|
خطبني شخص من بلد غير بلدي
سلام عليكم ! مع اني اخذت عهد اني ما اكتب مره ثانيه في اي منتدى ! بس انا محتاره وما لقيت غيركم استشيره!
الموضوع هو كما تعرفون انا! ما عندي اهل خارج بلدي ! بصراحه خطبني رجل من بلد مجاور ! وهو ماعليه قصور وراضي انه ما يتم العرس اله لما اخلص دراستي! بس انا مومتخيله نفسي اعيش خارج بلدي وبعيد عن اهلي مع العلم انه صارحه ابوي انه يحبني وشايفني بالعمره واخذت كل المعلومات عني ! ومع الايام اختبر اخلاقي بطريقتهم هم الشباب ! بس بصراحه حيل متوتره ومحتاره الرجل شاريني ! بس هم محتاره ماعندي القدره اني اعيش خارج ديرتي ! تكفون ساعدوني محتاجه المشوره!:25: |
قديم سألوا جحا ........ بلدك ايه ياجحا , قال بلدى اللى فيها مراتى
الاخت الكريمة ,, انت مازلتى فى بلدك وكارهه فكرة العيش خارجها ..... وهذا يكفى انى انصحك بعدم مغادرة بلدك , لانك لن تكونى سعيدة ولو اشعل لكى اصابعه العشرة شمع تحياتى |
مشكور يا مهاجر ! والله وانا قاعده اكتب الموضوع كان في احد يردني ! وبعدين انا لما اسافر وارجع لفتره قصيره احس بشوق للكويت! فشلون اعيش بره! بس انا قاعده اواجه ضغوط من الاهل انه هو ابدى رغبته انه يعيش في الكويت بس مو الحين ! خايفه انه يرد في كلامه ! وخاصة انه ابوي ريال يطبق الدين عدل وقال انه مافي عيب فليش نرفضه!
|
البلدين واحد وما راح تحسين بفرق
لكن لا تنسين انه ولله الحمد الحجاب في بلد خطيبك سائد لذلك اذا ما كنتي تتحجبين انصحك تتحجبين اولا مرضاة لله وثانيا حتى تتأقلمي مع الوضع هنا |
اقتباس:
|
حبيبتي يتيمتك يا جابر...
ألتقينا مرة ثانية وأهلا بك.... تبين رايي عن تجربة....؟؟؟ لا تقبلين به... أنا عايشة لوحدي في بلد زوجي لا أم ولا أبو ولا أهل ولا هم يحزنون... أموت من الشوق لأهلي...(بكرة رايحة لهم بإذن الله) مع إنه مايمر أكثر من شهرين ...لازم زوجي جزاه الله خير يوديني لهم ... ولكن أموت باليوم ألف رمة.. وإذا أحتجت لهم ما أحصلهم... ونقطة ثانية... أحس الفرق بين ديرتي وديرة زوجي... مثل الفرق بين ديرتك وديرة خطيبج... يعني فرق شـــــــــــــــــــــــــــــــــــــــــــــــــ ـــسع... في الحياة والعادات والتقاليد... شي وايد صعب... أنا صار لي أكثر من 4 سنين وللحين مو قادرة أتأقلم عليها... نصيحة أخت محبة... لا تطلعين من ديرتك......... |
بصراحه
إذا جآكم من ترضون دينه وخلقه فزوجوه ولكن كيف ستكون زيارتك لأهلك في البداية ؟؟ وياختي إذا رزقك الله باطفال رايح تتأقلمين مع الوضع . الله يدلك على الخير |
مشكوره يا بحرينيه!وشكلي قاعد اقتنع شوي شوي ! بس في كلمه ترن براسي قالوها رفيجاتي انه مو كل يوم تلقين زوج يحبج! مشكوره حبيبتي وتروحين وتردين بسلامه ! وسلمي على البحرين اللي لها مكانه بقلوبنا الكويتيين!
|
انااشوف انه مافيها شي .......
