|
بنات المنتدى العزيزات تعالوا بقولكم ...
[marq=left][marq=left]السلام عليكم ورحمة الله وبركاته .......[/marq][/marq]
:) :28: :d :d :d لله درك أيها المنتدى المبارك كلما غبت عنك أحس بالحنين إليك .... وكلما أنقطعت عن الكتابه فيك لظروف الدراسه وبختني نفسي والله لأني كم أستفدت منك وأريد أن أرد لك بعض ماأستطيع وباالله التوفيق ومنه العون والسداد ...عفوا كلماتي هذه مشاعر صادقه ويعلم الله صدقها تحركت في صدري فأحببت أن ابتدأ بها كمقدمه بسيطه والله من وراء القصد ..... أخواتي العزيزات في منتدى عالم الحياة الزوجيه عدت اليوم وكلي شوق لكن ..... أود بموضوعي هذا أن تكون لنا جلسه مع بعض جلسة نساء يعني تماما كما نجتمع خارج النت في جلسات العصريه وبعد المغرب ونتجاذب أطراف الحديث وكل وحده تدلي بدلوها الفرق الآن اننا من وراء الشاشات وعبر الكيبوردات ...... :22: المواضيع والامور اللي نبغى نتناقش فيها كل شيء يعني مثلا كل وحده كم لها من تزوجت ماهي الأشياء الإيجابيه اللي قدرت تبدعها وتضيفها على حياتها الزوجيه خلال سنوات زواجها ... كذلك الأشياء الإيجابيه اللي عودت نفسها وزوجها عليها وأي وحده عندها استفسار أو تساؤل يخص الحياة الزوجيه تقوله وانساعد بعض بالنصايح وتبادل الخبرات تماما مثل ما قلت كأننا في جلسه نساء عاديه وطبعا الكلام ذو شجون ويجر بعض المهم شدو الهمه بنات وخلونا نبدأ ونخلي البساط أحمدي مثل مايقولون :18: |
وعليكم السلام ورحمة الله وبركاته...
حياك الله أختي في الله " أيام الطفولة " وياهلا ومرحبا... حبيت أسأل ممكن البنوتات اللي على وش زواج :15: ممكن يشاركوا....؟؟؟ |
:17: فكرة جيدة بارك الله فيك غااااليتي يالله خلينا نشوف الردود ولي عودة |
اهلين ايام الطفوله .. انا لي تقريبا 8 شهور متزوجه والحمدلله مبسوطه مو معنى كذا انو مافيه مشاكل بس مشاكل بسيطه ماوصلت الى درجه التعقيد واختك في الله احيانا تتضايق لو ماتناقرت مع زوجها :23: :23: :d وبما اني توني متزوجه وماعندي الى الحين اطفال فأنا احاول قدر الامكان اغير قليل في زوجي يعني مثلا هو ماعنده صبر ابدا على الاطفال او حتى على اخوانه اللي اصغر منه وانا اقوله ياولد الحلال اخوانك مراهقين ماينتعامل معهم بهالاسلوب بس ولا كاني اتكلم :25: برضو مايطيق يسمع عيال اهوانه يبكون او يلعبون بصوت عالي خبرك البزارين حتى بضحكهم يصارخون بس هو الله يهديه مايحب الصخب اطلاقا بس الحمدلله احس مع الايام بدأ يتأقلم لاني انا احب البزارين وفوضويتهم .. وحنا ساكنين مع اخوانه في عماره وحده يعني كل واحد بشقه وانا ماعندي اطفال فاتلاقيني اذا طفشت انزل عندهم واناديهم عندي فتلاقينه يتضايق من اصواته وانا اكون في قمه انبساطي :17: :17: بالنسبه للاشياء اللي عودته عليها اممممممم مو كثير لكن في اشياء احاول فيها منها مثل ماقلتلك الاطفال وصخبهم خليته على الاقل يتحملهم اشوي علشاني برضوا اخذ مني بعض الالفاظ والعادات مثل كلمه ماتستحي؟ :d برضوا طريقه رده افعالي تجاه المواضيع صاير حافظها وصاير يتوقع رده فعلي قبل مايكمل موضوعه :29: واكيد صاير ينظف سيارته من غير مااقوله لاني اتضايق لما اشوفها فوضه.._برضوا عودته انه مايتوقع اني بطبخ في يوم من غير مايقولي اطبخي ويصمم علي :29: :d والاشياء اللي اخذتها منه التأني_ اني اتكلم بصوت عالي(شفتوا التناقض مايحب البزارين لانهم فوضويين وهو نفسه فوضوي) _الانتظام في المواعيد_العياره الزايده_كلمه ان شاء الله بس هذا هو اللي في بالي مشكوره ياقمر على طرح الموضوع.. |
اقتباس:
هلا وغلا أختي توتي نورتي أكييييييييييد حبيبتي البيت بيتك قصدي الموضوع موضوعك هلا فيكي في أي وقت واي سؤال أحنا حاضرين ألف مبروك على الزواج مقدماً :14: :14: ولكي مني كل الود ..... |
اقتباس:
هلا والله أختي ألم وبارك الله فيك ِ .... ياالله شدي معانا الهمة وخلينا نشوف إبداعك .... ودمتي بخير أختي .... |
اقتباس:
هلا والله أختي الدانه ياحليلك والله أجل ما ترتاحين إلا لما تناقرين أبو الشباب حلوه لكن لا تكثرين بعدين ياخذها منك ويصير هو يطفشك ههههههه اما بالنسبه للعيال ياشيخه فرصة حتى يجيكم العيال إن شاء الله أتمتعي معاه ودامه ما يحب الازعاج لاتجبرينه فكرتيني بأختي وزوجها مثل زوجك .... أما عني من ضمن الاشياء اللي تعودت عليها وبعد هو مثلي السهر يعني ساعات نجلس كذا نتكلم ويسحبنا الكلام وما ندري الا هو اذن الفجر هذا ساعات مو دايما ... بعد فيه شيء قعدت أزن على راسه إلى أن هداه الله ووفقه ومن عليه أنه صار يصلي في المسجد صلاة الفجر .... كان لما يتوفى أحد ويروح يحظر الجنازه القاها فرصه لأنه يكون متأثر وأذكره باالآخره والحمد لله هداه الله أسأل ربي له الثبات ..... هذا اللي جاء في بالي ولي عوده وخلونا نشوف طلتكم الحلوه ..... |
وين البااااقين وإلا ماقبلتوا العزومه........؟؟
|
لا ياحبيبتى عزومه مقبوله ونص وثلاث ارباع بعد بس اقول لك شى انامااتكلم عن زوجى بجلسات الحريم خخخخخخخخخخخخخ موخايفه وحده تزل بكلمه كذا ولاكذا عند زوجها وتطلع سوالف وهروج الواحد بغنا عنها بس اقول لك خلينا نعتبر الجلسه مو جلسه حريم لاجلسه خوات يعنى الحين الواحد ياخذ راحته ويسولف والله يااختى اهم تغيير قدرت اسويه بزوجى هو الصلاه على وقتها زمان كان زوجى ياخر الفجربالذات الى مابعد طلعه الشمس واحيانا مايصلى المغرب الا مع العشا اماالان لا ياربي لك الف حمد وشكر اهم صفه سيئه بزوجىالعصبيه والى الان مو قادرة اخليه يخفف منها اما عنى انا شخصيا احس سنين الزواج انضجتنى وخلتنى افكر فى بكرة وبعد بكرة خلتنى ابطل اهتمام فى بعض الامور اللى لاتودى ولاتجيب بس ضياع وقت وبس وابطل حساسيتى الشديده تجاه اى كلمه نقد توجه لى يعنى صار عندى ثقه بنفسى اكثر من الاول نسيت اقول لكم لى 8 سنوات زواج وعمرى الان 28 سنه
|
