|
فترة ملجه محيرة
السلام عليكم ورحمة الله تعالي وبركاته
جزاكم الله خير على هالنتدى المفيد وربي يعطيكم الاجر على نيتكم الصالحه من انشاء هالمنتدى موضوعي يا جماعة الخير هو انني مالجه وصارلي خمس شهور وشوي وباقي على عرسي ست شهور وشوي الي احسه ان ريلي مب شرات باقي الرياييل في فترة الملجه طبعا هو تغير بالاول كان حلو ومافي شراتع ابد بس هالشي صار شهر او شهرين وعقب تغي الريال يعني ما احسه يتوله علي ولا انه يشتاقلي ابد الحين صار لنا ثلاث اسابيع ما التقينا وهو عادي عنده يعني مب هامنه ابد المهم الي محيرني انه تغير علي وايد بالاول اذا طلعنا ايود ايدي ولا يودرها والحين ولا يفكر في هالشي مع اني الحمد لله فتاة ملتزمه واملك من الجمال ما يرضي الرجل ولله الحمد وكلامي هذا مب للغرور بس ابيكم تكونون معاي بالصوره انا كلمته بالموضوع وقلتله انه متغير علي وانه ماعاد هو الشخص الي عرفته قبل وصلت لدرجه اني شكيت فيه يمكن يكون احد بحياته غيري بس قالي انه يحبني وانه ما يعرف للمغازل طريج ولله الحمد يا جماعة الخير الي ابيه منكم ادلوني على طريقه اني اخليه يشتاقلي ولا يصبرعلى فراقي ابي من شباب المنتدى انهم يقولولي شو الاشيا الي جذبتهم لحريمهم في فترة الملجه وشو التصرفات الي يحبونها وابي من البنات يعطوني من خبراتهن وافكارهن المبدعه (لا تطلبون مني اني استعيل بالعرس لان هالشي مستحيل ) (هدايا وكلام حلو عطيته يعني مب مقصره من هالناحيه) ان قلتوا انه يستحي بقولكم (لا) لو كان يستحي ما كان في بداية الملجه بيتغزل فيني ولا بيود ايدي جزاكم الله خير وربي يسهدكم ويسخر لكم كل عزيز وغالي ان شاءالله |
مرحبا اختي بس ودي اعرف وش معنى الكلمة هذي( ولا بيود ايدي)
|
بيود يعني بيمسك
اسمحلي اخوي السعودي اختلاف اللهجات جزاك الله خير وانتظر ردك |
اقولك بصراحة لا تحاولي تركضي وراه واتركيه فترة وهو راح يركض وراك وبعدين لما تجلسوا مع بعض ويحاول يراضيكي او يمسك ايدك اتعززي عليه شوي واشعريه انك زعلانه منه
|
جزاك الله خير اخوي خالد
صدقني تركته وتقدر تقول طنشت بس ما تغير شي انت تقولي اذا حاول يمسك ايدي طبعا هذا ما اتوقعه راح ابين اني زعلانه منه وبشوف ان شاءالله بس ان شاءالله يرد الاولي الي اعرفه زين تسلم اخوي على مرورك الطيب |
مساء الخير000
انا اقول يم خليفه تغلي عليه شوي مووايد وبعدي عنه شوي ادري صعبه 0 يمكن هوهاالايام عنده مشكله اوشغله ماخذه تفكيره فعطيه فرصه ولاتحكمين الله العالم بالنيات لاكن اهم شي تكسرين عينه بطيبج وكبرقلبج وهومن روحه بيحس والله يوفجج وياه طول العمر0000 أخوج طاقه الواهس |
آمين ويوفق الجميع ان شاءالله
اخوي طاقة الواهس جزاك الله خير على ردك الطيب الله العالم اني طيبه معاه لابعد الحدود كثر ما يسوي فيني ويطنشني بالعكس اسأل عنه واوصي خواته بالبيت عليه اذا كان مريض وفكرت نفس تفكيرك يمكن هالشي يخليه يتغير ويقول بخاطره الي قاعد اسويه غلط بس ما بين بعينه شي وانا اختك بس الله كريم والحمد لله على كل حال وجزاك الله خير اخوي |
اعذريني اختي مافي الا حل واحد انج تحاجين امج وتوصل الحجي لاهله ويشوفون له حل هذا آخر شي ممكن تسوينه علشان ماتنجبرين عليه وتندمين بالمستقبل والله لايقولها ان شاءالله0
|
تسلم اخوي طاقة الواهس على متابعتك للموضوع
ما ابي اخرب حياتي باني ادخل احد من الاهل لا والله الله يقدرني ان شاءالله واحل المشكله بنفسي مع ريلي من دون تدخل الاهل تدخل الاهل اخر سيله راح اتكون في حل اي مشكله بس ان شاءالله ما نوصل لها باذن واحد احد وريلي انسان طيب ولله الحمد الي متعبني معاه اسلوبه الجاف معاي ان شاءالله ما بيصيبنا الا الي كتبه الله لنا |
لاتستعجلين يأم خليفة كل شيء زين يجي بعد الزواج ..أو في أخر أيام الملكة
هو ممكن عندة مشكلة مأثرة عليه أو تجهيز البيت والاثاث ولوازم الفرح تاخذ كل تفكيره .. ممكن في البداية أنه حاول يتكلم كلام حلو (يتصنع) لكن الكلام الحلو راح يجي أن شاء الله عقب الزواج .. والله يهنيك وياه |
اختي ام خليفة ..
