|
خائفة من أن أتعبه ....وخائفة من أن أحس بالنقص..
السلام عليكم ورحمة الله وبركاته ..
أخواني وخواتي ...ابي مشورتكم بموضوع مهم جدا بالنسبه لي مو خطير ..لكن محيرني ومشغل بالي كثير انا حاليا والحمد لله توي مخلصه جامعه ..يعني على وش قواز وتقدم لي أشخاص لكن ماكان في نصيب ...وأبوي ما اخذ رايي فيهم اصلا لانهم مو مستاهلين حسب مافهت من امي مو هاذي مشكلتي ... المشكله شي ثاني خلوني احكيلكم شي عشان احطكم فالصوره انا البنت الكبيره وكنت الوحيده لفتره طويله عمري الحين 23 وخواتي صغار مره وابوي الله يطول فعمره ويخليه ... من ولادتي معيشني بدلع ودلال الله يجزيه الجنه لما كنت صغيره .. تصوروا لما ابغى العاب يسافر يومين يشتريلي احلى واغلى العاب ويجي .. ..وفالكليه ..كنت من من البنات البارزين فالكليه باناقتهم ولبسهم .. لانه فديته مايقصر معي باي شي بدون ما اطلب ...لاحظوا بدون ما اطلب لما اطلع السوق اقل مبلغ يعطينياه ثلاث اربع الاف ... وفالاجازات لما نسافر واتسوق اقل مبلغ 10 آلاف قبل نهاية السنه سافرت لظرف معين يومين يوم سفر ويوم جلست فالبلد اللي رحته واليوم الثالث رجعت فيه .. اليوم اللي جلسته صرفت 13 ألف ريال فالسوق مع العلم ان وضع اهلي المادي صدق انه زين الحمد لله بس مو خيالي يعني ابوي راتبه مايتعدى 14 ألف + دخل محلات تجاريه وشقق ايجار لحد هنا مافي مشكله .... ايام كنت اتضايق لان عماتي يحشون راس ابوي علي .. مايصلح كذت بنتك خربتها بكرا ماتلقى اللي يصبر عليها وعلى مصاريفها ... بكرا بنتك تعيش مو مرتاحه لانها تعودت اللي تبيه تجيبه وكلام كثير كان ابوي يطنشه ... وامي اللي تقولي انهم قالوا كذا ...وماظلمهم اكيد قصدهم نصيحه وخوف علي المهم الكلام ذا ماكان يعنيلي شي ... والحين مرت السنين وابوي الله يطول بعمره ماتغير علي ولا عمره حرمني من شي ابيه الله لايحرمه الجنه نجي الحين للمشكله .. الحين بديت اصحى ...اقرا هنا فالمنتدى واسمع من صديقاتي .. اللي زوجها مايعطيها فلوس كثير ... واللي مايقصر معها بس مو زي ماتبي ... وهنا اقرا عن بنات يستحون يطلبون من ازواجهم فلوس الا الضروري مررره ..وكثيررر مشاكل وصار ينشغل بالي واقول لنفسي ..احسن ما اتعب واتعب اللي بيصير زوجي او احسسسه انه مقصر او اضغط عليه لو بدون ماحس ...الاحسن اللي ما اقبل بواحد الا يكون احسن مني ماديا كثير بس ارجع اقول وش يضمن لي يتقدم لي واحد كذا مستواه؟؟ طيب اذا تقدم لي واحد اخلاق ودين ومحترم وشبه كامل بس راتبه مثلا 7 الاف وهالمبلغ كويس كراتب بالنسبه لشاب ...بس انا اصرف اكثر من نصف هالمبلغ بطلعة سوق وانا مو محتاجه الاغراض كثير بعد مجرد انهم اعجبوني ؟؟ طيب ارفضه احسن ما اطفش او اطفشه؟ لاني ماجربت نفسي يعني مدري عادي ولا بتضايق وهالشي مو مهم طيب مو حرام ارفض عريس زي هذا ؟؟ مليون سؤال يجي فراسي ولا احسن لما اصارحه قبل الارتباط الرسمي بهالشي ؟؟ ولا عيب كاني قاعده اوصل له مسج انك لازم تصرف كل اللي عندك علي او شي زي كذا ..يعني حركه ماهي حلوه اشوفها تعبت من كثر التفكيررررررر مدري وش الصح... انا تفكيري مو مادي ...لكن اخاف من المشاكل ؟؟ ومشكلتي بالسوق ومصروف اليد... اقصد ان اللي بيتقدم لي ماراح يعرف هالشي ... لان زي ماقلت مستوانا متوسط... ولا راعين سفر كل سنه ولا ساكنين فقصر وعايشين بترف ..يارب وصلت الفكره وسالفة مصروفي والسوق محد يعرف هالشي الا القريبين مني ... فاخاف تصير هاذي مشكله لي او له لان اللي بيتقدم لي بيتقدم على اساس اني مناسبه له ؟؟ يعني كأنه بينغش فيني بدون قصدي ... ابي تجاربكم.... في احد مثلي وجرب تزوج وعادي تأقلم حسب ظروفه؟؟ ولا بتصير لي مشاكل سواء بيني وبين نفسي او احسسه لاسمح الله انه مقصر ولا ان ابوي احسن منه وانه مو مالي عيني مدري وش الصح... ارفض المتوسط وانتظر الغني ؟ ولا هاذي ماتعتبر مشكله ؟؟ لان امي وابوي عادي ماعمري حسيتهم شايفين انها بتكون مشكله لي ... تعبت من التفكير ابي مشورتكم وجزاكم الله خير على وقتكم .. ابي ردود المتزوجين اللي جربوا ... واراء الشباب لو ارتبطوا فبنت واكتشفوا انها كذا ؟ |
أختى العزيز الفلوس هي وسخ الدنية و الرجل إللي باخلاقه و طيبته ما يشترى ابداااااا
كلنا بنرجع للتراب و الفلوس ما تدوم أبدا اختى نصيحة ليكي لو تقدم ولد الحلال شوفي اخلاقه و دينه بس و الرزق من عند الله و ما تنسي أن المبذريين من إخوان الشياطين فالفلوس إللي تصرفيها على السوق كثير و حرام والله ,في ناس حتى الاكل ما محصلينه !! فكري زين بالموضوع و لا تنتظري الغني !! يمكن واحد فقير أحسن من مية غني !! أهم شىء الاخلاق و الدين تمنياتي لك بحياة سعيدة إن شاء الله و دعواتك معي تنحل مشكالي و يعطيني الله باللي في بالي أختكم |
الله يفـــرج عليك أختي ويحقق لك اللي تتمنينه ..
بس حسستيني بإحساس الله لايوريك؟ وخليتني اتعقد اكثر ..لو فيوم طلبت من زوجي وقالي كذا!! الفلوس وصخ وفي ناس مو لاقيه تاكل ...مدري وش بحس صراحه؟؟؟ وهذا اللي خايفه منه عشان كذا طلبت شوركم...بس كلامك هجومي مره الله يسامحك انا قلت لكم... ماعمري طلبت... ابوي عودني وش ذنبي ..يعطيني ابوي فلوس واقول له لأ اخاف اتعود؟؟ مو ذنبي ..وبالعكس احس اني واعيه بما فيه الكفايه ومو غرور عشان كذا فكرت ..اخاف اضايقه او اتعبه او احسسه انه مقصر وهو يمكن مو مقصر ..وادخل فدوامه بسبب هالموضوع...او خايفه اصير زي وحده قريت مشكلتها من يومين هنا فالمنتدى ... ماتتجرأ تطلب منه فلوس ..لانها ماتعودت تطلب تعودت تاخذ وبس ... .......الله يعين بس .... |
رأيي بصراحة,
لن أقبل بفتاة تربت بهذه الطريقة, لأنه من الصعب جدا إرضاؤها. الزواج مسؤولية كبيرة ومايبغاله زوجة تصرف كثير. وما أعرفه هو العكس, في معظم الأحيان تكون المرأة هي المقتصدة, فالرجال لا يحسنون إدارة شؤون المنزل كالنساء. وجهة نظر |
أختي الكريمة ،، أحسست من كلامك أنك بحاجة إلى نصح وإلى من يقف بجانبك ويشرح لك أمور كثيرة ،أنت أكيد لك هدف تسعين إلى تحقيقه وهو من وجهة نظري هدف أي فتاة تعليم ثم وظيفة أن وجدت وأسرة وزوج وأطفال ، لذلك يجب أن تجاهدي نفسك وتضعين لها حد معين ، المال والأسواق كل هذه الأمور جبلت عليها المرأة ولكن يجب أن تضحي بها من أجل أسرة سعيدة من أجل زوج يعطيك الحب والحنان من أجل كلمة ماما ، اختي حياتك بهذا الروتين وبهذا الأسلوب تتجه بك إلى إتجاهات غير طيبه ، وربما تجعل الشباب يبتعدون عنك ، هذا رأيي الشخصي كشاب ،،،والله يوفقك يا أختي.