ايام الطفوله .. ماشاء الله عليكي تأثيرك حلو جدا على زوجك .. الله يهديه يارب سحابه صيف.. ماشاء الله عليكي بالضبط اذا الواحد انتظم في صلاته كل حياته تنتظم .. بس عندي مشكله وابغى لها حل مجدي انا زوجي يدخن وابغاه يبطل تدريجيا فكيف ابدأ معه لاتقولون قوليله انو مضر وانو فيه اثم لا ابغى طريقه مجديه اذا تعرفون دلوني الله يخليكم.. مع العلم انو بايام الخطوبه قلتله ماراح نتزوج الا لما تترك التدخين بس والله طنشني اخوكم في الله :25: |
السلام عليكم ورحمة الله وبركاته....(يا بنات)
ايام الطفوله ::ولله كأنك في راسي وتعرفين افكاري....كانت عندي نفس فكرتك بس ظروفي هي اللي أخرتني يله روحي وحنا معاك......... اختي الدانه:_من رايي تستانين مع زوجك في هالايام قبل الله ما يرزقكم بلاولاد والذريه الصالحه ان شاء الله انا متزوجه من حوالي 3 سنوات وتوها جايتني البنوته الثانيه من 21 يوم واللي احس انه تغير في زوجي هو نظرته للعلم واهمية الوقت فالحمد لله ومن فضله خليته يعيد الثانويه العامة ويجيب مجموع محد متوقعه منه ويدخل الجامعه وهو الحين في السنه الثانيه ومن المتفوقين ان شاء الله وهذامن فضل ربي |
انا لي اكثر من 15 سنة زواج
قدرت ببرود اعصابي وهدوئي امتص غضبة وصار يعصب بهدوء ههههههههههه حلو يعصب بهدوء بس فيه اشياء كثيره ماقدرت اغيرها بس لا زلت احاول |
اقتباس:
أجل أنا وأنتي متقاربات في سنين الزواج أنا بكمل 12 سنه وعمري مثلك 28 ..... بارك الله فيكِ عزيزتي على الانجاز اللي ربي وفقك له حين اهتدى زوجك للحفاظ على صلاته على يديك بفضل الله .... لنعلم أن أروع إنجاز ترتقي به المرأة في بيتها ويزيدها رفعه في الدنيا والآخره حين تسعى لإصلاح نفسها وزوجها دينيا فيعود عليهما ذلك بحياة هادئه مطمئنه حتى المشكلات تمر على خير ويسر من الله تبارك وتعالى أليس كذلك .... اذن لنستمر على هذا الطريق والله في عون العبد ما زال العبد في عون أخيه .... استمري معنا عزيزتي في الحوار وأثرينا بكل ما لديك من جديد ....دمتي بخير :22: |
نورتي مجلسنا أختي الدانة بعودتك أيوه كذا الهمة ألحين صارت جلسه اخويه نسائيه بحق ....
بالنسبه لمشكلة زوجك مع التدخين والله حبيبتي ما يحضرني شيء الحين لكن خلينا نفكر واذا احد من الاخوات عندها حل راح يساعدوك ان شاء الله ....انا زوجي قريب من زوجك يحب الشيشه لكن وين ووين يعني مو دايما ياالله اللي عندها الحل تسعفنا بارك الله فيكم ... لا تحرمينا من طلتك اختي الدانه ولكي كل الود .... |
اقتباس:
هلا وغلا أختي ar4aa يعني سبقتك ولطشت الموضوع من أفكارك معناته القلوب عند بعضها حبيبتي ... ماشاء الله تبارك الرحمن عليك وعلى زوجك الله يوفقه ان شاء الله في دراسته ويحفظ لكم البنوتات ... شكلك مثلي تحبين الدراسه انا انقطعت عنها بسبب الزواج والحين ربي عوضني وسجلت في الاكاديميه الاسلاميه عبر النت والعلم الحين صار ميسر بكافة الطرق فالحمد لله على منه وكرمه .... خلاص اختي انتي شبكتي معانا لاتقطعينا لما تخلصين النفاس :14: |
اقتباس:
