ... الله يسعدك بقدر ماسعدتيني بنتظر شوي .. وبعدين افكر هل ارسل اخوي او اسوي حل ثاني |
رد: طليقي يريد ارجاعي بلا مهر
اقتباس:
كلامك صح واشكرك عزيزتي على ردك الجميل 👍💕 |
رد: طليقي يريد ارجاعي بلا مهر
اقتباس:
اشكرك عزيزتي والله على تفاعلك وردك الحلو 💕 وبالنسبة لي تعلمت اني مادخل احد بحياتي على مشاكل تافهه والمشاكل التافهه تصير كبيرة وهو ( طليقي ) يقول انا قبل ماقدرت اتفاهم بسبب الضغوط والمشاكل بين اهله واهلي ويقول اذا رجعتها شرطي الوحيد ( مابي احد يتدخل بحياتنا ) وبس والله ... |
رد: طليقي يريد ارجاعي بلا مهر
اقتباس:
اشكرك سديم الذكريات على ردك ودعوتك لي جزيل الشكر ممكن انه شر وصرفه ربي وممكن انه يتغير او يغير رأيه الله اعلم ... دعواتك لي اختي 💕 |
رد: طليقي يريد ارجاعي بلا مهر
اقتباس:
وياليت صاحبة الموضوع تجي تفهمنا ايش المقصد من سالفة المهر، هل انه رافض يدفع المهر كله قليل ولا كثير؟! أو رافض يدفع 10 الالاف ويبى يدفع اقل؟! المسألة يا أخي مو مسألة الوحدة تسعر نفسها بفلوس لكن المهر حق للبنت ومايصير تتنازل عنه وهذا حق ربي كفله لها وانا ماقلت انه المهر قليل ولا ناقشت على المبلغ نقاشي على إعطاء المهر فقط وانه لازم يعطي مهر لو ريال |
رد: طليقي يريد ارجاعي بلا مهر
اقتباس:
اهلي يوم قالو له عن شروطي ومن ضمنها المهر قال عندي ديون واقساط وبأخذ قسط ثاني عشان ازين الشقه واثثها اذا هي بترجع وبس ماقدر اجيب شي ثاني وبعدها باسبوع اتصل ع امي قال هي مصره على عشر الاف قالت امي هذا كلامها قال الله يرزقها بواحد غيري |
رد: طليقي يريد ارجاعي بلا مهر
ما اشوفه متمسك كثير !
تدخلات الاهل انتم سببها ما تشوفي 5 سنوات كثيرة في الانفصال ؟؟؟ اعتاد على بعدك وما عاد تفرق معه برأيي انت أدرى لاني لما خليت نفسي مكانك أنا أعرف وش المشاكل اللي وجوهني فيها اهلي واهله وصارت حياتي بين أياديهم وتسببت في طلاقي - فأنتي حكمي المشكلة اربع سنوات او خميس عمر صارت لا تكلمي اخته وصلي الكلام لأمك او لاخوك خلهم يتصرفوا والله يعينك |
رد: طليقي يريد ارجاعي بلا مهر
أختي نفسي أناقش معك أشياء كثيرة بس ما عندي وقت ، لكن بحاول اكتب حلول فكرت فيها بعد قراءة الموضوع
اولا : انتي عارفة انو طلبك للمهر حق لك وانو هذا اقل شيء تطلبينه بعد هالسنين، مو كتعويض لك ، لكن حق . وعندك أسباب كثيرة خلتك تفكرين كذا ومنها ممكن انك عارفة ان مبدأ المال مهم لزوجك وتريدين معرفة اذا كان سيدفع هذا المبلغ لإرجاعك. تصرفك ب وضع 10000 لم يكن مخططا ومدروسا؟ أليس كذلك بل كان قرار بمثابة انه شيء عادي وانه ان ارداني سيدفع. عموما لست هنا بغرض التحليل الذي لن اكتفي منه ولكن هذه بعض من الحلول : - اتركيه فترة بسيطة ، لمعرفة قيمتك فهو الآن يفكر مثلك ويقول لو ارادتني لكانت وافقت بأقل وهي تعلم ظروفي ولكن ربما خير، وربما يشعر بالندم للحظات. - اجعلي وسيط من المعارف قريب لكم وياليت لو محرم ، يذهب اليه ويقول( شوف يا ولدي انا اعرف انك رجال طيب ، ومحترم وسمعت انك بغيت ترجع فلانة وهذا شيء طيب وفرحت جدا بسماع هذا الخبر ، لكن لما اتكلمت مع الأهل استغربت لما قالوا ماصار شيء! وبيني وبينك يا ولدي انا جلست مع البنت وقلت لها ليش يا بنتي تبغين عشرة آلاف انتي تعرفين ظروف الرجال وهو كان زوجك ورجلك ، ليش ما قبلتي بأقل ! قالت والله يافلان انت تعرف كيف الأسواق الحين غالية وانا لما برجع ابشتري فساتين ومكياج ويادوب ال عشرة تكفي ، انا ما طلبتها كذا ابيها عشان أتزين فيها ويشوفني قمر. وانا يا ولدي أبقولك أني أقنعت البنت وقلت لها اشتري من الرخيص وعفي الرجال واررجعي لبيتك وحياتك وهي وافقت بس قالت لازم مهر وانت شوف كم يمداك تعطي وحتى انا بساعدك لو تبي وسددها لي اقساط بعد كذا (اذا كان محرمك يقدر )، والله أني ما ودي الا الأجر والإصلاح وعسى ربي يكتب لي اجر بإرجعاكم لبعض). عموما .. الأهم من هذا كله الاستخارة وكلام الأخ الوحيد ، هل فعلا الرجال يستاهل ؟ لا تجعلي قرارك وليد المشاعر بل فكري بعمق فيه وهل هو رجل تتمنينه زوج لك؟ من وجهة نظري اشعر انكم متوافقون تماما ، لكن فكري. |
