نفسية زوجتي تعبانه ... ساااااعدوني
 

السلام عليكم جميعاً ...

أنا ماراح أطول عليكم بموضوعي .. بس والله جيت أبي أدور حل للمصيبه اللي أنا وزوجتي فيها .. عسى الله أن يحل مصيبتنا .. آمين

المصيبه يا أخوان ويا أخوات ان زوجتي من فتره حست بآلام في الصدر من الجهه اليسرى .. على طول شكت في قلبها .. ليش؟ .. لأنها افتحت الانترنت ودورت على الأعراض اللي تشتكي منها ولقت موضوع واحد يقول ممكن يكون مشكله بالقلب! .. وهنا بدت المصيبه. :(

أول مابدت حالتها كانت تعبانه شوي .. وتخاف .. خوفها كان مبين عليها .. وكلمتها وقلت وش فيك .. وقالت لي أنا شاكه بقلبي!! .. قلت استغفري ربك .. على طول قلب؟ .. ليش ماتفكرين اننا قبل كم يوم كنا طالعين برا البيت وكان الجو بارد .. وممكن تقلصت عضلات الصدر ؟ .. قالت لا .. أنا أحس بضيق تنفس .. قلت وش يمنع طيب .. انتي غلط تشكين بالقلب .. المهم وديتها دكتور أمراض قلبه (جنسيته هندي) .. ومايتكلم الا انجليزي .. وكنت أنا مترجم بينهم:22: .. المهم زوجتي قالت له بالضبط وش تشتكي منه .. وكشف عليها كشف أولي .. وعطانا موعد للكشف بالموجات الصوتيه (echo ) بعد 5 أيام .. بس حالتها صارت أسوأ .. لأنها صارت تفكر وتوسوس .. وتركت البيت ودخلت عالم ثاني ... المهم قلت شكل المشكله مو متحمله هاخمس أيام فأخذتها من بكره للدكتور الهندي .. وقلت لازم تسوي الكشف اليوم .. فسوى الكشف قدامها .. وكان يقول هذا القلب .. نبضاته سليمه .. ضخ الدم سليم .. كل شي فيه سليم 100% ... ورجعنا لمكتب الدكتور وجلس يكلمها ويقول انتي لاتفكرين بقلبك .. مافيه شي .. هاذي عضلات صدرك متقلصه ويبيلها فك .. وعطاها حبوب relaxon عشان تفك العضلات المتقلصه ..

يوم طلعنا من المستشفى كانت مبسوطه وأنا على بالي 100% تطمنت على قلبها .. وذاك اليوم أكلت زين واضحكت وتغيرت شوي ودخلت جو البيت شوي .. جو البيت يعين أنا وبنتي .. لأن أنا وبنتي نلعب ونضحك وزوجتي الله يشفيها كانت بهمومها :(

المهم من بكرا يوم صحينا من النوم لقيت تعابير وجه زوجتي تقول ان الحاله رجعت لها ثانيه .. سألتها وش فيك ياحبيبتي .. كأنك مو مبسوطه .. فبكت :( .. قلت خير ان شاءالله؟ ... قالت مو متطمنه .. أحس بضعف بجسمي .. قلت ماهو الضعف بسبب انك ماكلتي طول الأيام اللي راحت .. وكنتي مهمومه .. تعوذي من الشيطان واذكري ربك وشوفي حياتك زين وراح تحسين بتغير .. المشكله كان يوم خميس ... والعيادات تسكر ومافيه الا طوارئ .. لأني كنت مخطط اني أوديها دكتور قلب عربي !!

يوم صار السبت (اللي فات) أخذتها على مستشفى ثاني .. وكان الدكتور مصري .. فدخلنا عند الدكتور .. وشرحت حالتها للدكتور ... قال الدكتور من قال لك ان المشكله بالقلب؟ .. قالت أنا قريت بالنترنت .. قال هو ممكن الأعراض تكون بسبب أشياء كثيره .. حتى القلق ممكن يسبب الأعراض اللي انتي فيها .. لكن حنسويلك تحاليل وفحوصات .. ماتصدقون .. سوى ذاك اليوم 3 فحوصات:
1 - فحص بالسماعه .. وقال دقات قلبك سليمه ومنتظمه
2 - فحص بجهاز التخطيط .. وقال نبض القلب سليم ومايبين فيه أي ضعف أو مشكله .
3 - فحص بالموجات فوق الصوتيه Echo .. وكان يقول لها " بصي .. ألبك مافيش زيه .. انتي عمال تضحكي على نفسك" :11:

بذاك الفحص كان يأكدلها ان كل شي سليم ووراها الطين الأيمن والأيسر والأذين الأيمن والأيسر .. ويقول شوفي دمك بينضخ ازاي ...