|
انتم مافهمتوني ولا انا ماوضحت لكم؟؟
قاعده اقولكم ان محد يدري ان هذا حالي وهاذي هي المشكله ... يعني مقدر اقول لنفسي عادي هو جاني وعارف وضعي وبيتصرف على الاساس ؟؟ انا عارفه ان اللي يتقدمون لي مو عارفين كذا وانا مثل ما احب لنفسي احب لغيري ... زي اني مابي انخدع فشخص .. بعد مابيه ينخدع فيني وماقلت لكم تقبلون تتزوجون وحده مثلي ؟؟ انا قلت رايكم اقبل بالمتوسط تجاربكم تقول انه عادي مايصير في مشكله؟؟ ولا ارفض لان مابرتاح ولا اريحه؟؟ صراحه ردودكم كلكم تخوف ...كني مسويه جريمه... ترا اكثر البنات كذا ..مني من كوكب ثاني انتظر رد( لطيف ) وعملي وبالنسبه للنقطه الاخيره انا خريجه زي ماقلت وقدمت على وظيفه واباشر عملي انشالله بداية الترم الثاني .. يعني بيكون لي دخل خاص ؟؟ مدري كذا تنحل المشكله ولا تتعقد اكثر .... انتظركم |
السلام عليكم ورحمة الله وبركاته
اختي الحبيبة يمكن انتي تعودتي على شيء وصعب انك تتركيه ولكن دائما هناك اشياء اخرى في حياتنا تستحق ان نضحي ولو بقليل من اجلها .. ياما ناس عايشين بترف وغنى ولكن غير مرتاحين نفسيا ومعنويا وياما ناس حياتهم المادية بسيطة ولكن مرتاحية ومستقرين حبيبتي مشكلتك بسيطة جدا ولا تجهدي تفكيرك بيها .. انتي كاى بنت بتحبي التسوق وهذا الشي اعتبريها هواية عندك بتحبي تمارسيها دائما واهلك عودوكي عليها ولكن عندما يجي الانسان الى يتقدم الك لو شفتي فيه الانسان الخلوق المتدين الملتزم لا تترددي في القبول ولا تفكري بهذا السبب حتى لو كان حالته المادية متوسطة .. ومارسي هوايتك بعد الزواج ولكن بحسب ميزانية زوجك ووقتها مش بتحسي بفرق المهم انتي من داخلك بتعرفي شو الصح وشو الغلط وربنا يسعدك ويوفقك في حياتك وردة الاسلام |
أختي المشكلة بسيطة ،،، سوي أتفاق مع زوجك فرضاً يعطيك ألف ريال أو أقل مصروف شهري + راتبك ، راح تنحل المشكلة واشتري زي ما تبغين لكن لا زم تساعدين زوجك إذا أحتاجك. بس
|
هلا بيك أختي
و سامحني والله ما قصدت اجرحك أو شىء يمكن أسلوبي بالرد ما كان زين انا عندي لك حل دوري على شغلة زينة و براتب زين إن شاء الله بعدها راح تقدري تصرفي على نفسك و فوق كذا زوجك لازم بيصرف عليك يعني هذه حل المشكلة :) المهم ان المتقدم لك يتحلى بالدين و الخلق لان هذا هو سر الزواج الناجح و قد اوصى به الرسول صلى الله عليه و سلم و على آله . اعلم من أحد الصديقات انها تزوجت احد الاغنياء و تمنت لو لم تتزوجه !!! فالغنى كانت نقمة عليها و تمنت لو تزوجت شخص بسيط و يقدرها و لا زوجها الذي يتكركها بالقصور و الأثاث وحيدة بين الجدران و هو يخرج لنزواته!!! تمنياتي لك بحياة سعيدة و مثل ما تتمنيها :) أختك :) |
اولا اعانك الله على نفسك وعليك بالدعاء ان الله يرزقك زوج صالح
