|
ابي اعرف مين الغلطان انا ولا هووووو
السلام عليكم ورحمة الله وبركاته
انا سبق وكتبت مشكله صارت لي انا وزوجي وكتبتها هنا في المنتدى عموما الاخوان ما قصرو وعطوني حلول وكلامهم خفف عني كثير في هذيك الفتره والحمدلله رجعت الامور لمجاريها قبل ما اكتب المشكله ودي اوضح بعض الامور زوجي انسان طيب ويخاف الله ويحافظ على صلاته وما يقصر معي في شي بس احيانا ينقلب الوضع وتجينا مشاكل مدري من وين وغالبا سبب ها المشكله يكون تافه طبعا لما نتزاعل غالبا انا الي ابتدي با الصلح مع انه يكون يبي ها الشي اكثر مني ويبينا نتصالح بس لايمكن يجي يعتذر الا قليل يعني اذا غلط علي وانا ساكته يرجع بعد 3 ايام ويراضيني لاكن لما ارد عليه وبنفس اسلوبه ما يعتذر حتى لو هو الغلطان واحيانا نكون متهاوشين بس مايكلمني ولا اكلمه الا اذا كان يبي غدا او عشاء قال فيه غدا فيه عشا يعني مثل كذا نرجع للمشكله قبل 8 ايام كنت مع زوجي في الرياض وكان حاجز لي علشان اروح عند اهلي في جده المهم انا في اليوم الي قبل رحلتي كنت مره مشغوله وازين اغراضي ورحت كذا مشوار يعني كنت في اخر هذاك اليوم هلكانه وابي بس انا م وارتاح بعد شغل البيت والاغراض وماكان نفسي بشي ابد (( اعتقد قصدي واضح )) المهم هو تضايق وحسيته زعل بس وش اسوي انا تعبانه ورحلتي الصباح ومهدود حيلي المهم صحينا من النوم ورحنا للمطار وانا مدري وش فيه احسه متضايق وما يتكلم الا اذا كلمته وجواب مختصر بعد وصلنا للمطار وجلسنا لما يجي وقت الرحله قام وجاب لي عصير وعطاني مصروف قلت زين بدا ينفل شوي المهم جا الوقت و ركبنا الطياره ومشى زوجي بعد ما وصلت انا لجده جوالي كان مقفل قلت غريبه ما اتصل ولا سئل وحتى الرحله تاخرت ساعه كامله جا المغرب وما اتصل على بيت اهلي قلت غريبه قمت دقيت عليه قال هلا وصلتو قلت لا والله صح النوم والظاهر كان معه احد فا قال لي زين الحمدلله على السلامه قلت له كم رقمي السري حق جوالي ههههه معليش ما اعرفه توه جديد وهو الي حطه لي قال والله كاتبه ما حفضته قلت اول ماترجع اتصل وعطني اياه قال خير انشالله بعدها تذكرت ان بنتي يبلها اغراض من الصيدليه فا استئذنت من الوالد ورحت انا واختي والسواق بجيب لها حليب علما انو ماكان فيه احد هذاك اليوم من الشباب في البيت وبعدين انا عادي اطلع مع السواق وزوجي عارف بكذا طبعا وانا طالعه هو اتصل على البيت وسئل عني قالو له طالعه قال وين راحت طبعا الي ردت عليه ما درت اني بروح للصيدليه تحسب السوق قالت مدري انا توني جايه الظاهر للسوق وحتى لو كنت طالعه للسوق المفروض انه مايسوي الي سواه لاني اطلع للسوق وهو عارف ها الشيب ومع السواق واستئذن من الوالد بس كان مشتهي زعل قام حط لي الرقم السري يوم رجعت قالو لي زوجك اتصل وحط الرقم السري وقالو لي انه قال وين راحت انا رجت واتصلت عليه وحسيته يالله يرد يعني من راس خشمه قلت له اهلين قال هلا واسمع ارجال معه قلت طالع قال ايه قلت خلاص اجل ما اطول عليك بااااي قال باي وبعدها ما رفع السماعه ولا اتصل علي ولا سئل عني وعن بنته واليوم لنا 8 ايام ولا فكر يتصل شفتو عاد يعني انا ما اعتقد اني غلطت ولو كنت غلطانه كان يتصل ويقول وش فيه وش دعوا 8 ايام وش علشانه طيب اتصل واسئل عن بنتك احيانا اقول اتصل عليه وبعدين اقول لاء هو تعود اني انا الي اراضيه واكلمه خليه يزعل لحد ما يمل انا ماسويت شي والحمدلله جالسه في بيت اهلي معززه ومكرمه واحيانا اقول انا ما راح اتصل عليه بس لما هو يتصل اكلمه عادي واضحك كنه ما همني وان الوضع عادي عندي بصراحه الموضوع مره مضايقني وماني قادره اغقول لحد عن ها الموضوع الله يعافيكم عطوني حل قولو لي وش اسوي |
يا اختي العزيزة انا اقولك وش المزعلة...
