|
اقروا مشكلتي وعطوني رايكم....!!!!
انا بعطيكم نبذه عن حياتي الزوجيه ..اللي كملت قبل يومين سنتين :
-زوجي اصغر عني بسنة.. -انا جامعية بس ماشتغلت بناء على رغبة الزوج وزوجي يوم اتزوجته بس كان عنده اعداديه والحين اول سنة جامعه.. -مطوع وملتزم و بس مب متشدد وعندي طفل سنة وشهرين.. -اسكن عند اهله في ملحق بغرفتين وبينا حوش لكن بابه يطل على الحوش وطبعا لازم اروح عندهم اذا ابغي شي من المطبخ.. -بيتهم وضعه زفت فئران ووسخ رغم انهم ناس مرتاحين لابعد حد وعندهم بيت بمنطقه ثانيه يجنن وانظف بس أجروه؟؟ - -جيراننا والنعم اربع سكارى غير ملاحق مؤجره للعزاب:( ودكاكين قريبه من البيت..وبابهم دايما مفتوح.. حتى ان اخو زوجي الصغير اربع سنوات دايما برى البيت:( واخته اللي ست سنوات وغير السبات الرااااائعه اللي يقولها اطفال الجيران اللي توصل لاذني ..لان السب البذئ وصل لبيتهم حدث لاحرج..لدرجة الواحد اذا بيسب اخته يالقـ.....!!!!ومره الولد قالها لامه ومحد سوى شي؟؟؟ وزجي رغم التزامه بس لسانه مانظف من هالسب -عمي(ابو زوجي) متزوج ثنتين عمتي الاولى والثانية تقربلي من بعيد...وهم ناس مايزوروا الناس الا بالمناسبات الهامة جداجدا ونادر ومحد يزورهم الا قلة بس..ومحد يعرف عنهم شي الا اللي يعيش معاهم..لانهم كتووومين حتى علي انا اللي معاهم اتخيلوا من تزوجت من اول اسبوع وعمتي وبنتها الكبيره يقنعوني ان الحريم اللي بالبيت يكرهنني..وهذه قبل الزواج قالت انتي وانتي.. وهذه تبى زوجج لاختها..لما كرهت حريم اخوان زوجي وعمتي الثانية:( مع ان زوجي حذرني اول ليلة من الاستماع لكلام اهل البيت بس ماقال احذري امي!!فماتخيلت عمتي تكذب علي.. غير لازم نبخر البيت من الجن وعلى الصالة اللي فيها غرفهم باب مممنوع ادخلها ...بس حدي المطبخ وغرفة التلفزيون:( ومرات اتم بروحي محد عندي واذا سرت غرفتي قالوا ليش ماقعدت..وولدي اذا خليته قالوا ترميه وماتهتم فيه..واذا شلته عندي قالوا حابسته عندها؟ ..طبعا تصير سرقات بالبيت وحتى انا انسرقت والشغاله ماسلمت واكتشف انه عيالهم هم السراقين والكل يدري بس امهم تدافع واتقول حرام محد يعطيهم؟؟.. طبعا غيرالتنصت ووين رحت ووين جيت... واذا على صوتي انا وزوجي اكتشف انهم تنصتوا على كل كلمة نقولها؟؟؟مافي احترام لمتزوجين؟؟...ويوم كنت اراجع بالمستشفى عمتي ماتصدق تتحسبني اسير اتمشى؟؟ حد يتمشى وسط الاسبوع الساعه عشرالصبح؟؟؟ حتى ربيعاتي وحريم اخوانهم ماقدر اكلمهن لانهن يعتبر في نظرهم سبب اي تغيير يطرا علي وانهن يغارن مني ووساوس يحاولو يحشوها براسي ... حتى صرت اتواصل مع صاحباتي بالنت عشان اضمن محد يتسمع لي...ولا اخبرهم اني اتصلت على احد غير اهلي وحريم اعيالهم ماكلمهن الا ضرورة..عندهم خوف فضيع من الحسد واذا حد مرض او شي قالوا انا اللي حسدت:(..