هلا والله بأختي ام عبد الله وأنا ام عبد الله .... هههههههههههههههههه والله صادقه حلو يعصب بهدوء على خفيف يعني ... بارك الله فيك ويسر عليك كل عسير وخليكِ معانا نستفيد من بعض ودمتي بخير وسعادة .... |
مرحبا يابنات وشلونكم عساكم طيبات
انا متزوجة من ثلاث سنين ولس ماجاني عيال يعني لس عروس من هذاك اليوم :14: المشكلة انه زوجي لس طالب في الجامعة وبحكم وضعه اضطرينا انا نسكن مع اهله بالبيت بس الحمدلله مافي الا انا وزوجي وامه وابوه بس ............طبعا والمصروف من عند عمي يجينا كل شهر المهم زوجي هو القعدة يعني كل الطلبات مجابه ،،،،،،، :23: بعد زواجنا لاحظت انه يصرف على الاجهزة والالكترونيات كل اللي في جيبه .......... :29: ومن هنا اتخذت قرار اني اخليه يتغير ويهتم شوي ويحاسب وين يصرف فلوسه وخليته مايشتري شي الا لما يحسب هل هي مفيدة له ؟؟؟؟ هل هي مهمة وضروريه ؟؟؟؟؟؟ والحمد لله تغير كثير وسار يقولي الله يجزاك خير انك وعيتيني و لا كان راح الجمل بما حمل |
اختي الغالية ايام الطفولة اشكرج على الترحيب .......والله يوفقج في دراستج وانا معاج ....ومع الاخوات اللي بيشرفونا بمشاركاتهم مرحبا بك اختي (شموع الظلام) احنا متزوجات في نفس السنه.....الله يرزقج ان اشاء الله الذريه الصالحة. :15: ... انا زوجي يحب الاكترونيات كثير.....وبالاخص الكمبيوتر وانا بعد اعشق الكمبيوتر واعتقد هذا الشيء قربنا من بعض لأنه هواياتنا مشتركه فصار يعلمني بعض الأشياء وانا اعلمه بعض الأشياء... وساعات اتفلسف عليه....وما اعلمه الا بطلعة الروح :23: |
اخيتي اسعدني موضوعك واسعدني اكثر اننا زملاء في الاكاديمية ياريت تقوليلي اسمك في الاكاديمية عشان نتواصل هناك كمان انتي من اي مدينة
اما عن السوالف فانا عندي كلام كتير لاني بصراحة مااحب تطلع مشاكلنا وعيوبنا للاهل وماعندي صديقة اثق فيها لدرجة اني احكيلها عن حياتي بس بحكيلكم انتو انا متزوجة من 4 سنين عندي طفل واحد حياتي مستقرة والحمد لله هاذا كل شئ حتى ياتي الجديد |
فكرة جميلة
عزيزتى ايام الطفولة احببت فكرتك كتير انا اريد ان اشارك فيها انا متزوجة من سنتين وعندى ولد احس انى مستقرة فى حياتى والحمد للة وعندى طفل هو سبب سعادتى ولا انكر ايضا ان زوجى يحبنى وانا احبة ولكن المكلة انة مشغول جدا بالعمل يعمل فى اليوم تقريبا 12 ساعة وكمان لما بيرجع البيت بيكون كلامة قليل جدا انا بشدة منة شد وانا اسكن بعيدة عن اهلى بمسافة كبيرة يعنى مش بقدر ازورهم دايما لانة يعتبر سفر وبالطبع بعيد ايضا عن اصدقائى وانا اشعر بوحدة كبيرة لاينقزنى منها سوى النت وعلى الرغم من زلك فانا لااشعر زوجىباى ضيق واحاول ان اجعلة سعيد باستمرارولكن فى بعض الاحيان يغلبنى المللوالوحدة حتى فى وجود زوجى عندك حل؟؟؟؟؟ مع حبى
|
هلا وغلا بكل أخت حبيبه زين مجلسنا هذا بطلتها يارب ماننحرم منكم وأسأل الله بمنه وكرمه كما أجتمعنا هنا في هذا المنتدى المبارك ان يجمعنا أجمعين في مقعد صدق عند مليك مقتدر ....