وبعدين ويش فيها لو عشتي في بلده .. وخاصة مدينته ...مدينه كبيره .... الخوف انك ما تتأقلمي علي الوضع اللي هنا ... ما بتلاقي نفس الحريه اللي عندك ...مثل سواقة السياره .والاسواق ..وغيره ..........واخيرا استخيري الله ...............والله يعينك . |
اقتباس:
|
اقتباس:
وبالنسبه لكلام صديقاتك والله صحيح لأن الرجل الطيب فرصه في هذه الأيام لا تعوض أخيرا إذا عزمتي توكلي على الله وأستخيري والله يقسم لك الخير |
أنا انصحكي ان تقبلين هذا الزوج لأنه ذات خلق ودين. اذا بتحبي تزوري الاهل فالمواصلات متوفرة ماشاء الله.
فكري زين احسن ما تضيعي فرصة العمر. |
اقتباس:
|
استخيري ..أنا خالتي عايشة في بلد زوجها ..:)
بالبداية كان صعب و الحين عادي ..كل عطلة عند أهلها .. حطي بعقد الزواج انه يوديج الديرة كل جم مرة :) |
أختي بما انك ماتعرفينه ومن جنسيات مختلفة أنصحك تسألين عنه كثيييييير وتكون فترة الخطوبة طويلة عشان تفهمون بعض
واختي حبيت انبهك ترى شبابنا غير شبابكم اقصد في التفكير.. شبابنا يميلون للشدة أكثر وبعدين يمدحون شبابكم كثيييييييير ياختي خذي منكم أحسن ( دهنا في مكبتنا <<< على قولتكم :25: بس تصدقين اختي هذا لأنه شافك معناته معجب فيك وبشخصك وهذا شعور طيب يعني شاريك صح ولالا؟ استخيري والله يكتب لك الخير يارب وطمنينا عليك يالغلا |
حبيبتي هذا الشي راجع لج...
بس لما تشوفين الناس اللي حواليج كل يوم عند اهلهم راح ينزف قلبج دم... ليش كل الناس يشوفون أهلهك متى ما يبغون وأنا لا... قالوا لي العيال بيملون حياتج... الله يحفظهم عندي بنتين بس مافي شي يعوضني عن أمي وأبوي وهلي وصديقاتي وعشرة عمري وديرتي.. أنا في ديرتي ماتنقب وأطلع وأروح وأيي على راحتي.. بس هني... سجن... حتى لو زوجي حاول يفضي نفسه عشان يطلعني.. مايقدر كل وقت.. أحتاج لأمي وأبوي بس ما أقدر أشوفهم.. في الحمل.. تصير مناسبات في ديرتي.. بس ما أقدر أسافر... توفى خالي وأنا بأول الحمل ولا قدرت أروح لأني كنت تعبانة حيل... كل هلي في ديرتي الواحد يشد من أزر الثاني.. مت من الحزن ويواسوني بالتلفون...... عرس ولد خالي كان قبل عرس حماتي بليلة... ماقدرت أروح عرسه... واااااااااااااااااااااايد تضحيات... بس ما أقول إلا الله يصبرني... |
لا احد يستطيع ان يحدد مصيركِ
انت حددي بنفسك هل لك القدره على مجابهة الاغتراب او لا؟ واذا كنتِ من النوع الذي لا يتحمل الغربه فلا تعذبي نفسكِ ولا تعذبِ الرجل |
يرجى الاكتفاء بتعبير ( بلد غير بلدي ) او ( خارج ديرتي ) ، او من غير جنسيتي ، بدل تحديد اسماء الدول وشكرا
|
مشكوره شوبارد ! بس اذا طولت فترة الخطوبه وحبيته شصير فيني ! وبالنسبه لشده يمكن بحلاوتي اقدر اخليه يلين!!!! واذا على شبابنه والله انهم عسل واللي تبيه البنت يقولون تم ! بس بعد شبابكم ماعليهم قاصر! بس شكلي برفض قرار نهائي ! والله مااقدر ابعد عن ديرتي ولاني قادره على الغربه مع اني متاكده انه اهل المملكه ونعم فيهم يحسسون الضيف انه في بلده ! بس الواقع غير ! خايفه من اني بصراحه ما اتاقلم مع الوضع انا عايشه في الكويت كل فري خايفه من الحكره! بس والله كان سبب ثانوي مو رئيسي !
