|
محتارة اعمل ايه ممكن تساعدوني
السلام عليكم ورحمة الله وبركاته
انا متزوجة منذ ٩ سنين تقريبا كان عمري ٢١ كان بيننا مشاكل كتير مثل الادمان وعدم عمله وان اهله متكفلين بمصاريفنا وكنت عرضت مشاكلي هنا ومشكور الاستاذ ابو مريم ورجل الرجال وغيرهم كانوا بيساعدوني اتخطى مشاكل كتير وده كان من اكثر من ست سنين المشكلة حاليا ان زوجي مازال لا يعمل ومتخبط بين انه فترة يكون تماما مقلع عن الادمان وفترة يرجعله كل ده تحملته ومش هقدر انكر انه اتحملني زي ما اتحملته اتحمل مني اهمال وكل شيء وزي ما هو مقصر في حقوقي انا كمان قصرت كتير طبعا بسبب الادمان كل السنين دي برغم كلامي وكلام اهلي واهله لا يتحمل اي مسؤلية لدرجة ان حتى ان اكون ام واكشف واشوف سبب عدم الحمل كله يتأجل وبعدين وبكرة هتغير صبرت سنين لحد ما كل حاجة ماتت جوايا تعبت من كتر الكلام كل الل يشوفني يقولي انتي مدفونة وابعدي اقولهم انتوا متعرفوش هو كمان متحملني ازاي كل حقوقي مش موجودة واتكلمت كتير لا حياة لمن تنادي حتى وهو مبطل ادمان عارفة اني السبب اني اتهاونت من الاول وغلطت كتير بس فعلا بقالي سنتين واكتر وصلت لمرحلة ان مش قادرة انطق كلمة عايشة وخلاص بس الل تاعبني ان مبقتش طايقة يقربلي ولا يلمسني انا وهو عايشين بين اربع جدرتن نادرا لو اتكلمنا مفيش خروج نهاااائي وهو ليل ونهار في البيت حتى اصحابه قاطعهم من سنين انا مبقتش مرتاحة حاسة ان عمري بيضيع طلبت منه نسافر كتير ف الاول كان يصبرني ويقولي كمان كام شهر دلوقتي رفض تام في النهاية انا عايزة امشي واسافر في الخارج وابعد بس خايفة اكون كده ظالماه هو طيب وبيصعب عليا اجرحه بس مبقتش قادرة اعيش كده واقوله كتير انا همشي مبيتغيرش امشي واسافر واشتغل واعيش حياتي بما يرضي الله ولا افضل كده مش عارفة اخد قرار اعمل ايه كل اهلي كانوا بيترجوني اسيبه واسافر عشاني وعشان هو يتغير لنفسه بس اما بقيت بفكر بجدية حسيت انهم مش حابين ده محتارة ارجوكم ساعدوني |
رد: محتارة اعمل ايه ممكن تساعد
وعليكم السلام ورحمة الله وبركاته
أختي الفاضله زوجك لم يتغير كل هذه السنين ما هي الميزة التي تجعلك متعلقه ومتشبذة بإنجاح في هذه الزيجة؟ يكفي ما أضعته من عمرك والطلاق لمن هم في حالتك حل لماذا لا تبحثين عن عمل في نفس البلد اللي ساكنة فيها؟ لماذا تريدين السفر للخارج للبحث عن عمل وبدء حياة جديدة؟ لماذا لا تفعلين هذا بالقرب من أهلك؟ لمذا تريدين الهرب؟ |
رد: محتارة اعمل ايه ممكن تساعد
مشكور على الرد انا فعلا بحاجة حد يدلني اعمل ايه
المميزات الل ف زوجي كتير اولهم ساعات بيتغير وبيبقى كل همه انه يتقي الله وبس في كل حاجة مهما كانت يومه بيبقى عبارة عن صلاة قران ذكر لله وبس بيحبني حتى لو الحب مات بفعل روتين الحياة باقي بيننا العشرة متاكدة من انه مش بيخونني لانه فعليا موجود طول السنين دي في البيت مبيخرجش نهائي الا لو راح لاهله نص ساعة كل كام يوم برغم ان بيتهم جمبنا بحس انه طيب وعشان عايش الحياة دي بحس انه مالوش غيري بجد دي اكتر حاجة مصعبة عليا الفراق متحملني معتقدش ان اهلي يتحملوني زيه ساعات اقول عشان كده كده مفيش مشاكل لكن ولا حقوق زي الحمل ولا ماديات ولا امان ولا سعادة ولا امان ولا كلام ولا اي حاجة موجودة بالنسبة ليه مش اشوف عمل في بلدي اولا صعب بالنسبة لعمري واهلي مش هيتحملوني وثانيا انا ليا اخوات برة بلدي ووالدتي هتسافر قريب وخالتي هناك وغير كده فعلا انا عايزة اهرب مش عايزة اعيش هنا عايزة ابعد عن كل حياتي دي مش قادرة اتحملها مش هتحمل اي كلمة عتاب من اهلي مش هتحمل ابقى عال على حد لو سافرت هعيش ليل ونهار في العمل انا الل بخدم نفسي ومش هحتاج لمخلوق وفي نفس الوقت هيبقى جزء من اهلي معايا وقريب مني |
رد: محتارة اعمل ايه ممكن تساعد
مش معقول انا مش مصدق عيونى ابنتى الغالية سارة الحمد لله رب العالمين انك بخير وزوجك بخير ربينا يحفظكم يا رب وازى الوالد والوالدة والاخوة والاخوات وازى بنت خالتك اللى كانت فى الكويت يا رب تكونوا جميعا بخير وافضل حال |
رد: محتارة اعمل ايه ممكن تساعد
اقتباس:
يارب دايما حضرتك تكون بخير وافضل حال والله فرحت كتير جدا ان حضرتك فاكرني دايما والله بدعيلك بالخير وعمري ما بنسى قد ايه حضرتك كنت بتدعمني وساعدتني في حل مشاكلي واني اكون انسانة افضل وبتمنى حضرتك تساعدني اعمل ايه |
رد: محتارة اعمل ايه ممكن تساعد
تسلمى يا ست الكل الله يسعدك ويوفقك ويسر امورك بس يا سارة اول حاجة عاوزك تحافظى على الصلاة على وقتها وفى اول الوقت يعنى تسمع الاذان تقوم تصلى الخمس فروض وخصوصا الفجر ثانيا عاوزك تقرا كل يوم حزء من القرآن الكريم او حتى نصف جزء فى الاول ثالثا تستغفرى 300 مرة 500 اكثر وكذلك التسبيح والتهليل وكمان الصلاة على سيدنا محمد اللهم صلى وسلم وبارك عليه 200 مرة فى اليوم اكثر وده يكون عمل يومى لا ينقطع وكذلك زوجك الغالى بس ياريت تكون صلاة فى المسجد وفى الصف الاول عاوزك الكلام ده ثلاث ايام وبعدها باذن الله تعالى نبدا فى الحديث عن حياتكم وكيفية الخلاص مما انتم فيه باذن الله وفى اثناء هذه الايام الثلاثة احكى لى عن كل السنوات الماضية واهم شىء لماذا الى الان لم يرزقكم الله بطفل ينير حياتكم ويكون طاقة النور وباب الخلاص والنسيان لكل الماضى بشره وما فيه وتفتح صفحة جديدة الامل فيها لله تبارك وتعالى وتسعوا كلاكما الى اسعاد هذا الطفل ويصل لكما الامل فى حياة جديدة مليئة بالامل زالتفاءل باذن الله تعالى |
رد: محتارة اعمل ايه ممكن تساعد
الله ييارك لحضرتك ويرزقك الفردوس الأعلى مع كل احبابك ياااارب