انتي تكلمتي عن تغير خطيبك .. بس ما كلمتينا بشكل عام ... شو تغير في حياتكم .. يعني هل تغير شي في حياته .. في عمله ؟؟ او شيء يخص اهله ..؟؟ وخبرينا بعد .. من ناحيتج انتي .. في شي تغير ؟؟ في اسلوبج .. في تصرفاتج ..؟ او في حياتكم .. ؟ يعني بالمختصر المفيد .. حبيبتي احيانا كلنا نمر باوقات نكون فيها مشغولين لدرجة اننا ننسى الناس اللي حوالينا .. ضعي هذا الاحتمال في بالك قد يكون خطيبك في هذه الفترة مشغول .. او قد يكون هناك تغير من ناحيتك .. نتج عنه تغير من ناحيته هو .. حبيبتي الموضوع كبير جدا .. ومفتاح الحل بيديكم انتو الاثنين .. اللي ابيه منج .. انج تسوين موعد معاه .. بعيد عن كل شي .. وبعد حتى عن المشاعر السلبية (الزعل والعتب ) وابيج تبدين موعدكم بشكل عااااادي جدا تسالينه عن اخباره .. وشغله كيف ماشي .. واهله شو اخبارهم .. وبعديييين ابيج تفتحين معاه هذا الموضووع .. وانج تلاحظين الفترة الاخيرة ان في شي تغير ف حياتكم .. وتقوليله انج تبينه يكلمج عن اللي يحسه .. وعن الي غيره .. وشوي شوي بتعرفين شو في خاطر خطيبج .. وانشالله بتوصلون لحل مناسب .. :) بس تذكري انج تكووونين هادية وتناقشينه بكل هدوووء وعقلانيه .. واتمنى لج التوفيق .. :) اختج القبعة السوداء |
أنصحك بعدم التثاقل عليه وابداء الزعل ’ مثل ما قال بعض الأخوان
والأخوات , فهذه قد تكون مزلقة لا يحمد عقباها , ويكون ردة فعله أشد وهذه طبيعة بعض الرجال , لأنها سيعتبرها مس برجولته , كما يلقن بعض الرجال ذلك , فأنصحك بالكلمة الطيبة والسؤال عن ما يضجره 0 معقول ثقل في أيام الملكة , صعبة على النفس وكسر خاطر , مايفكر في هذا الحل الا جاهل |
السلام عليكم
الاخت ام خليفة اولا مبروك مقدما واسال الله ان يسعدك في حياتك الزوجية أختي الكريمة. .. ان طبيعة الرجل تختلف عن المراة... يعني الزوجة لا يشغلها في حياتها الا زوجها...وتبدا مشتاقه له ولرؤيته.. وللحديث معه.. ولكن الزوج... فحياته مليئة بالاشياء التي يفكر فيها... يعني مشاكل العمل.. ومصاعب الحياة.. وما الى هنالك من امر تشغل باله... واوقات ينغمس في هذه الامور.. الى الدرجة التي تبعده عن السؤال عن زوجته بعض الشي... ومن هنا .. لعل زوجك لديه مشاغل كثيرة.. لا سيما وانه قادم على زواج.. ولابد لها من تكاليف وترتيبات... وربما يكون عنده مشكلة في عمله.. او مع اهله... جعلته يبتعد عنك بعض الشي.. ولكن هذا لا يعني بالضرورة ان مشاعره تغيرت تجاهك... واعلمي انه لو لم يكن يحبك لما تزوجك... بالاضافة الى انه لو كان متضايق منك سيتحدث معك... واذا لاحظ شي فيك لاقدر الله لم يروق له..بامكانه ان ينفصل عنك... قبل ان يدخل بك... الشي الاخر... قلتي انك تمتلكين مواصفات الزوجة من كافة النواحي.. لا سيما وانك ملتزمة وهذا ما يبحث عنه الرجال في هذا الزمن... لذا انا لا اتوقع ان يكون تخميني صحيح .. ولكن قلته من باب التاكيد لك انه يحبك... فالافضل ان لا تشغلي بالك كثيرا.. بموضوع الاشتياق ومسك يديك... اعلمي يا اختي ان كل زوج يشتاق الى زوجته... ولكن وكما قلت احيانا تبعده مصاعب الحياة ويعود مرة اخرى... وكما قلتي انه قبل الملكه كان وضعه غير..يعني الرجل لا يوجد به شي يعيب.... انا اعتقد انها سحابة صيف وستمر ان شاء الله... اوقفي بجانب زوجك.. تقربي منه... حاولتي تتعرفي عن ما يدور في نفسه.. باسلوب هادى وجميل... ومع احترامي لراي البعض الذين قالوا ان تخبري اهله او اهلك... لا انصح بهذا مطلقا... لا زلتم باول الطريق.. ومن غير المعقول من الان تدخلوا الاهل باشياء تخصكم.. بالاضافة الى ان الموضوع لا يستاهل ان ياخذ اكبر من حجمه... اسال الله لك التوفيق.. وشكرا |
