مشكلة اعانيها ... ابي الحل منكم
 

اعضاء المنتدى الطيبين : :(

عندي مشكلة ان خطيبي دائم الانشغال عني ... يعني اذا طلبته ولا حتى حبيت اتكلم معاه يعطيني اربعة اجوبة

1- مشغول ،2- تعبان ،3- ابي انام ،4- مصدع

واذا تفاهمت معاه يكون وياي يومين مثل العسل ويرد مثل اول ... انا اراعي ظروفه الجامعة طلعته ويا ربعه علشان يريح عن نفسه ... بس هم انا انسانة وعندي خطيبي وزوج المستقبل يريحني .. واذا هو اتصل ولا يبي يشوفني لازم اكون مستعدة في اوقت متى كان يكون ... اتحملت وايد وتفاهمت وياه ... بس ما اقدر اصبر يوم يومين ... اسبوع اسبوعين ... ما اتحمل اكثر واذا عصبت يقولي بتصل فيج 5 ساعات كل يوم ... اقول يا عسى يا شر ... هاذي ما هي حالة
يعني خمس دقايق ما اقدر اتكلم وياه على طول مشغول ولا تعبان ويبي ينام ... واذا طالع يكون ويا ربعه وسهران للساعة 12 ولا وحدة ... وانا اولي ... واذا هو المتصل وكنت مشغولة ولا شي صاير معنى احلفلكم والله يوم اتصل اهد الي بايدي وارد عليه الا اذا كانت مشغووولة على الاخر وما تصير الا نادرا ... وهو يدري ... ما اقوللكم ما يحبني بس مو كأني خطيبته ... ما يسأل الا اذا سألت واحيانا يعصب ويبند الخط بويهي ويقولي تعرفيني عصبي وانا ما اقدر اعصب
من صج مقهووووورة وابي حل الله يخليكم

:rolleyes:

مرحبا أختي شووووق .. والله مادري شاقولج بس خطيبج صغير وهو في الجامعه .. يمكن الريال ليحين ما تعود على انه احد ايدش في حياته .. ومثل ما تقولين طلعات مع الربع لي وقت متأخر .. يعني اهو ليحين ما يعرف شلون يتصرف معاج عشان جذيه تكلمي معاه بالهداوة والتفاهم لانه مثل ما قلتي عصبي ولا تعصبين معاه .. وصبري عليه .. وهو مثل ما قلتي يحبج .. والله يوفقكم انشاء الله ومبروك لكم ..
(( ام نورة ))

هلاااااا ام نورة
انا راعيت ظروفه ... بس ما اقدر اتحمل ... تخيلي وانا مسافرة اتصل فيه تقريبا كل يوم
واذا عصب يبند الخط بويهي وتخيلي مكالمة دولية وانا متحملة لازم ازعل منه في اليوم اكثر من ثلاث مرات اذا كلمته ولقيته اصلا
ومشكورة على المساعدة

أختي شوووق مادري شاقول الحين .. بس أعتقد حاولي انج ما تتصلين له وااايد وخليه اهو الي يتصل فيج لانه الصبي لما ايحس البنت دايما معاه ومثل ما يقولون لازقه فيه يمل .. عشان جذيه حاولي انج تبتعدين عنه شوي وحاجيه مرة في اليوم .. واذا اتصل فيج اهو قولي له انج مشغولة وسكري الخط عشان يشتاااق لج .. وانشاء الله تنفع النصيحة ..
اختج ام نورة..

هلا بيج مرة ثانية
انا اتصل فيه اذا ما اتصل فيني يوم كامل
واذا اتصلت فيه علشان الفلوس الي بيدفعها بعدين والفاتورة الله لا يراويج 300 ولا 400

بصراحة حيرتيني معاج .. واذا انتي حاسة انج موب مرتاحة له ترى انتو بعدكم على بر الامان ومثل مادشيتو بالمعروف طلعو بالمعروف وهو اصعب الحلول برأيي بس اذا ما تقدرين تتحملين مادري بصراحة .. أحسج في موقف صعب ومادري .. الله يساعدج ..