واذا صار شي بالبيت مايخبروني واذا طلعوا مكان يكذبوا علي وانا بس اكون اسال استفسر ,..واغراضهم اذا اشتروا يهربوها تهريب مني يحسسوني اني وحده شريره تراقبهم..وتحسدهم مع اني يالله الا هي سنتين بينهم عايشه وجايه من بيت ماعمري نقص علي شي فيه.. وهالشي خلاني خلاص احب اقعد في غرفتي بس اطلع الصبح واسوي الغدا وارد لغرفتي وماطلع الا ثاني يوم.. عشان اتجنب الحش والنش في اهل البيت:( ..خاصة ان مشاكلي بدت من هالشي..فقلت اتجنب المشاكل عشان زوجي واطنشهم.. اول ماتزوجت زوجي يخليني اشتري من الاماكن اللي تعودت وانا عندي اهلي اشتري منها.. بس بعد ما جت اخته زياره وسافرت..انقلب من اول طلب طلبته وقال ماعندي الا سوق الهنود اشتري منه؟؟؟؟ طبعا عصبت وصارت مشكله واهلي قالو اصبري ومابنقصر معاج:(.. قال ماخلي الشغاله تنظف ملحقنا مع انه يدفع راتبها...قلت اوكى...بعدين رفض حتى انها تكوى ثيابه؟؟ قلت الامر لله بس ولدي مايعطيني فرصه للكوى واخاف عليه فخليته يوديه مرات للكواي ومرات اجبره يمسك ولده لين اخلص اهلي قريب بس نص ساعه لانهم بالعاصمة .. لكن صار بس اقوله ودني لاهلي يرفض:( قلتله اسبوع اروح يومين واسبوع لا..خاصة انه حتى تمشيه للبحر او للحديقه مايرضى ..رفض عقب قلت خلاص اروح اخر الاسبوع الجمعه وارد بالخميس اللي بعده في كل شهر مره ووقت الدوره عشان مايكون عنده عذر بحاجته لي.. بس لازم كل شهر مشكله على الزياره .. والحين ماعندنا شغاله واندور وحده بس اقوم الساعه 10 البس ولدي واطلع عندهم واقعد اسوي الغداء غير تنظيف المطبخ والله مافي بريك غير لصلاة الظهر لين 2ونص واطلع ... وارد انام واقعد مع ولدي واشتغل بملحقي باقي اليوم.. طبعا مافي كلمة يعطيج العافية..بالعكس اذا بس شي صغير بالارض قلب الدنيا وكاني ماعمري نظفت شي؟؟ وفوق هذا قهرني وقال انا مامني فايده وجودي وعدمه واحد.. لاني بس ماقوم الصبح؟؟؟ شو يباني اسوي الصبح مايراعي ان المطبخ بعيد وملحقي بعيد ولازم البس واغير عشان اطلع الساعه 6الصبح عشان كاسة شاي وساندويش..وهم اصلا يكونوا مسويين دلة شاي وساندويشات؟؟؟ ليش يعني هالتعذيب ؟؟؟ وين رحمة الزوج بزوجته؟؟؟ انا جربت اول الزواج..والله مليت بس اقعد على التلفزيون وماعندي شي اسويه..لاني ماقدر اتحرك ببيتهم براحتي الا المطبخ وغرفة التلفزيون ولا اقدر اساعد عمتي اذا تباني انظف او شي معاها داخل..فارد غرفتي واحاول انام بس خلاص ماينفع..حاولت اناقشه بالمنطق بس خلاص يوم اكلمه مايرضى يناقشني ويغير الكلام لتجريح ويظهر عيوبي واني استاهل لاني ارجع من عند اهلي يوم يجي يراضيني اذا صارت مشكله؟؟ يفور دمي لين اعصب واخليله الغرفه.. وفوق هذا اسكت منه لان صارت مشاكل فوق ماتتخيلون وفي اخر مشكله وانا عند اهلي سالته قلتله يابن الناس سؤال؟؟ تحبني تعال خذني واذا لا خلاص انا اللي بطلب الطلاق عشان محد يزعل منك بالغصب تم يلف ويدور وقال انه يحبني وخذني ليلتها الفجر وماتكلمت...