وزوجتي تقول أنا خايفه يكون فيه تضخم بالشرايين !! .. قال انتي ماتحكميش على نفسك وتوسوسي .. فقال لها كلام عن تضخم الشرايين وحبيت أشاركم فيه وأفيدكم بمعلومه .. الحمدلله زوجتي ولا مره استخدمت موانع للحمل (من حبوب أو لولب .. أو غيره) .. قال الدكتور دام انتي الدوره عندك منتظمه وماتستخدمين موانع حمل .. وتحملين وتولدين فمستحيل تفكرين بمشكله بشرايينك .أو حتى قلبك .. وخصوصا عمرك 25 .. وقال ان اللي يفكرون بالمشاكل هذي المفروض اللي يوصلون مرحلة اليأس .. أو اللي يستخدمون موانع .. المهم حبيت أفيد بعض الأخوات اللي تستخدم موانع .. واذا تبون معلومات أكثر عن المعلومه ممكن تسألون ..

نرجع لكلامنا .. الدكتور عطاها موعد علشان يشوف وش سوت .. وعطاها طبعا نصايح ويقول لاتفكرين وتوسوسين .. واهتمي باللي حوالينك .. رجعنا للبيت ذاك اليوم وكأنها شوي مبسوطه .. قلت المفروض تصيرين متطمنه .. خلاص ياحبيبتي لاتفكرين بشكل سلبي .. خلي عندك تفاؤل .. قالت ان شاءالله أحاول ...عدى ذاك اليوم وهي نص مبسوطه ..

يوم الأحد كلمتها من الدوام وقالت ضايق خلقي وصارت تصيح :( .. قلت ليش مافيه داعي كذا .. حاولي ماتفكرين بموضوعك لأنك مافيك شي .. مافيك الا وسواس بس .. قالت أنا خايفه .. قلت طيب أنتي لو تفكرين انه فيه ناس مهمين بحياتك ومحتاجينك وتلهين نفسك بهالتفكير كان تهون عليك .. قالت ما أقدر والله ما أقدر .. يعني داخله عالم ثاني .. كأنها داخله غرفه دائريه مافيها باب .. وماتقدر تطلع منها :(

رحنا أمس للدكتور مره ثانيه (علشان الموعد ) .. خلاها تجري على السير الكهربائي .. بس عشان يثبت لها انه قلبها سليم .. ووراها تخطيط قلبها بعد الرياضه هذي .. قال هذا قلب سليم 100% .. والله مافيه أي مشاكل .. قالت طيب ليش أحس بالآلام هذي؟ .. قال الدكتور انتي ركزي بحياتك ولاتفكرين بالهم هذا وراح تشوفين انك تغيرتي .. طلعنا من المستشفى وأنا حاط أمل ضعيف انها تصير مبسوطه .. وكلمتها وقلت لها لازم تاكلين زين وتنتبهين على حالك .. صار لك فتره ماتاكلين الا شي بسيط .. لازم جسمك يتغذى صح حتى لو غصبتيه .. رحنا البيت وتعشينا .. وماتخيلون انها أكلت أربع ملاعق رز بس .. حاولت خليها تاكل قالت ما أقدر .. ما أشتهي .. بعدها اجتمعنا مع الجيران ويوم رجعنا قلت ان شاءالله انبسطتي ... قالت لا والله .. أصلا جالسه بهمومي !! ... قلت المفروض انك تاركه الهموم على جنب وشفتي حالك .. قالت والله ما أقدر ... خايفه من قلبي!! ...

صارلنا الحين تقريبا اسبوعين على هالحال .. لا تاكل .. ولا تنام زين .. ولا تبتسم .. ولا تلعب معنا أنا وبنتي (اللي عمرها سنتين) .. ولا تتحرك كثير ..

رجاءً اكتبوا لي حلول (غير الدكتور النفساني) ... وادعوا لنا ان الله يرجع الحياة في بيتنا وبيت كل مسلم :(

وآسف على الاطاله

مشكوره أختي هلا على الرد ..

زوجتي أهديها كثير .. وماتتخيلين اني أكلمها بطريقه غير .. يعني أحاول أدخل عالمها عشان أطلعها منه .. بمعنى آخر أكلمها بالعقل الباطني .. اللي هو العقل اللي مخليها خايفه .. ان شاءالله مافيه شي اسمه يأس دام الواحد ايمانه قوي ..

