|
ماذا افعل لاسترد ثقة زوجي
السلام عليكم ورحمة الله وبركاته
مشكلتي سببتها بنفسي لنفسي امس طلعت مع صديقاتي نتعشى في مطعم بدون ما اخبر زوجي ولما اتصل علي سالني انتي في وين قلت له اني ببيت يدتي ما طلعت من وصلتني وسالني وين ولدي عشان اكلمه قلت له ولدك هناك يلعب مع اليهال قالي ليش تجذبين وعقب ثواني عرفت من اختي ان اتصل على امي وسالها عني وقالت له اني رحت السوق على ما خبرتها انه وهاوشني طبعا وانعدمت الثقه فيني وخيرني يا اني ارد بيت ابوي وننفصل واطلع على كيفي يا اني اعيش معاه بدون ما اطلع من البيت الا على المقبره وطبعا هو في باله اشياء ثانيه ابتدى الشك يلعب براسه ويكلمني على اساس اني تحت راسي شي ويقولي يعني انه ما ادري شتسوين من وراي وجم مره جذبتي علي انه ادري اني غلطانه 1000%بس شاسوي (كل بني آدم خطاء) وما بيدي اني ارجع الزمن واصلح غلطتي لو سمحتو عطوني حلول بدون ما تلوموني لاني ادري اني غلطانه ونفسيتي جدا تعبانه ولا تزيدون علي الله يخليكم وجزاكم الله خير |
والله لا اعرف ما اقول لك
والحمدلله انك عارفه غلطتك انتظري لين زوجج يهدا شوي وبعدين اعتذري له وان شاءالله الاخوات والاخوان يساعدونك اختي ا لكريمه مراعاه الكتابه باللغه ا لعربيه الفصحى بارك الله بيك،،، ام اثير |
ما ادري شأقول لك لأنة لو انتي مكانة وتدرين انة كذب عليك بتشكين في الموضوع وبتفقدين الثقة فيه وبتعيشين في دوامة فهذا نفس الشئ اللى قاعد يصير واياه فحاليا أرضى بفكرة انك تعيشين معاه وما تطلعين من البيت ولا تقومين باي حركة تثير شكه فيك اي كانت هالحركة حتى لو من وجهه نظرك بسيطة ...
وحاولي تعتذرين منه بدلع بلحظة صفا وتبررين تصرفك مثل انك تقولين له طلعت وكنت أظن نفسي ما بتأخر من جذي قلت في نفسي ما له داعي أتصل لك ولأني متعودة على طول اذا بغيت اروح مكان اقول لك فلما اتصلت فيني تخربطت ما عرفت شاقول لك من جذي جذبت !!! ونصيحة منى خليها آخر مرة منك هالتصرف (لأنة لو حطيتي نفسك مكان زوجك شنو بيكون موقفك وشنو بيكون شعورك؟؟؟)... |
اولا اختى هدى اعصابك وتعوذى من ابليس
لكل مشكله اكيد فيه حل بعض المشاكل لازم وقت ............................................وان شاء الله تجيب حل اول شى اتقولين زوجك خيرك بين الزعل والانفصال ((( الله يبعده عنا وعنك )))) اوا انك تعيشين معاه وبدون خروج وبدون اى شى ,,,,,,,,,,,,,,,,,,,,,,,,,, الحين اتسوى ليله مصالحه واعتذار دزى له مسج حلو اوا اكتبلى رساله له تعتذرين وقولى له اهم شى عندى رضاءك مش مشكله اطلع اوا اروح اى مكان من يوم زعلت على الدنيا ماتسوى ............. وما الومك حقك على وبغد كذا حتى المشاوير ان شاء الله البسيط منها عند اهلك اوا اهله لازم تتصلين فيه وتعطينه خبر وبطريقه حلوة ((( بس حبيت استسمح منك اذا تسمح لى اروح حتى لو مع امه اوا اخته ))) صدقينى بتتقير الفكره وحتى الى معاك بيحترمونك عندما تكونى هكذا .................................. ولو جينا للحق ترون المراه لاتخرج اى مكان الا وزوجها راضى .........يله كل غلطه بتعليمه ......................... انا ادرى انك نادمه ومتاكده مستحيل تعيدينها ..................... طمنينى عليك وبكون معاك اول باول واى فكره اوا مساعده انا فى الخدمه اختك حتومه |