تدرين هو يمووووت فيني ما يقدر يعيش الا اذا سمع صوتي بس ظروفه صعبة وانا مقدرتها يعني مثلا امه مسويتله مشاكل وايدة وهو متحمل عشاني تبيه يهدني وياخذ بنت خاله ... انا حاسة فيه وحاسة ليش هو متضايق من كل شي بس من صوب يتهاوش ومن صوب يصرخ و يجرح بكلامه اذا تكلم حتى رفيجه رفيج عمره مو غريب يعني لاحظ وقالي بلسانه رفيجي قايلي اني اسلوبي وياج حاد وقوي ولازم احسنه مهما كانت المشاكل انتي بنت بالنهاية .. يعني تشوفين احيانا كلامه يريح ويهدي واحيانا ابي اصيح من كلامه ... وهم وكل هذا ما اعصب واقول تحملي يا بنت الناس راعي ظروفه سوا علشان وايد

مقهورة وما اعرف شنو اسوي

أختي جان قلتي من البداية السالفة جذيه انه أمه داشة في السالفةةة .. تعرفين الأمهات اذا ما يبون وحدة حق ولدهم واايد ايسون مشاكل .. وخاصة تبيه يتزوج بنت خاله .. يعني ما في غير الصبر وحاولي انتي انج تعاملين امه زين عشان مع الوقت تعرفج انج تحبين ولدها وما تحبين تكدرينه .. وتخافين عليه مثلها وأكثر .. وبالنهاية انشاء الله تنحل جميع مشاكلكم .. وتتزوجون .. وانتي حاولي قد ما تقدرين انج تستحملينه ومثل ما تقولين اتراعين ظروفه الصعبة .. لانه في صراع يسمع كلامج او كلام امه وهنيه المشكله .. الله يساعدج عزيزتي

هلا ام نورة
بالعكس انا اقوله هاي امك ولازم تتحملها يقعد يسبها والله انصحه واقوله بالنهاية هاي امك
بس امه شايفة الخير والعز من صوب اخوانها يعني بنت خاله ابوها مليونير
وهو هدهم وسكن بشقة بروحه وعنده كم محل ومعاش الجامعة يمشي حاله
وان شالله بيشتغل تراه عنده الخبرة مشتغل قبل في شركة قبل الجامعة وهاي شركة امه طردته من الشركة اذا ما يهدني ورافعة عليه قضاياه انه بايقها وتبي التلفون وتبي السيارة يعني مشاكل وايدة ... لازم يخليني صدره الحنون الي يقولي على مشاكله واسراره
واذا قلتله انا اقولك على كل شي يقول انت اصغر مني ولازم تقولين لاكبر منج ... بنظره حبيبته الياهل الدلوعة انا والله ما جذي ... وهو يعرفني زين اني مو دلوعة ومتحملة اهلي وهواشتهم علشانه
كل هذا وما يبي يكلمني خمس دقايق في اليوم متضايق من كل شي

ومشكورة على التفاعل وياي

تدرين والله ما انام الليل وهو يدري احيانا اقعد صياح من مشاكلي ومشاكله ... هو ريال وقد كلمته اذا قال شي مع الناس الكل يمدحه بس وياي ليش جذي بالنهاية انا حبيبته وخطيبته وزوجة المستقبل الي لازم يكون معاها
صدري ضايق من المشاكل الي عندي ... حتى دراسة ما اقدر ادرس كله تفكير بتفكير ... انا بعدني ما كملت العشرين وجذي اشلون بعدين ... مصيبة والله

يمدحون الثقل في مثل هذي المواقف



ثاير

مرحباااااااا إختي شووق .. أعتقد ماكو غير الصبر .. والله يعينج ويعين خطيبج .. بس حابة اني ابين نقطةةة لفتت انتباهي انج ذكرتي بأن خطيبج بينت خاله أهلهم مليونيرين .. وانه امه تبيه يتزوج من بنت خاله عشان جذيه .. يعني حاولو انكم تقنعون أمه بأن الفلووس موب كل شي اذا ما كان في حب متبادل وتفاهم .. وشنو يعني تبيه ولدها ايقص على بنت خاله وانه بيتزوجها عشان أهداف ثانية تبي اهي توصل لها مثل الفلووس.. لاااا وضحوا لها هالشي ان الفلووس موب كل شي في الحياةة .. وانشاء الله انتي وخطيبج تكملون الدراسة بالتوفيق وتشتغلون اثنينكم .. بس قولي له بإنج تفهمين وبإنج لما بيصارحج بكل شي يمكن تقدرين بتفكيرج انج تساعدينه في مشاكله وانه ما يفكرج بانج الصغيرة ودلوعةةة .. وانشاء الله الله يتمم على خير بينكم ..
اختج ام نورة ..