زوجتي تقرا القرآن والحمدلله كثير .. وتقرا وردها ..

بالنسبه للحمل مافيه حمل .. متأكدين 100% وسوينا تحليل ومافيه شي ..

مشكوره على الرد مره ثانيه

ألا بذكر الله تطمئن القلوب .

أخي الكريم

عليكما بتقوي الله و المحافظة على الصلوات في أوقاتها و خاصة صلاة الفجر و الأذكار و الإستغفار

و أنصحك بالرقية الشرعية على زوجتك و غلإستماع بتمعن لسورة البقرة .

وأسأل الله العظيم رب العرش العظيم أن يشفيها

شكراً أخي مصطفى على ردك الجميل ..

أحب أقول لك اننا والحمدلله من المحافظين على الصلوات بوقتها .. وحتى قراءة القرآن .

بالنسبه لزوجتي عندها كتيب (الرقيه الشرعيه) .. وتقرا فيه بشكل يومي تقريباً

اللهم اني أسالك أن تفرجها على زوجتي وعلي وعلى كل مسلم

أخ مصطفى .. أشكرك على ردك الجميل

صدقني أخي اننا والحمدلله من المحافظين على الصلوات بوقتها .. وعلى قراءة القرآن ..

زوجتي عندها كتيب بعنوان (الرقيه الشرعيه) .. وتقراه كل يوم

أسأل الله أن يفرجها على زوجتي وعلي وعلى كل مسلم

شكرا

ما رأيك لو إتفقت مع طبيب صديق مثلا أن تأخذ زوجتك إليه و يخبرها أن لديها مشكلة بسيطة في أي شيء آخر دون القلب و يقول لها إن هذا هو سبب ما تشعرين به
و يصف لها أي دواء لا يأثر سلبا مثل الأسبرين و يخبرها بأنها ستتحسن و تكون بصحة جيدة بعد أيام قليلة

مرة أخرى و دائما أسأل الله العظيم رب العرش العظيم أن يشفيها و يشفي جميع مرضي المسلمين

أخي الكريم : صخر وقت لها ولا تبتعد عنها وحاول فيها إذا لم تتغير . أبحث عن الأنسانة المقربة لزوجتك لتقضي وقتها معاها لعل وعسى .. وأنصحك قبل كل شي الرقي الشرعية . وإذا لم ينفع معها الأحل الأخير دكتورة نفسانية ليس عيب يا أخي الكريم ..

المشكله أخوي مصطفى هذا اللي صار في بداية الأمر. وصف لها الدكتور حبوب relaxon .. وقال هذي راح تفك التقلص اللي بعضلات صدرك .. لأن هي أصلاً المشكله اللي فيها تقلصات بعضلات الصدر .. بس ما صدقت زوجتي :(

أخوي فهد .. مشكور على الرد

أنا وقتي كله لزوجتي .. وأنا أصلاً مخصص وقت كثير لها .. وفي حالتها هذي كل وقتي لها .. ماعدا فترة الدوام .. وبالنسبه للرقيه الشرعيه أنا وزوجتي متعودين ولله الحمد نقرا الورد يوميا .. وهي تقرا مثل ماقلت لكم قبل كتاب (الرقيه الشرعيه) .. الله يشفيها ويطلعها من حالتها

أخي
الله يكون بعونك و أرجو من الله أن يعطيك الصبر عليها

و هذا ما أنصحك به , الصبر و الدعاء لها بالشفاء

و ما دامت من المحافظين على الصلاة و باقي العبادات من المفروض إنها تؤمن بأن لكل أجل كتاب و ما تخاف من شيء

قد كتبه الله لها .

و الحمد لله رب العالمين

الله يتقبل دعاءك ان شاءالله

مشكور أخوي والله مع الصابرين

(وبشر الصابرين الذين اذا أصابتهم مصيبة قالوا إنا لله وإنا إليه راجعون)

نسيت أقول شي للأخ فهد ..

مافيه عيب لو تعالجت عند طبيب نفسي .. أكيد مافيه عيب .. بس والله العلاج النفسي متعب .. زوجتي جربته من قبل وتأثرت من العلاج بشكل سلبي وسبب لها خمول ومزاجيه غريبه .. عشان كذا أبي نبعد عن العلاج النفسي :(

السلام عليكم انا عضوه جديده بالمنتدى
والله يشفي زوجتك حبيت اقول اذا كان
عندك اجازه (يوم) وروحو شاليهات مثلا
لان هذا كله نفسي عشان كذا حاول تنسيها
مثلا روح مكان هيه تحبه مثل السوق وفليل اجلسو
سولفو والعبو عشان تنام وهيه مرهقه ماتفكر واذا
شفتها تفكر حاول تلهيها ........