تسلم يارب على دعمك الدائم بالنسبة للصلاة في اوقاتها الحمد لله انا بالفعل بعمل كده ومش بتاخر عن اداء الصلاة وقيام الليل وزوجي كمان كذلك مع اذكار الصباح والمساء والقيام وقراءة القرآن واتفقت معاه اننا ننفذ نصيحة حضرتك لينا الثلاثة ايام على الاقل وبالفعل بدأت بإذن الله هكتب لحضرتك كل الاحداث خلال السنين الماضية |
رد: محتارة اعمل ايه ممكن تساعد
تسلمى يا سيتى الله يوفقكم وييسر آمركم يا رب العالمين اسأل الله ان يستجيب دعائك انه سميع قريب مجيب الدعاء وخلى بالك يا سارة ان الاستغفار من اسباب الذرية والرزق بإذن الله وكثرة الصلاة على سيدنا محمد صلوات الله عليه تزيل الهم وتفك الكرب بقدر الله منتظرك بإذن الله حفظك الله ويسر آمرك ورزقكم من حيث لا تحتسبوا |
رد: محتارة اعمل ايه ممكن تساعد
ابنتى الغالية اكدى على زوجك الغالى المحافظة على الصف الاول فى المسجد مع الدعاء والتضرع الى الله عز وجل وهو ساجد وهو يصلى السنة القبلية او تحية المسجد هذا وقت اجابة دعاء ومكان اجابة دعاء وهو على طاهرة يعنى اجمعت عدة اسباب لقبول الدعاء بإذن الله خليه يكثر من دعاء اللهم انك عفوا تحب العفوا فأعفوا عنا ومن لا إله الا انت سبحانك انى كنت من الظالمين اللهم انى اسألك من كل خير سألك منه عبدة ونبيك محمد صلى الله عليه وسلم واعوذ بيك من كل شر استعاذك به منك عبدك ونبيك محمد صلى الله عليه وسلم مع كثرة الاستغفار والصلاة على سيدنا محمد وقول سبحان الله والحمد لله ولا اله الا الله والله اكبر ولا حول ولا قوة الا بالله |
رد: محتارة اعمل ايه ممكن تساعد
بعد اخر فترة وحضرتك كنت بتساعدني في حل مشاكلي مع نفسي واهلي ومعاه هو كمان كان بيحاول يبعد عن كل انواع المخدرات بطل حاجات منها وحاجات لا وبعدها زوجي فضل كل فترة ما بين انه يبطل ويرجع للمخدرات رغم كده بيصلي ما بيفوت فرض ودايما يقرا قرآن وبعد عن سماع الاغاني والتليفزيون وكل يومه ما بين العبادة والجيم وبليل يشرب او ياخد حبوب مخدرة وطبعا كل السنين دي ولا مرة فيهم حاول يشتغل ابدااااااا وانا كنت بشتغل من البيت عبر النت كتابة وترجمة وكنت بحاول اعمل اي حاجة رغم ان الكل كان رافض لان طبعا بما انه مش بيشتغل انا كل شغلي هو الل بياخد اجره فأهلي واخواتي كانوا دايما يقولولي حرام تعملي كده وابعدي هتضيعي من عمرك كام سنة كمان وهو مبيتغيرش
وكان كلامهم ده عشان شايفين انه مش بيعمل اي حاجة عشاني ابداااا حتى ملابسي اهلي الل بيجيبهولي بس للامانة انا الل مش بطلب منه يعني بردو الغلط عليا مش عليه لوحده في نقطة انه يصرف عليا بس كانوا دايما يشجعوني امشي بقى مش عشان شايفين زوجي وحش بالعكس هما كمان شايفين انه طيب جدا وقريب من ربنا بس مبيفكرش فيا ولا انا عايزة ايه ولا عايشة ازاي حياتنا ليل ونهار ف البيت بمعنى الكلمة مش بنخرج نهائي بيسيبني بس اروح لاهلي يوم الجمعة وده من قريب قبل كده كان ممنوع انزل لوحدي الا اروح عشر دقايق وهو الل ينزلني وقت ما ينزل او يحب ينزل ووالدتي سافرت سنة برة بلدنا عند اخواتي وبابا كان هنا لوحده ما كان راضي يجي يقعد عندي انا او اختي لما كان بابا بيجيلي يوم الجمعة يوم اجازته من الشغل كان دايما يزعقلي لدرجة ان كنت بخاف اقوله بابا جاي النهاردة واقعد اعيط اقوله ازاي مكانش بيرفض بس دايما يحسسني اني عاملة جريمة رغم ان المفروض انه من نفسه يقولي روحي اقعدي مع والدك كام يوم اخدميه بس لا هو كان بيرفض يقولي باباكي طول اليوم ف الشغل يرجع ينام تروحي تعملي ايه واهلي اتحايلو عليا اروح اقعد الفترة دي انا وزوجي بس زوجي رفض وبردو اختي وزوجها الل عايشين قريب مني هنا الفكرة مرفوضة عندهم كل الحاجات دي خلتني من جواكي اقسى على زوجي احس بالذل اكتر واكتر |
رد: محتارة اعمل ايه ممكن تساعد
بالنسبة لموضوع الانجاب خلال السنين دي بدال المرة مليون اترجاه نكشف اقوله اد ايه اما بسمع صوت طفل ببقى نفسي يبقى ليا طفل يشوفني ليل ونهار بتفرج على فيديوهات اطفال يقولي هحاول ويكبر دماغه ولا عمل اي حاجة والله من عام 2015 او 2017 بالكتير اوووي ما وداني لدكتورة اكشف اشوف في ايه هي مرة واحدة في اي سنة منهم مش فاكرة عملت زيارة لطبيبة وتحاليل وكانت التحاليل ان كله تمام وما تركني اروح اعادة الكشف
هو عمل تحليل طلع عنده ضعف مخزون خد علاج اسبوعين وما راح لاي طبيب لمدة كام سنة ومن سنتين تلاتة عمل تحليل تاني بس ما راح لطبيب والحجة عنده انه بعدين مش وقته الفترة الجاية كله هيتغير ومفيش حاجة بيتغير الحجة عنده مش ماديات هو بيصرف اوقات كتير على المخدرات واوقات مبالغ كبيرة على مكملات غذائية وحديد وبارات عشان التمارين الل بيعملها قولتله كتير طيب خلاص سيب فلوس شغلي اكشف بيهم اعمل اي حاجة يضحك عليا بالكلام انا هعملك كل حاجة واول ما تيجي الفلوس بياخدها وانا اسكت اهلي اترجوه يعمل حقن مجهري كذا مرة وقالوله هنساعدك فيه هيدفعوا اكتر منه بكتير تكاليف العملية وهو عليه العلاج والكشف رفض بحجة ان محدش يديه حاجة ودي كانت حجة لاني متاكدة انه مش فارق معاه بيعترف كتير انه مش فارق معاه ولا بيتمنى زي اي حد انه يبقى عنده اطفال بيقول جت يبقى خير وحاجة حلوة او مجتش عادي مش فارقة الاطفال مسؤلية وهم كبير تعبت من كتر الكلام وصلت لمرحلة ان انا كمان مبقاش فارق معايا اي حاجة مبقتش عايزة حاجة عايشة وخلاص يومي بحاول ارضي ربنا بالعبادات والبعد عن الذنوب لا بكلم حد ولا ليا دعوة بحد بمعنى الكلمة حرفيا ولا بتكلم معاه هو كمان الا هنعمل اكل ايه النهاردة او اي كلام عام بس اغلب الوقت كل واحد فينا في دنيا تانية ساكتين انا اشتغل وهو يلعب رياضة كتير اقوله واخرتها يقولي قريب حياتنا هتتغير وتعدي شهور ولا اي جديد من شهر رمضان كان واعدني اول ما الشهر يخلص هيشتغل اي حاجة ولليوم قاعد ف البيت يتدرب رغم انه عمره حاليا ٣٩ سنة قولتله انا الل بيخليني لسة عايشة معاك انك صعبان عليا اني اسيبك مالكش حد غيري لانه فعلا مالوش اصحاب ولا اي حد قالي ومين قالك ان انا مش بفكر زيك انا كمان ساعات يحسسني انه كمان مش فارق معاه وزهق وساعات يحسسني انه لا ما يستغنى عني حيرني معاه مش هنكر ان مقصرة معاه وكتييير وان ما في حد يتحملني زيه بس من تعبي انا من سنين عايشة ميتة وقلتله نشوف حل لكن مفيش اي رد فعل ده الل خلاني افكر ابعد يمكن هو يتغير يلاقي سعادته مع غيري وانا ارتاح من الحيرة واعيش مع نفسي اسفة طولت على حضرتك |