اهلين اخت ام خليفه
رأيي لك انه لا يطري على بالك انك تقولين لأهلك او اهله عن الموضوع لأن الرجال منا مايحب البنت اللي كل ما صار شي على طول عند اهلها او اهله هذي نقطه ولكن انتي حاولي انك تثقلين عليه وهو بيجي على وجهه بس اثقلي بمعنى كلمة ثقل قفلي الجوال ولا تردين على اي تلفون واذا طلبك من اهلك على اتلفون صرفيه وسوي زعل بس لا تكثرين عشان لا تقلب جد واذا ما دق احلق شنبي |
تسلم اخوي نواف وجزاك الله الف خير
لو عنده مشكله بالشغل او بالتاثيث انا بعرفه على طول بطريقتي الخاصه بس الحمد لله رب العالمين ميسر الامور |
اخوي ابو رغد لا تييب طاري شنبك لان شكلك راح تضظر تحلقه
لان ريلي حلولت معاه بس :( الحمد لله اختك ام خليفه عاقله ليومك هذا الاهل ما راح ادخلهم باموري الشخصيه الاحسن اني احلها بعون الله وقدرته ان شاءالله |
السلام عليكم ورحمة الله تعالى وبركاته
يا جماعة الخير ويييينكم عطوني حل مناسب بارك الله فيكم ليش الرياييل ما عطوني نصايحهم الي تخلي ريلي يموت فيني وليش ما خبرتوني عن الاشيا الي تعجبكم في الحريم وقت الملجه جزاكم الله الف خير اختكم مكسورة الخاطر ام خليفه |
|
جزاك الله خير اخوي جمر
وتسلم على الوصله |
اظم صوتى الحلو مع اخوانى الاحلى
......... |
مرحبا اختي ...
اولا احب اسألك : هل تصرفه هذا نتج عن ردة فعل !! يعني لما كان في الماضي يتغزل وكما تريدين ... هل كنت متجاوبة معه ام انك كنت ثقيلة معه فاصبح يشعر بانه ثقيل دم او غير مقبول بتصرفاته هذه وبالتالي حب يغير نهجه معاك ويعاملك بثقل كما تفعلين . اذا لم تكن ردة فعل منه فنصيحتي لك هي انك تجلسي معه دون موعد ودون ان يشعر انها جلسة علاج وابدئي بالتحدث معه بشكل اعتيادي وقومي بالتحدث له عن ازواج تعرفينهم او لا تعرفينهم احبوا بعضهم في البداية ولكن بعد ذلك فتر الحب ... وقولي له ان شاء الله ما نكون مثلهم ... واطلبي منه بخفة دم انه يقولك على اشياء تكبر الحب ويجعله يستمر ... انا والحمدلله خاطب ... مرة جلست مع خطيبتي وقلت لها تعالي نلعب لعبة ... والله ما اعرف كيف خطرتلي : المهم قلت لها تعالي نتصارح وكل واحد ايش يحب من الثاني وايش يكره .. وفعلا بديت انا وحكيت لها كل شي مضى وكل شي اريده في المستقبل ...وفعلت هي الشيء نفسه وحكت لي .. الغريب في الامر هو اننا بالرغم من اننا نتكلم عن السلبيات في الطرف الثاني الا انه يتقبلها بكل اريحية وحب واهتمام ... وهذي نقطة مهمة اتمنى تسوينها ... وحاولي تنفذي هذي اللعبة . حذاري انك تبدئي انت بالحركات الجنسية فهذا امر مرفوض من الخطيبة واللي يبدا فيها لازم يكون الخطيب ..اما بعد الزواج فمفيش مشاكل مين يبدا .. ثم حذاري من انك تسايريه وتفعلي اللي يبيه بخصوص الامور الجنسية كلها ... وتتصوري انك بهالشكل تكسبيه .. مو مشكلة القبل والاحضان .. بس مهما يصير لا توصلي معه للجماع ... ديري بالك . نقطة اخيرة : حاولي التعرف على مشاكله عن طريق اخواته واهل بيته ... يمكن يكون هناك امور يخجل انه يكلمك فيها . الله يهدي سركم ويؤلف بين قلوبكم يا رب تحياتي |
اظم صوتى مع صوت نواف عبدالعزيز
ارسل جارى البحث تم البحث .. |
| الساعة الآن 12:33 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©