اول شي انك رفضتيه ليلة سفرك ( فاهمة علي) لانك تعبانة وهو كان يبي هالشي بحكم انك مسافرة ويمكن تطول المدة المهم هذا الشي يضايق كل رجال ثاني شي انه اتصل عليكي وانتي كنتي بالصيدلية( هو ما يدري ) يحسب انك رحتي عالسوق فربط ليلة امس باليوم انك قلتيله تعبانه والحين بالسوق انا اعتقد ان هذا الشي زعله كثير منك والحين هو ما فهم الموضوع صح. انا برأي بحكم اني رجال وفاهم عليه انك ترسلي له رسالة كلها كلام حب وانتي ابخص بزوجك وش يحب وفي اليل اتصلي عليه وقوليله الشوق ذابحني وماني قادرة اتحمل اكتر من كاذ يعني كلمتين من اللي يرضو الخاطرو يصفو الجو وبعدين فهميه وش اللي صاير وقولي انك رحترتبي ليلة رومانسية اول ما تلتقو وزي كذا وطيبي خاطره لانه صدقيني تراه مو مرتاح ورح يموت عشان يسمع صوتك بس لانه شايف انك غلطانه وده انك تطيبي خاطره. اكسبي زوجك وراضي والله رح تكبري فعينه اكتر واكتر واتمنالك التوفبق. |
vip شكرا على الرد بس هل زعله يخليه ما يتصل ويشوف انا وصلت والا ما وصلت انا بخير انا وبنته او لاء يعني هذي الامور المفروض الواحد يسويها علشان يتطمن سواء كان زعلان او لاء يعني لي ها الدرجه انا وبنتي رخاص عنده وما نهمه قاهرني ها الزوج
|
اختي هالايام رياجيلنا علا طريف يدورون شغلة وحدة حتا يحطوا فيها علا الوحدة لكن ما علية عقولهم صغيرة وانت مو غلطانة لكن معروف الوحدة دايما تضحي من اجل عيالها وتكبر راسها سوي نفسك ما تعرفي عن الموضوع شي وقولي له يعني ما ولهت عليك تراني مرة مشتاقة لك واذا فتح لك الموضوع قولي له بكل صراحة انت تدري اذا رحت لاهلي انا استاذن من ابوي وفهميه الموضوع اذا كان ززعلان لانك ما عطيتيه شي قولي له انت تدري كنت تعبانة بس ما علية راح اعوضك بدل الوحدة ثنتين يعني طيبي خاطرة
|
بصراحه وبدون مقدمات غلطانه غلطانه غلطانه والغلط راكب من راسك لاخمص قدميكي ( اخمص قدميكي هاذي سبق وقلتها لدبدوب لايبيلنا وحده جديده) ايه انتي غلطانه غلطانه غلطانه لعن ابليسك ماتخيلين ماتنتخين ماتفترين ( كلمه حجازيه) هاالحين تعرفين الرجال بيعزب وانتي شاده بشتك من سوق لسوق مافكرتي في شعور هاالفقير هاالمسكين البريئ، هااللى جالس يتحسر على شبابه اللى ضاع ويوم انك تدرين انك بتطولين في الاسواق وينك من اسبوع يعني ماحبكت الا قبل السفر بيوم تخلصين مشاويرك هذا انتوا تزعلون رجالكم وتجونا في المنتدي الحقوني زوجي زعلان زوجي مايكلمني من حقه يزعل ومن حقه يهجرك وماالومه اذا تزوج عليكي والله يلوم اللى يلومه هاالمسكين. لكن مو مشكله نحاول نلقالك حل وعلى الله يجيب نتيجه ونراضي الرجال احتمال انه يوافق ويرجع المياه لمجاريها.... بس اياني وايانك تعيديها او انك تفكرين او تتجرئين انك تفكري تسويها ثاني مره احرجتونا مع رجالكم مابقي الا احنا نروح ونلبي طلباتهم عنكم.. على العموم روحي قسم عالم المتزوجين تلقين موضوع باسم ليله الحب الصافيه حاولى انك تجربيها وانا متاكد ان هاالوصفه راح تجيب افضل النتايج كثير من الاخوان والاخوات جربوها وتحسنت امورهم كثير وفي قسم التغذيه فيه كم موضوع انا كاتبه مري عليهم وطبقي الشغل بحذفيره والنتايج راح تكون افضل من الاوله انتي عارفه اقرب طريق الى عقل الرجل بطنه شكلك ماسمعتي عن المثل السنغالى عزوبي دهر ولا عزوبي شهر طبعا انتي فاهمه وش اقصد مدري نلقاها من المتزوجات ولا من اللى على وشك الزواج ولا اللى يفكرو في الزواج الله يكون في عونا بس |
