|
بنت تبي تطلق من زوجها الشايب ؟؟
السلام عليكم ورحمة الله وبركاته..
أنا عضوه جديدة في هذا المنتدى لكني متابعة قديمة لكل مايكتب به وهو للحق منتدى رائع ويستحق الثناء.... رغبت أن أعرض عليكم مشكلة أختي لعلي أجد لديكم الجواب الشافي وليتعض الأباء والأمهات ممن قد يعمي الطمع قلوبهم...... أختي عمرها 19 سنه وجميله جدا تقدم لها رجل في حوالي الستين من عمره وعنده زوجتين لكنه مليونير فوافق والدي على الفور بدون حتى أن يسأل عليه وأخذ يحايل أختي مره بالكلام اللين ومره بالتهديد والوعيد حتى وافقت ووالدتي أمرأة مغلوبة على أمرها أوبالأصح ضعيفة الشخصية مع الأسف....... المهم حاولت أنا وزوجي بكافة الطرق بأقناع أهلي بأن هذا الزواج لايجوز خصوصا بعد أن سأل زوجي عنه ولم يجد من يمدحه فالجميع يقولون أنه أنسان متكبر ولكن أبي لم يسمع منا رغم أن والدي أنسان طيب ولكن ضيق ذات اليد وأحواله الماديه المتدهوره وتفكيره بأن هذا الرجل سوف يجعل ابنته تعيش في عز ونعيم وطبعا بعض الأباء هداهم الله لايعترف بالمشاعر بين الزوجين والتكافؤ وماإلى ذلك.. المهم تزوجت أختي حتى بدون حفله وأبي لم يمانع في ذلك وكان زوجها قد قال لوالدي أنه لايريدها أن تكمل دراستها ووافق أبي على ذلك لكن أختي عندما سألها الشيخ إن كان لها شروط (وقت الملكة) قالت نعم أكمال دراستي لأن أختي متمسكة بدراستها المهم تم الزواج ... ومع الأسف كان الرجل كما قيل عنه أنسان متكبر ولسانه وسخ والكلمه الحلوه ماتطلع منه لاويترك أختي بالأسابيع مرميه ببيتها لوحدها ولماتطلب منه أنها تزورني أوتزور أهلي (أهلي بمنطقه غير اللي ساكنه فيها أنا وأختي) يقول خل يجون ياخذونك هم ويمنعها من زيارتي وانا بنفس الديره معاها المهم أنه طلع أنسان ماينتعاشر ومايعطيها الريال الابالحسره هي تقول مابي منه فلوس ماأبغى الاشي واحد المعامله الحسنه وأنه يدق علي ويسأل عني ولايهملني بحجة أنه رجل أعمال ومشغول ..المهم البنت صارت كل ماتروح لأهلي تحلف أنها ماترجع له لكن أهلي يقنعونها لين ترجع لكن من شهرين راحت لأهلي وهي رافضه أنها ترجع له نهائيا ومصره على هالشي وأبوي ماقال شي يقول بكيفك وواضح أنه نادم قد شعر راسه على تزويجه لها..وهي الحين صار لها سنه من تزوجته ولله الحمد ماحملت منه وش رايكم بالموضوع وبماذا تنصحونها خصوصا أنه رافض أنه يطلقها ويقول أنه بيعلقها عشر سنين على هالحاله.. |
لا زالت مجتمعاتنا تشكو من مثل هذه الحالات
أعانها الله والمحكمة طريق لحل المشكلة لو رفض الطلاق بالطرق الحكيمة وفقكم الله |
ترفع الأمر إلى المحكمة ، وتطلب خلع ..
نصيحة لاتجعلونها ترجع إليه ابداااااااااااااااااااااااااااااااااااااااااااا .. وااااااااااااه الحمدلله إنها ماحملت ! الله يسامح أبوك ويهديه على اللي سواه !! |
اقووووول اختي هالنوعية ماتجي الا بالقوه لانه مستخدم نفس السلاح معكم
اختك محتاجة ان يكون موقفها نابع من ذاتها ...ويكون موقف صارم وقوي هالمرة امام ابووووك حسافة ان يفرط الاهل ببناتهم بهدف التزوج والستر او حتى الطمع فلا عذر لجرم ابوووووك وسامحه لله عليكم ان تكونو اكثر قوه وقرب من الله بالدعاء حتى لو وصلت للمحاكم مصيره يطلقها ورجل فووووووق راسه |
مسكينة أختك ضحية الاب الغير مبالي أبد
الله معاها ومالها الا المحكمة الله يكون بالعون ويخلصها منة باقرب وقت تحيااااتي |
تطلب الفسخ من المحكمة
و القاضي بيطلقها غصب عن الزوج بس طبعاً يجب استرجاع جزء أو كل المهر |
ختي والله تقطع قلبي وانا اقرا القصه
اختي حرام تخلونها معاه ....مالكم الى المحكمه وتدخلي انتي وزوجك الله يخليكم ولا تخلونها بروحها البنت ترا حيل صغيره وما تعرف تدبر نفسها وماعتقد ابوك كذللك بيقدر يوقف بوجه زوجها ...فأنت وزوجك تكفون اوقفو معاها طمنينا عنها ((الله يعطيك العافيه<< تحياتي |
الحل الوحيد هو المحكمة ....