رغم اني بأذني سمعت عمتي تقول لعمي وهي زعلانه انه السبب وولده ماكان يبغي زواج:(.. . وهو اصلا مب اختصاص رومانس وكلام عدل ولا يقرب ولاشي..الا وقت حاجته حتى احبطني وكل ماسويت شي مايعجبه واذا تعدلت قاللي مب وقته ويطلع ويخليني :( مع انه مب بخيل والله بالعكس كان يشتريلي ولولده من المكان اللي احبه ويطلعني وقت ما ابى بس الحين اتغير..ويوم طاح الحين في نصبه صارت عليه ماقمت اطلب منه الا الاغراض الاساسية لولده عشان ماضغط عليه:( وعطيه الفلوس اللي عندي .. بس انصدمت واكتشف ان عنده بيزات ويدلع عمره مب مهتم بي وبولده..الا الحليب والحفاظات. ويكذب علي يوم انا اطلب...:(وصرت ادفع من جيبي ثم اللي بشتريه.. طبعا ماعندي تلفزيون ومب مقتنع بالمجد؟؟؟ بس رضى بالنت على الاقل اتسلى فيه... وهاليومين قلب الموجه ويهددني انه بيقفل الغرفة الثانيه (هي مكتب ومجلس حريم:( )..ويبعد عني النت.. والله يا اخواني اني بنت ابوي المعززه المكرمه والناس تشهدلي بالاخلاق وحب الناس واهلي طيبين ومعروفين وابوي متعلم وماخذ الماجستير واخواني اقل شي بكالوريس وماعمري مرت علي بيئة مثل هذه اللي اعيش فيها:(..ماعمر الوالد الله يطول بعمره قصر علي ولا اتبهدلت بمساكن مثل هذه:( ولاعرفت ناس بهالرجعية وقلة الاخلاق.... واللي ياخذ بنت الناس لازم يراعي وضعها عند اهلها كيف؟؟ صح ولا لا؟؟؟ خاصة اني طلبت منه مصروف بس 500 وهو راتبه 9000 وهي لي للتلفون ولاغراضي واي شي ابغيه يعني لاتقولوا مبذره وادور للغالي مثل ماهو يقول... ..القهر يوم خطبني ماعرف اهله الا بالاسم لكن بس عرفت انه مطوع وافقت من خوفي من عيال الحرام..فاخترته لدينه رغم فارق السن والتعليم...وماعرفته الا ليلة الزواج لان زواجنا كان بسرعه خلال شهرين.. اعتذر عن الاطاله وعدم ترتيب الافكار حاولت هذه رابع مرة اعدل في الموضوع واختصره وماعرفت من التوتر اللي فيني لدرجة اني اخاف اصاب بالاكتئاب لان حرمة اخوهم الكبير عندها اكتئاب من اللي شافته معاهم وخايفه على نفسي:( اخواني مب عارفه شو مشكلتي انا نفسي ومحتاره بس الضيق ذبحني ..لو اني لوحدي مع زوجي يمكن كنت بتحمل اكثر... بس صعب اتحمل مشاكلي مع زوجي ومشاكل اهله:( وغير الضغط النفسي من خوفي على ولدي وتربيته:( راضيه باى حل..او عتاب اي شي بس حد يرد علي...:( سؤال؟؟؟: هل المسكن خاص حق من حقوق الزوجه؟؟ خاصة اذا فيه اخوان للزوج ببيت اهله وعنده المقدرة على فتح بيت؟؟؟؟؟او على الاقل مطبخ صغير خاص؟؟ |
اختي الكريمه..لي عوده لموضوعك
وانا اقرأ مشكلتك اضحك من قلبي....تدرن ليش؟؟؟ كأنك تتكلمين عني بالضبط...بس وضعي شوي احسن....صج...شر البليه ما يضحك ولي عوده اخرى مع حلول تمكنك من العيش مع ناس مثل هالنوع...... اعذريني الحين مستعجله و الرد محتاج لوقت طويل... دوووووووووووت |
اختي ام فلان ..
