|
زوجي طلقني
بِسْم الله
اولا انا اول مره اكتب موضوع لكن محتاجه استشارتكم كنت انا وزوجي بجدال ورديت عليه وكلام جارح بيني وبينه لانه قال بسافر وانا طلبت منه مبلغ ويقضي للبيت رفض وقال روحي لاهلك وتجادلنا على هالموضوع وقلت له إنّو انا متفقه معك على هالشي بعدين قال انتي طالق واحده وانا مادري وش وضعي مره تعبت نفسيا لان دايم نتهاوش على هالموضوع ودايم يقولي روحي لبيت اهلك لاهلك على اي مشكله ماحسيت بالاستقرار وكانت عارفه بيجي يوم ويطلق والحين مو عارفه وضعي وخصوصا انه دايم يجيبني بيت اهلي ويجلس يقول لاهلي بنتكم فيها وفيها وللامانه احاول ماقصر لكن محد كامل ويخليني قرابة الاسبوعين بعدين ارجع له من نفسي وبعد تودد ووو الحين ابوي كلمه وترجاه يرجعني وانا موعارفه وأهلي يبون بس الموضوع ينحل وانا مر متضايقه مو كل مره يحطنّي انا وعيالي عند اهلي ومتي ماسمح رجع والآن ماعرف هل حصل الطلاق اولا |
رد: ابي مساعده ضروري
دامك عارفته كذا ليه تجادلينه
ليه تردين عليه بكلام جارح ؟ خلاص انتي عارفة انه ممكن باي لحظة يطلق تجنبي هذه اللحظة عشان ما يتعود حاولي تقوين مكانتك وتكونين صبورة الله يصلح امرك |
رد: ابي مساعده ضروري
صعب انا اسكت غالبا لكن مع الظغط ارد ما اقدر اسكت حاولت اسكت اسكت لكن بالاخير معاد أسيطر على نفسي
|
رد: ابي مساعده ضروري
اقتباس:
ايش مصلحتك من الكلام الجارح؟ قوي منزلتك عنده بعدها هو اللي يدور عليك و يرجعك😊 ابوك يترجاه لانه عارف الغلط منك |
رد: ابي مساعده ضروري
ابوي يترجاه علشان يبي الفكه مني انت ماعشت معه علشان تحكم علا العموم حصل الي حصل وهو قالي انتي طالق وبعدين كل إنسان يغلط محد كامل
|
رد: ابي مساعده ضروري
فعلاً كل إنسان يغلط، وبعدين مو معقوله الرجل اللي يطلق بسهوله!!
الطلاق ما يجي سهل يعني المفترض يصبر زي ما تصبرين وبعدين المواضيع اللي تسبب خلافات دائماً ما تستدعي طلاق. مو معقوله إن المرأة بتعيش حياتها في توتر لا يطلقني! أنا مدري عنك بصراحة لكن أهلك طريقتهم تخليه يطلقك مره ثانيه لأنه بيحس إنهم بيرجعونك له كل مره. ترى الطلاق يخليك توعين وينبهك على أخطاء كثيره بحق نفسك وأولها إذا كان اعتمادك عليه حاولي تعتمدين على نفسك لأنه بكل بساطة طلقك وسحب يده منك ورماك عند أهلك. اشتغلي على هالنقطة، الرجال صاروا يطلقون بسهوله. |
رد: ابي مساعده ضروري
معك حق انا كنت قبل احاول أتوظف لكن رافض وكنت عايشه بقلق فضيع وهاذا سبب عصبيتي وانا بصراحه مو عارفه وضعي اهلي يقلون لاتكلمينه وأهلي خايفين منه ينتظرون يطيح الي براسه علشان يفكر يرد عليهم للان ماجات ورقتي والله تعبت من التفكير حتي لنفرض انه رجعني مو عارفه اقرر ارجع ولاخلاص كافي كل ماحصلت مشكله وداني لاهلي عيالي بيكبرون اكيد بيتعبون بعد
|
رد: ابي مساعده ضروري
الله يفرج همك ويصلح زوجك يسافر ويترك عند اهلك وليش ماياخذك معاه يعني ماشاءالله قادر يسافر موقادر يقضي للبيت
|
رد: ابي مساعده ضروري
لا كلام عليك ولا عتب زوجك فقط لم يجد خلفك أهل يوقفوه عند حدوده ويعلموه قيمة الأسرة والزوجة كل ما عليك أن توزني أمورك إذا أنت تتحملي تبعات الطلاق أم تبقي على قيد الأمل أن يتغير حاله من أجل أطفالك على الأقل حتى يكبرو ويعتمدو على أنفسهم والحياة صبر أنظري لإيجابيات حياتك معه لأني لا أتوقع أن الحياة عند أهلك ستكون سهله وهم بهذا التفكير
طمنينا عليك ربي يوفقك |
رد: ابي مساعده ضروري
