|
الإبتعاث الى امريكا -----> زوجي والذهب (محتارة)
بسم الله الرحمن الرحيم اللهم صلي على محمد وآل محمد اخواني واخواتي اني اضع بين ايديكم مشكله قد لا تكون مشكله بتلك الأهميه ولكني محتارة واتمنى منكم ان تدلوني للخيار الصحيح انا متزوجه من ستة اشهر فقط والآن انا وزوجي ولله الحمد مقبلين على الإبتعاث للولايات المتحده الأمريكيه بعد اثني عشر يوم للخوض بالدراسه الجامعيه لمدة خمس سنوات ( من المعروف ان اي زوجه قبل زواجها من ضمن تجهيزاتها تشتري ذهب ) ...!! وهذا الذهب في فترة ذهابي الى الغربه ستحتفظ به اختي ليست هذه المشلكه.. المشكله تكمن في ان زوجي اقترح علي اقتراح الا وهو :... ان ابيع ذهبي واضع المال في الأسهم او اضع المال في البنك للإستثمار ------------ وانساه خلال هالخمس سنوات وعندما ارجع سيتضاعف المال اضعاف سعر الذهب الأصلي في نظرة (احسن من انه يظل عندك مال مجمد ) يعني انا مارح استخدم الذهب في هالفترة اساساً ولمن ارجع من السفر اشتري لي ذهب ثاني وبكذا تكون موضات الذهب اختلفت هذي وجهة نظر زوجي ------------------------------------------------------ اما اهلي (انا ماقلت لهم راي زوجي) يقولون اني ما ابيعه لإن اذا بعته متى ما احتجت من هالفلوس بآخذ منهم وبيخلصون حتى لو انا من الأصل ما البس ذهب كثير بس انتوا عارفين الذهب يعتبر ذخر للعروس في الأيام الجايه لأن الأنسان ما يضمن الظروف انا محتارة بين كلام زوجي وأهلي ومقتنعه بكلام زوجي اكثر بس بقول لكم الشيء اللي مخليني محتارة زوجي من قبل لا تطلع لنا البعثه دايم يلمح لي انه اذا نحتاج فلوس ابيع ذهبي ويقول اذا بعتي الذهب لمن نحتاج بناخذ منه (ممكن)؟؟ وانا ما اقدر اقول له لا هذا زوجي اذا ما ساعدته اساعد من ..!! بس ما تحسون ان الكلام عن بيع الذهب بدري شوي ..؟؟ ل انا ماكملت حتى سنه من زواجي وابيع ذهبي (قويييييييييه بصراحه ) وغير كذا ببداية عرسي عمي (ابوه) عطاني 500دولار قبل لا نسافر شهر العسل وخليته عنده وصرفها هناك من غير ما يرجعها لي ونسيناها وعيدياتي في الأعياد تكون لنا (نسافر او اعزمه على اي مكان على حسابي) لكن ولا مرة اخذ فلوسي وصرفها على نفسه يعني انا اقول لنفسي ما تسوى هالفلوس اللي ياخذها مني لأنه في النهاية بيونسني انا معاه وهو اللي دايماً يصرف علي ما فيها شيء اذا ساعدته شوي ------------------------------------- زوجي يقول لي ادري ماتبين تبيعينه خايفه آخذ من الفلوس وحلف انه ما بياخذ شيء علشان لا