مشكووورة ياام نورة وبحاول قدر ما اقدر
وتسلمووون كلكم

العفو حبيبتي شووق هذا من واجبنا المساعدة :) .. وانشاء الله تنحل جميع مشاكلج بأقرب وقت يــــــــــــــــــــــــــــــــارب ..
((^ ام نورة ^))

عزيزتي شوق
انا كنت اعاني من نفس المشكله يعني خطيبي ماعنده ادنى اهتمام فيني وانا متلهفة عليه وعلى عالم الحب معاه واستخير الله فيه ويزداد حبي له ولاني عارفه ايش اسوي بس فكرت في فكرة مايقدر يهرب من احبالها قمت يالغاليه كثفت اتصالاتي وهو مطنش وارسله الهديا والمسجات اللي كلها حب وشوق اسبوعين وهو يعتقد اني مفروض علي اعمل كذا
وبعد الاسبوعين قطعت فجأة كل شي وجوالي سكرته والله اني ابكي في الليل من شوقي له وهو بعد 3 ايام اتصل علي وجوالي مقفول قام اتصل على البيت ورديت عليه باني احب اختلي بنفسي واعيد النظر في اموري وببرود شديد ولو ركز كان سمع دقات قلبي من اللهفه وقال بس قلقلت عليك وتركته اسبوع بعد اتصاله وهو ينتظر اني ارجع مثل اول بس بديت اثير غيرته بان صار لي اهتمامات ثانيه غيره واني مشغوله في دراستي وبالنت ........وهو صار ناااااااار من القهر وبعد كذا اتغير يوم قل اهتمامي وصرت اجاريه اذا ابدى اهتمام سالت عنه واذا نسى نسيت
واحس انه صار افضل من الاول
جربي وقولي لي عالنتايج

هلا اعماق السكووون
تدرين والله اني مهتمة هدايا على كروت على اتصالات ... يعني والله لما يشوفني ينطر مني هدية حتى مرة ما يبتله وياي ولا شي ... يوم سألني قلتله كل يوم عيد
يعني تخيلي ولا مرة ما عطاني شي بس والله ما افكر جذي يعني اقوووول هو سوا وايد ترك اهله علشاني واانا افكر بهدية بس تدرين يعني انا في كلامي شوي مقصرة اذا كلمته اقوله كلمة حبيبي ولا حياتي مرة ولا مرتين بس يوم يمناها وايد بس انا استحي اطلع الكلمة من حلجي ... بس والله في اشياء ثانية ماني مقصرة حتى تدرين كنت ادري مرة انه مفلس والشهر بعد باقي وايد والله قمت وعطيته بايده قالي والله ما اخذها الا سلف وصار يشكرني اذا فرحته اتصل وسأل اما جذي لأني خطيبته ما سأل ولا قال اشلونج ؟؟
بس طلباته وايدة وانا ما اقدر انفذها كلها يبتعصب اذا ما نفذتها واذا انا طلبت شي وما نفذه لازم اسكت وما اقول شي ... اذا فتحته بالسالفة يقول انا ريال ومو لازم تنكسر كلمتي وانتي بنت

والله اسكت وما اقووول شي ... وهم مو عاجبه شي واذا قلتله شنو تي فيني مدامني ما عاجبتك يقولي احبج

ما ادري والله شنو اسوي ... راسي متلعوز من كل شي

أختي شوق إذاخطيبك هذا ما عقد القران عليك فأنصحك إنك تعيدين النظر في الارتباط به لان امه ماتبغاك وبتعشين في مشاكل لانه بيظل متحير بينك وبين امه ولان من هالحين ما يهتم بك وانتي في فترة الخطوبه .
وإذا كنت عاقدين انصحك بعدم الاهتمام به قليلا حتى يفتقدك ويعرف قيمتك
مع تمنياتي لك بالتوفيق

هلااااااا حبيبتي فجر
المشكلة ما اقدر قبل ما انخطب كانت بينا علاقة حب تربطنا والحب ما زال بس المشاكل معكرة مزاجه وحالتي الحين جذي ... وما اقدر افكر بلحظة افصخ الخطوبة لأن من صج اموووت في خطيبي وهو يمووووت فيني وعلى فكرة الي قالب امه علينا هو خاله ابو العروس المنتظرة
وتسلمين عيوني