أختي مقروده
أنتي قلتي (00يعني كنت في اخر هذاك اليوم هلكانه وابي بس انا م وارتاح بعد شغل البيت والاغراض وماكان نفسي بشي ابد (( اعتقد قصدي واضح )) المهم هو تضايق وحسيته زعل بس وش اسوي انا تعبانه ورحلتي الصباح ومهدود حيلي 000)!!!! كلامك مفهوم جداً000 يعني أنتي عارفه وش يبي 000صح000 هذا هو إلى مزعله000 وزوجك بعد إتصاله وأنتي خارج منزل والدك 000بعد ذهابك للصيدلية هو لا يعلم أين أنتي 000وهو زعلان من ليلة سفرك 000 زاد زعله منك000لأنه يتذكر ليلة سفرك !!!! ولم تعطيه حقه الشرعي000 حتى ولو كنتي متعبه 000فالفراق يمكن يطول بينكما000 أنا أعتقد أن زوجك معه حق 000لاتزعلي مني000 والحقيقه أنتي كبرتي المشكلة000 أنتي قلتي (000خليه يزعل لحد ما يمل انا ماسويت شي والحمدلله جالسه في بيت اهلي معززه ومكرمه000) ليش كل هذا الكلام 000فأنتي مدحتي زوجك في بداية كلامك000 مادام أنه يخاف الله ويصلي ومايقصر معك000 كلميه أو 00ارسلي له رساله فيه نوع من الحب والغزل000 فهذا زوجك وأبو أبنتك000ومالكم غنا عن بعض000 ولا يذهب تفكرك بعيد 000الآن ارفع سماعة التلفون وكلميه000 وتحججي باي شي 000قولي له أبنتك مشتاقه لك000 وأنا كذلك 000وافتقدناك000 الله يصلح حالكم000 أختك الممشوقة |
ابو ثنيان خير انشالله وش دعوا انا وش سويت ويكون بعلمك المشاوير الي كانت قبلها بيوم كانت لهله ولجدته وعماته يهني هذا جزائي وبعدين ليه معصب اقرا الموضوع زين الاسواق ما رحت لها ويوم رجعت رحت للصيدليه واذا ليه ما زينت اراضي قبلها بفتره حجزي ماكان اكيد واتصلو على زوجي وقالو تاكد الحجز لذالك ماكان عندي وقت ابد ابد
لازم تفهم الموضوع هذا انتم يا الرجال الواحد يخندر ويزعل ويهاوش وهو مافهم وش السالفه ورجلي من ها النوع بصراحه قهرتني ورفعت ضغطي بس شكرا على الرد |
اقتباس:
مقروده يبه لاتزعلى وحقك على بس انتي ماوضحتيلي ان المشاوير لجدته انا قصدة يوم انتوا في الرياض ماهو يوم رحتي الصيدليه وبعدين انا وش يدريني ان حجزك ماتاكد الاقبلها بليله وش قالولك اشم على ظهر يدي اذا رجلك من هاالنوع المفروض تفرحي لانه هذا اسلوب الرجل العصري واقدر اقول انتي انسانه محظوظه انا ماني معصب بس لازم تعرفي انه هذا هو الاسلوب الحديث في معالجة المواضيع الحساسه يعني تبيني اطبطب على كتفك واقولك اسفهي لا عيوني لا لازم تعرفين المثل وش يقول يابخت من بكاني وبكاء الناس عليا ولا ضحكني وضحك الناس عليا شكرا على تقبلك النقد البناء مدري مريت على المواضيع ولا لا |
طيب وين الباقين
|
اختي مقروده السلام عليكم ..