اخاف بس طبعاً انا بينت له العكس وقلت له انا وانت واحد بس انا متأكده ان الفلوس بتخلص قبل لا اشتري ذهب ثاني قال لي انا ابغصبك تاخذين ذهب من اول ما نرجع قبل لا تستخدمين الفلوس وبكذا لا بستفيد من الفلوس ولا من الذهب في النهايه اهو يقول لي انتي تسمعين كلام اخواتك بس ما تسمعين كلامي --------------------------------------- انا ما ابي اكون ناكرة جميل بصراحه زوجي مو مقصر علي متى ما بغيت منه فلوس وهو عنده يعطيني ولا يقول لي لا وخلال هالست شهور سافرنا اكثر من 4 مرات منها دول اجنبيه وخليجيه غير انه يمشيني ويأكلني في مطاعم اكثر من مرة في الأسبوع ويعطيني مصروف كل شهر مو قليل وغير معاملته معاي الى من الأحسن الى الأحسن يعني هو يعتبر فلوسي فلوسه وانا بعد كذا لكن انا خايفه ان ابيع الذهب وبعدين ما يبقى عندي شيء اذا ضاقت فيني الدنيا هو عندي زوجي قاللي فكري وردي علي ساعدوني انا محتارة وما بقى شيء على سفرنا وانا ابي اتخذ قرار وآسفه لأسلوبي الغير منمق تحيــاتي :) |
شوفي انا اشوف ان كلام زوجك منطقي اكثر
اشوف انه افضل لك تبيعينه وتحطينه بصندوق استثماري بحيث انه ماتقدرين تسحبين منه وتخلينه هالخمس سنين لانه فعلا موضة الذهب تتغير وكل ما تاخر الوقت نزل سعر الذهب ياختي الفلوس اضمن لك من الذهب لان الذهب مع مرور السنين ينزل سعره ويصير ما يسوا شي لكن الفلوس تزداد وتزدهر مع الاستثمار حتى لو رجعتي من سفرتك باذن الله بعد خمس سنين ليش ترجعين تشترين ذهب يا اختي؟ الاستثمار اضمن الا لو احتجتي شوية ذهب تلبسينه اشتري لكن خلي الباقي في الحساب الاستثماري بحيث انك ماتقدرين تسحبين منه وبالعكس لو قدرتي توفرين من مصروفك او راتبك بعد كذا ضيفيه على حسابك الاستثماري ياختي الفلوس اذا اقتصدتي فيها وجمعتيها واستثمرتيها تكثر بسرعه ما تتخيلينها لكن الذهب زي ماهو انا شخصيا بعت شي مهم عندي وحطيت فلوسه بحساب استثماري ماقدر اسحب منه وكل ماقدرت اوفر مبلغ رحت للبنك ودخلتها في الحساب الاستثماري بكرا يجيك عيال ويكبرون وبتحتاجين فلوس يعني بيكون عندك مبالغ ويمكن تسوين مشروع بعد سنين طويله ان شاء الله وتقدرين تضمنين مستقبل عيالك باذن الله.. |
أخـــتي الفاضلة
رأيي من رأي زوجك |
أختي البحلة بالنفس مشكووووووورة اختي على ردك والله كلامك جداً منطقي
يعني اذا حطيت الفلوس في الصندوق الإستثماري ما اقدر اسحب منه ابداً ..؟؟ (اعذروني غشيمه بهالشغلات من قلب ) اخي الغيور تُشكر اخي لمرورك |
مرحبا أختي ....
