|
مشورتكم في عريسين
السلام عليكم ورحمة الله وبركاته
هذي الايام بس اكتب مواضيع عندكم يله تتسلون في الحجر😂 المهم يا اخوني واخواتي الان عندي عرضين في موقع مودة ومحتاره بينهم وكلهم حلوين الى الان الى الان مجرد تعارف (واحد منهم بغى يسأل اسئله خاصه فقلت له بتشوفني في الشوفه الشرعيه) ومدري اذا زعل او لا) انا اخذت بنصيحتكم اني ما افتح مجال للأسئله الخاصه والاخر ما سألني اي سؤال خاص او محرج وكلهم اغنياء المهم نجي للأول متزوج وله ابناء في الجامعه عمره 48 ساكن في الرياض مرح في كلامه (مزوحي) محاضر في جامعه في الرياض ومستشار مالي قال بستخير وارد عليك واليوم رد عليه انه مستعد يستأجرلي بيت في مدينتي (الطائف) ويجيني كل اسبوع وفي الاجازات الطويله ورمضان زواج معلن ومن حقي اجيب عيال كاتب في بياناته انه يريد وحده مرحه محبه للسفر داخليا وخارجيا يقولي ابغى كل ما جيتك القاك متزينه كأنك رايحه مناسبه يحب السفر والطلعات (كوفيهات ومطاعم )مع الزوجه كاتب الافضل تكون موظفه حتى تشغل نفسها قلتله بترك الوظيفه قال عادي وابشري بالعوض رديت عليه ما تقدر اعيش معك في الرياض؟ وباقي ما رد عليه. ( الثاني ) مطلق عنده بنت عمره 45 وكيل مدرسه وله اعمال اخرى خاصه بالعقار لهم اعمال في مصر خاصه بابوه ساكن في نفس مدينتي وعنده بيت ملك في الطايف وبيت في الشرقيه وبيت في مصر بيته فله وقريب من بيت اهلي يروح كل سنه مصر شهرين يقول اعمال الوالد هناك متفتح يحب ان الزوجه تحضر معه مباريات وحفلات غنائيه ومطاعم وكفيها (تقريبا نفس الاشياء بينهم مشتركه) سبب الطلاق تدخلات امها بينهم وافشائها لاسرارهم وفشلها في العلاقه العاطفيه بينهم ما فصل قال كذا بس قلت هل بترجعها ؟؟ قال مستحيل قلتله ليش ما تخلي اخواتك يدورولك قال مستحيل اكرر الغلطه انا دور بنفسي رأيكم ومشورتكم؟؟ واذا عندكم اي اسئله ممكن اسئلها لهم؟؟ |
رد: مشورتكم في عريسين
بصراحة أشوف الثاني مناسب أكثر شيء لأنه غير مرتبط الآن وبنفس مدينتك بعد مايحتاج تتركين وظيفتك عشان تنتقلين معه لمكانه.
ولا تستعجلين بهالأمور المصيرية، حتى لو يجي يشوفك شوفة شرعية اسألوا عنهم كويس بعد . |
رد: مشورتكم في عريسين
اقتباس:
ومن يوم رفضت والرجال ملتزم الصمت😂 مدري يبغون الوحده تقل حياها عشان تعجيهم ولا ايش!! الاول ما سئلني اي سؤال خاص ابدا ايضا قلتله احلف انك مطلق (لان بعضهم يقول مطلق وهو متزوج عشان ما يرفضونه) ما حلف قال ما يحتاج احلف ثقي اني قلت الصدق طيب اش بتخسر تحلف دامك صادق!!!! ايضا اثناء حديثنا قالي انتي باين عليك طيبه وصادقه انتبهي من اي احد كذاب لابد من التريث انا او غيري يا ترى ليش قال هالكلام؟؟!! |
رد: مشورتكم في عريسين
برأيي الاول اكثر جدية
الثاني تصرفاته واسئلته مريبة شوي ولو انه في النهاية صعبتي عليه ونصحك نصيحة صادقة ؟! |
رد: مشورتكم في عريسين
وعليكم السلام ورحمة الله وبركلته
ااااه من الحجر الصحي الممل الله يرفع عنا البلاء عاجلا اما بالنسبة للسؤال الاول مستقر في حياته يريد التجديد والسؤال بعد مدة هل يبقى على وعده ويبقى يجي عندك في رايي استخيري في الثاني وشوفي لانه ناوي يستقر والله يجيب الي فيه الخير |
رد: مشورتكم في عريسين
وعليكم السلام ورحمة الله وبركلته