رد: محتارة اعمل ايه ممكن تساعد
اقتباس:
|
رد: محتارة اعمل ايه ممكن تساعد
بصى يا سارة مفيش حاجة بتتغير بدون سبب وتذكرى ان السماء لا تمطر ذهب ولا فضة الله عز وجل قال {ذَلِكَ بِأَنَّ اللّهَ لَمْ يَكُ مُغَيِّراً نِّعْمَةً أَنْعَمَهَا عَلَى قَوْمٍ حَتَّى يُغَيِّرُواْ مَا بِأَنفُسِهِمْ وَأَنَّ اللّهَ سَمِيعٌ عَلِيمٌ}الأنفال53 {لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللّهِ إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ وَإِذَا أَرَادَ اللّهُ بِقَوْمٍ سُوءاً فَلاَ مَرَدَّ لَهُ وَمَا لَهُم مِّن دُونِهِ مِن وَالٍ } الرعد11 وقبل التعليق على كلامك اسألك سؤال وانا عارف انك صريحة بإذن الله انتى توقفتى تماما عن هذه الاشياء ام تحنى وتضعفى من وقت الى آخر |
رد: محتارة اعمل ايه ممكن تساعد
اقتباس:
في السنوات الماضية توقف تماما عن كل حاجة ورجعت تاني ضعفت وتوقفت بفضل الله حتى اخر مرة من خمس سنين تقريبا بسبب الام العظام اطباء كتبولي علاج اعصاب ووالدي طبيب بردو قالي اخد الدوا وكان هو الل بيجيبهولي اوقات ودوا الاعصاب ده بردو كان الشباب يتعاطوه مخدر وزوجي كان عارف انا اتعودت عليه وزوجي كان بياخد منه هو كمان وبصراحة كنت باخد جرعات زيادة عن المحددة بس لقيت ان نفس الوضع رجعت زي الاول وقررت ان انا حتى مش هاخد منه اقل حاجة لانه تعبني نفسيا وبفضل الله توقفت عنه من اكتر من اربع سنين ووالدي عشان كان عارف المرة دي ساعدني اتغلب على اعراض الانسحاب بأدوية اخرى ما في منها ضرر لان طبعا مثل ما حضرتك عارف ان مفيش حد من اهلي يعرف اي حاجة عن الماضي لحد الآن ومن يومها مهما يوصل تفكيري اقول ابدا كفاية بهرب بالنوم من كل حاجة |
رد: محتارة اعمل ايه ممكن تساعد
الحمد لله يا سارة الحمد لله ، اسأل الله لك الثبات وان يصرف عنك كل سوء ولكن بصراحة المشكلة فى زوجك هداه الله ولكن طبعا لا يمكن ان القى اللوم كله عليه لانك رضيت بهذا الامر سنوات طويلة ولا يمكن تغير هذا فى يوم او اسبوع المهم الان يجب من وقفه بإذن الله ويجب ان يصل الى زوجك انك هذه المرة سيكون لك موقف وموقف حازم ان شاء الله ابدئى من الان التمهيد له ان صبرك نفذ اما ان يشتغل ويبدأ الحياة ويتحمل المسئولية والا لا يمكن لك الاستمرار اما موضوع الاطفال فاتركيها الان الى ان نرى موقف زوجك هل سيتغير ويتقى الله فيك وفى نفسه ويتوقف تماما بإذن الله عن كل ما يتعاطى ويخرج الى العمل مثله مثل اى رجل متزوج وفاتح بيت اما لا يمكنه هذا ابداً اعطى له مهله الى نهاية هذا الشهر ان شاء الله اليوم السابع من اكتوبر تحدثى معه غدا الجمعه بإذن الله تعالى واتركى له باقى الاسبوع ولا تتحدثى معه يوم الخميس القادم بإذن الله اذا لم يتحرك تآخذى شنطتك وتذهبى الى والدك وترسل له ذهبت الى اهلى لكى افكر فى مستقبلنا هل يمكن لى الاستمرار معك ام لا وطبعا لن يقبل ويقول ارجعى ووووو قولى له سيبنى الخميس والجمعه ونتكلم السبت ويوم السبت ان شاء الله ارجعى بيتك وقولى له رجعت لكل الاسباب التى ذكرتيها لى ، اذكريها له قولى رجعت فقط ولكن يجب ان تعلم ان التى تقف امامك الان آمرة آخرى ولن اقبل ان يضيع عمرى معك اذا لم تتغير انت حر فى حياتك ولن اتسطيع ان اجبرك على شىء لا تريده لقد صبرت 10 سنوات وهذا يكفى تماما اذن ننفصل وكل واحد يشوف نصيبه وسنرى يا سارة على نهاية الشهر موقف زوجك اما يتحرك والا سنتتقل الى المرحلة الثانية بإذن الله تعالى من العلاج يسر الله آمرك طمنى عنك خلال هذه الايام بإذن الله ولو لك اى استفسار فيما كتبت تحت آمرك |
رد: محتارة اعمل ايه ممكن تساعد
سارة انت كم سنة الان ومنذوا متى تم الزواج اسعدك الله ويسر آمرك واذكرك اليوم ان شاء الله ليلة جمعه اكثرى فيها من الصلاة على سيدنا محمد صلوات الله عليه وغدا الجمعه ان شاء الله ولا تنسوا قرآة سورة الكهف |
رد: محتارة اعمل ايه ممكن تساعد
تمام هنفذ كلام حضرتك
انا بالفعل الفترات الماضية كل يومين بمهد ليه ان خلاص تعبت ومش هكمل ولو هو مش عايز يغير يسيبني انا اعمل اي حاجة وابعد يمكن ده يخلينا نحس بقيمة بعض او يبقى سبب في سعادتنا ف البعد واوقات احس انه مش فارق معاه من ردوده انه يقولي براحتك مش هربطك بيا كل ده لو مش مرتاحة واوقات يرفض ويقول بطلي كلام الهبل ده او يتجاهل وما يرد عليا وانا قبل كده بعدت وروحت لاهلي وكلموه بدل المرة كذا مرة يوعد بوعود كتيير ع الفاضي او يكون ايام بيبحث عن عمل او مشروع ينفذه ويومين ويختفي بحثه وموضوع انه يبطل بردو يبطل شهر ويرجع شهر ويروح لمعالجين وياخد ادوية وفي نفس الدوامة كل فترة بحال وفعلا مش هنكر ان الغلط الاكبر عليا انا وده الل بيخليني احس بالذنب لما افكر ابعد واحس ان بظلمه بس هنفذ كلام حضرتك وابلغ حضرتك بكل جديد اما بالنسبة لعمري انا ٣٢ سنة الا شهور قليلة ومتزوجة من ٢٠١٢ يعني قريبا بكمل عشر سنين زواج الله يكرم حضرتك ويرزقك الفردوس الاعلى وبإذن الله هنفذ كل وصايا وكل كلمة حضرتك قلتها |