بعد المشكله هو ماسافر لانه اتصل على اخوي وقال يجون يأخذون اغراض لهم ورحت اخذها هو كل همه اطلع من البيت ويوم رحت اخذ أغراضي جلس يدعي على اخوي يقوله جعلك تشوف الي شفته بزواجي تشوفه انت حسبي الله اخوي وش ذنبه اخوي عمره 20 وبعدين هو وش شاف بزواجه دامه مارتاح ليش ماطلق من اول سنه وانا للحين لنا سبع سنوات بصراحه لما قال كذا انا صرت افكر خلاص يصير طلاق نهائي
|
رد: زوجي طلقني
والله كبرتوا راسه و جالسين تجروا وراه و لا عملتي مقدار لنفسك و لا اهلك علموا مقدار لك
كيف تبغي ولد الناس يعمل مقدار لك بعدها عزي نفسك و ما راح تموتي من غيره يرجعك بكرامة و بشروط مو على كيفه كل شوي يهدد و يطلق بالاخير على سبب تافه |
رد: ابي مساعده ضروري
والله العيشه صعبه عند اهلي قبل لاتزوح وشلون الحين اذا تطلقت معي ولدين هو كويس وطيب احيننا لكن اهلي يشوفون الظاهر مايشوفون الداخل لكنه عصبي ودايم حزين وأي شي أسويه يذمه رجال ماعليه كلام ظاهريا مايحب يتحمل المسؤليه ولازم مرتين بالسنه يحطنّي عند اهلي ويجلس يتكلم فيني اني فاشله ماسوي شي وإني بزر ماني حرمه ثم يرجع ولأكان شي صار يارب فرجك مو عارفه أقرر ولا وش اسوي
|
رد: زوجي طلقني
هاذي المشكله لكن انا ماعندي نية رجعه وأفكر أحط محامي يشوف اذا حصل الطلاق اولا والله متشتته مو عارفه استخرت الله يسهل بس
|
رد: زوجي طلقني
الحين ترى الاعضاء مايقدرون ينفعونك لان المشكلة ماهي واضحة.
هل فعلا زوجك يطلق على شي تافه او انتي فعلا اخطأتي خطأ قوي في حقه خلاه يغضب و ينقهر وانتي تشوفينه شي تافه! انتي الان قيمي نفسك و سوي اللي عليك واصلحي نفسك الاخطاء اللي يذكرها زوجك اصلحيها و ان حصل طلاق مع هذا صدقيني ماراح تندمين لانك سويتي اللي عليك وهو اللي بيجيك بنفسه و الاهم من هذا كله الدعاء باصلاح الاحوال |
رد: زوجي طلقني
انا غلطت بصراحه لكن هو ضايقني قالي بسافر قلت اوك بس ماراح اروح لاهلي قال بتجي امك قلت مادري قال انا متفق معك قلت لا ماتنفقنا خل نتكلم بالغرفه لان عيالي عندي قال انا ماعلي منك بسافر بكرى الصبح واغراض ماني جايب لك بتروحين روحي قلت انا متفقه معك اني اجلس بيتي وانت بكيف ماعندي مشكله قام يستهزء فيني كانك هنديه ويسوي حركات وينافخ قام ولدي يكلمني قلت اصبر اسمع ذالبزر وانا متلخبطه قال انتي طالق وداني لاهلي انا غلطانه لكن هو من يوم فكر بالسفر وهو يقول روحي لاهلك ومايردك الا بيت اهلك
|
رد: زوجي طلقني
اجلسي فكري زين وادعي الله يكتب لك الخيرة في أمرك.
الأمور في بداية الطلاق تكون صعبه وما تقدرين تسيطرين على روحك ودك تهاجرين لكن الصبر والتصبر حلو الله يعطيك قوة نسيانه. لا تترجينه يرجعك، ولكن اقرأي سورة البقرة آيات الطلاق، تحصلين اللي طلق زوجته وما خلاها تقضي العدة شرعاً عنده "ظلم نفسه" ولعل الله يحدث بعد ذلك أمرا. أنتي ابني حالياً إنك مطلقه جد، بعد العدة إذا ما رجعك وانتهت وعندك اثباتات على الطلاق راجعي المحكمة لأن أمورك بتتعطل بتكونين تحت اسمه في الكرت وما لك سلطة تسوين شيء لولدك أو بنتك لأن ما عندك اثبات. الاثبات تطلعينه بعد ما يسقطك من كرته. الموضوع مشربك بس فعلاً بتشوفين كيف قرار سريع وبدون مشاورة -أقصده هو وكيف طلق بدون لا يشاورك- بيكون له تبعات فالبداية عليك كثير لأنك أنتي اللي انكسرتي وانصدمتي بقرار ما قررتيه ثانياً انطردتي برا بيتك اللي استقريتي فيه فالآن راح ترجعين تستقرين في بيت أهلك من جديد، بينما هو ما يعاني من النقاط اللي ذكرتها. أنتي بتبدأين تدورين طريق للعيش والإكتفاء الذاتي بدل اعتمادك على أهلك وبتلقين الناس تحكم على تأخرك بجهل لكن هذه فعلاً أحد الأشياء اللي تعبتني. بس مع الأيام راح تنسين كل الألم اللي مر عليك ويبدأ فجأة هو يتألم أو يصحى بعد ما تكرهينه وتحلمين بحياة غير وأهداف واعية. كل اللي عليك تسوينه الحين الصبر لا ترسلين له أي شيء لا تهينين نفسك أكثر. |