الصبـــــــــــــــــــــــــــــــــــــــــر زين صح ;)
صبري على لين ما الله يفرجها عليج حبيبتي ..
ام نورة ** ما انصح بالفصخ الا اذا تعقدت السالفة واايد

هلااااا ام نورة
مستحيل اقدر افصخ الخطوبة ما اقدر الا اذا خاني ويا وحدة ثانية ومستحيل يسويها
تدرين والله من يومين يقص علي يقولي الاسبوع الياي خطوبتي على بنت خالي وانا تجيلي صدمة وابي اصيح واتهاوش ويقولي انتي انخبلت علشان تصدقين
واسكت واقوله ما يقول جذي طيح قلبي من صج

لا انشاء الله الله ما يفرق بينكم ويخليكم لبعض دووووم قولي آمييييين ..
ام نورة

ان شالله يا ام نورة
بس انا ما اتحمل عصبيته على اتفه الاسباب يعصب وما تعجبني عادة تسكير الخط بويهي ... اتحملته على هذا الاسلوب وايد ... بصراحة انا احبه وما اقدر اقول شي واذا قلت شي بيعصب ولا يومين مثل العسل ويرجع لسابق عهده
وتسلمين حبيبتي

اختي الغالية ،، صراحة ما ابي اقول لج شي وبعدين يحصل بينكم فراق او شي لا سمح الله ،، انا خطيبي مثل خطيبج بس بإختلاف شي واحد بس

انه يتصل فيني دايم ،، بس دايم يتخانق معاي على اشياء تافهة جدا ،،
وتخيلي انه يتهمني باتهامات انا بعيدة كل البعد عنها ،، وما تتصورين شكثر انجرح من كلامه ،، لانه احس انه يهيني لكن لما يشوفني زعلانه وابكي يرجع ويتأسف ويقول لي آخر مرة ،، بس انا تعبت زيك ودايم اصيح

زي اليوم جيت من الدوام وتخانقت معاه خناقة كبيرة ونمت وطول ما انا نايمه وانا اتقلب واحس نفسي ابكي ،، ولما صحيت من النوم لقيت دموعي تنزل غصب عني وبكيت بغزارة ،، بس وش اسوي لما افكر ،، اقول اني احبه ولا يمكن اني ابعد عنه

واقول هذا نصيبي ولازم اصبر ،، مع اني تعبت كثير وانا من النوع الحساس مررة بس وش اسوي

اللي الله كاتبه بشوفه

انا اقول صلي استخارة وشوفي ،، يمكن هو طبعه كذا ،، توكلي على الله

السلام عليكم

أختي الفاضله شوووق

أنا الصراحه من المتابعين لهذا المنتدى منذ بدايته ولكن لم يطرأ علي أبدا أن أسجل فيه حتى قرأت موضوعك هذا.

فأقول لك يا أختي

من خلال قرأتي كلامك عن خطيبك رأيت فيه شخص مماثل لي

فأنا عصبي ومتقلب المزاج وهذا كله بسبب المشاكل والضغوط التي تواجهني , علما بأني لا أفضفض عما في صدري لأي كان إلا في أمور بسيطه , فأنا أحب أن أحتفظ بمشاكلي في صدري.

وأنا أيضا دائم الغضب على الناس الذين يحبونني وأحبهم , و لا أدري لماذا أغضب عليهم؟ وأنا لا أفرغ عصبيتي إلا عليهم.

وهذا الشيء خارج عن إيرادتي بسبب الضغوط التي أواجها

ولكن أود أن أقول لك إذا كان خطيبك يحبك كما تقولين
وأنه يقول ذلك لك صريحه في بعض الأحيان.

فلا تدعي خطيبك المسكين لوحده وقفي بجانبه , وحاولي قدر المستطاع أن تكسبيه أكثر , ولا تنسي أن تفضفضي له عما في صدرك وما يخطر على بالك.

ونقطه أخيره أود ذكرها لك خطيبك لا يحب أن يكون في موقف ضعف أو في موقف شفقه أو أنه محتاج لأحد.

وهذه إستنتاجات أستنتجتها لأن طبيعتي هكذا .

فحاولي ألا تشعري خطيبك أنه ضعيف أو أنه مسكين أو أنك تشفقين عليه , بل حسسيه بأنه رجل قادر على حل مشاكله وأنه الرجل الذي تفتخرين به ومن هذا القبيل.