اذا هو يذكرك بالموقف هذا اعتذري واذا لم تلاحظي عليه اي تغير في تعامله عيشي طبيعي ومع الايام كل شيئ بيصير طبيعي
|
انتي اعتذري له وقولي له ان رضاه هم المهم
وتحملي الاختيار الثاني واعتقد انه بيعاقبك فتره وبعدين بيرجع كل شيء طبيعي الله يصلح حالكم |
أنا من رايي انج تقولين له: " انا الصراحه ماكان قصدي اني اخش عليك بس خفت اني ازعلك لو قلت لك الصج لاني ماأقدر على زعلك انت كلشي عندي بهالدنيا ومابي اشوفك زعلان لاتلومني انت عندي بالدنيا كلها ومااحب اضايق بشي خلاص والله ماكان قصدي اني اخش عليك بس صدقني هذا هو السبب لاني كذبت عليك انا آآسفه " جربي وقولي لي النتيجه :)
|
اعجبني تعليق الاخت ال بحرانية وهو الحل المفضل لدي
واوكد على نصيحتها التي تعني ان كذبتك تكون لاخر مرة اعرف ان كثيرات وقعن في نفس الغلطة بطيب خاطر وتحول الامر الى مشاكل مع ازواجهن كادت ان تنسف العلاقة الزوجية بينهم |
إن لم ينجيك الصدق...فلن ينجيك الكذب
مالك الا أن تصدقيه القول حتي في أدق الأمور ليستعيد الثقة المسلوبة في شئ أنا أعتقد انه ما يستاهل لا تزعلي مني أختي...فأنت أختي |
اقتباس:
:29: هذا هو الكلام الصحيح إعملي به ولن تندمي 0 |
الحل تصاريحنه وتعطينه رقم صديقتك ليتأكد منها وتطلبين منه الصفح
و تؤكيدين له انك جادة بالاعتذار ولن تكرري ما حصل وبوسه على راسه تمسح ما مضى والمسامح كريم تحياتي |
الحل انك تعتذرين وتتحملين تغير زوجك لفتره طويله يمكن وعدم ثقته فيكي بهذي الفتره انتي لازم تكونين بمنتهى
الصدق معاه ولاعاد تطلعين بلبيت بلمره وقوليله اي شي تباه بنفذه بس عشان ترتاح وتسامحني وانا عارفه نفسي الغلط راكبني من فوق لتحت وانا آسفه ........ قوليله هالكلام وان شاءلله يسامحك وانتي تتركين هذي التصرفات |
مشكوين على المشاركه وعلى نصائحكم انه الحمدلله تراضيت مع زوجي بس الي يقهرني فيه انه لحين متمسك برايه وما يبيني اطلع ولا اروح مكان بس انه ما تهمني الطلعه المهم عندي اني اجوف امي وابوي وبس وهو حرمني من جوفتهم اسبوع كامل لكن انه قلت له انه عارفه اني غلطانه وانه راضيه باللي تسويه بس امي مالها ذنب انها ما تجوفني ولا تجوف عيالي وامي صج كانت نفسيته جدا تعبانه اكثر مني وكل يوم تبجي انها ما تجوفني انه وعيالي المهم مع اني صلحت غلطتي مع زوجي بس قلبي وايد شايل عليه لان حرمني من من زياره اهلي ..........................وعلى العموم مشكورين كلكم
|
