|
ممكن رائيكم بصراحه
مرحبا اخواني وخواتي
بصراحه صار لي اليوم موقف سخيف جدا طبعا انتو يمكن عارفين الانهيارات الي صايره بالسوق الاسهم السعودي رجعت اليوم من البنك وكنت متفق انا وزوجتي قبل لا اطلع للبنك نروح لسوق ونشتري اطقم كنبات لصاله المهم رجعت ومدري وش فيني ما اشوف قدامي الا احمر وضايق خلقي لدرجه خياليه مع انها مو اول مره اخسر لاكن مدري وش صار قالت يلا نروح قلت طيب طلعنا ورحنا لم المحل المقصود وهي تشاورني وتقول هذا حلو لا هذاك احلى ومن ها الكلام يوم بالاخير قالت ها وش رايك اي واحد قالت اصلاا انتي ما عندك سالفه مجرجرتنا على وجيهنا ولا عارفه وش تبين تاخذين الشرهه مو عليك الشرهه علي الي طالع معك هي انصدمت ومشت الموضوع عادي وتسولف وتحاول انها تلطف الجو ولله يا جماعه اول مره اقول ها الكلام مدري وش فيني احس بغبنه لدرجه فضيعه مو عشان الاسهم لا شي ثاني زياده على الاسهم عاد اخوكم بسرعه يتندم يعني حركتي مالها داعي بس ليش سويت كذا مدري ولله مدري عاد انا ودي اعتذر لها بس مالي وجه خاصه انها مسويه نفسها عادي جدا ولا كأن شي صاير ورجعنا البيت وتسولف وتعشينا وتعلق على التلفزيون بس احس انها مصدومه من حركتي |
أخوي والله زوجتك هذي تحطها فوق راسك وتحمد ربك ما سوتلك نكد على هالموقف!!
لو وحده نكديه وتدقق على كل شي كانت سوتلك سالفه! الله يخليكم لبعض يا رب .. والله واضح انها عاقله وأم العقل كمان .. ما شاء الله .. لا قوة إلا بالله شوف أخوي انت ضروري تعتذرلها .. مو زين اللي سويته .. ما تستاهل المسكينه ووضحلها انك متضايق عشان شغلك وهي راح تتفهم أكيد الله يكون بعونك |
الإعتذار .. قولا وفعلا .. و لا داعي للإستكبار .. تنازل وطيب الخاطر ..
|
والله زوجتك تستاهل هدية محترمة ومن بكرة
وصدقني ما راح تشوف أسهمك نسب خضرة إلين ما تراضيها ههههههههه يمكن تدعيلك دعوة يرتد المؤشر بعدها !! الله يعوضك خسايرك ويزيدك خير |
ياخوي والله زوجتك هذي اميييييييييييره
طيب انتو ياأهل الاسهم وش ذنب زوجاتكم يوم انكم تحطون حرتكم فيهم ياخي والله مكفيها اللي فيها طول الوقت مشغول بالاسهم الغبيه هذي وفي نفس الوقت حارمها من الحنان والرومنسيه والعطف وتجي انت في اللحظه اللي تفرغت لها تقول لها هالكلام والله حرام عليك ياخي تقول ان هي اللي لاعبه بالاسهم معليش اعذرني على الاسلوب الجاف اعتذر منها واللعن الشيطان ارق التحااااايا اختك |
نايف ياانا حقدت عليك ....... احمد ربك ماشاء الله عليها وربي كبرت بعيني الله يخليكم حق بعض إن شاء الله...لكن شوف نصيحه ان صرت معصب ولا متضايق ياانك تقولها انا معصب بقعد الحالي او تطلع من البيت لين تروق لان حرام تحط حرتك في احد عزيز عليك صح ولالا لذلك ان كنت زعلان ولا شي لاتجي البيت ولا قولها احسن من تصير مشاكل ماتدري لو يصير كذا ثاني مره يمكن تزعل وكذا فهمت علي اخوي... وتبي تعتذرلها طلعها ولا روح اشتر لها الي تبيه وقولها ذوقك مره حلو يعني عاد تعرف....
كلمتي ( ما شاء الله) و(إن شاء الله) تكتبان بهذه الطريقة |
أخي الكريم
هذا هو حالنا مع الأسهم ، ثم .. ألم تصبك مناعة عقب الانهيارات المستمرة للأسهم ؟ نحن النساء نتوقع انفجـار أزواجنـا في أي لحظة ، فكل أمر يكدر خاطرهم ، تكون مغبته علينا نحن أولاً حيث يفرغ الرجل غضبه ، وينفس عما به لزوجته والزوجة تصبر وتحتمل لكنها في نفس الوقت اعتذراراً منك تنتظر بادر فاعزمها على العشاء خارج المنزل ، واشرح لها سبب ثورتك ، وأوصها بأن تحتملك ، فإن لم تحتملك هي فمن سيحتمل ؟ لا بد من مفاجأة زوجتك بهدية غير متوقعة .. وفقكما الله |
إضافـة :
إياك ثم إياك أن تضغط على نفسك من أجل أن تسعدها ، كما فعلت حين كنت غاضباً فضغطت على نفسك وأخرجتها .. لأن احتمال الانفجار وارد في أي لحظة وحينها ، تنقلب السعادة إلى حزن وتعاسة ولو أنك اعتذرت منها بأسلوب لبق قبل خروجكما لكان ذلك أفضل |
بصراحه انا ضحكت لما شفت ان الموضوع في غير محله.....فعلا انت متضايق.....عموما الللي زوجته ملكه مثل زوجتك لازم ما يشيل هم انها تسامحه لانها اساسا ما حقدت عليك....هي فاهمتك لذلك مشتها لك....بس روح واتأسف وعوضها بطلعه من اللي هي.....وفي اخر الطلعه ارجع واعتذر وسمعها انك متألم جدا من تطاولك عليها....خلها تحس انها ماتهون عليك..وصدقني حتحس انها ملكه بجد على كل نساء العالم.....