ااااه من الحجر الصحي الممل الله يرفع عنا البلاء عاجلا اما بالنسبة للسؤال الاول مستقر في حياته يريد التجديد والسؤال بعد مدة هل يبقى على وعده ويبقى يجي عندك في رايي استخيري في الثاني وشوفي لانه ناوي يستقر والله يجيب الي فيه الخير |
رد: مشورتكم في عريسين
الخياراات إلى الآن مش مشجعة لا الأول ولا الثاني والأفضل تركهم كلهم إلا في حالات بذكرها لك .. لكن مادام طلبت الاختيار بينهم فاقول
كنت بكون مع الثاني بلا نقاش بس لما قلت متفتح و و هنا أتوقف . ترى ماهي ميزة إن الرجل ياخذ زوجته لحفلات ومباريات إلا هذي سقطة شنيعة شنيعة في الرجولة كيف يرضى زوجته معه وفوق منها رجال وبجنبها رجال ونظرات رجال و و وقرف ما تدري أيهم يغثك أول . ولو سلم منها أو أنت ترفضي ما تروحي لحفلات مختلطة ومباريات فتوكلي على الله وعلى الثاني ، بعد ما تتأكدي من شغلة وهي كيف محافظته على صلاته ودينه وأفكاره حطي في بالك من أشباه الرجال اللي يريد متفتحة وهو يقصد متحررة . وإن كان في الظاهر إن تدينه ورجولته ما تجي 30 % والأول مبدئيا ممتاز بشرط إن كان ما يمانع بوجودك في الرياض فاختاريه فهو على الأقل دينيا أفضل منه ( حسب الظاهر ) وفي كل الأحوال لا تتركي وظيفتك حتى لو ضحيتي فيهم .. فممكن يطلقك أو يموت وش بيكون موقفك وقتها . ملاحظة : لا تصدقي الوعود كثير |
رد: مشورتكم في عريسين
اقتباس:
يقول ابوه رفض يوم قلتله تشتغل في مستشفى!! وين المنفتح واللي يبغى منفتحه واهلها منفتحين😂 شر البلية ما يضحك! قلتله خلاص وطاعة ابوك واجبه رح خله يزوجك وحده من الديره🙂 |
رد: مشورتكم في عريسين
اقتباس:
لدرجة احيانا ابكي كنت افرفر بسيارتي واروح عن نفسي الحين صكه😢 خلاص راح الثاني مع اني كنت اميل له والحمد لله على كل حال |
رد: مشورتكم في عريسين
اقتباس:
حتى انا كنت مستغربه الحاحه على موضوع الانفتاح حتى سأل عن اهلي منفتحين ولا لا!! شي مريب صراحه!! بقي الاول اليوم رد على سؤالي اذا يقدر يسكني عنده في الرياض؟ قال: " ابغى اكون اسره في الطائف ويكون لاسرتنا مكان فيها " ودي اصدق🤷♀ |
رد: مشورتكم في عريسين
وعليكم السلام ورحمة الله وبركاته أظنّ كلام الثاني عن الإنفتاح هو فخّ, ليعرف ميوللك واتجاهك انت في هذا الشأن, أما إذا كان صحيح ما يقوله عن نفسه, فهو رجل لا يُرتضى دينه وخلقه ولا خير فيه, ولا تأسفي على انسحابه,, أما الأوّل, يريد التجديد وواضح أنّ زوجته منشغله عنه أو بينهم خلافات, اسأليه عن رأيها في زواجه,,, |
رد: مشورتكم في عريسين
اقتباس:
وبياناتي كاتبه فيها متدينه قليلا واصلي دائما ويوم قال تروحين معي مباريات قلت لا واهلي قلت ناس وسط لا منفتحين ولا متشددين! يعني ان كان فخ فقد نجوت منه😂 اكيد رايها كرأي اي امرأة عن زواج زوجها بس يوم سألته هي تدري انك بتتزوج قال من زمان المح لها تلميح بدون تجريح هذا رده |
رد: مشورتكم في عريسين
المتزوج مصر يكون سكني في مدينتي
يقول بحط مكتب استشارات في الطائف وابغالي بيت هناك! وهو مميزاته حلوه والزواج معلن زي ما قال وكلامه الى الان يوحي انه صادق والله اعلم رايكم؟؟ |
رد: مشورتكم في عريسين
انا اشوفه جاد
بقاءك في مدينتك افضل اهم شي موافقته على الانجاب |
رد: مشورتكم في عريسين
اقتباس:
انه صار يتكلم في امور خاصه جدا تلميح وتصريح بس انه يبغاني حتى يقولي لا تناديني بابو فلان ناديني بسم الولد اللي بجيبه منك انتي اش رايك؟ |
رد: مشورتكم في عريسين
اقتباس:
وقبل هذا لازم تحسمين قرارك بخصوصه بالرفض او القبول واذا كان فيه قبول الاسراع باجراءات الخطبة قدر الامكان التواصل بهذه الطريقة بدون اتخاذ اجراء علني على ارض الواقع يضر اكثر مما ينفع |
رد: مشورتكم في عريسين
اقتباس:
عموما قالي اطلعي من الموقع وصرت انا وياه على الاونلاين وطلب صوره لي وانا متنقبه يقول بشوف لو شكلك العام وعيونك |
رد: مشورتكم في عريسين
الحكم بالجدية 100 % أشوفه صعب ، الجاد هو اللي رجلك على رجله ، اللي فعلا يعتبر زواج مثله مثل غيره .. لكن ممكن تكون ظروف الناس والحياة تغيرت .. فالله أعلم أما جاد وهو في بلد وأنت في بلد ولا أحد يدري عن الثاني فنسبة الجدية تنخفض . احسمي الأمر . إذا جاد يتقدم ويجي مع الباب الكبير ولا تسمحين لا له ولا لغيره بالكلام الخاص جدا أوكيه وصف للجسم عموما دون الدخول في تفاصيل دقيقة وحساسة قادحة في شخصيتك وحيائك وإذا انت ما عندك مانع في بقائك في بلد وهو في بلد ومناسب ما ذكره لوضعك مع التزامه الديني على الأقل للحد الأدنى ( أداء الواجبات والحقوق ) فتوكلي على الله .
|
رد: مشورتكم في عريسين
اقتباس:
واحس ابغى زوجي معي دايما وقلتله هالكلام قال بجيك كل اسبوع ومصر انه ما يقدر اكون معه في الرياض مدري وين الصعوبه!! بالعكس اريح له اكون عنده! احاول اغير مجرى الكلام لكن يروح ويرجع على سواليف جنسيه! |
رد: مشورتكم في عريسين
استاهل
انا اللي رفضت في العرسان لين ما عاد يجيني غير المترديه والنطيحه |
رد: مشورتكم في عريسين
اقتباس:
الله أعلم وش ظرف الرجال هو بيجي كل اسبوع أو لا الله أعلم .. بس أنت أخبريه أن الهدف إنجاب لأن كثير منهم مكتفي من الإنجاب وما يبي .. يبي مرأة تبسطه جنسيا بس (بصراحة أقولها ) ولو غير مجرى الكلام لا تستجيبين . لا تستجيبين وتسوين نفسك بتجذبينه لك ترى الرجال بالعربي ما يحبون اللي هذي طريقتها وهي منطقيا تعتبر قلة حياء من المرأة بدون زعل .. كيف رجال غريب تتكلم معه بها الشكل والله سبحانه يقول : عَلِمَ اللَّهُ أَنَّكُمْ سَتَذْكُرُونَهُنَّ وَلَكِنْ لَا تُوَاعِدُوهُنَّ سِرًّا إِلَّا أَنْ تَقُولُوا قَوْلًا مَعْرُوفًا .. أي معروف في كلام جنسي وما العذر ؟ واصرفيه للأمور الجدية مثلا تخبريه إن ما عندك مانع في مساعدته ماليا وتحمل تكاليف بيتك وعيالك ( تقصدين نفسك وعيالك إن شاء الله ) ليش لأن الرجال كثير منهم يبي يتزوج بس لما يتذكر المصاريف يوقف . أنت بالطريقة ذي رغبتيه أكثر من سوالف الجنس وهو راح يقلبها براسه ما دام متكفله بنفسها وبعيالها وببيتها راح يقول أنا وش خسران ويجيك . إذا تمم الله لك على خير هو أو غيره تقدرين تجذبينه لك بحسن التعامل واللطف أسمع عن وحدة تزوجت مسيار وأكرمت زوجها المسياري إكرام ما بعده شرت له سيارة وتعطيه فلوس ومعه في كل شي يبيه .. حتى الرجال أحبها وأعلن زواجه منها .. ثم في كل الظروف إياك تتنازلين عن الوظيفة مهما كلف الأمر ولو صار وساعدتي زوجك في أي شي حاولي تسجلين عليه بطريقة لبقة مؤدبة إن مشى عدل الحمد لله .. لف ودار وطلق تاخذين حقوقك . |
رد: مشورتكم في عريسين
صادق اخوي ولد ال زيد في بعض كلامك
لكن ما احب اجذب احد بفلوسي اول ما ينقطع السيل يقلب عليه!! عيشتن قشرا!! عموما الحين اش رايكم استمر معه ولا اتركه ؟؟ الحين هو يطلب مني صور خاصه وطبعا رفضت رفض قاطع هل ارفض الصور واستمر معه ام ارفضه؟؟ |