اتصلي بزوجك و ما تعاتبيه .. و قولي له كلام حلو و بعدين فهميه الموضوع .. انتم الثنين مش راضيين تتنازلو عن موقفكم .. ما تكبري المشكلة و تخربي بيتك بيدك .. و بعدين زوجك ما كان عارف انك رحتي للصيدلية .. راضيه الله يرضى عليكي و فهميه الموضوع و ان شاء الله بعدها حيتصل فيكي كل ساعة .. الله يصلح حالكم .. تحياتي |
أختى مقرودة .....بل محظوظة
أهنئك على زوج صالح وحنون مثل زوجك أدام الله محبتكما أختى أكثر المشاكل التى تحدث بين الزوجين سببها قلة فهم طبيعة كلا منهما التى خلقهم الله عليها فنحن معاشر النساء لا نعى مدى تأثر الرجل بتمنع زوجته عنه بغض النظر عن الأسباب لكن الله الذى خلقنا يعلم سبحانه لذا رتب عقوبة ليست بالهينة على هذا الفعل من جهة المرأة لذا لا تستغربين إذا قلت لكى أن سبب ما أنت فيه من تعب نفسية زوجك وزعله هو تمنعك عنه ...فانتبهى أختى يرعاك الله أخبرك بشىء .......كان مكان دراستى يبعد عن إقامتى 80 كيلو متر وكنت لا أرجع إلا قريب العصر وزجى موقت نفسه فى هذا الوقت بالذات ومع ذلك لم يحدث أنى تمنعت عنه خوفا من الله أولا ولعلمى بالأثر السىء من هذا على نفسيته التى بالتالى ستؤثر على صفاء حياتنا اعتذرى له ليس بالضرورى قولا بل فعلا ولا مانع من مناقشة الأسباب بهدوء لتلا فيها مستقبلا |
عزيزتي .. مقرودة مساء الوله عزيزتي .. مافي شي يسوى هالضيق والزعل الي انتِ فيه ترى الدنيا كلها يومين ..استغليها ولاتخلين اشيا تافهه تأذيج او تخرب عليج وناستج بين اهلج. وترى زوجج باين عليه حساس وحنون وعاطفي جداً وانتِ خذيه من هالجانب .. طبطبي عليه وتعذري منه انج جفيتينه ذيج الليلة بسبب التعب والحوسة .. واوعديه انج بتعوضين ذيج الليلة بليلة ماصارت وبيني له شوقج له وانج تعدين الايام والليالي عشان ترجعين لحضنه. وترى البعد ماينفع والزعل الثقيل . واذا على منو صح ومنو غلط انا اقول اثنينكم غلطانين يعني هو يزعل ويوصل زعله لهاي الدرجة ماصارت وانتِ تسكتين عنه وماتسألينه وش فيك وليش ياحبيبي متكدر بعد ماصارت يعني الحياة الزوجية فيها حب وعطف وودّ .. مافيها زعل وبعد ومن الغلطان وليش وهاي ابليس دخل مابينكم .. اتعوذي منه وبوسي راس زوجج بالتلفون وانسي الموضوع تراه مايسوى كل هاي الضيق. مااقول غير ربي يوفقنا ويسعدنا معاكم |
الاخت مقروده
اتفق مع كلام الاخ vip وتراك انتي الغلطانه تدري ليه لانه مو فاهم الموقف وانتي ماشرحتي له وشكله زوجك من الناس اللي يزعلون بسرعه وبنفس الوقت عنيددددددد عشان كذا مااتصل اكيد في قلبه محترق يبي يكلمك بس عناده مانعه ومكبر راسه لوووول !! انا اشوف انك تصالحينه وتطيبين خاطره وتنسون السالفه لانها اصلا ماتستاهل زعل !! خليك انتي الكبيره :d الله يوفقكم |
السلام عليكم و رحمة الله و بركاته اختي مقروده بأقول لك على شي قبل ما ارد على موضوعك اول مره اقرأ موضوع في المنتدى و يستفزني و يخليني أرد غصباً علي هو موضوعك هذا تدرين ليه لأنك بصراحه غلطانه و غلطانه و غلطانه 100 % المشكله الأولى الا و هو ........ رفض حق شرعي من حقوق الزوج و تحت هذا الباب تندرج اشياء كثيره و بأختصرك لك اياها بمقطع بسيط جداً من أحد المواقع سأضع رابطه بعدها [light=FFFFCC]احذري أن تكوني مقلقة لزوجك إذا أراد منك حاجته الزوجية، أو تتبرمي بالأعذار الواهية، فقد جاء الوعيد الشديد في ممانعة المرأة لزوجها إذا طلبها لفراشه، قال رسول الله صلى الله عليه وسلم :"إذا دعا الرجل امرأته إلى فراشه، فأبت، فبات غضبان، لعنتها الملائكة حتى تصبح" [البخاري][/light] تفاصيل أكثر عن هذا الموضوع في هذا الرابط تحت عنوان حقوق الزوج على الزوجه و ما أظن انك بتدورين عن تفاصيل أخرى بعد الكلام اللي فوق المشكله الأخرى التي وقعتي فيها الا وهي الخروج من البيت بدون اذنه و هذا عقابه عند الله كبير و أثم عظيم شوفي هذا الرابط & و هذا الرابط ايضاً المشكله الثالثه و الأخيره الخروج بدون محرم مع السواق و الى هذا الحد أكتفي و ما عندي شي اقوله :) و السلام عليكم و رحمة الله و بركاته |
المحترمة مقرودة