ليش ما تطلبين منـه بناء مطبخ صغير ملاصـق لملحـقك .. وبناء جدار صغير عازل عن بيت اهـله .. ومسكنكم الحالي .. ولو كان قديم شويه .. قابـل للتجديد والتنظيف والصيانــة .. الأخ الكريم، برجاء تغيير توقيعك بآخر مقبول |
والله اني اقرى وقلبي يتعزز لك ويدعي لك ان ربي يفرجها عليك
اختي حاول بكل الطرق انكم تسكنون لوحدكم وبهذه الطريقه تقدرين تغيرين نمط زوجك وبعدين السكن الخاص من حقك وواجب على الزوج ما دام في البيت له اخوان كبار وكذلك فيه من يقوم بشغل البيت يعني امه مو كبيره ولا شي ربي يفتحها في وجهك وتتعدل حالك وإنشاء الله في أقرب وقت تبشرينا انكم سكنتوا لوحدكم ومرتاحين ومبسوطين |
يبعد عمري
كلنا معاك قولي دائما حسبي الله لااله الا هو عليه توكلت وهو رب العرش العظيم7 مرات اتوكلي على الله وخلي ايمانك بالله كبير حسبي الله عليهم واعوذ بالله منهم حبيبتي حصني نفسك وولدك وحصنيه واقرأي عليه المعوذات وهو نايم وصلي واستخيري الله يعينك ويسخرلك ويبعد عنك الهموم والشر ويسعدك ويهدي زوجك واهله كل ما قابلتي احد منهم خلي على لسانك الله يهديكم وربي يفرج همك عاجلا غير آجل اقنعي زوجك انكم تخرجوا ببيت خاص حطي له اشرطه دينيه من رأي انك تطلبي من ابوك يطلب من زوجك انكم تسكنوا ببيت خاص هذا من رأي وانتظر معك ردود اخواني واخواتي دعواتي لك |
السلام عليكم ...اختي الكريمه اقول الله يعينج بس اكثري من العاء...وحطي في بالج الصبر مفتاح الفرج..واول ما تفكرين في حل فكري في الولد الي بينكم... والله المستعان والله يعينج حبيبتي
|
اخت دووت..
شفتي كيف شر البلية مايضحك.. بس الله المستعان وفي انتظار ردج ان شاءالله.. وعسى الله يفرجها على الجميع... اخ حارس الازواج.. الحمدلله من ناحية ملحقي قدرت اضبطه واعدله اول ماتزوجت وسويت صيانه.. والمطبخ كلمته قلتله ابغيه بسيط ..اقتنع اول مرة..وبعدين الحين يرفض الفكره.. واشكرك اخوي على الرد والنصيحه الطيبه جعلها بميزان حسناتك ان شاءالله.. اخ ابو رواء.. بحاول معاه بالاسلوب الطيب الظاهر مثل ماقلتوا لازم السكن الخاص.. مع اني اول مرة اقنعته لان اخوانه كبار ومايخلى الجلوس معاهم مرات من الضحك او اطراف شعري تبان قدامهم من دون ماقصد خاصة اذا ولدي بحضني.. غير اني داخل قلبي خايفه على تربية ولدي.. بس ما احب اجرحه بهالشي عشان مايحس اني شايفه نفسي.. واشكر تفاعلك معاي ونصيحتك وربي يفرجها علينا جميعا ان شاءالله.. اخت روح الغالي... ان شاءالله بحاول ان ذكر ربي مايفارق لساني مالنا الا هو سبحانه يفرجها.. بس بغيت استفسر عن اي نوع من المواضيع اللي تنصحيني احطها له؟؟... خاصة اذا عندج اسم او موضوع ياليت تسعفيني..لان زوجي ماشاءالله مطوع ويخاف ربه في النهاية... ابوى كلمته وقال يفضل اني اجل موضوع السكن الخاص..يخاف يقولون اني بسرق ولدهم...:( مع انه متضايق من موضوع جيرانهم بشكل خاصة لو اخبره ان جارنا افرجوا عنه وحصله عمي سكران وعاري جنب باب بيتنا الخارجي ..يمكن يتشجع يفتح الموضوع اكثر اشكرج واشكر تفاعلج...وبانتظار ردج...ويفرجها على جميع المسلمين.. انشاءالله اختى دلوعة البدو... والله صابره واتراجع عشان الولد مع اني مرات اقول يمكن اريحله يعيش بعيد عن تربيتهم.. كل واحد راسب كم سنة وزوجي واخوانه طلعوا من الدراسه واشتغلوا بس الحين ردوا للدراسه عشان يحسنوا وضعهم... غير غير اولاد الشارع اللي ماعلى لسانهم الا الفاظ الله يعزكم عن سماعها... بس ان شااءلله نصبر.. انا حبيت احط مشكلتي عشان القى على الاقل عزاء يصبرني...لاني صدق خايفه امرض.. |
