|
بعد الصلح هل اقنعه بالحمل
السلام عليكم
كيف حالكم جميعاً الحمدلله العلاقة بيني وبين زوجي تصلحت بفضل من الله سبحانه ولكن فكرة الحمل لا زالت تراودني و ارغب بالحمل وبشدة انا عمري 29 سنه يعني مب صغيره فرص الحمل تقل مع التقدم في العمر كل شي بايد رب العالمين ولكن ودي افرح بعيالي وانا بشبابي الاطفال زينة الحياة وعسى الله مايحرم اي شخص من هالنعمة اللهم لك الحمد ربي رزقنا انا وزوجي ببنت وحده عسى الله يحفظها ويخليها عمرها سنتين ونص من يوم كملت بنتي سنه كنت اكلم زوجي عن الياهال ، لانه كان ودي اييب ثاني ياهل بسرعه عشان بنتي حبيبتي تتسلى معاه ولا تبقى وحيده لكن كان يقول انتي تبين تصفينهم ورى بعض شكلج قلت له خلاص يوم تكمل بنتنا سنتين ان شاء الله انييب ياهل ثاني وعادي ماكان مبين انه متحمس للموضوع بعدين تعرفون مرت مشاكل كثيره بيني وبين زوجي وطول الوقت خلال هذه الشهور كنت مرات أكلمه والمح له عن الحمل وهذا حق من حقوقي بس دايماً يقول ان شاء الله ويطنش عقب كان يصير هجر بسبب المشاكل اللي بينا ويوم تتصلح العلاقه دايما مايكون موجود خلال أيام التبويض وكنت اطرش له رسايل مرات اذكره انه التبويض قرب بس ماكان يهتم ويوم صارت المشكله الكبيره بيني وبينه قال ما ابغي منج عيال اكثر ، مع انه من ايام الملجه كان يبين لي انه يبغى مثلا 3 ولا 4 المهم هذه الايام الحمدلله عدت وان شاء الله ماترجع هذه المواجع ف الحين بعد مارجعت علاقتنا طيبه ولله الحمد محتاره هل اكلمه عن الحمل مره ثانيه ولا ماله داعي وتتوقعون هو عارف هالشي ويتذكر والله مشتاقة جداً للحمل لما كنت اشاور امي ، كانت تقول لا ماله داعي تكلمينه انا ولا مره بحياتي كلمت ابوج عن الحمل والحمدلله يبتكم كلكم بس مهما كان ابوي غير كانت علاقتهم الزوجيه طبيعيه منتظمة انا و زوجي علاقتنا الزوجية ليست منتظمة تماماً مرتبطه بمزاجه واغلب ايام التبويض يكون تعبان او غايب عن البيت وقالت امي ان الريال يتضايق اذا حس الحرمه تبغي العلاقه عشان الياهال ( وانا اصلا ما حسسته بهالشي ) ولكن هذا حقي للعلم يوم حملت في بنتي حددت له ايام التبويض اللي لازم يصير فيها جماع والحمدلله كان وقتها سهل بالتعامل محتاره شو اسوي وكيف اتصرف هل اسكت وما اخبره عن الحمل وايام التبويض ولا اكلمه عن الحمل واذكره بأيام التبويض اخاف يتهرب ويتضايق والله اخاف اتصرف تصرف اندم عليه تعقدت من كثر المواقف اللي صارت فحبيت اخذ شوركم |
رد: بعد الصلح هل اقنعه بالحمل
من رأيي اسكتي عن الموضوع وانتي اتركي المانع وتابعي تبويضك بهدوء وحاولي تكون العلاقة بأيام التبويض بشكل عفوي .