رد: محتارة اعمل ايه ممكن تساعد
بسم الله ماشاء الله
ربينا يبارك فى عمرك انت اتجوزتى صغيرة جدا ده اللى فى سنك لسه بنات ولم يتزوجى العمر كله قدامك باذن الله وربينا يتقبل دعائك ولك اضعاف اضعاف يا رب العالمين المهم لا تراجع ولا استسلام ان شاء الله الحمد لله انك صحيت فى الوقت المناسب يسر الله آمرك وحفظ لك الوالد والوالدة اظن يا سارة انتم اخوات بنات وليس لكم اخ رجل |
رد: محتارة اعمل ايه ممكن تساعد
وعلى فكرة الغلط مش كله عليك لانه فى النهاية زوجك رجل ويعلم الصح من الخطا واكيد هو يعلم ان مفيش ست تقبل تعيش معاه بظروفه ده والمفروض كان يحمد الله على انه تاب عليه وينصلح حاله ويسجد لله شكرا على وجود زوجة مثلك فى حياته ويسعى بكل جهده للحفاظ عليه مش يقعد بدون عمل نسال الله العافية وكمان ياخد فلوسها والعواذ بالله وان لله وان اليه راجعون ولا حول ولا قوة إلا بالله اسال الله لنا له والهداية والتوفيق وحسن الخاتمة |
رد: محتارة اعمل ايه ممكن تساعد
اقتباس:
تسلم يارب لا ليا اخ ولد اكبر مني باربع سنين مشكلته زي زوجي واكتر وكنت دايما بردو بستشير حضرتك في مشاكله وحضرتك دايما كنت بتساعدني وعمري ما بنسى ده ابداا |
رد: محتارة اعمل ايه ممكن تساعد
اقتباس:
لا حول ولا قوة الا بالله نعم تذكرت وكيف حاله الان والله يا ابنتى الكريمة حال الشباب اليوم حال يحزن ولا حول ولا قوة الا بالله الله المستعان اسأل الله العلى القدير ان يهدى شباب الاسلام ويردهم الى دينه رداً جميلاً ويهديهم ويحفظهم ويصرف عنهم الفتن اللهم آمين وصلى الله وسلم وبارك على سيدنا محمد وعلى آهله وصحبه وسلم |
رد: محتارة اعمل ايه ممكن تساعد
السلام عليكم
أخبارك ابنتى الطيبة اريد ان اطمئن عليك |
رد: محتارة اعمل ايه ممكن تساعد
السلام عليكم ورحمة الله وبركاته
اسفة اني اتاخرت على حضرتك في الرد انا الحمد لله بخير بس ما كنت عارفة ارد اقول ايه انا عملت كل الل حضرتك قلتلي عليه وكلمته وقلتله ان خلاص مش هتحمل وان مش قادرة اعيش كده ولازم حل وان همشي وهبعد طول ما هو كده ومفيش تغيير بس مشكلتي ان مش بعرف اتكلم معاه ولا مع اهلي كويس مش بعرف احكي الل جوايا هو من يومها لا جديد اوقات يبقى متعصب واوقات احس انه عايز يوصل ليا انه هيتغير ممكن يساعدني في البيت يجيب سيرة انه بيفكر ف مشروع يقولي اني لو لفيت الدنيا مش هلاقي زيه بس كل ده حصل كتييير من غير افعال وبالنسبة للشرب هو ما بقاش بيشرب كتير ولا زي حاجات زمان وشايف ان حاجة زي الل بيشربها زي السجاير عادي وانها مش ماثرة وانه كان فين وبقى فين انا كان المفروض ان بكرة هروح لاهلي ومش هرجع البيت تاني الا لو اتغير بس مش قادرة اعمل ده حاليا بسبب خوفي اولا وضعف شخصيتي الل مخلياني مترددة في كل حاجة ومش بعرف اخد قرار وثانيا بسبب ردود فعل اهلي واخواتي كانوا دايما بيشجعوني ان اعمل كده لما قلتلهم من اسبوع كلهم حسسوني ان هعمل جريمة وان خلاص الطلاق كده هيحصل وان لو عملت كده اعمل حساب ان زوجي عنده كرامة وممكن يرفض يرجعلي وماما كانت دايما تحاول اسيبه دلوقتي كل ما اقولها تهرب مني في الكلام بأي حاجة مش عارفة اقوي شخصيتي ازاي واخد قراراتي بنفسي دون انتظار اي دعم منهم وااكد ليهم اني مش هبقى عبأ عليهم وهتحمل مسؤولية نفسي انا اكيد هنفذ كلام حضرتك واخد موقف وامشي بس هاجل ده اسبوع بس لحد ما اشوف هعمل ايه |
رد: محتارة اعمل ايه ممكن تساعد
ممكن اهلك ليس قصدهم انك ثقيلة او انهم غير. رايهم في زوجك و انما خلاص ممكن تعبوا من ترددك فهمناك اناس يقعون في مستنقع ويستشيروا و يطلبوا المساعدة لكن هدفهم فقط الفضفضة و الموانسة و ليس انهم يطلعوا و يبذلوا جهد انهم يخرجوا من المستنقع اللي واقعين فيهم
فبدهم حدا يجلس امامهم يمسك ايدهم و مايحاول يطالعهم ولا يبذلوا مجهود اصلحي مابينك و بين الله من ترك شيئا لله عوضه الله خيرا منه وايضا - من التمس رِضا اللهِ بسخَطِ الناسِ ؛ رضِيَ اللهُ عنه ، وأرْضى عنه الناسَ ، ومن التَمس رضا الناسِ بسخَطِ اللهِ ، سخِط اللهُ عليه ، وأسخَط عليه الناسَ الدنيا هذه ايام و نرحل ماذا اعددتي للرحيل ؟ |
رد: محتارة اعمل ايه ممكن تساعد
اقتباس:
فعلا مش هنكر ان العيب في اني مترددة وضعيفة هما لم يقصدوا بأني عبأ عليهم هما اهلي وبعرف اد ايه بيحبوني بس الل انا قصدته ان هما رغم انهم معتقدين ان زوجي تعافى من الادمان من اكتر من سنتين ولكن كانوا بيشجعوني ان ابعد عنه وخاصة مامتي بسبب ان مش بيعمل اي حاجة كانت كل متشوفني تقولي كده وانا كان ردي بالرفض ليه لما انا الل قلت عايزة ده هي سكتت لدرجة ان ابقى بكلمها واقولها يا امي اعمل ايه متردش تنشغل بالهاتف ليه مفيش حد استغرب ايه الل غير موقفي ليه مسالوش بقول كده ليه هما فعلا قالوها مرة ان انا جبانة وبخاف بس كنت فاكرة هيشجعوني لكن يا اخوات يهاجموا يا اما تجاهل ده الل خلا الموقف اصعب عليا وهما عارفين ان انا مش بقول للفضفضة ان انا من الشخصيات الكتومة جدااا ولا بحكي ولا حد يعرف حاجة عن حياتي منهم غير الظاهر بس انا فعلا اشبه بطفل او عجوز مش قادرة تعمل حاجة محتاجة حد منهم ياخد ايدي ويحركني ويواجه كل حاجة وانا ابقى بعيد عايزة اهرب وبس الله يهديني ويهدي الجميع بحاول اعد للرحيل الله يجعلنا من عباده الصالحين والمتقين |
رد: محتارة اعمل ايه ممكن تساعد
اقتباس:
ابنتى الكريمة الوقت ليس فى صالحنا الان انت فى سن تبدأ حياتك بإذن الله لو ربى لم يقدر لك الاستمرار كل يوم تاخير ليس فى صالحنا ابدا ابدا ابدا وانا لم اطلب منك الطلاق انا اطلب منك وقفه حازمة يا ابنتى الغالية اليوم اهلكم على قيد الحياة اطال الله فى اعمارهم ورزقهم حسن العمل غدا لن تجدوا من ينفقوا عليكم ولن تجدى انت اليد التى تربط على كتفك ولا تعينك انت فاكرة الفلم العربى بتاع فريد الاطرش وهند رستم لما كان بينهم حب جارف ولكنه مهمل ولا يعمل على الرغم من انه لدية موهبة فذة ماذا فعلت هى تركة ولكى تثبت له انها لن تعود تزوجت من آخر بدون حب فقط علشان تثبت له انها ضاعت منه ماذا حدث له تفجرت كل الطاقات بداخله واراد ان يثبت له انه ناجح وليس تافهه وليس عالة ابحثى عن الفلم على النت وشاهديها هيغير فى معانى كثيرة جدا ان شاء الله بإذن الله تعالى المغزى من قصة الفلم اننا ربما تفعل اشياء تآلم فى اول الامر ولكنها علاج مثلها مثل الكى حفظك الله يا ابنتى زوجك متوقف عن كل شىء حتى الاطفال التى يتمنها اى مخلوق لا تفرق معه ولا يفرق معه العمل من دونه ولا ان يتحمل مسئولية آسرة الا يكفى سلبية وتردد اللى ضيعوا من عرمك عشر سنوات لا حول ولا قوة الا بالله تحركى ابنتى الطيبة انسى الناس كلها معك الحى القيوم رب السموات والارض ثم ابوك ربى يحفظه ويبارك فيه العمر يمضى ولن ينفع الندم بعد العدم والعمر الذى يمر لن يعود استخيرى الله وانسى الوهن والضعف وكونى قوية وثقى انك لن تفعلى الا ما يكتبة الله لك |
رد: محتارة اعمل ايه ممكن تساعد
ابنتى الطيبة السلام عليكم ورحمة الله اين اختفيتى اريد ان اطمئن عليك ولا يضرك تآخر التحرك فى النهاية نحن نتناقش المهم هو تحرك زوجى وتغير حياتك بإذن الله تعالى الى الافضل اما انقطاعك كما فعلتى المرة الماضية اكبر خطأ العمر يمر ولا يعوضك ولا يصح ابداً ان تستمرى كما انتى لو انتظرتى 5 سنوات آخرى سيكون عمرك عند العودة اذا قدر الله لنا العمر شارف على 40 العام ووقتها ستكون كل الظروف مختلفة هداك الله ويسر آمرك منتظر ان اطئمن عليك ان شاء الله تعالى |
رد: محتارة اعمل ايه ممكن تساعد
الله يرزق حضرتك الفردوس الاعلى
بشكر حضرتك على اهتمامك بجد الل كل مرة بيسعدني ويخليني احس ان الدنيا فيها خير وفعلا ما بلاقي الاهتمام ده من اي حد حواليا الله يباركلك يارب ورد حضرتك يدل على انك فاهمني كويس جدااا انا فعلا مش عارفة ارد عشان لم اتخذ اي خطوة إلى الآن كله كلام بقوله لزوجي واهلي كلهم حاصروني بنفس الرد انتي بتاعة كلام نفذي وبعدين اتكلمي حاسة باحباط رهيييب مخليني منعزلة عن الكل بس انا متاكدة اني هنفذ وقريب جدا خلال ايام بإذن الله لأن مفيش حل غير كده وحضرتك قلتها إن مهما أعمل هو ده المكتوب وهو الل كان هيحصل كل ال بفكر فيه انفذ امتى وامشي اروح اقعد عن بابا وانهي الصراعات الل جوايا دي والل يحصل يحصل واكيد مهما جرحت زوجي بالفعل ده لأنه رافض تماما اني اروح اقعد كام يوم مع اهلي بس جرحه مش هيبقى اكبر من جرحه بالحياة الميتة دي والله ييسر الامر ويهديني للخير |
رد: محتارة اعمل ايه ممكن تساعد
اخيرا ردتى يا ست سارة الله يهديك المهم الحمد لله انك بخير لى عودة للرد ان شاء الله اكثرى من لا حول ولا قوة الا بالله ومن حسبنا الله ونعم الوكيل ومن الاستغفار والصلاة على سيدنا محمد صلوات الله عليه |
رد: محتارة اعمل ايه ممكن تساعد
اقتباس:
السلام عليكم ورحمة الله وبركاته انا عارفة اني اتأخرت جدا في التنفيذ بسبب ضعف شخصيتي بس اخيرا قدرت اتحكم في نفسي واتغلب على الخوف والتردد والتأجيل كان دايما بيتردد في دماغي كلام حضرتك ان لازم افضل فاكرة ومتذكرة ان أي حاجة بعملها والل هيحصل هو ده المكتوب وال كان هيحصل وارادة ربنا في اول الاسبوع اتفقت مع زوجي ان هروح اقعد مع ماما يومين افكر هكمل معاه ولا لا وان وجوده معايا بيضعفني وان مش قادرة اعيش ف الضغط النفسي ده لازم اقرر واخد قراري بالعقل وهو رغم ان بقالي شهور بقوله همشي وابعد وقلتله كل الكلام ده وكل يوم تقريبا بفكره يقولي نفذي وامشي ومفيش اي كلام بيننا عن حياتنا ابدا هو بيهرب وانا اكتر منه هروب كل كلامنا هناكل ايه ولو عن اي حاجة عامة ف الدنيا ومفيش تغيير بردو وفكرت ان من ناحية اهلي ممكن فعلا عشان شايفين اني بتاعة كلام بيتجاهلوني قلت هروح اجرب واشتغل واعتمد على نفسي ومش هخليهم يحملوا همي بس عشان لسة ف الاول مخنوقة مش عارفة ليه مش مرتاحة من الخوف ولا بسبب اني اول مرة اقرر حاجة وانفذها مش عارفة اعدي الايام دي ازاي وكمان انا قلت لزوجي يومين افكر اواجهه ازاي بعد كده اني قررت ابعد فترة لحد ما هو يبقى كويس والدنيا تتغير ويفوق لنفسه ولو حب نرجع انا معاه او يتجوز هو اقوله وجها لوجه ولا في رسالة وعادي وهو عارف اني مش بعرف ولا اقدر اواجه حد ولا اتكلم حتى مع اهلي هيفهم كده ولا هيفهم انها اهانة عشان رسالة وانا قررت من جوايا ان مش هرجع الفترة دي هاخد اجازة طويلة على الاقل ٣ شهور اعرفه ازاي ده من غير ما اجرحه ولا اهلي يجرحوه عايزة يعرف مني انا بس من غير ما اواجهه اقول ايه واعمل ايه في كل حاجة مش عارفة وازاي اوصل لاهلي انهم ما يحملوش همي ويتطمنوا اعمل ايه غير انهم يشوفوني بشتغل واهرب من كلام اخواتي او غيرهم من الل رافضين تصرفي ده ازاي بحاول اتجنب الكلام مع اي حد وواخدة جنب مع نفسي بس حاسة ان كل نظرة ليا وكل كلمة عليا حتى لو من بعيد الله يعمل الل فيه الخير ويثبتني على موقفي دايما داعية لحضرتك بالخير والجنة وبتمنى ما اكون ضايقت حضرتك بكثر كلامي واسألتي بس ربنا شاهد ان فعلا نصايح حضرتك بتساعدني اتخطى اوقات صعبة |
رد: محتارة اعمل ايه ممكن تساعد