حالتها النفسية لن تعالج الا في حالة...وجود مرض ما بقلبها............لا سمح الله

الدور هنا هو دورك

اتصل بدكتور صديق لك واخبره بمشكلتها واعرض عليه تمثيل تمثيلية عليها .....فهو حل ناجح لكثير من المرضي النفسيين

على الدكتور اخبارها بأن لديها مشكلة بسيطة في القلب او الحجاب الحاجز او اي شيء ويقوم باعطائها علاج لا يؤثر سلبا على صحتها

حكبوب فيتامينات او املاح او ابر فيتامينات .....مع عدم علمها بما هو نوع العلاج الدي تتناوله

وبعد اسبوع او عشرة ايام يخبرها بأنها تعافت وذهب عنها المرض وتتمتع بصحة جيدة ...في هذا الحالة فقط ستقتنع بأنها بخير وقد زال عنها الخطر




اذكر قصة قديمة من علاجات ابن سيناء

كان هناك شخص يشكو من ألم في بطنه ربماكان ألم بسيط ولكن الوسواس أوصله لقناعة ان في بطنه حنش أو ثعبان كبير يأكل من أمعائه

ذهب به اهله لجميع الأطباء وجربو جميع الأدوية والعلاجات ولكن دون فائدة
بدأت صحته في الهزل وبدأ دمه في الهبوط ونقص وزنه من كثر التفكير

ذهب لأبن سيناء واخبروه بالقصة

اقنعه بأنه فعلا يوجد ثعبان في بطنه اعطاه دواء بسيط جدا وهو زيت الخروع ....طبعا بدون علم المريض بذلك واخبره بأن هذا العلاج سيقتل الثعبان في بطنه


طبعا بعد اخذ الزيت عمل له اسهال ..... ........ ......... ...... .وبعد خروجه من الحمام أكرمكم الله

دخل بعده الدكتور ووضع ثعبان ميت ضمن ال(...........)


قال له تعال وانظر فقد خرج الثعبان من بطنك

شفي الرجل نفسيا وجسديا واسترد صحته



اتمنى الشفاء العاجل لزوجته

شكراً على ردك إختي مملكة الحب ..

ماتتخيلين وش كثر حالتها مأثره فيها .. لدرجة انها تشوف الدنيا بشكل ثاني .. والله ياناس ماتتخيلون وش كثر هي داخله عالم ثاني .. حتى وأنا أقرب واحد لها ماقدرت أدخل عالمها 100% .. بس أقدر أتصوره ..

سويت أشياء كثيره عشان تطلع من عالمها .. طلعنا السوق كذا مره .. رحنا لمطعم وتعشينا عشاء رومانسي بس ما كانت تاكل وماكانت تسولف .. كنت أضحك وأحاول أغير لها الجو بس هي مو قادره تدخل جوي .. مسكينه .. والله العظيم راحمها لدرجة إن العبره تخنقني وأنا أشوفها بهالحاله .. بس أخفي عنها أي شي يزود حزنها .. مع اني عارف انها مافيها شي ان شاءالله .. بس المشكله انها دخلت عالم ثاني واشتقنا لها أنا وبنتي :(

الله يفرجها علينا ان شاءالله

اختي ريم ..

القصه مضحكه وظريفه ومشكوره عليها .. تصدقين اني قلت لها نفس القصه في بداية الحاله؟ .. نفس القصه بالضبط بالحرف الواحد .. وبالأخير قلت ان اللي فيك شي نفسي .. محتاجه قناعه انك مافيك شي .. حتى هي ضحكت على القصه يوم قلتها .. وارتاحت نفسيا

بس والله فكره حلوه .. بس خايف من شي .. هي خوافه بدرجه كبيره .. وخايف لو رحنا لنفس الدكتور وكشف ومثّل عليها ان فيها شي بسيط ويزول بمجرد استخدام علاج وهمي ممكن تقول ماقلت لك اني فيني شي؟ .. وتبدا تشك وتخاف أكثر انها ماراح تتشافا .. وأخاف تزيد الطين بله :(

ما رأيك بأن الدكتور يقوللها ان مشكلتها فقر دم وهو بدوره قد اثر على نبضات القلب ....مثلا

لكن يجب اقناعها بأن احساسها لم يكون وسواسا او تخيلات

وانما كان صادقا


عليك انك تدبر لها اي مرض بالقلب او الدم او الصدر ....او بشرط ان يكون هذا المرض بسيط وسهل العلاج والشفاء ....حتى فيما بعد تقتنع انها شفيت تماما



والله يشفيها يااااارب

اختي ريم شكراً على تفاعلك

المشكله اننا سوينا فحص لدمها وكل شي سليم ..