|
اعتقد ان المشكلة لساكي صغيرة وما زلتي متعلقة بالصديقات والعائلة (ماما بابا ...) اظن انو تردد طبيعي لصغر سنك والله موش عارف لو كنت في مكان ابوك اقبل زواجك هذا بس راح يجي وقت تشوفين كل صحباتك يتزوجون وكل واحدة تصبح في شأن وراح مع الوقت يقلوا العلاقات مع الصديقات وما راح ينفعك الا الزوج الصالح.
عليك بالاستخارة واستشارة ابوك وامك. |
نصيحتي هي انك تصلي صلاة استخارة و شوفي ادا اترحتي توكلي على الله . ما ارتحتي قولي لهم انك استخرتي ربنا و ما ارتحت. و طمنينا عليكي. في امان الله.
|
أنتي من تستطيعي القرار..هل تسطيعي الغياب عن اهلك لفترة اقلها شهر بمعنى كل شهر تزوريهم كم يوم؟
ولتعلمي ان الغربة صعبة وبدون اهل جحيم.. ان كان السفر الى بلد اخر مؤقت وسيعود لبلدك فوافقي على ان يكتب هذا الشرط في عقد الزواج.. وان لا فلا انصحك أختك حائزة الأمل |
مشكورين كلكم ! الله يفتح عليكم وينور لكم ! بفضل الله ثم بفضلكم خلاص قررت ارفض ! الله يعوضه اللي احسن مني ويعوضني خير ! لاني من كلامكم ايقنت اني وحده ما اقدر ابعد عن ديرتي وعن اهلي ! شكرا لكل واحد قال رايه لانكم بصراحه نورتوني ! وبالخص بحرينيه ولكن! وبعد البحرينيه الثانيه نسيت اسمها ! لانهم افادوني بتجربتهم !
|
تصدقين يا بحرينيه ولكن ! اني غبيه انتي رده ردين وعلبالين انه كل رد وحده غير عل العموم مشكوره حبيبتي على الافاده!
|
اقتباس:
هههههههههههههههه مب غبية ولا شي بس من الحيرة اللي فيج افتر المخ شوية...:23: والله يعوضج بزوج أحسن ومن ديرتج..... |
مرحبه اختي انتي بالاول استخيري وشوفي لان مب زين ترفضين انسان زين وانه مثلج تقدم لي واحد برع ديرتي والحمدالله متقبله كل القبول اني اسكن في ديرته لان اهم شي زوجي يكون معاي ومعاه انه راح احس براحه والامان نصيحتي لج تستخيرين اختي وفكري ان اهم شي تلقين زوج ذو خلق ودين لا تضيعين هالشي وهذا رأيي وحسب الي اشوفه وربي يوفقج ويوفق الجميع ان شاءالله |
مشكور هنوفه ! بس انا الحمدلله اخذت القرار! ومستعده ما تزوج بس اظل بديرتي معززه مكرمه بين اهلي وناسي ! تسلمين حبيبتي! اما بحرينيه ولكن! تصدقين الشكل اللي انتي حاطته يمثل حالتي!