وكلام الاخت وردة الاسلام صح لابد من ان تتاقلمي على وضعك الجديد اذا كان اقل من الوضع الذي اعتدي عليه لان الحياة لاتسير على وضع واحد لابد من الكدر فيها فالتقصير قد يحدث وانتي في بيت والدك في يوم من الايام لاسمح الله ولابد للانسان من التفاؤل يااخيه |
ابد ابد لاترفضين الزوج المناسب اذا كان ذو اخلاق عاليه ومقدر للحياة الزوجيه
اصلا اذا حبيتي شخص حب حقيقي بتعيشى معه لوفي عشه او على التراب لانك بتحسى معه بالسعاده الحقيقيه وتحسى ما ينقصك اي شى وتنسين الماضى الله يوفقك بابن الحلال اللي يستاهلك |
حبيبتي الحياة الزوجية لما اتكون مع واحد مرتاحه معاه ويعطيج ماي عيونه بالي يقدر عليه ويحبج ويحترمج ويصونج احسن مليون مرة من الاشياء الي تشترينها بسوق لمجرد لانها عجبتج !!
ابوج الله يخليه لج ويطول بعمره مو دايم لج ياقلبي ومو علشان دلعج ودللج خلااص ابي اعيش هالحياة وغيرها لاء غلط في حياة احلى انت ماجربتيها انج اتكونين اسرة بروحج انج اتكونين ام اتكونين زوجة في اشياء وايد لازم صج تتعبين وتفكرين فيها اكثر من شنو مستوى ولا معاش الي تبين اتوافقين عليه ياقلبي .. كلنا عشنا حياة غير الي قاعدين انعيشها ببيوت ازواجنا وقلنا نفس كلامج بس لما اييج نصيبج فكري بالشخص الي جدامج قلبه تفكيره التزامه بدينه مو بمعاشه !!! ياريت اكون سهلة عليج التفكير :) |
حبيبتي انتي من تملكين الجواب!!
نعم لست انا او غيري يحدد لك هل ستتكيفين مع من هو اقل مستوى مادي لك ام لا..فأنا اعرف فتاة اعلى من مستواك المادي ولكنها قد وضعت حدا للمستوى المادي الذي تريده في زوجها فطلبت في حدود المعقول فأقل راتب ستقبل به 4 الاف مع زيادة ..وستحاول ان تأقلم نفسها مع بيتها الجديد.. حبيبتي..اغلبنا يعيش في مستوى عالي في بيت اهله ولكن عندما نرتبط بشاب في مقتبل الحياة فعلينا ان نفكر في الاخلاق اولا ومن ثم المال والمال بشيء معقول.. انا لست متزوجة ولكن احببت ان ادلو بدلوي..ولك عذري على التطفل.. اختك حائزة الأمل |
طبعا لازم تهتمين بالدين والاخلاق اولا
لكن من الصعب انك تتأقلمين مع واحد راتبه عادي لانك تعودتي على الصرف فنصيحي لك خوذي واحد اعلى من المتوسط يعني حاولي يكون زوجك مهندس او دكتور وهذولا رواتبهم مرتفعه نوعا ما وانتي اذا توظفتي رح يكون لك راتب ومع شوي تنازل منك رح تعيشين باستقرار ان شاء الله لكن ما ينفع تاخذين واحد راتبه خمسه مثلا مارح تتأقلمين معاه الا بصعوبه لكن لو توظفتي انتي نصيحتي لك وفري من راتبك الشهري مبلغ او سوي جمعيه وحاولي انك ما تروحين السوق كثير بالايام العاديه وبالاجازة شوفي وش جمعتي او استلمي جمعيتك وروحي اشتري اللي نفسك فيه رح يكون مبلغ محترم احسن من روحة السوق كل يوم هذي ياشيخه تخلي البخيل يصرف كل فلوسه من يقاوم اغرائات السوق؟؟ اذا خففتي روحات السوق ونظمتي مصروفاتك وراتبك عندك وزوجك رح يعطيك باذن الله ماعندك مشكلة وعلى فكره كثييير من البنات كذا وانا منهم اهلي مستواهم المادي قدام الناس متوسط لكن ابوي وامي على قولتك مدلعيني وبطاقه امي حقت البنك في محفظتي ومصاريفي واااجده لكن ما شلت هم اذا تخرجت ان شاء الله بتوظف وبضبط وضعي بصرف نص الراتب واوفر نصه وبعد كم سنة بستثمر الفلوس اللي جمعتها لان مثيلاتنا في الصرف لازم يكون لهم مصدر كبير ولا يتعبون |
انا اقول انتي الي تعرفين كيف تمشين حياتك الزواج حياة ثانيه بعيده عن الام وعن الاب وعن ( دلع الاب)
بعدين الزوج الي بيتقدم لك يفكر في وحده تساعده على امور الحياه بتكوين اسره وانصك انك تسالين ابوك كيف عانا في تكوين حياه وقارني بزوج المستقبل |
عزيزتي الحلو فيكي انك عارفة انو اسرافك مشكلة...
بس ما تفكري انك عم ترهقي اسرتك بهالعادة السيئة...يعني لو سألتي حالك كم اتصدقتي هذا الشهر ...ما اتوقع يوصل عشر اللي تصرفيه في السوق...وانتي معترفة انو شي مو ضروري اللي تشتريه...يعني مجرد انو عجبك ...والله اعلم تستعمليه او لا... انتي لازم تفكري تحلي المشكلة هادي مو عشان زوج المستقبل بس عشان نفسك...وربنا رح يحاسبك عن كل قرش من وين كسبتيه واين انفقتيه...هاد عبئ والله اكبر مليون مرة من هم الزوج... عزيزتي بدك نصيحتي وما تزعلي....لازم تصلحي وضعك مو عشان الزواج بس عشان نفسك...ما اقلك ما تشتري ابدا بس اشتري بتعقل الشي اللي انتي محتاجيتو... واتمنالك التوفيق بحياتك وربنا يرزقك الزوج الكريم ان شاء الله |
والله كلام فيله فرحني هذا الصح اختي
تسلمين فيله على كلامج الدرر اختي الوحده تعيش مع واحد تحبه بتنسا كل الاشيا حتا طلعه السوق ما راح تحبيها مثل قبل وما بتكون شغلج الشاغل تحياتي لج ارضي باللي دينه واخلاقه زينه واتركي هم الفلوس بعدين تراها تجي بوقتها |
الغاليه مشكلتج سهله والواضح من كلامج انج واعيه للمشكله يعني بتحاولين اتحلينها
الحل المناسب هو من البدايه تتطلبي من زوجج مصروف شهري ثابت..حتى لو اشتغلتي عشان هو الزوج ومفروض يصرف..والراتب بكيفج انتي المتحكمة فيه لكن كلام زهره الاقصى صحيح لازم تغيرين في عاداتج لاجل نفسج انتي... خاصة يوم قلتي انج تشترين اللي تبينه واللي ماتبينه حبيبتي كلنا في اهالينا هذا وضعنا ولا ادري وين اودي الفلوس بس الحين عقب الزواج صرت احسب كل شي واراقب الاسعار ...اصلا بروحج بتحسين بالمسؤوليه..لان المهم هو الزوج مادامج مرتاحه معاه مابتهمج بيزات الدنيا ولا اسواقها... وعندج فرصة لتنظيم نفسج وهي انج بعد ماتشتغلين اتحاولين انج ماتاخذين من الوالد مصروف ابببببببد... وتحاولين تنضمين حياتج بالراتب وحاولي تخصصي قسم منه للتوفير وقسم منه مساعده للبيت..