أنا رأيي من رأي زوجك بيعي الذهب وحطي فلوسهم في الأسهم ، بس اتكون شركة مضمونة أما أنج تستثمرينهم في البنك أبدا ما أنصحج وهذا عن تجربة لأن البنك ما يفكر الا في مصلحته وربحه هو فقط ومو مهم عنده انج تخسرين.... ولك خالص تحياتي |
عفوا يا اختي مهره اصلح معلومتك
لما تحطين فلوسك بصندوق اسثماري بالبنك فهو اكيد رح يحرص على ربحك لا ن هو له نسبة فكيف مايهتم بخسارتك؟ اذا خسرتي انتي خسر هو ولا ليش تتوقعين انهم يساهمون بفلوس الناس؟ عشان سواد عيونهم؟ لا وانما لهم نسبه بسيطه وهذي الصناديق مضمونة لانه العاملين عليها خبرااااء في الاسهم لكن لو بغيتي تشترين اسهم في شركة مضمونه وش المانع؟ عموما انتي اذا حطيتي فلوسك بصندوق استثماري ماتقدرين تسحبين منه على كيفك لازم تروحين للبنك بنفسك ومعك اوراقك الثبوتية وتسوين اجرائات طويله عشان يطلعون منها شي لك وفيه نوع استثمار اخر ماتقدرين تسحبين فلوسك الا اذا بلغتيهم قبلها بشهر انصحك تروحين للبنك وتستفسرين بنفسك وهم رح يقدمون لك النصيحه المناسبه لك |
قولي لزوجك سمعا وطاعة وتستطيعين ان تفعلي ذلك بنفسك من خلال فروع النساء في البنوك
واوصيك بشراء الاسهم في الشركات النقية .............الله يبارك لك في زوجك ومالك |
اختي مهرة
AIM تسلمووون لمشاركتكم يعني الحين كلكم متفقين على راي واحد اللي هو راي زوجي بس انا للحين مترددة ما ادري ليش بصراااااحه ( خايفه وش تكون ردة فعل اهلي ) واستحي اقول لهم مالكم دخل :( |
أختي البحلة بالنفس .. أسعد الله مساءك بكل خير .. أنا أولا لما اتكلمت عن الاستثمار في البنك فأنا اتكلمت لأنه لي تجربة مع البنك والأستثمار أنواع مثل ما قلتي منه ما يمتد الى خمس سنوات ومنه ما يمتد الى ثلاث سنوات وطبعا طول مدة الأستثمار ما تقدرين اتطلعين من فلوسج شي إلا وعليه charges يعني يخصمون من فلوسج لأنج خالفتي الشرط ولنفرض سحبتي فلوسج في نفس المدة المحددة اللي تنتهي فيها المدة المشروطة كم يعني ربحج بكون لو قستيها وهم يشغلون افلوسج 5سنوات فبتكون ولا شي وترى اتكون بنسبة محددة يحددها نوع الاستثمار ..على العكس لو حطيتي فلوسج في الأسهم وعلى كيفج اتحركينهم ولا اتخلينهم الربح يكون أسرع وأكثر والخسارة اتكون ممكنة بس في مجال اتعوضينها وهذا كلام عن خبرة لأني اتعامل مع الأسهم .. ولك خالص تحياتي
|
أخـــتي الفاضلة
رأيي من رأي زوجك |
السلااااااااااااااام عليكم
اول شيء مبررووك على البعثة وزعقبال عندي يا رب تاني شيء انو ما في شيء اسمه فلوسي وفلوسه لانو خلاص كل شيء الكم انتو الاتنين وتالت شيء انا بايد كلام زوجك انو تاجري فيهم يقطع امه الدهب شو زنخ وما بطيقه ورابع شيء بتمنالك اقامة حلوة ودراسة موفقة والسلام عليكم |
انا رأيي من رأي زوجك والاخوان اللي سبقوا بالرد
الذهب الان حل مكانه الاكسسوار ومااصبح يتلبس كالسابق وتشتريه بسعر عالي وتبيعيه بربع القيمه والله مجربه يعني اللي يقول نرفعه للزمن والحاجه ماعد ينفع زي الايام السابقه انصحك بيعيه وضعي المبلغ في صندوق استثماري يتعامل حسب الشريعه تستثمرلك المبلغ وتزيده بدل مايتجمد وطريقة الصناديق الاستثماريه هي الافضل تاخذ نسبه من الارباح وتشترط في البدايه كم شهر ممنوع سحب المبلغ او جزء منه ويختلف عدد الاشهر من بنك للآخر ولكنها لاتتجاوز7_8 أشهر وبعدها لكي الحريه بسحب الجزء الذي تريديه او الارباح وترك المبلغ الاساسي نصيحتي انا مجربه لكن تحري الصناديق الموافقه للشريعه الاسلاميه وربي يرزقك من واسع فضله |
اختي ام المهدي
الف مبروك على الزواج و الله يرزقكم بالذريه الصالحه و مبروك على البعثه لي راي مخالف قليلا لماسبق الاستثمار شي ممتاز و تفكير واقعي و منطقي لكن بعثه ل5سنوات هذا كثير الاستثمار ايا كان نوعه يحتاج لمتابعه من صاحب المال ،،، و ماحد يحرص عليه غير صاحبه (في حالتنا صاحبته) و بما انكم مسافرين بالسلامه لخمس سنوات من سيتابع لك الامور الستثماريه و الماليه في غيابك |
يا أختي ..