|
اقتباس:
هلا ومرحبا بأختي شموع الظلام نور تينا حبيبتي ....ذكرتيني بأيام أول زواجي لما كنا ساكنين مع أهل زوجي أمه وأبوه لأنه كان مثل زوجك أصغر أخوانه ....وألحين صرنا في شقه مستقله لكن طبخنا وأكلنا مع بعض والقعده والسمر بعد .... أحسنتي التصرف أخيتي لما عودتي زوجك على كيفيت تدبير المال ومثل مايقولون القرش الابيض ينفع لليوم الاسود جعل أيامك كلها بيضاء ومنوره ... دمتي بخير وسعادة ولا تقطعينا .... |
اقتباس:
هلا ومرحبا اختي ar4aa أسعدتيني برجعتك ومشاركتك .... |
اقتباس:
هلااااااا والله أختي بيارق الخير وأنتي أسم على مسمى يعني طلعنا زميلات في نفس الاكاديميه اللهم لك الحمد ....أسمي فيها أم عبد الله وأنا من الرياض ياعيوني وأنتي وش اسمك هناك ؟ اسعدك الله في حياتك ووفقك في دراستك وأي شيء عند ك قولي وزيدينا من خبرتك أحنا خوات ولا تقطعينا دمتي بود وسعادة.... |
اقتباس:
والله اختي أنا مثلك زوجي ساعات عمله كثيره ولما يرجع البيت يكون تعبااان وخصوصا ايام بداية العطلة الصيفيه تخيلي مايرجع الا 12 ونص ... لكن بقولك شيء لازم بيكون هناك يوم الخميس والجمعه مثلا وأنا زوجي حتى يوم الجمعه شغل لكن أحاول ساعات نجلس بالليل بعد العشاء نتكلم وساعات يمر الوقت لما يكون الكلام حلو وما نحس الا أذن الفجر ... أنتي بس شوفي الكلام اللي يحبه زوجك مثلا لو يحب يتكلم في مجال عمله ما عليه شاركيه وشوي شوي ادخلي معه في الكلام الحلو وتذكروا ايام كنتوا عرسان وهاتوا شوي في السياسه كذا يعني المهم شوفي الكلام اللي يحبه وشاركيه فيه حتى يتعود طبعا لما يكون رايق ومرتاح ... الله يهنيكي في حياتك ويديم عليك السعادة .... خليكِ معانا ودمتي بود .... |
شكر وحب
عزيزتى ايام الطفولة... اشكرعلى ردك فانا عضوة جديدة فى المنتدى وهو اول رد يصلنى لذا فانا اعتبرك اول صديقاتى فية مع حبى ولى عودة ان شاء الله
|
... الأخت الفاضلة ، عند رغبتك في طرح موضوع يرجى طرحه بشكل منفصل و ليس على شكل مداخلة المراقبة Reemona |
اقتباس:
حياك الله أختي الشمس والقمر أناستينا برجعتك وننتظر منكِ المزيد دمتي بود وسعادة.... |
وينكم بنات خلاص طفشتوا وخلص كلامكم ....
|
اختي الغالية ايام الطفوله انا معاك بس بي موضوع اتكلم فيه ياله شدي حيلج وانا معاج خلينا انوسع صدرنا :d |
السلام عليكم اختي ايام الطفولة.... ايييييييييييه احلى شيء ايام الطفولة.. تسلمين يا حبيبتي على الفكرة الحلوة .. و انا جبتلكم شيء معاي... شوية حلويات.. :d http://www.koshergiftbaskets.com/ima...1wicker4lg.jpg http://www.kirstensdanishbakery.com/...ets-tray-3.jpg http://www.kirstensdanishbakery.com/...ets-tray-1.jpg http://www.kirstensdanishbakery.com/...ets-tray-2.jpg مع شوية عصاير بهالحر http://www.rawchef.org/images/juices.jpg http://www.tacomesa.net/Images/Break..._2-1_small.jpg .......................................... الحين نسولف.. انا الحمدلله صار لي سنتين متزوجة .. و عندي بطة صغيرة الله يحفظها موجودة بتوقيعي... الايجابيات من زواجي بصراحة استفدت من زوجي بالناحية العلمية كثير... لأنه صيدلي... بصراحة كثييييييييييييييييييييير استفدت.... و هو من ناحية علاقته بأهله احاول يكون لهم اكثر قربا... يعني هو طيب بس بعيد عنهم شوي... و بعد ... تعلمت منه الهدووووووووء لأنه اكبر مني 8 سنوات .. و هاديء.. و انا عصبية :16: فشوية شوية اتعلم منه ... و بس و الله مافي اي شيء اكثر خاصة انه دوامه طويل فما نشوف بعض الا اايام الاجازات و العطلات الرسمية :d :23: ان شاء الله بلكي بهذا الصيف نتقرب من بعض اكثر.... يكون مخلص دراسته .. بس ودي بسؤال للأخت الغالية سحابه صيف كيف اثرت على زوجك بسالفة الصلاة؟؟؟؟ اتمنى تفيدينا بطرقك... تحياتي للجميع ... و اتمنى يكون هذا الموضوع مستمر ... لأنني احببتكم جميعا.. و ان شاء الله حلوياتي تعجبكم:d |