اهلا ابنتى الغالية الله يوفقك واهم شىء مع اى خطوة استخارة الله تبارك وتعالى وانا بعد الله معاك بإذن الله وانسى خلاص موضوع تعبى المهم اتصل بيه وقول له يا فلان انت عارف حبى لك ولكن اللى احنا فيه مش حياة لا شغل ولا اطفال ولا حياة اصلا انا مش هضغط عليك ده حياتك وانت حر فيها وده حياتى وانا اللى لى الحق اقرر ما فى صالحى كفاية 10 سنين ضاعوا واحنا محلك سر لا احنا بنرجع كمان ولو فى بارقة امل ان شاء الله يبقى ده رزق من الله لو اشتغلت وبدأت تبنى حياتك انا موجودة وهيكون اسعد يوم فى حياتى اما موضوع العلاج والاطفال لا تتكلمى فيه الان المهم اولا جوزك يتغير ويعتمد على الله ثم على نفسه علشان يكون قادر يفتح بيت ويشيل مسئولية زوجة واطفال اما اهلك انسيهم ده حياتك لما كنتى حزينة ووحيدة محدش نفعك خليك مع الوالد وبس هو اللى هيفهمك ويقدر موقفك ان شاء الله وانا بفضل الله معاك اى اسئلة تحت آمرك لا تنسى اليوم ليلة جمعه سورة الكهف وكثرة الصلاة على الرسول الكريم صلوات الله عليه مع كثرة الاستغفار وصلاة الليل والفترة ده مهم جدا تكون قريبة جدا من الله عز وجل |
رد: محتارة اعمل ايه ممكن تساعد
السلام عليكم ابنتى ان شاء الله يكون فى اخبار طيبة ، ربى يسعدك منتظر ردك |
رد: محتارة اعمل ايه ممكن تساعد
اقتباس:
انا الحمد لله بخير واتمنى من الله دوام الصحة والعافية والخير لحضرتك دايما يارب للاسف انا غلطت غلطة من ضعفي مقدرتش اواجهه وكان بيكلمني يطمن عليا وقالي مش قلتي يومين تفكري هتقرري ايه مش هتيجي قلتله مش عارفة اما عرفت انه لوحده ومش راضي يروح يقعد عند اهله صعب عليا وقعدت افكر اروح ليه انضفله واعمله اكل وخليته جه خدني امبارح ولا سألني قررتي ايه ولا قالي اي حاجة كان بس عصبي وشكله حزين حتى لما قلتله ازاي سيبتني اروح افكر اذا كنت هبعد عنك ولا لا قالي الل مش عايزني مش عايزه ونفس الحياة ونفس الكلام عن البيت والاكل كل الل قاله عن الشغل انه بيفكر بس مش لاقي نفسه في اي حاجة حسيت اني رجعت لنفس الحياة وجوايا صراع ان ده مينفعش وندمت اني جيت صعبان عليا جدااا بس عارفة ان جرحه هو الدواء لكل مشاكلنا والدتي تعبانة قلتله هروح اقعد معاها لحد ما تخف وهيوديني اليوم بليل ومش هضعف وارجع تاني وربنا يقدرني على مواجهته ووالدتي عايزاني اخد القرار بنفسي بس قالت ان الصح كلام حضرتك ووالدي مجبش سيرة بس بيحاول يجيبلي كل حاجة بحبها عشان يحسسني بالامان ليا اخت واحدة بس الل محسساني اني بياعة وبعته وغدرت بيه عشان هو اتحمل مني اهمال البيت واهمال في نفسي بحاول اتخطى كلامها بس بتضعفني ومواظبة على القيام والاستخارة والاذكار والدعاء |
رد: محتارة اعمل ايه ممكن تساعد
الله يسعدك ويوفقك يا ابنتى الغالية محدش قال لك سيبيه ولكن ده عملية كى وفيها الم شديد ولكن بعدها بإذن الله هتكون حياتكم طبعية وزى اى اسرة عادية وهو اول واحد هيشكرك على كده بإذن الله تعالى يا سارة اليوم بابا وماما موجدين ربى يحفظهم ولكن بكرا مش عارفين هتكون الدنيا ازى اليوم انت فى سن مازال المستقبل امامك بإذن الله تعالى ولكن لو وصلتى 40 يبقى خلاص مش هتقدرى تعملى حاجة اما عن اختك قول لها انا ادرى بحياتى فى حاجات انت مش عارفها ولو انت مكانى مكنتيش صبرتى سنة واحدة يكفى يا سارة ان الله يسامحه زوجك من جر رجلك الى الطريق الاسود اللى ربى انقذك منه ومع الاسف هو كانت نية سيئة كان عاوزك تبقى زية علشان يربطك بيه ومتقدرش لا تبعدى عنه ولا تفضحية ولا تنسى ان لو ابوه مات مين اللى هيصرف عليكم فى النهاية هو حر فى حياة ولكن انت حرام عليك نفسك يا بنتى الحياة صغيرة جدا وان شاء الله ربى معاك ثم انا ارسل وفى اى وقت ان شاء الله هرد عليك ربى يسعدك ويوفقك اللهم آمين يا رب العالمين |
رد: محتارة اعمل ايه ممكن تساعد
اقتباس:
بسم الله ما شاء الله لا قوة الا بالله انت حنينة جدا الله اكبر الراحمون يرحمهم الله وابشرك برحمة الله لك بجد اكيد زوجك طيب لان الله تبارك وتعالى قال الطيبون للطيبات وان شاء الله اللى بنفسيتك ده بإذن الله ربنا هيكرمها بس لازم ناخد بالاسباب والسعى لان السماء لا تمطر ذهب ولا فضة |
رد: محتارة اعمل ايه ممكن تساعد
السلام عليكم ورحمة الله وبركاته
انا نفذت ورجعت بيت اهلي من يومها تقريبا اسبوع بعد اليومين الل رجعتله فيهم بيكلمني يطمن عليا وكويسة طيب سلام كلمني يوم الجمعة الماضية قالي ارجعي قلتله مش هقدر ماما مريضة وانا تعبانة نفسيا محتاجة اقعد فترة اهدى ونشوف هنعمل ايه قالي في البداية انتي هتسوقي فيها قلتله انا حابة كده قالي براحتك ماما كلمته قالتله تعالى شوية عندنا نتكلم وندردش اتهرب منها وقالها عندي مشاوير بكرة كلمني تاني يوم قالي قوليلها اني تعبان ومش هقدر اجي وارجعي ونروحلها بعدين قلتله لا انا محتاجة افضل هنا شوية تاني يوم كلمني بالرسائل وقالي احكي لمامتك انك عايزة تسافري وتغيري حياتك واكيد هي هتساعدك وتتمنالك الخير وخدي قرار يا ترجعي يا نبعد خالص قلتله انت هتبقى راضي عن اي قرار قالي ايوة المهم تكوني مرتاحة قلتله هشوف واقولك تاني يوم بعتلي رسالة انجزي في تفكيرك ده يلا مش عايزة حاجة سلام قلتله طيب اول اليوم لقيته باعتلي رسالة اما تصحي ابعتيلي بعتله اخبارك وكده قالي انتي هتفضلي كده قلتله انا مش مرتاحة ف الحياة اعصابي تعبت من الحياة ننام ونصحى وناكل ونشرب ولا فيه اي جديد قالي خلاص هكلم باباكي وننهي الموضوع قلتله زي ما تحب بعدها بساعتين بعتلي مش عايزة نقعد ونتفاهم قلتله تعالى اقعد معايا انا وماما قالي لا انتي لوحدك قلتله انت اما ضغطت عليا الصبح وقلتلي لازم قرار اضطريت اقولهم ف البيت وماما قالت مش هتروحي لوحدك قالي لا محدش يدخل في حياتنا قلتله مش هينفع اتكلمنا سالته مش ناوي تتغير قالي ضحكتيني انا الل اتغير ولا انتي اتكلمنا قلتله انت شايف ان حياتنا دي طبيعية زي الناس قالي الصراحة انا شايف ان