وخذي وقتك وهو كمان ارجعوا ع شوي شوي بدون ضغوط الحمل والعلاقة والتبويض .. اوريدي انتوا متوترين مو محتاجين حاجة توتركم زيادة .. حاولي تركزين هالفترة ع الاستمتاع انتي وزوجك قضيتوا مشاكل كثير .. تستحقون انكم تعيشون حياة سعيدة وهادئة .. وخلي هذا تركيزك عليه هالفترة وبناء زواج ناجح ومستقر أهم من التفكير بالحمل . الله يرزقكم السعادة والذرية الصالحة ❤ |
رد: بعد الصلح هل اقنعه بالحمل
اقتباس:
صح كلامج اختي الافضل اصبر و عسى الله يرزقنا بدون تخطيط وبدون ما اتكلم ما نستخدم حالياً وسائل منع لكن سبحان الله مايصادف اللقاء ايام التبويض متوكله على رب العالمين ويزاج الله خير |
رد: بعد الصلح هل اقنعه بالحمل
لا تبينين له كلام امك صحيح صراحة
كل شي عفوي يكون احلى انتي حاولي و لا توترين اهم شي |
رد: بعد الصلح هل اقنعه بالحمل
لا تكلمينه ابداااا خليه على فاله
انسى الموضوع قدامه .. كثر الحن يزهقه ويخليه يمنّ في نومته معك 😂😂😂 واذا الله كاتب لك بيبي بيجي لو مره وحده بالسنه نمتي معاه |
رد: بعد الصلح هل اقنعه بالحمل
يجب ألا تلحي عليه، ولا تشعريه بأنك تطلبي العلاقة من أجل الحمل! أطلب العلاقة من أجل الرغبة به
اللي أعرفه أنه يمكنك يحدث الحمل حتى في خارج أوقات التبويض الجيد أنكم ماتستخدمون موانع وهذا شيء جميل ويريحكم أنتم الأثنين ويجب أنه مايحس أن شغلك الشاغل كيف احمل، لأنه سيصله شعورك وكأنك تستعملين للحمل أو كمكينة تلقيح انبسطي بحياتك واللي يجيب الله حياه الله، ولايصير تفكيرك كله بالحمل قدامك الايام الشهور السنوات، وانتي لسه صغيرة |
رد: بعد الصلح هل اقنعه بالحمل
إستنكار
روح انتهت Neat Man جزاكم الله خير عالرد خلاص عيل ما راح أكلمه وبشوف شكثر راح اصبر صح كلامكم ،، وكل شي بايد رب العالمين بس تبارك الرحمن اللي اعرفهم في نفس عمري عندهم من 2 الى 4 اطفال المقارنه مب زينه أدري بس لاتلوموني الحرمه دايماً تحن للياهال |
رد: بعد الصلح هل اقنعه بالحمل
حبيبتي لا تكلمينه يمكن يعند ويتعمد مابصير بينكم شي ايام التبويض
ولو الله كاتب لك ذريه منه بيجون غصب عليه لو سوى المستحيل حتى يمنعه |
رد: بعد الصلح هل اقنعه بالحمل
زوجك مطنش حكاية الحمل بسبب المشاكل وأنت بالكاد طلعت من نفقها, تبغي تدخلي معه في نفق الإنجاب الأفضل أن تأخذوا فترة استقرار وهدوء قبل الإلتفات للحمل وتأكدي أن الحمل بيد الله قبل أن يكون بموافقة زوجك فاسألي الله أن يسخّره لك وييسر لك الأمور وبطّلي كلّية طريقة رسائل التذكير بموعد التبويض,لأنّها قد تشكّل عليه ضغط نفسي منفّر,,, ولا تنسي إن كان في عمرك من عندهم 4 أطفال فهناك من لم يتزوجن بعد,, |
رد: بعد الصلح هل اقنعه بالحمل
الله يهديك متسرعة كثير
امس رجعتوا لبعض بعد فترة جفاء طويلة استمتعي بعيلتك الصغيرة و دعي الامور تاخذ مجراها دون تخطيط متى ما كتب الله انك تحملي رح تحملي باذنه و لا تضغطي على زوجك برسائل التذكير ممكن تجيب نتائج عكسية و يرفض العلاقة وقتها |
رد: بعد الصلح هل اقنعه بالحمل
ان شاء الله
معاكم حق مشكورين جميعاً ماقصرتوا الحمدلله اني شاورتكم لاني بصراحه كنت حاطه في بالي اني اكلمه بس وايد اثق في ردودكم ونصايحكم جزاكم الله خير |
رد: بعد الصلح هل اقنعه بالحمل
الله يصلح زوجك ويرزقك بالذريه الصالحه
|
رد: بعد الصلح هل اقنعه بالحمل
سديم الذكريات امين يارب جزاكم الله خير
|
رد: بعد الصلح هل اقنعه بالحمل
مساكم الله بالخير جميعاً