احنا لقينا مشكلة تقلص العضلات بالصدر .. بس والله خلاص .. هي حطت المشكله من القلب و مو راضيه تقتنع بأي شي ثاني :(

السلام عليكم
الله يشفيلك زوجتك
انا برأي تاخذ اجازه كم يوم تطلع معها تاخذون عمره بعدين تتمشون في جده.........ز..

السلام عليكم ورحمة الله وبركاتة

اخي الكريم سوزوكي

انا انصحك بالرقية الشرعية لا تقول لي اننا نُحصن انفسنا بالأذكار

الرسول صلى الله عليه وسلم صابه السحر يعني هل الرسول لم يكن يحصن نفسه بالأذكار

اتمنى لكم التوفيق الشفاء العاجل لأهلك

أخي

أحس إن زوجتك مريضة بالوهم >> وهذا علاجه نفسي

إذا كانت تدخل النت كثير أمنعها أو لا تدخله إلا وإنت معاها حتى ما تدخل المواقع اللي تششكها بنفسها بزيادة

وخليها تصلي ركعتين لله وتدعي إن الله يعافيها

وتشرب ماء زمزم فهو لما شرب له كما ورد في الأحاديث

وحاولوا تغيروا جو شوية

يعني اطلعوا تمشوا

لا تخلوها تجلس لوحدها حتى لو أنت بالعمل وأنت خارج بالصباح خذها وديها عند أهلها ولا وديها مجمع تجاري

أو أي مكان حتى ما تجلس لوحدها وتوسوس مرة تانية

وكل ما يجيها الوسواس خليها تتعوذ بالله من الشيطان الرجيم

اختي 3Xفيونه ... شكراً على ردك .. بس والله المسأله زادت شوي .. وخصوصا في الخميس والجمعه .. رافضه تطلع والا تجتمع مع أحد .. حاولت بشتى الطرق بس مافيه فايده .. والله يوم الخميس أول ماصحت من النوم جلست تصيح .. وتقول أنا خايفه وأنا خايفه .. وأنا أطمنها وأقول لها تعوذي من الشيطان .. والله مافيك الا ستين ألف عافيه ماشاءالله .. بس لاتوسوسين .. كل الناس يتشكون من أوجاع وآلام .. يعني حبكت على مشكله بالقلب؟ فاقترحت نطلع للبر .. وأجبرتها شوي لأن هي أصلاً مب عارفه هي راح تستانس والا لا .. فطلعنا وغيرنا جو وانبسطت نوعا ما .. بس لما رجعنا رجعت حالتها :(

أخوي أبو أرين .. تسلم على هالرد .. والله أنا حاط في بالي أوديها لشيخ يقرا عليها .. بس مخطط اني أوديها اليوم ان شاءالله لدكتور قلب (ثالث) .. لأنها مارتاحت لا للأول بحكم انه يتكلم انجليزي . ولا للثاني بحكم اسلوبه الجاف شوي .. قلت اوكي والثالث وشلون تأكدين لي انك بترتاحين له؟ .. قالت ان شاءالله الثالثه ثابته ... قلت يالله .. نتوكل على الله والله يكتب اللي فيه خير ...

شكراً اختي بنوته حلوه على ردك .. مخططين والله على عمره انشاءالله قريب .. بس المشكله مافيها طاقه تتحرك .. ان شاءالله مجرد ما تقوم بالسلامه وترجع زي أول على طول نطلع عمره .. بإذن الله .. وبالنسبه للطلعات والجيات مثل ماقلت .. هي ماتحب تطلع .. حتى البارح جاري عزمني أنا وزوجتي وأول ما قلت لها صاحت وقالت مالي خلق أحد .. قلت خلينا نطلع نغير جو .. قالت أنا لو أشوف جارتي بيضيق خلقي لأني بجلس وبكون ساكته .. مع ان جارتها مثل اختها بالضبط .. وفعلا أنا ملاحظ انها تعلقت بالانترنت بشكل فظيع .. بس أشوف المواضيع الللي تقراها كلها عن القلق .. عشان كذا متطمن وقلت يمنك تفيد نفسها وتقتنع ان اللي فيها قلق ماهو بالقلب ..

الله يعدي هالمرحله على خير ان شاءالله