وليش تشيلين عليه لو أنا منك بحاول قد ماأقدر إني أسترجع ثقته باللي الله يقدرني عليه من كلمه حلوه بين لحظه والثانيه بتدليله بماناداته بكلمات هو يحبها منك .. بطبخه يحبها لكن ماأكودهم كلهم مره وحده .. أحاول ماأخالفه بشي ولا أعترض حتى لو حرمني من أهلى لأنه ماينلام .. حطي نفسك مكانه وشوفي ردت فعلك شلون تصير هو للحين شايل عليج . لاتستعجلين رضاه وهونيها وتهون ..راح تلاقينه بعد يومين كأن ماصار شي حتى أهلك ممكن هم يزورونك .. حاولي يوم تعزمينهم على العشا في البيت وبدل ماتكونين انتي عندهم صاروا عندك .. والله يوفقك ويصلح حالك آمين
|
مشكوه اختي بنحاول على نصيحتج
|
أختي لابد أن الومك جدااااا على هذا الخطأ الجسيم . الحياة الزوجية إذا ما تبنى على الصراحة والوضوح والصدق وإلا تنهار . وما وقعتي فيه هو إستغفال للزوج وأظن ان زوجك طيب جداا جزاه الله خيرا الذي إكتفى بعدم خروجك من البيت مرة ثانية . وإلا الكثير في هذه الحالة يرسل ورقة الطلاق دون مشورة . أرى أن تقدمي له الإعتذار الشديد وتعاهديه عهدا أكيدا عدم العودة لمثل هذا وتكرري الآسف والإعتذار . عسى الله أن يعينه على قبول إعتذارك
جمع الله بينكما على المحبة والحذر الحذر من تكرار هذا الفعل السيء |
مخاوي العز
كلامك صائب 100% وأعتب على الأخت بأنها شايله على زوجها بالعكس أحمدي ربك على أنك على ذمته إلى الآن وأطيعيه في كل ما يأمر به حتى لو كبّل يديك ورجليك كوني صافية القلب تجاهه احسني معاملته فهو لم يسامحك الى الآن وأنك تقضين فترة العقاب الى الأن أشعريه بندمك الشديد ليس لأنه حرمك من أهلك بل لأنك كذبتي عليه وخرجتي بغير أذنه وأشعريه أنك لن ترجعي لذلك ابداً مهما كان العذر تمنياتي لك بزوال مشكلته |
بسم الله الرحمن الرحيم اخواني مخاوي العز إحساس شاعر كلامكم صائب 100% اوافقكم هذا الرأي الصحيح |
انتي قلتي كذا مرة انك غلطتي يعني انك تعرفين انه غلط ومع ذلك اصريتي عليه -نصيحه لك لوجه الله لا تغرك الدنيا وتصدقين تجارب الاخرين وتقولين هالمرة وعديها والحين انتي طحتي بغلط الله يعينك عليه ( شوفي الحين انتي في وضع جدا خطير لان متي ما دخل الشك عند الرجال مستحيل ينمحي إلا بعد مجهود وعمل بياخذ بعض الوقت منك لين تصلحين اللي انتي سويتيه والحل اول حاجة انك تاخذين عهد على نفسك انك ما تخبي اي شيء على زوجك مهما كان ووعديه ان هاذا الغلط لن يتكرر مهما كانت الظروف وثاني شىء حاولي انك دايما تطلعين معاه الاماكن اللي هو شاك فيها ويشوف انها جدا محترمة وثالثا لا تغيبي عنه كل ما حاول يدورك انتي وين وخلي دايما الجوال معاك علشان يطمئن عليك ويرتاد ( وعرفي ان الدنيا ما تسوى مهما وصلتي إذا نهد بيتك وفقدتي زوجك وعيالك - والمسؤلية دايما عند اللة كبيرة يايكون الشخص قدها او لا والله يوفقك ويحفظ اسرتك من المشاكل. تحياتي لك
|
| الساعة الآن 05:57 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©