رد: مشورتكم في عريسين
اقتباس:
هذي وجهة نظري قد أكون فيها مخطئ لكن أراها عادية في حالة أن المرأة اضطرت بالنسبة لطلب الرجل للصور .. فلا تعطيه أي شي وقولي أنا استجبت معك لهدف واحد محدد حتى ما راح أطول معاك في الكلام لأن المعلومات وعندك وتبي بيتنا أدلك عليه ولك حق شوفة والقرار لك . وأنا أوعدك بكل شي ينقصك إذا صرت بالحلال من رومانسية ومن دلع ومن ومن .. لكن بالحلال . خلي كلامك عام يصلح له ولغيره . وأخبريه إنك ماديا مكتفية ما أنت بحاجة مال وعندك استعداد تتحملي مصاريفك الخاصة أنت وعيالك . بس وقفلي الموضوع .. إن أصر على الصور وانحدر في الكلام فاتركيه . ويرزقك ربي من واسع فضله |
رد: مشورتكم في عريسين
أسأل الله أن ينير بصيرتك ويصرف عنك كلّ لأذى, يا أختي الفاضلة, لا تسمحي لأحد أن يجرّك في طريق تغضب الله عزّ وجلّ فيوكلك الله إليه, فأي تصرّف تريدين فعله اعرضيه على الحكم الشرعي, لأنّ الذي يُخشى في مثل هذه التواصلات هو التعوّد على أمور غير محمودة قد كانت من قبل من الخطوط الحمراء, فتصبح بالتدريج عادية , الكلام له حدود والتعارف لا يسمح لك بأن ترسلي صورا تصف ما لا يراه إلا المحارم, ولمين؟ لواحد لا تعرفين عنه إلا ما قاله عن نفسه, لو له زرغبة فيك يجي لبيتكم كما يأتي الخطّاب, في رأيي حتى المهاتفة لا تضمن شيئا, وفي الحقيقة أي تراخي في التواصل فهو جزء منك ومن حيائك يتآكل من غير ما تحسّي, وما يرضيك أحرصي على نيله بما يرضي الله, يمكن انت لا تنتبهي لهذه الدقائق لأنّك وسط الموضوع وحرصك على الوصول للزواج يغيّبها عن بالك, أقول هذا حرصا على أخت لي عرفت عنها الطيبة وجمال الرّوح , وأحرص على أن تبقى كذلك.. وفّقك الله |
رد: مشورتكم في عريسين
اقتباس:
مو كلهم بيقدر العطاء المادي! وانا بالعكس كل كلامي معه انه ما بيشوف ريال مني يعني عكس ما اوصيتني به!! حتى هو يضحك يوم اقوله ويقول انه يمزح ماهو بحاجة مالي (هو فعلا حسب اعماله غني ) يقول سئلتك عن مالك اختبرك لان الانسان يعرف عند المال او في السفر! اما الصور لم ارسل له الا صوره واحده وانا لابسه العبايه والنقاب "هو طلب حتى لو بالعبايه" |
رد: مشورتكم في عريسين
اقتباس:
وان شاء الله اني ما انزلق وقد رفضت رفض قاطع موضوع الصور الا صوره وحده بالعبايه يقول اشوف شكلك العام ونسأل الله الثبات |
رد: مشورتكم في عريسين
يا اخوتي الكرام
انا احس اني بدأت احب او اعجب بهذا الرجل!! واحس طلبه للصور مجرد حاله انفعاليه ولا هو طيب ورجل شهم احسه كذا!! (هو محاضر في احدى الجامعات معقوله يلعب ويتسلى وهو بهذا المركز)؟؟ انا وياه الان على الاونلاين نتحدث بكل راحه وهو يستلطف كلامي بصراحه صرت اكلمه كني اعرفه من زمان ويوم انفعل وابدأ اسب يضحك ويقول كلامك على قلبي زي العسل وطبعا مازال مصر اني اكون في مدينتي وقالي بكل صراحه اذا رافضه ف مقدر اتزوجك هذي ظروفي وانا واضح معك الحين انا محتاره اقبل به لميلي له ولشخصيته واتحمل بعد ذلك بعده واثره النفسي عليه وقد اتعود؟؟ وقد قال لي من قبل ربما تتغير الاحوال واجيبك ام ارفضه واقبل بشخص اخر تقدم من نفس مدينتي ايضا متزوج رجل عادي جدا ليس فيه اي مميزات ويقول عنده 5شقق في عمارته وراح يحطني في وحده منها؟؟ شوركم؟؟ ودعواتكم |
| الساعة الآن 06:31 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©