السلام عليكم ...اختي الكريمه اقول الله يعينج بس اكثري من الدعاء...وحطي في بالج الصبر مفتاح الفرج..واول ما تفكرين في حل فكري في الولد الي بينكم... والله المستعان والله يعينج حبيبتي
|
اختي الكريمه ام فلان اعانك الله على ماانتي فيه
العيشه مع اهل الزوج يبغالها اعصاب وقوة تحمل وايمان قوي ان ماضاقت الا فرجت طبعا هو الحل الوحيد تقريبا السكن الخارجي او المنعزل وبماان هالشي شبه مستحيل الحين فمالك الا ان تليني قلب زوجك الك وهذا مايجي الا بلدعاء وببعض الدهاء والحيل والذكاء العاطفي تقدري تستميلي قلبه وتملكيه او على الاقل تجذبيه الك ويقعد معاك اكثر لاتنسي زوجك ساكن بوسط اهله وبما تفكيرهم بهالطريقه راح يؤثرون عليه مهما كان من درجة الوعي عندنا مثل يقول كثر الدق يفل الحديد يعني حتى لو كان حديد الا مايسمع لكلامهم لاانهم حوله وين مايروح بلبيت فانا رايي اتفرغي لزوجك اكثر وكنت ومازلت اقول الزوج يحتاج الى كمية حنان كبيره متى ماحصلها ينسى الدنيا ومافيها لاان ناس كثير بوضعك كانو وعاشو الامرين من اهل الزوج ومهما كانو اهل الزوج متدينين سبحان الله الا ماتطلع اشياء تنغص وتقهر مرت الولد وجربو كل الحلول ومانفع معاهم الا هالحل .....ولاتنسي اختي شخصية الزوج اللي عايش وسط اهله تختلف عن شخصية الزوج اللي مستقل بسكنه وزوجك ماشاالله شكله فهمان ويخاف عليك والا ماقالك من اول زواج انتبهي تسمعي كلامهم وهذا دليل انه يخاف على حياتكم ولاتياسسي وتذكري الله معاكي ويحفظك ويحفظ ولدك ويفرج عنك عاجلا غير اجل |
اخت نرجس..
يمكن انا بديت اقصر في مسألة الحنان معاه في بعض الاحيان نتيجة الضغط النفسي اللي امر فيه.. ومثل ماقلتي لازم يتأثر بأهله ولا هو صدق من داخله طيب وعاقل وعارف الخطأ بس انقهر يوم اشوفه يتغير..لان ماصبرني على هذا الا هو ومعزتي له..ولاالمفروض من زمان عند اهلي ..واتمنى انه يقدرلي هالشي..ومايألمني الا لما مايقدرني ويسمع كلامهم..وهذا اللي يجرح صدق... وبحاول مثل ماقلتوا اقنعه بالسكن المستقل... واشكرج من اعماق قلبي على الكلام الطيب..وربي يوفقنا للي فيه الخير اخواني في الدين ...هل السكن الخاص حق للزوجه؟؟؟بغيت لو حد عنده خلفية يفيدني... اعذروني اذا اتاخرت هالاسبوع بالرد عليكم ومتابعة نصايحكم وارائكم لاني الحين بروح لاهلي ويمكن انشغل عن النت...بس بحاول ادخل عشان اتابع واستفيد منكم..بس لاتبخلوا على اختكم في الله.. الله يخليكم..اللي يحس في خاطره شي او نصيحه او عتاب حتى لايبخل علي.. وجزاكم الله كل خير |
اخيتي ام فلان انتي تحتاجين لتغييرات جذرية في حياتك لتكون الأفضل اول خطوة تكلمي احد من اهلك يتفاهم مع زوجك ان يخصص لك سكن خاص واتمنى ان يتفهم زوجك ذلك ثاني خطوةان تذهبي للعمل فذلك سيحسن من وضعك المادي على الاقل تشتري ماتحاجينه ثالث خطوة ان تذكري زوجك ان هناك كتاب وحساب وانه لابد ان يراعي الله فيك.. ولااملك غير الدعاء لك بالفرج والرزق الواسع.. أختك حائزة الامل |
مع احترامي للجميع...بس لا تدخلين اهلك بالموضوع حاليا.....حاولي تجربين كل الحلول وبعدين اذا ما نفعت دخلي اهلك عشان ما يركبك الغالط في وقت لاحق.....