لا انتي ولا هو من حقك وانت تعبانة عدم القبول لان الموضوع لابد ان يكون والاثنين راغبين وهو من حقه ان يزعل وزعله بسبب هذا او غيابك في الصيدلية دليل على حبه الكبير لك فمثل هذه الامور لا يزعل منها الا زوج محب جدا والحقيقة ان اصلاح الامر بسيط لو هناك تفهم سليم ارى ان عليك اشعاره با الاسف العميق وان ذلك كان رغما عنك وبدون اي قصد واشعريه ايضا انك تضايقتي من اجله وفي نفس الوقت اشكريه على تفاعله غير المقصود معك والذي يدل على حبه لك هو نفس الحب الذي تبادلينه والحقيقة المستخلصة من مشكلتك مع زوجك انكما تحبان بعضكما كثيرا فهنيئا لكما ذلك |
اختي المقروده الظاهر اللقب حقك هو اللي حايسك تراني امزح ;) وان شاءالله بيراضيكي وتحطين لنا المبخوته :) المهم عزيزتي شكل زوجك حساس بالمره وراسه شو يابس لا تواخذيني على الكلمه بس عشان اوضحلك اكثر هو وش يبغاله 00اول شي انا مالومك ثاني شي مادام السبب واضح الحل بسيط يبيلك تهدين اللعب وتطولين بالك احيانا الرجال يكونون زي الصغار عشان تكسبينه طولي بالك عليه وحسسيه باهتمامك لانه يحب الاهتمام ولاتعاندين ابد تقبلي الامر بسعه صدر مادامه سريع الزعل فهو اكيد سريع الرضا دائما اللين في كل شي حلو دقي عليه وسمعيه صوت حزين وعتب خفيف وشوق كبير وان شاءالله راح يلين قلبه ويجيك ركض وسلامتك00
|
أذكرك أختي بهذا الحديث
لما قدم معاذ من الشام سجد للنبي صلى الله عليه وسلم قال ما هذا يا معاذ قال أتيت الشام فوافقتهم يسجدون لأساقفتهم وبطارقتهم فوددت في نفسي أن نفعل ذلك بك فقال رسول الله صلى الله عليه وسلم (( فلا تفعلوا فإني لو كنت آمرا أحدا أن يسجد لغير الله لأمرت المرأة أن تسجد لزوجها والذي نفس محمد بيده لا تؤدي المرأة حق ربها حتى تؤدي حق زوجها ولو سألها نفسها وهي على قتب لم تمنعه )) فهل أدركتي عظم حق الزوج ؟ |
الأخت مقرودة
في بداية المشكلة !! أنت غلطانة وهو كذلك غلطان أنت غلطانة لعدم تلبية طلبة في ليلة السفر 0 وهو غلطان لانه لم يقدر ظروف تعبك 0 ولا أعتقد أن هذه المشكلة سوف تتسبب في زعل زوجين لهذه الدرجة إلا إذا كان هناك رواسب من الماضي أو أن العلاقة بينكما ليست على ما يرام 0 لأن من يحب شخص مستعد أن يضحي ولو في حياته0 المفروض أن تقاومي نفسك وتنسي التعب والسفر (وتلبي طلبه ) ولو مجاملة وعلى شان خاطره وظروف السفر0 وبما أن هذا لم يحصل فالمفروض هو يقدر ما أنت فيه ولا يزعل تقديرا لك ولظروفك0 ( كلاكما غلطان ) طبعا المشكلة الثانية إمتدادا للمشكلة الأولى ولو كنتما راضيين قبل السفر لما كانت هذه مشكلة (وهي فعلا ماهي مشكلة ) لكن أحداث ما قبل السفر حولتها الى مشكلة0 الحل أولا ما الذي يمنعك بالإتصال به ولو لم يتصل هو !!! هل هو مكابرة !! هل هو العناد !! هل هو عزة النفس !!!! غلطانة وصدقيني أنه لما تتصلي بزوجك سوف تكبرين في عينه ويزداد حبه لك وإتركي المكابرة وعزة النفس وإستخدميها مع الأخرين ((( إلا زوجك )))0 وإذا كنت مصرة على المكابرة ممكن الإتصال بسبب شيئ تفتعليه مثل ( أخذ رايه في هدية سوف تشترينها له ) أو ( لون مفرش لغرفة النوم ) 0000000 الخ ومن خلال ذلك يكون بينكم أخذ ورد ولا بد أن يتكرر منك الإتصال الى أن تزول المشكلة0 عجبي / من زوجين في بيت واحد ولا يتحدثان لمدة ثلاث أو أربع أيام !!!!!!! وتأثير ذلك يكون على الزوج أكثر من الزوجة لأنه هو من إختار هذه المرأة لتعيش معه في نفس البيت !!!! فيجب على الزوجة تكون هي المبادرة في الكلام ولا تنتظر منه المبادرة 0 وما أن تبدأ في الكلام حتى ينخرط الزوج في الكلام والتحدث !! ويكون كلامها في ألأول هو المفتاح للزوج للتحدث0 وفي الختام أرجو منك الإتصال والسؤال عن أحواله ! وكيف يأكل وين 0 وإبداء الشوق له وللمنزل وتحسسيه إنك مانت مبسوطة في السفر وإن البيت أفضل وأحسن والجلسة معك ما تنمل 00 ومن هذا الكلام (( ولو كان هذا الكلام غير صحيح )) لأنه لا يعتبر كذباً لأن الهدف منه الإصلاح بين الزوجين 0 والسلام ختام 0 |
.. عزيزتي الموضوع بسيط ليش نحاول نعقد حياتنا الزوجية اعذريني بس هالمشكلة هينة بالنسبه لمشاكل كثير مادام انك على قدر من التفاهم مع زوجك ومرتاحة معاه مافي داعي تحطين مسألة الكرامة وعزة النفس بينك وبينه انا عن نفسي اتفقت مع زوجي ان نشطب هالكلمه بينا والي يزعل او يزعل الثاني عادي يبدا أي طرف بالصلح والحمد الله هالشي معيشنا مرتاحين مستحيل ننام وفي قلب اي واحد فينا شي على الثاني.. كلميه عادي لان بعض الشباب تكون في شخصيتهم اشويه ثقل وحنا المفروض نعرف كيف نتعامل معاه ونذوبه بشكل صحيح الله يوفقك ويصلح امورك تحياتي أختك |
المشكلة انه ما في مشكلة ....