رد: طليقي يريد ارجاعي بلا مهر
اقتباس:
اعرف ان المهر حق للزوجه ولكن لم يحدد مبلغ المهر في الشرع بل ان الدين يحث على تقليل المهور وقول رسول الله صلى الله عليه وسلم اقلهن مهراً اكثرهن بركه فـ لو كان ريال هذا يعتبر مهر ولاينقص من قيمة الفتاه بل يزيد اما مانراه الان من تسليع المراءه بهذا الشكل المقزز اي عقل سليم يرفضه وللاسف ان النساء انفسهن هن السبب في تسليع المراءه وتقليل قيمتها بهذه الافكار لاترخصين نفسك .. الخ |
رد: طليقي يريد ارجاعي بلا مهر
اقتباس:
يقصد انه مايقدر يدفع وشاف امك مصممه على المبلغ فقال الله يوفقها فلو ارسلتي له راح يجي |
رد: طليقي يريد ارجاعي بلا مهر
انا من وجهه نظري ان تتعاملو ما الموضوع ببساطة وشوي مرونه
بما انه الطلاق صار لاسباب تافهه وانتي من طلب ولطلاق ماشوف انكم انكسرتو ^^ اكثر منه .. نقول كسرها ولازم يجبر كسرها في حاله انه طلقها او تسبب باذيتها لفضية او جسديا .. الموضوع خلي اخوك يتصرف ويتنازل شوي عشان ينحل التراضي لان والله حرام تضلو كذا راح من عمركم 4 سنوات وانتو منتظرين ايش؟ بعدين انتي قلتي وافق على كل شروط الا المهر ايش كانت شروطكم هل هي مكلفه ؟؟ هل كلفتوه كثير في عرسك السابق؟؟ محدثتك جاراتها وحده تطلقت نهايه التسعينات عشان رفض يعطيها نفس المبلغ اللي ذكرتيه تماما والسالفه كلها عناد وتدخلات الاهل واكاد اجزم انهم الحين ندمانين اشد الندم اقصد الرجل وزوجته والاخرى طلبت طلاقها بدون سبب واضح انتظرها فتره واخر شي تزوج زعلو اهلها رغم انهم خسرو كثير في عرس وطالبو بطلاقها بطريقه مزعجه اخر شي ماحد يتحمل مسوؤليه الا البنت لا تفرطي بطليقك دام كذا موقفه ايجابي معك وشاريك 😊☺ ادري ان كلامي ملخبط بس حسيت موضوعك يهمني امكن لانه تكرر كثير عندنا كثير .بنات جيل تسعين يتزوجن كم شهر ويطلقين والكل يتدخل هههه مع انه الرجاله مهددة بالانقراض من الحروب اللي دخلت علينا من كل صوب |
رد: طليقي يريد ارجاعي بلا مهر
اعذريني ع اخطاء املائيه مواصله من امس ..
ولا تفهمي من كلامي انك تتنازلي عن مهر .. المهر من حقك بس جيبو حل يرضي الطرفين مو كل احد يشد من صوب وتعاندو |
رد: طليقي يريد ارجاعي بلا مهر
1) ادرسي إيجابيات وسلبيات هذا الزوج السابق بشكل عميق ومستمر خلال مدة 3 أيام قادمة، خصوصاً وأنك قد قضيت معه مدة زمنية معينة.
2) قارني بين إيجابياته وسلبياته. 3) استخيري كثيراً مع الدعاء. 4) إذا قررت الموافقة فافهمي جيداً هذه الأمور: أ- المهر حق شرعي للمرأة سواء كان كثيراً أو قليلاً. ب- يحق للمرأة التنازل عن المهر. ت- لا بأس بالتنازل عن نصف المهر المحدد أو ثلثيْ المهر أو توزيع المهر ما بين مقدم ومؤخر. ث- يجب أن يذهب رجل عاقل حكيم لهذا الزوج السابق؛ حتى يجس نبضه، ويفهم مراده، ويوضح له أنه سيكون وسيط خير معكم، وهكذا. ج- أقترح ذهاب أخيك إليه للتفاهم، وهذا لا ينزل من قدركم أبداً؛ لأن أخاك ونحن معه نريد مصلحتك. 5) لو اضطررتم للتنازل أكثر نوعاً ما فلا بأس إن كان الرجل يريدك وتريدينه. |
رد: طليقي يريد ارجاعي بلا مهر
10 الاف ليست بالمبلغ الكبير
وعليه اقساط وديون وهو لاعيال ولا مسؤوليات ولا اجار ولا شي وبيتدين زياده علشان يستأجر شقة ويأثثها ؟ هل وضعه المادي جدا سيء الى هالدرجة اقل شي يطلب 5 اشهر يجمعها كل شهر 2000 ماحد بيقبل يزوج بنته او اخته ب 10 الاف لو مطلقه 10 الاف يعتبر مبلغ رمزي تتجهز فيه البنت والى متى بيستمر بالضائقه الماليه والديون انتي تمسكتي بشرطك وهو قال الله يوفقها معناها ان للان بينكم عدم تفاهم انتي تبينه يثبت انه شاريك وهو يبيك تثبتين انك شاريته بالتنازل عن المهر اضافة ان المشكله ستستمر بعد الزواج على الشقه على طول مااااش مش مريح اسلوب الزواج هذا لو اختي مااقبل تتنازل وهي حره بقرارها |
رد: طليقي يريد ارجاعي بلا مهر
اقتباس:
|
| الساعة الآن 12:57 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©