|
انا مخطوبه من واحد بره ديرتي
مثلج تقريبا واهلي متفقين معه انه يجيبني كل ثلاث شهور او اربع ادري انها صعبه ولا اكو شي يعوضني عن الام والاب بس انا في شي احسن منج لانه لي اهل او معارف بعد في ديره خطيبي بس مو معنى اقدر استغنى عن ابوي وامي ولا يهمني معيشه وادري انه حياتي الحين احسن من بعدين بس ماهمني غير اهوه انه يحبني وشاريني ويقدرني ويحترمني والحين في وسائل اقدر اواصل مع اهلي اولهم الانترنت اتواصل كل يوم معاهم جنهم معاي وطبعا وكل ماقدرت ازورهم وفي الف وسيله تقدرين تزورينهم ان ماقدر ريلج يوديج وانتي شنو ضمنج بواحد بديرج يسعدج مثل اللي بره ديرتج ؟ فكري قبل كل شي |
عليك بالخطوات التالية:
- هل أحببتي الشاب وأرتاح قلبك له؟ بمعنى آخر هل ترين فيه فارس أحلامك؟ - هل قلبك مرتاح بعد صلاة الاستخارة؟ - هل أنت اجتماعية بحيث تستطيعين التأقلم مع البلد الجديد والحصول على أصدقاء جدد هنالك بسرعة؟ - هل لديك المؤهل العلمي الجيد الذي يخولك للتوظيف لشغل أوقات فراغك... لأنك بالبداية وقبل الحمل والولادة سيكون عندك أوقات فراغ كثيرة وتحتاجين لملئها بشيء مفيد وليس بالشوق والبكاء على الأطلال. الزواج بعيدا عن الأهل له محاسنه ومساوئه... وبإمكانك التغاطي عن المساوئ إن كنت متيمة في حب زوجك ومستفيئة بظله |
حبيبتي توكلي على الله يمكن تعيشين معاه عيشه احسن من لو كان في بلدك استخيري يابعد حيي
|
غاليتي
استخيري الله وان شاء الله بهديكي للقرار السليم وعندي نقطة بحب احكيلك اياها ، انه الست لما تتزوج ، زوجها بكون هو اهلها وناسها ، واذا كان كريم صالح بعوضها عن الاهل والناس ومابتحس بغربة ، كيف لها ان تحس بغربة وهو منها وهي منه، صدقيني اذا هو بحبك وعنده دين وخلق ، ما راح تتندمي على الارتباط به ، وعندك الهاتف والنت ، وبتحاولي تزوري اهلك عدة مرات في السنة ، والمكالمة ثلثين المشاهدة ياخية ، اهم شي انه يكون رجل ذو خلق ودين وشاريكي بالفعل استخيري الله وكرري الاستخارة اكثر من مرة حتى يلهمك الله للقرار السليم اسأل الله ان يفتح لك ابواب الخير ويوفقك لماهو خير لك في الدين والدنيا والاخرة ،والحياة كلها جهاد ياغالية |
والله يا اختي اذا الرجل عنده دين واخلاق ومنيح وبعرف الله (يعني مسلم كتير متمسك بدينه) مو مشكلة لانه المرأة لزوجها بس احسن شي انك تستخيري وتوكلي عالله والله يجيبلك اللي في خير
|
اقتباس:
مآدري آنا راح أتزوج شخص عن غير ديرتي بس العادات والتقاليد نفس الشي لأني بصراحة أحبه وأموت فيه وماأتخيل أني أعيش مع غيره.... وردج خوفني:( وتسلمين عزيزتي هم آنا بحرينية مثلج |
اقتباس:
حبيبتي مريوم بحرينية مثلي وأسمج على أسمي...:22: أنا ما كنت اتمنى أني أخوفج والظاهر أنج مخطوبة ومملوج عليج... يعني مستحييييييييييييييييل أنصحج تتراجعين... توكلي على الله وإن شاء الله يكون حظج أحسن من حظي... والله يديم المحبة بينكم وتفرحون بعيالكم...:14: |
اقتباس:
بعد جبدي والله بنت ديرتي تسلمييييييين حبيبتي هو للحين ماصار أي خطوبة بس أن شاء الله قريب:o :o والله يسعدج ياااااااااارب |
اقتباس:
يغلق بما ان الاخت اتخذت قرارها مع امنياتي لكِ بأن يعوضكش الله خيرا ويوفقك . |
| الساعة الآن 07:36 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©