زوجك يحس بالحنان في كلمة آسفه .. غير كده ما في اي شيئ نهائيا ... اتصلي عليه وقولي له (انا ما ادري ايش في قلبك عليا بس ما دامك ماكلمتني كل هذه الفترة معناها انك زعلان مني ..على العموم انا اسفه ... بس اتمنى اذا زعلت مني مرة تانيه ياريت تصارحني ولا تشيل عليا لانه اللي بينا اكبر من كده .. واللي تؤمر بيه انا حاضرة) صدقيني بعدها اتوقع انه يروحلك جدة ويبوس راسك ان شاء الله ... بس حتى لو ما سوى كده وجلس زعلان ,تلاقيه من داخله بيطير من الفرح ان عنده زوجه تعرف قدر زوجها .. وبيحاول يعوضك عن هدا التواضع قريب ان شاء الله .... وحتى لو ما سواها فـــ ( إن الله لا يضيع أجر من أحسن عملاً).. لا تخلي الموضوع يطول .. والبعد جفا0 |
السلام عليكم ورحمة اللة وبركاته للاسف انت غلطاااااااانه وما فى انسان معصوم عن الغلط انصحك يا الغالية تتصلين على زوجك واعتذر منة 0000 واسا ل اللة العلى العضيم ان يهديكما اختك الكنز المكنون :) |
عجيب امركم ايه النسوه ترفضين حقه الشرعى وتقولين ليش زعلان...والله بلاك مافهمتي وش يبغى الرجل الى الحين...المفروض انك تفكرين وشلون تكفرين عن خطاكي واذكرك بحديث الرسول فيما معناه الذي يقول فيه ايما امرأه دعها رجلها الى الفراش وأبت فالملائكه تلعنها حتى تصبح؟؟؟ اما الذين عذروا لكي فوالله ماصدقوا في نصحهم ارأيت ماذا فعلت تلعنها..ولماذا تفكرين بنفسك واغراضك وانانيتك المفرطه وتنسين الرجل الذي سوف يحترق ايام طوال من بعدك...نحن الرجال نعرف ذلك جيداا |
مشكورين على ردودكم ومل قصرتو
بس انا ما رفضت الشي هذا الا لاني تعبانه وانا نادر ما اقوله لاء بس وش اسوي تعبانه والمفروض يراعيني ثاني شي انا اتصلت فيه البارح وكان عند اهله سلمت وقلت انت في بيت اهلك قال لي ايه قلت له طيب ممكن تطلع برا او تدخل غرفه ابي اكلمك قال انهم يتعشون او يحطون العشا حاجه زي كذا قلت خلاص اجل لما اتخلص وتفضى اتصل علي قال اوكي هذا الكلام امس والحين الساعه 4 ونص والاخ لاحس ولا خبر وانا متحسفه مليون مره اني اتصلت عليه |
مقروده لازم ترسلين له مسج شوفي وش سالفته هذا من جده كابره براسه مره !!!!!!!!!!!!!! الله يعينك
|
أختي مقروده
اولاً أحب اشكرك أنك اتصلتي عليه000 فمهما كان هو زوجك وأبو أبنتك000 ومالكم غنا عن بعض000 ثانياً المفروض يوم كلمتيه قلتي له كلمتين فقط مثلاً (كيفك عساك طيب 000حبيت أطمئن عليك)000 أنتي يوم قلتي له اطلع برا ابكلمك 00هو حس أنك بتعاتبينه000 أو في خاطرك شي000 المهم لا تتحسفين أنك كلمتيه000أنت صاحبة المبادره ولك أجر عظيم ارسلي له رساله رومنسية 000صدقيني سوف يردك عليك000 الله يصلح حالكم000 أختك الممشوقة |
والله بعد الي صار مالي خلقه ولا لي خلق اكلمه مدري على ايش ها الرزه الكذابه مدري وش قصده اخاف بس قصده انه يبي يادبني بس نشوف مين يرفع السماعه على الثاني انا الغلطانه لاني كلمته
|
تصدقون طاري على بالي اتصل واتهاوش
|
سويها وانا اضمن لك تعاسة طول عمرك وخصوصا انه بينكم طفل ... خلي اسبوع غضب واحد
يخليكي تكرهي حياتك كلها ... استعيذي بالله من الشيطان الرجيم واشغلي نفسك بقراءة القرآن اذا مو عشانك عشان ابنك المسكين0 |
|
طيب وش اسوي والله اني مقهوره واغلي غلي احس ان كرامتي راحت
|
^
^ استهدي بالله اختي واعتذري من زوجك |
انا كلمته وهو الي ما رجع اتصل علي وانا ما راح اكلمه مره ثانيه
|
"ادفع بالتي هي احسن فكأنمى الذي بينك وبينه عدواه غفور رحيم "
صدق الله العظيم هذا مع الاعداء كيف لو كان زوجك خليك انتي الطيبه والمسامح كريم وعديها هالمره خاصه انكم منتو مع بعض صدقيني العناد هذا راح يكبر المشكله اكثر على الاقل اسمك حاولتي وبديتي بالصلح والغلط من صوبه ماهو منك ! تعوذي من الشيطان وسامحيه المفروض يكون بينكم الحب مو العناد ولا الكرامه لان هذا الشي ماهو موجود بين اللي يحب صدق من قلبه وباقي على الانسان خاصه انه ابو بنتك ! |
يا اختي العزيزة ... ما في شيئ اسمه كرامة بين الزوجين ..