عشان من الحين تحسين بالمسؤوليه ودربي نفسج...صدقيني سويها وشوفي صح في اول الاشهر صعبه بس بعدين بتتعودين واتذكري ان هذا لمصلحتج.. وعلى فكره اسالي الوالد شو اللي مب مناسب في اللي يتقدمون لج؟؟؟ ياخوفي ان الوالد يضيع عرسان اوكى بس من خوفه انهم مايقدرون يصرفون عليج ..او انه مستواهم المادي مب اوكى!!!... انتبهي الغاليه من هذه النقطه وحاولي تفهمي السبب عدل..عشان تتكلمين فيها مع ابوج وتبينيله وجة نظرج في زوج المستقبل..والافضل تخبرينه يستشيرج قبل لايرفض حد يمكن لج نظرة ثانيه... ياما بنات فاتهم الزواج بسبة النظرة المادية اللي لاتودي ولاتجيب..واغلب الشباب يالله يبدون حياتهم.. ويبون اللي تساعدهم...فانتبهي الغاليه...لان الاهم الدين والاخلاق واعذريني على الاطالة |
أخواني وخواتي شكرا جزيلا وجزاكم الله ألف خير على تفاعلكم
ريحتوني شوي ...وخلاص ان شاء الله مابفكر بهالشي كعقبه اذا تقدم لي عريس مناسب وبصير مره سنعه ان شاء الله وماطفش ابو العيال ...وابوي عقاب له وردعا لامثاله بخليه يصرف علي حتى بعد الزواج عشان لايتعود يدلع كثير .....الله يطول بعمره ويجزاه الجنه أنا اكتفيت بهالرودود ولكم جزيل الشكــر وأرجو إغلاق الموضوع عشان المواضيع الأهم تاخذ حقها |
اختي العزيزه
مشكله اذا بطلعه وحده لسوق بتكلف 4 الاف يعني خالص راتب الرجال مسكين ولو تاخذين واحد راتبه 10 بطلعتين بتخلص انتي اذا تزوجتي بيتغير كل هذا شي طبيعي ان الواحد قبل لايتزوج يصرف كثير لاكن بعد مايتزوج ويصير مسئول يحسب الف حساب بعدين بيت ابوك غير بيت زوجك في بيت زوجك انتي بتصيرين مسؤله عن البيت بعدين بيجيك اطفال يعني ميزانيه ولله اذا الواحد صرف 4 او 5 الاف بطلعه بتخلص الفلوس لو عندكم كنوز ونتي الحين موظفه ممتاز |
الاحساس بالمشكله هو اول طريق الحل
فعند الزواج تختلف البيئه التى ترعرتى فيها عن البيئه فى الحياة الزوجيه وكونك استشعرتى ذلك فهذا بيسر الامر وبتكونى متفهمه لاى وضع كان |
المسألة بسيطة كثير
أنت تعودتي على شي ومتأكدة أنه ما بيستمر معك على طول يمكن فأول زواجك بتحسين بصعوبة الحرمان من هذا الشي بس مع الأيام بتتعلمي أن في الحياة أمور أهم بكثير من الشراء والترف والبذخ ولا أخفيك أنك قد تضيقين ذرعا بهذا الشي ولكن هناك أمور في الزواج ستخفف عنك أتمنى أن لا تضخمي المسألة حتى لو تزوجت واحد على قد حاله أهم شي دينه وأخلاقه وسوف تضحي بكل شي من أجل راحته وإرضائه فسعادته سعادتك عاااااااااااااااااااااااااااادي الأمر سهل كثير صدقيني وفقك الله |
شكرا جزيلا خواتي ..ماقصرتوا الله يجزاكم خير ..