|
تدري أخوي
بس لاااااااااااااااااا يكبر راسك المحظوظه هي زوجتك بعد .. مب بس انت !!!! رائع منها انها عدت الموقف ..وتعاملت معاك بحكمه .. بس الأروع لما الريال .. يحس بالضيق والندم لأنه ضايق زوجته.. قبلة على الراس ..فيها التقدير والاكرام .. وتقول لها هذي مقابل .. ذيج العباره بتحس .. الله .. محلاها من عباره .. عسل عالقلب .. بس عاد تحمل .. لا تستحلي وتعيدها..ا |
عادي يا خوي ، لازم خطيبتك تقدر خسارتك بالأسهم ... ترى اللي قاعد يصير مو شي قليل. وإذا ما تحملتك هي مين بيتحملك ؟؟؟؟
|
ينقل (( متأخرا )) إلى قسم المتزوجين والله لايفرق بينكم:) نصيحتي إن كنت تخشى الإعتذار فهدية لطيفة جميلة مع عزومة على العشا قد تفي بالغرض :22: |
حبها على راسها وضمها ضمة كبيييييييييييييييييييييرة...
وقولها حياتي أحبك مـــــــــــــــــــــــوت.... وصدقني بتنسى السم اللي قلته لها......... |
[CENTER]هديه وليلة على المزاج بتخلها تنسى كل الزعل
|
اخوي ...
المفروض زوجتك تحطها على راسك لانها مشت لك الموضوع وحاولت تلطف الجو وتتناسى الموضوع لو وحده غيرها مستحيل تمشيها لك والله ثم والله لو زوجي عمل هالحركه معي كان قومت الدنيا وقعدتها وكان جلست اسبوع كامل سافهته بدون ولا كلمه حتى يعرف يتكلم معي مثل هالاسلوب يعني زوجتك ماشاء الله تبارك الله عاقله وفاهمه وتحاول تبعد عن المشاكل المفروووض تحطها فوق راسك وتحترمها لانها باين انه طيبه وتحبك ولاتبي تزعلك الله يسعدك ويوفقك وانتبه لزوجتك |
بالتوفيق يارب
|
زوجتك ماشاء الله عليها باين انها انسانه رائعه ورزينه بعد الي تعاملت مع الموقف بهالشكل اقل شي وابسط شي ممكن تسويه وماراح يكلفك كثير جب لها ورد وقل( اسف ) مو عيب الرجل يقولها واشرح لها انك متضايق من الاسهم
|
مرحبا اخواني
اشكركم على تفاعلكم معي بالموضوع وهذا الشي مو غريب عليكم حبيت اوضح لكم شي انا ما اخشى الاعتذار بلعكس تماما خصوصا لزوجتي اغلبكم فهمني غلط هي احرجتني فقط لاغير يعني المفروض تكون على الاقل شايله في نفسها ومبينه لي عشان ابادر بالاعتذار لكن هي ابدا ما بينت انها متضايقه والشي هذا لايعني اني ما احس بغلطتي بلعكس بس انا احترت اسكت ولا اعتذر نتيجه لائخذها الموضوع بشكل عادي واحساسي اني غلطان بس هذا الموضوع عموما اعتذرت لها وارتحت انا من الهم واحساسي اني غلطان وهي مقدره الظروف الي امر فيها بس لي تعليق على اختي ريم الامور والحياة الزوجيه ما تجي كذا لازم كل واحد يقدر ظروف الاخر يعني بذمتك اذا سوت هي مشكله وسفهتني على قولتك ونا متضايق وحالتي حاله وش تتوقعين النتيجه بتربيني هي بالاسلوب هذا بعلكس راح تزيد المشكله اكثر واكثر وهي كذالك تمر احيانا بمزاج لايطاق وكلكم انتم يالبنات عارفينه يعني اعصب عليها ولا اكلمها واسوي مشكله ونا عارف الي تمر فيه اكيدا لا بسايرها واريحها لين تخلص من الي هي فيه صح ولا غلط بعد ما تهدا وترتاح تجي وتعتذر والحياة تمشي كذا اختي ريم عموما الاعتراف بالحق فضيله انا غلطان واعتذرت وهي مقدره ظروفي والحمد لله انتهت المشكله بدون زعل ولا شي اتمنى تستفيدين من كلامي انتي والاعضاء زي استفدت من ردك مشكوره اختي والشكر موصول لباقي الاعضاء شكرا لكم |
ماشاء الله لاقوة إلا بالله الله يتمم عليكم الهناء والسعادة يارب والله ماأحسن منك إلا زوجتك هذي الحياة وإلا بلا كل واحد عارف حدود ه ويعترف بأخطائه....الله يوفقكم ويرزقكم الذرية الصالحة عاجلا غير آجل....بس ياخوي نايف ياليت تطمنا على حالة زوجتك الصحية إن شاء الله إنها بخير؟؟
|
الحمد لله اختي زوجه بلاظل
هي بصحه وعافيه هذا من فضل ربي علينا واتمنى لكي اختي السعاده في الدنيا والاخره على حرصك وسؤالك على زوجتي شكرا اختي |
اقتباس:
|
| الساعة الآن 01:48 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©