.اما عن طريقه عيشي مع ناس بمثل مستوى اهل زوجك تقريبافانا جربت اعيش معاهم و كأنني مؤجرة.....مدخلي و مخرجي بعيد عنهم وابني ما يطلع بره عندهم الا ناااااااادرا....و زوجي ما يتشره على لانه عارف اني مشغوووووله حيل بدراستي و اصلا هو عمره ما ضغط علي اني اطلع بره .... وبالنسبه للسكن ...فمن حق الزوجه السكن الشرعي....ويكون مستقل عن الاهل و بعيد عنهم و هذا ليس من طيب الزوج بل غصب عن خشمه.....وبالنسبه لمساله طبخك لاهل البيت فهذا شي انتي مو ملزومه فيه مكاتب الخدم كثر النمل و اذا يبون احد يطبخ لهم يجيبون خدامه انتي زوجه ولدهم مو خااادمه لهم مع احترامي لك... والحين بزمننا هذا ما اظن في احد يبطخ...الله يخلي الخدم!!!!! واذا ما رضى زوجك يطلعك بسكن خاص اشرطي عليه يفصلك عن اهله بجدار و يبني لك مطبخ خاااااص و مستقل....و يعدل لك بالبيت بحيث يكون مو ناقصه ولا شي....و ابنك تقدرين تتحكمين بمكان وجوده.... اما عن موضوع ان اهل الزوج حسودين او يخافون من الحسد...طنشي المواضيع هذي كلها بس اهتمي بقراءة القران و المعوذات و حصني نفسك انت و ابنك..... والله الموفق دووووووووووت |
بودي مناقشتك بعدة نقاط :
أولا : المنزل الشرعي من حقك مليوووووووووووووووووون بالمية ، أو على الأقل أن تحصلي على ملحق بمدخل خارجي مستقل ومطبخ وحمام ثانيا : فهمت من طرحك للمشكلة بأن زوجك ليس بخيل ، ولكن قد يتأثر برأيي الآخرين وخاصة أهله ، إذن أنتي بحاجة إلى مكر النساء ، إغويه ودلليه وإسرقي عقله وقلبه ومن ثم سينفذ طلباتك ، أغدقي عليه بالحنان والعاطفة والحب ولاتنتقدي كثيرا ، ثم من قال لكي بأن كاسة الشاي الصبح هي كل مايحتاج إليه ؟ عندنا في بلاد الشام القهوة ولابد للزوجة من شرب فنجان القهوة مع زوجها قبل ذهابه إلى العمل لأنه تعطيه بذلك منشط طبيعي ليستفتح يومه فيتفاءل وتنشرح أساريره ولا تهمليه أو تهملي نفسك ليلا ، لكن لي طلب عندك وهو لاتعوديه أن تصرفي من جيبك ، فليعلم بأنه هو المسؤول عن مصروفك ومصروف طفله فحذاري أن يتكل عليك أو على أسرتك . إنها عادة بشعة وسيصعب عليكي التخلص منها إن تعلق زوجك بها . ثالثا : الأم مدرسة إن أعددتها أعددت شعبا طيب الأعراق ، بالنسبة لطفلك أهتمي به واعزليه عن هذه البيئة وحفظيه القرآن وعلميه أصول الحياة وأنا وبدون مجاملة عندما قرأت مشكلتك أحسست بأنك قادرة على تربية طفلك تربية سليمة فقط اعتبري نفسك عايشة بدولة أجنبية مثلا وأنتي بحاجة إلى عزل إبنك عن هؤلاء ولكن ليس لدرجة أن تجعليه انطوائي بل حاولي أن يلعب مع أولاد أخوانك وخواتك أو سجليه بروضة أو معهد أو ماإلى ذلك . هذا والله ولي التوفيق سيدرا |
اعتذر لكم اعرف ان الموضوع قديم ...من اسبوعين طرحت مشكلتي واعذروني ذهبت في زياره لاهلي وخفت ان افتح الموقع ويشاهد أحد اخوتي طرحي للمشكله كون الجهاز عام وفي الصاله:(...والرد يأخذ وقتا..