اقتباس:
أنا مثلا أحس يومي يمر بسرعة سعات ماالحق اسوي كل اللي ابغاه .... ساعات ابغى ابدى يومي برياضة مثلا لكن مااستمر يمكن عشاني ضامنه نفسي لأني مااسمن :18: :17: لكن ولو ابغى احااافظ على الرياضة لازمو اشوف لي حل :22: ياالله يا أختي ar4aa حكيني انتي والبنات انتوا مثلي والا لا وكيف تقضوا يومكم <<<< وحده ملقوفه.... :d |
اقتباس:
ياهلا والله بأختي العزيزه ابيسه .... ولو ياقلبي ليه تتعبي حالك ألف شكر ياعيوني على الحلويات الحلوة والله شكلك مبدعة في عمل الحلى مشكوره حبيبتي ... :22: الله يحفظلك الاموره ماقلتيلي وش اسمها ... وماشاء الله عليكِ هذا المؤمل من بنات الاسلام حلو انك تحثي زوجك على التقرب من أهله أكثر ....الله يزيدك من فضله.... أما بالنسبه للصلاة بجاوبك أنا حتى تجي الاخت سحابة صيف وتفيدك أكثر... حاولي أنك في اوقات الصفء بينكم تكلميه عن نعيم الجنه وتشوقيه لها وحكيه عن الحور العين وشوي شوي اشرحيله ايش اللي يقربه من الجنه وانه شيء بسيط وربي ما كلفنا شيء صعب ....كمان لما تشوفيه متاثر من منظر عن الموت مثلا ذكريه ...باإضافه إلى انك تهديه أشرطه مؤثرة وكذا ... أحب اقولك اننا بعد نحبك في الله ودمتي بخير وسعادة ... |
وعليكم السلام ورحمة الله وبركاته
والله موضوع كثير حلو اختي الغاليه ,,,,,, ليه عشر سنين متزوجه والحمد والله الي اربع اطفال زوجي كثير طيب وحبوب والحمد الله هوه غير فيه اشياء كثير تعلمت منو شغلات ما كنت اعرفها في مجال عملو هو دكتور بلجامعه ربي يحفضوو بس في شغله بعدها مو راضي يبطلها الي هي الصووووت العالي :11: وكمان بفضل الله سبحانه وتعالى بطل الدخان الو شهر وكثير فرحت انا وهلا نسيه الدخاااان خالص وشكرا لصاحبه الموضوع :25: |
هلا وغلا بحبيباتي غاليتي ايام الطفولة ....بقولك عن جدولي اليومي الله يسلمج انا اسوي شيء يشبه النوم لين الساعه 11 (خبرك عندي بنوتات الله يحفظهم ضد النوم ما ينامون طبعا الصغيرة اقول هذا عادي (عمرها شهر الحين) :15: لكن الكبيره الله يحفظها من تسمع صوت قامت_ ماما يله انروح تحت_ ويبتدي يومي ما بين رضاعه وتبديل.......لين صادتي حاله اكتأأأأأأ :( أأأأب واذا باطلع اشوي طبعا الصغيرة ما اقدر اخليها عند حد فأخذها معاي وتعاالي عاد دوري مكان حق الترضيع :19: رغم اني اكون حريصه اني ارضعها وابدلها وكل شيء قبل لا طلع واحسب اني اتم ساعتين وارجع البيت قبل موعد رضاعتها.....لكن بعد افشل :16: ما ادري شاسوي يالربع .. :confused: ..فيني حالة اكتأأأأأأب احاول اغير المكان اروح بيت هلي نفس الشيء.....احس اني فاشله مع بناتي واني ماقدر اكون على قد المسؤولية فعلا انا وين والزواج وين.. :29: اجلس ابكي اذا بقيت ابروحي...عشان جذذي اهرب من اني ابقى ابروحي وطبعا قدام زوجي شيء ثاني ما احاول ابين له عشان ما يتضايق......رغم انه ساعات يقولي ايش فيك موعوايدك..(رغم اني من طبعي المزاح والفرفشه ....) فكرت اني ادخل نادي بس بعد وين اخلي الصغيرة....خدامتي زينه مع الاطفال بس انا ما أخلي عندها بيبي صغير ....ما أأمن انها اتعرف لها شكلي هذرت عليكم وايد...بس الله العالم اني احس انكم ربعي واخواتي عشان جذي انا تكلمت عن اللي في نفسي....بشيء ما بحت به حق غيركم |
| الساعة الآن 04:30 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©