رد: زوجي طلقني
اقتباس:
قولي نسيت والا غفلت ما رجعت ذكرته! الموضوع ما يستدعي الطلاق فالآخير. |
رد: زوجي طلقني
الله يجبر خاطرك ويسعدك
|
رد: زوجي طلقني
غلطة علشاني قلت بزر
مادري احس مايسدعي الطلاق بس هو دايم دايم يهدد بالطلاق |
رد: زوجي طلقني
أختي هو يبيك تروحين بيت أهلك
ولما لقاك معزمه تقعدين طلقك فسواء قلتي بزر أو ما قلتي هو يبيك تطلعين من البيت هالفتره |
رد: زوجي طلقني
ايه يبيني اطلع من البيت كل مشكله يدرون فيها اهلي وبلبله ليه انا تعبت حتي لو متضايق يطلع هو مو انا نتكلم لين يطلع الي بخاطره يقول انا تعبان حتي لو مظغوط انا بعد ننظغط الزواج كذا انا عايشه عمر معه مو شهر وخلاص
|
رد: زوجي طلقني
حبيبتي دام اهلك كذا
زوجك بيستسهل طلاقك وبيستهل روحتك لاهلك انتي ماطلبتي الا حقك انه يقضي لبيته قبل يسافر |
رد: زوجي طلقني
هل ارسله يرسلي ورقتي انها ماجات كمان ابي بطاقتي الأحوال لان احتاجها ولا اتركه هالاسبوع
|
رد: زوجي طلقني
لا لا ترسلين له شيء تكفين حسسي نفسك بقوتها !
بطاقة الأحوال موضوعها ضروري والا ممكن تصبرين لأن لو مطول الموضوع وما حله راح يضطر يقول لك شيلي عفشك. ما عندك صورة لها تمشي الوضع. لكن ما أفضل ترسلين شيء |
رد: زوجي طلقني
اقتباس:
الله يصلح الامور |
رد: زوجي طلقني
اجل بصبر شوركم وهداية الله
|
رد: زوجي طلقني
الله يصلح شانكم
عندكم عيال وكوني اعقل منه ونصيحة حاولي لا تدخلي اهلج في موضوع ولا تصعدي الامور وياه مرده بيرجع لج ام عياله ويرجع وهو حاس انه غلطان احسن ما نه يرجع وشايف نفسه عشان ما يتكرر الغلط ( توسل اهلج له غلط ) حتا لو وقعة طلقه ممكن يرجعك ويمكن تكون خيره عشان ما يسترخصك ويعرف قدرك وعليج بدعاء الله يجمعك بابو عيالج ويجمعني بام عيالي |
رد: زوجي طلقني
ايه عندي ولدين ماكنت ابي ادخل اهلي لكن هو يحب يشتكي لاهلي
مو اول كل مشكله كذا الله يجمعك بام عيالك ويحن قلبها عليك عاجلا غير اجل |
رد: زوجي طلقني
لا تطلبي الطلاق
خليكي قويه تصدقي استغفري هالفتره واذا جا يرجعك اشرطي شروطك |
رد: زوجي طلقني
ماطلبت الطلاق بس هو ماراح يرجعني لين اكلمه انا وانا ماراح اكلمه لان هو الي جابني لاهلي وهو الي طلق لكن هو اليوم جاء قبل لايجي ارسل لامي رساله قالها خالتي جهزي العيال بجي أخذهم ودق على امي مرتين امي ماردت وجاء عندنا وكلم ابوي وجهزت الصغير وراح معه علشان يسلم علا اهله اما الكبير عياء ولا سبوع هاذا عنده روضه ومادري اغيبه ولا وش اسوي معه
|
رد: زوجي طلقني
يا عمري أنتي البدايات دائماً صعبة
إذا نفسيتك ما تسمح تودينه لا تودينه روضة مو تمهيدي وإلا أولى ابتدائي يعني اعفيه واعفي نفسك يعني ترى بتجلسين كم أسبوع كذا كسلانه من الهم ومن الجرح لكن معليش بعد كم أسبوع ثانية تصيرين أحسن وتستمرين بحياتك هو مو مصدق إنه سوا شيء كان يتمناه وهو الطلاق وسبحان الله تراه مغيب وفي سكره بكرا تجيه الطامه ويرجع له عقله ويبدأ يفكر! وأنتي تدرين وش بيصير لك بتنبسطين وبتتعودين على حياة أخف شوي في المسؤوليات يعني ماعاد فيه مسؤولية زواج وطاعة زوج وإرضاء وصبر على أسلوب ومعامله واهمال، كل هذا بيختفي وبتلاحظين أشياء ثانية أحسن وبعدين فجأة هو تبدأ الحياة تعكه وكرجل برضو محتاج مرأة ! بيرجع بس أتمنى يرجع في وقت مناسب ما تكونين تجاوزتيه. |
| الساعة الآن 03:35 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©