على العموم شكرا اخواتي على ردودكن الرائعه التي تثلج الصدر..احيانا احس بالرغبه بالكلام مع اناس غير من حولي والحمدلله وجدت في هذا المنتدى اخوة واخوات في الله لايقصرون في ابداء النصح الطيب لمن يطلبها .. |
اختى حائرة الامل..
بخصوص الكلام مع الاهل ..سبق ان تكلمت مع الوالد..لكنه يفضل تأجيل طرح هذا الموضوع مع زوجي ..ليش مادري؟؟:( العمل..يرفضه زوجي من اول يوم تزوجته فيه:(...ولازال على رفضه للان..مع ان اهله يشجعونه على الموافقه لكنه يرى اني بقصرفي البيت وفي تربية الطفل:(... واهلي يعارضون انهم يضغطوا عليه ..بل يفضلوا يعطوني اللي اريده واشتري اللي بخاطري يوم ازورهم بس لا اضغط على زوجي:(... واما عن الحساب والله كلمته.. ويسكت لما اقول ان له اخوات واللي يسوونه معاي يمكن يصيرلهن يوم يتزوجن...لان اول مرة قلت له هذا الكلام عصب وقال ليش تدعين على اخواتي..قلت له ليش تزعل انا ماقلت شي غلط ..بس دعيت ان ربي يرزقهن بزوج واهل يعالوهن مثل ماتعاملونا ..ان انت راض عن نفسك وعن اهلك ليش تزعل دامكم ماتسوون غلط !!! فسكت..وحسيت انه فهم كلامي.. الله المستعان يا اختى والحمدلله الان رمضان سخرته للدعاء ان يفرج عني كربتي وهمي..خاصة اني راضيه عن زوجي واحبه... وقبلته لدينه وما اريد اخسره لاجل امور دنيويه... وعسى الله ان يفرج همج ويسعدج دنيا وآخره اختى دوت... شكرا على العوده الطيبه... ماشاء الله..الدراسه عذر مفيد ...للاسف ماعندي لاشغله ولامشغله...بس العذر اللي نافعني ..وجود اخوانه الشباب..مرات يقتنع ومرات لأ..هو مسكين من داخله مقتنع بس لما حد يتكلم ينقلب مزاجه... والشغاله احنا مقدمين على وحده بس مشكلة من المكتب وماعرف شو...بس حتى لو وصلت هم يحبون الطبخ من ايدنا مب من الشغاله...بس مشكلتي يوم يصير شغل طبخ وتنظيف مطبخ:(... بس الله يعين... الصراحه فكره السكن الخاص الظاهر لازم ترد للسطح من اللي اشوفه من كلامكم وبحاول ان شاء الله افتح الموضوع ومثل ماقلتي لازم ارد للاذكار والادعيه ..عشان اسلم من افكارهم... ويارب تتوفقين وتتخرجين ان شاء الله وتستقلين بحياتج بهناء وسعاده ...يارب اختي سيدرا... -الصراحه ان تزيدوا اقتناعي بان المسكن الخاص حق شرعي مع اني كنت اشك..من ردود افعال اهلي:( الصراحه اللي يلزمني مدخل خارجي للشارع عشان ارتاح من هم المراقبه... ومطبخ:(...وياريت يتحقق بس بفضلكم برد بالطيب احاول... -مشكلتي من ناحية التقرب للزوج...اني من كثر الضغط مليت وعدم تجاوبه اصلا معي أثر على علاقتي معاه...ويمكن هذا اللي خلاه سريع التأثر بكلامهم..