هههه طبعاً مب قادره اتحمل ودي اكلم ريلي عن الحمل بس تذكرت كلامكم بس احس اني ماراح ابقى ساكته ف حبيت اسألكم يعني فيها شي اذا الحرمه بينت لريلها انها ودها تحمل واتييب ياهل ثاني ليش الريال عادي يقول للحرمه احملي وهي مالها حق تطلب ؟؟؟ اللهم لك الحمد بفضل الله تعالي امورنا مستقره وعلاقتنا طيبه ولكن سبحانك ياربي دايماً وقت الاباضه يكون غايب ومايصير اللقاء الا في ايام الامان واكيد رب العالمين هو الرزاق سبحانه وانا ادعي ومتوكله على ربي ولكن الواحد يبذل الاسباب يعني وايد اعرف حريم يتفقون مع رياييلهم انه هالشهر ودهم يصير حمل فتصير العلاقه خلال ايام معينه مب كل حمل صار صدفه يعني هو بايد رب العالمين اكيد ولكن بعد ارادته يكون هناك تخطيط ومحاولات في ايام معينه وهذا اللي صار معاي في حملي الاول والحمدلله ف الحين كلكم خبرتوني لا تكلمينه لكن كيف افهمه انه ودي احمل و عن موعد ايام الاباضه اذا بتم ساكته لانه هو يغيب بالشهر لايام معينه ومايصادف انه موجود معاي هذه الاوقات للعلم اني ابدا ما كلمته ولا لمحت له عن الحمل طول الفتره الماضيه عشان ماتقولون اني احن عليه او ابين رغبتي فيه للحمل فقط لا هذا الشي مب قاعد يصير لكن انصحوني هل تحسون الوقت مناسب عشان اكلمه وانصحوني كيف ممكن اكلمه ومتى الوقت المناسب خاصة الرياييل اذا حريمكم بينوا رغبتهم بالحمل هل هالشي يضايقك ؟؟ |
رد: بعد الصلح هل اقنعه بالحمل
عادي اختي مافيها شي
قولي يا فلان ما رأيك نجيب اخ لولدنا يلعب معه ويكبروا سوا احسن ما يكون بينهم فرق ويكبر وحيد ويحس ان كنت تحبينه او من اجل الانجاب من غير ما تتطرقي لهذه النقطة موفقة |
رد: بعد الصلح هل اقنعه بالحمل
مرحباً أختي
الأصل أن الحمل والعزل قرار مشترك لابد من موافقة الجميع لكن قد يكون هناك تنازلات لأحد الأطراف فيترك القرار بيده الآخر مثلي أنا تارك قرار الحمل والعزل بيد زوجتي .. تفعل ماتريد أما بالنسبة لكِ فأنتِ تعلمي زوجك وشخصيتة وقراراته .. وفي النهاية من حقك أن تطلبي . بارك الله فيك |
رد: بعد الصلح هل اقنعه بالحمل
يا أختي لو كنت مكانك لأنتظرت سنه قبل أفكر بالحمل حتى أطمئن أنه كل شي مستقر وان الحياة بتمشي مع الزوج
|
رد: بعد الصلح هل اقنعه بالحمل
طالما أن الموضوع يشكل حساسية له لا تكثرين من طرقه , فقط حاولي تحين الفرص خلال وقت التبويض
|
رد: بعد الصلح هل اقنعه بالحمل
Wa1121
هذا الكلام اللي افكر فيه وفعلاً افكر في بنتي اكثر من رغبتي الشخصيه عسى الله ايسر الامور الرسمي شكراً لك اخوي على الافاده والمشاركه في حملي الاول كان بطلب مني وهو تعاون معاي بس مع رغبتي بالحمل الثاني ما احسه مهتم الله يسهل Mewako حالياً الحمدلله استقرت الامور بينا عشان جي فكرت اكلمه استغفر الله لا قدر الله لو صارت بينا مشاكل احس مهما كان بنتي تحتاج اخت ولا اخو تقطع قلبي يوم اشوفها تتعلق بالياهال وماتحب تلعب وحيده لك مشكله حل انا جي اسوي بس لانه كثير الغياب عن البيت بسبب ارتباطه بشغل معين ف مرات كثيره يصادف انه غير موجود ايام الاباضه فهني احتاج اشرح له واتكلم انا فكرت اكلمه هالمره اخر مره عقب خلاص ماراح احن لانه اعتبر حياتنا الزوجية رجعت مره ثانيه طبيعيه من شهر فقط لانه قبل يوم كنت اكلمه كانت علاقتنا متوتره جزاكم الله خير عالرد عسى الله يرزقكم جميعاً ماتحبونه وتتمنونه ويقضي حواجئكم كلها يارب |
رد: بعد الصلح هل اقنعه بالحمل
سبحان الله دايم كلام الامهات فيه حكمه
صح كلامها ليه تعقيد المسائل ضبطي ضروفك يكون اللقاء وقت التبويض وان شاءالله الله يرزقك من واسع فضله |
رد: بعد الصلح هل اقنعه بالحمل
اختي مبتعثه متفائله
لو انه ظروفنا عاديه نفس اي زوجين جان ما فكرت بهذه الطريقه بس لانه زوجي لازم كل شهر يرتبط بشغل معين خارج في منطقه ثانيه ومرات يتأخر اكثر من اسبوع وكله يصادف سبحان الله اوقات الاباضه انا ماراح اتكلم بس لو صادف غيابه هالفتره هني يمكن بتكلم |
| الساعة الآن 07:13 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©