على العموم اتصلي فيه ولا تعتذريله حاولي تكلميه عن اي شيئ واذا انفتح الموضوع قوليله ( يعني اذا كنت غلطانه ما تسأل عني؟ طيب اذا انت غلطت مين يسأل عليك غيري؟) ادعي ربك انه يهديه .. واتوقع ليالي جميلة بينكم بعد انتهاء المشكلة .. ان شاء الله0 |
اخت مقرودة الله يحفظك طمنينا عنك ايش صار ... يارب ما يصير معاكِ زي ماصار معايا
ترى الفراق مو سهل .. الله يستر عليكِ ويهديكم لبعض0 |
لضاهر طاح الحطب وخلاص تصالحتوا ان شاء الله؟
|
أحسنتي تماماً ، لا تتصلي عليه ، وإبقي في بيت أهلك معززة مكرمة ، وأخرجي إلى السوق أو حتى غير السوق بدون علم زوجك ، وذلك لأنه يعلم بأنك تخرجين وهذا شئ عادي بالنسبة لكي ، لا تتصلي عليه حتى يذل نفسه لك ويتصل هو ويعتذر عن أنه لم يعاتبك في أنك منعتيه من حقه ، وفي خروجك بدون إذنه :confused: ....
آهذا الكلام الذي تريدين بأن تسمعيه :confused: ، هذا الكلام الذ تتوقعينه من أي شخص عاقل :confused: ، لا والله لن يقوله أحد إلا إذا كان في عقله نقص ..... أختي الكريمة ..... يتضح أساساً من عنوان موضوعك بأنك من النوع الذي لا يتساهل ، ولا يساعد في أن تسير سفينة الحياة الزوجية إلى بر الآمان .... أختي الكريمة .... هل يهمك معرفة من المخطئ ؟ وهل إذا جاوبك كل أعضاء المنتدى هل ستقتنعين بكلامهم إذا قالوا بأنك المخطئة وستتصلين وتعتذري منه ؟؟ أم أن الهدف الأساسي النفسي من الموضوع هو أنك طرحتيه أساساً لرغبتك في أن تري أي رد يوافقك الرأي وتأخذين به ، وما يخالفك الرأي ترفضينه ولا تعترفين بعقلية كاتبه ؟ أختي الكريمة .... نعم إتصلتي عليه ولم يعاود هو الإتصال عليكي ، فهل تعتبرين بأنك بإتصالك هذا قد محيتي كل المشكلة وبأنك قمتي بما عليكي ومن المفروض بأنه بعد ذلك بأن يتصل هو ؟؟؟؟ أختي الكريمة ..... لقد جرحتيه جرحاً غائراً منذ لحظة رفضك له خاصة وأنك مسافرة في اليوم التالي ، فتخيلي بأنه في قمة الشوق لكي ويريدك لكي يصبر نفسه على فراقك بعد ذلك بذكرى تلك الليلة المميزة ، ولكنك رفضتي بدعوى أنك متعبة ؟؟؟؟ ، ألم تسمعي عن حديث رسول الله صلى الله عليه وسلم فيما معناه بأن المرأة إذا كانت قائمة على تنور الخبز ودعاها زوجها فعليها الإجابة ، وحديث آخر فيما معناه بأن الزوجة عليها بأن تجيب زوجها حتى لو كانوا على ظهر بعير ، وحديث آخر بمعنى أن المرأة إذا رفضت تلبية زوجها بدون عذر شرعي كالحيض تلعنها الملائكة حتى تصبح ؟؟؟؟؟ أختي الكريمة .... الم تسمعي عن الحديث الذي فيما معناه بأن المرأة إذا خرجت بدون علم زوجها تلعنها الملائكة حتى ترجع ؟؟؟؟ أستغرب منك والله ، هل نسيتي كل هذه الأحاديث ، ونسيتي كل حقوق زوجك عليكي ، وإكتفيتي بعذرك بأنك متعبة ؟؟؟؟؟ أراها والله وبكل حيادية قمة الأنانية ، وأرى بأنك تفكرين بنفسك فقط وما فعلتيه طوال الوقت ، ولا تفكرين فيه أو في مشاعره أو في أسبابه أبداً ، وهذا من أكبر الأخطاء في الحياة الزوجية ..... أختي الكريمة .... حياتك الزوجية تعيشينها أنتي وهو ولا يعيشها أحد غيركما ، وفي يدك بأن تجعلينها حياة سعيدة وفي يدك أن تجعليها جحيم لا يطاق كما هي الآن ، ولا أعرف بصراحة من المستفيد من هذا الجحيم أبداً :confused: ، هل ستسفيدين أنتي ؟؟ هل ستخرجين منتصرة إذا اتصل هو عليكي وأعتذر ؟؟؟؟ ثم ماذا هل ستحتفلين بإنتصارك وتكوني بذلك قد ربيتي زوجك على ما تريدين ؟؟؟؟؟ أختي الكريمة ..... هذه حياتك وأنتي أدرى بها ، ولكن عليكي بأن تفكري في زوجك كإنسان وفي إحتياجاته في بعض الأوقات ..... أختي الكريمة ..... الجواب على سؤالك هو بأنك غلطانة 100% في رفضك من البداية ، وغلطانة 100% لأنك خرجتي بدون إذنه حتى لو كان يعلم بأنك تخرجين مع السائق ، والحل الوحيد للمشكلة هو بأنك قد جرحتي كرامته وكسرتي بقيمته كرجل أمام نفسه وأمام أهلك الذي علموا بانك خرجيتي بدون أن يعلم عن مكان خروجك ، وحتى لو كان أهلك متعودين منك على ذلك قبل الزواج فهذا يختلف الآن ، لأن خروجك بهذه الطريقة فيه تقليل من شخصية زوجك أمام أهلك ، ولن تستطيعي بأن تغيري نفوسهم أو أفكارهم لأن هذه من الأفكار الفطرية التي لا تتغير .... أختي الكريمة .... أنتي أخطأتي وبالتالي عليكي بأن تستسمحيه ، وعليه بأن يكابر ، وعليكي بأن تتذللي له ، وعليه بأن يكابر لكي يحس بإسترجاع قيمته أمامك ، وعليكي بالإستمرار بالتقرب منه ومحاولة كسب رضاه ، أما تعلمين بأن زوجك هو جنتك ونارك ؟ الا تستحق آخرتك بأن تتذللي لأجلها ؟ ألا يستحق زوجك وأب طفلك ذلك ؟ وحتى إذا لم يستحق من وجهة نظره فهذا حقه ومن المفروض بأن يصله إلى حده ..... هداك الله يا أختي الكريمة .... تذكري تذكري تذكري ، لا تجعلي كرامتك تقف في طريق سعادة حياتك الزوجية ، ولا تصري على أشياء لن يجني أحد منها إلا التعاسة على مر الوقت ، لا تجني عليه وعلى نفسك ، أنتي من تعيشين حياتك وعليكي بأن تبذلي الكثير من التضحيات لأجلها ، إتصلي عليه وأطلبي الصفح وأخبريه بأنك أخطأتي في النقطتين السابقة الذكر ، وأشتري له هدية قبل رجوعك إليه ، وأشتري ملابس مثيرة لأجله ، وأجعلي من يوم عودتك من السفر إحتفالاً رائعاً بينكما ، على شرط بأن تكوني قد تصالحتي معه قبل سفرك للعودة ، لكي يتولد الإشتياق بينكما من جديد بدلاً من مشاعر النفور الموجودة بينكما حالياً .... هذه نصيحتي قد بلغتها اللهم فأشهد ، وأصبحت الكرة الآن في ملعبك ..... تحياتي .... |
اقتباس:
اذا ؟؟؟؟ جفت الأقلام و طويت الصحف أتفق معك أخي 100% لا بل 1000000 % كبر النساء هو الي بيخرب البيوت و حناننهن بيعمر البيوت أرجعي أختي الي عقلك و أنسي مسئلة الكرامه لا كرامه بين الأزواج اللهم أهدي أختنا مقروده و عمر بينها و بين زوجها متزوج و سعيد جداا :confused: |
الحقيقة الخطاء منك
وبعدين قضت الأسماء ماحصلتي عير مقرودة |
اسفه اني تاخرت با الرد بسبب الضروف وعطل الجهاز
اشكر كل من رد علي ونصحني المشكلة انتهت ولله الحمد |
| الساعة الآن 02:22 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©