بس الحمدلله رديت هاليومين للدلع والافكار الرومانسيه..واحسه رد اكثر لي حتى صار يحب يقعد معاي..وان شاءالله استمر وابليس مايلعب بمخي واعصابي مره ثانيه..خاصة اني صرت اتجنب كثر الجلوس معاهم عشان ماسمع شي يكدرني..ويكدر بالتالي علاقتي مع زوجي.. - المصروف والله ماعرف شقولج..اتصدقين اني بهالزياره الاخيره ابوى وداني وولدي وخلاني اشترى للعيد من الحين..وطلب اني لاتكلم عند زوجي عن اغراض العيد الا اذا هو تكلم من نفسه:(.... بس مقهوره ان زوجي عنده فلوس ليش اسكت عن حقي؟؟؟...على الاقل بطلب مصروفي الخاص..اهلي مبدأهم انه في النهايه بيعقل وبيحس بالمسؤوليه:( ماعرف احس انه بيتعود مثل ماقلتي والافضل اطالبه بمصروفي.. -ومن ناحية تربية ولدي...الله المستعان...اتخيلي يا اختي اليوم ماقفلوا باب الشارع وشافوه وهو بالحوش وانا كنت مشغوله بالافطار..خلوه وماهتموا وحصله ابوه جدام باب البيت بره في الشارع....خلاص بغيت اموووت من هالموقف..حتى عصبت وقلتلهم محد يقولي ليش احبس الولد..:( انا بحاول بس ان شاءالله اسلم من التدخلات الخارجيه في المستقبل..خاصة من ناحية دخوله وخروجه..لانهم يتقبلوا خروج الطفل للدكان وهو عمره ثلاث سنين؟؟؟...فانا بنظرهم مجرمه اذا ماطلعته:( واشكر مداخلتج واطرائج الطيب وتسلمي وعسى ربي يسعدج ويبعد عنج الهموم..ان شاء الله وادعيلي تنفرج علي..واقدر انفذ كلامكم ونصايحكم الطيبه لي...خاصة بهالشهر الفضيل... |
السلام عليكم ورحمة الله وبركاته
يا أختي الحبيبه انتي نفسج بس اللي تردين على هالسؤال : انتي قادره تكملين معاه حياتج؟ ومتخيله انج راح تعيشين جذي على طول؟ اذا انتي شاريته صبري وحاولي تقنعينه انكم تطلعون بمسكن خاص واذا مارضى كلميه بصراحه ان المكان انتي مو مرتاحه فيه والبيئه ماتناسبج وانج ما ترظين ولدج يطلع نسخه طبق الأصل منهم اللي بالشارع واذا ما فاد حاولي ادخلين شخص من عايلتج تثقين فيه وبعقله واستشيريه | وخليه يكلم زوجج لأن يا أختي الحبيبه البيئه لها تأثير على حياتكم وحياة اطفالكم والقرار النائي عندج والله ولي التوفيق |
باين من مشكلتك أنها مع أهله أكثر من انها مع زوجك00000000 راتبه 9 الاف اتوقع مو صعبه عليه يلقى سكن منفصل ولو قدرتى اقنعيه ما يكون فى نفس الحى ولا تلومى زوجك اذا طلع عليه تصرفات غريبه انتى بنفسك شفتى البيئه الى كان عايش فيها بس خوفك الاكبر على أبنك
الله يخفف عنك نصيحه لكل زوج و زوجه أسكن بعيد عن اهلك واهلها أريح لك واريح لها سلا11111111111م |
| الساعة الآن 04:41 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©