أنا أقول رأيي و أنتي استخيري وفكري قبل البدأ .. أولا : أنا أأيد كلام ( أم أثير ) الله يجزاها بالخير .. ثانيا : إن كنت راغبة في الاشتراك في الأسهم والصناديق الاستثمارية , فلا تبيعي الذهب بأكمله ,, احذري ,, فربما ياتيكي اليوم الذي تكوني بحاجته . أشتركي بنص الذهب و أتركي النصف الأخر عند اهلك .. والله يردكم بالسلامة .. 0 |
يا اخواني مشكورين جميعاً لردودكم
والله يبارك فيكم وعقبالكم يارب لكن ركز في بالي راي اخي رسول الغرام صج انا لو بسافر لمدة خمس سنين منهو الفاضي اللي بيتابع مالي؟؟ صحيح انا عندي اخواني ولا بيقصرون بس اخاف اكون مثقلة عليهم ..!! |
أنا أقول لا تتركي الذهب في مكان واحد ,,
و وزعية مثلا على أخوتك , لأنك لا تعلمين ,, ربما يسرق منزل أختك ,, ومن الممكن أن يحصل أي شي .. اجعلي بعضه في التجارة وبعضة مكنوز .. والله يقدر ما فيه الخير .. |
اولا مبروك الزواج
ومبروك البعثه وبتوفيق ان شاء الله انا رائيي انم تستخيري اولا ولونو رائي زوجك هو عين العقل اه صحيح انتي على اي ولايه جايه . وبتمنى الك السعاده ان شاء الله |
انشاء الله خيــــــر
اختي حنان انا على ولاية مونتانا بس بأخذ اللغه وبعدين بغيرها لبنسلفانيا ليه اختي انتي بأمريكا ..؟؟ |
السلام عليكم
معلش انا رأيي مخالف قليلا لرأي الجميـع لاني لاحظت تردد السائله وعدم اقتناعها اقتناع كامل ببيع الذهب انا ارى ان تستخيري.. واللي بتقرريه سويه دون تردد لو ما تبغي تبيعي الذهب خلاص لا تبيعيه وفيه ايضا رأي هام.. وهو توزيع الذهب على اخوانك .. او الأفضل ان تبيعي نصفه و تضعي النصف الاخر لدى اختك وبالتوفيــق لك في اتخاذ الرأي المناسب لك |
مادري اي اخت مهره كيف النظام في بلدكم احنا عندنا صناديق استثماريه في البنك بحيث تعطين البنك مبلغ وهو ياخذه ويساهم لك فيه يشتري لك اسهم ويبيع عن طريق خبير والربح لك والخسارة لك وهو له نسبه بسيطه من الربح اوالخسارة على حد سواء ونسبته معروفه وبسيطه جدا(فهمت من كلامك النظام عندكم بالعكس يعني هو يستثمر وياخذ الربح وانتي لك نسبه معينه) وهذا لان البنوك عندنا غير مسموح لها تساهم ففتحت هذي الصناديق تساهم للناس وتاخذ نسبه وهذا الشي جدا ممتاز عندنا كل الناس حطت فلوسهم في صناديق استثماريه وخلال سنتين تضاعفت فلوسهم لان الاسهم ارتفعت السنتين اللي فاتت
وعموما يعني هو نفس الشي لو اشتريتي اسهم بس الفرق هنا ان فيه خبير يتابع فلوسك باستمرار ويحرص على ربحك عشان نسبته هو.. |
| الساعة الآن 09:08 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©