|
الله يعينها ويفرج لها
المشكله دائما في الاختيار أنصحها أن يتدخل اهل الخير لكي يطلقها بالحسنى وإذا لم ينفع ذلك تذهب للمحكمه الله يوفقها للخير |
على العموم ممكن يتقدم أبوك للمحكمة ويخلعون البنت منه غصب عليه بس يمكن يصير به دفع الصداق الي تزوج فيه أختك
والله يكون بعونها |
عشر سنين معلقه
وش الظلم هذا وين الرحمه في قلوب الناس وين الخوف من الله وش صار في الدنيا هذي اختي قولي لأخت عليها بالدعاء في هذا الشهر الكريم أن ربي يفتحها في وجهها وان تتخلص من هذا الرجل عليكم بالدعاء لها حاولوا تكلمون احد من أولاده إذا كان فيه احد عاقل منهم وفاهم ارسلوا له احد المشايخ >> وترى هذا مو صعب تلقون شيخ وحاولوا من المشايخ المشهورين >> يذكره بالله ويخوفه من عذاب الله وإن شاء الله تنفرج عليها اللهم يامن لا تراه العيون ولا يصفه الواصفون اللهم يامن يقول لشيء كن فيكون افرج كرب هذه الفتاه في أسرع حال فأنت سبحانك عالم بحالها فرحمها وأرح بالها تنبيه : الأخ الفاضل أرجو التنبه للكتابة الصحيحة لكلمة ( إن شاء الله ) ، فهي تكتب على الصورة الموضحة . ولك جزيل الشكر وكامل التقدير على مجهوداتكم المباركة |
لا حول ولا قوة الا بالله
اختي العزيزة انا مع راي الاخوان لو مانفع باللين خليها تطلب الطلاق من المحكمة انا اول مرة اشجع على الطلاق لاني ضد هذه الفكرة تماما في المشاكل الى بتصير بين الزوجين لكن .. اختك صغيرة جدا وهذا الزواج كان غلطت والحياة مع هذا الشخص شبه مستحيلة لو كان سنه اصغر من كدة كان ممكن تفكر بحل ثاني لكنه بمقان جدها او والدها المهم الطلاق طبعا لمصلتحا وان شاء الله ربنا يوفقها ويعوضها بالخير نور حياتي |
لا حول ولا قوة الا بالله
الله يصلح لكى الحال |
بصراحة وجعني قلبي من سالفة اختك حسبي الله ونعم الوكيل وش ذنب البنت تدفع ثمن شبابها وحياتها علشان أهداف خطاءه لن ولم تصل ولكن الحل الوحيد هي المحكمة وطلب الخلع .. وانا عندي احساس ان الشيخ راح يخلع طالما انها مو راضيه به من الاساس نصحتي بأنها ما ترجع مهما عمل من عطايا او تهديد .. لانهم مراح يتفقون ابد وربي يرزقها بالزوج الصالح الي يعوضها عن مافاتها اخوك مصير مجهول |
جزاكم الله خير اخواني الأعزاء... وان شاء الله راح نتقدم للمحكمة ونقول أنها من الأساس ماكانت راضيه بالزواج ومابني على باطل فهو باطل حتى لو ماراح الوالد الله يهديه بنروح حنا والله يكون بعونها ويفرج همها ..
دعواتكم أخواني واخواتي بهالشهر الفضيل ان الله يفك عقدتها ويعوضها عن مافاتها لأنها مسكينه مالها أي ذنب باللي صار فهي مجرد ضحية ... |
اقتباس:
انا مع اختي زرقة البحر تطلب الخلع والله يكون بعونها.................... |
أنا برأيي إذا البلد فيها قانون وبيحكموا بالعدل لازم يترأفؤو بحالتها ويراعوا فرق السن ،،،
|
دعواتنا جميعاً أيها الاخوة والأخوات في هذا الشهر الفضيل .. شهر إجابة الدعوات لأختنا الفاضلة صاحبة المشكلة الأساسية ، كما نشكر أختها الأخت " **فرح** " عضوة هذا المنتدى ، على تواصلها واستشارة الأعضاء ، متمنين تواصلها واستمراريتها معنا بالمنتدى بغض النظر عن موضوع أختها . ولا تنسوا من أن تسمعونا الأخبار الطيبة أختنا الفاضلة ؛؛ يغلق الموضوع لاجتماع الآراء والأخذ به من قبل صاحبة المشكلة تحياتي واحترامي ؛؛؛ |
| الساعة الآن 02:00 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©