انا زي ماقلت لكم واعيه بمشكلتي بس خايفه يكون تفكيري اني بقدر اتأقلم هو خيال وبنصدم بالواقع لاني عمري ماجربت اقتصد او اكتب قائمه بالمشروات قبل لا اطلع مو لاني ما اعرف ..لكن لأني ما احتاج اسوي كذا يعني لاتاخذون فكره عني اني سطحيه ومدلعه وهمي كله فاللبس والسوق وبس انا اعرف زين كيف ممكن اقتصد لكن كمعلومات ...ماقد جربت عارفه اني زي ماقلت ممكن اسوي قائمه باللي احتاجه ما ادخل الا المحلات اللي عارفه ان حاجتي فيها اشتري من محلات بحيث اكون اقدر اجيب منها اكبر عدد من الاشياء باقل قيمه ممكنه واشياء كثير بقعد ساعات اكتبها لكن اللي ودي اعرفه هل هالوضع واقعيا بيكون مقبول ..انا اشوفه نوعا ما مقبول لكن خايفه لما اجربه مايكون كذا لكن كتبت لكم هالامثله عشان تعرفون ان مشكلتي مو فالوعي ..انا عارفه زين المشكله وعندي اكثر من حل بس خايفه ان تفكيري يكون صحيح معنويا بس ماينجح على ارض الواقع عشان كذا طلبت تجاربكم واذا قلت ان صرفي كثير .. مو معناته اني مابعرف اعيش او ماني واعيه بمسؤليات الزوجه لكن احاول اختار انسان ممكن يصير لي معاه اقل قدر من العقبات من هالناحيه وشكــــرا جزيلا على سعة صدركم وعلى وقتكم...جزاكم الله خير |
عزيزتي جمره
عندي لك حل أتمنى تجربيه هذه الفترة تخيلي إنك تزوجتي بشاب كل مواصفاته رائعه اخلاق دين بس راتبه الشهري 7000 ريال والحين أنت خلاص أنتقلت تعيشي معه يعني تخيلي حتى لو انت فبيت أهلك وابوك الله يعزه خلاص قطع مصروفك مثلا حتى لو هو يعطيك بدون طلب الحين أنت خذي من كل الفلوس مبلغ 1200ريال لكل شهر يمكن تشوفينه قليل والباقي لا تستخدميه مهما كان تخيلي ان عندك بس هذا المبلغ واصرفيه مثل مابدك بس الأوليات دايما أهم شي وأستمري كذا 6شهور وبعدها قللي المبلغ شوي شوي كل 6 شهور هذا تدريب لك من الحين قبل لا تتزوجي تعيشي الواقع من الأن حتى لو فرضنا إنك دربت نفسك على الإقتصاد وتقدملك شاب ميسور يغرقك في الفلوس مثل أبوك فما يضرك شي بل بالعكس أستفدتي كثير عشان تعلمي أولادك وبناتك بعدين على الإقتصاد أتمنى تجربي تراك ما بتخسري خلي عندك خيال وااااااسع بتستمتعي كثييير الله يوفقك |
و الله يا أختي مشكلتك صعبة شوي بس حلها أكيد بيدك ..
و الحل عند إحدى أمرين .. إما تستمري على حالك مقابل اتفاق مع أهلك إنهم يتسمروا بالصرف عليك و يكون دور زوجك المستقبلي فقط تأمين الحاجات المستقبلية .. وهذا الأمر يرفضه الكثير من الرجال لأنه قد يكون انتقاص من قدرهم .. أو مطلوب إن تقومي بالتخفيف التدريجي من المصروف و ادخار البقية و عمل استثمار باسمك يولد لك دخل ثابت كشراء شقة مفروشة يتم تأجيرها و عائدها لك .. أو شراء أسهم أو عدة مشاريع حسب رأس مالك .. و بعدين تحسي بقيمة النقود و أنها لا تأتي بالساهل فأنا أعتقد أن الألف دولار لديك كدولار لدي .. لأن هناك من يقول ... من ملك البلاد بغير حرب يهون عليه تسليم البلاد و عليها نقيس من ملك المال بدون تعب يهون عليه إلقاء هذا المال في القمامة .. و أعتقد باتخاذك الخيار الثاني يكون لك كيان و شخصية إمرأة أعمال .. و تحسي بقيمة الدنيا ..و قيمة القرش .. و لذة القرش ... لأنه و الله أحياناً تأتيني اموال بدون تعب تذهب بدون أن أحس بها ولا أشعر بمتعة صرفها .. أما تعبي و المال القادم منه أجد منه الدولار الواحد بقيمة ألف من التي تأتي بدون تعب .. و عندما أشتري شيئاً أحس أن له طعم آخر هو من تعبي .. من شقاي ... وشكرا |
| الساعة الآن 10:15 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©