أتمنى من كل قبلي أن أكون قد أفدتك


وإن شاء الله يوفقكم جميعا ويجمع بينكم بالخير والبركه

هلاااااااااا بيكم
اقدر جهودكم على حل مشكلتي

المصرقعة .. انا صابرة والله صابرة حتى والله هو اليوم يقولي انتي الوحيدة الي فيج خير وتتصلين محد يتصل فيني حتى ربعي والله اسكت وما اقول شي في خاطري اقوله علشان تعرف اشلون انا احبك وربعك ما يبونك الا اذا احتاجوا شي ولا مصلحة ... بس كل شي في قلبي

العصبي ... مو بس هو العصبي انا هم عصبية درجة اولى وهو ما مجرب عصبيتي الا شوية بس لما اصب امسك نفسي ما اصرخ عليه ولا اصك الخط بويهه ... ابي اعرف ليش ما يقولي على اسراره مو يحبني وهد اهله علشاني يحترمني ويقدرني شوية ... انا هم ابي احسه واعرف شنو في قلبه ... ولا بس هو يبي يعرف عن مشاكلي والي داخل قلبي وانا مو من حقي اعرف عنه تدري حتى مرة وهو في عصيبته قالي اني انانية وكذابة واني ما استاهل واحد مثله ... والله تميت اصيح من كلامه وما اتصلت فيه جاني يعتذر وقول تعرفيني لما اعصب ماادري شنو اقول ... هذا رد وهو يعرف اشكثر احبه جذي عاد وكله هذا واطلعله اعذار

بسم الله الرحمن الرحيم

أختي العزيزه شوووق

من حقك أن يفضفض لك خطيبك عن الذي في صدره مثل ما أنت تفضفضين له. لكن أقول هذي المسأله تبي وقت وصبر منك , صحيح أنك صابره ومقدره ظروفه لكن طولي بالك عليه أكثر.

ومن الواضح أن خطيبك مضطرب نفسيا ( تقريبا مثلي) لذلك يكون متردد في ذكر ما يضيّق صدره لأي أحد حتى خطيبته الي هي أنت .

لكن إذا صرتي دايم تفضفضين له وتتكلمين له عن جميع مشاكل حتى الي في أيام الطفوله, وإذا واجهتك أي مشكله كلميه في وقت مناسب بأسرع ما يمكن وقولي له عليها وقولي له أنك تبين رأيه ومشورته وإذا قدرتي تبكين وأنت تشتكين له يكون أفضل ( حاولي تتغصبين البكى)

ولا تقولين له فضفض لي أبدا , إلا إذا سمعتي صوته مهموم فقولي له وقتها "ممكن تشركني معك في الهم الي شايله "

ولا تتشكين منه كثير عشان ما يزهك ويطفش لأن حالته سيئه

ومع الوقت إن شاء الله يلين ويبدأ يطلع الي في صدره لك شوي شوي.

ونقطه ثانيه ما دام أنه متزاعل مع أمه فحاولي أنك في مكالماتك له أنك ما تمدحين أبوك وأمك . عشان ما يتضايق ويتذكر معاملة أمه له

لكن إذا صار لك مشكله مع أحد والديك لا قدر الله قوليها له حتى لو كانت بسيطه . عشان يحس أن فيه أحد قريب من حالته شوي.

ونقطه أخرى : أنت ذكرتي أنه آخر مكالمه له معك قالك "أنت الوحيده الي فيك الخير وتسألين عني" وهذا يدل على أنه يحس أن ما فيه أحد مهتم فيه.

وأعرفي أن طلعات خطيبك مع أصدقائه للترويح عن النفس وتغيير الجو المظطرب الي هو عايش فيه ومهوب أنه يعزهم أكثر منك, أما معاملته السيئه لك فهو يفرغ شحناته وعصبيته فيك مهوب لأنه يكرهك لا لأنه يحبك ولا فيه أحد قريب منه غيرك .

فحاولي أنك تتحملينه أكثر وتذكري أنك عايشه وسط أهلك وهو المسكين عايش وحده , أنت صحيح تحملتي وصبرتي لكن خطيبك يستاهل تضحيات كثيره منك خصوصا أنك عارفه وضعه زين.

و أسال الله أن يؤلف بين قلوبكم



تحياتي