انا طبيعي انتي الل مش طبيعية وفاهمة الحياة غلط قلتله انا خلاص تعبت ولا بقيت باكل ولا اشرب ولا قادرة اهتم بنفسي ولا شغلي ولا بيتي وليل ونهار بدموعي لما جيتلك يومين قلت اجرب لقيتني منهارة وانت كل ردودك ان المشكلة عندي انا وانك راضي بالحياة دي قالي طيب انتي هتعملي ايه عندك هتسافري قلتله انا هنا مرتاحة عن بيتنا والموضوع مش سفر انا مش هسافر انا قاعدة في بيت اهلي عشان تعبت واتدمرت وانت مش حاسس وكله عندك عادي قالي انتي اوفر ومش عارفة عايزة ايه قلتلك تعالي اوديكي تتعالجي نفسيا قلتله شهور بكلمك واقولك هبعد وانت كل كلامك نفذي متتكلميش او براحتك وعادي لا بنام ولا اكل ولا اشرب ولا انضف ولا اعمل اي حاجة بموت ادامك من الضغط النفسي عملت ايه حاولت تعمل ايه قلتله خلاص لو انت شايف ان انا المريضة وانت تمام انا في بيت اهلي ملزومين يعالجوني اما اتعالج ابقى اجيلك قالي خلاص انا الل هاخد القرار واعرفك بيه الصبح قلتله ف انتظارك مش عارفة اتصرف معاه ازاي وهو برغم كل كلامي عن الشغل وحياته شايف انه طبيعي وانا الل اوفر شايف اني ارضى وخلاص وعايشة اكل واشرب مش مهم مين الل بيصرف علينا مفكرش لحظة في كل حقوقي الل مش موجودة وانا فعلا مبقتش قادرة اتحمل ارجع البيت عندي نفور من البيت رهيببب عند اهلي اكيد من المشاكل واثر البعد مش مرتاحة بسبب بعدي عنه والمشاكل بس مرتاحة عن الرجوع ليه والحياة الل كنت فيها مبقتش عارفة عايزة ايه وبردو مش عايزة ارجع وصعبان عليا فراقه بس رجوعي بالحالة دي بردو مش هقدر اهتم بيه كزوجة وبيت لاني متدمرة نفسيا اتصرف معاه ازاي لو قال تاني نتفاهم ولو قال نبعد هقوله تمام |
رد: محتارة اعمل ايه ممكن تساعد
وعليكم السلام ورحمة الله وبركاته اهلا ابنتى الطيبة يسر الله آمرك وفك عنك كربك ورزقك بالسعاة فى الداريين طبعا استمرى فى استخارة الله تبارك وتعالى ، لانها التى ستنير لك الطريق واثبتى على موقفك الكلام من اليوم باذن الله مع بابا وماما ولا رجوع ان شاء الله الا بعد ان يتغير جزريا وليس اسبوع او شهر بل فترة كافية للتاكد انه فعلا اعتمد على الله ولن يعود الى ما كان فيه والافكار كثيرة باذن الله ولكن عندما يقتنع ان حياته بايظة ولا توجد إنسانه من بيت تقبل هذه العيشة ابدا ابدا ابدا إياك ان تضعفى ثبتك الله ثبتك الله توكلى على الله ولن يضيعك باذن الله تعالى ومن يتوكل على الله فهو حسبة اكثرى من لا إله إلا انت سبحانك انى كنت من الظالمين اما موضوع انه هيسيبك ده كلام عيال معتقد انك سارة االى غشها وضحك عليها لما كنتى طفله ومراهقه ولا تعلمى عن الحياة اى شىء خليك قوية وحاسمة سمعانى قوية بفضل الله وحاسمة يجب ان يصل له ذلك قولى انت كل حياتك غلط واى حد هيقول لك كده ، عاوز تتغير انا منتظر أشوف تغيرك عاوز تبعد يبقى ده قرارك وافتكر انك من اتخذ القرار وليس انا حتى لا تقول انى غدرت بك او تخليت عنك الان الكرة فى ملعبه ، والقرار عنده وانا متاكد باذن الله عندما يتاكد ان سارة 2022 هى واحدة تانية ومختلفة تماما عن سارة 2012 سيبدا فى التفكير العاقل والذى يجعله يحتفظ بيك ولا يخسرك باذن الله ولكن ذلك لن ياخذ اسابيع بل شهور 20 سنة حياته غلط ولن تنصلح الا بعد ضربة موجعه تجعله يفيق ان شاء الله اياك ان تضعفى اياك ان تقبل انصاف الحلول 11 سنة كافية تماما لكل هذا الكلام الان وقت التغير الكامل باذن الله تعالى الحمد لله رب العالمين حمدا دائما طيبا كثيرا انه اعانك على هذا القرار واسأله سبحانه ان يثبتك وتوقعى منه الكثير لانه لن يقبل التغير بهذه السهوله وان شاء الله اهلك معاك وانا بفضل الله بجوارك لا تتخذى اى قرار الا بعد استخاره الله ثم الاستشاره يسر الله آمرك يسر الله آمرك يسر الله آمرك |
رد: محتارة اعمل ايه ممكن تساعد
الله يحفظك ابنتى الطيبة عاوز اطمئن عليك ان شاء الله كل خير |
رد: محتارة اعمل ايه ممكن تساعد
السلام عليكم ورحمة الله وبركاته
الله يحفظ حضرتك ويباركلك يارب تسلم يارب ع سؤالك دايما عن احوالي الجديد انه يوم الخميس امس ارسلت ليه رسالة ان والدتي مريضة ومحتاجاني معاها ممكن يوافق اسافر معاها برة مصر كمرافق وهرجع معاها هي وبابا اول ما اختي تقوم بالسلامة وتلد طفلها كان رده اتركه وقت قليل يفكر وان شاء الله خير في اخر اليوم بعتلي يتفاهم معايا انتي عايزة نكمل مع بعض جاوبته اكيد عايزة ولكن مش في نفس الحياة دي قالي يبقى ترجعي تعملي واجباتك وحقوقي عليكي من اكل وتنظيف وحقي الشرعي مش عايزه منك تماما ونهاىيا قلتله مش هقدر اعيش حياتك دي لازم كلها تتغير انا مش هرجع الا بعد التغيير تعبت واتدمرت قالي انتي بتعصي ربنا ومش هتدخلي الجنة بتصرفاتك دي انتي مبتسمعيش كلام جوزك وبتغضبي ربنا قلتله انت قلت اني مريضة ومحتاجة علاج ولا يكلف الله نفسا الا وسعها اعتبرني بتعالج لحد متتغير قالي مش هينفع الكلام كده هجيلك تنزلي معايا قلتله مش هنزل عايز تقابلني يبقى في وجود امي وابويا قالي هي وصلت للدرجادي ان مش هعرف اقعد معاكي لوحدنا قلتله انت اكتر حد حافظني وعارفني اني مش هعرف اواجهك كرر كلامه اني هبات عاصية لربنا وغضبان عليا وان الكلام ده مش لعبة وان ليا اب يترد عليه ما رديت عليه بعدها بساعتين انا بعتله ليه بتعمل كده احنا بنتفاهم اهو قالي مفيش تفاهم بينا بعد ما وصلت ان مش عايزة نتكلم لوحدنا انتي كنتي بتقولي دايما عن نفسك خبيثة ومبصدقش طلعتي فعلا خبيثة وغضبان عليكي وعاصية لربنا وبكرة تعرفي قيمة النعمة الل كنتي عايشة فيها والله يسهلك ويهديكي ما رديت عليه تاني يوم الل هو اليوم الجمعة كلم بابا وجاء عندنا هو وواخوه زيارة ما دخل اول كلمة ليه بعصبية يا دكتور هي سارة هنا بتعمل ايه وكل كلامه بصوت عالي وعصبية قال كل عيوبي ادام اخوه وابويا وامي ومصمم يطلعني انا الوحشة رغم ان شددت على اهلي ما حد يجرحه بكلمه ولا يجيب سيرة الحمل والانجاب ولا شغله ولا اسرارنا قولوله هي تعبانة ومحتاجة ترتاح بس للاسف من كلامه امي قالت عن الشغل والانجاب وانت عمرك ما جبتلها حاجة انا قلت مش هنكر تقصيري معاك بس انا تعبانة محتاجة امي وابويا ارتاح عندهم لحد ما اخف وانت تغير حياتك قالي هتنزلي معايا يعني هتنزلي وتشوفي واجباتك زي اي واحدة عشان تعرفي قيمة ان كنت متساهل معاكي ف تقصيرك بابا قاله لا مش هتمشي غير بارادتها قاله يبقى خلاص كل واحد يروح لحاله هي بتعصي جوزها والشرع بيقول مالهاش حقوق عندي هي كده ال طالبة الطلاق كسرني ادام اهلي خلا قيمتي عنده شوية اثاث مالهمش اي لزمة اهلي ردوا عليه انت حر شوف الل عايزه واعمله اخوه حاول يهدي الموضوع ويقول الحل تروح معاه تغير جو في اي مكان ويتفاهموا قلتلهم سيبوني يومين افكر اشوف هقبل التفاهم ده ولا عشان اديه فرصة هو يفكر قبل ما توصل للطلاق بعد ما مشي انا قلت ارجعله ازاي بعد ما عمل كده معايا لانه كان بيتكلم بقلة ذوق ويعلي صوته ع اهلي انتوا مالكوش كلمة عليها دي مراتي انا ومحسسني اني هربت من البيت رغم ان جيت هنا وهو الل موصلني بارادته بعدها بعتلي انه غلط لما فكر ان مقدرش استغنى عنه وابعد وكان واهم وغلطته انه قالي اعملي الل يخليكي مبسوطة ما رديت بعتلي انه غلط ومع الوقت والتفكير والعزلة اكتشف انه غلطان بس انتي غلطتي اكتر انك بعدتي ومش بتدينا فرصة نتفاهم واوعدك اني هغير حياتنا واخليكي مبسوطة ع قد ما اقدر انا قلتله مش قادرة اتكلم بكرة نتكلم لاني حسيت انه بيقول كلام عشان كل همه ارجع البيت ويسيطر عليا خايفة منه معرفش ليه مفرحتش بكلامه لانه مش معقول ولا منطقي انه اقتنع انه غلطان في ساعتين وهو بقاله اكتر من اسبوعين شايف نفسه عادي وطبيعي وانا الل وحشة ومش راضية عن الحياة وكانت مقابلته معانا كلها هجوم وعصبية انا مقررة مش هرجع الا اذا في تغيير جذري فعلا بالافعال واما اتكلم معاه هعرف هو فعلا ندم وهيوافق يسيبني لحد ما انا نتغير ولا مصمم ع رايه وده مجرد كلام وكلامي معاه هيبقى ف التليفون او رسايل مش هقابله راي حضرتك انا كده صح ولا غلط واعمل ايه واتصرف ازاي هو لو ما كان بعت الرسايل الاخيرة كانت بالنسبالي منهية ومش عايزاه بس بقول يمكن ندم بس مش مرتاحة لكلامه |
رد: محتارة اعمل ايه ممكن تساعد
تسلمى ابنتى الغاليه يسر الله آمرك وثبتك ونصرك ورزقك من يقف الى جوارك خلاص يا سارة اتضحت الصورة هو فقط يريد خادمة وليس ذلك وفقط ولكن خادمة بدون مقابل بصراخة مكنتش فاكر ان كده لا رجولة ولا نخوة ولا عشرة ولا اى حاجة اكثرى من حسبنا الله ونعم الوكيل ومن وآفوض آمرى إلى الله ان الله بصير بالعباد ده بسبب الاختيار الخطا غفر الله لك ولكن الحمد لله انك صحيت فى الوقت المناسب والحمد لله ان ديننا حلل لنا الفراق بالاحسان لا وخادمة وحتى بدون حقوق شرعية عليه اه البني آدم ده يعنى اقل شىء لو زوج مثله ولا يقوم باى حقوق يرضى زوجة ويسعى لوجود طفل يخفف من هذه الحياة اليائسة البائسة المريرة القاسية اما موضوع ان الله يغضب عليك وان الملائكة تلعنك قول له الاول انت خلى الله عز وحل يرضى عنك روح اعرف حقوق الزوحة الاول والتى بعدها تكون ناشز قول له الرسول صلوات الله عليه قال لا يجوز لرجل يسب ويضرب بالنهار وياتى الليل يقول لزوجة تعالى لماذا قال هذا الرسول الحبيب بابى وامى ونفسى صلى الله عليه وسلم لان الزوجة آمرة وحرة ولها حقوق وليست جارية للفراش فقط هو اللى خبيث ومكير هو عرف انك لن تعودى فارسل آخر رسالة متخيل انك هبله للدرجة ده اتركيه يا سارة وسافرى مع اهلك واجعل هذه الفترة الفرصة الأخيرة له اما ان يشعر بقدرك وتغير ويصبح رجل يعتمد عليه اما استمر على ما هو عليه وهو حر وهذة حياته انت ايضا حرة تفعلى فى حياتك كيفاما تشاء سبحان الله رجل بلا مسئوليات نسال الله العفوا والعافية وكمان قليل التربية ولا يقدر منزلة الوالد والوالدة ولا يعرف حرمة البيوت ولا حول ولا قوة إلا بالله ولكن احمدى الله تبارك وتعالى واشكريه واسجدى له لانه لو كان لدية ذرة بصيرة لكان جاء لك مع امة او اخته ومعه هدية قيمة واعتذر وقبل يدك وراسك ورحع بك الى بيته وسافر معك يومان او ثلاثة ثم عاد كما كان ولكنها بركة الاستخارة والتوكل على الله الحمد لله رب العالمين لقد اذن الله لك بالراحة ابنتى الغالية وان شاء الله ييسر لك الزوج الصالح التقى النقى والأسرة والاطفال والعمل آن الاوان ان شاء الله ان تستيقظى فى الصباح الباكر لتجهيز اطفالك للذهاب الى المدرسة ثم تذهبى لاعداد طعام الغذاء لهم ولزوجك عند العودة من العمل آن الاوان ان شاء الله الى انتظار الاجازة الاسبوعيه وتجهيز مكان الفسحة والطعام آن الاوان ان شاء الله لانتظار اجازة الصيف للخروج والذهاب الى المصيف آن الاوان ان شاء الله للتفرغ للعبادة خلال شهر رمضان والذهاب الى العمرة مع اسرة الصغيرة وزيارة مسجد الرسول الكريم صلوات الله عليه كما قلت لك انتهى الكلام اعملى له بلك ولا كلام معه بعد هذا التطاول والتجريح وعدم معرفة قدرك ولعلمك هذه من المرات القليلة التى اكون فى صف الزوجة وضد الزوج على طول الخط لانى لم ارى فيه بارقة الآمل مع الأسف استمرى على استخارة الله وزيدى قربك من الله فانت فى اشد الحاجة اليه سبحانة وتعالى فى هذه المرحلة شديدة الحرج من حياتك انتظر ردك و استفساراتك أستودعك الله ألذى لا تضيع ودائعه ودائعه |
| الساعة الآن 01:21 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©